Prakash Padgaonkar Hanche Kovitentolo Odheatmik Sur (- Anju Sakhardande)
Proptrachi Manddaull
• Odheatm' mhonnlear kitem?
• Konknni kovita
• Prakash Padgaonkar hanchi vollokh
• Prakash Padgaonkar hanchi odheatmik nodor
• Prakash Padgaonkar hancheo kovita
• Tanchi kaveantoli bhas ani xoili
• Nixkorx
Odheatm' mhonnlear kitem?
• Konknnintoli odheatmik kovita hea vixeacher proptr manddtta astona odheatm' mhonnlear kitem tem zannun gheup bhovo gorjechem.
• Odheatm' mhonnje monachi xanti, bhoutik jinne poros antrik muleam, ud'dexy ani zannivo hancho onnbhou. Odheatm' hi ek bhouayami sonklpona zatunt jivnacho orth, atmon'noti ani svot, soim' , monisoponn ani devo hache koddenchea sombondacho sod. Monxacho svotchea atmeacho sod, atmo ani pormatmeachem natem somzun gheup ani jinnecho khoro orth somzun gheupacho ontormukh provas.
• Adi xonkrachareachea mota promann- odheatm' mhonnje atmo ani brohm' hancho sumell.
• Svami vivekanond hanchea mota promann doreka monxa bhitor axil'le doivi xokticho zal'lo sakxatkar.
• Xri orvind hanchea mota promann- uchch chetnen mon, jinn ani kudd hanchem purai rupantoronn. (Transformation of human life through the descent of higher consciousness into mind, life and body.)
• Atmeacho khoro sobavo vollkhop ani to brohmandda kodden koso zoddil'lo asa tacho ghetil'lo bodh mhonnlear odheatm'.
• Atam brohmandd mhonnlear kitem tem-i zannun gheup gorjechem.
• Brohmandd mhonnlear sury, chondr, tare, gire, akaxogonga, kall ani tatunt axil'le soglle podarth ani urza hanchem ektrit vixv.
Konknni Kovita
• Ek gozal zannouta ki konknni sahiteant kovita ho sahity prokar sonkheatmok tosoch gunnatmok nodren soglea moddinim sogleant chodd promannant protibhaunt kovi kouyitrinim kelloil'lo dixtti poddtta. Konknni kovitechi survat sont soirobanath ambie ani uprant krixnnombhott bandkar hanche posun suru zali oxi rujvat melltta.
• Tea mullaunnacher adarun orvil'lea kallant sabar protibhaunt kovinim kovitecho mollo fuloilo.
• Konknni kovitent mukhel kalkhondd :-
• 1910 te 1959 poilo kalkhondd-gorbhokonni yug
• 1960 te 1989 dusro kalkhondd-bhangrayug
• 1990 to atam merenocho tisro kalkhondd-vojrolikhonni yug - oxe obheasache nodren tin kalkhondd ghalum yetat.
• 1960 te 1989 dusro kalkhondd-bhangrayug. Hea kalkhonddant ‘bamor’ kall ani ‘bangor’ kall – oxe ud'dexun ddo. Razoi povar hamnni mhotvache provah sangleat.
• Bamrantolo ba mhonnlear bakibab borkar, mo mhonnlear monohororai sordesai ani ro mhonnlear romex velluskar. Bakibabamni-i odheatmik axeacheo kovita rochleat. Paddumrong bhangi hamnni-i kaim odheatmik kovita rochleat.
• Romex Velluskar hanche somkalin kovim bhitor madhou borkar ani prokax paddgamvokar hancho aspavo zata.
• Odheatmik kovitecho provahuy konknni sahiteant disun yeta.Sont sahitea saun adhunik kovite meren atmanubhou, porom' sot'techo sod ani jinnecho orth sodpachem kam' kovi kolatmok zann ballgun sorzonoxil ritin obhivyokt korta. Konknni koviteche babtint tthollok ponnan xonkor ramanni hanchem namv mhalogddea kovi bhitor gheuchench poddttolem.Tanche fattofatt sonkheatmok ani gunnatmok pamvddear vichar korta astona prokax damodor paddgamvokar hanchem namv poile suvatecher yeta. Tanchi kovita fokot dhormik updexant simit na tor ti monis jinnentlea antrik songhrxak hat ghalta.
