ಪ್ರಕಾಶ್ ಪಾಡಗಾಂವಕಾರ್ ಹಾಂಚೆ ಕವಿತೆಂತಲೊ ಅಧ್ಯಾತ್ಮೀಕ್ ಸೂರ್ (- ಅಂಜೂ ಸಾಖರದಾಂಡೆ)
ಪ್ರಪತ್ರಾಚಿ ಮಾಂಡಾವಳ್
ಅಧ್ಯಾತ್ಮ್ ಮ್ಹಣಲ್ಯಾರ್ ಕಿತೆಂ?
ಕೊಂಕಣಿ ಕವಿತಾ
ಪ್ರಕಾಶ್ ಪಾಡಗಾಂವಕಾರ್ ಹಾಂಚಿ ವಳಖ್
ಪ್ರಕಾಶ್ ಪಾಡಗಾಂವಕಾರ್ ಹಾಂಚಿ ಅಧ್ಯಾತ್ಮೀಕ್ ನದರ್
ಪ್ರಕಾಶ್ ಪಾಡಗಾಂವಕಾರ್ ಹಾಂಚ್ಯೊ ಕವಿತಾ
ತಾಂಚಿ ಕಾವ್ಯಾಂತಲಿ ಭಾಸ್ ಆನಿ ಶೈಲೀ
ನಿಶ್ಕರ್ಶ್
ಅಧ್ಯಾತ್ಮ್ ಮ್ಹಣಲ್ಯಾರ್ ಕಿತೆಂ?
ಕೊಂಕಣೀಂತಲಿ ಅಧ್ಯಾತ್ಮೀಕ್ ಕವಿತಾ ಹ್ಯಾ ವಿಶಯಾಚೆರ್ ಪ್ರಪತ್ರ್ ಮಾಂಡಟಾ ಆಸತನಾ ಅಧ್ಯಾತ್ಮ್ ಮ್ಹಣಲ್ಯಾರ್ ಕಿತೆಂ ತೆಂ ಜಾಣೂನ್ ಘೆವಪ್ ಭೊವ್ ಗರಜೆಚೆಂ.
ಅಧ್ಯಾತ್ಮ್ ಮ್ಹಣಜೆ ಮನಾಚಿ ಶಾಂತೀ, ಭೌತೀಕ್ ಜಿಣೆ ಪರಸ್ ಆಂತರೀಕ್ ಮುಲ್ಯಾಂ, ಉದ್ದೆಶ್ಯ್ ಆನಿ ಜಾಣೀವ್ ಹಾಂಚೊ ಅಣಭವ್. ಅಧ್ಯಾತ್ಮ್ ಹಿ ಎಕ್ ಭೊವಆಯಾಮಿ ಸಂಕಲ್ಪನಾ ಜಾತೂಂತ್ ಜಿವನಾಚೊ ಅರ್ಥ್, ಆತ್ಮೊನ್ನತಿ ಆನಿ ಸ್ವತ್, ಸೈಮ್ , ಮನೀಸಪಣ್ ಆನಿ ದೆವ್ ಹಾಚೆ ಕಡೆನಚ್ಯಾ ಸಂಬಂದಾಚೊ ಸೊದ್. ಮನಶಾಚೊ ಸ್ವತಚ್ಯಾ ಆತ್ಮ್ಯಾಚೊ ಸೊದ್, ಆತ್ಮೊ ಆನಿ ಪರಮಾತ್ಮ್ಯಾಚೆಂ ನಾತೆಂ ಸಮಜೂನ್ ಘೆವಪ್ ಆನಿ ಜಿಣೆಚೊ ಖರೊ ಅರ್ಥ್ ಸಮಜೂನ್ ಘೆವಪಾಚೊ ಅಂತರ್ಮುಖ್ ಪ್ರವಾಸ್.
ಆದಿ ಶಂಕರಾಚಾರ್ಯಾಚ್ಯಾ ಮತಾ ಪ್ರಮಾಣ್- ಅಧ್ಯಾತ್ಮ್ ಮ್ಹಣಜೆ ಆತ್ಮೊ ಆನಿ ಬ್ರಹ್ಮ್ ಹಾಂಚೊ ಸುಮೆಳ್.
ಸ್ವಾಮಿ ವಿವೆಕಾನಂದ್ ಹಾಂಚ್ಯಾ ಮತಾ ಪ್ರಮಾಣ್ ದರೆಕಾ ಮನಶಾ ಭಿತರ್ ಆಶಿಲ್ಲೆ ದೈವಿ ಶಕ್ತೀಚೊ ಜಾಲ್ಲೊ ಸಾಕ್ಷಾತ್ಕಾರ್.
ಶ್ರಿ ಅರವಿಂದ್ ಹಾಂಚ್ಯಾ ಮತಾ ಪ್ರಮಾಣ್- ಉಚ್ಚ್ ಚೆತನೆನ್ ಮನ್, ಜೀಣ್ ಆನಿ ಕೂಡ್ ಹಾಂಚೆಂ ಪುರಾಯ್ ರುಪಾಂತರಣ್. (Transformation of human life through the descent of higher consciousness into mind, life and body.)
ಆತ್ಮ್ಯಾಚೊ ಖರೊ ಸಬಾವ್ ವಳಖಪ್ ಆನಿ ತೊ ಬ್ರಹ್ಮಾಂಡಾ ಕಡೆನ್ ಕಸೊ ಜೊಡಿಲ್ಲೊ ಆಸಾ ತಾಚೊ ಘೆತಿಲ್ಲೊ ಬೊಧ್ ಮ್ಹಣಲ್ಯಾರ್ ಅಧ್ಯಾತ್ಮ್.
ಆತಾಂ ಬ್ರಹ್ಮಾಂಡ್ ಮ್ಹಣಲ್ಯಾರ್ ಕಿತೆಂ ತೆಂಯ್ ಜಾಣೂನ್ ಘೆವಪ್ ಗರಜೆಚೆಂ.
ಬ್ರಹ್ಮಾಂಡ್ ಮ್ಹಣಲ್ಯಾರ್ ಸುರ್ಯ್, ಚಂದ್ರ್, ತಾರೆ, ಗಿರೆ, ಆಕಾಶಗಂಗಾ, ಕಾಳ್ ಆನಿ ತಾತೂಂತ್ ಆಶಿಲ್ಲೆ ಸಗಳೆ ಪದಾರ್ಥ್ ಆನಿ ಉರ್ಜಾ ಹಾಂಚೆಂ ಎಕತ್ರೀತ್ ವಿಶ್ವ್.
ಕೊಂಕಣಿ ಕವಿತಾ
ಎಕ್ ಗಜಾಲ್ ಜಾಣವತಾ ಕಿ ಕೊಂಕಣಿ ಸಾಹಿತ್ಯಾಂತ್ ಕವಿತಾ ಹೊ ಸಾಹಿತ್ಯ್ ಪ್ರಕಾರ್ ಸಂಖ್ಯಾತ್ಮಕ್ ತಸೊಚ್ ಗುಣಾತ್ಮಕ್ ನದರೆನ್ ಸಗಲ್ಯಾ ಮೊಡೀನೀಂ ಸಗಲ್ಯಾಂತ್ ಚಡ್ ಪ್ರಮಾಣಾಂತ್ ಪ್ರತಿಭಾವಂತ್ ಕವಿ ಕವಯಿತ್ರೀನೀಂ ಕೆಳಯಲ್ಲೊ ದಿಶ್ಟಿ ಪಡಟಾ. ಕೊಂಕಣಿ ಕವಿತೆಚಿ ಸುರವಾತ್ ಸಂತ್ ಸೊಯರೊಬಾನಾಥ್ ಆಂಬಿಯೆ ಆನಿ ಉಪರಾಂತ್ ಕೃಷ್ಣಂಭಟ್ ಬಾಂದಕಾರ್ ಹಾಂಚೆ ಪಸೂನ್ ಸುರೂ ಜಾಲಿ ಅಶಿ ರೂಜವಾತ್ ಮೆಳಟಾ.
ತ್ಯಾ ಮುಳಾವಣಾಚೆರ್ ಆದಾರುನ್ ಅರ್ವಿಲ್ಲ್ಯಾ ಕಾಳಾಂತ್ ಸಾಬಾರ್ ಪ್ರತಿಭಾವಂತ್ ಕವೀನೀಂ ಕವಿತೆಚೊ ಮಳೊ ಫುಲಯಲೊ.
ಕೊಂಕಣಿ ಕವಿತೆಂತ್ ಮುಖೆಲ್ ಕಾಲಖಂಡ್ :-
1910 ತೆ 1959 ಪಯಲೊ ಕಾಲಖಂಡ್-ಗರ್ಭಕಣಿ ಯುಗ್
1960 ತೆ 1989 ದುಸರೊ ಕಾಲಖಂಡ್-ಭಾಂಗರಾಯುಗ್
1990 ತೊ ಆತಾಂ ಮೆರೆನಚೊ ತಿಸರೊ ಕಾಲಖಂಡ್-ವಜ್ರಲಿಖಣಿ ಯುಗ್
ಅಶೆ ಅಭ್ಯಾಸಾಚೆ ನದರೆನ್ ತೀನ್ ಕಾಲಖಂಡ್ ಘಾಲೂಂ ಯೆತಾತ್.
1960 ತೆ 1989 ದುಸರೊ ಕಾಲಖಂಡ್-ಭಾಂಗರಾಯುಗ್. ಹ್ಯಾ ಕಾಲಖಂಡಾಂತ್ ‘ಬಾಮರ್’ ಕಾಳ್ ಆನಿ ‘ಬಾಂಗರ್’ ಕಾಳ್ – ಅಶೆ ಉದ್ದೆಶೂನ್ ಡ್~ಒ. ರಾಜಯ್ ಪವಾರ್ ಹಾಂಣಿ ಮ್ಹತ್ವಾಚೆ ಪ್ರವಾಹ್ ಸಾಂಗಲ್ಯಾತ್.
