ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾದ್ರ್ಯಾಬಾಂಕ್ ಕಾಜಾರಾಚಿ ಪರ್ವಣ್ಗಿ!?
[ವಿಡಂಬನ್] - ಸುನಿಲ್ ಫೆರ್ನಾಂಡಿಸ್, ಕೋಟ
(ಪಾದ್ರ್ಯಾಬಾಂಕ್ ಕಾಜಾರ್ ಜಾಂವ್ಕ್ ಪರ್ವಣ್ಗಿ ದೀಂವ್ಕ್ ಜಾಯ್ ಮ್ಹಣ್ ಥೊಡ್ಯಾಂಚೊ ವಾದ್, ಪಾದ್ರ್ಯಾಬಾಂಕ್ ಕಾಜಾರ್ ಜಾಲ್ಯಾರ್ ಲಾಯಿಕ್ ಆನಿ ಹಾಂಚಾ ಮಧೆಂ ಕಸಲೊ ಫರಕ್? ಮ್ಹಳ್ಳೊ ಪ್ರತಿವಾದ್ ಥೊಡ್ಯಾಂಚೊ. ಅಶೆಂ ಲಾಯಿಕಾಂ ಥಾವ್ನ್ ಪಾಪ್ ಸಾಯ್ಬಾ ಮ್ಹಣಾಸರ್ ಸಕ್ಕಡಾಂಚೊ ಹೊ ಏಕ್ ಗೊಂದೊಳ್ ಚಾಬೊಂಕ್ ಜಾಯ್ಜಾತ್ಲ್ಲೊ ಚಣೊ ಜಾವ್ನ್ ಉರ್ಲಾ. ಆಸೊಂಕ್ ಪುರೊ ಥೊಡೆ ಕಾಜಾರ್ ಜಾಂವ್ಕ್ ಪಾಂಯ್ ಉಕ್ಲೊನ್.......... ಪುಣ್ ಹೆಂ ವಿಡಂಬನ್ ಪಾದ್ರ್ಯಾಬಾಂಕ್ ಕಾಜಾರ್ ಜಾಂವ್ಚಿ ಪರ್ವಣ್ಗಿ ದಿಲಿ ತರ್ ಸಮಾಜೆಂತ್ ಹಾಚೊ ಪರಿಣಾಮ್ ಕಸೊ ಆಸ್ತಲೊ ಮ್ಹಳ್ಳೆ ಕಲ್ಪನ್ ಕರ್ನ್ ಬರಯಿಲ್ಲೆಂ ವಿಡಂಬನ್.)
"ಕಾಜಾರಾಕ್ ಮೊಸ್ತು ಲೋಕ್, ಹಾಂವೆ ಇತ್ಲೊ ಲೋಕ್ ಖಂಚಾಯ್ ಕಾಜಾರಾಂತ್ ಪಳೆಂವ್ಕ್ ನಾ" ಬಸ್ಸಾರ್ ರಂಗ್ ರಂಗಾಚಿ ಝರಿಚಿಂ ಕಾಪ್ಡಾಂ ನ್ಹೆಸೊನ್ ಮಾತ್ಯಾರ್ ಮೊಗ್ರಿಂ ಫುಲಾಂ ಮ್ಹಾಳುನ್ ಬಸ್ಸಾರ್ ಪಯ್ಣ್ ಕರ್ನ್ ಆಸ್ಚ್ಯಾ ಸ್ತ್ರೀ ಜಮ್ಯಾಂತ್ಲ್ಯಾ ಎಕ್ಲೆ ಸ್ತ್ರೀಯೆನ್ ಉದ್ಗಾರ್ ಕಾಡ್ಲೊ. ಹಾಂವ್ ಬಸ್ಸಾರ್ ತಾಂಚಾ ಪಾಟ್ಲ್ಯಾ ಬಸ್ಕಾರ್ ಬಸೊನ್ ಆಸ್ಲ್ಲೊ. ತಾಂತ್ಲಿ ಬಾರಿಕ್ಶಿ ಎಕ್ಲಿ ಸಾಂಗೊಂಕ್ ಲಾಗ್ಲಿ "ಆಜ್ ಕಾಲ್ ಪಾದ್ರ್ಯಾಬಾಂಚಾ ಕಾಜಾರಾಕ್ ಲೋಕ್ ಚಡಾವತ್ ಜಾವ್ನ್ ದೋನ್ ಹಜಾರಾ ವಯ್ರ್ ಮಿಕ್ವತಾ". "ವ್ಹಯ್ ಸಯ್ರೆ ಪಾದ್ರ್ಯಾಬ್ ತಾಂಚಿ ಬಾಯ್ಲಾಂ, ಭುರ್ಗಿಂ ಉಪ್ರಾಂತ್ ಫಿರ್ಗಜ್ಗಾರಾಂ, ಚೆಡ್ಯಾ ಗೆಲಿಂ ಚೆಡ್ವಾಂ ಗೆಲಿಂ ಮ್ಹಣ್ತಾನಾ ಲೋಕ್ ಜಾಂವ್ಚೊ ಕಾಂಯ್ ನವಾಲ್ ನ್ಹಯ್" ಮ್ಹಣೊಂಕ್ ಲಾಗ್ಲಿ ಧೊಬ್ಲಿಶಿ ಆಂಟಿ ’ದೊರ್ಕ್’ ಕರ್ನ್ ದುಕ್ರಾಮಾಸಾಚೊ ಧೆಂಕ್ ಕಾಡ್ನ್. "ಆಮ್ಚಿ ಲ್ಹಾನ್ ಫಿರ್ಗಜ್, ಆಮ್ಚಾ ವಿಗಾರಾಚಾ ಕಾಜರಾಕ್ಚ್ ದೇಡ್ ಹಜಾರ್ ಲೋಕ್ ಆಸ್ಲ್ಲೊ, ಕಾಜಾರಾಚೊ ಖರ್ಚ್ ವಾಂಟುನ್ ಘೆಜೆ ತರ್ ಲೊಕಾಂಕ್ ತಕ್ಲೆರ್ ಆಯ್ಲೆಂ. ಆನಿ ಮುಕಾರ್ ಕಾಜಾರ್ ಜಾಲ್ಲ್ಯಾ ಪಾದ್ರ್ಯಾಬಾಂಕ್ಚ್ ವಿಗಾರ್ ಜಾವ್ನ್ ಧಾಡಾ ಮ್ಹಣ್ ಬಿಸ್ಪಾಕ್ ಮನವಿ ದಿಲ್ಯಾ. ಕಾಜಾರ್ ಕರಂವ್ಚಿ ತಕ್ಲಿ ಹುನ್ ನಾಕಾ ಮ್ಹಣೊನ್" ಮುಡ್ಯಾತೆದೊ ಶೆಂಡೊ ಘಾಲ್ಲಿ ಎಕ್ಲಿ ಖರ್ಶೆವ್ನ್ಶೆ ಮ್ಹಣಾಲಿ.
