ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 6
ಮೆಲ್ವಿನ್, ವಿಜ್ಮಿತ್ ಜಾವ್ನ್ ಮಾಗ್ಗಿಬಾಯೆಚ್ಯಾ ಜಾಪಿಕ್ ರಾಕ್ತಾಲೊ. ತಿಚೆ ಥಾವ್ನ್ ಜಾಪ್ ಯೇಂವ್ಕ್ ಚಡ್ ಘಳಾಯ್ ಜಾಲಿನಾ.
"ವೆತಾಯ್ ಜಾಲ್ಯಾರ್ ವಚ್ ಪುತಾ. ಪುಣ್ ಕಾಳೊಕ್ ಪಡ್ಚ್ಯಾ ಆದಿಂಚ್ ಘರಾ ಯೆಯಾ. ಭಂವ್ಡಿ ಮ್ಹಳ್ಯಾರ್ ತುಕಾ ಜೀವ್....." ಮ್ಹಣಾಲಿ ತಿ,
ಮೆಲ್ವಿನಾಕ್ ಸಂತೊಸ್ ದಾಂಬುನ್ ದವರುಂಕ್ ಜಾಲೊನಾ. ಮನಾಂತ್ ಸಂತೊಸಾಚಿಂ ಹಜಾರ್ ಚಿಂತ್ನಾಂ ತೊ ಚಿಂತ್ತಾಲೊ.
"ಜಾಯ್ತ್ ಮಾಂಯ್, ವೆಗಿಂಚ್ ಪಾಟಿಂ ಯೆತಾಂ. ಮೆಲ್ವಿನ್, ಏಕ್ ಮಿನುಟ್ ಬಸ್. ಹಾಂವ್ ನ್ಹೆಸೊನ್ ಆಯ್ಲಿಂ." ಆಶೆಂ ಮ್ಹಣೊನ್ ಚಿತ್ಳಾಬರಿ ತೆಂ ಬಿತರ್ ಧಾಂವ್ಲೆಂ. ಆನಿಂ ಮೆಲ್ವಿನಾಚಿ ದೀಷ್ಟ್ ತಾಂಚ್ಯಾ ಸಾಲಾಚ್ಯಾ ದಾರಾರ್ ಆಸ್ಲ್ಲ್ಯಾಬರಿಚ್, ಜೆಸ್ಸಿಚೆಂ ರುಪ್ಣೆಂ ಥಂಯ್ ದಿಸ್ಲೆಂ. ತ್ಯಾ ಘಡಿಯೆ ತಾಚೆಂ ಕಾಳಿಜ್ ಜಿಮ್ಮ್ ಜಾಲೆಂ. ತಾಂಚೆ ಚ್ಯಾರ್ ದೊಳೆ ಏಕ್ ಜಾಲೆ ಆನಿಂ ಜೆಸ್ಸಿ ಲಜೆಲೆಂ. ಅಪೂರ್ವ್ ಏಕ್ ಕೃತಿ.
ಕಿತ್ಲೆಂ ಸುಂದರ್ ತೆಂ ರೂಪ್. ತೆಂ ಪಿರಿಬರಿ ವಾಡ್ಕುಳೆಂ ಮುಖ್, ಲ್ಹಾನ್ ಕಪಲಾರ್ ಶಿಂಪಡ್ಲೆಲೆ ತೆ ನಾಜೂಕ್ ಮುದಿಯಾಳೆ ಕೇಸ್ ದಾಂತೊಣೆಚ್ಯಾ ಬಾಂದ್ಪಾಸಾಕ್ ಮೆಳಾನಾತ್ಲ್ಲೆ. ಲಿಂಬ್ಯಾಚ್ಯಾ ಬೊಯಾಂಬರಿ ತೆ ನಾಜೂಕ್ ವೋಂಟ್ ನೈಸರ್ಗಿಕ್ ತಾಂಬ್ಸಾಣೆನ್ ಭರ್ಲ್ಲೆ. ತೊಂಡಾರ್ ತೊ ಅಮೃಕೊ ಹಾಸೊ ಆನಿಂ ಪ್ರಕಾಸ್....
ಜೆಸ್ಸಿಚೆಂ ರೂಪ್ ದೆಖೊನ್ ತೊ ಪಿಸ್ವಾಲ್ಲೊ. ಕಾಳಿಜ್ ತಾಚೆಂ ಜ್ಯೋರಾನ್ ಉಡ್ತಾಲೆಂ. ಜೆಸ್ಸಿಚ್ಯಾ ರುಪಾ ಆನಿಂ ತಾಚ್ಯಾ ಕಾಳ್ಜಾ ಮಧೆಂ ಕಸಲೊಗಿ ಸಂದೇಶ್ ದಾಂವ್ತಾಲೊ. ಕಸಲಿಂ ಭೊಗ್ಣಾಂ ತಿಂ! ಜೆಸ್ಸಿನ್ ನ್ಹೆಸ್ಲ್ಲೆಂ ತೆಂ ನ್ಹೆಸಾಣ್.... ಕಾಳೊ ಸಿಲ್ಕಾಚೊ ಬ್ಲಾವ್ಜ್ ಆನಿಂ ತೆಂ ದೊವಾಬರಿ ಧೊವೆಂ ಕಾಪಾಡ್. ನ್ಹೆಸಾಣ್ ಸಾದೆಂ ತರೀ ಜೆಸ್ಸಿಕ್ ತ್ಯಾ ನ್ಹೆಸ್ಣಾನ್ ವರ್ಣುಂಕ್ ನ್ಹಜೊ ತಸಲೊ ಆಲಂಕಾರ್ ದಿಲ್ಲೊ.
"ಮೆಲ್ವಿನ್ ಯಾಗಿ?" ಜೆಸ್ಸಿನ್ ಜಾಗ್ವಯ್ಲೆಂ ತಾಕಾ.
"ಯಾ, ಯಾ.." ಪರ್ತಾನಾತ್ಲ್ಲ್ಯಾ ಜಿಬೆನ್ ತೊ ಉಲಯ್ಲೊ.
ಮಗ್ಗಿಬಾಯೆಕ್ ಸಾಂಗೊನ್ ತಿಂ ದೊಗಾಂಯ್ ಘರಾ ಭಾಯ್ರ್ ಪಡ್ಲಿಂ. ಬತ್ತೇರಿಚಿ ವಾಟ್ ಧರ್ನ್ ಚಲ್ತಾನಾ ಜೆಸ್ಸಿ ವಿಚಾರಿಲಾಗ್ಲೆಂ.
"ಮೆಲ್ವಿನ್, ಟಿಪ್ಪು ಸುಲ್ತಾನಾಚ್ಯಾ ಕೊಟ್ಯಾಕ್ ವಚೊಂಕ್ ಕಿತ್ಲಿ ವಾಟ್ ಆಸಾ?"
"ಏಕ್ ಫರ್ಲಾಂಗ್ ಜಾಯ್ತ್. ಕಿತೆಂ ಚಲೊನ್ ಪುರೊ ಜಾತಾಗಿ?"
"ನಾ ಹಾಬಾ, ಆಮ್ಕಾಂ ಹಳ್ಳೆಂತ್ಲ್ಯಾಂಕ್ ಚಲೊನ್ ಸವಯ್ ಆಸಾ. ಚಡ್ ಚಲೊಂಕ್ ತಾಂಕಾನಾ ಶಹರಾಂತ್ಲ್ಯಾಂಕ್ ಮಾತ್ರ್. ಹಾಂವೆಂ ಆಶೆಂಚ್ ವಿಚಾರ್ಲೆಂ" ಜೆಸ್ಸಿ ಮ್ಹಣಾಲೆಂ.
ಏಕ್ ಕ್ಷಣ್ ರಾವೊನ್ ಮೆಲ್ವಿನಾನ್ ಮ್ಹಳೆಂ - "ಜೆಸ್ಸಿ, ಹಾಂವ್ ಏಕ್ ಸವಾಲ್ ವಿಚಾರ್ತಾಂ. ಬೆಜಾರ್ ಪಾವನಾಂಯ್ ಜಾಲ್ಯಾರ್..."
"ಖಂಡಿತ್ ನಾ....ವಿಚಾರ್."
"ಜೆಸ್ಸಿ," ಮ್ಹಣಾಲೊ ತೊ ಧರ್ಣಿಕ್ ದೀಷ್ಟ್ ಲಾವ್ನ್, "ತ್ಯಾ ದಿಸಾ ಹಾಂವೆಂ ತುಕಾ ಹೊಟೆಲಾಕ್ ಆಪಯಿಲ್ಲ್ಯಾಕ್ ತುವೆಂ ನಿರಾಕರ್ಸಿಲ್ಲೆಂಯ್. ಪುಣ್, ಚಲ್ಯಾ ಸಾಂಗಾತಾ ಭರ್ಸೊಂಕ್ ವ ಉಲಂವ್ಕ್ ತುಕಾ ಲಜ್...."
"ಮೆಲ್ವಿನ್," ಜೆಸ್ಸಿಚ್ಯಾ ತಾಳ್ಯಾಂತ್ ದುಃಖಾಚಿ ಛಾಯಾ ಆಸ್ಲ್ಲಿ, "ಬಹುಶಃ ಹಾಂವೆಂ ತುಜ್ಯಾ ಸಾಂಗಾತಾ ಯೆಂವ್ಚೆಂ ತುಕಾ ಬರೆಂ ದಿಸಾನಾ. ತಶೆಂ ಜಾಲ್ಯಾರ್ ಹಾಂವ್ ಪಾಟಿಂ ವೆತಾಂ" ತಾಚೆಂ ತೊಂಡ್ ಭಾವ್ಲ್ಲೆಂ ಆನಿಂ ಕಾಂಪ್ಚ್ಯಾ ಉತ್ರಾಂನಿ ಪರ್ತ್ಯಾನ್ ತೆಂ ಸುಸ್ಕಾರ್ಲೆಂ - "ಮ್ಹಜಿ ಚೂಕ್ ಜಾಲ್ಯಾರ್...".
ಮೆಲ್ವಿನ್ ಶಿರಿಂ ಸುಕ್ಲೊ. ಆಪ್ಣೆ ವಿಚಾರುಂಕ್ ಚಿಂತ್ಲ್ಲೆಂ ಏಕ್ ಆನಿಂ ಆತಾಂ ಜೆಸ್ಸಿನ್ ಸಮ್ಜಾಲ್ಲೆಂ ದುಸ್ರೆಂಚ್. ತೊ ಕಳ್ವಳ್ಳೊ.
"ನಾ......ನಾ ಜೆಸ್ಸಿ, ಹಾಂವೆಂ ವಾಯ್ಟ್ ಅರ್ಥಾನ್ ತುಕಾ ಹೆಂ ಸವಾಲ್ ಕರುಂಕ್ ನಾ. ತಾಕಾ ಭುಜೊವ್ನ್ ತೊ ಸಾಂಗಾಲಾಗ್ಲೊ. "ತುಂ ಮ್ಹಜ್ಯಾ ಸಾಂಗಾತಾ ಆಯಿಲ್ಲ್ಯಾನ್ ಮ್ಹಾಕಾ ಬೆಜಾರ್ ನ್ಹಂಯ್, ಬಗಾರ್ ಸಂತೊಸ್ಚ್. ನ್ಹಂಯ್ ತರ್, ತುಕಾ ಪಳೆಂವ್ಚ್ಯಾ ಇರಾದ್ಯಾನ್ ಹಾಂವ್ ಹಾಂಗಾ ಯೆತೊಂನಾ.
"ಮ್ಹಾಕಾ ಪಳೆಂವ್ಚ್ಯಾ ಖಾತಿರ್?" ವಿಜ್ಮಿತ್ ಜಾಲ್ಲ್ಯಾ ಸ್ವರಾನ್ ತೆಂ ಉಲಯ್ಲೆಂ, "ಮ್ಹಾಕಾ ಕಿತ್ಯಾಕ್ ಪಳೆಂವ್ಕ್?"