ಬಾಮರಾಂತಲೊ ಬಾ ಮ್ಹಣಲ್ಯಾರ್ ಬಾಕೀಬಾಬ್ ಬೊರಕಾರ್, ಮ್ ಮ್ಹಣಲ್ಯಾರ್ ಮನೊಹರರಾಯ್ ಸರದೆಸಾಯ್ ಆನಿ ರ್ ಮ್ಹಣಲ್ಯಾರ್ ರಮೆಶ್ ವೆಳೂಸ್ಕಾರ್. ಬಾಕೀಬಾಬಾಂನೀಯ್ ಅಧ್ಯಾತ್ಮೀಕ್ ಆಶಯಾಚ್ಯೊ ಕವಿತಾ ರಚಲ್ಯಾತ್. ಪಾಡುಂರಂಗ್ ಭಾಂಗಿ ಹಾಂಣೀಯ್ ಕಾಂಯ್ ಅಧ್ಯಾತ್ಮೀಕ್ ಕವಿತಾ ರಚಲ್ಯಾತ್.
ರಮೆಶ್ ವೆಳೂಸ್ಕಾರ್ ಹಾಂಚೆ ಸಮಕಾಲೀನ್ ಕವೀಂ ಭಿತರ್ ಮಾಧವ್ ಬೊರಕಾರ್ ಆನಿ ಪ್ರಕಾಶ್ ಪಾಡಗಾಂವಕಾರ್ ಹಾಂಚೊ ಆಸಪಾವ್ ಜಾತಾ.
ಅಧ್ಯಾತ್ಮೀಕ್ ಕವಿತೆಚೊ ಪ್ರವಾಹೂಯ್ ಕೊಂಕಣಿ ಸಾಹಿತ್ಯಾಂತ್ ದಿಸೂನ್ ಯೆತಾ.ಸಂತ್ ಸಾಹಿತ್ಯಾ ಸಾವನ್ ಆಧುನೀಕ್ ಕವಿತೆ ಮೆರೆನ್ ಆತ್ಮಾನುಭವ್, ಪರಮ್ ಸತ್ತೆಚೊ ಸೊದ್ ಆನಿ ಜಿಣೆಚೊ ಅರ್ಥ್ ಸೊದಪಾಚೆಂ ಕಾಮ್ ಕವಿ ಕಲಾತ್ಮಕ್ ಜಾಣ್ ಬಾಳಗೂನ್ ಸರ್ಜನಶೀಲ್ ರಿತೀನ್ ಅಭಿವ್ಯಕ್ತ್ ಕರತಾ. ಕೊಂಕಣಿ ಕವಿತೆಚೆ ಬಾಬತೀಂತ್ ಠಳಕ್ ಪಣಾನ್ ಶಂಕರ್ ರಾಮಾಣಿ ಹಾಂಚೆಂ ನಾಂವ್ ಮ್ಹಾಲಗಡ್ಯಾ ಕವಿ ಭಿತರ್ ಘೆವಚೆಂಚ್ ಪಡಟಲೆಂ.ತಾಂಚೆ ಫಾಟೊಫಾಟ್ ಸಂಖ್ಯಾತ್ಮಕ್ ಆನಿ ಗುಣಾತ್ಮಕ್ ಪಾಂವಡ್ಯಾರ್ ವಿಚಾರ್ ಕರತಾ ಆಸತನಾ ಪ್ರಕಾಶ್ ದಾಮೊದರ್ ಪಾಡಗಾಂವಕಾರ್ ಹಾಂಚೆಂ ನಾಂವ್ ಪಯಲೆ ಸುವಾತೆಚೆರ್ ಯೆತಾ. ತಾಂಚಿ ಕವಿತಾ ಫಕತ್ ಧರ್ಮೀಕ್ ಉಪದೆಶಾಂತ್ ಸಿಮೀತ್ ನಾ ತರ್ ತಿ ಮನೀಸ್ ಜಿಣೆಂತಲ್ಯಾ ಆಂತರೀಕ್ ಸಂಘರ್ಶಾಕ್ ಹಾತ್ ಘಾಲತಾ.
ಪ್ರಕಾಶ್ ದಾಮೊದರ್ ಪಾಡಗಾಂವಕಾರ್ ಹಾಂಚಿ ವಳಖ್-
ಪ್ರಕಾಶ್ ಪಾಡಗಾಂವಕಾರ್ ಹೆ ಕೊಂಕಣೀಂತಲೆ ಎಕ್ ನಾಮನೆಚೆ ಕವೀ. ತಾಂಚೊ ಜಲ್ಮ್ 4 ಡಿಸೆಂಬರ್, 1948 ಹ್ಯಾ ದಿಸಾ ಜಾಲೊ.72 ವರ್ಸಾಂಚೆ ಪಿರಾಯೆಚೆರ್ 29 ಎಪ್ರಿಲ್, 2021 ಹ್ಯಾ ದಿಸಾ ಕೊವೀಡ್ ಕಾಳಾಂತ್ ತೆ ದೆವಾ ಘರಾ ಗೆಲೆ. ಪಾಡಗಾಂವಕಾರ್ ಹಾಂಚಿ ಅಧ್ಯಾತ್ಮೀಕ್ ಕವಿತಾ ಆತ್ಮ್ಯಾಚ್ಯಾ ಸೊದಾಕ್ ಕೆಂದ್ರೀತ್ ಆಸಾ. ತೆ ಅಧ್ಯಾತ್ಮಾಕ್ ಧರ್ಮಾಚೆ ಫಾಸ್ಕೆಂತ್ ಬಾಂದೂನ್ ದವರನಾತ್ ತರ್ ತೆ ಆತ್ಮಾನುಭವ್ ಮ್ಹೂಣ್ ಮಾಂಡಟಾತ್. ತಾಂಚೆ ಕವಿತೆಂತ್ ಕಾಳಖಾ ಕಡಲ್ಯಾನ್ ಉಜವಾಡಾ ಕಡೆನ್ ವಚಪಾಚೊ ಹಾವೆಸ್, ಆಶಾವಾದ್, ಆತ್ಮ್ ಸಾಕ್ಷಾತ್ಕಾರ್, ಮನೀಸಪಣ್, ಸಮಾನತಾಯ್ ಹಾಂಚೊ ಆಸಪಾವ್ ಜಾತಾ.
ಆಯಜವೆರ್ ತಾಂಚೆ 9-10 ಕವಿತಾಝೆಲೆ ಉಜವಾಡಾಕ್ ಆಯಲ್ಯಾತ್.ಸಾದಾರಣ್ 4 ದಸಕಾಂ ವಯರ್ (45 ವರ್ಸಾಂ) ತಾಂಣಿ ಕೊಂಕಣೀಂತ್ ಸಾತತ್ಯಾನ್ ಕವಿತಾ ರಚಲ್ಯಾತ್. 1976 ತೆ 2020 ಹೊ ತಾಂಚೊ ರಚನಾ ಕಾಳ್. 1. ‘ಉಜವಾಡಾಚೀಂ ಪಾವಲಾಂ’ (1976), 2. ‘ವಾಸ್ಕೊಯನ್’ (1977), 3. ‘ಹಾಂವ್ ಮನೀಸ್ ಅಶ್ವತ್ಥಾಮೊ’ (1985), 4. ‘ಕವಿತಾ: ಕಾಳ್ ರೆಲ್ವೆಚ್ಯೊ, ಮನ್ ಹಾರಶಾಂಚ್ಯೊ, ಪಾವಸ್ ಪಾಣಯಾಂಚ್ಯೊ’ (1993), 5. ‘ಸರ್ಗ್ ಘಡಪಾಕ್ ಧರ್ತರೆಚೊ’ (1994), 6. ‘ವ್ಹಾಂವತಿ ನ್ಹಂಯ್ ಕಾಳಾಚೀ’ (2003), 7. ‘ಬ್ರಹ್ಮಾಂಡ್-ಯೊಗಿ ಚಿಂರಂತನಾಚೊ’(2008), 8. ‘ಪುನರಾರ್ಥೊಪನಿಶದ್’ (2014), 9. ‘ದಾಣ್ಯಾ ಯೆದಿ ಧರ್ತರಿ ’ (2020) ಹೆ 9 ಕವಿತಾಝೆಲೆ ತಶೆಂಚ್ 10. ‘ಸಮ್ರಾಟ್ ಅಶೊಕ್ “ಶಿಲ್ಪಿ , ಅಖಂಡ್ ಭಾರತಾಚೊ ಮುಳಾರಂಭಿ ಸಂವಸಾರೀಕ್ ಶ್ರೀಬುದ್ಧಧರ್ಮ್ ಪ್ರಸಾರಾಚೊ” ಮಹಾಕಾವ್ಯ್ (2022) ಹೆಂ ಮಹಾಕಾವ್ಯ್ ಉಜವಾಡಾಕ್ ಆಯಲಾಂ. ತಾಂಚ್ಯಾ ‘ಹಾಂವ್ ಮನೀಸ್ ಅಶ್ವತ್ಥಾಮೊ’ ಹ್ಯಾ ಕವಿತಾಝೆಲ್ಯಾ ಖಾತೀರ್ ತಾಂಕಾಂ ಕೆಂದ್ರೀಯ್ ಸಾಹಿತ್ಯ್ ಅಕಾದೆಮೀಚೊ ಪುರಸ್ಕಾರ್ ಫಾವೊ ಜಾಲಾ.