"ಕಿತೆಂ ಮ್ಹಣ್ತಾತ್ ತುಮಿ ಕಾಜಾರ್ ಜಾಲ್ಲೆ ಆಯ್ಲ್ಯಾರ್ ತಾಚಾನಿ ವ್ಹಡ್ಲಿ ತಕ್ಲಿ ಹುನ್. ತಾಂಚಾ ಬಾಯ್ಲ್ ಭುರ್ಗ್ಯಾಂಕ್ ಪೊಸುಂಕ್ ಇಜ್ಮೊಲ್ ಚಡ್ ಘಾಲುಂಕ್ ಪಡ್ತೆಲೆಂ, ವಯ್ಲ್ಯಾನ್ ಆನ್ವಾಲ್ ಕಾಯ್ದೊಯ್ ವಾಡಯ್ತಲೆ, ಮಿಸಾಂಚೆ ಫೀಸ್ಯಿ ಚಡಯ್ತಾಲೆ" ದುಬಾವ್ ಉಚಾರುಂಕ್ ಲಾಗ್ಲಿ ಆನ್ಯೇಕ್ಲಿ. "ಆಮ್ಚಾ ಫಿರ್ಗಜೆಚೊ ವಿಗಾರ್ ಕಾಜಾರಿ, ಮಿಸಾರ್ ತವಳ್ ತವಳ್ ಸಾಂಗ್ತೆ ಆಸ್ತಾ, ತುಮಿ ಘಾಲ್ಚೆಂ ಇಜ್ಮೊಲ್ ಕುಟಾಮ್ ಚಲೊಂವ್ಕ್ ಕಾಂಯ್ ಪಾವಾನಾ, ಇಲ್ಲೆಂ ಉದಾರೆಂ ಮನ್ ದಾಖಯಾ ಮ್ಹಣೊನ್" ಮ್ಹಣೊಂಕ್ ಲಾಗ್ಲಿ ಲಿಬ್ಯಾ ಸೈಜಿಚೊ ಶೆಂಡೊ ಘಾಲಿ ಎಕ್ಲಿ ಆಂಟಿ ತೋಂಡ್ ವೊಂಕ್ಡೆ ಕರ್ನ್.
"ಕಿತೆಂಯ್ ಜಾಂವ್ ಸಿಕೇರಾಮಾನ್ ಪುತಾಚೆ ಕಾಜಾರ್ ಗಡ್ದ್ ಕೆಲೆಂ, ಕಾಂಯ್ ದೋನ್-ತೀನ್ ಲಾಖ್ ಪಿಟೊ ಕೆಲೆ ಆಸ್ತಾಲೆ" ಮ್ಹಣೊಂಕ್ ಲಾಗ್ಲಿ ಸಿಲ್ಲಿ ಬಾಯ್. ಇತ್ಲ್ಯಾರ್ಚ್ ಹಾಂಚಾ ಉಲವ್ಣ್ಯಾಂನಿ ತಾಂಚಿ ನಾಂವಾ ಮ್ಹಾಕಾ ಕಳಿತ್ ಜಾಲ್ಲಿಂ. "ಸಿಕೇರಾಮ್ ಖಂಯ್ ಖರ್ಚಿತಾ ಪಿಟ್ಟಾಸಿ, ಪುತ್ ವ್ಹಡ್ಲ್ಯಾ ಫಿರ್ಗಜೆಂತ್ ವಿಗಾರ್ ನ್ಹಯ್ವೇ? ಚಾರ್ಶ್ಯಾಂ ವಯ್ರ್ ಕುಟ್ಮಾ ತ್ಯಾ ಫಿರ್ಗಜೆಂತ್ ಆಸಾತ್. ಎಕೇಕ್ ಕುಟ್ಮಾಕ್ ಪಾಂಯ್ಶಿ ರುಪ್ಯಾ ಲೆಕಾರ್ ವಂತಿಗಿ ವಸುಲ್ ಕೆಲ್ಯಾ ಖಂಯ್. ಖುಶ್ಯೇನ್ ಥೊಡ್ಯಾ ಗಲ್ಫಾರಾಂಚಾ ಬಾಯ್ಲಾಂನಿ ಘೊವಾ ಕಡೆನ್ ಚಡಿತ್ ಪಯ್ಶೆ ಹಾಡವ್ನ್ ಪಾಂಚ್ - ಧಾ ಹಜಾರ್ ಅಶೆ ದಿಲ್ಯಾತ್ ಖಂಯ್. ಫಿರ್ಗಜ್ಗಾರಾಂ ಉಲವ್ನ್ ಆಸ್ಲ್ಲಿಂ" ಸಾಂಗೊಂಕ್ ಲಾಗ್ಲಿ ಇಲ್ಲೆ ಪ್ರಾಯೆಚಿ ದುಲ್ಸಿನ್ ಬಾಯ್. "ವಯ್ಲ್ಯಾನ್ ಫಿರ್ಗಜೆಚಾ ಗಲ್ಫಾಗಾರಾಂನಿ ಹನಿಮೂನ್ ಸ್ಪೊನ್ಸರ್ ಕೆಲಾ ಖಂಯ್, ಆಸ್ಟ್ರೇಲಿಯಾಂತ್ ಸಾತ್ ರಾತಿಂ ಆನಿ ಸಾತ್ ದೀಸಾಚಿ ಪ್ಯಾಕೇಜ್ ಖಂಯ್’ ಸಾಂಗೊಂಕ್ ಲಾಗ್ಲೆ ತರ್ನಾಟೆಂ ಬ್ಲೆಂಚಾ. "ಬ್ಲೆಂಚಾ, ತುಂಯ್ ಎಕ್ ಪಾದ್ರ್ಯಾಕ್ ಪಳೆವ್ನ್ ಕಾಜಾರ್ ಜಾಗೊ, ಕಾಜಾರ್ ಗಡ್ದ್ ಜಾತಾ ಸಾಂಗಾತಾ ಗಾಂವ್ ಭಂವೊಂಕ್ ಮೆಳ್ತಾತ್" ಯೆವ್ಲಿನ್ ಚಿಡೊಂವ್ಕ್ ಲಾಗ್ಲೆ.
ಬ್ಲೆಂಚಾಚಾ ಆವಯ್ಕ್ ಪಿಂತೆರ್ ಚಡ್ಲೆಂ "ಪಾದ್ರ್ಯಾಬಾಕ್ ಕಾಜಾರ್ ಕರ್ನ್ ದಿಂವ್ಚೆ ಮ್ಹಳ್ಯಾರ್ ತಿತ್ಲೆ ಸಲಿಸ್ನಾ ಕಳ್ಳೆಮೂ! ತೆಯ್ ದೋತ್ ಘೆತಾತ್. ಖಬರ್ ಕಾಡ್ಲಾ ಆಮಿಂ. ಪುನ್ ಶೆತಾಂತ್ ವಿಗಾರ್ ಜಾವ್ನ್ ಆಸ್ಲ್ಯಾರ್ ಇತ್ಲೆ, ದಿರೆಕ್ತೊರ್ ಜಾವ್ನ್ ಆಸ್ಲ್ಯಾರ್ ಇತ್ಲೆ, ಪ್ರಿನ್ಸಿಪಾಲ್ ಜಾಲ್ಯಾರ್ ಇತ್ಲೆ, ಡ್ಯಾನ್ಸ್ ಕರ್ತೆಲ್ಯಾಂಕ್ ಇತ್ಲೆ, ಮ್ಯಾಜಿಕ್ ಕರ್ತೆಲ್ಯಾಂಕ್ ಇತ್ಲೆ, ಗಾಯ್ತೆಲ್ಯಾಂಕ್ ಇತ್ಲೆ, ಕ್ಯಾಸೆಟ್ ಕಾಡ್ತೆಲ್ಯಾಂಕ್ ಇತ್ಲೆ, ಶೊಪಿಂಗ್ ಕೊಪ್ಲೆಕ್ಸ್ ಆಸ್ಲ್ಯಾ ಫಿರ್ಗಜೆಂತ್ ವಿಗಾರ್ ಜಾಲ್ಯಾರ್ ಇತ್ಲೆ, ತಾಂಚ್ಯಾ ತಾಂಚ್ಯಾ ಗ್ರೇಡಿ ಪ್ರಮಾಣೆ ದೋತ್ ಫಿಕ್ಸ್ ಕೆಲ್ಯಾ ಖಂಯ್". "ಮಿಸಾಂವಾಂತ್ ವಾವ್ರ್ ಕರ್ತೆಲೆ ಮಾತ್ರ್ ದೋತ್ ಘೆನಾಂತ್ ಮ್ಹಣ್ ಆಯ್ಕಾಲಾ. ತಾಂಕಾ ಕಾಂಯ್ ಹುಟ್ವಳ್ ನಾತ್ಲ್ಯಾನ್ ಚೆಡುಂ ದೀಂವ್ಕ್ ಲೋಕ್ ಪಾಟಿಂ ಮುಕಾರ್ ಪಳೆತಾ ಮ್ಹಣ್ ಸಾಂಗ್ತಾತ್, ಬಿರ್ಮತ್" ನಂರ್ಗುನ್ ಸಾಂಗೊಂಕ್ ಲಾಗ್ಲಿ ದುಕಿ ಸಾಯ್ಬಿಣ್ ಆಪ್ಲಿನ್ ರಡ್ಕುರ್ಯಾ ಉತ್ರಾಂನಿ.
