ಫೈಸಲ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾಂಕರ್ - 3

ಮಟ್ವಿ ವಳೊಕ್:

ಕವಿ ಜಾವ್ನ್ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಪಾಂಯ್ ದವರ್‌ಲ್ಲೊ ಹೊ ಅಪ್ಲಿ ಪಯ್ಲಿ ಮಟ್ವಿ ಕಾಣಿ ಘೆವ್ನ್ ಉಭೊ ಜಾಲಾ ತರ್‌ಯ್ ಹಾಚ್ಯಾನ್ ಫುಡೆಂ ಖಂಡಿತ್ ಬರ್‍ಯೊ ಕಾಣ್ಯೊ ಬರಂವ್ಚಿ ಶ್ಯಾಥಿ ಆಸಾ ಮ್ಹಳ್ಳೆಂ ಬೊಲ್ಮೆಂ ಹಾಂವ್ ಆತಾಂಚ್ ಸಾಂಗೊನ್ ಸೊಡ್ತಾಂ. ಕಾಣಿ ಸಾಂಗ್ಚಿ ಕಲಾ ಬರ್‍ಯಾನ್ ಜಾಣಾ ಆಸ್ಚೊ ಹೊ, ಪ್ರಸ್ತುತ್ ದುಭಾಯಾಂತ್ ವಾವ್ರ್ ಕರುನ್ ಆಸಾ ಆನಿ ದುಭಾಯಾಂತ್ ಸಾಹಿತಿಕ್ ಚತುವಟಿಕಾಂನಿ ಕ್ರಿಯಾತ್ಮಕ್ ರಿತಿನ್ ವಾವ್ರ್ ಕರುನ್ ಆಸಾ.

ರೆಮ್ಸಿ ಫೆರ್ನಾಂಡಿಸ್

ಕಥಾಂಕರ್ - 3. ಫೈಸಲ್

"ಫೈಸಲ್........." ಬಾಪಾಯ್ಚಾ ಹಾತಾಚೊ ಸ್ಪರ್ಶ್ ಫೈಸಲಾಚಾ ಗಾಲಾಚೆರ್ ಝಗ್ಲಾಣೆ ಮಾರ್‌ಲ್ಲೆಪರಿಂ ಪಡ್ತಾನಾ ಫೈಸಲಾಚೆ ದೊಳೆ ಉಗ್ತೆ ಜಾಲೆ...

"ಕಿತೆಂ ಮ್ಹಣ್ತಾಯ್ ತುಂ ಫೈಸಲ್, ಹಿ ತುಜಿ ಆವಯ್ ನ್ಹಯ್? ಕೊಣೆ ಸಾಂಗ್ಲೆಂ ಹಿ ತುಜಿ ಆವಯ್ ನ್ಹಯ್ ಮ್ಹಣೊನ್? ನ್ಹಯ್ ಖಂಚ್ಯಾ ಆಧಾರಾರ್ ತುಂ ಉಲಯ್ತಾಯ್?" ಬಾಪಾಯ್ಚ್ಯಾ ಗೊರೊಜೆಕ್ ಫೈಸಲ್ ಉದ್ರೇಕಿತ್ ಜಾಲೊ....

"ತುಂ ತೋಂಡ್ ದಾಂಪ್...ಆಜ್‌ಚ್ಚ್ ಆಕ್ರೇಚೆ ಪಾವ್ಟಿಂ ತುಂವೆ ಮ್ಹಜೆರ್ ಹಾತ್ ಉಬ್ರಾಂವ್ಚೊ! ಹಾಂವ್ ಕಿತೆಂ ಲ್ಹಾನ್ ಮ್ಹಣ್ ಚಿಂತಾಯ್??? ಹಾಂವ್ ತುಜೆಪರಿಚ್ಚ್ ಏಕ್ ದಾದ್ಲೊ...ಜಾಗ್ರುತ್.." ಪರ್ತ್ಯಾನ್ ಸಾಂಗ್ತಾಂ ಹಿ ಮ್ಹಜಿ ಆವಯ್ ನ್ಹಯ್! ಮ್ಹಜಿ ಆವಯ್ ಜಿವಂತ್ ಆಸಾ, ಮ್ಹಜೆ ಭಾವ್ ಆಸಾತ್, ಮ್ಹಜೆ ಕುಟಾಮ್ ಹಾಂಗಾಸರ್ ಲಾಗ್ಗಿಂಚ್ ಆಸ್ಚೆ ಪರಿಂ ಭೊಗ್ತಾ... ಹಾಂವ್ ಖಂಡಿತ್ ತಾಂಕಾ ಸೊಧುನ್ ಕಾಡ್ತಲೊಂ.....

ಏಕಾ ಸಾತ್ ವರ್ಸಾಂಚ್ಯಾ ಭುರ್ಗ್ಯಾ, ಫೈಸಲಾಚ್ಯಾ ತೊಂಡಾಂತ್ ಥಾವ್ನ್ ವಾಳ್ಚಿಂ ಉತ್ರಾಂ ಆಯ್ಕೊನ್ ಬಾಪಯ್ ಸಗ್ಳೊ ಕಾಲುಬುಲೊ ಜಾಲೊ ಮಾತ್ರ್ ನ್ಹಯ್ ಅಪ್ಲ್ಯಾ ಮೊಗಾಳ್ ಪುತಾಚಿ ಬದ್ಲಾವಣ್ ಪಳೆವ್ನ್ ಖಂತಿಷ್ಟ್ ಜಾಲೊ.