"ದುಸ್ರೆಂ ಕಾಂಯ್ ನ್ಹಂಯ್ ಜೆಸ್ಸಿ". ತೊ ಮ್ಹಣಾಲೊ, "ತುಕಾ ಪಳಯಿಲ್ಲ್ಯಾ ಪಯ್ಲ್ಯಾ ಘಡಿಯೆ, ಮ್ಹಾಕಾ ಕಳ್ಳೆಂಕಿ ತುಂ ಮೊವಾಳ್ ಕಾಳ್ಜಾಚೆಂ ಮ್ಹಣ್. ತುಜಿ ಇಷ್ಟಾಗತ್ ಜೋಡ್ನ್ ದೋನ್ ಸಬ್ದ್ ಉಲಂವ್ಚೊ ಮ್ಹಜೊ ಇರಾದೊ ಆಸ್ಲ್ಲೊ"
ಜೆಸ್ಸಿ ಲಜೆನ್ ತಕ್ಲಿ ಬಾಗಾಯ್ಲಾಗ್ಲೆಂ. ತರೀ ಕಾಳ್ಜಾಂತ್ ತಾಚ್ಯಾ ಸಂತೊಸ್ ಭರ್ಲ್ಲೊ.
"ಜೆಸ್ಸಿ, ಮುಖಾರ್ ಪಳೆ, ತೆಂಚ್ ಟಿಪ್ಪುಚೆಂ ಕೊಟೆಂ"
"ಓ, ಕೆತ್ಲೆಂ ಸೊಭಿತ್! ಆಮಿಂ ಹಾಚ್ಯಾ ವಯ್ರ್ ವಚ್ಯೆತ್ಗಿ ಮೆಲ್ವಿನ್?"
"ಯಾ..ಯಾ" ತಿಂ ದೊಗಾಂಯ್ ಕೊಟ್ಯಾ ವಯ್ರ್ ಚಡ್ಲಿಂ.
"ಓ...ಹಿ ನ್ಹಂಯ್.... ಮುಖಾರ್ ದಿಸ್ತಾ ತೊ ದರ್ಯೊ, ಕಿತ್ಲೊ ಗಂಭೀರ್! ಹಾ, ಕಿತ್ಲಿ ಸುಂದರ್ ದ್ರಶ್ಯಾಂ! ಮೆಲ್ವಿನ್, ದರ್ಯಾ ದೆಗೆರ್ ಕಶೆಂ ವೆಚೆಂ?" ತೆಂ ವಯ್ಲ್ಯಾವಯ್ರ್ ಸವಾಲಾಂ ವಿಚಾರ್ತಾಲೆಂ. ಪಯ್ಲ್ಯಾ ಪಾವ್ಟಿಂ ದರ್ಯೊ ಪಳೆಲ್ಲ್ಯಾನ್ ಸಗ್ಳೆಂಚ್ ಉಲ್ಲಾಸ್ಭರಿತ್ ಜಾಲ್ಲೆಂ ಜೆಸ್ಸಿ.
"ಥಂಯ್ಸರ್ ವಚೊಂಕ್ ದೊಣಿರ್ ವೊಚಾಜಾಯ್. ಆತಾಂ ಸಾಂಜ್ ಜಾಲಿ. ಅನ್ಯೇಕ್ ಪಾವ್ಟಿಂ ಆಮಿಂ ದರ್ಯಾ ದೆಗೆರ್ ಯಾ. ಆಮಿಂ ಆತಾಂ ಥೊಡೊ ವೇಳ್ ಹಾಂಗಾ ಬಸ್ಯಾಂಗಿ ಜೆಸ್ಸಿ?" ಮೆಲ್ವಿನಾನ್ ವಿಚಾರ್ಲೆಂ.
"ಖಂಡಿತ್,ವೊರಾಂ ಸ ಜಾಲಿಂ ಮಾತ್ರ್. ಸಾತ್ ಜಾತಾ ಪರ್ಯಾಂತ್ ಆಮಿಂ ಬಸ್ಯಾಂ. ಸುರ್ಯೊ ಬುಡ್ತಾನಾ ಮ್ಹಾಕಾ ಪಳೆಜಾಯ್"
ತಿಂ ತಶಿಂಚ್ ಬಸೊನ್ ಭಂವ್ತೊಣಿಂಚ್ಯಾ ಪ್ರಕ್ರತೆಕ್ ದೆಖ್ತಾಲಿಂ. ಸುಂದರ್ ಸಾಂಜೆಚೊ ವೇಳ್. ವ್ಹಾಳ್ಚಿ ನ್ಹಂಯ್ ಆನಿಂ ಸೊಬ್ಚೊ ದರ್ಯೊ ಸಂಸಾರಾಕ್ ದೆವಾಚಿ ಪದ್ವಿ ದಾಕೈತಾತ್ ತಶೆಂ ದಿಸ್ತಾಲೆಂ. ಸುರ್ಯೊ ಆತಾಂ ತಾಂಬ್ಡೊ ಜಾವ್ನ್, ಸಗ್ಳ್ಯಾ ದಿಸಾಚೊ ಬೆಸೊರ್ ಕಾಡುಂಕ್ ವಿಶೆವ್ ಘೆಂವ್ಚ್ಯಾರ್ ಆಸ್ಲ್ಲೊ. ತಾಚ್ಯಾ ತಾಂಬ್ಸಾಣೆಕ್ ಭಂವ್ತೊಣಿಚಿಂ ಕುಪಾಂ ಆನಿಂ ಮೊಳಾಬ್ಯಿ ತಾಂಬ್ಡೆಂ ಜಾಲ್ಲೆಂ. ಆನಿಂ ತ್ಯಾ ಕುಪಾಂತ್ಲ್ಯಾನ್ ಸುರ್ಯಾಚಿಂ ಕೀರ್ಣಾಂ ಭುಮಿರ್ ಫಾಂಕ್ತಾನಾ, ಸಂಸಾರ್ಚ್ ತಾಂಬ್ಡೊ ವರ್ಣ್ ದಾಕೈತಾಲೊ. ಆನಿಂ ನ್ಹಂಯಿಂತ್ಲ್ಯಾ ಹಾಲ್ಚ್ಯಾ ಉದ್ಕಾಂತ್ ತಿಂ ನಿಮಾಣಿಂ ಕೀರ್ಣಾಂ ಉಜ್ವಳ್ಚ್ಯಾ ಮೊತಿಯಾಂಬರಿ ದಿಸ್ತಾಲಿಂ. ಘಡಿಯೆ ಘಡಿಯೆ ಪ್ರಕಾಸ್ ವಿವಿಧ್ ರಂಗಾಕ್ ಪರ್ತಾತಾಲೊ. ತಿ ಶಾಂತತಾ, ತೆಂ ಥಂಡ್ ವಾರೆಂ, ತಿ ಮನೋಹರ್ ಘಡಿ. ....ಮೆಲ್ವಿನ್ ಪಿಸೊ ಜಾಲ್ಲೊ. ಜೆಸ್ಸಿ ಸಂಸಾರಾಕ್ಚ್ ವಿಸರ್ಲ್ಲೆಂ.
"ಮೆಲ್ವಿನ್," ಸ್ವಾದೀಕ್ ತಾಳ್ಯಾನ್ ಜೆಸ್ಸಿನ್ ಜಾಗ್ವಯ್ಲೆಂ ತಾಕಾ, "ತುಂ ತಿತ್ಲ್ಯಾ ಉಮ್ಹೆದಿನ್ ಕಸಲೆಂ ಪಳೆಂವ್ಕ್ ಪಡ್ಲಾಯ್? ಹಾಂವೆಂ ಜಾಲ್ಯಾರ್, ದರ್ಯೊ ಪಯ್ಲ್ಯಾ ಪಾವ್ಟಿಂ ಪಳೆಂವ್ಚೊ"
"ನಾ ಜೆಸ್ಸಿ" ತಕ್ಲಿ ಹಾಲವ್ನ್ ಹ್ಯಾ ಸಂಸಾರಾಂತ್ ನಾತ್ಲ್ಲ್ಯಾಬರಿ ಉಲಯ್ಲೊ ಮೆಲ್ವಿನ್, "ದೆವಾಚ್ಯಾ ಹ್ಯಾ ಭೋವ್ ಸುಂದರ್ ಪ್ರಕ್ರತೆಕ್ ಸದಾಂನಿತ್ ಪಳೆಲ್ಯಾರೀ ಉಬ್ಗೊಣ್ ಬೊಗಾನಾ. ತ್ಯಾ ಸುರ್ಯಾಕ್ ಆನಿಂ ದರ್ಯಾಕ್ ಪಳೆತಾನಾ ತುಕಾ ಕಿತೆಂ ಭೊಗ್ತಾ ಜೆಸ್ಸಿ? ಮನಿಸ್ ಕಿತ್ಲೊ ಕಿರ್ಕೊಳ್ ಆನಿಂ ದೆವಾಚಿಂ ತಿಂ ರಚ್ನಾಂ ಕಿತ್ಲೆಂ ಉತ್ತಿಮ್ ಆನಿಂ ತಿಂ ರಚ್ಲ್ಲ್ಯಾ ದೆವಾಚಿ ಅಗಣಿತ್ ಪದ್ವಿ ಕಿತ್ಲಿ ಮ್ಹಣ್ ನಿಯಳ್ನಾಂಗಿ ತುಕಾ?"
ಜೆಸ್ಸಿ ವಿಜ್ಮಿತ್ ಪಾವ್ಲ್ಲೆಂ. ಮೆಲ್ವಿನಾಚ್ಯಾ ತೊಂಡಾ ಥಾವ್ನ್ ತಿಂ ಉತ್ರಾಂ ತಾಣೆಂ ಅಪೇಕ್ಸುಂಕ್ ನಾತ್ಲ್ಲೆಂ. ತೆಂ ತಾಕಾಚ್ ಕಾನ್ ದೊಳೆ ಸೊಡ್ನ್ ಆಯ್ಕೊಂಕ್ ಪಡ್ಲ್ಲೆ.
"ಜೆಸ್ಸಿ" ಮೆಲ್ವಿನ್ ಕಿತೆಂಗಿ ಚಿಂತುನ್ ಉಲಯ್ತಾಲೊ, "ಆಜ್ ಸಂಸಾರಾಚಿ ಸ್ಥಿತಿ ಕಿತೆಂ ಜಾಲ್ಯಾ? ಸಂಸಾರ್ ಆಜ್ ದುಬ್ಳೊ ಆನಿಂ ಗ್ರೇಸ್ತ್ ಮ್ಹಣ್ ದೋನ್ ಪಂಗಡ್ ಜಾವ್ನ್ ವಿಂಗಡ್ಲಾ. ದುಬ್ಳ್ಯಾಚೊ ಪೊಂಡ್ ಗ್ರೇಸ್ತಾನ್ ಬಾಂದ್ಚ್ಯಾ ಬಾಂದ್ಪಾಚೆಂ ಪಂಚಾಗ್, ಜೆಸ್ಸಿ. ಆನಿಂ ತೆಂ ಬಾಂದಾಪ್ ಸಮಾಜಿಚೊ ಅಲಂಕಾರ್. ಕಿತ್ಯಾಕ್, ಸಮಾಜ್ ಆಜ್ ಗ್ರೇಸ್ತಾಂನಿ ಬಾಂದ್ಲ್ಯಾ ಆನಿಂ ದುಬ್ಳೊ ಥಂಯ್ ಅಸ್ಪ್ರಶ್ಯ್ ಜಾಲಾ. ಪಳೆ ತ್ಯಾ ದರ್ಯಾಕ್, ತಾಂತ್ಲ್ಯಾ ಉದ್ಕಾಕ್ ಕೊಣಿ ಮೊಲ್ ದೀನಾ. ಪಳೆ ತಿಂ ಸುರ್ಯಾಚಿಂ ಕೀರ್ಣಾಂ, ದೆವಾನ್ ಫುಂಕ್ಯಾಕ್ ಸಂಸಾರಾಕ್ ದಿಂವ್ಚಿಂ. ತ್ಯಾ ವಸ್ತುಂಕ್ ಕೊಣಿ ಮೊಲ್ ಬಾಂದುಂಕ್ ಸಕಾನಾ. ತೊ ಸುರ್ಯೊ ಲ್ಹಾನ್-ವ್ಹೊಡ್, ಗ್ರೇಸ್ತ್ ದುಬ್ಳೊ ಮ್ಹಣ್ ಬೇದ್ಯಿ ಚಿಂತಿನಾ. ಕಿತ್ಯಾಕ್ ಸಕ್ಟಾಂಕ್ ಸಮಾಸಮ್ ತಿಂ ಕೀರ್ಣಾಂ ಆನಿಂ ಉಜ್ವಾಡ್ ತೊ ವಾಂಟ್ತಾ. ಪುಣ್ ಮನ್ಶಾ ಆನಿಂ ಮನ್ಶಾಂ ಮಧೆಂ ಬೇದ್ ಕೆಲಾ ಮನ್ಶಾನ್. ಹಿ ನೀತ್ ದಿಸ್ತಾಗಿ ತುಕಾ ಜೆಸ್ಸಿ?"