ಪ್ರಕಾಶ್ ಪಾಡಗಾಂವಕಾರ್ ಹಾಂಚ್ಯೊ ಕವಿತಾ-
‘ಉಜವಾಡಾಚೀಂ ಪಾವಲಾಂ’ (1976) ಹೊ ತಾಂಚೊ ಪಯಲೊ ವಯಲೊ ಕವಿತಾ ಝೆಲೊ. ಉಜವಾಡಾಚೊ ಧ್ಯಾಸ್ ಆಶಿಲ್ಲೊ ಹೊ ಕವೀ. ಹ್ಯಾ ಝೆಲ್ಯಾಂತ್ ವಟ್ಟ್ 50 ಕವಿತಾಂಚೊ ಆಸಪಾವ್ ಜಾತಾ. ಹ್ಯಾ ಝೆಲ್ಯಾಚೆ ಪ್ರಸ್ತಾವನೆಂತ್ ಪದ್ಮಶ್ರಿ ಬಾಕೀಬಾಬ್ ಬೊರಕಾರ್ ಮ್ಹಣಟಾತ್ ಕಿ ಪ್ರಕಾಶ್ ಬಾಬ್ ಹೆ ಎಕ್ ಪ್ರತಿಭಾವಂತ್ ಕವೀ. “ತಾಂಕಾಂ ದಿಸತಾ ತೊ ಉಜವಾಡ್ ಹೊ ಉಜವಾಡ್ ಆನಿ ಕಾಳೊಖ್, ಜೀವನ್ ಆನಿ ಮರಣ್, ಪ್ರೆಮ್ ಆನಿ ವ್ಯಥಾ, ಸುಖ್ ಆನಿ ದೂಖ್,ಜ್ಞಾನ್ ಆನಿ ಅಜ್ಞಾನ್, ಸೈಮ್ ಆನಿ ತಾಚೆಂ ಋತೂಚಕ್ರ್, ವಸ್ತೂಂಚೆ ಆಕಾರ್ ಪ್ರಕಾರ್ ಆನಿ ತಾಂಚೆ ಸ್ಪಂದ್ ಆನಿ ವಿಕಾರ್ ಹ್ಯಾ ಸಗಲ್ಯಾಂಚಿ ಉತ್ಪತ್ತೀ, ಸ್ಥಿತಿ ಆನಿ ಲಯ್ ಜಾಕಾ ಲಾಗೂನ್ ಘಡಟಾ ತೊ ಸನಾತನ್ ಉಜವಾಡ್. ತೊ ಉಜವಾಡ್ ಮ್ಹಣಲ್ಯಾರಚ್ ಸತ್ ಚಿತ್ ಆನಂದ್.” ಧ್ಯಾಸಾ ವಾಂಗಡಾಚ್ ಕಾವ್ಯ್ -ವ್ಯಕ್ತಿತ್ವಾಚೆಂ ಅಧ್ಯಾತ್ಮೀಕರಣ್ ಕರಪಾಚೆಂ ಶ್ರೆಯ್ ತಾಂಕಾಂ ಲಾಬಲಾಂ. ತಾಂಚೆಂ ನಾಂವ್ ಪ್ರಕಾಶ್. ಉಜವಾಡ್ ಹೊ ‘ತಮಸೊ ಮಾ ಜ್ಯೊತಿರ್ಮಗಯ್’ ಹೆಂ ತತ್ವ್ ವ್ಯಕ್ತ್ ಕರತಾ. ಹ್ಯಾ ಝೆಲ್ಯಾಂತಲೆ ‘ಉಜವಾಡಾಚೆಂ ಪಾವಲ್’ ಹೆ ತಾಂಚೆ ಪಯಲೆ ವಯಲೆ ಕವಿತೆಂತ್ ತೆ ಮ್ಹಣಟಾತ್-
“ಉಜವಾಡಾಚೆಂ ಪಾವಲ್ ಮ್ಹಜೆಂ ಕಾಳಖಾ ಸೊಪಣ್ ಚಡಟಲೆಂ
ಯೆವಂ ತುಫಾನ್ ಜಾವಂ ಮೊಡ್ ಸಹಜತಾಯೆನ್ ಪರತಿತಲೆಂ”
ಪ್ರಕಾಶ್ ಪಾಡಗಾಂವಕಾರ್ ಹೆ ಶ್ರಿ ಅರವಿಂದಾಚೆ ತತ್ವಪ್ರಣಾಲೀಚೆ ಎಕ್ ಉಪಾಸಕ್. ‘ಮ್ಹಾ-ಯೊಗಿ ಅರವಿಂದಾಕ್’ ಹ್ಯಾ ನಾಂವಾನ್ ರಚಿಲ್ಲೆ ಕವಿತೆಂತ್ ತೆ ಮ್ಹಣಟಾತ್-
“ಉಜವಾಡಾಚೊ ದೂತ್ ತೂಂ ಅಮರೂತಾಚಿ ನ್ಹಂಯ್
ಭಾಗ್ಯಾ ಲ್ಹಾರ್ ಫುಟಲೆಂ, ತುಜೀಂ ಪಾವಲಾಂ ಥಾರಲೀಂ ಥಂಯ್…….
ಮ್ಹೂರ್ತ್ ತುಜಿ ದೊಳ್ಯಾಂತ್ ಸಾಂಠಯತ್ ನಮನ್ ತುಕಾ ಕರತಾಂ
ಅರವಿಂದಾ ತೂಂ ಸರ್ಗ್, ತುಜ್ಯಾ ಉಜವಾಡಾಂತ್ ನ್ಹಾತಾಂ”
‘ವಾಸ್ಕೊಯನ್’ (1977) ಹ್ಯಾ ದುಸಱ್ಯಾ ಝೆಲ್ಯಾಂತ್ ದೀರ್ಘ್ ಕವಿತಾ ಆಸಪಾವತಾತ್. ತಾಂಚ್ಯಾ ಕವಿತಾಂನಿ ಕಾಳಖಾ ಕಡಲ್ಯಾನ್ ಉಜವಾಡಾ ಕಡೆನ್ ವಚಪಾಚೊ ಪ್ರವಾಸ್ ಚಾಲೂಚ್ ಉರತಾ.ತಶೆಂಚ್ ತಮಸ್ ಹಾಚೆ ಸಂಬಂದಾನ್ ಕವಿಚ್ಯಾ ಮನಾಂತ್ ಆಶಿಲ್ಲೊ ರಾಗ್ ಸುಚಯತಾ. ವಾಸ್ಕೊ ಶಾರಾಂತ್ ಎಕಾ ಕಾಳಾರ್ ಚಲತಲ್ಯಾ ಕಾಳ್ಯಾ-ವಾಯಟ್ ಘಡಣೂಕಾಂಚೊ ತಾಂಣಿ ಥಾವ್ ಘೆತಲಾ. ಉದ್ದೆಗೀಕರಣ್, ಪ್ರದೂಶಣ್ ಆನಿ ಬಾಯಣಾಚ್ಯಾ ಶಿಂದಳಕಿ ವೆವಸಾಯಾಕ್ ಲಾಗೂನ್ ವಾಸ್ಕೊ ಶಾರಾಚಿ ಜಾಲ್ಲಿ ಅವತಿಕಾಯ್ ಮಾಂಡಲ್ಯಾ.
1;“ವಾಸ್ಕೊ ಮ್ಹಳ್ಯಾರ್ ಎಕ್ ರಸಾಯನ್
ಖತಖತತ್ ರಾವಪಾಚೆಂ
ರಸಾಯನ್ ತೆಂ ಹೆಂಚ್ ಕಾಯ್ ಕಿತೆಂ
ವಿಶ್ವಾಚ್ಯಾ “ಉದ್ದಾರಾಚೆಂ”?”
30. ಹೊ ವಾಠಾರ್ ಫ್~ಎಶನೆಬಲ್ ಬಾಯಲೆವರೀ
ದಿಸಾ-ಉಜವಾಡಾ ಗಿರೆಸ್ತಕಾಯ್ ಮಿರಯತಾ
ಆನಿ ಕಾಳೊಖ್ ಪಡೂಂಕ್ ಲಾಗತಕಚ್
ರಂಗಪಂಚಮ್ ಮನಯತಾ.
‘ಹಾಂವ್ ಮನೀಸ್ ಅಶ್ವತ್ಥಾಮೊ’ (1985) ಹ್ಯಾ ಝೆಲ್ಯಾಂತ್ 55 ಕವಿತಾ ಆಸಪಾವತಾತ್. ಹ್ಯಾ ಝೆಲ್ಯಾಂತ್ ತಾಂಚೊ ಸೊದ್ ಅಶ್ವತ್ಥಾಮ್ಯಾಚ್ಯಾ ಸಂಕೆತಾಂನಿ ವ್ಯಕ್ತ್ ಜಾಲ್ಲೊ ದಿಸತಾ. ಹೊ ನಕಾರ್ ದರ್ಶವಪಿ ಸೊದ್ ಕವೀಕ್ ಮಾನವನಾ.
ತೆ ಅವಸ್ಥೆಂತಲ್ಯಾನ್ ಭಾಯರ್ ಸರೂನ್ ‘ಅಸತೊ ಮಾ ಸದಗಮಯಾ’ ಕಡೆನ್ ವಚಪಾಚೊ ಧ್ಯಾಸ್ ತೆ ಘೆತಾತ್. ಹಾಂವ್ ಮನೀಸ್ ಅಶ್ವತ್ಥಾಮೊ ಹೆ ಕವಿತೆಂತ್
ಹಾಂವ್ ಮನೀಸ್
ಹಾಂವ್ ಅಶ್ವತ್ಥಾಮೊ....
ಅಶೆಂ ಮ್ಹಣತ್
ಹಾಂವ್ ಆಧುನೀಕ್ ಮನೀಸ್
ಹಾಂವ್ ಅಶ್ವತ್ಥಾಮೊ” ಅಶೆಂ ಮ್ಹಣಟಾತ್.