ವಲೀದ್ ಅನಿ ರುವೇದಾ, ಸರ್ವಾಂಕ್ ಮೊಗಾಚಿಂ.. ಹಾಂಚ್ಯಾ ತೆಗಾಂ ಭುರ್ಗ್ಯಾಂ ಸಾಂಗಾತಾ ಬೈಸೂರ್ಚಾ ಪರ್ವತ್ ಸುವಾತೆರ್ ವಸ್ತಿ ಕರ್ನ್ ಅಸಾತ್. ಲಗ್ಭಗ್ ತೀಸ್ ಲಾಖ್ ಲೊಕಾಂನಿ ವಸ್ತಿ ಕರ್ಚ್ಯಾ, ಲೆಬನಾನ್ ದೆಶಾಂತ್ಲೊ ಏಕ್ ಜಾಗೊ ಬೈಸೂರ್. ಹಾಂಗಾಸರ್ ಚಡಾವತ್, ಮುಸ್ಲಿಂ, ಆನಿಂ ದ್ರೂಸ್ ಆನಿ ಥೊಡೊ ಕ್ರಿಸ್ತಾಂವ್ ಲೋಕ್ ವಸ್ತಿ ಕರ್ತಾ. ಚೊವ್ದಾ ವರ್ಸಾಂ ಹಾಂಗಾಸರ್ ಸಿವಿಲ್ ವಾರ್ ಚಲೊನ್ ಆಸ್‌ಲ್ಲೆಂ. ಕಿತ್ಲೆಶ್ಯಾ ಜಣಾನಿಂ ಕಿತ್ಲ್ಯಾಂಕ್ ಲಗಾಡ್ ಕಾಡ್ಲೆಂ, ಕಿತ್ಲ್ಯಾಂಚ್ಯಾ ಕಾಳ್ಜಾಂನಿ ಆಜೂನ್‌ಯೀ ದ್ವೇಷಾಚೆ ಕಿಟಾಳ್ ಪೆಟೊನ್ಂಚ್ಚ್ ಆಸಾ. ಆಜೂನೀ ಹಾಂಗಾಚ್ಯಾ ಲೋಕಾನಿಂ ಆಪ್ಲ್ಯಾ ಬಚಾವೆ ಖಾತಿರ್ ಅಪಾಪ್ಲ್ಯಾ ಘರಾಂನಿ ಆಸ್ತ್ರಾಂ ತಯಾರ್ ದವರ್ಲ್ಯಾಂತ್.

ವಲೀದ್ ಆನಿಂ ರುವೇದಾಚಾ, ತೆಗಾಂ ಭುರ್ಗ್ಯಾಂ ಪಯ್ಕಿ ಫೈಸಲ್ ನಿಮಾಣೊ ತಶೆಂಚ್ ಮೊಗಾಚೊ. ದುಸ್ರ್ಯಾ ವರ್ಗಾಂತ್ ಇಸ್ಕೊಲ್ ಶಿಕ್ಚ್ಯಾ ಫೈಸಲಾ ಥಂಯ್ ವಿಶೇಷ್ ಏಕ್ ಬದ್ಲಾವಣ್ ದಿಸೊನ್ ಯೆತಾಲಿ. ಭಾವ್, ಭಯ್ಣಿ ಸಾಂಗಾತಾ ಖೆಳ್ತಾನಾ ಜರ್ ರಾಗ್ ಆಯ್ಲೊ ತರ್, ಸುರಿ ಘೆವ್ನ್ ದಾಂವ್ಡಾವ್ನ್ ಹಾಡ್ತಾಲೊ....ತಿಂ ತಾಕಾ ಚುಕವ್ನ್ ಬಾಗ್ಲಾ ಭಿತರ್ ಲಿಪ್ಲ್ಯಾರ್, ರಾಗಾನ್ ಬಾಗ್ಲಾಕ್ ಕೊಚಾಯ್ತಾಲೊ...

ಹೆಂ ಸರ್ವ್ ದೆಖ್‌ಲ್ಲ್ಯಾ ಆವಯ್, ಬಾಪಾಯ್ನ್ ಅಪ್ಲ್ಯಾ ಪುತಾಕ್ ದಾಕ್ತೆರಾಕ್ ದಾಖಂವ್ಕ್ ಚಿಂತ್ಲೆಂ...
ರಾತಿಂಚಿ ಸಾಧಾರಣ್ ಸಾಡೆ ಇಕ್ರಾ ವೊರಾಂ ಜಾತಿತ್... ಫೈಸಲಾಚ್ಯಾ ರುಮಾಂತ್ ಥಾವ್ನ್ ಏಕ್ ದೀರ್ಘ್ ಶ್ವಾಸ್ ಸೊಡ್‌ಲ್ಲೆಪರಿಂ ಆವಾಜ್ ಆಯ್ಕಾಲೊ. ವಲೀದ್ ಉಟೊನ್ ಫೈಸಲಾಚ್ಯಾ ರುಮಾಕ್ ಧಾವ್ಲೊ..... ವ್ಹಯ್ ಫೈಸಲ್ ಮೆಲ್ಲ್ಯಾ ಮೊಡ್ಯಾ ಪರಿಂ ನಿದೊನ್ ಆಸ್‌ಲ್ಲೊ. ಕುಡಿಂತ್ ಕಿತೆಂಚ್ ಚಲಾವಣ್ ನಾತ್‌ಲ್ಲಿ. ವಲೀದಾನ್ ಫೈಸಾಲಾಚೆರ್ ಉದಾಕ್ ಮಾರ್ಲೆಂ, ಫೈಸಲ್ ಉಟೊನ್ ಬಸ್ಲೊ... ಥೊಡೊ ವೇಳಾ ಉಪ್ರಾಂತ್ ವಲೀದ್ ಆಪ್ಲ್ಯಾ ರುಮಾಕ್ ಪಾಟಿಂ ಪರ್ತಾಲೊ.