"ತುವೆಂ ಸಾಂಗ್ಚೆಂ ಸಮಾ," ತಕ್ಲಿ ಪಂದಾ ಘಾಲ್ನ್ ಜೆಸ್ಸಿ ಮ್ಹಣಾಲೆಂ. ಮೆಲ್ವಿನಾಚಿಂ ಉತ್ರಾಂ ಜಿರೊಂವ್ಕ್ ಸಕೊಂಕ್ನಾ ತೆಂ.
ತೊ ವ್ಹಳೂ ಹಾಸ್ಲೊ, "ಜೆಸ್ಸಿ, ಹಾಂವ್ ಆಸೊ ಉಲೈಲೊಂ ಮ್ಹಣ್ ಬೆಜಾರ್ ಪಾವಾನಾಕಾ. ಕಿತ್ಯಾಕ್ ಥೊಡ್ಯಾಂ ಪಾವ್ಟಿಂ ಮ್ಹಜ್ಯಾ ಕಾಳ್ಜಾಂತ್ಲಿ ಕೊಡ್ಸಾಣ್ ಭಾಯ್ರ್ ಪಡ್ತಾ. ಕಿತ್ಯಾಕ್ ಜೀವನಾನ್ ಮ್ಹಾಕಾ ಶಿಕಯ್ಲಾಂ ಆನಿಂ ಹಾಸ್ಚ್ಯಾ ಸಂದರ್ಭಾರ್ ನಶಿಬಾನ್ ಮ್ಹಾಕಾ ಜಾಯ್ತ್ಯಾ ಪಾವ್ಟಿಂ ರಡೈಲಾಂ. ಹಾಂವ್ ದುಬ್ಳೊ, ತಾ ಜಿನ್ಸಿಂ ಸಂಸಾರಾಂತ್ ಆಸ್ಚೊ ಜಾಯ್ತೊ ಲೋಕ್ಯಿ ದುಬ್ಳೊ. ಸಬಾರಾಂಕ್ ದಿಸಾಕ್ ಏಕ್ಪಾವ್ಟಿಂ ಜೇಂವ್ಕ್ ಗತ್ ನಾ. ಗ್ರೇಸ್ತಾಂಚ್ಯಾ ಮೆಜಾರ್ ಪಾಡ್ ಜಾಂವ್ಚೆಂ ಉಸ್ಟೆಂ, ಹಜಾರ್ ದುಬ್ಳ್ಯಾಂಕ್ ಪೊಟ್ ಭರುಂಕ್ ಪುರೊ. ಪುಣ್ ತೆಂ ಉಸ್ಟೆಂ, ತಾಣಿ ಪೊಸ್ಲ್ಲೆ ಪೆಟೆಯಿ ಖಾವ್ನ್ ಸಾಂಡ್ತಾತ್ ಜೆಸ್ಸಿ. ಮನಿಸ್ ಸುಣ್ಯಾಚ್ಯಾಕೀ ಫಾಸ್ಟ್ ಸ್ಥಿತೆಕ್ ಪಾವ್ಲಾ. ಮ್ಹಜಿಂ ಉತ್ರಾಂ ತುಕಾ ರುಚ್ತಿತ್ ವ ನಾ ಕೊಣ್ಣಾ. ಪುಣ್ ಥೊಡ್ಯಾ ಪಾವ್ಟಿಂ ಮ್ಹಜೆಸ್ತಕಿಂ ಹಾಂವ್ ಚಿಂತ್ತಾನಾ, ಮ್ಹಾಕಾ ರಡೊಂಕ್ ಯೆತಾ ಜೆಸ್ಸಿ. ಕಿತ್ಯಾಕ್, ಮಾಮೂಲಿ ಬೆಂಕಾಚ್ಯಾ ನವ್ಕರಾನ್ ಆಪ್ಲ್ಯಾ ಪುತಾಕ್ ಶಿಕಾಪ್ ದಿವಯ್ಜಾಯ್ ಜಾಲ್ಯಾರ್ ಜಾಯ್ತೊ ಸಾಕ್ರಿಫಿಸ್ ಕೆಲಾ, ಆನಿಂ ರಗಾತ್ ಆಟೈಲಾಂ"
ತಾಚೊ ತಾಳೊ ಉದ್ವೇಗಾನ್ ಭರ್ಲ್ಲೊ. ನೆಣಾಸ್ತಾನಾ ಜೆಸ್ಸಿಚ್ಯಾ ದೊಳ್ಯಾಂನಿಯಿ ದುಃಖಾಚಿ ಶೆಳ್ ಆಸ್ಲ್ಲಿ. ತಾಣೆಂ ವ್ಹಳೂ ದುಕಾಂ ಪುಸ್ಲಿಂ.
"ಜೆಸ್ಸಿ........ತುಕಾಯಿ ಶಿಕ್ಪಾಕ್ ಮಸ್ತ್ ತೊಂದ್ರೆ ಜಾಲೆಮೂ? ತುಜಿ ಮಾಂಯ್ ಸಾಂಗ್ತಾಲಿ.
"ಕಿತೆಂ ಸಾಂಗ್ತಾಲಿ?"
"ನ್ಹಂಯ್, ಸಾಂಗ್ತಾಲಿ ಇತ್ಲೆಂಚ್," ಹಾಸೊನ್ ತೊ ಉಲಯ್ಲೊ, ಮುಖಾರ್ ಬಿ.ಎ.; ಎಮ್. ಎ.ಗಿ. ವ ದಾಕ್ತೆರ್ನ್ ಜಾಂವ್ಕ್ಗಿ ಆಪೇಕ್ಶಿಲ್ಲ್ಯಾ ಜೆಸ್ಸಿಬಾಯೆಕ್ ಲ್ಹಾನ್ಪಣಿಂಚ್ ಟೀಚರಿಚೆಂ ಕಾಮ್ ಕರ್ಚೆಂ ಪಡ್ಲೆಂ."
ಜೆಸ್ಸಿನ್ ಸಟ್ಟ್ ಕರ್ನ್ ತಕ್ಲಿ ತ್ಯಾ ಕುಶಿಕ್ ಕೆಲಿ. ತಾಚೆಂ ತೊಂಡ್ ಮೆಲ್ವಿನಾನ್ "ಜೆಸ್ಸಿಬಾಯ್" ಮ್ಹಳ್ಳ್ಯಾಕ್ ಲಜೆನ್ ತಾಂಬ್ಡೆಂ ಜಾಲ್ಲೆಂ. ಲಜ್ ಚೆಡ್ವಾಂಕ್ ದೊಡ್ತಿ ಸೊಭಾಯ್ ದಿತಾ ಆನಿಂ ಜೆಸ್ಸಿಕ್ ಕಾಂಯ್ ಹಜಾರ್ ವಾಂಟ್ಯಾನಿ ಚಡ್. ಮೆಲ್ವಿನಾಚಿ ದೀಷ್ಟ್ ಮುಖಾರ್ ಗೆಲಿ ತ್ಯಾ ಗಂಭೀರ್ ಸಾಗೊರಾಚೆರ್. ಸುರ್ಯೊ ಬುಡ್ಚಿ ನಿಮಾಣಿ ಘಡಿ ತಿ. ತಾಂಬ್ಡೊ ಸುರ್ಯೊ.......
ಎಕಾಚ್ಛಾಣೆ ತೊ ಮ್ಹಣಾಲೊ - "ಜೆಸ್ಸಿ, ಆಜ್ ಸಂಸಾರಾಚೆರ್ ದೋನ್ ಸುರ್ಯೊ ಬುಡ್ತಾತ್....."
ಜೆಸ್ಸಿಚಿ ಜಾಪ್ ನಾತ್ಲ್ಲಿ.
"ಏಕ್ ಸುರ್ಯೊ ದರ್ಯಾಂತ್ ಬುಡ್ಲೊ ಆನಿಂ ತಾಂಬ್ಡಿಂ ಕೀರ್ಣಾಂ ತುಕಾ ದೀವ್ನ್ ಗೆಲಾ."
ತೆಂ ಬಿಂಡ್ಡಾಬರಿ ತಾಂಬ್ಡೆಂ ಜಾಲೆಂ - "ಮೆಲ್ವಿನ್...." ಲಜೆನ್ ಮುಖಾರ್ ಉಲಂವ್ಕ್ ತೆಂ ಸಕ್ಲೆಂನಾ. ಮೆಲ್ವಿನಾಚ್ಯಾ ತೊಂಡಾಕ್ ದೀಷ್ಟ್ ವ್ಹೊರೊಂಕ್ ಜೆಸ್ಸಿಕ್ ಜಾಲೆಂನಾ.
"ಸಾಂಗ್ ಜೆಸ್ಸಿ. ಅರ್ಧ್ಯಾರ್ ಕಿತ್ಯಾಕ್ ರಾವಯ್ಲೆಂಯ್?"
"ತುಂ ಇತ್ಲೊ ಹುಶ್ಯಾರ್ ಆಸಾಯ್ ಮ್ಹಣ್ ಹಾಂವೆಂ ಚಿಂತುಂಕ್ ನಾ.."
"ಕಸಲ್ಯಾಂತ್? ಚೆಡ್ವಾಂಕ್ ವರ್ಣುಂಚ್ಯಾಂತ್ಗಿ?"
"ಹ್ಯಾ ಲ್ಹಾನ್ ಪ್ರಾಯೆರ್ ತುಕಾ ಇತ್ಲಿ ಸಮ್ಜೊಣಿ ಆಯಿಲ್ಲಿ ನವಾಲಾಂಚಿ ಗಜಾಲ್" ಕುಡ್ಕ್ಯಾ ಉತ್ರಾಂನಿ ತೆಂ ಉಲಯ್ತಾಲೆಂ. "ಆನಿಂ...ಆನಿಂ ಚೆಡ್ವಾಲಾಗಿಂ ಉಲಯ್ತಾನಾ ತುಕಾ ಲಜ್ ಗೀಜ್ ಕಾಂಯ್ಚ್ ದಿಸಾನಾ. ಹಾಂವ್ ಚಿಂತ್ತಾ ತುಂ...." ಮ್ಹಣೊಂಕ್ ಚಿಂತ್ಲ್ಲೆಂ ಸಂಪೂರ್ಣ್ ಕರುಂಕ್ ಜೆಸ್ಸಿ ಸಲ್ವಾಲೆಂ.
ಆಮ್ರುಕೊ ಹಾಸೊನ್ ಮೆಲ್ವಿನಾನ್ಚ್ ವಾಕ್ಯೆಂ ಮುಖಾರ್ಸಿಲೆಂ. "ಹಾಂ ಸಬಾರ್ ಚೆಡ್ವಾಲಾಗಿಂ ಉಲಯ್ಲಾಂ ಮ್ಹಣ್ ಚಿಂತ್ತಾಯ್ ತುಂ ನ್ಹಂಯ್ಗಿ? ನಾ ಜೆಸ್ಸಿ, ಹೆಂಚ್ ಪಯ್ಲ್ಯಾ ಪಾವ್ಟಿಂ ಎಕಾ ಚೆಡ್ವಾ ಸಾಂಗಾಂತಾ ಹಾಂವೆಂ ಬಸೊನ್ ಆಸ್ಚೆಂ - ತಾಣೆಂ ಫಟ್ ಮಾರ್ಲಿ.
ಜೆಸ್ಸಿನ್ ದೀರ್ಘ್ ಏಕ್ ಶ್ವಾಸ್ ಸೊಡ್ಲ್ಲೊಯಿ ಮೆಲ್ವಿನಾಕ್ ಆಯ್ಕಾಲೊನಾ. ತೊ ಆಪ್ಣೆ ಮಾರ್ಲ್ಲಿ ಫಟ್ ನಿಯಾಳ್ತಾಲೊ. ಭರ್ತಿ ಚೊವೀಸ್ ವರಾಂ ಆದಿಂ ಹ್ಯಾಚ್ ಸುವಾತೆರ್ ಸಿಂತಿಚ್ಯಾ ಸಾಂಗಾಂತಾ ತೊ ಆಸ್ಲ್ಲೊ. ಪುಣ್ ಆತಾಂ.....ಆತಂ ತಾಕಾ ಫಟಿಚ್ಯಾ ಬಗಾರ್ ದುಸ್ರಿ ವಾಟ್ಚ್ ನಾತ್ಲ್ಲಿ.
"ಜೆಸ್ಸಿ....ತುಕಾ ಕೆದಾಳಾ ಕ್ಲಾಸ್ ಪ್ರಾರಂಭ್ ಮ್ಹಣಾಲೆಯ್?"
"ಕಿತ್ಯಾಕ್ ಮ್ಹಣಾಲೊಯ್?" ಮೆಲ್ವಿನಾಚ್ಯಾ ದೊಳ್ಯಾಂಕ್ಚ್ ಪಳೆವ್ನ್ ತಾಣೆಂ ವಿಚಾರ್ಲೆಂ.
"ತುಂ ವ್ಹೊಡೊಲ್ ಸಾಂಗ್ತಾಲೊಯ್ ದರ್ಯಾ ತಡಿರ್ ಯಾ ಮ್ಹಣ್. ಹಾಂವೆಂ ಆಲೋಚೆನ್ ಕೆಲ್ಯಾ ನವ್ಯಾ ವರ್ಸಾ ದಿಸಾ ಆಮಿಂ ಯಾಗಿ ಮ್ಹಣ್. ತ್ಯಾ ದೀಸ್ ಸಬಾರ್ ಜಣಾಂ ಖುಶಾಲಾಯೆ ಖಾತಿರ್ ತಂಡ್ರಬೈಲ್ ವೆತಾತ್"
"ತುಜಿ ಖುಶಿ ಜಾಲ್ಯಾರ್ ಹಾಂವ್ಯಿ ಸಯ್. ಮ್ಹಾಕಾಯಿ ಲಾಗಿಂ ಥಾವ್ನ್ ದರ್ಯೊ ಪಳೆಂವ್ಕ್ ಖುಶಿ ಆಸಾ" ಜಾಪ್ ದಿಲಿ ಜೆಸ್ಸಿನ್, "ಮೆಲ್ವಿನ್, ವೊರಾಂ ಸಾತ್ ಜಾಂವ್ಕ್ ಜಾಲಿಂ ಆಮಿಂ ಘರಾ ಚಲ್ಯಾಂಗಿ?"
ಮೆಲ್ವಿನಾನ್ ಆನಿಕ್ಯಿ ಥೊಡೊ ವೇಳ್ ಬಸೊಂಕ್ ಮನ್ ಆಸ್ಲ್ಲೆಂ. ಪ್ರಕತೆಚಿ ಸೊಬಾಯ್ ನಿಯಾಳ್ಚೊ ಇರಾದೊ ನ್ಹಂಯ್, ಬಗಾರ್ ಜೆಸ್ಸಿಚೊ ತೊ ಸಾಂಗಾತ್. ತ್ಯಾ ಸಾಂಗಾತಾನ್ ತಾಚ್ಯಾ ಮತಿಂತ್ ತುಫಾನ್ ಉಟೈಲ್ಲೆಂ. ಕಾಳ್ಜಾಂತ್ ಆಟೆವಿಟೆ ಉಬ್ಜಾಶೆಂ ಕೆಲ್ಲೆ. ತೊ ಚಿಂತ್ತಾಲೊ, ಏಕ್ ಪಾವ್ಟಿಂ ’ಜೆಸ್ಸಿ, ಹಾಂವ್ ತುಜೊ ಮೋಗ್ ಕರ್ತಾಂ’ ಮ್ಹಣ್ ಸಾಂಗೊಂಕ್. ಪುಣ್ ತಿತ್ಲೆಂ ಧೈರ್ ತಾಚೆ ಥಂಯ್ ನಾತ್ಲ್ಲೆಂ. ಚೆಡ್ವಾಂಚೆಂ ಮನ್ ತಾಂಕಾಂ ರಚ್ಲ್ಲೊ ದೇವ್ಚ್ ನೆಣಾ ಮ್ಹಣ್ತಾತ್. ಭಾಯ್ಲ್ಯಾನ್ ತಿಂ ಏಕ್ ಥರ್ ದಿಸ್ತಾತ್ ಜಾವ್ಯೆತ್, ಪುಣ್ ಅಂತಸ್ಕರ್ನಾಂತ್ ತಿ ಕಶೆಂ ಚಿಂತ್ತಾತ್ ಕೊಣ್ ಜಾಣಾ! ಆಪುಣ್ ಧೈರ್ ಘೆವ್ನ್ ಕಾಂಯ್ ತರೀ ಉಲೈನ್ , ತಾಚೊ ಪರಿಣಾಮ್ ಕಸೊ ರಾವಾತ್? ಥೊಡ್ಯಾ ಸಳಾವಳೆಚೊ ವಾಯ್ಟ್ ಪ್ರಯೋಗ್ ಕೆಲ್ಲ್ಯಾಕ್, ಜೆಸ್ಸಿ ರಾಗಾರ್ ಜಾಯ್ತ್ ಜಾಲ್ಯಾರ್.......ದೆವಾ, ಉಪ್ರಾಂತ್ ತಾಚೆಂ ರಾಗಿಷ್ಟ್ ತೊಂಡ್ ಕೊಣೆ ಪಳೆಂವ್ಚೆಂ? ನಾ, ಜೆಸ್ಸಿಚೊ ಸಾಂಗಾತ್ ಚುಕ್ಚ್ಯಾ ತಿತ್ಲೆಂ ನಿರ್ಭಾಗ್ಪಣ್ ದುಸ್ರೆಂ ನಾ. ತರೀ ಆಪ್ಣಾಚ್ಯಾ ಕಾಳ್ಜಾಂತ್ ಬೊಗ್ಚೆಂ ಹೆ ಆಟೆವಿಟೆ...ಹೆ ಬಾಂದ್ಪಾಸ್ ಕಶೆ ಪರಿಹಾರ್ ಕರ್ಚೆ? ವ್ಹಯ್, ಏಕ್ ಪಾವ್ಟಿಂ ಆಪ್ಣೆಂ ಸ್ವಷ್ಟ್ ಉಲೈಜಾಯ್. ಕಾಳಿಜ್ ಖಾಲಿ ಕರುಂಕ್ ಜಾಯ್. ಜೀಕ್ ವ ಸಲ್ವೊಣಿ....ತರೀಪುಣ್ ತೊ ಸಂದರ್ಭ್ ಕೆದಾಳಾ ಲಾಭಾತ್?
"ಮೆಲ್ವಿನ್, ಹಾವೆಂ ಉಲೈಲ್ಲೆಂ ಆಯ್ಕೊಂಕ್ ನಾಂಗಿ ತುಕ? ಕಿತೆಂ ಚಿಂತ್ತಾಯ್?"
"ಹಾಂ, ಯಾ, ಯಾ ಜೆಸ್ಸಿ," ತೊ ಜಾಗೊ ಜಾಲೊ. ದೊಗಾಂಯ್ ಬತ್ತೇರಿಚಿಂ ಮೆಟಾಂ ದೆಂವೊನ್, ಘರ್ಚ್ಯಾ ವಾಟೆಕ್ ಲಾಗ್ಲಿಂ. ಕಾಳೊಕ್ ಜಾಲ್ಲ್ಯಾನ್ ಮಾರ್ಗಾಚೆ ವೀಜ್ ದಿವೆ ಪೆಟ್ಲ್ಲೆ. ವಾಟೆರ್ ದೊಗಾಂಯ್ ಚಡಿತ್ ಉಲೈಲಿನಾಂತ್.
"ಆಮ್ಚೆಂ ಘರ್ ಆಯ್ಲೆಂ; ಘರಾ ಯೆತಾಯ್ಗಿ? ಜೆವಾಣ್ ಕರ್ನ್ ವಚ್ಯೆತ್" ಜೆಸ್ಸಿ ಮ್ಹಣಾಲೆ.
"ಓ ಥ್ಯಾಂಕ್ಸ್ ಜೆಸ್ಸಿ. ಅನ್ಯೇಕ್ ಪಾವ್ಟಿಂ ಯೆತಾಂ. ಹಾಂವ್ ವೊಚೊಂಗಿ ಜೆಸ್ಸಿ"
"ಬರೆಂ ತರ್. ಫಾಲ್ಯಾಂ ಸಾಂಜೆರ್ ಮೆಳ್ತಾಯ್ಗಿ? ಬತ್ತೇರಿಕ್ ಯಾ"
"ಜರೂರ್. ತುಕಾ ದರ್ಯೊ ಪಳೆವ್ನ್ ಪುರೊ ಜಾಂವ್ಕ್ ನಾ ತರ್? ಗುಡ್ ನಾಯ್ಟ್ ಜೆಸ್ಸಿ"
"ಗುಡ್ನಾಯ್ಟ್.....ಸ್ವೀಟ್ ಡ್ರೀಮ್ಸ್"
ಸ್ವಪ್ಣಾಂತ್ ತರೀ ತುಜೊ ಮೋಗ್ ಜೊಡ್ಚೆ ತಿತ್ಲೆಂ ನಶೀಬ್ ಮೆಳೊಂದಿ ಜೆಸ್ಸಿ’ ಮತಿಂತ್ಚ್ ಚಿಂತುನ್ ತೊ ಘರ್ಚ್ಯಾ ವಾಟೆಕ್ ಲಾಗ್ಲೊ.
ದುಸ್ರ್ಯಾ ದೀಸ್ ತೀಸ್ ತಾರಿಕ್. ನವ್ಯಾ ವರ್ಸಾಕ್ ದೋನ್ಂಚ್ ದೀಸ್ ಉರ್ಲೆಂ. ತ್ಯಾ ಸಾಂಜೆರ್ ತೊ ಜೆಸ್ಸಿಕ್ ಪರ್ತುನ್ ಬೆಟ್ಲೊ. ಆದ್ಲ್ಯಾ ದಿಸಾಬರಿಚ್ ತಿಂ ಸುಲ್ತಾನ್ ಬತ್ತೇರಿಕ್ ಗೆಲಿಂ ಆನಿಂ ಪ್ರಕ್ರತಿಚಿ ಸೊಭಾಯ್ ನಿಯಾಳ್ನ್ ಪಾಟಿಂ ಆಯ್ಲಿಂ. ಘರಾಲಾಗಿಂ ಪಾವ್ತಾನಾ, ಮೆಲ್ವಿನಾನ್ ವಿಚಾರ್ಲೆಂ-
"ಜೆಸ್ಸಿ, ತುಕಾ ಆನಿಂ ಪುಣಿ ನ್ಹಂಯ್ ಆನಿಂ ಪಳೆವ್ನ್ ದಾದೊಶಿ ಜಾಲೆಂಗಿ?"
"ನಾ, ಬಿಲ್ಕುಲ್ ನಾ" ಹಾಸೊನ್ ಜೆಸ್ಸಿನ್ ಜಾಪ್ ದಿಲಿ. "ತುಕಾ ವಿಚಿತ್ರ್ ದಿಸಾತ್ ಮೆಲ್ವಿನ್. ಪುಣ್, ಹಾಂವೆಂ ಸಾಂಗ್ಚೆಂ ಜಾಲ್ಯಾರ್ ದೆವಾಚಿಂ ಸುಂದರ್ ರಚ್ನಾಂ ಮನ್ಶಾಕ್ ದೆಖ್ಲ್ಲ್ಯಾ ತಿತ್ಲಿ ಪಾವನಾ. ಹರ್ಯೇಕಾ ದಿಸಾ ನವ್ಯಾ ನವ್ಯಾ ಥರಾಚಿ ಸೊಭಾಯ್ ಥಂಯ್ ಉಬ್ಜಾತಾ"
"ಖರೆಂ ತುವೆಂ ಸಾಂಗ್ಚೆಂ" ಮೆಲ್ವಿನ್ ಮ್ಹಣಾಲೊ. "ಏಕ್ ಉರ್ಲಾಂ - ದರ್ಯಾ ದೆಗೆರ್ ವಚೊಂಕ್. ಉಪ್ರಾಂತ್ ತುಜಿ ಆಶಾ ಸಂಪೂರ್ಣ್ ಜಾತೆಲಿ. ಜೆಸ್ಸಿ, ತುಜ್ಯಾ ಮಾಂಯ್ ಲಾಗಿಂ ವಿಚಾರ್ಲಾಂಯ್ಗಿ ತುವೆಂ, ನವ್ಯಾ ವರ್ಸಾ ತಂಡ್ರಬೈಲ್ ವೆತಾಂ ಮ್ಹಣ್?"
"ಓ......ತುಂ ಕಾಂಯ್ ದುಬಾವ್ನಾಕಾ. ಮಾಂಯ್ಚಿ ಪ್ರವಣ್ಗಿ ಜರೂರ್ ಮೆಳ್ತೆಲಿ. ಆಮಿಂ ದೊಗಾಂಚ್ ಮ್ಹಣ್ ವಾಯ್ಟ್ ಚಿಂತ್ಚಿ ಮನಿಸ್ ನ್ಹಂಯ್ ತಿ"
"ಕಿತೆಂ ವಾಯ್ಟ್...?" ಜಾಯ್ ಜಾಯ್ ಮ್ಹಣ್ ತಾಣೆಂ ಸವಾಲ್ ಕೆಲೆಂ.
