ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
6. ಕೊಂಕ್ಣಿ ಕವಿ....? ಫೆಸ್ತಾಚೆ ಕವಿ..!?[ಸಪ್ತೆಂಬರ್
ಸೊಳಾ ತಾರಿಕೆರ್ ಅಲಂಗಾರಾಂತ್ ಆಸಾ ಕೆಲ್ಲ್ಯಾ ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರಾವೆಳಾರ್ ವಾಚುನ್ ಸಾಂಗ್ಲ್ಲೊ ಪಬಂಧ್]
ಕವಿತಾ ಮ್ಹಳ್ಯಾರ್ ಕಿತೆಂ?
ಖಂಡಿತ್ ಜಾವ್ನ್ ಯ್ ಹೆಂ ಏಕ್ ಸಾದೆಂ ಸವಾಲ್ ಬಿಲ್ಕುಲ್ ನ್ಹಯ್. ಹಾಕಾ ಜಾಪ್ ಸೊಧ್ಚೆಂ ಅಂತ್ರಳಾಕ್ ಮುಟಿ ಭಿತರ್ ಘೆಂವ್ಚೆಂ ಪ್ರೇತನ್ ಜಾಯ್ತ್. ಹ್ಯಾ ಭಾಯ್ರ್ ಕೊಣೆಂ ತರೀ ವ್ಯಾಖ್ಯಾನ್ ದಿಲ್ಯಾರ್ ತೆಂ ಫಕತ್ ಕವಿತೆಚ್ಯಾ ಲಾಕ್ ರುಪಾಂ ಪಯ್ಕಿ ಎಕಾ ರುಪಾಚೆಂ ಹಣೆ ಬರಪ್ ಮಾತ್ರ್.
ಲಿಯೋನಾರ್ಡ್ ಕೊಹೆನಾ ಪ್ರಕಾರ್-"ಕವಿತಾ ಫಕತ್ ಜಿಣಿಯೆಚೆಂ ಶೇಷ್ (ಎವಿಡೆನ್ಸ್). ಜರ್ ತುಜಿ ಜೀಣ್ ಬರಿಚ್ ಲಾಸೊನ್ ಆಸಾ ತರ್ ಕಾವ್ಯೆಂ ಫಕತ್ ಗೊಬೊರ್."
ಕಾರ್ಲ್ ಸ್ಯಾಂಡ್ ಬರ್ಗ್ ಸಾಂಗ್ತಾ-"ಕಾವ್ಯೆಂ ಮ್ಹಣ್ಜೆ ಏಕ್ ಪ್ರತಿಧ್ವನಿ... ಜಿ ಸಾವ್ಳೆಕ್ ನಾಚೊಂಕ್ ಫರ್ಮಾಯ್ತಾ."
ಜೆರಾಲ್ ರಿತಿನ್ ಸಾಂಗ್ಚೆಂ ತರ್, ಕವಿತಾ ಮ್ಹಳ್ಯಾರ್ ಕೊಣಾಕ್ ಕುಮ್ಸಾರ್ ತರ್ ಆನಿ ಕೊಣಾಕ್ ಸರ್ಗ್. ಕೊಣಾಕ್ ಫುಲ್ ತರ್ ಆನಿ ಕೊಣಾಕ್ ಕಾಂಟೊ. ಕೊಣಾಕ್ ಸಂಭ್ರಮ್ ತರ್ ಆನಿ ಕೊಣಾಕ್ ದೂಕ್. ಕೊಣಾಕ್ ಚಾಂದ್ನೆ ತರ್ ಆನಿ ಕೊಣಾಕ್ ಸೊರ್ಮುಣ್.
ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ ವಿಚಾರ್ಲ್ಲ್ಯಾ ತೆನ್ನಾ ಎಕಾ ಕವಿನ್ ಆಶಿ ಜಾಪ್ ದಿಲ್ಲಿ ಆಸಾ-"ಕವಿತಾ ಮ್ಹಳ್ಯಾರ್ ಜೆಂ ಕಿತೆಂ ಕವಿ ಲಿಕ್ತಾ".
ತರ್ ಆತಾಂ ಕವಿ ಮ್ಹಳ್ಯಾರ್ ಕೋಣ್?
"ಕವಿ ಮ್ಹಳ್ಯಾರ್ ಏಕ್ ಫಟ್ಕಿರೊ... ಜೊ ಸದಾಂಚ್ ಸತ್ ಸಾಂಗ್ಚೊ" ಮ್ಹಳಾಂ ಎಕ್ಲ್ಯಾ ಜಾಣಾರ್ಯಾನ್. ಹರ್ಯೆಕ್ಲೊಯ್ ಕವಿ ಜಾಂವ್ಕ್ ಸಾಧ್ಯ್ ನಾ. ಕವಿಚಿ ಮತ್ ಹೆರಾಂಚ್ಯಾಕೀ ವೆಗ್ಳಿ. ತೊ ಬುಕಾಂನಿ ಪಿಂತುರಾಂ ದೆಕ್ತಾ ಆನಿ ಪಿಂತುರಾಂನಿ ಉತ್ರಾಂ ವಾಚ್ತಾ. ಕೊಣ್ ಎಕ್ಲ್ಯಾಕ್ ಕವಿ ಜಾಯ್ಜೆ ತರ್ ತಾಕಾ ಮುಳಾವೆಂ ಪ್ರತಿಭಾ ಆಸೊಂಕ್ ಜಾಯ್. ಹಾಂಗಾಸರ್ ಪ್ರತಿಭಾ ಮಳ್ಳ್ಯಾ ಸಬ್ದಾಕ್ ವಿಶಾಲ್ ಅರ್ಥ್ ಆಸಾ.