ಆಯ್ತಾರಾಚೊ ದೀಸ್ ತೊ....ರಜೆಚೊ ದಿಸ್! ಸಕಾಳಿಂ ಉಟೊನ್ ಕಾಫಿ, ಫಳಾರ್ ಸೆವ್ತಚ್ ತಿಂ ಫೈಸಲಾಕ್ ಘೆವ್ನ್ ದಾಕ್ತೆರಾ ಸರ್ಶಿಂ ಭಾಯ್ರ್ ಸರ್ಲಿಂ. ಹಾಂಗಾಸರ್‌ಯೀ ಅನ್ವಾರಾಂನಿ ಹಾಂಚಿ ಪಾಟ್ ಸೊಡುಂಕ್ ನಾಂ. ಆಸ್ಪತ್ರೆಕ್ ಲಾಗ್ಸಾರ್ ಪಾವ್ತಾನಾಂ, ಆಂಬುಲೆನ್ಸಾಂಚೊ ಆವಾಜ್ ಆಯ್ಕೊನ್, ಫೈಸಲಾಕ್ ಸಾಳ್ವಾಲೆಂ... ಆಂಬುಲೆನ್ಸಾಚೆರ್ ದಿಷ್ಟ್ ಪಡ್ತಚ್, ತಾಣೆಂ ಉಲಂವ್ಕ್ ಸುರು ಕೆಲೆಂ. 

"ಪಳೆಯಾ ಮ್ಹಾಕಾ ಆಂಬುಲೆನ್ಸಾರ್ ವ್ಹರ್ತಾತ್, ಮ್ಹಜೊ ಭಾವ್ ಮ್ಹಜೆ ಸಾಂಗಾತಾ ಆಸಾ, ದಿಸ್ತಾಗೀ ತುಮ್ಕಾಂ?"... ಫೈಸಲಾಚಿ ಹಿ ಅವಸ್ಥಾ ಪಳೆವ್ನ್ ಆವಯ್ ಬಾಪಾಯ್ಚಿ ತಕ್ಲೆನ್ ಕಾಮ್ ಕರ್ಚೆಂಚ್ ರಾವಯ್ಲೆಂ... ದಾಕ್ತೆರಾಕೀ ಖಂಚಿಚ್ ಪಿಡಾ ಮೆಳೊಂಕ್ ನಾಂ.... ನಿರಾಶೆನ್ ತಿಂ ಘರಾ ಪಾಟಿಂ ಭಾಯ್ರ್ ಸರ್ಲಿಂ...

ಚಡಾವತ್ ದೊನ್ಪಾರಾಂಚೊ ವೇಳ್ ಜಾಯ್ತ್... ಮುಲ್ಲಾ ಭಾಂಗ್ ದೀಂವ್ಕ್ ತಯಾರ್ ಜಾಲ್ಲೊ.... ಹಾಂಚೆ ದುರಾದೃಶ್ಟ್... ಪರತ್ ಫೈಸಲ್ ಚಾಳ್ವಲೊ ಭಾಂಗ್ ಆಯ್ಕೊನ್...." ಬಂಧ್ ಕರಾ, ಹೊ ಆವಾಜ್ ಬಂಧ್ ಕರಾ... ಮ್ಹಾಕಾ ಮಾರಿನಾಕಾತ್, ಹಾಂವ್ ತುಮ್ಚ್ಯಾಚ್ ಪಾಡ್ತಿಚೊ.... ಮ್ಹಾಕಾ ಮಾರಿನಾಕಾತ್... ಆನಿ ವೊಡ್ಲ್ಯಾನ್ ಬೋಬ್ ಮಾರ್ನ್ ಮ್ಹಣಾಲೊ... ಮ್ಹಾಕಾ ಮಾರ್ಲೆಂ" ಮುಲ್ಲಾಚೆಂ ಮಾಗ್ಣೆ ಮುಗ್ದಾಲೆಂ... ಥೊಡ್ಯಾಚ್ ವೆಳಾನ್, ಫೈಸಲ್ ಶಾಂತ್ ಜಾಲೊ...

"ಹೆಂ ಕಸ್ಲೆಂ ಆನ್ವಾರ್ ಆಮ್ಚೆರ್ ದಾಡ್ಲೆಂಯ್ ದೆವಾ, ಆಮ್ಚ್ಯ ಮಾಯಾಮೊಗಾಚ್ಯಾ, ಏಕ್ವಾಟಾಚ್ಯಾ, ಸುಖಿ: ಜಿವಿತಾಕ್ ತುಜ್ಯಾನ್ ಪಳೆಂವ್ಕ್ ಜಾವ್ನಾಂಗೀ?? ಖಂಯ್ಸರ್ ಆಮಿಂ ಚುಕೊನ್ ಪಡ್ಲ್ಯಾಂವ್??"