ಇತ್ಲ್ಯಾರ್ ಬಸ್ಸ್ ಗುಂಟಾಲ್ಕಟ್ಟೆ ಬಸ್ ಸ್ಟೊಪಾರ್ ರಾವ್ಲೆಂ. ಹಾಂತ್ಲ್ಯಾ ಥೊಡ್ಯಾ ಸ್ತ್ರೀಯಾಂಕ್ ಹಾಂಗಾಸರ್ ದೆವೊಂಕ್ ಆಸ್ಲ್ಲೆ. ದೆಂವ್ಚೊ ಸಕ್ಕಡ್ ಲೋಕ್ ದೆಂವ್ಲಾರಿ, ಹಾಂಕಾ ಸಿಟಿರ್ ಥಾವ್ನ್ ಉಟೊಂಕ್ ಇಲ್ಲೊ ವೇಳ್ ಲಾಗ್ಲೊ. ಕಂಡಕ್ಟರ್ ದರ್ವಡೊನ್ ಆಸ್ಲ್ಲೊ "ಬಾಯಾಮ್ಮ ಜಲ್ದಿ ಜಪ್ಪುಲೆ, ಲೇಟ್ ಆಪುಂಡು". "ಕಂಡೆಕ್ಟರ್ ನಮಗೆ ಸಲುಪ ಪೆಂಕಾಟ್ ನೋವು" ಮ್ಹಣೊನ್ ಎಕೆಕ್ಲಿಂಚ್ ಹಾಲೊನ್ ಧಲೊನ್ ದೆಂವ್ಲಿ. ಕಶೆಂಯ್ ಬಾಯ್ಲಾಂ ದೆಂವ್ಲಿ ಕಂಡೆಕ್ಟರಾನ್ "ರೈಟ್ ಪೊಯಿ" ಮ್ಹಳೆಂ, ಡ್ರೈವರ್ ಗಾಳಿ ಯೆಟಿತ್ ಬಸ್ಸ್ ಚಲಂವ್ಕ್ ಲಾಗ್ಲೊ.
ಬಸ್ಸ್ ಚಲೊಂಕ್ ಲಾಗ್ಲೆಂಚ್ ಬಾಯ್ಲಾಂಚಿ ತೊಂಡಾ ಪರತ್ ಚಲೊಂಕ್ ಸುರು ಜಾಲಿಂ. ಲಿಲ್ಲಿ ಬಾಯೆನ್ ಉತ್ರಾಂಚಿ ಸುರ್ವಾತ್ ಕೆಲಿ. "ತೊ ಆಮ್ಚಾ ಇಗರ್ಜೆಚಾ ವಯ್ಲ್ಯಾ ವಾಡ್ಯಾಚಾ ಫಿಟ್ಟರ್ ಚಾರ್ಲಿನ್ ಫೆರ್ಗೊಚ್ ಮಾರ್ಲೊ ನೆಂ! ಧುವೆಕ್ ಅಮೆರಿಕಚಾ ಪಾದ್ರ್ಯಾಬಾ ಲಾಗಿಂ ಕಾಜಾರ್ ಕರ್ನ್ ದಿತಚ್!". "ಕಿತೆಂ ಮ್ಹಣ್ತಯ್ ಲಿಲ್ಲೆ ತುಂ?" ಬಿಜ್ಜು ಬಾಯೆನ್ ಮಧೆಂ ಆತುರಾಯೆನ್ ದಾಯ್ ಘಾಲಿ. "ಮ್ಹಾಕಾ ಸಾರ್ಕೆ ಕಳಿತ್ ನಾ, ಕೊಣಾಂಕ್ ಸಾಂಗೊಂಕ್ ವೊಹಾನಾಕಾತ್, ಕಳಿತ್ ಆಸಾಗೀ ವಿಚಾರಾ" ಲಿಲ್ಲಿ ಬಾಯ್ನ್ ಉರ್ಲ್ಯಾ ಬಾಯ್ಲಾಂಚಿ ಉರ್ಬಾ ಚಡಯ್ಲಿ. "ಗಜಾಲ್ ಇತ್ಲಿಚ್ ಚಾರ್ಲಿನ್ ಧುವೆಕ್ ತ್ಯಾ ಅಮೆರಿಕಾಚಾ ಪಾದ್ರಿಕ್ ಕಾಜಾರ್ ಕರ್ನ್ ದಿಲ್ಲೆ ನ್ಹಯ್ ವೆ, ತೊ ಅಮೆರಿಕಾಂತ್ ಕಾಲೆಂ ತೆಂ ಇಂಗ್ಲಿಶಾಂತ್ ಸಾಂಗ್ತಾತ್ ಪಳೆಯಾ ಫ್ರೀ ಲೇಸರ್ ಪಾದ್ರಿ" ಮದೆಂ ಬ್ಲೆಂಚಾನ್ ದಾಯ್ ಘಾಲಿ "ಫ್ರೀ ಲೇಸರ್ ನ್ಹಯ್, ಫ್ರೀ ಲ್ಯಾನ್ಸರ್ ಲಿಲ್ಲಿ ಬಾಯೆ". ಲಿಲ್ಲಿ ಬಾಯ್ ತೊಂಡ್ ಘುಂವ್ಡಾವ್ನ್ ಮುಖಾರ್ಸುನ್ ಸಾಂಗೊಂಕ್ ಲಾಗ್ಲಿ" ಕಿತೆಂಗಿ ಫುಟ್ಲೆ ತಾಕಾ ಥಂಯ್ ಬರೆಂ ಪಯ್ಶೆ ಮೆಳ್ತಾತ್ ಖಂಯ್. ಥಂಯ್ಚೊ ಲೋಕ್ ಮೀಸ್ ಸಾಂಗ್ಲ್ಯಾರ್, ಸೆರ್ಮಾವ್ ದಿಲ್ಯಾರ್ ಡಾಲರಾನ್ ಪಯ್ಶೆ ದಿತಾತ್ ಖಂಯ್. ತಾಣೆಚ್ ನ್ಹಯ್ವೆ ಚಾರ್ಲಿಕ್ ವ್ಹಡ್ಲೆ ವರ್ಕ್ಶೋಪ್ ಘಾಲ್ನ್ ದಿಲಾ" ಉರ್ಲಿಂ ಬಾಯ್ಲಾ ಎಕಾಚ್ ಫರಾ ಆತುರಾಯೆನ್ ಮ್ಹಣೊಂಕ್ ಲಾಗ್ಲಿ "ವ್ಹಯ್ಗೀ ?!". ಲಿಲ್ಲಿ ಬಾಯ್ ಪರ್ತ್ಯಾನ್ ವಿನಂತಿ ಕರುಂಕ್ ಲಾಗ್ಲಿ "ದಯಾ ಕರ್ನ್ ಕೊಣಾಂಕ್ ಹಿ ಗಜಾಲ್ ಸಾಂಗೊಂಕ್ ವೊಹಾನಾಕಾತ್, ಅಶೆಂ ಅಶೆಂ ಖಂಯ್ ಕಳಿತ್ ಆಸಾಗೀ ಮ್ಹುಣ್ ಮಾತ್ರ್ ವಿಚಾರಾ".
ಲಿಲ್ಲಿ ಬಾಯ್ ಸಾಂಗೊನ್ಚ್ ಆಸ್ಲ್ಲಿ "ಚಾರ್ಲಿ ಪೊರ್ ಗಡಾಂಗಾಂತ್ ಇಲ್ಲೆಂ ಶೆಕ್ತಚ್ ಮ್ಹಜ್ಯಾ ಘರ್ಕಾರಾ ಲಾಗಿಂ ಬಡಾಯ್ ಕೊಚ್ಚುನ್ ಆಸ್ಲ್ಲೊ ಖಂಯ್, ಜಾಂವಯ್ ಅಸೊ, ತಸೊ,, ಬರೊ ಮ್ಹಣೊನ್’. "ತೊ ಅಮೆರಿಕನ್ ಪಾದ್ರಿ ಮ್ಹಜಾ ಸುನೆಂಚಾ ಗಾಂವ್ಚೊ ಯಾ" ಮಧೆಂ ದಾಯ್ ಘಾಲಿ ಸೆರ್ಪಿನ್ ಬಾಯೆನ್ "ಮ್ಹಜಾ ಸುನೆಂಕ್ ಪಯ್ಶಿಲ್ಯಾನ್ ಸಯ್ರೊ ಪಡ್ತಾ ಖಂಯ್. ಗೆಲೆತ್ಯಾ ವರ್ಸಾ ಗಾಂವಾಕ್ ಆಯಿಲ್ಲೊ ತುಮ್ಚ್ಯಾ ಫಿರ್ಗಜೆಚಾ ಚೆಡ್ವಾ ಸಂಗಿ ಕಾಜಾರ್ ಜಾವ್ನ್ ಆಪೊವ್ನ್ ಘೆವ್ನ್ ಗೆಲಾ ಮ್ಹಣ್ ಸಾಂಗ್ತಾಲೆಂ". "ತೊಚ್ ತರ್ ಆಮ್ಚಾ ಚಾರ್ಲಿಚೊ ಜಾಂವಯ್" ಲಿಲ್ಲಿ ಬಾಯೆನ್ ಕುಡ್ಸಿಲೆಂ.
ಬಸ್ಸ್ ಭರ್ಮಾರ್ ಬೆಲ್ಲದಕಟ್ಟೆಲಾಗಿಂ ಯೆತಾನಾ ಥೊಡಿಂ ಬಾಯ್ಲಾಂ ಕಂಡಕ್ಟರಾಕ್ ಬೊಬ್ಮಾರ್ನ್ ಸಾಂಗೊಂಕ್ ಲಾಗ್ಲಿ "ಕಂಡಕ್ಟರ್ ನಮಗೆ ಮುಕಾರ್ ಬಸ್ಟೆಂಡಿನಲ್ಲಿ ದೆವೊಂಕ್ ಉಂಟು. ಸ್ವಲ್ಪ ನಿಲ್ಲಿಸಿ". ಕಂಡೆಕ್ಟರಾನ್ ಶಿಲೊಂಣಿ ಮಾರ್ಲಿಚ್. ಥೊಡಿಂ ಬಾಯ್ಲಾಂ ದೆವ್ಲಿಂ. ಅನ್ಯೇಕ್ ಹಿಂಡ್ ಬಾಯ್ಲಾಂ ಭರ್ಮಾರ್ ಬಸ್ಸ್ ಸ್ಟೊಪಾರ್ ಚಡ್ಲಿ. ಮಾತೆಂಭರ್ ಆಬೊಲಿ ಮಾಳೊನ್ ಆಸ್ಲ್ಲಿ. ತಾಂಚಾ ಸಾಂಗಾತ್ ಮ್ಹಜೊ ಇಶ್ಟ್ ಪಾಸ್ಕಲ್.