Prakash Damodar Padgaonkar hanchi vollokh-
Prakash Padgaonkar he konknnintole ek namneche kovi. Tancho zolm' 4 ddisembor, 1948 hea disa zalo.72 vorsanche pirayecher 29 epril, 2021 hea disa kovidd kallant te deva ghora gele. Paddgamvokar hanchi odheatmik kovita atmeachea sodak kendrit asa. Te odheatmak dhormache faskent bandun douronat tor te atmanubhou mhunn manddttat. Tanche kovitent kallkha koddlean ujvadda kodden vochpacho haves, axavad, atm' sakxatkar, monisoponn, somanotai hancho aspavo zata.
Aizover tanche 9-10 kovitajhele ujvaddak aileat.Sadaronn 4 doskam voir (45 vorsam) tamnni konknnint sat'tean kovita rochleat. 1976 te 2020 ho tancho rochna kall. 1. ‘Ujvaddachim paulam’ (1976) 2. ‘Vaskoin’ (1977), 3. ‘Hamv monis oxvot'thamo’ (1985), 4. ‘Kovita: kall relvecheo, mon harxancheo, paus panneancheo’ (1993), 5. ‘Sorg ghoddpak dhortorecho’ (1994), 6. ‘Vhamvti nhoim kallachi’ (2003), 7. ‘Brohmandd-yogi chimrontonacho’ (2008), 8. ‘Punrarthoponixod’ (2014), 9. ‘Dannea yedi dhortori ’ (2020) he 9 Kovitajhele toxench 10. ‘Somratt oxok “xilpi , okhondd bhartacho mullarombhi somvsarik xribud'dhodhrm' prosaracho” Mohakauy (2022) hem mohakauy ujvaddak ailam. Tanchea ‘hamv monis oxvot'thamo’ hea kovitajhelea khatir tankam kendri-i sahity okademicho purskar favo zala.
Prakash Padgaonkar hancheo kovita-
‘ujvaddachim paulam’ (1976) ho tancho poilo voilo kovita jhelo. Ujvaddacho dheas axil'lo ho kovi. Hea jheleant vott'tt 50 kovitancho aspavo zata. Hea jheleache prostaunent podmoxri bakibab borkar mhonnttat ki prokax bab he ek protibhaunt kovi. “tankam dista to ujvadd ho ujvadd ani kallokh, jiun ani moronn, prem' ani vyotha, sukh ani dukh,gonean ani ogonean, soim' ani tachem rituchkr, vostunche akar prokar ani tanche spond ani vikar hea sogleanchi utpot'ti, sthiti ani loi zaka lagun ghoddtta to sonaton ujvadd. To ujvadd mhonnlearoch sot chit anond.” dheasa vangddach kauy -vyoktitvachem odheatmikoronn korpachem xrey tankam lablam. Tanchem namv prokax. Ujvadd ho ‘tomso ma jeotirmogoi’ hem totv vyokt korta. Hea jheleantole ‘ujvaddachem paul’ he tanche poile voile kovitent te mhonnttat-
“ujvaddachem paul mhojem kallkha soponn choddttolem
yeum tufan zaum modd sohzotayen portitolem”
prokax paddgamvokar he xri orvindache totvopronnaliche ek upasok. ‘mha-yogi orvindak’ hea namvan rochil'le kovitent te mhonnttat-
“ujvaddacho dut tum omrutachi nhoim
bhagea lhar futtlem, tujim paulam tharlim thoim…….
Mhurt tuji dolleant santthoit nomon tuka kortam
orvinda tum sorg, tujea ujvaddant nhatam”
‘Vaskoin’ (1977) hea dusrea jheleant dirgh kovita aspautat. Tanchea kovitamni kallkha koddlean ujvadda kodden vochpacho provas chaluch urta.Toxench tomos hache sombondan kovichea monant axil'lo rag suchoita. Vasko xarant eka kallar cholotlea kallea-vaitt ghoddnnukancho tamnni thavo ghetla. Ud'degikoronn, produxonn ani bainnachea xindlloki veusayak lagun vasko xarachi zal'li ovtikai manddlea.
1. “Vasko mhollear ek rosain
khotkhotot raupachem
rosain tem hench kai kitem
vixvachea “ud'darachem”?”