ವಲೀದ್ ಆನಿಂ ರುವೇದಾನ್ ದೆವಾಕ್ ಸವಾಲ್ ಘಾಲುಂಕ್ ಸುರು ಕೆಲೆಂ.. ಪುಣ್ ತಾಂಚ್ಯಾ ಸವಾಲಾಕ್ ಜಾಪ್ ಮೆಳ್ಳಿ ನಾಂ ಜಾಲ್ಯಾರೀ ದೆವಾಚೆರ್ ಭರ್ವಸೊ ತಾಣಿಂ ಸಾಂಡ್ಲೊ ನಾಂ. ದೆವಾಕ್ ಅರ್ಗಾಂ ದೀವ್ನ್ ತಿಂ ನಿದೊಂಕ್ ಘೆಲಿಂ... ರಜೆಚೊ ದೀಸ್ ಮ್ಹಜೆಚೊ ಜಾಯ್ಜಾಯ್ ಆಸ್‌ಲ್ಲೊ, ವೊಜ್ಯಾಚೊ ಜಾಂವ್ಕ್ ಪಾವ್ಲೊ...ವ್ಹೊಜೆಂ ಫೈಸಾಲಾಚಾ ಬದ್ಲಾವಣೆಚೆಂ, ವೊಜೆಂ ಕಷ್ಟಾಂಚೆ, ವೊಜೆಂ ನಿರಾಸೆಚೆಂ....

ಹರ್ಶೆಂಚೆ ಪರಿಂ, ಆನ್ಯೆಕ್ ನವೊ ದಿಸ್ ಉದೆಲೊ. ವಲೀದಾಕ್ ದಫ್ತಾರಾಕ್ ವೆಚೊ ಆಮ್ಸೊರ್ ತರ್, ಭುರ್ಗ್ಯಾಂಕ್ ಇಸ್ಕೊಲಾಕ್ ವೆಚೊ... ಸಗ್ಳಿಂ ಅಪಾಪ್ಲ್ಯಾ ವಾಟೆನ್ ಚಲ್ತಚ್ ರಾವ್ಲಿಂ... ರುವೇದಾ ಬಾವ್ಡಿ, ಕುಜ್ನಾಂತ್ಲಿ ಯೆಜ್ಮಾನ್ ಜಾಲ್ಲ್ಯಾನ್ ರಾಂದ್ಪಾಚಿ ತಯಾರಾಯ್ ಕರ್ನ್ ಆಸ್‌ಲ್ಲಿ... ತಿತ್ಲ್ಯಾರ್ ಕಾಂಪಿಣ್ ವಾಜ್ಲಿ.... ಸೆಜಾರ್ಚಿ ಬಾಯ್ಲ್ ದಾರಾರ್ ಉಭಿ ಆಸ್‌ಲ್ಲಿ.

ರುವೇದಾನ್ ತಿಕಾ ಬಸ್ಕಾ ದಾಖಯ್ಲಿ. "ಪೊಯ್ರ್ ಹಾಂವೆ ತುಂಮ್ಗೆರ್ ಕಿತೆಂಗಿ ಬೋಬ್ ಅಯ್ಕಾಲಿ, ಸಗ್ಳಿಂ ಘರಾ ಆಸ್‌ಲ್ಲ್ಯಾನ್ ಮ್ಹಾಕಾ ಕಾಲ್ ವಿಚಾರುಂಕ್ ಬರೆಂ ಲಾಗೊಂಕ್ ನಾಂ.. ಗಜಾಲ್ ಕಿತೆಂ?" ಆಪ್ಣಾಚ್ಯಾ ಘರಾಂತ್ ಚಲ್ಚ್ಯಾ ಕಷ್ಟಾಂಕ್ ಕಸ್ಲೊ ಪರಿಹಾರ್ ಪುಣೀ ಮೆಳಾತ್ ಮ್ಹಳ್ಳ್ಯಾ ಭರ್ವಸ್ಯಾನ್, ಘಡ್‌ಲ್ಲೆಂ ಸಗ್ಲೆಂ ಅಸಾ ತಶೆಂತ್ ಸಾಂಗ್ಲೆಂ ರುವೇದಾನ್...ಪ್ರಾಯೆಂತ್ ತಿ ರುವೇದಾಚ್ಯಾಕೀ ವ್ಹಡ್ ಜಾಲ್ಲ್ಯಾನ್, ತಿಚ್ಯಾ ವೊಂಟಾರ್ ಸವಾಲಾನ್ ಭರ್‌ಲ್ಲಿ ಜಾಪ್ ಉದೆಲಿ..

"ಫೈಸಲಾಕ್ ಕಾಂಯ್ ತಾಚೆಂ ಆದ್ಲೆಂ ಜಿವಿತ್ ಪುಣಿಂ ಉಗ್ಡಾಸಾಕ್ ಆಯ್ಲೆಂಗೀ??" ಚಡಾವತ್ ದ್ರೂಸ್ ಲೋಕ್, ಆದ್ಲೆಂ ಜಿವಿತಾ ವಿಶ್ಯಾಂತ್ ಪಾತ್ಯೆತಾತ್ ಜಾಲ್ಲ್ಯಾನ್ ತಿಣೆಂ ಅಶೆಂ ಉಲಂವ್ಕ್ ಕಾರಣ್..