"ಪಾಸ್ಕಲಾ ಖಂಯ್ರೇ ಪಯ್ಸ್ ಪಾವ್ಲೆಯ್?" ವಿಚಾರ್ಲೆಂ ಹಾಂವೆ. "ಆಮ್ಚಾ ಫಿರ್ಗಜ್ ಪಾದ್ರಿಚಾ ಬಾಯ್ಲೆಕ್ ಗುರ್ವಾರಿ ಧಾಡ್ಚೆಂ ಕಾರ್ಯೆಂ ಆಸ್ಲ್ಲೆಂ. ಗುರ್ವಾರಿಕ್ ಪಾವ್ನ್ ಪಾಟಿ ವಸುನ್ ಆಸಾಂವ್" ಮ್ಹಣೊಂಕ್ ಲಾಗ್ಲೊ ಪಾಸ್ಕಲ್ ಆನಿ ಆಪ್ಲೆ ಇಸ್ಕಳ್ ದಾಂತ್ ದಾಕವ್ನ್ ಹಾಸೊಂಕ್ ಲಾಗ್ಲೊ. ಮುಖಾರ್ಸುನ್ ಪಾಸ್ಕಲ್ ಸಾಂಗೊಂಕ್ ಲಾಗ್ಲೊ "ದನ್ಪಾರಾ ಇಗರ್ಜೆಂತ್ ಜೆಂವಣ್ ಆಸ್ಲೆಂ ಆಮಿಂ ಥೊಡಿಂ ಗುರ್ವಾರಿಕ್ ಕುಳಾರಾ ಧಾಡುಂಕ್ ಗೆಲ್ಯಾಂವ್. ಪಾದ್ರ್ಯಾಬ್ ಮಾವಾಡೆ ರಾವ್ಲಾ. ಎಕ್ ಹಪ್ತೊ ಮೀಸ್ ನಾ ಖಂಯ್".
ಬಾಯ್ಲಾಂ ಕಾಜಾರಾ ವಿಶ್ಯಾಂತ್ ಗುರ್ವಾರಿ ಧಾಡ್ಚಾ ವಿಶ್ಯಾಂಕ್ ಕಸಲೆಂ ಪಸಲೆಂ ಮ್ಹಣ್ ಉಲವ್ನ್ಚ್ ಆಸ್ಲ್ಲಿಂ. ಲಿಲ್ಲಿ ಬಾಯ್ ಸಾಂಗೊಂಕ್ ಲಾಗ್ಲಿ "ಕಾತ್ತು ಬಾಯೆ ಪುತ್ ಕಿತೆಂ ಕರ್ತಾ ಆತಾ?". ಕಾತ್ತು ಬಾಯ್ ಬೆಜಾರಾಯೆನ್ ಸಾಂಗೊಂಕ್ ಲಾಗ್ಲಿ "ಕಿತೆಂ ಮ್ಹಣ್ಚೆಂ ಡಿಗ್ರಿ ಜಾವ್ನ್ ಘರಾ ಬಸ್ಲಾ. ಕಾಮ್ ನಾ. ಕಾಮ್ ನಾಸ್ತಾಂ ಚೆಡುಂ ಕೋಣ್ ದಿತಾ. ಆಮ್ಕಾಂ ಪಿರಾಯ್ ಜಾವ್ನ್ ಆಯ್ಲಿ". "ಆಜ್ ಕಾಲ್ ಶಿಕ್ಲ್ಯಾಂಕ್ ಕಾಮಾಂ ಮೆಳೊಂಕ್ಯಿ ಕಶ್ಟ್" ಮದೆಂ ದಾಯ್ ಘಾಲಿ ಎಕೆ ಸ್ತ್ರೀಯೆನ್. ಕಾತ್ತು ಬಾಯ್ ಮುಖಾರ್ಸುನ್ ಸಾಂಗೊಂಕ್ ಲಾಗ್ಲಿ" ಡಿಗ್ರಿ ಸೆರ್ವಾತಾ ಮ್ಹಣ್ತಾನಾ ಪರಾತ್ಲೆ ಆಮಿಂ ಪಾದ್ರಿ ಜಾಂವ್ಕ್ ವಚ್ರೆ ಮ್ಹಣೊನ್. ಆಯ್ಕೊಂಕ್ ನಾ. ಆತಾ ಪಳೆ ತಾಕಾಯ್ ತಕ್ಲಿ ಹುನ್ ಆಮ್ಕಾಂಯ್ ಹ್ಯಾ ಮ್ಹಾತಾರೆಪಣಾರ್ ತಕ್ಲಿ ಜಡ್".