ಪ್ರತಿಭಾ ಮ್ಹಳ್ಯಾರ್ ಪ್ರಜ್ಞೆಚಿ ಏಕ್ ಸ್ಥಿತಿ. ಹಾಂತು ಉಗ್ಡಾಸ್, ಯಾದ್, ಜಾಗ್ (ಎಚ್ಚರ) ಆಟಾಪ್ತಾತ್. ಸಂಸಾರಾಚ್ಯೊ ಸಂಗ್ತ್ಯೊ ಆನಿ ಆನ್ಭೊಗ್ ದೆಕ್ಚಿ ವೆಗ್ಳಿಚ್ ದೀಶ್ಟ್. ಕವಿಕ್ ಜಾಂವ್ಚೊ ಆನ್ಭೊಗ್ ಆನಿ ಹ್ಯಾ ನಿಮ್ತಿಂ ಯೆಂವ್ಚ್ಯಾ ಅಭಿವ್ಯಕ್ತೆಚ್ಯಾ ದಭಾವಾಂತ್ ಸೂಕ್ತ್ ಉತ್ರಾಂ ವಿಂಚ್ಚಿ ಸಕತ್. ಆಪ್ಲೊ ಖಾಸ್ಗಿ ಅನ್ಭೊಗ್ ಸಾಮಾಜಿಕ್ ವೆದಿಕ್ ಚಡಂವ್ಚಿ ಬುದ್ವಂತ್ಕಾಯ್ ಕವಿಕ್ ಆಸಜೆ.
ದುಸ್ರೊ ವಿಶಯ್- ಅಭಿವೆಕ್ತಿ. ಕಾಳ್ಜಾಕ್ ಆಪ್ಟೊಂಕ್ ತಾಂಕ್ ನಾತ್ಲ್ಯೊ ಕವಿತಾ ಸಮಾಜೆಂತ್ ಕಸಲ್ಯಾಚ್ ಥರಾಚೆಂ ಸಂಚಲನ್ ಕರುಂಕ್ ಸಕನಾಂತ್. ವಾಚ್ಲ್ಲ್ಯಾ ಖಿಣಾಂ ಕವಿತಾ ರಸಿಕಾಂಚ್ಯಾ ಕಾಳ್ಜಾಕ್ ಲಾಗೊಂಕ್, ವಾ ಕಾವ್ಯಾಚಿ ರೂಚ್ ಚಾಕೊಂಕ್ ಪ್ರಭಾವ್ಭರಿತ್ ಅಭಿವ್ಯಕ್ತಿ ಭೋವ್ ಗರ್ಜೆಚಿ. ಅಭಿವ್ಯಕ್ತಿ ಮ್ಹಳ್ಯಾರ್ ಕಿತೆಂ?... ಅಭಿವ್ಯಕ್ತಿ ಮ್ಹಳ್ಯಾರ್ ಆಪ್ಲೊ ಅನ್ಭೊಗ್, ವಿಚಾರ್, ಆಲೋಚನ್, ಚಿಂತಾಪ್ ಹ್ಯೊ ಪೂರಾ ಗಜಾಲಿ ಉತ್ರಾಂನಿ ಭಾಯ್ರ್ ಘಾಲ್ಚಿ ರೀತ್ಚ್ ಅಭಿವ್ಯಕ್ತಿ ಮ್ಹಣ್ಯೆತ್. ಕವಿನ್ ವಾಪಾರ್ಚಿ ಭಾಸ್, ಶೈಲಿ ಹೆಂ ಸರ್ವ್ ಅಭಿವೆಕ್ತಿಂತ್ ಯೆತಾ.
"ಹೇಳಿದರೆ ಹಾಳಾಗುವುದೊ ಅನುಭವದ ಸವಿಯು ಹೇಳದಿರೆ ತಾಳಲಾರನೋ ಕವಿಯು" - ಕುವೆಂಪುಚ್ಯಾ ಹ್ಯಾ ಉತ್ರಾಂನಿ ಅಭಿವ್ಯಕ್ತಿಚಿ ಸಂಪೂರ್ಣ್ ಜವಾಬ್ದಾರಿ ಆಟಾಪ್ಲ್ಯಾ ತಶೆಂ ಭಗ್ತಾ. ಭಾಸ್ ಹಾಂಗಾಸರ್ ಭೋವ್ ಗರ್ಜೆಚಿ. ಕಾವ್ಯೆಂ ಲಾಟ್ಣೊ ತರ್ ಭಾಸ್ ಹಾಂಗಾ ಗೊಂವಾಂಚೆಂ ಪೀಟ್ ಜಾಯ್ಜೆ. ಭಾಶೆಕ್ ಆಪ್ಲ್ಯಾ ಚಿಂತ್ಪಾ ಫರ್ಮಾಣೆ ಮೊಳ್ಚಿ ಕಲಾ ಕವಿಂಕ್ ಕಳಿತ್ ಆಸಜೆ. ಛಂದಸ್, ಅಲಂಕಾರ್, ಪ್ರಾಸ್, ಪ್ರತಿಮಾ, ಸಂಕೇತ್, ರೂಪಕ್ ಹ್ಯೊ ಸರ್ವ್ ಗಜಾಲಿ ಅಭಿವ್ಯಕ್ತೆಕ್ ಪೂರಕ್ ಜಾವ್ನ್ ಯೆತಾತ್.
ಛಂದಸ್ ಮಳ್ಳ್ಯಾ ಸಬ್ದಾಚೆಂ ಮೂಳ್ ’ಛದ್’. ಛದ್ ಮ್ಹಳ್ಯಾರ್ ಕವರ್ (ಹೊದಿಕೆ). ಆದಿಂ ದೇವತೆಂಕ್ ಮೊರ್ನಾಚೆಂ ಭ್ಯೆಂ ಯೆತಾನಾ ತಿಂ ಮಂತ್ರಾಂನಿ ಉತ್ರಾಂಚ್ಯಾ ಪಡ್ದ್ಯಾ ಇಡ್ಯಾಂತ್ ಲಿಪೊನ್ ಬಸ್ತಾಲಿಂ ಅಶೆಂ ಏಕ್ ದೈವಿಕ್ ಚಿಂತಾಪ್ ಆಸಾ. ಕವಿತೆಚೊ ಅರ್ಥ್ಯೀ ಆಸೊಚ್ ಉತ್ರಾಂ ಇಡ್ಯಾಂತ್ ಲಿಪೊನ್ ಆಸ್ತಾ. ಪುಣ್ ಆಜ್ ಕಾಲ್ಚೆ ಕವಿ ಛಂದಸ್, ಪ್ರಾಸ್ ಹ್ಯಾ ಭಾಯ್ಲ್ಯಾ ವಿಶಯಾಂಕ್ ಚಡಿತ್ ಗುಮಾನ್ ದೀನಾಂತ್. ಬಗಾರ್, ಅಲಂಕಾರ್, ಪ್ರತಿಮಾ, ಸಂಕೇತ್, ರೂಪಕ್ ಅಸಲ್ಯಾ ಗುಣಾಂನಿಚ್ ಕಾವ್ಯಾಂತ್ ಆಪುರ್ಬಾಯೆಚಿ ಅಭಿವ್ಯಕ್ತಿ ಹಾಡುಂಕ್ ಸಕ್ತಾತ್.
ಅಲಂಕಾರ್: ಕವಿ ಆಪ್ಲ್ಯಾ ಭಿತರ್ ಉದೆಲ್ಲ್ಯಾ ಭಗ್ಣಾಂಚಿ ಗುಂಡಾಯ್ ವಾ ವಿಸ್ತಾರಾಯ್ ರಸಿಕಾಂಕ್ ಕಳ್ಚ್ಯಾ ಖಾತಿರ್ ಥೊಡ್ಯಾ ಸರ್ವಾಂಕೀ ಕಳಿತ್ ಆಸ್ಚ್ಯಾ ವಾ ಸರ್ವಾಂಚ್ಯಾ ಗುಮಾನಾಂತ್ ಆಸ್ಚ್ಯಾ ಭಾಯ್ಲ್ಯಾ ಸಂಗ್ತೆಂಕ್ ವ್ಹಾಪಾರ್ತಾ. ಹೊಚ್ ಅಲಾಂಕಾರ್. ದಾಕ್ಲೊ ದಿಂವ್ಚೊ ತರ್,
"ಹಾಂವೆ ತುಜೊ ಮೋಗ್ ಭಗ್ಲೊ" ಮ್ಹಳ್ಯಾರ್ ಏಕ್ ಸಾದಿ ಗದ್ಯ್ ವೋಳ್ ಜಾತಾ. ಹಾಂತು ಕಸಲೆಚ್ ಕಾವ್ಯ ಗೂಣ್ ಝಳ್ಕನಾಂತ್. ವಾಚ್ತೆಲ್ಯಾಂಕ್ ಹೊ ಮೋಗ್ ಕಸೊ ಭಗ್ಲೊ ಮ್ಹಣ್ ಕಳಾನಾ. ತಿಚ್ ವೋಳ್ ಅಶಿ ಉತ್ರಾಯ್ಲಿ ತರ್-
"ತಡಿಕ್ ಆಪ್ಟಂವ್ಚ್ಯಾ ಲ್ಹಾರಾಂ ಬರಿ ಹಾಂವೆ ತುಜೊ ಮೋಗ್ ಭಗ್ಲೊ" ಮ್ಹಣ್ತಾನಾ ಮೊಗಾಚ್ಯಾ ಭಗ್ಣಾಚೆಂ ಏಕ್ ಚಿತ್ರಣ್ ವಾಚ್ಪ್ಯಾಂಚ್ಯಾ ದೊಳ್ಯಾಂ ಫುಡೆ ಯೆತಾ. ಲ್ಹಾರಾಂ, ತಡ್ ಹಾಂಗಾಸರ್ ಅಲಂಕಾರ್ ಜಾವ್ನ್ ಉಪ್ಯೋಗ್ ಜಾತಾತ್. ಅಲಂಕಾರಾಕ್ ವ್ಯಾಖ್ಯಾನ್ ದಿಂವ್ಚೆಂ ತರ್- ಅಪ್ರಸ್ತುತಾ ಮರಿಫಾತ್ ಪ್ರಸ್ತುತ್ ವಿಚಾರ್ ರಸಿಕಾಂಚ್ಯಾ ಅನ್ಭೊಗಾಕ್ ಹಾಡ್ಚೆಂ ಪ್ರೇತನ್.
ಆನಿ ಪ್ರತಿಮಾ:
ಕವಿ ಹ್ಯಾ ಪ್ರತಿಮಾ, ಸಂಕೇತ್ ವಾ ರೂಪಕಾಂಕ್ ಕಿತ್ಯಾಕ್ ವಾಪಾರ್ತಾ? ಹಾಚಿ ಗರ್ಜ್ ತರೀ ಕಿತೆಂ?
ಚರಿತ್ರೆಂತ್ ವ್ಹಡ್ ವಾದಾಳಾಕ್ ಶಿರ್ಕಲ್ಲಿ ಜನಾಂಗಾಚಿ ಪ್ರತಿಭಾ ಹ್ಯಾ ವಾದಾಳಾ ಥಾವ್ನ್ ಚುಕೊನ್ ಆಪ್ಣಾಕ್ಚ್ ಉರಂವ್ಕ್ ಶೆಂಭೊರಾಂನಿ ತಂತ್ರಾಂ ಆಸ್ತಾತ್. ತೆದಳಾ ಕಲಾ ಏಕ್ ಭೂಗತ್ ಸಂಘಟನ್ ಜಾವ್ನ್ ಭೋವ್ ವಿಶೆಸ್ ಥರಾಚೆಂ ಪ್ರತಿರೋಧ್ ವಾಡವ್ನ್ಂಚ್ ಯೆತಾ. ಪ್ರತಿಮಾ ಮ್ಹಳ್ಯಾರ್ ಹೆಂಚ್ ಮ್ಹಣ್ತಾ ಕನ್ನಡಾಚೊ ಪ್ರಸಿದ್ದ್ ವಿಮರ್ಶಕ್ ಡಿ. ಆರ್. ನಾಗರಾಜ್. ಹೆಂ ಬೋವ್ಶಾ ಏಕ್ ಕ್ಲಿಶ್ಟ್ ವ್ಯಾಖ್ಯಾನ್. ಜೆರಾಲ್ ಥರಾನ್ ಪ್ರತಿಮಾ ಮ್ಹಳ್ಯಾರ್ ಕವಿತೆಚಿ ಕೂಡ್.
ಉತ್ರಾಂಚೆಂ ಪಿಂತುರ್ ಮ್ಹಣ್ಯೆತ್. ಇಂದ್ರಿಯಾಂನಿ ಪಾರ್ಕಿಲ್ಲೆಂ ವರ್ಣುಂಚೊ ಸಬ್ದ್ ವಾ ಸಬ್ದಾಚೊ ಸಮೂಹ್. ಉಪಮಾ, ಅಲಂಕಾರ್, ರೂಪಕ್, ಸಂಕೇತ್ ಇತ್ಯಾದಿ. ದಾಕ್ಲ್ಯಾಕ್ ಕವಿತೆಂತ್ ಏಕ್ ರೂಕ್ ವರ್ಣಿಲೊ ತರ್ ತೊ ರೂಕ್ ಪ್ರತಿಮಾ ಜಾತಾ.
ಜರ್ ತರ್ ಕವಿತೆಂತ್ಲಿ ಪ್ರತಿಮಾ ಸ್ವತಂತ್ರ್ ಜಾವ್ನ್ ವಾಪಾರ್ಲಿ ತರ್, ಆಪ್ಲಿ ಅರ್ಥವ್ಯಾಪ್ತಿ ತಿ ಪ್ರತಿಮಾಂಚ್ ನಿರ್ದಾರ್ ಕರ್ತಾ ತರ್ ತಿ ಪ್ರತಿಮಾ ಏಕ್ ಸಂಕೇತ್ ಜಾತಾ. ವಯ್ಲ್ಯಾ ದಾಕ್ಲ್ಯಾಂತ್ ರೂಕ್, ರುಕಾಚೆ ಫಾಂಟೆ. ಪಾನಾಂ, ಬಸ್ಚಿಂ ಸುಕ್ಣಿಂ ಇತ್ಯಾದಿಚೆಂ ಚಿತ್ರಣ್ ದೀವ್ನ್ ನಿರೂಪಕಾಚಿ ಮನೋಸ್ಥಿತಿ ದಾಖವ್ಯೆತ್. ತೆನ್ನಾ ಹೊ ರೂಕ್ ಏಕ್ ಸಂಕೇತ್ ಜಾಲೊ.
ಅಸಲ್ಯಾ ಎಕಾ ಸಂಕೇತಾಕ್ ಖಂಚ್ಯಾ ತರೀ ಎಕಾ ವಿಚಾರಾ ಸವೆಂ ಸಮೀಕೃತ್ ಕೆಲ್ಯಾರ್ ತೆನ್ನಾ ತ್ಯಾ ಪ್ರತಿಮೆಚೆರ್ ಸಮೀಕೃತ್ ಕೆಲ್ಲ್ಯಾ ವಿಚಾರಾಚೆರ್ ಅವಲಂಬಲ್ ಜಾಲ್ಲ್ಯಾನ್ ಆನಿ ಆಪ್ಲೆಂ ಸ್ವತಂತ್ರ್ ಹೊಗ್ಡಾಯ್ತಾ ಜಾಲ್ಲ್ಯಾನ್ ತಿ ಪ್ರತಿಮಾ ರೂಪಕ್ ಜಾತಾ. ಕವಿತೆಂತ್ ಪ್ರತಿಮಾ ವಿನ್ಯಾಸ್ ಮ್ಹಳ್ಯಾರ್ ಕವಿನ್ ಆಪ್ಲೊ ಅನ್ಭೊಗಾಚೊ ಸಂಸಾರ್ ಸೊಧುನ್ ಕಾಡುಂಕ್ ವಾಪಾರ್ಚೊ ಕುರುಃ ವಾ ನೊಟೇಶನ್.
ಕವಿತಾ ಉದೆಂವ್ಚೆ ಖಿಣ್ ಭೋವ್ ಅಜ್ಯಾಪಾಚೆ. ಖಂಚೊ ತರೀ ವಿಶಯ್ ಪಯ್ಲೆಂಚ್ ಠರಾವ್ನ್ ಕವಿತಾ ಲಿಕುಂಕ್ ಜಾಯ್ನಾ. ಹೆಂ ಫಕತ್ ಆಪ್ಲ್ಯಾ ವಿಚಾರಾಚೆಂ ಮಂಡನ್ ಜಾತಾ ಶಿವಾಯ್ ಕವಿತಾ ನ್ಹಯ್. ಇಂಗ್ಲೆಜ್ ಕವಿ ರಾಬರ್ಟ್ ಫ್ರಾಸ್ಟ್ ಮ್ಹಣ್ತಾ-" ಎದೊಳ್ ಪರ್ಯಾಂತ್ ಹಾಂವೆಂ ಕವಿತೆಚೆಂ ಆಖೆರ್ ಕಿತೆಂ ಮ್ಹಣ್ ಸಂಪೂರ್ಣ್ ಸಮ್ಜೊನ್ ಉಪ್ರಾಂತ್ ಬರಂವ್ಕ್ ಸುರ್ವಾತ್ಲ್ಲೆಂ ನಾ. ಕವಿತಾ ಲಿಕ್ಚೆಂ ಮ್ಹಳ್ಯಾರ್ ಎಕಾ ರಿತಿಚೊ ಸಂಸೊದ್"
ಪಯ್ಲೆಂ ಕಾವ್ಯೆಂ ಜಾಗಜೆ. ಖಂಚ್ಯಾ ತರೀ ಆನ್ಭೊಗಾಂತ್ ಏಕ್-ದೋನ್ ವೊಳಿ ಝಳ್ಕಾಜೆ. ಹ್ಯಾ ವೊಳಿಂಚೊ ಪಾತ್ತೊ ಘೆವುನ್ ಕವಿತಾ ಸೊಧಿಜೆ. ಕವಿತೆಕ್ ಜಾಯ್ ಜಾಲ್ಲಿ ಪ್ರತಿಮಾ, ಅಲಂಕಾರ್ ಆಪಾಪಿಂಚ್ ಝಳ್ಕಾತಾತ್. ಹಾಚೆ ಪಾಟ್ಲ್ಯಾನ್ ಕವಿಚೆಂ ಸುಪ್ತ್ ಮನ್ ಕಾಮ್ ಕರ್ತಾ. ಸುಪ್ತ್ ಮನ್ ಮ್ಹಳ್ಯಾರ್ ಭಿರಾಂಕುಳ್ ಕಲ್ಪನ್ ನ್ಹಯ್. ಬಗಾರ್, ವಾಸ್ತವ್ ಪ್ರಜ್ಞೆಚಿ ಭಿತರ್ಲಿ ಕೂಸ್. ಬರವ್ನ್ ಸಂಪ್ತಚ್ ಝಳ್ಕಲ್ಲೊ ವಿಚಾರ್ ಪಳೆವ್ನ್ ಕವಿನ್ಂಚ್ ವಿಜ್ಮಿತ್ ಪಾವಜೆ. ಅಶ್ಯೊ ಉದೆಂವ್ಚ್ಯೊ ಕವಿತಾ ಬೋವ್ ಆಪ್ರೂಪ್ ಆನಿ ಆಪುರ್ಬಾಯೆಚ್ಯೊ. ಬೋವ್ಶಾ ಅಸಲ್ಯಾಚ್ ಕವಿತೆಂಕ್ ಮತಿಂತ್ ದವರುನ್ ನೊಬೆಲ್ ಜಿಕ್ಪಿ ಎಲಿಯೆಟಾನ್ ಸಾಂಗ್ಲ್ಲೆಂ -"ಬರ್ಯೊ ಕವಿತಾ ಅರ್ತ್ ಜಾಂವ್ಚೆ ಆದಿಂಚ್ ಆಮ್ಚೆಲಾಗಿಂ ಸಂವಾದ್ ಚಲಯ್ತಾತ್!"
ಕವಿ ಕರ್ಚಿ ತಾಂಕ್ ಆಸ್ಚಿ ಕವಿಂಕ್ ನ್ಹಯ್ ಬಗಾರ್ ಅಸಲ್ಯಾ ಕವಿತೆಂಕ್. ಬರ್ಯೊ ಕವಿತಾ ಖುದ್ದ್ ಕವಿಕ್ ವಾಡಯ್ತಾತ್, ರಸಿಕಾಂಚಿ ರೂಚ್ ಚಡಯ್ತಾತ್ ಆನಿ ವಿಮರ್ಶಕಂಚಿ ಮತಿ ಸಾಣ್ಯಾಕ್ ಧರ್ತಾತ್.
ಏಕ್ ಭಾಸ್ ಕಾವ್ಯಾಳ್ ರಿತಿನ್ ವಾಡಜೆ ತರ್ ಕವಿ ಮಾತ್ರ್ ನ್ಹಯ್ ಬಗಾರ್ ವಾಚ್ಪ್ಯಾಂಚಿ ಕಾಲೆತ್ಯೀ ಪ್ರಮುಖ್ ಪಾತ್ರ್ ಘೆತಾ. "ಕೊಣಾಕೀ ಖಂಯೀ ಕಾವ್ಯೆಂ ದಿಸ್ಚೆಂನಾ.. ತುಮ್ಚೆ ಭಿತರ್ ಇಲ್ಲೆಂ ತರೀ ಆಸ್ಲ್ಯಾ ಶಿವಾಯ್" ಅಶೆಂ ಮ್ಹಣ್ತಾ ಜೋಸೆಫ್ ಯೂಬರ್ಟ್. ಕವಿತಾ ವಾಚ್ಚಿ ಆನಿ ಸಮ್ಜೊಂವ್ಚಿಂಯ್ ಏಕ್ ಪ್ರತಿಭಾಚ್.
ತರ್ ಕವಿತಾ ಕಿತ್ಯಾಕ್ ವಾಚಿಜೆ? ವೇಳ್ ಪಾಶಾರ್ ಕರುಂಕ್ಗಿ ವಾ ಮನೋರಂಜನ್ ಮೆಳೊಂಕ್? ಜಾಣ್ವಾಯ್ ಜೊಡುಂಕ್. ಮತ್ ಚುರುಕ್ ಜಾಂವ್ಕ್? ಪ್ರಬುದ್ದತಾ ಯೆಂವ್ಕ್? ಹಾಂಕಾಂ ಪೂರಾ ವಿಗ್ಯಾನ್, ಗಣಿತ್ ಆಸಾನೆ...... ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ ವಿಚಾರ್ತಾನಾ ಕವಿ ಕಸೊ ಉತ್ರಾಂವ್ಕ್ ಸಕನಾಂಗಿ ತಶೆಂಚ್ ಕವಿತಾ ಕಿತ್ಯಾಕ್ ವಾಚ್ಚಿ ಮ್ಹಣ್ ವಿಸಾರ್ತಾನಾಂಯ್ ಖರೊ ವಾಚ್ಪಿ ಸಾಂಗೊಂಕ್ ಸಕಾನಾ....
ವಿಗ್ಯಾನಿ ಚಂದ್ರ್ ತಾರಾಂಚಿ ವಳೊಕ್ ಕರುನ್ ದೀತ್.... ಪುಣ್ ಕವಿ ಆಸ್ಡ್ಯಾಂಕ್ಚ್ ಲಾಂಪ್ಯಾಂವ್ ಬಾಂಧುನ್ ಆಮಿ ಆಮ್ಕಾಂಚ್ ಸೊಧಿಶೆಂ ಕರ್ತಾ. ಹರ್ಯೆಕ್ಲಾಚ್ಯಾ ಕಾಳ್ಜಾ ಕೊನ್ಶ್ಯಾಂತ್ ಕಾಂಯ್ ತರೀ ಭಗ್ಣಾಂಚೊ ಕೋಯ್ರ್ ಆಸೊಂಕ್ ಪುರೊ. ಜೆನ್ನಾ ಕವಿತಾ ಕಾಳ್ಜಾಕ್ ಲಾಗೊನ್ ಅಸಲ್ಯಾ ಕೊನ್ಶ್ಯಾಂನಿ ಉತ್ರಾಂ ಆಪ್ಟಾತಾನಾ ಭಾಂಗ್ರಾಳಿ ಧುಳ್ ಉಟ್ತಾ. ಕವಿತಾ ಕೊಯ್ರಾಂತೀ ಜೀಣ್ ಉಸ್ತುಂಕ್ ಲಾಯ್ತಾ. ಕಾಲ್ಚ್ಯೊ ಯಾದಿ ಚಿಂತುನ್ಗಿ ವಾ ಫಾಲ್ಯಾಚಿಂ ಸಪ್ಣಾಂ ನಿಯಾಳುನ್ಗಿ.. ಆಮಿ ವರ್ತಮಾನ್ ಕಾಳಾಕ್ ಮೋಸ್ ಕರುನ್ ಕಸಲೆಂಗಿ ಅವ್ಯಕ್ತ್ ಸುಖ್ ಭಗ್ತಾಂವ್. ಕಾವ್ಯೆಂ ಹೆಂ ಸುಖ್ ದಿಂವ್ಚ್ಯಾ ಸವೆಂ ವರ್ತಮಾನಾಚೆಂ ಅಸ್ಥಿತ್ವ್ ಕಾಳಾಚ್ಯಾ ಅನಂತತೆಸವೆಂ ಸಮ್ಜಾಯ್ತಾ. ಸರ್ವ್ ಸತಾಂ, ಜಿಣಿಯೆಚಿಂ ನಿಗೂಡ್ಪಣಾಂ ಪೂರಾ ಕಳ್ಳ್ಯಾ ಉಪ್ರಾಂತ್ ಕಿತೆಂ ರೂಚ್ ಜಿಯೆಂವ್ಚಾಂತ್? ಕಾವ್ಯೆಂ ಸುಕ್ಯಾ ಚಿಂತ್ಪಾಚ್ಯಾ ತತ್ವ್ ಗಿನ್ಯಾನಿಚಿಂ ಆದರ್ಶ್ ವಿಚಾರ್ ನ್ಹಯ್. ತತ್ವಾಚೊ ಸರ್ವ್ ಸಾರ್ ಚಿಂವೊನ್ ತತ್ವ್ ಗಿನ್ಯಾನಿಚ್ಯಾ ಫೊಂಡಾವಯ್ರ್ ಆಂಕ್ರೆಲ್ಲ್ಯಾ ತಣಾ ಬರಿ ಜಿವಾಳ್.
ಜೆಂ ಕೊಣಾವಿಶಿಂ ಕವಿ ಲಿಕ್ತಾತ್ಗಿ ತ್ಯಾಚ್ ಸಾದ್ಯಾ ಲೊಕಾಕ್ ಕಾವ್ಯೆಂ ಸಮ್ಜನಾ ಅಶೆಂ ಏಕ್ ಚಿಂತಾಪ್ ಆಸಾ. ತಿಂ ಸಮ್ಜನಾಂತ್ ತೊ ತಾಂಚೊ ಊಣ್. ಪೂಣ್ ಏಕ್ ವಿಶಯ್ ಹಾಂಗಾ ಪಾರ್ಕುಂಚೊ ಗರ್ಜೆಚೊ. ಸಾದೊ ಲೋಕ್ ಜೊ ತಾಂಚೆ ವಿಶಿಂಚ್ ಚಿಂತಿನಾ ತಸಲ್ಯಾಂಚೆಂ ಅಸ್ತಿತ್ವ್ ಗಾಂವ್ಚ್ಯಾ ಕವಿಚ್ಯಾ ಉತ್ರಾಂನಿ ಆಸ್ತಾ. ವಾ ಸಾದ್ಯಾ ಲೊಕಾವಿಶಿಂ ಚಿಂತಾ ಕರ್ಚೆ ಸಬಾರ್ ಆಸಾತ್. ತಸಲ್ಯಾಂಚ್ಯಾ ಕಾಳ್ಜಾಂತ್ ಜರೀ ಕವಿತೆಂಚ್ಯಾ ಪ್ರಭಾವಾನ್ ಏಕ್ ’ಸೋಫ್ಟ್ ಕೋರ್ನರ್" ರುತಾ ಜಾಲೆಂ ತರ್ ಹಾಚ್ಯಾಕಿ ವರ್ತ್ಯಾನ್ ಕಿತೆಂ ಜಾಯ್?.
ಆಯ್ಚಿ ಕೊಂಕ್ಣಿ ಕಾವ್ಯಾಚಿ ಜೆರಾಲ್ ಪರಿಗತ್:
ಸದ್ದ್ಯಾಕ್ ಕೊಂಕ್ಣೆಂತ್ ಕವಿತಾ ಬರಯ್ತೆಲ್ಯಾಂಚಿ ಖಾತಡ್ಚ್ ಆಸಾ. ತಾಂತ್ಲಿಂಯ್ ಥೊಡಿಂ ಪ್ರತಿಭೆಚಿ ಶೆಳ್ ಸಯ್ತ್ ನಾಸ್ತಾನಾ ಕವಿತೆಂಚೊ ದರ್ಯೊ ರಚುಂಕ್ ಭಾಯ್ರ್ ಸರ್ಲ್ಯಾಂತ್. ಪ್ರಸ್ತುತ್ ಕಾಳಾರ್ ಕಾವ್ಯಾಚಿ ಪ್ರತಿಭಾ ಆಸ್ಚೆ ಕಾಂಯ್ ಸಾತ್-ಆಟ್ ಕವಿ ಆಸಾತ್. ತಾಂಕಾ ಸೊಡ್ಲ್ಯಾರ್....
ಆಮ್ಚ್ಯೆ ಜಾಯ್ತೆ ಕವಿ ಫೆಸ್ತಾಚೆ ಕವಿ. ನತಾಲ್, ಮೊಂತಿ ವಾ ಪಾಸ್ಕಾಂಚ್ಯಾ ಫೆಸ್ತಾಕ್ ಮಾತ್ರ್ ಭುಲ್ತಾತ್. ಆನಿ ಹಿಂ ಫೆಸ್ತಾಂಯ್ ಕಾಂಯ್ ವೆಗ್ಳ್ಯಾಚ್ ದಿಶ್ಟೆನ್ ಪಳಯ್ತಿತ್ ಮ್ಹಳ್ಯಾರ್ ತೇಂಯ್ ನಾ.... "ಸಾಂತ್ ಆನ್ನಾ ಉದಾರಿಂ.... ಜಲ್ಮೊನ್ ಆಯ್ಲಿ ಮರಿ.." , "ಗರ್ದನ್ಯಾ ಗೊಟ್ಯಾಂತ್ ಜಲ್ಮೊಲೊಯ್...", "ಜೆಜೂ ತೂಂ ಪರತ್ ಯೇನಾಕಾ" ಅಸಲಿಂಚ್ ಬೆಳ್ಶೆಲ್ಲಿಂ ಚಿಂತ್ಪಾಂ ಆನಿ ಫುಂರ್ಗೆಲ್ಲ್ಯೊ ವೊಳಿ. ಆಮ್ಚೆ ಕವಿ ಭಾಯ್ಲ್ಯೊ ಕವಿತಾ ವಾಚಿನಾಂತ್; ಅಧ್ಯಯನ್ ಕರಿನಾಂತ್. ಕವಿತಾ ಫಕತ್ ವಾಚ್ಯಾರ್ಥಾರ್ ಹೊಂದೊನ್ ಆಸ್ತಾ. ರೂಪಕ್, ಸಂಕೇತಾಂಚಿ ಗಜಲ್ ಕಳಿತ್ ನಾ. ಚಡ್ತಾವ್ ಕವಿಂಚೊ ಶೆವೊಟ್ ಆಪ್ಲಿ ಕವಿತಾ ಪತ್ರಾಂನಿ ಫಾಯ್ಸ್ ಜಾಂವ್ಚೊ ಮಾತ್ರ್. ಹಾಚೆ ಭಾಯ್ರ್ ರಸಿಕಾಂಥಂಯ್ ಸಂಚಲನ್ ಕರ್ಚೆಂ ಬಳ್ ಆಮ್ಚ್ಯಾ ಕವಿಂಕ್ ನಾ. ದೇವ್ ಧರ್ಮ್ ಉತ್ರೊನ್ ವಚುಂಕ್ ಆಮ್ಚೆ ಕವಿ ಕಾವ್ಜೆತಾತ್. ನವ್ಯಾನ್ ಬರಯ್ತೆಲ್ಯಾಂನಿ ಭಾಯ್ಲೆ ಕಾವ್ಯೆಂ ವಾಚಿಜೆ; ಭಗಾಜೆ. ಆಜೂನ್ ಆಮ್ಚೆಂ ಕಾವ್ಯೆಂ ರಮ್ಯ್ ಭಗ್ಣಾಂಚೆರ್ಚ್ ಆಸಾ. ತಾಕಾ ನವ್ಯ್ಗಿ ವಾ ನವ್ಯೋತ್ತರ್ ಕಾಳಾಚಿ ಹುನ್ಸಾಣ್ ಲಾಗೊಂಕ್ ನಾ.
ಹೆಂ ಪೂರಾ ಉತ್ರೊನ್ ಆಮ್ಚೆಂ ಕಾವ್ಯೆಂ ವಾಡಜೆ ತರ್ ಕವಿಂನಿ ಗಂಭಿರ್ ಕೃಷಿ ಕರಿಜೆ. ಹರ್ಯೇಕ್ ಆನ್ಭೊಗ್ ಜಾಂವ್ ತೊ ಪಾಡ್ ವಾ ಬರೊ ಸಂಪೂರ್ಣ್ ರಿತಿನ್ ಭಗಜೆ. ಸಂಪಾದಕಾನ್ ಕವಿತಾ ಫಾಯ್ಸ್ ಕರುಂಕ್ ನಾ ತರ್ ಬೆಜಾರಾಯ್ ಭಗ್ತಾ. ತಿ ಬೆಜಾರಾಯ್ ಸಯ್ತ್ ಕಾವ್ಯಾಂತ್ಚ್ ಶಮನ್ ಜಾಂವ್ಚೆಂ ಹಟ್ ಜರ್ ಹರ್ಯೆಕ್ಲ್ಯಾಂನಿ ಧರ್ಲೆಂ ತರ್ ಖಂಡಿತ್ ಕಾವ್ಯೆಂ ತುಮ್ಚ್ಯಾ ಪಾಂಯಾಂಕ್ ಪಡ್ತಲೆಂ.
ಪ್ರಸ್ತುತ್ ಕಾಳಾರ್ ಕೊಂಕ್ಣಿ ಕಾವ್ಯಾಂತ್ ಸಾಂಜ್ ಮ್ಹಳ್ಯಾರ್-
"ಬುಡೊನ್ ಆಸಾ ಸುರ್ಯೊ..... ತಾಂಬ್ಡೊ ಜಾಲಾ ದರ್ಯೊ". ಇತ್ಲೆಂಚ್. ಹೆಂ ಬಾಲಿಶ್ಪಣ್ ಸಾಂಡುನ್
"ಪಡ್ಲಾಚ್ಯಾ ಸಾರಿಯೆರ್ ದಿಸಾಚೆಂ ಮೊಡೆಂ ಜಳ್ತಾ ಪಳೆ..." ಅಸಲಿಂ ಉತ್ರಾಂ ಆಯ್ಕಾಜೆ ತರ್ ಕೊಂಕ್ಣಿ ಕಾವ್ಯಾನ್ ಆನಿ ಕಿತ್ಲೆ ದೀಸ್ ರಾಕಜೆಗಿ??
************
ಆಧಾರ್ ಬೂಕ್:
"ಶಕ್ತಿ ಶಾರದೆಯ ಮೇಳ"- ಡಿ. ಆರ್. ನಾಗರಾಜ್.
"ವಿಮರ್ಶೆಯ ಪರಿಭಾಶೆ"- ಒ. ಎಲ್. ನಾಗಭೂಶಣ್.
’ತಿಸ್ರೊ ದೊಳೊ’ಚೆ ಆಧ್ಲೆ ಆಂಕ್ಡೆ: 1, 2, 3, 4, 5
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