"ಕಿತೆಂ? ತಾಚೆಂ ಆದ್ಲೆಂ ಜಿವಿತ್ ತಾಕಾ ಉಗ್ಡಾಸಾಕ್ ಆಯ್ಲೆಂ ಮ್ಹಣ್ ಭೊಗ್ತಾ ತುಕಾ??" ರುವೇದಾನ್ ಆತುರಾಯೆನ್ ವಿಚಾರ್ಲೆಂ...

"ವ್ಹಯ್ ಜರ್ ಕೊಣೀ ಝಗ್ಡ್ಯಾಂತ್ ವಾ ಕೊಣಾಚ್ಯಾ ಆನ್ಯಾಯಾನ್ ವಾ ಮೊಸಾನ್ ಬಲಿ ಜಾತಾ ತಾಕಾ ತಾಚೆಂ ಆದ್ಲೆಂ ಜಿವಿತ್ ಉಗ್ಡಾಸ್ ಯೆತಾ. ಆಮಿಂ ಹೆಂ ಪಾತ್ಯೆತಾಂವ್ ಜಾಲ್ಲ್ಯಾನ್ ಫೈಸಲಾಕೀ ಅಶೆಂಚ್ ಜಾತಾ ಜಾಯ್ಜಯ್....

ಸೆಜಾರ್ನಿಚಿ ಉತ್ರಾಂ ರುವೇದಾಚ್ಯಾ ಮತಿಂತ್ ಲ್ಹಾರಾಂ ವ್ಹಾಳ್‌ಲ್ಲ್ಯಾ ಭಾಶೆನ್ ಉಪ್ಯೆಂವ್ಕ್ ಲಾಗ್ಲಿಂ. ಥೊಡ್ಯಾಚ್ ದಿಸಾನಿಂ ಹಿ ಖಬಾರ್ ಗಾಂವ್ಚ್ಯಾ ಲೋಕಾಂ ಮ್ಹಣಾಸರ್ ಪಾವ್ಲಿ.

ಆಶೆಂಚ್ ದೀಸ್ ಧಾಂವ್ಲೆ, ಹಾಪ್ತೆ ಪಾಶಾರ್ ಜಾಲೆ, ಮ್ಹಹಿನೆ ಸಂಪ್ಲೆ... ಆಚಾನಕ್ ಬಾಗಿಲ್ ಬಡಯಿಲ್ಲೊ ಆವಾಜ್...ಟಕ್ ಟಕ್ ಟಕ್....ಕೋಣ್ ಘರಾಂತ್??........ ರುವೇದಾನ್ ದಾರ್ ಉಗಡ್ಲೆಂ...

ಮಾಫ್ ಕರ್... ತುಜಿ ವ್ಹಳೊಕ್ ಮೆಳ್ಳಿ ನಾಂ... ರುವೇದಾನ್ ಪಯ್ಲೆ ಪಾವ್ಟಿ ತಿಕಾ ಪಳೆಂವ್ಚೆಂ ಜಾಲ್ಲ್ಯಾನ್ ಸವಾಲ್ ಉಡಯ್ಲೆಂ.

"ಹಾಂವ್ ಹಾಂಗಾಸರ್ ಕಾಂಯ್ ಏಕ್ ದೋನ್ ಕಿ.ಮೀ ಪಯ್ಸ್ ರಾವ್ತಾಂ... ತುಜ್ಯಾ ಪುತಾ ವಿಶ್ಯಾಂತ್ ಆಯ್ಕಾಲೆಂ....ಬಾಜಾರಾಕ್ ಆಯ್ಲಿಂ, ತಶೆಂಚ್ ತುಜ್ಯಾ ಪುತಾಕಿ ಪಳೆವ್ನ್ ಯಾ ಮ್ಹಣ್ ಭೊಗ್ಲೆಂ."

"ಪುಣ್ ಫೈಸಲ್ ಇಸ್ಕೊಲಾಕ್ ಗೆಲಾ" ರುವೆದಾನ್ ಸಾಂಗ್ಲೆಂ..

ಪಯ್ಲೆಪಾವ್ಟಿಂ ಏಕಾಮೆಕಾ ಮೆಳ್ಚೆಂ ಜಾಲ್ಲ್ಯಾನ್ ಎಕಾಮೆಕಾ ವಳಕ್ ಕರ್ಚಾಂತ್‌ಚ್ ವೇಳ್ ಪಾಶಾರ್ ಜಾಅಲೊ. "ತರ್ ಹಾಂವ್ ಚಲ್ತಾಂ" ಆಪ್ಲೊ ವಿಳಾಸ್ ಆನಿ ಫೋನ್ ನಂಬರ್ ದೀವ್ನ್ ತಿ ಭಾಯ್ರ್ ಸರ್ಲಿ.

ಆಶೆಂ ಥೊಡೆ ದೀಸ್ ಪಾಶಾರ್ ಜಾಲೆ. ಫೈಸಲಾಚಾ ನಿಮ್ತಿಂ ಚಡಾವತ್ ಲೋಕ್ ವಲೀದ್ ಆನಿಂ ರುವೇದಾಕ್ ವಳ್ಕಿಚಿಂ ಜಾಲಿಂ.

ಮಾಂಯ್ ಮಹಿನ್ಯಾಚಿ ಆಟ್ ತಾರೀಕ್, ಫೈಸಾಲಾಚ್ಯಾ ಜೀವನಾಚೊ ಭಾಗಿ ದಿವಸ್...ಆಟ್ವೊ ಜಲ್ಮಾ ದಿವಸ್ ಆಚರಣ್. ಫೈಸಲ್ ನಿಮಾಣೊ ಜಾಲ್ಲ್ಯಾನ್ ವರ್ಸಾನ್ ವರ್ಸ್ ತಾಚೊ ಜನಮ್ ದಿವಸ್ ಆಚರಣ್ ಕರ್ತಾಲಿಂ.. ಹ್ಯಾ ಪಾವ್ಟಿಂ ಚಡ್ ಲೋಕ್ ಆಸ್‌ಲ್ಲೊ.

ಸಾಲಾಂತ್ ಕಾಳೊಕ್, ಬರ್ತ್ ಡೇ ಬೋಯ್ ಫೈಸಲ್ ಆಪ್ಲ್ಯಾ ಆವಯ್ ಬಾಪಾಯ್ ಸಂಗಿಂ ಪ್ರವೇಶ್ ಜಾಲೊ. ಸಾಲಾಂತ್ ದಿವೆ ಪರತ್ ಪೆಟಯ್ತಾಚ್ ಫೈಸಾಲಾನ್ ಕೇಕ್ ಕಾತರ್ಲಿ ಆನಿಂ ಪಯ್ಲೊ ಕುಡ್ಕೊ ಆಪ್ಲ್ಯಾ ಭಾವಾಕ್ ಆನಿಂ ಭಯ್ಣಿಕ್ ದಿಲೊ, ಉಪ್ರಾಂತ್ ಬಾಪಾಯ್ಕ್ ದಿಲೊ. ಆವಯ್ಕ್ ಕೇಕ್ ದೀಂವ್ಕ್ ಘುಂವ್ಲಾ ಮಾತ್ರ್, ಫೈಸಾಲಾಚಿ ದೀಷ್ಟ್ ಹಾಜಾರ್ ಜಾಲ್ಲ್ಯಾ ಪಯ್ಕಿ ಏಕ್ಲ್ಯಾಚೆರ್ ಪಡ್ಲಿ... ತಕ್ಷಣ್ ಆವಯ್ಚ್ಯಾ ಹಾತಾಕ್ ದರ್ನ್, ತಿಕಾ ಭಾಗ್ವೊಂಕ್ ಸಾಂಗ್ಲೆಂ ಆನಿ ತಿಚ್ಯಾ ಕಾನಾಂತ್ ಪುಸ್ಪುಸೊಂಕ್ ಲಾಗ್ಲೊ...

"ಹಾಂವ್ ಹಾಂಕಾ ಜಾಣಾ... ಹಾಂಕಾ ಸರ್ವಾಂಕೀ ಹಾಂವ್ ಜಾಣಾಂ"

"ಕಿತೆಂ ಮ್ಹಣ್ತಾಯ್ ತುಂ ಫೈಸಲ್? ತುಂ ಕಸೊ ಜಾಣಾಯ್?" ರುವೇದಾನ್ ಪುತಾಕ್ ಸವಾಲ್ ಕೆಲೆಂ... ರುವೇದಾಚ್ಯಾ ಆಪವ್ಣ್ಯಾಖಾಲ್ ತೆಂ ಕುಟಾಮ್ ಥಂಯ್ ಹಾಜರ್ ಆಸ್‌ಲ್ಲೆಂ.

ತಿತ್ಲ್ಯಾರ್ ಫೈಸಲ್ ತಾಂಚೆ ಲಾಗಿಂ ಘೆಲೊ. "ರಾಯೆದ್, ಮ್ಹಜಾ ಭಾವಾ, ತುಂ ಮ್ಹಾಕಾ ವಳ್ಕಾನಾಂಯ್ ಗೀ?? ಹಾಂವ್ ತಾರೇಕ್...". ರಾಯೆದಾನ್ ಫೈಸಾಲಾಕ್ ಪಯ್ಲೆಂ ಪಾವ್ಟಿಂ ಪಳೆಂವ್ಚೆ ಜಾಲ್ಲ್ಯಾನ್, ಭುರ್ಗ್ಯಾಚ್ಯಾ ತೊಂಡಾಂತ್ ಥಾವ್ನ್ ಆಪ್ನಾಚೆಂ ನಾಂವ್ ಆಯ್ಕೊನ್, ರಾಯೆದಾಕ್ ಪಾಯಾಂ ಪಂದಾ ಥಾವ್ನ್ ಥಳ್ ಚುಕ್‌ಲ್ಲೆಪರಿಂ ಜಾಲೆಂ...

"ತಾರೇಕ್?? ತುಂ ಜಲ್ಮೊಂಚ್ಯಾ ಆದಿಂ ತೊ ಸರ್ಲಾ.. ಹಿ ಖಬಾರ್ ತುಕಾ ಕೊಣೆ ಸಾಂಗ್ಲಿ??"

"ಪುಣ್ ಭಾವಾ ಹಾಂವ್‌ಚ್ಚ್ ತಾರೇಕ್, ನಾಂ ತರ್ ಮ್ಹಾಕಾ ತುಜೆಂ ನಾಂವ್ ಕಶೆಂ ಕಳಿತ್?"

"ತರ್ ಹಿ ಕೋಣ್?? ಆಪ್ಣಾಚ್ಯಾ ಬಾಯ್ಲೆಕ್ ದಾಖವ್ನ್ ರಾಯೆದಾನ್ ಫೈಸಲಾಕ್ ಸವಾಲ್ ಕೆಲೆಂ.