"ವ್ಹಯ್ ವ್ಹಯ್ ಆಜ್ಕಾಲ್ ಪಾದ್ರ್ಯಾಬ್ ಜಾಂವ್ಚೆಂಚ್ ಬರೆಂ ಕಾಮ್ ಸೊದ್ಚಿ ಗರ್ಜ್ ನಾ. ಕಾಜಾರ್ ಜಾಂವ್ಚೆ ತರ್ ಚೆಡ್ವಾಂಯ್ ತಯಾರ್ ಆಸ್ತಾತ್" ಪಾಸ್ಕಲ್ ಕಿಸ್ಸ್ಕ್ ಕರ್ನ್ ಹಾಸೊನ್ ಸಾಂಗೊಂಕ್ ಲಾಗ್ಲೊ. ಮೇರಿ ಬಾಯ್ ಫಾಟಿಂ ಪಳೆವ್ನ್ ಹಾಸೊನ್ ಸಾಂಗೊಂಕ್ ಲಾಗ್ಲಿ "ಹಾಸಾರೇ... ಹಾಸಾ....ಬ್ಯೆಂ ಬಿರಾಂತ್ ಕಾಂಯ್ ನಾ ತುಮ್ಕಾಂ". ಮೇರಿ ಬಾಯ್ ಹಾತಾಂತ್ ಕಿತೆಂ ಧರ್ನ್ ಉಕ್ಲುನ್ ಉಕ್ಲುನ್ ದಾಕಯ್ತಾಲಿ. "ಹಾಂವೆ ವಿಚಾರ್ಲೆಂ ಮೇರಿ ಬಾಯೆ ಹಾತಾಂತ್ ಕಿತೆಂ? ಕಾಜಾರಾಚೆ ಲಾಡು ಪುಣಿಂ ಬಾಂದುನ್ ಹಾಡ್ಲ್ಯೆಯ್ ಕಿತೆಂ?". ಮೇರಿ ಬಾಯ್ ಲಜೆವ್ನ್ಶೆಂ ಸಾಂಗೊಂಕ್ ಲಾಗ್ಲಿ "ನ್ಹಯ್ರೆ ಪುತಾ ಮ್ಹಾಕಾ ಹೆಂ ಕಾಜಾರಾಂತ್ ಪೋಟ್ ಪಿರೈಜ್ ಮೆಳ್ಳೆಂ". ಮುಕ್ಕಾರ್ ಬಸ್ಲೆಂ ಬ್ಲೆಂಚಾನ್ ಮದೆಂ ದಾಯ್ ಘಾಲಿ "ಮೇರಿ ಮಾಂಯ್ಕ್ ಸ್ಪೋಟ್ ಪ್ರೈಜ್ ಮೆಳ್ಳೆಂ. ಎಮ್.ಸಿ ನ್ ಸವಾಲ್ ವಿಚಾರ್ಲೆಂ ’ಸಾತಾಕ್ ಸಾತೀ ಸಾಕ್ರಾಮೆಂತ್ ಜೊಡುಂಕ್ ಕೊಣಾಂಚಾನ್ ಸಾಧ್ಯ್ ಆಸಾ?’ ಮ್ಹಣೊನ್. ಮೇರಿ ಮಾಂಯ್ ಸಟ್ಟ್ ಉಟೊನ್ ಜಾಪ್ ದೀಂವ್ಕ್ ಲಾಗ್ಲಿ - ’ಪಾದ್ರ್ಯಾಬಾಂಕ್’ ಮ್ಹಣೊನ್". ಮೇರಿ ಬಾಯ್ ಲಜೆವ್ನ್ಶೆಂ ಮ್ಹಣೊಂಕ್ ಲಾಗ್ಲಿ "ಪುರೊ ಗೊ ತುಜೆ ಶೇಲೆ. ತುಕಾ ಜವಾಬ್ ಕಳಿತ್ ನಾತ್ಲ್ಲಿ ಮ್ಹುಂ!".
ಬಸ್ಸ್ ಮುಕ್ಲ್ಯಾ ಸ್ಟೋಪಾರ್ ರಾವ್ತಾನಾ ಚಡಾವತ್ ಬಾಯ್ಲ್ ಮನ್ಶಾಂ ದೆಂವ್ಲಿ. ಪಾಸ್ಕಲ್ಯೀ ದೆಂವೊಂಕ್ ಆಸ್ಲ್ಲೆಂ. ತೊಯ್ ದೆಂವ್ಲೊ. ದೀಸ್ ಸನ್ವಾರ್ ಪಳ್ಳಿಗುಡ್ಡೆ ಇಗರ್ಜೆಂತ್ ಆಯ್ತಾರಾಚಾ ಲೇಕಾರ್ ಸನ್ವಾರಾಚೆಂ ಮೀಸ್ ಆಯ್ಕೊನ್ ವೆಚೆಂ ಮ್ಹಣೊನ್ ಹಾಂವ್ಯಿ ದೆಂವ್ಲೊ. ಹಾಂವ್ ಆನಿ ಪಾಸ್ಕಲ್ ಮಿಸಾಕ್ ಗೆಲ್ಯಾಂವ್. ಮೀಸಾಚಾ ಅಖ್ರೇಕ್ ಪಾದ್ರ್ಯಾಬಾನ್ ಕಾಜಾರಾಚೆ ಚೀಟಿ ವಾಚೊಂಕ್ ಸುರು ಕೆಲ್ಯೊ. ಎಕಾ ಪಾಟಿಂ ಎಕ್. ತಾಂತುನ್ ಎಕ್ ಪಾದ್ರ್ಯಾಬಾಚಾ ಕಾಜಾರಾಚಿ ಚೀಟ್ಯಿ ಆಸ್ಲ್ಲಿ "ಇಗರ್ಜೆ ವಾಡ್ಯಾಚ್ಯಾ ಸಿಮಾಂವ್ ಆನಿ ಇಜ್ಜು ಸೋಜಾಚಿ ಆಂಕ್ವಾರ್ ಧುವ್ ರೋಸಿ ಡಿ’ಸೋಜಾ ಕಾಜಾರ್ ಜಾಂವ್ಕ್ ಮುಖಾರ್ ಸರ್ಲಾ, ಕಾಳಾವರ್ ಫಿರ್ಗಜೆಚಾ ಅಗೋಸ್ತಿನ್ ಆನಿ ಲುಸಿ ಪಿರೇರಾ ಹಾಂಚೊ ಆಂಕ್ವಾರ್ ಪಾದ್ರಿ ಪೂತ್ ಸಿಲ್ವೆಸ್ಟರ್ ಡಿ’ಸೋಜಾ ಕಡೆಂ. ಹಿ ಜಾವ್ನಾಸಾ ತಾಂಚಿ ಪಯ್ಲಿ ಚೀಟ್. ಹಾಂಚಾ ಮದೆಂ ಕಿತೆಂ ಆಡ್ಕಳ್ ಆಸಾ ತರ್. ಮ್ಹಾಕಾ ಖುದ್ ಯೇವ್ನ್ ಸಾಂಗ್ಚೆ" ಪಾದ್ರ್ಯಾಬ್ ಚೀಟಿ ವಾಚುನ್ ನಿಮಾಣೆಂ ಬೆಸಾಂವಾಂಕ್ ಆಯ್ತೊ ಜಾಲೊ. ಮೀಸ್ ಸಂಪ್ಲೆಂ.