"ನ್ಹಂಯ್...... ಹಾಂವೆಂ ಮ್ಹಣ್ಚೆಂ.." ತಾಕಾ ಲಜೆನ್ ಕಿತೆಂ ಸಾಂಗ್ಚೆಂ ಕಳ್ಳೆ ನಾ. ತೊ ಪ್ರಸ್ತಾಪ್ ಸೊಡ್ನ್ ಮೆಲ್ವಿನ್ ಮ್ಹಣಾಲೊ - "ಬರೆಂ ಜೆಸ್ಸಿ, ಪೊರ್ವಾಂ ದನ್ಪರಾಂ ದೋನ್ ವೊರಾಂಚೆರ್ ತುವೆಂ ನ್ಹೆಸೊನ್ ತಯಾರ್ ಜಾಯ್ಜಾಯ್"
"ಹ..ಹ....." ಅಪುರ್ಬಾಯೆನ್ ಹಾಸ್ಲೆಂ ಜೆಸ್ಸಿ, "ಅನಿಕಿ ಫಾಲ್ಯಾಂಚೊ ಏಕ್ ದೀಸ್ ಆಸಾ. ತುಂ ಆತಾಂಚ್ ಕಾರ್ಯ ಪಟ್ಟಿ ತಯಾರ್ ಕರ್ತಾಯ್. ಫಾಲ್ಯಾಂ ಮೆಳ್ಚಿ ಆಲೋಚನ್ನಾಂಗಿ ತುಕಾ?"
"ಮೆಳ್ತಾಂ, ಮೆಳ್ತಾಂ ಜೆಸ್ಸಿ," ತಾಣೆಂ ಭಾಸ್ ದಿಲಿ, "ಬರೆಂ ತರ್, ಹಾಂವ್ ವೆತಾಂ. ಗುಡ್ ನಾಯ್ಟ್.."
"ಗುಡ್ ನಾಯ್ಟ್.." ಜೆಸ್ಸಿನ್ ಸಾಂಗ್ತಚ್ ತಿಂ ವಿಂಗಡ್ಲಿಂ.
ರಸ್ತ್ಯಾನ್ ಚಲ್ತಾನಾ ಮೆಲ್ವಿನ್, ಪೊರ್ವಾಂ ಕಿತೆಂ ಕರ್ಚೆಂ...ಕಶೆಂ ಚಲ್ಚೆಂ.....ನಿಯಾಳ್ ಕರ್ತಾಲೊ. ತ್ಯಾ ದಿಸಾ ಸಗ್ಳೊ ಖರ್ಚ್ ಆಪ್ಣೆಂಚ್ ಪಳೆಜಾಯ್. ಪುಣ್, ಖರ್ಚಾಕ್ ಪಯ್ಶೆ...ಪಯ್ಶೆ ತಾಚಿ ಝಿಂಟ್ ಉಡ್ಲಿ. ಆಂಟಿನ್ ಬೊಂಬಯ್ ವೆತಾನಾ ದಿಲ್ಲೆ ಧಾ ರುಪಯ್ - ತಾಚಿ ವಿಸರ್ಚ್ ಪಡ್ಲ್ಲಿ ತಾಕಾ. ಕಲ್ಸಾಂವಾಚ್ಯಾ ಬೊಲ್ಸಾಂತ್ ನೋಟ್ ತಾಣೆಂ ದವರ್ಲ್ಲೊ ಆನಿಂ ನ್ಹೆಸ್ಲ್ಲೆಂ ಕಲ್ಸಾಂವ್ ಘಡಿ ಕರ್ನ್ ಪೆಟೆಂತ್ ದವರ್ಲ್ಲೆಂ.....ನೋಟ್ ಆಸಾಗಿ ನಾ? ನಾಜಾಲ್ಯಾರ್....? ತೊ ಆತಾಂ ತುರ್ತಾಚಿಂ ಮೆಟಾಂ ಕಾಡುಂಕ್ ಲಾಗ್ಲೊ. ಆನಿಂ ಘರಾಚಿಂ ಮೆಟಾಂ ಕಾಡುಂಕ್ ಲಾಗ್ಲೊ. ಆನಿಂ ಘರ್ ಲಾಗಿಂ ಯೆತಾನಾ ನಿಜಾಕಿ ತೊ ಧಾಂವ್ತಾಲೊ.
"ಅರೇ, ಕಿತೆಂ ಧಾಂವೊನ್ ಯೆತಾಯ್ರೆ?" ಜಿಲ್ಲಿಬಾಯ್ ಪುತಾಕ್ ಪಳೆವ್ನ್ ಮ್ಹಣಲಿ.
ಆವಯ್ಕ್ ಜಾಪ್ ದೀನಾಸ್ತಾಂ ತೊ ಶೀದಾ ಆಪ್ಲ್ಯಾ ಕುಡಾಕ್ ಗೆಲೊ. ಆನಿಂ ಕೊಂಬಿಯೆ ಪಿಲಾಕ್ ಝೊಂಪಯ್ ಮಾರ್ಚ್ಯಾ ಘೊಣಿಬರಿ ಪೇಟ್ ಉಗ್ತಿ ಕರ್ನ್ ಕಲ್ಸಾಂವಾಚ್ಯಾ ಬೊಲ್ಸಾಂತ್ ತಾಣೆಂ ಹಾತ್ ಘಾಲೊ. ದುಸ್ರ್ಯಾ ಘಡಿಯೆ ಶ್ವಾಸ್ ಸೊಡ್ಲೊ ಮೆಲ್ವಿನಾನ್. ನೋಟ್ ತಸೊಚ್ ಆಸ್ಲ್ಲೊ.
"ಮೆಲ್ವಿನ್ ಸೊದ್ತಾಯ್ ಕಿತೆಂ? ಕಿತೆಂ ತುಜಿ ಅವಸ್ಥಾ?" ಪುತಾಚ್ಯಾ ಪಾಟ್ಲ್ಯಾನ್ಂಚ್ ಧಾಂವೊನ್ ಆಯಿಲ್ಲಿ ಜಿಲ್ಲಿಬಾಯ್ ವಿಚಾರ್ತಾಲಿ.
ತಾಣೆಂ ಜಾತಾ ತಿತ್ಲ್ಯಾ ಚಲಾಕೆನ್ ಜಾಪ್ ದಿಲಿ - "ಮಾಂಯ್ , ಗರ್ಜೆಚೆಂ ಕಾಗಾದ್ ಬೊಲ್ಸಾಂತ್ ಆಸ್ಲ್ಲೆಂ ತೆಂ ವಿಸ್ರೊನ್ಂಚ್ ಗೆಲ್ಲೊಂ.
"ಓ....... ತೆಂಚ್ಗಿ? ತಾಕಾ ಇತ್ಲೊ ಉಚಾಂಬೊಳ್ ಜಾವ್ನ್ ದಾಂವ್ತಾಲೊಯ್ಗಿ? ನ್ಹಂಯ್, ವಿಚಾರ್ಲ್ಲ್ಯಾ ಸವಾಲಾಕ್ ಜಾಪ್ ದಿಂವ್ಚ್ಯಾ ತಿತ್ಲೆಂ ಸಮಾಧಾನ್ ತುಕಾ ನಾ" ಆಶೆಂ ಸಾಂಗೊನ್ ತಿ ಬಿತರ್ ಚಲ್ಲಿ.
ತಾಣೆಂ ಸಮಾಧಾನೆನ್ ತೊ ನೋಟ್ ಪೆಟೆಂತ್ ದವರ್ಲೊ ಆನಿಂ ರಾಕ್ಲ್ಲ್ಯಾ ದೆವಾಕ್ ಮತಿಂತ್ಚ್ ಅರ್ಗಾಂ ದಿಲಿಂ.
ದುಸ್ರ್ಯಾ ದಿಸಾ ಸಾಂಜೆರ್ ಪರ್ತುನ್ ಜೆಸ್ಸಿಗೆರ್ ತೊ ಗೆಲೊ. ತ್ಯಾ ದೀಸ್ ತಿಂ ನ್ಹಂಯ್ ದೆಗೆರ್ ಗೆಲಿಂನಾಂತ್. ಫಾಲ್ಯಾಂ ನವೆಂ ವರ್ಸ್ ಯೇಂವ್ಕ್ ಆಸ್ಲ್ಲ್ಯಾನ್ , ಜೆಸ್ಸಿಕ್ ಘರಾ ರಾಟಾವಳ್ ಆಸ್ಲ್ಲಿ. ಮೆಲ್ವಿನಾನ್ ಫಾಲ್ಯಾಂಚಿ ಮಾಂಡಾವಳ್ ಸಗ್ಳಿ ಸಾಂಗ್ಲಿ ಆನಿಂ ಕಾಳೊಕ್ ಪಡ್ಚ್ಯಾ ಆದಿಂ ತೊ ಘರಾ ಆಯ್ಯ್ಲೊ.
"ಮಾಂಯ್" ತಾಣೆಂ ಆವಯ್ಕ್ ಆಪಯ್ಲೆಂ. "ಫಾಲ್ಯಾಂ ನವೆಂ ವರ್ಸ್ ನ್ಹಂಯ್ವೆ? ಹಾಂವೆಂ ದರ್ಯಾ ತಡಿಕ್ ವಚೊಂಕ್ ಚಿಂತ್ಲಾಂ"
"ದರ್ಯಾ ತಡಿಕ್!" ಹಾಂಕ್ರೆಲಿ ಜಿಲ್ಲಿಬಾಯ್, "ನಾಕಾ ನಾಕಾ ಮ್ಹಜ್ಯಾ ಸೊಮಿಯಾ, ಭೊಗೊಸ್ ಮ್ಹಾಕಾ. ಬರ್ಯಾನ್ ಸಾಂಗ್ತಾಂ ತುಕಾ. ತ್ಯಾ ದರ್ಯಾತಡಿಕ್ ವೊಚೊನ್, ಮಾಗಿರ್ ಉದ್ಕಾಂತ್ ನ್ಹಾವ್ನ್, ನಾಕಾ ಜಾಲ್ಲೆಂ ಖರ್ಗ್ ಹಾಡ್ಚೆಂ ನಾಕಾ. ಜಿವಾಚಿ ಆಶಾ ನಾ ತುಮ್ಕಾಂ. ತುವೆಂ ಬಿಲ್ಕುಲ್ ವೆಚೆಂ ನಾಕಾ"
ತೊ ಹಾಸ್ಲೊ. " ಮಾಂಯ್ ತುಂ ಇತ್ಲಿ ಘಡ್ಬಡಿ ಕಿತ್ಯಾಕ್ ಕರ್ತಾಯ್? ದರ್ಯಾ ದೆಗೆರ್ ವೆತಾಂ ಮ್ಹಣ್ತಾನಾ, ಉದ್ಕಾಂತ್ ಉಡಿ ಮಾರುಂಕ್ ವೆತಾಂ ಮ್ಹಣ್ ಲೆಕ್ತಾಯ್ಗಿ? ಜಿವಾಚಿ ಆಶಾ ಬರಿ ಆಸಾ ಮ್ಹಾಕಾ"
"ಮಾಗಿರ್ ಕಿತ್ಯಾಕ್ ವೆತಾಯ್ರೆ?"
"ಆಶೆಂಚ್, ಖುಶಾಲಾಯೆ ಖಾತಿರ್, ಫಾಲ್ಯಾಂ ಕಿತ್ಲೊ ಲೋಕ್ ತಂಡ್ರಬೈಲ್ ವೆತಾ ಜಾಣಾಂಯ್ಗಿ? ಮ್ಹಜೆ ಈಷ್ಟ್ಯಿ ಆಸ್ತೆಲೆ"
"ಖುಶಿ ಆಸ್ಲ್ಲ್ಯಾ ಬರಿ ಕರ್. ತುಕಾ ಸಾಂಗ್ಲ್ಲೆಂ ನಾಟ್ವನಾ. ಉದ್ಕಾಂತ್ ಪುಣಿ ದೆಂವಾನಾಕಾರೆ" ತಿ ಸಾಂಗಾಲಾಗ್ಲಿ.
"ಖಂಡಿತ್ ನ್ಹಾಂವ್ಕ್ ವಚಾನಾ ಮಾಂಯ್. ಹೆಂ......" ಮೆಲ್ವಿನಾನ್ ತಕ್ಲಿ ಖೊರ್ಪುನ್ ವಿಚಾರ್ಲೆಂ, "ನತಾಲಾಂ ಫೆಸ್ತಾಚೊ ಕುಸ್ವಾರ್ ಉರ್ಲಾವೆ?"
"ವ್ಹಯ್. ಚೆಡ್ಯಾಕ್ ಕಿತೆಂ ಕುಸ್ವಾರಾಚಿ ಆಶಾ ಆಯ್ಲಿ ಹಾಬಾ?" ವಿಜ್ಮಿತ್ ಜಾಲಿ ತಿ. "ಹರ್ಶೆಂ ಬಲತ್ಕಾರ್ ಕೆಲ್ಯಾರಿ ಚಡ್ ಖೆಲ್ಯಾರ್ ಜಿರ್ವೊಣೆಕ್ ಪಾಡ್ ಮ್ಹಣ್ ಉಪಾದೆಸ್ ಸಾಂಗ್ತಾಲೊಯ್. ಜಾಯ್ ಜಾಲ್ಯಾರ್ ಖಾ"
"ಆಜ್ ನ್ಹಂಯ್ ಮಾಂಯ್, ಫಾಲ್ಯಾಂ ದರ್ಯಾ ದೆಗೆರ್ ವೆತಾನಾ ವರೊಂಕ್"
"ನಾಕಾ ನಾಕಾ, ತಿತ್ಲಿ ಗರ್ಜ್ ನಾ. ಕೊಣಾ ಕೊಣಾಚೆ ಆಂಯ್ಡೆ ಪಳೆವ್ನ್ ಖಾಂವ್ಚ್ಯಾ ಬದ್ಲಾಕ್ ಹಾಂಗಾಚ್ ಖಾವ್ನ್ ವಚ್. ಚೆಡ್ಯಾಕ್ ಕಿತೆಂ ಮಾನ್ - ಮಾಣ್ಸುಗಿ ಏಕೀ ನಾ?"
"ಮಾಂಯ್" ಪರಾತ್ತಿಲೆಂ ಮೆಲ್ವಿನಾನ್, "ಮ್ಹಜೆಂ ಥೊಡೆ ಈಷ್ಟ್ ಆಸ್ತೆಲೆ ಮಾಂಯ್. ತಾಂಚ್ಯಾ ಖಾತಿರ್ ಪುಣಿ..."
"ಇಷ್ಟಾಂಕ್? ಥುತ್ತ್ ತುಜ್ಯಾ ಚರ್ಬೆ!"
ಜಿಲ್ಲಿಬಾಯೆನ್ ಬೋಬ್ ಮಾರ್ಲಿ. ಈಷ್ಟಾಂಕ್ ಕಿತೆಂ ತಾಂಚ್ಯಾ ಘರಾಂನಿ ತಯಾರ್ಸಿಲ್ಲೊ ಕುಸ್ವಾರ್ ನಾಂಗಿ? ಮ್ಹಳ್ಯಾರ್, ತುವೆಂ ವರ್ನ್ ತಾಂಕಾಂ ಖಾವೈಜಾಯ್ ಮ್ಹಣ್ ಚಿಂತ್ಲಾಯ್ ದಿಸ್ತಾ? ನಾಕಾರೆ ಪುತಾ. ತಸಲಿ ಶಿಫಾರಾಸ್ ಆಮ್ಕಾಂ ನಾಕಾ".
ಮೆಲ್ವಿನಾಕ್ ಇಲ್ಲೊ ರಾಗ್ ಆಯ್ಲೊ, "ತುಂ ದಿತಾಯ್ ಜಾಲ್ಯಾರ್ ದಿ ಮಾಂಯ್, ನಾ ಜಾಲ್ಯಾರ್ ನಾಕಾ. ತುಜ್ಯಾ ಲಾಗಿಂ ತರ್ಕ್ ಕರುಂಕ್ ಮ್ಹಾಕಾ ಸೈರಾಣ್ ನಾ. ಕಿತೆಂ ಸಾಂಗ್ಲ್ಯಾರಿ ಬಾಯ್ಲ್ ಮನ್ಶಾಂಚೆಂ ಪೀಕಲಾಟ ಆಸಾಚ್. ತುಮ್ಕಾಂ ಖಂಯ್ಚ್ಯಾ ದೆವಾನ್ ಅರ್ಧಿ ಬೂದ್ ದಿಲ್ಯಾಗಿ!"
ಜಿಲ್ಲಿಬಾಯೆಕ್ ಮತಿಂತ್ಚ್ ಹಾಸೊ ಆಯ್ಲೊ. ಪುತಾಕ್ ಜಾಪ್ ದೀನಾಸ್ತಾಂ ತಿ ಶೀದಾ ಬಿತರ್ ಚಲ್ಲಿ. ಪುಣ್ ಮೆಲ್ವಿನ್ ಸ್ವಷ್ಟ್ ಜಾನಾಸ್ಲೊ, ಆವಯ್ನ್ ಆಜ್ ಆಶೆಂ ಮ್ಹಳ್ಯಾರಿ ಫಾಲ್ಯಾಂ ತಿ ಖಂಡಿತ್ ಕುಸ್ವಾರ್ ಬಾಂದುನ್ ದಿತೆಲಿ ಮ್ಹಣ್.
ಕಾಳೊಕ್ ಚಡೊನ್ ಯೇವ್ನ್, ಹರ್ಯೇಕ್ ಘಡಿ ಪಾಶಾರ್ ಜಾತಾನಾ ಮೆಲ್ವಿನಾಚ್ಯಾ ಕಾಳ್ಜಾಂತ್ ಉದ್ವೇಗ್ ಆರಂಭ್ ಜಾಲೆ. ಫಾಲ್ಯಾಂ ಉದೆಂವ್ಕ್ ಆಸ್ಚ್ಯಾ ದಿಸಾ ತಾಚ್ಯಾ ಜೀವನಾಂತ್ಲೆಂ ಮಹತ್ವಾಚೆಂ ಕಾಮ್ ಜ್ಯಾರಿ ಜಾಯ್ತ್ಗಿ? ಜೆಸ್ಸಿ ಕಡೆ ಆಪ್ಲೊ ಮೋಗ್ ಉಚಾರುಂಕ್ ಸಂದರ್ಭ್ ಮೆಳಾತ್ಗಿ? ತೆಂ ಆಪ್ಲೊ ಮೇಗ್ ಕರಿತ್ಗಿ? ಹಜಾರ್ ಚಿಂತ್ನಾಂನಿ ಮಗ್ನ್ ಜಾಲ್ಲ್ಯಾ ತಾಕಾ ನೀದ್ ಪಡ್ತಾನಾ ಮಸ್ತ್ ವೇಳ್ ಜಾಲ್ಲೊ. ಸಕಾಳಿಂ ತಾಕಾ ಜಾಗ್ ಜಾತಾನಾ ಉಜ್ವಾಡ್ಲ್ಲೆಂ.
ಬುಡ್ಲ್ಲೊ ಸುರ್ಯೊ ಪರ್ತ್ಯಾನ್ ಉದೆಂವ್ಚೊ ಪ್ರಕ್ರತೆಚೆಂ ನಿಯಮ್. ಪುಣ್ ಆಯ್ಚೆಂ ಸಕಾಳ್ ಮೆಲ್ವಿನಾಕ್ ನವೊ ಸಂದೇಶ್ ಹಾಡ್ನ್ ಯೆತಾಶೆಂ ದಿಸ್ಲೆಂ. ಸಕಾಳಿಂಚ್ಯಾ ತ್ಯಾ ಸ ವೊರಾಂಚೆರ್ ತಾಕಾ ಜಾಗ್ ಜಾತಾನಾ, ಏಕ್ ಘಡಿ ಆಳ್ಸಾಯೆನ್ ನಿದ್ಲೊ ತೊ. ಭಾಯ್ರ್ ಸುಕ್ಣಿಂ ರಂಗೀನ್ ತಾಳ್ಯಾನ್ ಗಾಯನ್ ಕರ್ತಾಲಿಂ. ಸುಪ್ರಭಾತ್.....ಸಂತೊಸಾನ್ ತಾಚೆಂ ಕಾಳಿಜ್ ಉಡ್ಲೆಂ. ತೊ ಹಾಂತುಳ್ನ್ ವಯ್ಲೊ ಉಟೊನ್ ಜನೆಲಾಲಾಗಿಂ ಆಯ್ಲೊ. ಕಸಲಿ ಮನೋಹರ್ ಘಡಿ. ಉದೆಂತಿ ಕುಶಿಂ ದೊಂಗ್ರಾಚ್ಯಾ ಇಡ್ಯಾಂನಿ ವಯ್ರ್ ಸರೊನ್ ಆಯಿಲ್ಲೊ ರವಿರಾಯ್. ತಿಂ ತರ್ನಿಂ ಕೀರ್ಣಾಂ ತಾಂಬ್ಡ್ಯಾ ರಂಗಾನ್, ಅಂತ್ರಳ್ ಆನಿಂ ಭುಮಿ ಸೊಭಾಯ್ತಾಲಿ. ರಾತಿಂ ಥೊಡೊ ದೋವ್ ಪಡ್ಲ್ಲ್ಯಾನ್ ಭಾಯ್ಲ್ಯಾ ರೂಕ್ - ಝಾಡಾಂಚ್ಯಾ ಪಾನಾಂಚೆರ್ ಉದ್ಕಾಚೆ ಥೆಂಬೆ ನಿಶೆತಾಲೆ ಆನಿಂ ತಾಂಬ್ಡಿ ಕೀರ್ಣಾಂ ತ್ಯಾ ಥೆಂಬ್ಯಾಂಚೆರ್ ಫಾಂಕ್ತಾನಾ, ಮೊತಿಯಾಂಬರಿ ದಿಸ್ತಾಲಿಂ. ಹೆಂ ನೀಜ್ ವ ಫಟ್..? ವಿಜ್ಮಿತ್ ಜಾಲ್ಲ್ಯಾ ಮೆಲ್ವಿನಾನ್ ದೊಳೆ ಘಸ್ಟಿಲೆ. ಕ್ಷಣಾನ್ ತಿ ಸೊಭಾಯ್ ನಾಶ್ ಜಾಲಿ. ಆತಾಂ ಸುರ್ಯೊ ವಯ್ರ್ ಚಡೊನ್ ಯೆತಾನಾ, ಮೊಳಾಬ್ ಶುಭ್ರ್ ಜಾಲೆಂ ಆನಿಂ ಬಾಂಗಾರಾ ವರ್ಣಾಕ್ ಬದಲ್ಲೆಂ.
ನವೆಂ ವರ್ಸ್. ಪೊರ್ನೆಂ ಸರ್ಲ್ಲೆಂ ಆನಿಂ ನವೆಂ ಉದೆಲ್ಲೆಂ. ಸಂಸಾರಾಚೆಂ ನಿಯಮ್ ತೆಂ. ಪಾಶಾರ್ ಜಾಲ್ಲಿ ಹರ್ಯೇಕ್ ಘಡಿ ಪೊರ್ನಿ ಜಾತಾಲಿ ಆನಿಂ ಮನಿಸ್ ಪಳೆತಾಲೊ ನವ್ಯಾಕ್. ಆನಿಂ ಮೆಲ್ವಿನ್, ತಾಚ್ಯಾ ವಾಂಟ್ಯಾಕಿ ಉದೆಲ್ಲೆಂ ಹೆಂ ನವೆಂ ವರ್ಸ್ ಜೀವನಾಚೆಂ ಮಹಾಭಾಗ್ ಹಾಡ್ನ್ ಯೇವ್ನ್ ಆಸ್ಲ್ಲೆಂಗಿ? ತೊ ವಿಜ್ಮಿತ್ ಆನಿಂ ಚೀಂತೆಸ್ತ್ ಜಾವ್ನ್ ಭಾಯ್ರ್ ತಿಳ್ತಾಲೊ.
"ಮೆಲ್ವಿನ್, ಅನಿಕೀ ನಿದೊನ್ ಆಸಾಯ್ರೆ ಕಿತೆಂ? ಮೀಸ್ ಸುರು ಜಾಂವ್ಚೊ ವೇಳ್ ಜಾಲೊ. ನವೆಂ ವರ್ಸ್ ಬರ್ಯಾನ್ ಆರಂಭ್ ಕರ್ಚಿ ಆಲೋಚನ್ ನಾಂಗಿ ತುಕಾ? ಚಲ್, ಭಾಯ್ರ್ ಸರ್" ಜಿಲ್ಲಿಬಾಯೆನ್ ಬೋಬ್ ದಿಲಿ.
ತಾಣೆಂ ಸರಾರಾಂ ತೊಂಡ್ ಧುಲೆಂ. ಆವಯ್ನ್ ದಿಲ್ಲಿ ಕಾಫಿ ಪಿಯೆಲೊ ಆನಿಂ ದರ್ವಡ್ಯಾನ್ ನ್ಹೆಸ್ಲೊ. ಮೀಸ್ ಪ್ರಾರಂಭ್ ಜಾಂವ್ಚ್ಯಾ ಆದಿಂಚ್ ಕಶೆಂಯಿ ಇಗರ್ಜೆಕ್ ತೊ ಪಾವ್ಲೊ.
ದಾರ್ವಾಟ್ಯಾ ಕಡೆ ಉಬೊ ರಾವ್ಲ್ಲ್ಯಾ ತಾಣೆಂ ಬಾಯ್ಲ್ ಮನ್ಶಾಂಚ್ಯಾ ಕುಶಿಕ್ ದೀಷ್ಟ್ ವ್ಹೆಲಿ. ಅತುರಾಯೆನ್ ದೆಖ್ಚ್ಯಾ ಮೆಲ್ವಿನಾಕ್ ಜೆಸ್ಸಿಕ್ ಸೊಧುಂಕ್ ಕಷ್ಟ್ ಮಾರ್ಲೆನಾಂತ್. ಎಕಾ ಕೊನ್ಶಾಕ್ ದಿಂಬಿ ಘಾಲ್ನ್ ತೆಂ ಧ್ಯಾನಾಕ್ತ್ ಜಾಲ್ಲೆಂ. ಮೆಲ್ವಿನಾನ್ ಏಕ್ ದೀರ್ಘ್ ಶ್ವಾಸ್ ಸೊಡ್ಲೊ.
ಕುಮ್ಗಾರಾಕ್ ಲೋಕ್ ಭರ್ನ್ ಆಸ್ಲ್ಲ್ಯಾನ್ ಸಾಂಗಾತಾಚ್ ಪೆಸ್ತ್ ಮೀಸ್ ಜಾಲ್ಲ್ಯಾನ್, ತಡವ್ ಕರ್ನ್ಂಚ್ ಮೀಸ್ ಸಂಪ್ಲೆಂ. ಮೆಲ್ವಿನ್ ಇಗರ್ಜೆ ಭಾಯ್ರ್ ಯೆತಾನಾ, ಜೆಸ್ಸಿಯಿ ದುಸ್ರ್ಯಾ ದಾರಾ ಥಾವ್ನ್ ಭಾಯ್ರ್ ಆಯ್ಲೆಂ. ದೊಗಾಂಯ್ಚಿ ದೀಷ್ಟ್ ಎಕಾಮೆಕಾಚೆರ್ ಪಡ್ತಾನಾ, ತೊಂಡಾಂ ಅಮ್ರುಕೊ ಹಾಸೊ ಹಾಸ್ಲಿಂ.
"ಬರೆಂ ನವೆಂ ವರ್ಸ್ ತುಕಾ....." ಜೆಸ್ಸಿ ಲಾಗಿಂ ಯೇವ್ನ್ ಮ್ಹಣಾಲೆಂ.
"ತುಕಾಯಿ ಜೆಸ್ಸಿ.." ತಾಚ್ಯಾ ಹಾತಾಕ್ ಆಪ್ಲೊ ಹಾತ್ ಮೆಳಯ್ಲೊ ತಾಣೆಂ.
"ತುಂ ಆಜ್ ಮೀಸಾಕ್ ಯೇಂವ್ಕ್ನಾಂಯ್ ಮ್ಹಣ್ ಚಿಂತ್ಲ್ಲೆಂ ಹಾಂವೆಂ. ಇಗರ್ಜೆಂತ್ ಖಂಯ್ಸರ್ಯಿ ದಿಸ್ಲೊನಾಂಯ್" ಜೆಸ್ಸಿನ್ ಸಾಂಗ್ಲೆಂ.
"ಆಹಾಂ...... ಇಗರ್ಜೆಂತ್ ಮ್ಹಾಕಾಚ್ ಸೊದ್ತಾಲೆಂಯ್ಗಿ ಕಿತೆಂ?"
"ನಾ...." ಲಜ್ಲೆಂ ಜೆಸ್ಸಿ.
ಹಾಂವೆಂ ತುಕಾ ಪಳೆಲೆಂ ಜೆಸ್ಸಿ", ಮೆಲ್ವಿನಾನ್ ಮ್ಹಳೆಂ, "ಅರ್ಧೆಂ ದೊಳೆ ದಾಂಪುನ್ ದಿಂಬಿಯೆಚೆರ್ ಆಸ್ತಾನಾ, ತುಜ್ಯಾ ತೊಂಡಾರ್ ಪ್ರಕಾಸ್ ಫಾಂಕ್ತಾಲೊ, ಏಕಾ ಮಾದ್ರಿಬಾರಿ ಸೊಬಿತ್ ದಿಸ್ತಾಲೆಂಯ್"
"ಮೆಲ್ವಿನ್...." ತಾಂಬ್ಡೆ ಜಾವ್ನ್, ತಕ್ಲಿ ಪಂದಾ ಘಾಲಿ ಜೆಸ್ಸಿನ್ ,"ತುಕಾ ಮ್ಹಜ್ಯಾ ವಿಷ್ಯಾಂತ್ ಸೊಡ್ನ್ ದುಸ್ರೆಂ ಉಲಂವ್ಕ್ಚ್ ನಾ ಜಾಯ್ಜಾಯ್. ತುವೆಂ ಚಿಂತ್ಲ್ಲ್ಯಾ ತಿತ್ಲೆಂ ಸಾಂತಿಪಣ್ ಹಾಂವ್ ಆದಾರಿನಾ. ತುಂ ಮ್ಹಾಕಾ ಬೆಷ್ಟೆಂಚ್ ಹೊಗಳ್ಸಿತಾಯ್. ಮಾದ್ರ್ ಜಾಂವ್ಚ್ಯಾ ತಿತ್ಲೆಂ ನಶಿಬ್ ಮ್ಹಾಕಾ ನಾ ಮೆಲ್ವಿನ್. ಮೆಲ್ವಿನ್, ಪಳೆ, ಸಗ್ಳೊ ಲೋಕ್ ಆಮ್ಕಾಂಚ್ ಪಳೆತಾ. ಮ್ಹಾಕಾ ಲಜ್ ದಿಸ್ತಾ. ಹಾಂವ್ ವಚೊಂಗಿ? ದನ್ಪರಾಂ ಜೆವ್ಣಾಕ್ ಆಂಗೆರ್ ಯೆ"
"ಜಾಯ್ತ್, ಮಸ್ತ್ ಥ್ಯಾಂಕ್ಸ್ ತುಕಾ," ಹಾಸ್ಲೊ ತೊ. "ದನ್ಪರಾಂ ದೋನ್ ವೊರಾರ್ ಮೆಳ್ಯಾಂ ಜೆಸ್ಸಿ. ತಯಾರ್ ರಾವ್"
"ಖಂಡಿತ್. ಬರೆಂ ಮೆಲ್ವಿನ್..." ಜೆಸ್ಸಿ ಚಲ್ಲೆಂ. ತಾಚ್ಯಾ ಪಾಟಿಕ್ಚ್ ಪಳೆವ್ನ್ ಏಕ್ ಘಡಿ ಥಂಯ್ಚ್ ಉಬೊ ರಾವ್ಲೊ ತೊ. ’ಪಾಪ್ ಚೆಡುಂ....’ ಚಿಂತ್ಲೆಂ ಮೆಲ್ವಿನಾನ್ ಮತಿಂತ್, ’ಕಿತ್ಲೆಂ ಸುಂದರ್ ತಾಚೆಂ ರೂಪ್ ಆನಿಂ ಕಸಲೆಂ ಅಪುರ್ಬಾಯೆಚೆಂ ಉಲವ್ಣೆಂ! ಆಜ್ ದುಬ್ಳಿಕಾಯೆಕ್ ಲಾಗೊನ್ ಲ್ಹಾನ್ ಪ್ರಾಯೆರ್ಚ್ ಟೀಚರಿಚೆಂ ಕಾಮ್ ಕರ್ಚಿ ಸ್ಥಿತಿ ತಾಕಾ ಆಯ್ಲ್ಯಾ. ನಂಯ್ ತರ್ ಆಜ್ ಗ್ರೇಸ್ತಾಗೆಲೆಂ ಕುಟಾಮ್ ಸೊಭಂವ್ಕ್ ತೆಂ ಪಾವ್ತೆಂ. ದೆವಾ... ಅಸಲ್ಯಾ ಸುಂದರ್ ಮಾಣ್ಕಾಕ್ ಮ್ಹಾಕಾ ಫಾವೊ ಕರ್. ತಾಣೆ ಮ್ಹಜೊ ಮೋಗ್ ಕೆಲ್ಯಾರ್ ಪುರೊ. ಸಂಸಾರಾಂತ್ ದುಸ್ರೆಂ ಕಸಲೆಂಜ್ ದಾಯ್ಜ್ ಮ್ಹಾಕಾ ನಾಕಾ. ಖಂಯ್ಚಾಕೀ ಸಾಂಜೆಬೀತರ್ ತಾಜೆಂ ಮನ್ ಹಾಂವ್ ಸಮ್ಜಾತೊಲೊಂ.’
ಸವ್ಕಾಸ್ ಮೆಟಾಂ ಕಾಡ್ನಾ ತೊ ಘರ್ಚ್ಯಾ ವಾಟೆಕ್ ಲಾಗ್ಣೊ. ವಾಟೆರ್ ಮೆಳ್ಲ್ಲ್ಯಾ ಇಷ್ಟಾಂಕ್ ಆನಿ ವಳ್ಕಿಚ್ಯಾಂಕ್ ನವ್ಯಾ ವರ್ಸಾಚೆ ಉಲ್ಲಾಸ್ ತಾಣೆ ಪಾಟಯ್ಲೆಂ.
ಸಕಾಳಿಂಚೆಂ ಪೆಜೆ-ಜೆವಾಣ್ ಜಾತಚ್ ಮೆಲ್ವಿನಾಕ್ ಏಕ್ ಆಲೊಚೆನ್ ಆಯ್ಲಿ ಆನಿ ತೊ ನ್ಹೆಸ್ಲೊ ಆನಿ ಹಂಪನ್ಕಟ್ಟಾ ಗೆಲೊ. ಸರ್ಶಿಂ ಆಸ್ಲ್ಲ್ಯಾ ಬೇಕರಿಂತ್ ತಾಣೆಂ ಏಕ್ ಲ್ಹಾನ್ ಪುಣ್ ಸುಂರ್ಗಾರಾಯಿಲ್ಲಿ ಕೇಕ್ ಮೆಲಾಕ್ ಘೆತ್ಲಿ. ಉಪ್ರಾಂತ್ ತೊ ಘರಾ ಆಯ್ಲೊ. ಕೆಕಿಚೊ ಘರಾ ಪಾತ್ತೊ ಮೆಳಾನಾಸೊ ಜಾಗ್ರುತ್ಕಾಯೆನ್ ಟ್ರಂಕಾಂತ್ ತಾಣೆಂ ತಿ ಲಿಪಯ್ಲಿ.
ದನ್ಪಾರಾಂಚೆಂ ಜೆವಾಣ್ ಕಂಯ್ ಏಕ್ ಪಾವ್ಟಿಂ ತಿರ್ಸಾನಾಂಗಾಯ್ ಮ್ಹಣ್ ಆತುರಾಯೆನ್ ಆಸ್ಲ್ಲೊ ಮೆಲ್ವಿನ್. ಜಿಲ್ಲಿಬಾಯ್ ಸವ್ಕಾಸಾಯೆನ್ ರಾಂದ್ಪಾಚ್ಯಾ ಕಾಮಾಂತ್ ಮಗ್ನ್ ಜಾಲ್ಲಿ. ವಿತೊರಾಬ್ ವರ್ತಮಾನ್ ಪತ್ರ್ ಘೆವ್ನ್ ವಾಚ್ತಾಲೊ. ದಾಕ್ಟೊ ಲೆನ್ಸಿ ತಾಚ್ಯಾ ಇತ್ಲ್ಯಾಕ್ಚ್ ಖೆಳ್ತಾಲೊ. ಮೆಲ್ವಿನ್ ಹೆಣೆತೆಣೆ ಪಾಸಾಯೊ ಮಾರ್ತಾಲೊ. ಹರ್ಯೇಕ್ ಮಿನುಟ್, ಎಕಾ ವೊರಾ ಭಾಷೆನ್ ತಾಕಾ ದಿಸ್ತಾಲೆಂ. ಸುಮಾರ್ ಎಕಾ ವೊರಾಚೆರ್ ಜಿಲ್ಲಿಬಾಯೆಚೆಂ ರಾಂದಾಪ್ ಸಂಪ್ಲೆಂ. ಪೊಟಾಂತ್ ಬೊಬೊ ಜಾತಾನಾ, ತಿಣೆಂ ಜೆವ್ಣಾಕ್ ಆಪವ್ಣೆ ದಿಲೆಂ.
ಮೆಲ್ವಿನಾಕ್ ಜೇಂವ್ಕ್ಯಿ ರುಚಾನಾ ಜಾಲೆಂ. ಗಬಗಬ ಚ್ಯಾರ್ ಘಾಸ್ ಗೀಳ್ನ್ ತೊ ಉಟ್ಲೊ. ತಾಚೊ ಆಂವ್ಸರ್ ಪಳೆವ್ನ್ ಜಿಲ್ಲಿಬಾಯ್ ಮ್ಹಣಾಲಿ - "ತುಕಾ ಆಜ್ ಕಿತೆಂ ಜಾಲಾಂರೆ ಮೆಲ್ವಿನ್? ವಾಸ್ರಾಚ್ಯಾ ಕಾನಾಂತ್ ವಾರೆಂ ರಿಗ್ಲ್ಲ್ಯಾಬರಿ ಉಚಾಂಬಳ್ ಜಾಲಾಯ್. ತುಜಿ ಗಜಾಲ್ ಕಿತೆಂ ಕಳಾನಾಂಮೂ ? ಇತ್ಲೆಂಯಿ ದರ್ವಡ್ಚೆಂ ಕಿತ್ಯಾಕ್ ತುವೆಂ? ತಂಡ್ರಬೈಲ್ ಕೊಣೆಂ ಮೆಳ್ತಾಂ ಮ್ಹಳಾಂ?"
ಮೆಲ್ವಿನ್ ಕಿತೆಂಗಿ ಸಾಂಗೊಂಕ್ ತೊಂಡ್ ಕಾಡ್ಚ್ಯಾದಿಂಚ್ ವಿತೊರಾಬಾನ್ ಮ್ಹಳೆಂ - "ತುಂ ಏಕ್ ಕಿತೆಂ ಉಲಯ್ತಾಯ್ ಜಿಲ್ಲಿ? ಆತಾಂಚೆ ಭುರ್ಗೆ ತಶೆಚ್. ಆಂವ್ಸರ್ ಆನಿಂ ದರ್ವಡ್ಯಾ ಶಿವಾಯ್ ತಾಣಿ ಕೆಲ್ಲಿಂ ಏಕ್ಯಿ ಕಾಮಾ ಶಿಜಾನಾಂತ್. ತೆ ಖಂಯ್ ವೆತಾತ್ ಆನಿಂ ಕಿತೆಂ ಕರ್ತಾತ್ ಮ್ಹಳ್ಳೆಂ ಆಮ್ಕಾಂ ಸಾಂಗೊಂಕ್ ಬಸ್ಲ್ಯಾತ್ಗಿ? ಕರುಂದಿತ್, ಕರುಂದಿತ್....." ಆಶೆಂ ಸಾಂಗೊನ್ ತೊ ಹಾತ್ ಧುಂವ್ಕ್ ಭಾಯ್ರ್ ಚಲ್ಲೊ.
ಮೆಲ್ವಿನ್ ನ್ಹೆಸ್ತಾನಾ ಜಿಲ್ಲಿಬಾಯ್ ಬಿತರ್ ಪುರ್ಪುರ್ತಾಲಿ - "ವ್ಹಯ್, ಆಮಿಂ ಕಿತೆಂ ಉಲೊಂವ್ಚೆಂ? ತಾಕಾ ಕಿತೆಂ ಬೂದ್ ನಾಂಗಿ? ಪಾಳ್ಣ್ಯಾಂತ್ಲೊ ದೂದ್ ಖಾಂವ್ಚೊ ಭುರ್ಗೊ ಕಾಂಯ್ ನ್ಹಂಯ್ಮೂ? ಆಟ್ರಾ ವರ್ಸಾಂಚ್ಯಾ ಭುರ್ಗ್ಯಾಂಕ್ ಬೂದ್ ಸಾಂಗ್ಚಿಂ ವ್ಹಡಿಲಾಂಚ್ ಪಿಶಿಂ. ಹಾಬ್ಬಾ, ಏಕ್ ಬರೊ ದೀಸ್ ಮ್ಹಣ್ ನಾ, ಘರಾ ರಾವ್ ಮುಳ್ಯಾರ್ ಘರ್ಚ್ ಹಾಂಕಾಂ ಖಾಂವ್ಕ್ ಯೆತಾ ಖಂಯ್. ದರ್ಯಾ ದೆಗೆಚೆಂ ಮಿಟಾಚೆಂ ವಾರೆಂ ಕುಡಿ - ಅತ್ಮ್ಯಾಕ್ ದೊನಾಂಕೀ ಬರೆಂ ಖಂಯ್"
ತಿ ಉಲಯ್ತಾನಾ ಮೆಲ್ವಿನಾಕ್ ವ್ಹಡ್ಲ್ಯಾನ್ ಹಾಸೊಂಕ್ ಆಯ್ಲೆಂ. ತಾಣೆಂ ಹಾಸ್ಚ್ಯಾ ಆವಾಜಾಕ್ ಜಿಲ್ಲಿಬಾಯ್ ಮ್ಹಣಾಲಿ - "ಪಳೆ, ಸಾಂಗೊನ್ ಖಂಯ್ ಗೆಲಿಂ ಹಾಂವ್. ಉತ್ರಾಂಚೆಂ ಗುಮಾನ್ ಆಸಾಗಿ ಪಳೆ. ತಾಚ್ಯಾ ಹಾಸ್ಯಾಚೊ ಅರ್ಥ್ ಕಿತೆಂ ಜಾಣಾಂಯ್ವೆ....?
"ತುಂ ಕಿತ್ಲೆಂಯೀ ಉಲಯ್. ಉಲೊವ್ನ್ ತುಜೊಚ್ ತಾಳೊ ಸುಕಯ್. ತುಜಿಂ ಉತ್ರಾಂ ಮ್ಹಾಕಾ ಕಾಂಯ್ ನಾಟ್ವಾನಾಂತ್’ ಮ್ಹಣೊನ್"
"ವ್ಹಯ್ ಜಿಲ್ಲಿ, ತುವೆಂ ಸಾಂಗ್ಚೆಂ ಬರಾಬರ್" ವಿತೊರಾಬ್ಯಿ ಹಾಸೊ ತಡ್ವುಂಕ್ ತಾಂಕಾನಾಸ್ತಾಂ ಸಾಂಗಾಲಾಗ್ಲೊ.
"ಜಾಲೆಂ, ಹೊಯಿ ತಾಕಾ ವಾರೆಂ ಘಾಲುಂಕ್ ಲಾಗ್ಲೊ" ಜಿಲ್ಲಿಬಾಯ್ ರಾಗಾನ್ ರಾಂದ್ಚ್ಯಾ ಕುಡಾಕ್ ಗೆಲಿಂ.
ಮೆಲ್ವಿನ್ ನ್ಹೆಸೊನ್ ತಯಾರ್ ಜಾತಾನಾ, ಜಿಲ್ಲಿಬಾಯೆನ್ ಕುಸ್ವಾರಾಚಿ ಲ್ಹಾನ್ ಪೊಟ್ಲಿ ಹಾಡ್ನ್ ತಾಕಾ ದಿಲಿ. ತಾಣೆಂ ಏಕ್ ಹೆಂಡ್ -ಬೆಗ್ ಘೆತ್ಲೆಂ ಆನಿಂ ಕುಸ್ವಾರ್ ಆನಿಂ ಕೇಕ್ ತಾಂತುಂ ಘಾಲಿ. ಘಡಿಯಾಳಾರ್ ದೇಡ್ ವೊರ್ ವ್ಹಾಜ್ಲ್ಲೆಂ ಆಯ್ಕಾಲೆಂ.
"ನ್ಹಾಂವ್ಕ್ ಪುಣಿ ವಚಾನಾಕಾರೆ!" ಮ್ಹಣ್ ಜಿಲ್ಲಿಬಾಯೆನ್ ಸಾಂಗ್ತಾನಾ ಮೆಲ್ವಿನ್ ಘರಾ ಭಾಯ್ರ್ ಪಡ್ಲೊ. ಆನಿಂ ವೆಗ್ಗಿಂ ಮೆಟಾಂ ಕಾಡ್ನ್ ಚಲೊಂಕ್ ಲಾಗ್ಲೊ. ತ್ಯಾಚ್ ಕ್ಷಣಾ...
ತ್ಯಾಚ್ ಕ್ಷಣಾ..... ಜನೆಂತ್ಲ್ಯಾನ್ ಭಾಯ್ರ್ ದೆಖ್ಚ್ಯಾ ಸಿಂತಿಚಿ ದೀಷ್ಟ್ಯಿ ಮೆಲ್ವಿನಾಚೆರ್ ಪಡ್ಲಿ. ’ಆರೇ, ಮೆಲ್ವಿನ್ ಮರ್ಜೆರ್ ನ್ಹೆಸೊನ್ ಖಂಯ್ ಭಯ್ರ್ ಸರ್ಲೊ?’ ಆಜಾಪ್ಲೆಂ ತೆಂ. ಸಿಂತಿಯಿ ತಂಡ್ರಬೈಲ್ ವಚೊಂಕ್ ಭಾಯ್ರ್ ಸರ್ತಾಲೆಂ. ಆನಿಂ ತಾಚ್ಯಾ ಯೆಣ್ಯಾಕ್ಚ್ ರಾಕ್ತಾಲೊ ಎಕ್ಲೊ ತರ್ನಾಟೊ ಲೇಡಿಹಿಲ್ ಬಸ್ಸ್ ಸ್ಟೇಂಡಾಂತ್ - ಜೊ ಸಿಂತಿಚ್ಯಾ ಜಾಳಾಂತ್ ನವೊಚ್ ಸಾಂಪಾಡ್ಲೊಲೊ.
’ಮೆಲ್ವಿನ್ಯಿ ತಂಡ್ರಬೈಲ್ ವಚಾನಾಮೂ..? ದುಬಾವಿ ಚಿಂತ್ನಾಂ ಸಿಂತಿಚ್ಯಾ ಮನಾಂತ್ ಉಟ್ಲಿಂ, ’ಪಳೆಯಾಂ, ಖಂಯ್ಚಾಕೀ ಕಳ್ತೆಲೆಂ ನ್ಹಂಯ್ವೇ?’ ತಾಣೆಂ ಆಪ್ಣಾಕ್ಚ್ ಸಮಾಧಾನ್ ಕೆಲೆಂ ಆನಿಂ ತೆಂಯಿ ಭಾಯ್ರ್ ಸರ್ಲೆಂ.
(ಖಂಯ್ಚಾಕಿ ಕಳ್ತೆಲೆಂ ಮ್ಹಣ್ ಚಿಂತ್ಲ್ಲ್ಯಾ ಸಿಂತಿಕ್ ಚಿಂತಿನಾತ್ಲ್ಲೆಂ ದ್ರಶ್ಯ್ ತಂದ್ರಬೈಲ್ ಪಳೆಂವ್ಕ್ ಮೆಳ್ಳೆಂ. ಜೆಸ್ಸಿಲಾಗಿಂ ಆಪ್ಲೊ ಮೋಗ್ ಉಚಾರುಂಕ್ ಚಿಂತ್ಲೆಲ್ಯಾ ಮೆಲ್ವಿನಾಚೆ ಹಾಲ್- ಹವಾಲ್ ಕಿತೆಂ ಜಾಲೆ? ಸಿಂತಿ ಆನಿಂ ಮೆಲ್ವಿನಾಚೊ ಸಂಬಂದ್ ಕಸೊ ಉರ್ಲೊ..? ಮುಖ್ಲ್ಯಾ ಆಂಕ್ಯಾಂತ್ ಹಿಂ ವಿಶೇಷ್ ಘಡೀತಾಂ ವಾಚುಂಕ್ ಚುಕಾನಾಂತ್.)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