‘ಮ್ಹಜಿ ಜೀಣ್’ ಹೆ ಕವಿತೆಂತ್ ತೆ ಮ್ಹಣಟಾತ್-
“ಬ್ರಹ್ಮಾಂಡಾಚ್ಯಾ ವಿಪುಲಕಾಯೆಂತ್
ಮ್ಹಜಿ ಜೀಣ್ ಇಲ್ಲೀಶೀ
ಜಾಲ್ಯಾರಯ್ ತಿಚೊ ವ್ಹಡ್ ಇತಿಹಾಸ್
ಪಾಳಾಂ ಮುಳಾಂ ವಿಶ್ವ್ ನಿರ್ಮಣೆಚ್ಯಾ ಖಿಣಾಪಸೂನ್
ಆನಿ ತಾಜೊ ತಿಗಾವ್ ವಿಶ್ವಲಯೆಮೆರೆನ್”
‘ಕಾಳೊಖ್ ಗುಪಾಟ್’ ಹೆ ಕವಿತೆಂತ್ ತೆ ಮ್ಹಣಟಾತ್
“ನಿರರ್ಥತಾಯೆಚೊ
ಕಾಳೊಖ್ ಗುಪಾಟ್
ಉಕ್ತಾಯತಲೊ ವಾಟ್
ಉಜವಾಡಾಚೀ”
‘ಸರ್ಗ್ ಘಡಪಾಕ್ ಧರ್ತರೆಚೊ’(1993) ಹ್ಯಾ ಕವಿತಾ ಝೆಲ್ಯಾಂತ್ ಕವೀಕ್ ಆಪಣಾಕ್ ಪಾವಪಾಚಿ ಸುವಾತ್ ಆನಿ ವಚಪಾ ಫಾಟಲೊ ಉದ್ದೆಶ್ಯ್ ಉಫಾಳೂನ್ ಆಯಿಲ್ಲೊ ದಿಸತಾ. ಹ್ಯಾ ಝೆಲ್ಯಾಂತಲ್ಯೊ ಕವಿತಾ ಡಿಸೆಂಬರ್ 1988 ತೆ ಜಾನೆವಾರಿ 1990 ಹ್ಯಾ ಕಾಳಾಂತ್ ಬರಯಿಲ್ಲ್ಯೊ. ಹ್ಯಾ ಝೆಲ್ಯಾಂತ್ 3 ಆಶಯಾಂಚ್ಯೊ ಕವಿತಾ ಗುಂಥಲ್ಯಾತ್. ದೆಖೀಕ್- ಮೊಗ್ ಅಜರಂವರೀ, ಕೃತಾರ್ಥ್ ಸುಗುರ್ವೊ ಆನಿ ಭವಿಷ್ಯ್ ದಿಶ್ಟಾವೊ.
“ಲ್ಹಾರಾರ್ ಲ್ಹಾರಾಂ ಫುಟಚೀ, ತಶೊ
ಜಿವಾಕ್ ವೆಣೊರ್ ವೆಣೊ
ಬ್ರಹ್ಮಾಂಡ್ ವಂಶಾ ಜೀವ್ ಭೊಂವತಾ-
ಪೊಟಾಂತ್, ಜೊ ಕಲ್ಪಾಂ ಜಿಣೊ”
ಭವಿಷ್ಯ್ ದಿಶ್ಟಾವೊ ಹೆ ಕವಿತೆಂತ್
ಬ್ರಹ್ಮಾಂಡ್ ಯೊಗಿ ಚಿರಂತನಾಚೊ
ಮಾರತಾಂ ತಾಸಾಂ ಕಾಳಾರ್
ನದರ್ ಆರಪಾರ್ ಭೆದೀತ್ ಭೊಂವತಾ
ಆಸನಸ್ಥ್ ಸೂರ್ಯರಥಾರ್
....
ಪ್ರಾಣಾ ಪ್ರಾಣಾಂತ್ ವಿಚಾರ್ ಸಾತ್ವೀಕ್
ಮನೀಸಜೀಣ್ ಧಾದೊಸತಲೀ
ಸರ್ಗ್ ಘಡಪಾಕ್ ಧರ್ತರೆಚೊ
ಕಲ್ಪ್ ನವೊ ಆರಂಭಲಾ.”
‘ಕವಿತಾ: ಕಾಳ್ ರೆಲ್ವೆಚ್ಯೊ, ಮನ್ ಹಾರಶಾಂಚ್ಯೊ, ಪಾವಸ್ ಪಾಣಯಾಂಚ್ಯೊ’ (1994) ಹ್ಯಾ ಝೆಲ್ಯಾಂತಲ್ಯೊ ಕವಿತಾ ಸಾಂಕೆತೀಕ್ ಪ್ರತಿಕಾಂನಿ ಭರಿಲ್ಲ್ಯೊ ದಿಸತಾತ್.
“ರೆಲ್ವೆ ರೂಳಾ ಶೆಜರಾಕ್ ಕೊಣಾಚೊ
ಜಲ್ಮ್, ಮರ್ಣ್ ಘರ್-ಸಂವಸಾರ್
ರೆಲ್ವೆಯ್ ಕೊಣಾಕೊಣಾಂಕ್ ಜಾತಾ
ಪಿಳಗ್ಯಾಂ ಪಿಳಗ್ಯಾಂಚೊ ಆದಾರ್”
‘ಮನ್ ಹಾರಶಾಂಚ್ಯೊ’-
“ಪೃಥ್ವೀರ್ ಹಾಂವ್ ಉಬೊ ರಾವೂನ್
ಮಳಬಾ ಖೊಲ್ ಹಾರಶಾಂತ್ ಪಳಯತಾ
ಮಳಬಾಕ್ ಆಸೂನ್ ಅಸಿಮ್ ಖೊಲಾಯ್
ಬಿಂಬ್ ಮ್ಹಜೆಂ ಹಾಂವ್ ನಿಯಾಳಟಾಂ”
‘ವ್ಹಾಂವತಿ ನ್ಹಂಯ್ ಕಾಳಾಚೀ’ (2003) ಹ್ಯಾ ಕವಿತಾ ಝೆಲ್ಯಾಂತಲ್ಯೊ ಕವಿತಾ ನಾಂವಾಂ ಪ್ರಮಾಣ್ ತಾಂಚೊ ಸೊದ್ ವ್ಹಾಂವತೆ ನ್ಹಂಯೆ ವರಿ ದಿಸತಾ. ಹ್ಯಾ ಝೆಲ್ಯಾಂತ್ 69 ಕವಿತಾ ಆಸಪಾವತಾತ್. ‘ನವಲಾಯೆಚೆಂ ಘರ್’ ಹೆ ಕವಿತೆಂತ್ ತೆ ಮ್ಹಣಟಾತ್-
“ನವಲಾಯೆಚೆಂ ಘರ್ ಮ್ಹಗೆಲೆಂ
ನವಲಾಯೆಚೆಂ ಘರ್
ರಾತಚೆಂ ತಾಚ್ಯಾ ಪಾಖ್ಯಾಚೆರ್ ನಖೆತ್ರಾಂಚೆಂ ಝುಂಬರ್”
‘ಸೈಮ್-ಸೃಜನ್’ ಹೆ ಕವಿತೆಂತ್ ತೆ ಮ್ಹಣಟಾತ್-
“ಸೈಮ್ ಸೃಜನಾಂಚೆಂ ಭಾಂಡಾರ್
ಋತೂಋತೂಂತಲ್ಯಾನ್ ರುಪಕಾರಾಕ್ ಯೆವನ್
ಇಂದ್ರಧಣೂಚ್ಯಾ ರಂಗಾಂನೀ
ಹೆ ವಸುಂಧರೆಕ್ ಪ್ರಸಯತ್ ರಾವತಾ”
‘ಬ್ರಹ್ಮಾಂಡ್- ಯೊಗಿ ಚಿರಂತನಾಚೊ’(2003) ಹ್ಯಾ ಝೆಲ್ಯಾಂತ್ 71 ಕವಿತಾ ಆಸಪಾವತಾತ್.ಹ್ಯೊ ಕವಿತಾ ತಾಂಣಿ 1998-2007 ಹ್ಯಾ ಕಾಳಾಂತ್ ರಚಿಲ್ಲ್ಯೊ.ಕವಿ ಆಪಲೆ ಮನಾಂತಲೆ ಉತ್ಫರ್ಕೆ ಪರಗಟಾಯನಾ ಸ್ಪಶ್ಟ್ ಕರತಾತ್ ಕಿ “ಹ್ಯೊ ಕವಿತಾ ಮ್ಹಜ್ಯಾ ಚೈತ್ಯ್ ಮನಾಚೊ ಹುಂಕಾರ್. ಮನಾನ್ ನಿವಾಂತ್, ಶಾನ್ತ್ ಆಸತನಾ ಹೊ ಮ್ಹಜ್ಯಾ ಆತ್ಮ್ಯಾಲಾಗೀಂ ಜಾಲ್ಲೊ ಸಂವಾದ್. ಹ್ಯೊ ಕವಿತಾ ಆಕಾರಾಕ್ ಯೆತನಾ, ಮ್ಹಜ್ಯಾ ದೊಳ್ಯಾಂ ಸಾಮಕಾರ್ ಜೆಂ ಕಿತೆಂ ಸಾಕಾರೂನ್ ಮನಾರ್ ಪಡಬಿಂಬತಾಲೆಂ, ತಾಂಣೀಚ್ ಉತರಾಂಚೆಂ ರೂಪ್ ಘೆತಲಾಂ. ಪುರಾಯ್ ಝೆಲ್ಯಾಂತ್ ಮ್ಹಾನ್ ತತ್ವಗಿನ್ಯಾನಿ ಶ್ರಿ ಒರೊಬಿಂದೊ ಹಾಂಚಿ ತತ್ವಪ್ರಣಾಲಿ ಮಾಂಡಿಲ್ಲಿ ದಿಶ್ಟಿ ಪಡಟಾ. ಹ್ಯಾ ಝೆಲ್ಯಾಂತಲಿ ಪಯಲಿ ಕವಿತಾ ಮ್ಹಣಲ್ಯಾರ್ ವಿಶ್ವ್ ಬ್ರಹ್ಮಾಂಡ್ ರಚಣಾಱ್ಯಾಚಿ ಕೆಲ್ಲಿ ಪ್ರಾರ್ಥನಾ.
ಹಿ ಕವಿತಾ ಸಾರ್ ರೂಪಾನ್ ಸಗಲ್ಯಾ ಝೆಲ್ಯಾಚೊ ಕೆಲ್ಲೊ ಗುಪಿತಾರ್ಥ್. ಹೆ ಕವಿತೆಂತ್ ಮನನ್ ಕರಪಿ ಮನೀಸ್ ಫಕತ್ ಕವಿ ನ್ಹಯ್ ತರ್ ಪುರಾಯ್ ಮನೀಸಕುಳಾಚೊ ಪ್ರತಿನಿಧೀ. ‘ಪ್ರಾರ್ಥನಾ’ ಹೆ ಕವಿತೆಂತ್ ತೆ ಮ್ಹಣಟಾತ್-
“ವಿಶ್ವ್- ಬ್ರಹ್ಮಾಂಡ್ ರಚಣಾಱ್ಯಾ
ಜ್ಯೊತ್ ತುಜೀಚ್ ಮ್ಹಜೆ ಭಿತರ್
ಜ್ಯೊತ್ ಜ್ಯೊತೀಕ್ ಭೆಟಟ್ಟಕಚ್
ಆಮಚೆಂ ಮದಲೆಂ ಸರತಾ ಅಂತರ್”
ಹೊ “ವಿಶ್ವ್ ಬ್ರಹ್ಮಾಂಡ್ ರಚಣಾರೊ ತೊಚ್ ಬ್ರಹ್ಮಾಂಡ್ ಯೊಗಿ ಚಿಂರಂತನಾಚೊ ಆಸಾ, ತೊ ಕವಿ ಭಿತರ್ ಆಸಾ, ತಸೊ ಸಗಳ್ಯಾಂ ಭಿತರ್ ಆಸಾ. ‘ಮನ್ ಬ್ರಹ್ಮಾಂಡ್’ ಹೆ ಕವಿತೆಂತ್ ತೆ ಮ್ಹಣಟಾತ್-
“ಮನ್ ಬ್ರಹ್ಮಾಂಡ್ ಉಂಚಾಯ್, ಮನ್ ಬ್ರಹ್ಮಾಂಡ್ ಖೊಲಾಯ್
ಮನ್ ಅನಂತ್ ಅಮಾಪ್, ಮನ್ ಚೈತನ್ಯ್ ನಿಳಾಯ್”
ಹೆ ತರೆನ್ ತೊ ಯೊಗಿ ಆಮಚ್ಯಾ ಸಗಳ್ಯಾಂ ಭಿತರ್ ಆಶಿಲ್ಲೊ ಮನೀಸ್ “ವಿಶ್ವ್ ಬ್ರಹ್ಮಾಂಡ್ ರಚಣಾರೊ ಆಸಾ ದೆಖೂನ್ ಕವಿ ‘ಬ್ರಹ್ಮಾಂಡ್- ಯೊಗಿ ಚಿರಂತನಾಚೊ’ ಹೆ ಕವಿತೆಂತ್ ಮ್ಹಣಟಾ-
“ಹಾಂವ್ ಬ್ರಹ್ಮ್-ಬೀಜ್ ರೂಜತಾಂ
ಕಾಳಾಕ್ ಭಿತರ್ ಉಬಯತಾಂ
ಸೃಜನ್ ಅಭಿಪ್ಸೆ ಪ್ರಕ್ರಿಯೆಕ್
ರಸಗಂಧಾಯತಾ ||"
ಶ್ರಿ ಒರೊಬಿಂದೊಚೆ ತ್ತವಪ್ರಣಾಲೀಚಿ ಆನೀಕ್ ಎಕ್ ದೆಖ್
“ಹಾಂವ್ ಪ್ರಯೊಗಿ ಪರಾರ್ಧಾಚೊ
ಬ್ರಹ್ಮಾಂಡ್-ಯೊಗಿ ಚಿರಂತನಾಚೊ
ನಮ್ ನಿರ್ಮಣೆ ಉತ್ಕ್ರಾನ್ತ್ ಪರ್ವಾಂ
ಸಾಕ್ಷಾತ್ಕಾರಾಯತಾಂ ||"
ಮ್ಹಜೊ ಕಿರ್ಣೊತ್ಸವಿ ವಸೊ
ಪಡಬಿಂಬತಾ ಪ್ರಾಣಾ ಹಾರಸೊ
ಅದ್ಶ್ಟ್ ಹಾಂವ್, ಅಜರಂವರಾಚೀ
ಋಚಾ ಜಿಯೆತಾಂ ||”
ಹೆ ಕವಿತೆಂತ್ ಕವೀಕ್ ಅಶೆಂ ಮ್ಹಣಪಾಚೆಂ ಆಸಾ ಕಿ ದರ್ ಎಕಾ ಮನಶಾ ಭಿತರ್ ಬ್ರಹ್ಮಾಂಡ್ ಭರಿಲ್ಲೆಂ ರೂಪ್ ವಸತಾ. ತೊಚ್ ಈಶ್ ವಾ ಈಶ್ವರ್ ಆಸಾ. ಈಶ್ವರೊಪನಿಶದಾಂತ್ ತಾಚೆಂ ವರ್ಣನ್ ಅಶೆಂ ಆಸಾ-
“ಈಶಾವಾಸ್ಯಾಂ ಇದಂ ಸರ್ವಮ್
ಯತ್ ಕಿಂಚ್ ಜಗತ್ಯಾಂ ಜಗತ್”
ಹೊಚ್ ಸಂದೆಶ್ ತಾಂಚೆ ‘ಈಶ್ವರಸೂಕ್ತ್’ ಹೆ ಕವಿತೆಂತ್ ಪಳೊವಂಕ್ ಮೆಳಟಾ.
“ಈಶ್ವರಾ, ತುವೆಂ ತುಜೆ ಇತ್ಸೆನ್ ಘಡಯಲೊ ಮಹಾಸ್ಫೊಟ್
ಆನಿ ನಿರ್ಮಿಲೆಂ ವಿಶ್ವ್-ಬ್ರಹ್ಮಾಂಡ್
ಹ್ಯಾ ಸ್ಫೊಟಾ ವರವೀಂ ಈಶ್ವರಾ
ತುಜೆಚ್ ಜೀವಸಾಣೆಚೆಂ ಅಸ್ತಿತ್ವ್ ಶಿಂಪಡೂನ್
ತುವೆಂ ಪ್ರಸಯಲೆಂ ಚೈತನ್ಯ್
ವ್ಯಾಪೀತ್ ಅಂತರಾಳ್ ಅನಂತತತ್ವ್ ಸಗಳೆ ವಾಟೆನ್
ಸಾದಯತ್ ಓಮ್ಕಾರ್ ಧ್ವನಿ ಓಮ್...ಓಮ್...ಓಮ್..
ಬೀಗ್ ಬೆಂಗ್ ಸಿದ್ಧಾಂತಾಚೊಯ್ ಅರ್ಥ್ ಕವಿ ಸ್ಪಶ್ಟ್ ಕರತಾ. (ಅಣೂ ಪರಸ್ ಲ್ಹಾನ್ ಆಶಿಲ್ಲ್ಯಾ ಕಣಾ ಪಸೂನ್ ಆನಿ ಪುರಾಯ್ ಸೃಶ್ಟ್ ನಿರ್ಮಾಣ್ ಜಾವನ್ ತಿಚೊ ವಾಯು ರೂಪಾನ್ ಆರಂಭ್ ಜಾಲೊ. ಹ್ಯಾ ವಾಯೂ ಪಸೂನ್ ಉಜವಾಡ್ ನಿರ್ಮೂನ್ ತಾಚೆ ವರವೀಂ ಉದಕ್ ಪ್ರಸವಲೆಂ. ಉದಕಾಚ್ಯಾ ಪ್ರಕ್ರಿಯೆನ್ ಧರ್ತರೆಚಿ ನಿರ್ಮಣಿ ಜಾಲೀ. ಹ್ಯಾ ಜಡ್ ರೂಪಾ ಪಾಸೂನ್ ಚರಾಚರ್ ಪ್ರಾಣಿ ತಶೆಂಚ್ ಚಿಂತನ್ ಕರಪಿ ಮನಶಾಚಿ ನಿರ್ಮಣಿ ಜಾಲೀ.
‘ಹಾಂವ್ ಮನೀಸ್ ಸನಾತನ್’ ಹೆ ಕವಿತೆಂತ್ ಕಲಾತ್ಮಕ್ ರಿತೀನ್ ಮಾಂಡಟಾ.
“ಸಾಂಸಣಾ ಖಾತೀರ್ ನಿರ್ಮಣೆಚೊ ಕ್ರಮ್ ಚಲಪಿ
ಹಾಂವ್ ಮನೀಸ್
ಖಣಟಾ ಜೀವ್ ಜಿವಾವಳ್ ಸಂಸ್ಕೃತಿ ಉತ್ಥಾನಾಚಿ ಬುನಯಾದ್.....”
‘ಹಾಂವ್ ಕೊಣ್ ಹಾಚೊ ಸೊದ್ ವೆದ್, ಉಪನಿಶದ್, ಬ್ರಹ್ಮಸೂತ್ರ್, ಶ್ರೀಭಗವದ್ಗಿತೆಂತ್ ಆಸಾ. ಕವಿ ಪಾಡಗಾಂವಕಾರ್ ಹೆಯ್ ಹಾಕಾ ಆಡವಾದ್ ನಾತ್.
‘ಹಾಂವ್ ಕೊಣ್’ ಹೆ ಕವಿತೆಂತ್ ತೆ ಮ್ಹಣಟಾತ್-
“ಹಾಂವ್ ಜೆನ್ನಾ ಜಾಲೊಂ
ಎಕರೂಪ್ ಹ್ಯಾ ಹಾರಶಾಂತಲ್ಯಾ ಮನಶಾ ಭಿತರ್
ತೆನ್ನಾ ಲಾಗಲೊಂ ವಿರಗಳಪಾಕ್ ಚರಾಚರಾಂತ್
ಅಣೂರೆಣೂಚೆ ಸುಕ್ಷ್ಮತಾಯೆನ್
ಸಗಳೆಂ ಮ್ಹಜೆ ಭಿತರ್ ಆಸಪಾವನ್ ಘೆತ್
ಆನಿ ಹೆ ಅವಸ್ಥೆಂತ್
ಜೆನ್ನಾ ಹಾಂವೆಂ ಪಳಯಲೊ ಮ್ಹಾಕಾ
ಮ್ಹಜ್ಯಾ ಅಸ್ತಿತ್ವರೂಪಿ ಕಾಳಜಾಚ್ಯಾ
ಹಾರಶಾಂತ್
“ದೆವಾ ಮ್ಹಜ್ಯಾ”
ತೆನ್ನಾಚ್ ಮ್ಹಾಕಾ ಜಾಲಿ ಮ್ಹಜಿ ಖರಿ ವಳಖ್
ಆನಿ ಕಳ್ಳೆಂ “ಹಾಂವ್ ಕೊಣ್?” ತೆಂ”
ಶ್ರಿ ಒರೊಬಿಂದೊಚಿ ತತ್ವಪ್ರಣಾಲೀ- ಉತ್ಕಾಂನ್ತಿ ಆನಿ ಸೈಮಾಚೆಂ ರಹಸ್ಯ್ ಕವಿ ಪಾಡಗಾಂವಕಾರ್ ಹಾಂಣಿ ಸಾದ್ಯಾ ಸೊಪ್ಯಾ ಉತರಾಂನಿ ಆಮಚೆ ರೊಸಾಳ್ ಕೊಂಕಣಿ ಭಾಶೆಂತ್ ಮಾಂಡಪಾಚೊ ಯತ್ನ್ ಕೆಲಾ.
ಖಱ್ಯಾ ಅರ್ಥಾನ್ ತೆ ಎಕ್ ಸಾಧಕ್. ತತ್ವಗಿನ್ಯಾನ್ ತಾಂಣಿ ಘೊಟೂನ್ ಪಿಯೆಲೆಂ, ಮನನ್, ಚಿಂತನ್ ತಾಂಚ್ಯಾ ಶಿರಂತರಾಂನಿ ಭರಲೆಂ ಆನಿ ಸೃಜನ್ ವಿಶ್ವ್ ಘಡಯಲೆಂ.
‘ಮಾಗಣೆಂ ಬ್ರಹ್ಮಾಂಡರಾಯಾಲಾಗೀಂ’ ಹೆ ಕವಿತೆಂತ್ ತೆ ಮ್ಹಣಟಾತ್
“ಖಿಣಾನ್ ಖೀಣ್ ಬ್ರಹ್ಮಾಂಡ್-ರಾಯಾ ರಾಜ್ಯ್ ತುಜೆಂಚ್ ಚಲಚೆಂ
ರಾಷ್ಟಾಂಚ್ಯೊ ಸರಾದಿ ಮೊಡೂನ್ ಮುಕ್ತ್ ವಿಚಾರ್ ವ್ಹಾಂವಚೆ.....
ಮನೀಸಜಾತೀಕ್ ಯೆವನ್ ಒತೊ ನಾತೀಂ ನವೀಂ ಜುಳಚೀಂ
ಸಂವಸಾರಾಚಿ ಮನೀಸಜಾತ್ ಎಕಾಚ್ ಧಾಗ್ಯಾನ್ ಗುಂಥಚೀ” ವಸುಧೈವ್ ಕುಟುಂಬಕಮಚಿ ಸಂಕಲ್ಪನಾ ತೆ ಹಾಂಗಾಂ ಮಾಂಡಟನಾ ದಿಸತಾತ್.
‘ಪುನರಾರ್ಥೊಪನಿಶದ್’ (2014) ಹ್ಯಾ ಝೆಲ್ಯಾಂತ್ 9 ಕವಿತಾ ಆಸಪಾವತಾತ್. ಭಗವಾನ್ ಶ್ರೀಕೃಷ್ಣ್, ಸತ್ಯಕಾಮ್ ಜಾಬಾಲಾ, ತಪಸ್ವಿ ಶಂಬೂಕ್, ತತ್ವಬೊಧಿ ಗೌತಮ್ ಬುದ್ಧ್, ಆದರ್ಶ್ ಪೂತ್ ಶ್ರವಣ್ ಕುಮಾರ್, ಕರೂಣೆಚೊ ಮಹಾಸಾಗರ್ ಜೆಜೂ ಕ್ರಿಸ್ತ್, ನರರತ್ನ್ ನಚಿಕೆತ್ ಹಾಂಚೆ ಪರಂಪರೆನ್ ಲೊಕಾಂ ಸಾಮಕಾರ್ ಉಬ್ಯಾ ಕೆಲ್ಲ್ಯಾ ಕಾಂಯ್ ಮಿಥಕಾಂ ಆನಿ ಘಡಣುಕಾಂಚೊ ಚಿಕಿತ್ಸಕ್ ಬುದ್ಧೀನ್ ನಿಯಾಳ್ ಕರೂನ್ ಕವಿ ತಾಂಚೆರ್ ಚಾಲಂತ್ ಕಾಳಾಚ್ಯಾ ಸಂದರ್ಭಾಂತಲ್ಯಾನ್ ಆಪಣಾಲೆಂ ಭಾಶ್ಯ್ ಕರತಾ.
‘ಸಂಭವಾಮಿ ಯುಗೆ ಯುಗೆ’ ಹೆ ಕವಿತೆಂತ್ ಕವಿ ಮ್ಹಣಟಾತ್
ಮನೀಸ್:
ಶ್ರೀಕೃಷ್ಣಾ ತೂಂ ಆಸಾ
ಕಣಾಕಣಾಂತ್ ಭರಿಲ್ಲೊ
ತೂಂ ಸರ್ವಜ್ಞ್ ಸರ್ವವ್ಯಾಪೀ
ಸಗಲ್ಯಾಕ್ ಆಸೂನ್ ದಿಸನಾಶಿಲ್ಲೊ
ತುವೆಂ ಘೆವನ್ ಆಸಪಾವನ್
ತುಜೆ ಭಿತರ್ ಹೆಂ ಬ್ರಹ್ಮಾಂಡ್
ತೂಂಚ್ ಜಾವನ್ ರಾವಲಾ
ಪುರಾಯೆನ್ ಬ್ರಹ್ಮಾಂಡ್
ಶ್ರೀಕೃಷ್ಣ್:
ದೆಖೂನ್ ಹಾಂವ್
ಥಂಯಚ್ ಆಸತಾ
ಘೆವನ್ ಮ್ಹಜೆಂ ಸುದರ್ಶನ್ ಚಕ್ರ್
ಫುಡಾರಾಚ್ಯಾ ದಿಶ್ಟಾವ್ಯಾನ್
ಕಾಳರೂಪಿ ವಿಶ್ವರೂಪ್ ದರ್ಶನಾಚೊ
ಘಡೊವನ್ ಪ್ರತ್ಯಯ್
ಕರೂಂಕ್ ಉಜೂ ವಿಚಾರಾಂಚ್ಯಾ
ಧರ್ಮ್ ತತ್ವಾಂಚಿ ಸುಸಜ್ಜ್ ಪ್ರತಿಸ್ಥಾಪಣೂಕ್
ಹಾಡೂಂಕ್ ಪೃಥ್ವೀಚೆರ್
ದಿವ್ಯತಾಯೆಚಿ ಚಿರಸ್ಥಾಯೀ
ಸರ್ಗರೂಪಿ ಶಾಂತೀಕಾಯ್
ಉಬಾರೂಂಕ್ ಕಾಳಾಚೊ ಥರ್ ವಯರ್.”
‘ವ್ಹಡವೀಕ್ ಸತ್ಯಕಾಮ್ ಜಾಬಾಲಾಚೀ’ ಹಿ ಕವಿತಾ ಛಾನ್ದೊಗ್ಯ್ ಉಪನಿಷದಾಂತಲೆ ಸತ್ಯಕಾಮ್ ಜಾಬಾಲ್ ಹೆ ಆವಯ್ ಪುತಾಚಿ ಕಾಣೀ.
“ಸತ್ಯಕಾಮ್ ಲಖಲಖತೊ
ಬ್ರಹ್ಮ್-ಗಿನ್ಯಾನಾನ್ ಪರಿಪುರ್ಣ್
ಭರಿಲ್ಲೊ ಜ್ಯೊತೀಂಚೊ ಪುಂಜೊ”
‘ಬ್ರಹ್ಮರ್ಷಿ ಸತ್ಯಕಾಮಾಚೆಂ ಶುಭವರ್ತಮಾನ್’ ಹಿ ಕವಿತಾ 8 ಆನಿ 9 ಜಾನೆವಾರಿ 2011 ಹ್ಯಾ ದಿಸಾ ಬೆಂಗಳೂರಾಕ್ ಶ್ರೀಅರವಿಂದ್ ಆಶ್ರಮಾಂತ್ ತಾಂಣಿ ರಚಲೀ. ಹೆ ಕವಿತೆಂತಲ್ಯಾ ಆಶಯಾಚೊ ಮೂಳ್ ಸತ್ಯಕಾಮ್ ಜಾಬಾಲ್ ಹ್ಯಾ ಉಪನಿಷದಾಂತಲ್ಯಾ ಕಥಾನಕಾ ಕಡೆನ್ ಕಸಲೊಚ್ ಸಂಬಂದ್ ನಾ. ಹಿ ಕವಿತಾ ತಾಂಚೆ ಪ್ರತ್ಭೆಚ್ಯಾ ದಿಶ್ಟಾವ್ಯಾನ್ ಶಕ್ತೀಭಾರಾನ್ ಬರೊವನ್ ಜಾಲಿ ಅಶೆಂ ತೆ ನಮೂದ್ ಕರತಾತ್.
ತತ್ವಬೊಧಿ ತಪಸ್ವಿ ಶಂಬೂಕ್ ಹಿ ಕವಿತಾ ತಾಂಚೆರ್ ಉಜವಾಡ್ ಘಾಲತಾ.
“ತಪಸ್ವಿ ಶಂಬೂಕಾ
ತುಜೆ ಭಿತರ್
ಉಜವಾಡಾಚ್ಯಾ ಭಾರಾನ್
ಬ್ರಹ್ಮಾಂಡೂನ್ ಆಯಿಲ್ಲೀ
ತಪಸ್ಯೆಚ್ಯಾ ಜಾಣವಿಕಾಯೆಚೀಂ ಲ್ಹಾರಾಂ
ಪಾವಂಡ್ಯಾ ಪಾವಂಡ್ಯಾನ್
ವಿಸ್ತಾರತ್ ವಚೂನ್
ಹಾತಾಸೂಂಕ್ ಸೊದತಾಲೀಂ
ಗುಪಿತಾಂ ಅದೃಶ್ಯಾಚೀಂ”
‘ತತ್ವಬೊಧಿ ಗೌತಮ್ ಬುದ್ಧ್’ ಹೆ ಕವಿತೆಂತ್ ಬುದ್ಧಾಚಿ ಶಿಕವಣ್ ತೆ ಸಾಂಗತಾತ್.
“ಗೌತಮ್ ಬುದ್ಧ್ ಶುದ್ಧ್ ಜಿಯೆಲೊ
ಜನಲೊಕಾಂತ್ ತಸೊಚ್ ವಾವುರಲೊ
ದವರೂನ್ ಉಕ್ತೆಂ ಕಾಳೀಜ್ ಸದಾಂ
ಭಿತರಲೆಂಚ್ ದಾಖಯತ್ ಭಾಯರ್.....
ಸಾಂಗಲೆಂ ಗೌತಮ್ ಬುದ್ಧಾನ್ ಜಾಗಾಕ್
ಜೊ ಶರಣ್ ವಚೂನ್ ಘೆತಾ ಜಾಣೂನ್ ಸತಾಂ
ತೊಚ್ ಖರೊ ಪ್ರಜ್ಞಾವಾನ್
ತೊಚ್ ಜೊಡಟಾ ಚಿರಂತನ್ ಸುಖಾಂ.....”
‘ದಾಣ್ಯಾ ಯೆದಿ ಧರ್ತರೀ’ (2020) ಹ್ಯಾ ಝೆಲ್ಯಾಂತ್ 64 ಕವಿತಾ ಆಸಪಾವತಾತ್. ಹ್ಯಾಯ್ ಝೆಲ್ಯಾಂತ್ ವಿಶ್ವ್-ಬ್ರಹ್ಮಾಂಡ್ ಮನೀಸ್ ಹೆ ಕವಿತೆಂತ್ ತೆ ಮ್ಹಣಟಾತ್,
ಹೆಂ ಮ್ಹಜೆಂ
ಅಲೌಕೀಕ್ ವಿಚಾರ್-ಯಾನ್
ರಾವತಲೆಂ ಕರೀತ್ ಪ್ರವಾಸ್
ಆಪಲೆ ಧ್ಯಾನ್-ಶಕ್ತೀನ್ ಸಾಂಠೊವನ್ ಘೆತ್
ಬ್ರಹ್ಮಾಂಡಾಚೆ ಉರ್ಜೆಕ್
ಪ್ರಕ್ಷೆಪಣ್ ಕರೂನ್
ಫುಲೊಂವಕ್ ಧರ್ತರೆಚ್ಯಾ ಕಣಾಂಕಣಾಂತ್
ನವ್-ಚೈತನ್ಯಾಚಿ ಫಾಂತೊಡ್.”
‘ಮ್ಹಜೆಂ ಅಸ್ತಿತ್ವ್’ ಹೆ 20 ನೊವ್ಹೆಂಬರ್ 2009 ಹ್ಯಾ ದಿಸಾ ರಚಿಲ್ಲೆ ಕವಿತೆಂತ್ ತೆ ಬರಯತಾತ್-
“ಫಾಲ್ಯಾಂ ಹಾಂವ್
ಆಸಲೊಂ ಕಿತೆಂ ನಾಸಲೊಂ ಕಿತೆಂ
ಕೊಣಾಕ್ ಕಸಲೊಚ್ ಫರಕ್ ಪಡೂಂ
ವಾ ನಾ ಪಡೂಂ
ಅಶೆಂ ಹಾಂವ್ ಮ್ಹಣಚೊ ನಾ
ಹೆಂ ವಿಶ್ವ್-ಬ್ರಹ್ಮಾಂಡ್
ಮ್ಹಜ್ಯಾಂತ್ ಭರಲಾಂ
ಹಾಂಗಚ್ಯಾ ಕಣಾಂಕಣಾಂತಲ್ಯಾನ್
ಮ್ಹಜೆಂ ಅಸ್ತಿತ್ವ್ ಪರ್ಜಳಲಾಂ
ಹಾಂವ್ ತಾತೂಂತ್ ಭರಸಲಾಂ
ಹಾಂವ್ ಜಿಯೆತಲೊಂ ಜಾವನ್
ಸೈಮಾಚಿ ಸೃಜನ್ ಪ್ರಕ್ರಿಯಾ
ಹಾಂವ್ ಅಜರಂವರತ್ ಮುರತಲೊಂ
ಜಾವನ್ ತತ್ವ್ ಬ್ರಹ್ಮಾಂಡಾಚೆಂ
ಬ್ರಹ್ಮಾಂಡಾಚ್ಯಾ ಮಾತೃ-ಶಕ್ತೀಚೆಂ”
‘ಕಾಳಖಾ ಕುಸವ್ಯಾಂತ್ ಉಜವಾಡ್’ ಹೆ ಕವಿತೆಂತ್ ಕವಿ ಮ್ಹಣಟಾತ್-
ಆತಾಂ ಮನಾಂ-ಅಂತರಾಳಾಕ್
ಒಡ್ ವ್ಹಾಂವತ್ಯಾ ತಾಱ್ಯಾ-ಪುಂಜ್ಯಾಂಚೀ
ಆನಿ ಲಕ್ತುಬಾಯ್ ನಿತ್ಯನೆಮಾನ್
ಕಾಳಖಾ-ಕುಸವ್ಯಾಂತ್
ಉಜವಾಡ್ ಪಿಕಯತಲ್ಯಾ ಸುರ್ಯಾಚೀ”
‘ಮ್ಹಜೆ ಪುನರ್ಜಲ್ಮ್’ ಹೆ ಫೆಬ್ರುವಾರಿ 2019 ಹ್ಯಾ ದಿಸಾ ರಚಿಲ್ಲೆ ಕವಿತೆಂತ್ ಕವಿ ಮ್ಹಣಟಾತ್
“ಹಾಂವ್ ನುಸ್ತೆಂ ಜಾತಲೊಂ
ಝಾಡ್ ಜಾತಲೊಂ, ಝಾಡಾವೆಲೆಂ ಫಳ್ ಜಾತಲೊಂ
ಮಾಡಾವೆಲೊ ನಾಲ್ಲ್ ಜಾತಲೊಂ
ವಚತ್ ಥಂಯ್ ಪಾವತ್ ಥಂಯ್
ರೂಜತ್ ಫಳತ್ ರಾವತಲೊಂ...
.....
ಹಾಂವ್ ಮನೀಸ್ ಮರತಲೊ
ಸಾರೆಂ ಜಾವನ್ ಕಣ್ ಕಣ್ ಮ್ಹಜೊ
ಹಜಾರ್ ವರ್ಸಾಂ
ನವೆ ನವೆ ಪುನರ್ಜಲ್ಮ್
ಘೆತ್ ರಾವತಲೊಂ.”
‘ಸಮ್ರಾಟ್ ಅಶೊಕ್ “ಶಿಲ್ಪಿ , ಅಖಂಡ್ ಭಾರತಾಚೊ ಮುಳಾರಂಭಿ ಸಂವಸಾರೀಕ್ ಶ್ರೀಬುದ್ಧಧರ್ಮ್ ಪ್ರಸಾರಾಚೊ” ಮಹಾಕಾವ್ಯ್ (2022) ನಾಂವಾಚೆಂ ಮಹಾಕಾವ್ಯ್ ತಾಂಣಿ ಖರೆಂ ಮ್ಹಣಲ್ಯಾರ್ 2014 ತೆ 2020 ಹ್ಯಾ ಕಾಳಾಂತ್ ರಚಿಲ್ಲೆಂ. ಪೂಣ್ ಕೊವೀಡ್ ಕಾಳಾಂತ್ ತೆ ಅನಂತಾಂತ್ ವಿಲೀನ್ ಜಾಲೆ. ಹೆಂ ಮಹಾಕಾವ್ಯ್ 14 ಕಾವ್ಯಾನಿ ತಾಂಣಿ ಮಾಂಡಲಾಂ. ಮರಣಾ ಉಪರಾಂತ್ ತಾಂಚ್ಯಾ ಘರಚ್ಯಾಂನಿ ಹೆಂ ಮಹಾಕಾವ್ಯ್ ಉಜವಾಡಾಕ್ ಹಾಡಲೆಂ. ಹ್ಯಾ ಮಹಾಕಾವ್ಯಾಂತ್ ತಾಂಣಿ ಸಮ್ರಾಟ್ ಅಶೊಕಾಚೆ ಜಿಣೆಚೆ ಆನಿ ಶ್ರೀಬುದ್ಧಾಚ್ಯಾ ಶಿಕವಣೆಚೆ ಇತಿಹಾಸೀಕ್ ಪ್ರಸಂಗ್ ಘೆತಲ್ಯಾತ್.
‘ಸಮ್ರಾಟ್ ಅಶೊಕಾಚೆಂ ಶ್ರೀಬುದ್ಧಾಠಾಂಯ್ ಆತ್ಮಸಮರ್ಪಣ್’ ಹಾತೂಂತ್ ತೆ ಮ್ಹಣಟಾತ್
ಹೆ ಕರೂಣೆಚ್ಯಾ ಮ್ಹಾಸಾಗರಾ
ಮನೀಸ್ ಜಿಣೆಚ್ಯಾ ಉದ್ಧಾರಾ
ಭಗವಾನ್ ಶ್ರೀಬುದ್ಧಾ
ಹಾಂವ್ ಅಖಂಡ್ ಭಾರತಾಚೊ
ಮ್ಹಾಪರಾಕ್ರಮಿ ಚಕ್ರವರ್ತೀ
ಸಮ್ರಾಟ್ ಅಶೊಕ್
ನತಮಸ್ತಕ್ ತುಜ್ಯಾ ಪಾಂಯಾರ್.....”
ಪ್ರಕಾಶ್ ಪಾಡಗಾಂವಕಾರ್ ಹಾಂಚೆ ಕವಿತೆಂತಲಿ ಭಾಸ್ ಆನಿ ಶೈಲೀ-
ತಶೆಂ ಪಳೊವಂಕ್ ಗೆಲ್ಯಾರ್ ಪ್ರಕಾಶ್ ಪಾಡಗಾಂವಕಾರ್ ಹಾಂಚಿ ಭಾಸ್ ಸಾದಿ ಸೊಪೀ, ಪ್ರವಾಹಿ ಆಸಾ. ತೆಚ್ ಬರೊಬರ್ ಮಿಥಕಾಂ, ಪ್ರತಿಕಾಂ, ಪ್ರತಿಮಾ ಹಾಂಚೊ ವ್ಹಡಾ ಪ್ರಮಾಣಾಂತ್ ವಾಪರ್ ಕೆಲ್ಲೊ ದಿಸತಾ.
ನಿಶ್ಕರ್ಶ್-
ಪ್ರಕಾಶ್ ಪಾಡಗಾಂವಕಾರ್ ಹೆ ಕೊಂಕಣಿ ಕವಿತಾ ಮಳಾ ವಯಲೆ ಅಧ್ಯಾತ್ಮೀಕ್ ಬಸಕಾ ಆಶಿಲ್ಲೆ ಎಕ್ ಸಾಧಕ್.
ಆಪಲ್ಯಾ ಕವಿತಾಂನಿ ತಾಂಣಿ ಮಿಥಕಾಂಚೊ, ಸೈಮಾಂತಲ್ಯಾ ಪ್ರತಿಕಾಂಚೊ, ಪ್ರತಿಮಾಂಚೊ ಸಮರ್ಪಕ್ ವಾಪರ್ ಕೆಲ್ಲೊ ದಿಸತಾ.
ಆಶಾವಾದ್, ಆದರ್ಶವಾದ್,ಅಸ್ತಿತ್ವ್ ವಾದ್, ಮನೀಸಪಣ್, ಎಕಚಾರ್-ಭಾವಪಣ್, ಸಮತಾ, ಲಾಗಣೂಕ್, ಸದಾಚಾರ್, ರಾಷ್ಟ್ರೀಯ್ ಅಸ್ಮಿತಾಯ್ ತಾಂಚೆ ಕವಿತೆಂತ್ ಪಡಬಿಂಬೀತ್ ಜಾಲ್ಲೊ ದಿಶ್ಟಿ ಪಡಟಾ.
ತಾಂಣಿ ಶ್ರಿ ಅರವಿಂದ್, ಭಗವತಗೀತಾ, ಉಪನಿಶದಾಂ, ಬುದ್ಧೀಸಮಾಚೊ ಖೊಲಾಯೆನ್ ಅಭ್ಯಾಸ್ ಕೆಲಾ. ತಾಚೆರ್ ಮನನ್, ಚಿಂತನ್ ಕರೂನ್, ಸಾಧನಾ ಕರೂನ್ ತೆಂ ತಾಂಚ್ಯಾ ಅಂತರಂಗಾಂತ್ ಆಪಣಾಯಲಾಂ ಆನಿ ಸಾದ್ಯಾ ಸೊಪ್ಯಾ ಉತರಾಂನಿ ಅಧ್ಯಾತ್ಮೀಕ್ ಸೂರ್ ತಾಂಣಿ ಕೊಂಕಣಿ ಸಾಹಿತ್ಯಾಂತ್ ಆಳಯಲ್ಯಾತ್.
ಜೆನ್ನಾ ಜೆನ್ನಾ ಕೊಂಕಣಿ ಸಾಹಿತ್ಯಾಂತ್ ಪಡಬಿಂಬೀತ್ ಜಾಲ್ಲ್ಯಾ ಅಧ್ಯಾತ್ಮೀಕ್ ಕವಿತಾಂಚೊ ವಿಚಾರ್ ಜಾತಲೊ, ತೆನ್ನಾ ತೆನ್ನಾ ಪ್ರಕಾಶ್ ಪಾಡಗಾಂವಕಾರ್ ನಾಂವಾಚೊ ಉಜವಾಡ್ ಪರಜಳಟಲೊ.
ಆದಾರಾವಳ್-
ಪಾಡಗಾಂವಕಾರ್, ಪ್ರಕಾಶ್.ಉಜವಾಡಾಚಾಂ ಪಾವಲಾಂ. ಅಪುರಬಾಯ್ ಪ್ರಕಾಶನ್,1976
ಪಾಡಗಾಂವಕಾರ್, ಪ್ರಕಾಶ್.ವಾಸ್ಕೊಯನ್. ಜಾಗ್ ಪ್ರಕಾಶನ್,1977
ಪಾಡಗಾಂವಕಾರ್, ಪ್ರಕಾಶ್.ಹಾಂವ್ ಮನೀಸ್ ಅಶ್ವತ್ಥಾಮೊ. ಇಶ್ಟಾಗತ್ ಪ್ರಕಾಶನ್,1985
ಪಾಡಗಾಂವಕಾರ್, ಪ್ರಕಾಶ್.ಕವಿತಾ: ಕಾಳ್ ರೆಲ್ವೆಚ್ಯೊ, ಮನ್ ಹಾರಶಾಂಚ್ಯೊ, ಪಾವಸ್ ಪಾಣಯಾಂಚ್ಯೊ. ರಾಜಹಂಸ್ ವಿತರಣ್,1993
ಪಾಡಗಾಂವಕಾರ್, ಪ್ರಕಾಶ್.ಸರ್ಗ್ ಘಡಪಾಕ್ ಧರ್ತರೆಚೊ.ರಾಜಹಂಸ್ ವಿತರಣ್,1994
ಪಾಡಗಾಂವಕಾರ್, ಪ್ರಕಾಶ್.ವ್ಹಾಂವತಿ ನ್ಹಂಯ್ ಕಾಳಾಚೀ.ಪ್ರಕಾಶನ್,2003
ಪಾಡಗಾಂವಕಾರ್, ಪ್ರಕಾಶ್.ಬ್ರಹ್ಮಾಂಡ್-ಯೊಗಿ ಚಿಂರಂತನಾಚೊ. ಸೃಜನ್-ವಿಶ್ವ್ ಪ್ರಕಾಶನ್,2008
ಪಾಡಗಾಂವಕಾರ್, ಪ್ರಕಾಶ್.ಪುನರಾರ್ಥೊಪನಿಶದ್. ಸೃಜನ್-ವಿಶ್ವ್ ಪ್ರಕಾಶನ್,2014
ಪಾಡಗಾಂವಕಾರ್, ಪ್ರಕಾಶ್.ದಾಣ್ಯಾ ಯೆದಿ ಧರ್ತರೀ. ಸೃಜನ್-ವಿಶ್ವ್ ಪ್ರಕಾಶನ್,2020
ಸಂದರ್ಭಾವಳ್-
o ಡಿಸೋಜ್, ಚಂದ್ರಲೆಖಾ.ಕೊಂಕಣಿ ಕಾವ್ಯಾಚಿ ಪೃಷ್ಠಭೂಮಿ. ಚಿಂತನ್ ಪ್ರಕಾಶನ್,1994
o ಮಾವಜೊ, ದಾಮೊದರ್. ಫಿನಿಕ್ಸಾಚೆಂ ಉತ್ಥಾನ್ ಆನಿ ಸರ್ಜಕಾಚೆ ಉತ್ಫರ್ಕೆ. ಅಂಡರ್ ದ್ ಪಿಪಲ್ ಟ್ರೀ,2019
o ವೆರೆಂಕಾರ್, ಶ್ಯಾಮ್, ಮಾಧವಿ ಸರದೆಸಾಯ್,ಕಮಲಾಕರ್ ಮ್ಹಾಳಶೀ.ಕೊಂಕಣಿ ಭಾಸ್, ಸಾಹಿತ್ಯ್ ಆನಿ ಸಂಸ್ಕೃತಾಯ್. ಕೊಂಕಣಿ ಭಾಶಾ ಮಂಡಳ್,2003.
o ಸರದೆಸಾಯ್, ಮನೊಹರರಾಯ್. ಅ ಹಿಸ್ಟರಿ ~ಒಫ್ ಕೊಂಕಣಿ ಲಿಟರೆಚರ್.ಕೊಂಕಣಿ ಸಾಹಿತ್ಯಾಚೊ ಇತಿಹಾಸ್).ಸಾಹಿತ್ಯ್ ಅಕಾದೆಮೀ,2000
ಸಂಕೆತಥಳಾಂ-
o https://en.wikipedia.org/wiki/Spirituality
o https://auroville.org/page/sri-aurobindos-teaching-and-spiritual-method
o https://vivekavani.com/teacher-spirituality-swami-vivekananda
o https://vajiramandravi.com
o https://en.wikipedia.org/wiki/Buddhism
ಅಂಜೂ ಸಾಖರದಾಂಡೆ
ಸಹಯೊಗಿ ಪ್ರಾಧ್ಯಾಪಕ್,ಕೊಂಕಣೀ,
ಭಾರತೀಯ್ ಭಾಶಾ ವಿಭಾಗ್
ಧೆಂಪೆ ಕಲಾ ಆನಿ ವಿಜ್ಞಾನ್ ಮಹಾವಿದ್ಯಾಲಯ್,
ಪಣಜೀ-ಗೊಂಯ್.
ಕಾರ್ಮೆಲ್ ಕಲಾ, ವಿಜ್ಞಾನಆನಿ ವಾಣಿಜ್ಯ್ ಮಹಾವಿದ್ಯಾಲಯ್, ನುವೆಂ-ಗೊಂಯ್
ದಾಲ್ಗಾದ್ ಕೊಂಕಣಿ ಅಕಾದೆಮೀ
ಆಶಾವಾದಿ ಪ್ರಕಾಶನ್, ಮುಂಬಯ್
ಜೊಡ್ ಪಾಲವಾನ್ ಆಯೊಜೀತ್ ರಾಷ್ಟ್ರೀಯ್ ಪರಿಸಂವಾದ್
ಕೊಂಕಣೀಂತಲಿ ಅಧ್ಯಾತ್ಮೀಕ್ ಕವಿತಾ (22 ಜಾನೆವಾರೀ, 2026)