ಅಖ್ರೇಕ್ ಪಾದ್ರ್ಯಾಬ್ ಆನ್ಯೇಕ್ ಕಳವ್ಣಿ ಆಸಾ ಬಸಾ ಮ್ಹಣೊಂಕ್ ಲಾಗ್ಲೊ. ಕಿತೆಂ ಗಾಯ್ ಮ್ಹಣೊನ್ ಆಮಿಂಯ್ ಬಸ್ಲ್ಯಾಂವ್. ಪಾದ್ರ್ಯಾಬ್ ಮ್ಹಣೊಂಕ್ ಲಾಗ್ಲೊ "ತುಮ್ಕಾಂ ಸಕ್ಕಡಾಂಕ್ ಕಳಿತ್ ಆಸಾ, ಮ್ಹಜಿ ಬಾಯ್ಲ್ ಬಾಳಂತ್ ಜಾಲಾ ಮ್ಹಣೊನ್. ಬಾಳ್ಶಾಚೆಂ ವೋಲ್ ಯೆಂವ್ಚಾ ಆಯ್ತಾರ್ ದಿಸಾ ಮ್ಹಜಾ ಬಾಯ್ಲೆಚಾ ಫಿರ್ಗಜೆಂತ್ ಸಕಾಳಿಂ ಆಟ್ ವರಾಂಚೆರ್ ದವರ್ಲಾ, ಉಪ್ರಾಂತ್ ಬಾಯ್ಲೆಗೆರ್ ಜೆವಾಣ್ ಆಸ್ತೆಲೆಂ. ತುಮ್ಕಾಂ ಸಕ್ಕಡಾಂ ಹಾಂವ್ ಒತ್ತಾಯೆಚೆಂ ಆಪವ್ಣೆಂ ದಿತಾ".
ಇಗರ್ಜೆ ಥಾವ್ನ್ ಭಾಯ್ರ್ ಪಡಾಜೆತರ್ ವರಾಂಡಾರ್ ಬಸ್ಲಾತ್ ಬೂಕ್ - ಪೆನ್ನ್ ಘೆವ್ನ್, ಇಗರ್ಜೆಚೆ ಥೊಡೆ ಕಾಂಟ್. "ಕೊಣಾಂಕ್ ಕೊಣಾಂಕ್ ವೋಲಾಕ್ ವಸುಂಕ್ ಮನ್ ಆಸಾ ಕಾಡಾ ಶೆಂಭರ್ ರುಪಾಯ್ ಅನಿ ನಾಂವ್ ದಿಯಾ. ವಚೊಂಕ್ ಬಸ್ಸಾಚಿ ವ್ಯವಸ್ಥಾ ಆಸಾ" ಮ್ಹಣೊಂಕ್ ಲಾಗ್ಲೆ. "ಪಾದ್ರ್ಯಾಬಾಚಾ ಬಾಳ್ಶಾಚಾ ವೊಲಾಕ್ ವಚಾನಾಸೆಂ ರಾವೊಂಕ್ ಜಾತಾಯೇ" ಮ್ಹಣೊನ್ ಎಕೆಕ್ಲೆಚ್ ಪೈಶೆ ದೀವ್ನ್ ನಾಂವ್ ದೀಂವ್ಕ್ ಲಾಗ್ಲೆ. ಹಾಂವ್ ಆನಿ ಪಾಸ್ಕಲ್ ಥಂಯ್ ಥಾವ್ನ್ ವ್ಹಳೂ ನಿಸರ್ಲ್ಯಾಂವ್.
ಲಾಗ್ಶಿಲ್ಯಾ ಸಾಂಬ್ರಾಯಾಚಾ ಹೊಟೆಲಾಂತ್ ಚಾಯ್ ಪಿಯೊಂಕ್ ಬಸ್ಲ್ಯಾಂವ್. ಆಮ್ಚಾ ಮುಖಾರ್ ಎಕ್ಲೊ ’ಭಯ್ಯ ಮಲ್ಲಿಗೆ" ಸಾಂಜೆಚೆಂ ಪತ್ರ್ ವಾಚೊನ್ ಆಸ್ಲ್ಲೊ. ಮುಖ್ಲ್ಯಾ ಪಾನಾರ್ ವ್ಹಡ್ಲ್ಯಾ ಅಕ್ಷರಾಂತ್ ಬರಯಿಲ್ಲೆಂ. ’ಮದುವೆಯಾಗಲು ಅವಕಾಶ ಕೋರಿ ಅಮೇರಿಕಾದಲ್ಲಿ ಮಾದ್ರಿಗಳ ಮನವಿ’!!!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications