Poinnari ಪಯ್ಣಾರಿ

ಕವಿತಾकविताPoem

ಅನುಪ್ಕಾರಿ ಖಾಂಡ್

[ಕವಿತಾ]

[ಕವಿತಾ] ಅನುಪ್ಕಾರಿ ಖಾಂಡ್

ಸಂಸಾರಾಂತ್ ದೋನ್ ವರ್ಗಾಚೆ ಲೋಕ್ ಆಸಾತ್, ಏಕ್: ಫಕತ್ ಅಪ್ಲೆಂ ಪೋಟ್ ಭರುಂಕ್ ಜಿಯೆತಾ ಆನಿ ದೋನ್: ಹೆರಾಂಚಿ ಫಿಕಿರ್ ಸಯ್ತ್ ಕರುನ್ ಅಪ್ಣಾಸವೆಂ ಹೆರಾಂಚಿ ಭುಕ್ ಸಯ್ತ್ ನಿವಾರುಂಕ್ ಆಟೊವ್ ಕರ್ತಾ. ಅಸಲೆಂಚ್ ಚಿಂತಪ್ ಕಾವ್ಳೊ ಸಯ್ತ್ ಕರ್ತಾ, ಅಪ್ಲ್ಯಾ ಪಿಲಾಂಸವೆಂ ಕೊಗುಳೆಚ್ಯಾ ಪಿಲಾಂಕ್ ಸಯ್ತ್ ಪೊಸ್ತಾ ಪುಣ್ ಅಖೇರಿಕ್ ಕಾವ್ಳ್ಯಾಕ್ ಭಗುಂಕ್ ಮೆಳ್ಚೆಂ ಫಕತ್ ಅನುಪ್ಕಾರಿ ಚಿಂತಪ್. ಹೆಂಚ್ ಚಿಂತಪ್ ಹ್ಯಾ ಕವಿತೆಂತ್ ದಿಸುನ್ ಯೆತಾ.

[ಕವಿತಾ] ಅನುಪ್ಕಾರಿ ಖಾಂಡ್

A picture from the Poinnari archive that nobody has described yet.

ಎಕ್ ಕೊಗುಳ್ ಆಪ್ಲ್ಯಾ ಪಿಲಾಂಚ್ಯಾ ಮೊಗಾನ್

ಕರುಂಕ್ ತಾಂಚ್ಯಾ ಪೊಟಾಚಿ ವೆವಸ್ಥಾ

ಸರ್ಲಿ ಭಾಯ್ರ್ ಜಿವ್ ದವ್ರುನ್ ಘೊಂಟೆರಾಂತ್

ಉಂಚ್-ಸಕಲ್ ಚಡುಂಕ್ ಮೆಳವಂಕ್ ಖಾಣ್

ಕೆದ್ನಾಂ ಝಾಡಾನ್ರ್ ಕೆದ್ನಾಂ ಜಮ್ನಿರ್

ಆನಿ ಕಾನ್ಟ್ಯಾಂ ಸಯ್ತ್ ಪಾಲ್ಯಾಪತ್ರಾಂತ್

ಪುಂಜಾಯ್ಲೆಂ ಖಾಣ್ ಚಂಚಿನ್ ಬರೆಂಚ್

ಪಡ್ಚೆ ನಾಂತ್ ಹಾಚಿ ಖಾತ್ರಿತ್ ಕರುನ್

ಧರ್ಲೆಂ ಪಾಂಯ್ಯ್ಯಾಂಚ್ಯಾ ಗಳ್ಶಿರಾಂತ್

ಯೆವಂಕ್ ಪರತ್ ತಾಣ್ಲಿ ವಾಟ್ ಉಮೆದಿಚಿ

ಪಯ್ಲಿಯೆ ಪಾವ್ಟ್ ಮೊಲಾದಿಕ್ ಖಾಣ್ ಮೆಳವ್ನ್

ಭುಲ್ಲುಸುನ್ ಗೆಲಿ ತಿ ವೆಗ್ಳ್ಯಾ ಸಂವ್ಸಾರಾಂತ್

ನದರ್ ಆಸ್ಲಿ ಥಿರ್ ಘನ್ಟೆರಾ ಕಡೆಂ

ಅಕಸ್ಮಾತ್ ಪಳೆಲೆಂ ಎಕ್ ಕಾಂವ್ಳ್ಯಾ ಪಿಲ್

ತಳ್ಮಳ್ಟಾಲೆಂ ಬಾಬ್ಳಿಚ್ಯಾ ಕಾನ್ಟ್ಯಾಂತ್

ಪಾಖಾಂನಿ ನೆಟ್ ಅಕಸ್ಮಾತ್ ದೆಂವಯ್ಲೊ

ಚುರ್ಚುರ್ಯಾಂಚಿಯೆ ಭಾವ್ನೆನ್ ಭರ್ಲಿ

ವಿಸ್ರನ್ ಆಪ್ಲ್ಯಾ ಪಿಲಾಂಕ್ ಘುಸ್ಲಿ ಝಂಪಾಂತ್

ಆಪ್ಲಿಯೆ ಬೊಂಚಿನ್ ಕಾಣ್ಟೆ ಸೊಡಯ್ಲೆ

ಕಾಂವ್ಳ್ಯಾ ಪಿಲಾಕ್ ಸುಟ್ಕಾ ದಿಲಿ ಕಶ್ಟವ್ನ್

ಸ್ವತಾ ರಂಗ್ಬಂಬಾಳ್ ಜಾಲಿ ಕಾರ್ಯಾಂತ್

ಸುರಿಯಾ ಮವ್ ಆಸ್ಲೊ ಶಾಂತ್ ಆಸ್ಲೆಂ ಮಳಬ್

ಉಲ್ಹಾಸಾನ್ ಗಾಯ್ತ್ ಧಿನ್ವಾಸ್ಣಿಯೆಚೆಂ ಗಿತ್

ಕೊಗುಳ್ ಪಾವ್ಲಿ ಖಾಣ್ ಘೆವ್ನ್ ಘನ್ಟೆರಾಂತ್

ನಿಶ್ಪಾಪ್ ಪಿಲಾಂ ಚಂಚಿ ಉಗ್ತಿಯೊ, ನಾಸ್ಲೊ ಜಿವ್

ಕೊಗುಳ್ ಲಾಗ್ಲಿ ರಡಂಕ್ ಪಳೆವ್ನ್ ಕಾಂವ್ಳ್ಯಾಕ್

ಜಾಣೆಂ ಕೆಲ್ಲೊ ಅನುಪ್ಕಾರಿ ಖಾಂಡ್ ಘೊಂಟೆರಾಂತ್

[ಜುಲಾಯ್, 2020]

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

ವಿನ್ಸಿ ಕ್ವಾಡ್ರೊಸ್

ವಿನ್ಸಿ ಕ್ವಾಡ್ರಸಾಚೊ ಜಲ್ಮ್ 1964 ವರ್ಸಾ ಸಾಶ್ಟೀಂತಲ್ಯಾ ರಾಯ್ ಗಾಂವಾಂತ್ ಜಾಲೊ. ಕಶ್ಟ್ಕಾರಿ ರಾಹಣಿಮಾನಾಚೆಂ ಜಿವೀತ್ ಜಗತನಾ ತಾಣೆಂ 1976 ವರ್ಸಾ ಸ್ಕುಲಾಂತ್ ಶಿಕತನಾಚ್ ‘ಚಿಂತೂಂಕ್ ನಾಸಲೆಂ’ ಹೊ ತಿಯಾತ್ರ್ ಬರೊವನ್ ಸಂಸ್ಕೃತೀಕ್ ಮಳಾರ್ ಪಾವಲ್ ದವರಲೆಂ. ತೊ ಎಕ್ ಭೊವಗುಣಿ ಕಲಾಕಾರ್, ಪತ್ರಕಾರ್ ಆನಿ ಕೊಂಕಣೀಚೊ ತಜ್ಞ್ ಆಸಾ. ತಾಚೆಂ ಕೊಂಕಣಿ ವ್ಯಾಕರಣ್ ಆನಿ ಕೊಶಾಚ್ಯಾ ಮಳಾರೂಯ್ ಯೊಗದಾನ್ ಆಸಾ. ತಾಣೆಂ ಸಮಾಜ್-ಶಾಸ್ತ್ರಾಂತ್ ಪದವ್ಯುತ್ತರ್ ಪದವಿ ಜೊಡ್ಲ್ಯಾ. ಶಿವಾಯ್ ತಾಣೆಂ ಪತ್ರಕಾರೀತೆಂತ್ ಆನಿ ಸಚೀವಪದ್ ಕಾರ್ಯಪದ್ಧತೀಂತ್ ಪದವಿಕಾ ಜೊಡಲ್ಯಾತ್. ಆಯಜ್ ವೆರ್ ತಾಣೆಂ ೭೫ ಪುಸ್ತಕಾಂ ಬರಯಲ್ಯಾಂತ್ ತಾತೂಂತ್ ತಿಯಾತ್ರ್, ಕಥಾ, ಕವಿತಾ, ಬಾಲಸಾಹಿತ್ಯ್, ಕಾದಂಬರ್‍ಯೊ, ಚರಿತ್ರಾಂ, ಲಿಪ್ಯಾಂತರಾಂ, ಆನಿ ಅಣಕಾರಾಂಚೊ ಆಸಪಾವ್ ಆಸಾ.

ಧಾವೆಕ್ ಆಸತನಾ ಸ್ಕುಲಾಚ್ಯಾ ನೆಮಾಳ್ಯಾಂತ್ ತಾಣೆಂ ಪಯಲೆಂ ಬರಪ್ ಕೆಲೆಂ. ನವೆಂ ಗೊಂಯ್ ಹ್ಯಾ ದಿಸಾಳ್ಯಾಂತಲ್ಯಾನ್ ತಾಣೆಂ ಕಥಾ ಬರೊವಂಕ್ ಸುರೂ ಕೆಲೆಂ. ತಾಣೆಂ ಭಾಸ್ ಚಳವಳೀಂತ್ ಭಾಗ್ ಘೆತಲೊ ಆನಿ ಕೊಂಕಣಿ ರಾಜಭಾಸ್ ಕಿತ್ಯಾಕ್ ಜಾವಂಚಿ ಹಾಚೆರ್ ಬರಪಾಂ ಕೆಲೀಂ. 1990 ವರ್ಸಾ ತಾಚೊ ‘ಫುಲದಾಣೀ’ ಹೊ ಪಯಲೊ ಕಥಾ ಸಂಗ್ರಹ್ ಉಜವಾಡಾ ಆಯಲೊ ಆನಿ ತಾಕಾ ದುಸರ್‍ಯಾಚ್ ವರ್ಸಾ ಕೊಂಕಣಿ ಭಾಶಾ ಮಂಡಳಾಚೊ ಸಾಹಿತ್ಯೀಕ್ ಪುರಸ್ಕಾರ್ ಫಾವೊ ಜಾಲೊ. ಕಥೆ ಕಡೆಂ ಖಂಬೀರಪಣಾನ್ ಉಬೊ ರಾವೂಂಕ್ ಹೀಚ್ ತಾಕಾ ಪ್ರೆರಣಾ ಥಾರಲಿ. ತಾಣೆಂ ಜಾಯತ್ಯಾ ನೆಮಾಳ್ಯಾಂನಿ ಕಥಾ ಬರಯಲ್ಯೊ. ಕಾರ್ಯಶಾಳಾಂನಿ ವಾಂಟೊ ಘೆತಲೊ, ಸಮ್ಮೆಲನಾಂನಿ ವಾಂಟೊ ಘೆತಲೊ, ಆಕಾಶ್‍ವಾಣಿ ಪಣಜಿ ಕೆಂದ್ರಾ ವೆಲ್ಯಾನ್ ಕಥಾ ವಿತ್ರಾಯಲ್ಯೊ ಆನಿ ಆಪಲೆ ಕಥೆಚೊ ದರ್ಜೊ ಉಂಚಾವಂಕ್ ಜ್ಯೆಶ್ಠ್ ಸಾಹಿತ್ಯೀಕಾಂಚೊ ಸಲ್ಲೊ ಘೆತಲೊ. ದಾಮೊದಾರ್ ಮಾವಜೊ, ಮಹಾಬಳೆಶ್ವರ್ ಸೈಲ್, ಪುಂಡಲೀಕ್ ನಾಯಕ್, ಹೆಮಾ ನಾಯಕ್, ಹಾಂಚೆ ಸಾರಕ್ಯಾ ಕಥೆಚೆರ್ ಪ್ರಭುತ್ವ್ ಆಶಿಲ್ಲ್ಯಾ ಸಾಹಿತ್ಯಕಾರಾಂಚಿ ಬುದ್ಧ್ ಘೆವನ್ ತಾಣೆಂ ಆನೀಕ್ ಜಾಯತ್ಯೊ ಕಥಾ ರಚಲ್ಯೊ. ಕಥೆಚೊ ಜಾಳವಣದಾರ್ ಆನಿ ಮಾರ್ಗದರ್ಶಕ್ ಮ್ಹಣ್ ತೊ ಆತಾಂ ವಾವುರತಾ. ಆಕಾಶ್‍ವಾಣಿ-ಪಣಜಿ, ನೆಮಾಳ್ಯಾಂನಿ, ದಿಸಾಳ್ಯಾಂನಿ ಉಜವಾಡಾ ಆಯಿಲ್ಲ್ಯೊ ಕಥಾ ಗುಂಥೂನ್ ಪುಸ್ತಕಾಂ ನಿರ್ಮಾಣ್ ಕೆಲೀಂ ತೀಂ ಅಶೀಂ ಆಸಾತ್ : ಕುರಪಣೊ (2007), ಸುಖ್ ಆನಿ ದುಖ್ (2007), ಘೊಂಸ್ (2008), ತುರೊ (2010), ಮೊಳೊ (2011), ಕಣಸಾಂ (2011), ಪ್ರೆರಣಾ (2018), ದುವಳ್ (2022) ಆನಿ ಮೊಗಾ-ಆಂಗಣ್ (2024). ಹ್ಯಾ ಕಥಾಂ ಝೆಲ್ಯಾ ಮದಲ್ಯಾ ತುರೊ ಪುಸ್ತಕಾಕ್ 2010 ವರ್ಸಾ ಥೊಮಸ್ ಸ್ಟಿಫನ್ಸ್ ಕೊಂಕಣಿ ಕೆಂದ್ರ್ ಹೆ ಸಂಸ್ಥೆಚೊ ಸಾಹಿತ್ಯೀಕ್ ಪುರಸ್ಕಾರ್ ಫಾವೊ ಜಾಲಾ ಜಾಲ್ಯಾರ್ 2024 ವರ್ಸಾ ದುವಳ್ ಪುಸ್ತಕಾಕ್ ಗೊವಾ ಕೊಂಕಣಿ ಅಕಾದೆಮೀಚೊ ಉತ್ಕೃಶ್ಠ್ ಗ್ರಂಥ್ ಪುರಸ್ಕಾರ್ ಫಾವೊ ಜಾಲಾ.

ತಾಣೆಂ ಭುರಗ್ಯಾಂ ಖಾತೀರೂಯ್ ಜಾಯತ್ಯೊ ಕಥಾ ಬರಯಲ್ಯೊ ಆನಿ ತ್ಯೊ ಪುಸ್ತಕ್ ರುಪಾನ್ ಛಾಪೂನ್ ಹಾಡಲ್ಯೊ. ನೆಮಾಳ್ಯಾಂನಿ ಆನಿ ದಿಸಾಳ್ಯಾಂನಿ ಬಾಲ್-ಕಥಾ ಬರೊವನ್ ತಾಂಚೀಂ ಪುಸ್ತಕಾಂ ನಿರ್ಮಾಣ್ ಕೆಲೀಂ ತೀಂ ಅಶೀಂ: ಪೊರಸೂಂ (2010), ಆವಾಜ್-ಧನ್ (2011), ಮೊರಪಾಖಾಂ (2014), ಮಾಣಕಾಂ-ಮೊತಯಾಂ (2016), ರಂಗ್-ಬಿರಂಗಿ ನಖೆತ್ರಾಂ (2017), ರಂಗ್-ಬಿರಂಗಿ ಫುಲಾಂ (2017), ವಾಂಕಡೆಂ ಝಾಡ್ (2024), ಆವಯ್ (2024), ಕಾಂಸವ್ (2024), ಘೊಂಟೆರ್ (2024), ಪರಿ (2024), ಮೆಂಢ್ರೊ (2024), ಜಲ್ಮ್ ದೀಸ್ (2024), ಶಾಣೆಂ ಬಾಯ್ (2024), ನುಸ್ತೀಂ (2024), ಸೈತಾನ್ (2024), ಮೈದಾನ್ (2024), ಬೊಮಾಡೊ (2024), ಎಕವಟ್ (2024), ಮನೀಸಣಣ್ (2024). ತಾಚ್ಯಾ ‘ಪೊರಸೂಂ’ ಹ್ಯಾ ಬಾಲ್-ಕಥಾ ಝೆಲ್ಯಾಕ್ ೨೦೧೩ ವರ್ಸಾ ಗೊವಾ ಕೊಂಕಣಿ ಅಕಾದೆಮೀಚೊ ಬಾಲಸಾಹಿತ್ಯ್ ಪುರಸ್ಕಾರ್ ಲಾಭಲಾ.

ವಿನ್ಸೀಚ್ಯೊ ಕಥಾ ವಿಂಗಡ್-ವಿಂಗಡ್ ವಿಶಯಾಂಚೆರ್ ಆಧಾರೀತ್ ಆಸಾತ್. ಆಯಜವೆರ್ ತಾಚ್ಯೊ ಕಥಾ ಕಿತಲ್ಯೊ ಜಾಲ್ಯೊ ಹಾಚೊ ಆಂಕಡೊ ಥಾರಾವಂಕ್ ಮೆಳಚೊ ನಾ, ಕಿತ್ಯಾಕ್ ದರ್ ಮ್ಹಯನ್ಯಾಕ್ ತಾಚ್ಯೊ ೪-೫ ಕಥಾ ಉಜವಾಡಾ ಯೆತಾತ್. ತಾಚ್ಯೊ ಕಥಾ ಇಂಗ್ಲೀಶ್ ಆನಿ ಕನ್ನಡ್ ಭಾಸಾಂನಿ ಅಣಕಾರೀತ್ ಜಾಲ್ಯಾತ್. ತಾಣೆಂ ಆಪಲ್ಯೊ ಕಥಾ ಮುಂಬಯ್ ಆನಿ ಭೂಜ್ ಹಾಂಗಾ ಇಂಗ್ಲೀಶ್ ಭಾಶೆಂತ್ ಸಾದರ್ ಕೆಲ್ಯಾತ್. ಹಾಲೀಂಚ್ ‘ಬ್ರೆವ್ ಸ್ಟ್~ಎಪ್’ ಹಿ ಮೂಳ್ ಕೊಂಕಣಿ ಕಥಾ ‘ದ್ ನವಹೀಂದ್ ಟಾಯಮ್ಸ್’ ಹ್ಯಾ ಇಂಗ್ಲೀಶ್ ದಿಸಾಳ್ಯಾಚೆರ್ ಛಾಪೂನ್ ಆಯಲ್ಯಾ. ‘ಆಸ್ತ್’ ಹಿ ಕುರಪಣೊ ಪುಸ್ತಕಾಂತ್ ಛಾಪೂನ್ ಆಯಿಲ್ಲಿ ಕಥಾ ಪಯಲೆಂ ವರ್ಗ್ ಬೀ.ಎ. ಖಾತೀರ್ ಪಾಠ್ಯಪುಸ್ತಕಾಂತ್ ಆಸ್ಪಾವಲ್ಯಾ. ತಶೆಂಚ್ ತಾಚೆಂ ಜಾದುಚೆಂ ಪೆಟೂಲ್ ಹೆಂ ಪುಸ್ತಕ್ ಬೀ.ಎ.ಚ್ಯಾ ದುಸರ್‍ಯಾ ವರ್ಸಾಕ್ ಪಾಠ್ಯಪುಸ್ತಕ್ ಮ್ಹಣ್ ಲಾಗಲಾಂ.

ತಾಣೆಂ ಬರಯಿಲ್ಲೆ ‘ಜಾದುಚೆಂ ಪೆಟೂಲ್’ ಹೆ ಬಾಲಕಾದಂಬರೀಕ್ ‘ಕೆಂದ್ರ್ ಸಾಹಿತ್ಯ್ ಅಕಾದೆಮೀಚೊ ೨೦೧೭ ವರ್ಸಾ ‘ಬಾಲ್ ಸಾಹಿತ್ಯ್ ಪುರಸ್ಕಾರ್’ ಫಾವೊ ಜಾಲಾ. ತಾಕಾ ಮ್ಹಯನ್ಯಾಚೊ ಕಥಾಕಾರ್ ಮ್ಹಣ್ ‘ನವೆಂ ಗೊಂಯ್’ ದಿಸಾಳ್ಯಾನ್ ಜಾಯತೆ ಫಾವಟೀಂ ಇನಾಮಾಂ ಭೆಟಯಲ್ಯಾಂತ್. ಹೆ ಶಿವಾಯ್ 2010 ವರ್ಸಾ ‘ಸುರ್ಯ್-ಉದಯ್’ ಹೆ ಕಾದಂಬರೀಕ್ ದಾಲ್ಗಾದೊ ಕೊಂಕಣಿ ಅಕಾದೆಮೀಚೊ (ಹಾತಬರಪ್) ಪುರಸ್ಕಾರ್ ಫಾವೊ ಜಾಲಾ. ತಾಚಿ ಕವಿತಾ ‘ಎಕ್ ಮೆಣವಾತ್’ ರಾಶ್ಟ್ರೀಯ್ ಕವಿ ಸಂಮೆಲನಾಕ್ ಆಕಾಶ್‍ವಾಣಿ ಪಣಜಿ ಕೆಂದ್ರಾನ್ ವಿಂಚೂನ್ ಕಾಡಲಿ ಆನಿ ತಿ 2018 ವರ್ಸಾ ಇಂದೊರ್ ಆಕಾಶ್‍ವಾಣಿ ಕೆಂದ್ರಾ ವೆಲ್ಯಾನ್ ಎಕಾಚ್ ಬರಾಬರ್ ಭಾರತಾಚ್ಯಾ 22 ಭಾಸಾಂನಿ ಅಣಕಾರೀತ್ ಜಾವನ್ ಭಾರತಭರ್ ವಿತರಾಯಲಿ. ತಾಕಾ ಪತ್ರಕಾರಿತಾ, ಕೊಂಕಣಿ ಕಾರ್ಯಕರ್ತೊ, ಉತ್ಕೃಶ್ಟ್ ಬರೊವಪಿ, ಉತ್ಕೃಶ್ಟ್ ಖೆಳಗಡೊ, ಉತ್ಕೃಶ್ಟ್ ಸೆವಾ, ಸಹಕಾರ್ ಕ್ಷೆತ್ರ್ ಅಶಾ ಮಳಾಂರ್ ಜಾಯತೆ ಹೆರ್ ಪುರಸ್ಕಾರ್ ಆನಿ ಭೊವಮಾನ್ ಫಾವೊ ಜಾಲ್ಯಾತ್.

All 8 pages by this writer

ಕವಿತಾकविताPoem Nov 2020

ಸಾಂಗಾತ್

By ವಿನ್ಸಿ ಕ್ವಾಡ್ರೊಸ್

More in Poinnari

Everything in Poinnari