30. Ho vatthar fexnebol baileuri
disa-ujvadda girestokai miroita
ani kallokh poddunk lagtokoch
rongponchom' monoita.
‘Hamv monis oxvot'thamo’ (1985) hea jheleant 55 kovita aspautat. Hea jheleant tancho sod oxvot'thameachea sonketamni vyokt zal'lo dista. Ho nokar dorxoupi sod kovik manouna.
Te ovsthentolean bhair sorun ‘osto ma sodgomoya’ kodden vochpacho dheas te ghetat. Hamv monis oxvot'thamo he kovitent
hamv monis
hamv oxvot'thamo....
Oxem mhonnot
hamv adhunik monis
hamv oxvot'thamo” oxem mhonnttat.
‘Mhoji jinn’ he kovitent te mhonnttat-
“brohmanddachea vipulokayent
mhoji jinn il'lixi
zalearoi ticho vhodd itihas
pallam mullam vixv nirmonnechea khinnaposun
ani tazo tigavo vixvoloyemeren”
‘Kallokh gupatt’ he kovitent te mhonnttat
“nirrthotayecho
kallokh gupatt
uktaitolo vatt
ujvaddachi”
‘Sorg ghoddpak dhortorecho’ (1993) hea kovita jheleant kovik apnnak paupachi suvat ani vochpa fattlo ud'dexy ufallun ayil'lo dista. Hea jheleantleo kovita ddisembor 1988 te zanevari 1990 hea kallant boryil'leo. Hea jheleant 3 axeancheo kovita gunthleat. Dekhik- mog ojromvori, kritarth sugurvo ani bhovixy dixttavo.
“lharar lharam futtchi, toxo
jivak vennor venno
brohmandd vonxa jivo bhomvta-
pottant, zo kolpam jinno”
bhovixy dixttavo he kovitent
brohmandd yogi chirontonacho
martam tasam kallar
nodor arpar bhedit bhomvta
asonsth suryorothar
....
Pranna prannant vichar satvik
monisojinn dhadosotoli
sorg ghoddpak dhortorecho
kolp novo arombhola.”
‘Kovita: kall relvecheo, mon harxancheo, paus panneancheo’ (1994) hea jheleantleo kovita sanketik protikamni bhoril'leo distat.
“relve rulla xejrak konnacho
zolm', mornn ghor-somvsar
relvey konnakonnank zata
pillgeam pillgeancho adar”
‘Mon harxancheo’-
“prithvir hamv ubo ravun
mollba khol harxant polloita
mollbak asun osim' kholai
bimb mhojem hamv niallottam”
‘Vhamvti nhoim kallachi’ (2003) hea kovita jheleantleo kovita namvam promann tancho sod vhamvte nhomye vori dista. Hea jheleant 69 kovita aspautat. ‘noulayechem ghor’ he kovitent te mhonnttat-
“noulayechem ghor mhogelem
noulayechem ghor
ratchem tachea pakheacher nokhetranchem zhumbor”
‘Soim'-srizon’ he kovitent te mhonnttat-
“soim' srizonanchem bhanddar
riturituntlean rupkarak yeun
indrodhonnuchea rongamni
he vosundhorek prosoit rauta”
‘Brohmandd- yogi chirontonacho’ (2003) hea jheleant 71 kovita aspautat.Heo kovita tamnni 1998-2007 hea kallant rochil'leo.Kovi aple monantole utforke porgottaina spoxtt kortat ki “heo kovita mhojea choity monacho hunkar. Monan nivant, xant astona ho mhojea atmealagim zal'lo somvad. Heo kovita akarak yetna, mhojea dolleam samkar jem kitem sakarun monar poddbimbotalem, tamnnich utranchem rup ghetlam. Purai jheleant mhan totvogineani xri orobindo hanchi totvopronnali manddil'li dixtti poddtta. Hea jheleantoli poili kovita mhonnlear vixv brohmandd rochnnareachi kel'li prarthona.
Hi kovita sar rupan soglea jheleacho kel'lo gupitarth. He kovitent monon korpi monis fokot kovi nhoi tor purai monisokullacho protinidhi. ‘prarthona’ he kovitent te mhonnttat-
“vixv- brohmandd rochnnarea
jeot tujich mhoje bhitor
jeot jeotik bhett'tt'ttokoch
amchem modlem sorta ontor”
ho “vixv brohmandd rochnnaro toch brohmandd yogi chimrontonacho asa, to kovi bhitor asa, toso soglleam bhitor asa. ‘mon brohmandd’ he kovitent te mhonnttat-
“Mon brohmandd unchai, mon brohmandd kholai
mon onont omap, mon choitny nillai”
he toren to yogi amchea soglleam bhitor axil'lo monis “vixv brohmandd rochnnaro asa dekhun kovi ‘brohmandd- yogi chirontonacho’ he kovitent mhonntta-
“hamv brohm'-biz rujtam
kallak bhitor uboitam
srizon obhipse prokriek
rosgondhaita ll”
xri orobindoche t'toupronnalichi anik ek dekh
“hamv proyogi porardhacho
brohmandd-yogi chirontonacho
nom' nirmonne utkrant porvam
sakxatkaraitam ll
Mhozo kirnnotsovi voso
poddbimbota pranna harso
odxtt hamv, ojromvorachi
richa jietam ll”
he kovitent kovik oxem mhonnpachem asa ki dor eka monxa bhitor brohmandd bhoril'lem rup vosta. Toch ix va ixvor asa. Ixvoroponixodant tachem vornnon oxem asa-
“ixavaseam idom sorvom'
yot kinch zogteam zogot”
Hoch sondex tanche ‘ixvorosukt’ he kovitent pollounk melltta.
“ixvora, tuvem tuje itsen ghoddoilo mohasfott
ani nirmilem vixv-brohmandd
hea sfotta vorvim ixvora
tujech jiusannechem ostitv ximpddun
tuvem prosoilem choitny
veapit ontrall onontot'tv soglle vatten
sadoit ॐkar dhvoni ॐ...ॐ...ॐ..
Big beng sid'dhantachoi orth kovi spoxtt korta. (onnu poros lhan axil'lea konna posun ani purai srixtt nirmann zaun ticho vayu rupan arombh zalo. Hea vayu posun ujvadd nirmun tache vorvim udok prosoulem. Udkachea prokrien dhortorechi nirmonni zali.Hea zodd rupa pasun chorachor pranni toxench chinton korpi monxachi nirmonni zali.
‘Hamv monis sonaton’ he kovitent kolatmok ritin manddtta.
“samsnna khatir nirmonnecho krom' cholpi
hamv monis
khonntta jivo jivaull somskriti ut'thanachi bunead……”
‘hamv konn hacho sod ved, upnixod, brohmosutr, xribhgoudgitent asa. Kovi paddgamvokar hey haka addvad nat.
‘hamv konn’ he kovitent te mhonnttat-
“hamv jen'na zalom
ekrup hea harxantlea monxa bhitor
ten'na laglom virgollopak chorachorant
onnurennuche sukxmotayen
sogllem mhoje bhitor aspaun ghet
ani he ovsthent
jen'na hamvem polloilo mhaka
mhojea ostitvorupi kallzachea
harxant
“deva mhojea”
ten'nach mhaka zali mhoji khori vollokh
ani koll'llem “hamv konn?” tem”
xri orobindochi totvopronnali- utkamnti ani soimachem rohsy kovi paddgamvokar hamnni sadea sopea utramni amche rosall konknni bhaxent manddpacho yotn kela.
Khorea orthan te ek sadhok. Totvoginean tamnni ghottun pielem, monon, chinton tanchea xirontoramni bhorlem ani srizon vixv ghoddoilem.
‘Magnnem brohmanddorayalagim’ he kovitent te mhonnttat
“khinnan khinn brohmandd-raya rajy tujench cholchem
raxttancheo soradi moddun mukt vichar vhamvche.....
Monisozatik yeun oto natim novim zullchim
somvsarachi monisozat ekach dhagean gunthchi” vosudhoiv kuttumbokomochi sonklpona te hangam manddttona distat.
‘Punrarthoponixod’ (2014) hea jheleant 9 kovita aspautat. Bhogvan xrikrixnn, sotyokam' zabala, topsvi xombuk, totvobodhi goutom' bud'dh, adrx put xrounn kumar, korunnecho mohasagor jezu krist, norortn nochiket hanche poromporen lokam samkar ubea kel'lea kaim mithkam ani ghoddnnukancho chikitsok bud'dhin niall korun kovi tancher chalont kallachea sondrbhantolean apnnalem bhaxy korta.
‘Sombhvami yuge yuge’ he kovitent kovi mhonnttat
monis:
xrikrixnna tum asa
konnakonnant bhoril'lo
tum sorvogone sorvoveapi
sogleak asun disnaxil'lo
tuvem gheun aspaun
tuje bhitor hem brohmandd
tunch zaun raula
purayen brohmandd
Xrikrixnn:
dekhun hamv
thoinch asta
gheun mhojem sudrxon chokr
fuddarachea dixttavean
kallrupi vixvorup dorxonacho
ghoddoun protyoi
korunk uzu vicharanchea
dhorm' totvanchi susjz protisthaponnuk
haddunk prithvicher
divyotayechi chirsthayi
sorgorupi xantikai
ubarunk kallacho thor voir.”
‘Vhoddvik sotyokam' zabalachi’ hi kovita chhandogy upnixodantole sotyokam' zabal he auy putachi kanni.
“sotyokam' lokhlokhoto
brohm'-gineanan poripurnn
bhoril'lo jeotincho punzo”
‘Brohmorxi sotyokamachem xubhourtoman’ hi kovita 8 ani 9 zanevari 2011 hea disa bengllurak xriorovind axromant tamnni rochli. He kovitentlea axeacho mull sotyokam' zabal hea upnixodantlea kothanoka kodden kosloch sombond na. Hi kovita tanche protbhechea dixttavean xoktibharan boroun zali oxem te nomud kortat.
Totvobodhi topsvi xombuk hi kovita tancher ujvadd ghalta.
“topsvi xombuka
tuje bhitor
ujvaddachea bharan
brohmanddun ayil'li
topsyechea zannvikayechim lharam
paunddea paunddean
vistarot vochun
hatasunk sodtalim
gupitam odrixeachim”
‘totvobodhi goutom' bud'dh’ he kovitent bud'dhachi xikounn te sangtat.
“goutom' bud'dh xud'dh jielo
zonlokant tosoch vavurolo
dourun uktem kalliz sodam
bhitrolench dakhoit bhair.....
Sanglem goutom' bud'dhan zagak
zo xoronn vochun gheta zannun sotam
toch khoro progoneavan
toch zoddtta chironton sukham.....”
‘Dannea yedi dhortori’ (2020) hea jheleant 64 kovita aspautat. Hyai jheleant vixv-brohmandd monis he kovitent te mhonnttat,
hem mhojem
oloukik vichar-yan
rautolem korit provas
aple dhean-xoktin santthoun ghet
brohmanddache urjek
prokxeponn korun
fulounko dhortorechea konnankonnant
nou-choitneachi fantodd.”
‘Mhojem ostitv’ he 20 nouhembor 2009 hea disa rochil'le kovitent te boroitat-
“faleam hamv
aslom kitem naslom kitem
konnak kosloch forok poddum
va na poddum
oxem hamv mhonncho na
hem vixv-brohmandd
mhojeant bhorlam
hangchea konnankonnantlean
mhojem ostitv porzollolam
hamv tatunt bhorsolam
Hamv jietolom zaun
soimachi srizon prokria
hamv ojromvorot murtolom
zaun totv brohmanddachem
brohmanddachea matri-xoktichem”
‘Kallkha kusveant ujvadd’ he kovitent kovi mhonnttat-
atam monam-ontrallak
odd vhamvtea tarea-punjeanchi
ani loktubai nityoneman
kallkha-kusveant
ujvadd pikoitlea sureachi”
‘Mhoje punrzolm'’ he Februvari 2019 hea disa rochil'le kovitent kovi mhonnttat
“hamv nustem zatlom
zhadd zatlom, zhaddavelem foll zatlom
maddavelo nal'l zatlom
vochot thoim paut thoim
ruzot follot rautolom...
.....
Hamv monis mortolo
sarem zaun konn konn mhozo
hozar vorsam
nove nove punrzolm'
ghet rautolom.”
‘Somratt Ashok “xilpi , okhondd bhartacho mullarombhi somvsarik xribud'dhodhrm' prosaracho” mohakauy (2022) namvachem mohakauy tamnni khorem mhonnlear 2014 te 2020 hea kallant rochil'lem. Punn kovidd kallant te onontant vilin zale. Hem mohakauy 14 kaveani tamnni manddlam. Mornna uprant tanchea ghorcheamni hem mohakauy ujvaddak haddlem. Hea mohakaveant tamnni somratt oxokache jinneche ani xribud'dhachea xikounneche itihasik prosong ghetleat.
‘Somratt Ashok-achem xribud'dhattham-i atmosomrponn’ hatunt te mhonnttat
he korunnechea mhasagora
monis jinnechea ud'dhara
bhogvan xribud'dha
Hamv okhondd bhartacho
mhaprakromi chokrourti
somratt oxok
notomstok tujea pamyar.....”
Prakash Padgaonkar hanche kovitentoli bhas ani xoili-
toxem pollounk gelear prokax paddgamvokar hanchi bhas sadi sopi, provahi asa. Tech borobor mithkam, protikam, protima hancho vhodda promannant vapor kel'lo dista.
Nixkorx-
• Prakash Padgaonkar he konknni kovita molla voile odheatmik boska axil'le ek sadhok.
• Aplea kovitamni tamnni mithkancho, soimantlea protikancho, protimancho somrpok vapor kel'lo dista.
• Axavad, adrxovad,ostitv vad, monisoponn, ekchar-bhauponn, somta, lagnnuk, sodachar, raxttri-i osmitai tanche kovitent poddbimbit zal'lo dixtti poddtta.
• Tamnni xri orvind, bhogoutogita, upnixodam, bud'dhisomacho kholayen obheas kela. Tacher monon, chinton korun, sadhna korun tem tanchea ontrongant apnnailam ani sadea sopea utramni odheatmik sur tamnni konknni sahiteant alloileat.
• Jen'na jen'na konknni sahiteant poddbimbit zal'lea odheatmik kovitancho vichar zatlo, ten'na ten'na prokax paddgamvokar namvacho ujvadd porzollottolo.
Adaraull-
• Padgaonkar, Prakash. Ujvaddacham paulam. Opurobai prokaxon,1976
• Padgaonkar, Prakash. Vaskoin. Zag prokaxon,1977
• Padgaonkar, Prakash. Hamv monis oxvot'thamo. Ixttagot prokaxon,1985
• Padgaonkar, Prakash. Kovita: kall relvecheo, mon harxancheo, paus panneancheo. Razhoms vitronn,1993
• Padgaonkar, Prakash. Sorg ghoddpak dhortorecho.Razhoms vitronn,1994
• Padgaonkar, Prakash. Vhamvti nhoim kallachi.Prokaxon,2003
• Padgaonkar, Prakash. Brohmandd-yogi chimrontonacho. Srizon-vixv prokaxon,2008
• Padgaonkar, Prakash. Punrarthoponixod. Srizon-vixv prokaxon,2014
• Padgaonkar, Prakash. Dannea yedi dhortori. Srizon-vixv prokaxon,2020
Sondrbhaull-
• Dsouza, Chandralekha. Konknni kaveachi prixtthobhumi. Chinton Prokaxon,1994
• Mauzo, Damodar. Finiksachem ut'than ani Sorzokache utforke. Onddor do pipol ttri,2019
• Verenkar, Sham, Madhvi Sordesai,komlakor mhallxi.Konknni bhas, sahity ani somskritai. Konknni bhaxa monddoll,2003.
• Sardesai, Manohar Rai. O histtori ef konknni littrechor.Konknni sahiteacho itihas).Sahity okademi,2000.
Sonketothollam-
• https://en.wikipedia.org/wiki/Spirituality
• https://auroville.org/page/sri-aurobindos-teaching-and-spiritual-method
• https://vivekavani.com/teacher-spirituality-swami-vivekananda
• https://vajiramandravi.com
• https://en.wikipedia.org/wiki/Buddhism
Anju Sakhardande
Soheogi pradheapok,konknni,
Bharti-i bhaxa vibhag
Dhempe kola ani vigonean mohavidealoi,
Ponnji-Gõy.
Carmel Kola, Vigoneanani Vannijy Mohavidealoi, Nuvem-Gõy
Dalgado Konknni Okademi
Ashawadi Prakashan, Mumboi zodd palvan ayojit raxttri-i porisomvad
Konknnintoli Odheatmik Kovita (22 January, 2026)