"ಹಿ ಮ್ಹಜಿ ವೊನಿ, ತುಜಿ ಬಾಯ್ಲ್" ಫೈಸಲ್ ವಳ್ಕಾಲೊ.

"ತರ್ ಮ್ಹಜೆಂ ನಾಂವ್ ಸಾಂಗ್ ಆನಿಂ ಮ್ಹಾಕಾ ಆಡ್ ನಾಂವ್ ಆಸಾ ತರ್ ಸಾಂಗ್" ಆತುರಾಯೆನ್ ರಾಯೆದಾಚ್ಯಾ ಬಾಯ್ಲೆನ್ ವಿಚಾರ್ಲೆಂ...

"ವೊನ್ಯೆ ತುಜೆಂ ನಾಂವ್ ರಾನಾ, ಆನಿ ಆಮಿ ತುಕಾ ಮೊಗಾನ್ ಸೂಜೂ ಮ್ಹಣ್ ಆಪಯ್ತಲ್ಯಾಂವ್" ಫೈಸಲ್ ಮ್ಹಣಾಲೊ..

ವ್ಹಡಾ ಆತುರಾಯೆಚೆಂ ವಾತಾವರಣ್ ಥಂಯ್ಸರ್ ದಿಸೊನ್ ಆಯ್ಲೆಂ. ಗಡ್ದಾಳಾಯೆನ್ ಫೈಸಲಾಚೊ ಜಲ್ಮಾ ದಿವಸ್ ಆಚರಣಾಚೊ ಸಂಭ್ರಮ್ ಸಂಪ್ಲೊ. ಸಗ್ಳಿಂ ಆಪಾಪ್ಲ್ಯಾ ಘರಾ ಘೆಲಿಂ...

ತಿ ರಾತ್ ಶಾಂತ್ ಆಸ್‌ಲ್ಲಿ.. ಫೈಸಲ್ ಶಾಂತ್ ಆಸ್‌ಲ್ಲೊ.. ಫೈಸಲಾ ಥಂಯ್ ಜಾಂವ್ಚಿ ಬದ್ಲಾವಣ್ ನಪಂಯ್ಚ್ ಜಾಲ್ಲಿ.

ದುಸ್ರ್ಯಾ ದಿಸಾ ಸಕಾಳಿಂ ಉಟೊನ್, ಆಪ್ಲ್ಯಾ ಆವಯ್ ಬಾಪಾಯ್ಕ್ ಘೆವ್ನ್, ಏಕಾ ಪಳ್ಳೆ ಸರ್ಶಿಂ ಘೆಲೊ ಆನಿಂ ತಾಚ್ಯಾ ಆದ್ಲ್ಯಾ ಜಿವಿತಾಂತ್ ಘಡ್‌ಲ್ಲೆಂ ಹರ್ಯೆಕ್ ಘಡಿತ್ ಖಳಿತ್ ಕೆಲೆಂ.. ಕ್ರೀಸ್ತಾಂವ್ ಆನಿಂ ಮುಸ್ಲಿಂ ಲೊಕಾ ಮಧೆಂ ಚಲ್‌ಲ್ಯಾ ಝಗ್ಡ್ಯಾಂತ್ ರಾಯೆದ್ ಆನಿಂ ತಾರೇಕಾನ್ ಮುಸ್ಲೀಮಾಂಚೊ ಸಾಂಗಾತ್ ದಿಲ್ಲೊ...ಆಪುಣ್ ತಾಂಚೊ ಸಾಂಗಾತಿ ಮ್ಹಣ್ ಹಾತ್ ಉಬಾರ್ನ್ ಸಾಂಗ್ಲ್ಯಾರೀ, ತಾಣಿಂ ಮಾರ್‌ಲ್ಲೊ ಬಂದೂಕೆಚೊ ಏಕ್ ಗುಳೊ, ತಾರೇಕಾಚ್ಯಾ, ಹರ್ದ್ಯಾರ್ ರೊಂಬ್ಲೊ... ತಾರೇಕ್ ಧರ್ಣಿಕ್ ಕೊಸಾಳ್ಳೊ...ರಾಯೆದಾನ್ ಆಂಬುಲೆನ್ಸಾರ್ ಘಾಲ್ನ್ ಆಸ್ಪತ್ರೆಕ್ ಪಾವಂವ್ಚ್ಯಾ ಪಯ್ಲೆಂಚ್ ತಾರೇಕಾನ್ ಪ್ರಾಣ್ ಸೊಡುಲ್ಲೊ.

ಆತಾಂ ಫೈಸಾಲಾಚ್ಯಾ ಆವಯ್ಕ್ ಆನಿ ಭಾಪಯ್ಕ್ ವಿಶಯ್ ಕಳಿತ್ ಜಾಲೊ. ಪಳ್ಳೆಚೊ ಭಾಂಗ್, ಆಂಬುಲೆನ್ಸಾಚೊ ಆವಾಜ್, ತಿ ಸುರಿ ಘೆವ್ನ್ ದಾಂವ್ಡಾವ್ನ್ ಹಾಡ್ಚೆಂ, ನಿದ್ತಾನಾ ವ್ಹಡಾ ಆವಾಜಾನ್ ದೀರ್ಘ್ ಸ್ವಾಸ್ ಸೊಡ್ಚೊ, ಹ್ಯಾ ಝುಜಾಚೊ ಪರಿಣಾಮ್ ಮ್ಹಣ್ ಕಳಿತ್ ಜಾಲೆಂ... ತಾರೇಕಾನ್ ಸಾಂಗ್ಚೆಂ ಪಾತ್ಯೆಂವ್ಕ್ ಲಾಗ್ಲಿಂ.

ಉಮ್ಮಿ, ಬಾಬಾ... ಹಾಂವ್ ತುಮ್ಕಾಂ ಮ್ಹಜೆಂ ಘರ್ ದಾಖಯ್ತಾಂ ಮ್ಹಜ್ಯಾ ಪಾಟ್ಲ್ಯಾನ್ ಯೆಯಾ... ಪಾಯ್ ವಾಟೆನ್ ತೊ ತಾಂಕಾ ಎಕಾ ಘರಾ ಆಪವ್ನ್ ವರ್ನ್ ಘೆಲೊ..

"ಅರೆ ಫೈಸಲ್?? ಆಂಟಿ, ಆಂಕಲ್ ತುಮಿಂ, ಆಚಾನಕ್....??" ರಾಯೆದಾನ್ ವಿಚಾರ್ಲೆಂ ದಾರ್ ಉಗಡ್ತಚ್.

"ಭಿತರ್ ಯೆಯಾ, ಬಸ್ಕೊ ಘೆಯಾ".. ರಾಯೆದಾನ್ ಯೆವ್ಕಾರ್ ಮಾಗ್ಲೊ..."ತುಮ್ಕಾಂ ವಾಟ್ ಕೊಣೆ ಸಾಂಗ್ಲಿ??" ರಾಯೆದಾನ್ ಪರತ್ ಸವಾಲ್ ಕೆಲೆಂ.

"ಫೈಸಲಾನ್ ಆಮ್ಕಾಂ ಆಪವ್ನ್ ಹಾಡ್ಲೆಂ, ತಾಚೆಂ ಘರ್ ದಾಖಯ್ತಾಂ ಮ್ಹಣ್" ರುವೇದಾನ್ ಜಾಪ್ ದಿಲಿ...

"ಉಮ್ಮಿ ಪಳೆ ಮ್ಹಜಿ ತಸ್ವೀರ್", ಫೈಸಾಲಾನ್ ತಾರೇಕಾಚಿ ತಸ್ವೀರ್ ದಾಖವ್ನ್ ಸಾಂಗ್ಲೆಂ..ತ್ಯಾ ಘರಾಂತ್ ಆಸ್‌ಲ್ಲಿ ಹರ್ಯೆಕ್ ವಸ್ತ್, ಜಾಗೆ ತೊ ವಳ್ಕಾಲೊ....ಆದ್ಲೊ ತಾರೇಕ್ ಆತಾಂ ಫೈಸಲ್ ಜಾಲ್ಲೊ. ಫೈಸಲ್ ಆಪ್ಲ್ಯಾ ಆದ್ಲ್ಯಾ ಜಿವಿತಾಂತ್ಲ್ಯಾ ಕುಟ್ಮಾಕ್ ಮೆಳ್ಳೊ....

"ರಾಯೆದ್ ಹಾಂವ್ ಮಾನ್ತಾಂ ತುಂ ಮ್ಹಜೊ ಭಾವ್, ಮೊಗಾಚೊ ಭಾವ್.. ಪುಣ್ ಆಜ್ ತಾವ್ನ್, ಆಮಿ ದೊಗಿ ಈಷ್ಟ್ ಜಾವ್ನ್ ರಾವ್ಯಾಂ....ಆಮ್ಚ್ಯಾ ಘರಾ ಯೇವ್ನ್ ಕರ್ನ್ ರಾವಾ... ಆದೇವ್ಸ್ ಮಾಗ್ತಾಚ್ ಫೈಸಲ್ ಆನಿ ತಾಚ್ಯಾ ಕುಟ್ಮಾಚಿ ಘರಾ ಪಾಟಿಂ ಗೆಲಿಂ.

ಆಜ್ ಪಂಚ್ವೀಸ್ ವರ್ಸಾಂಚೊ ಫೈಸಲ್, ಆಮೇರಿಕಾಂತ್ ವಾವ್ರ್ ಕರ್ನ್ ಆಸಾ... ಆಪ್ಲ್ಯಾ ಈಷ್ಟ್ ಆನಿಂ ತಾಚ್ಯಾ ಕುಟ್ಮಾ ಕಡೆನ್ ಆಜೂನ್‌ಯೀ ಲಾಗ್ಸಿಲೊ ಸಂಬಂಧ್ ದವರ್ನ್ ಆಸಾ... ಫೈಸಲ್ ಸಂತೊಸಾನ್ ಜಿಯೆವ್ನ್ ಆಸಾ, ತಾಚ್ಯಾ ನಶಿಬಾಕ್ ತೊ ಋಣಿ ಜಾವ್ನಾಸಾ......... ಫೈಸಲ್ ಸುಖಾನ್ ಜಿಯೆವ್ನ್ ಆಸಾ......

ಫೈಸಲ್ ಆನಿಂ ಪರತ್ ಕಿತೆಂ ಜಾವ್ನ್ ಜಲ್ಮಾತಾ ತೆಂ ಪಳೆಂವ್ಕ್ ಥೊಡಿಂ ವರ್ಸಾಂ ರಾಕೊನ್ ರಾವ್ಯಾಂ..........

ಕಥಾಂಕರ್ ಮುಖ್‌ಪಾನಾಕ್

ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications