Poinnari ಪಯ್ಣಾರಿ

ಕವಿತಾकविताPoem

Onupkari Khandd

[Kovita]

[Kovita] Onupkari Khandd 

Somsarant don vorgache lok asat, ek: fokot oplem pott bhorunk jieta ani don: heranchi fikir soit korun opnnasovem heranchi bhuk soit nivarunk attovo korta. Osolench chintop kaullo soit korta, oplea pilamsovem kogullechea pilank soit posta punn okherik kaulleak bhogunk mellchem fokot onupkari chintop. Hench chintop hea kovitent disun yeta. 

[Kovita] Onupkari Khandd 

A picture from the Poinnari archive that nobody has described yet.

Ek kogull aplea pilanchea mogan

Korunk tanchea pottachi vevostha

Sorli bhair jiv dovrun ghotterant

Unch-sokol sodunk mellounk khann

Kednam zhaddanr kednam zomnir

Ani kantteam soit palea-potrant

Punzailem khann chonchin borench

Poddche nant hachi khatrit korun

Dhorlem paim-ianchea gollxirant

Yeunk porot tannli vatt umedichi

Poilie pautt moladik khann melloun

Bhul’lusun geli ti vegllea sonvsarant

Nodor asli thir ghonttera koddem

Okosmat pollelem ek kanvllea pil

Tollmollttalem babllichea kantteant

Pakhamni nett okosmat denvoilo

Churchureanchie bhavnen bhorli

Visron aplea pilank ghusli zhompant

Aplie chonchin kanntte soddoile

Kanvllea pilak suttka dili koxttoun

Svota rongbomball zali karyant

Suria mov aslo xant aslem mollob

Ulhasan gait dhin’vasnniechem git

Kogull pavli khann gheun ghontterant

Nixpap pilam chonchi ugtio, naslo jiv

Kogull lagli roddonk polleun kanvlleak

Zannem kel'lo onupkari khandd ghotterant

[Jul, 2020]

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

Vincy Quadros

Vinsy Quadros-acho zolm' 1964 vorsa saxttintlea rai gamvant zalo. Koxttkari rahnnimanachem jivit zogtona tannem 1976 vorsa skulant xiktonach ‘chintunk naslem’ ho tiatr boroun somskritik mollar paul dourolem. To ek bhougunni kolakar, potrokar ani konknnicho togone asa. Tachem konknni veakronn ani koxachea mollaruy yogdan asa. Tannem somaz-xastrant podvyut'tor podvi zoddlea. Xivai tannem potrokaritent ani sochiupod karyopd'dhotint podvika zoddleat. Aiz ver tannem 75 pustokam boroileant tatunt tiatr, kotha, kovita, balsahity, kadombreo, choritram, lipeantoram, ani onnkarancho aspavo asa.

Dhavek astona skulachea nemalleant tannem poilem borop kelem. Novem gõy hea disalleantlean tannem kotha borounk suru kelem. Tannem bhas cholloullint bhag ghetlo ani konknni rajbhas kiteak zaunchi hacher borpam kelim. 1990 vorsa tacho ‘fuldanni' ho poilo kotha songroh ujvadda ailo ani taka dusreach vorsa konknni bhaxa monddllacho sahityik purskar favo zalo. Kothe koddem khombiroponnan ubo ravunk hich taka prernna tharli. Tannem zaitea nemalleamni kotha boroileo. Karyoxallamni vantto ghetlo, som'melonamni vantto ghetlo, akaxvanni ponnji kendra velean kotha vitraileo ani aple kothecho dorzo unchaunk jyextth sahityikancho sol'lo ghetlo. Damodar mauzo, mohabollexvor soil, punddlik naik, hema naik, hanche sarkea kothecher probhutv axil'lea sahityokaranchi bud'dh gheun tannem anik zaiteo kotha rochleo. Kothecho zallounnodar ani margodrxok mhonn to atam vavurota. Akaxvanni-ponnji, nemalleamni, disalleamni ujvadda ayil'leo kotha gunthun pustokam nirmann kelim tim oxim asat : kurponno (2007), sukh ani dukh (2007), ghoms (2008), turo (2010), mollo (2011), konnsam (2011), prernna (2018), duvll (2022) ani moga-angonn (2025). Hea kotham jhelea modlea turo pustokak 2010 vorsa thomos sttifns konknni kendr he somsthecho sahityik purskar favo zala zalear 2024 vorsa duvll pustokak gova konknni okademicho utkrixtth gronth purskar favo zala.

Tannem bhurgeam khatiruy zaiteo kotha boroileo ani teo pustok rupan chhapun haddleo. Nemalleamni ani disalleamni bal-kotha boroun tanchim pustokam nirmann kelim tim oxim: porsum (2010), avaz-dhon (2011), morpakham (2016), mannkam-moteam (2016), rong-birongi nokhetram (2017), rong-birongi fulam (2017), vankddem zhadd (2024), auy (2024), kamsou (2024), ghontter (2024), pori (2024), menddhro (2024), zolm' dis (2024), xannem bai (2024), nustim (2024), soitan (2024), moidan (2024), bomaddo (2024), ekoutt (2025), monisonnonn (2025). Tachea ‘porsum’ hea bal-kotha jheleak 2013 vorsa gova konknni okademicho balsahity purskar labhla.

Vinsy-cheo kotha vingodd-vingodd vixeancher adharit asat. Aizover tacheo kotha kitleo zaleo hacho ankddo tharaunk mellcho na, kiteak dor mhoineak tacheo 4-5 kotha ujvadda yetat. Tacheo kotha inglix ani kon'nodd bhasamni onnkarit zaleat. Tannem apleo kotha mumboi ani bhuz hanga inglix bhaxent sador keleat. Halinch ‘brevo sttep' hi mull konknni kotha ‘do nouhind ttaims' hea inglix disalleacher chhapun ailea. ‘ast' hi kurponno pustokant chhapun ayil'li kotha poilem vorg bi.E. Khatir patthyopustokant aspaulea. Toxench tachem zaduchem pettul hem pustok bi.E.-chea dusrea vorsak patthyopustok mhonn laglam.

Tannem boryil'le ‘zaduchem pettul' he balkadomborik ‘kendr sahity okademicho 2017 vorsa ‘bal sahity purskar' favo zala. Taka mhoineacho kothakar mhonn ‘novem gõy’ disallean zaite fauttim inamam bhettoileant. He xivai 2010 vorsa ‘sury-udoi' he kadomborik dalgado konknni okademicho (hatborop) purskar favo zala. Tachi kovita ‘ek mennvat' raxttri-i kovi som'melonak akaxvanni ponnji kendran vinchun kaddli ani ti 2018 vorsa indor akaxvanni kendra velean ekach borabor bhartachea 22 bhasamni onnkarit zaun bhartobhor vitraili. Taka potrokarita, konknni karyokrto, utkrixtt boroupi, utkrixtt khellgoddo, utkrixtt seva, sohkar kxetr oxa mollamr zaite her purskar ani bhouman favo zaleat.

All 8 pages by this writer

ಕವಿತಾकविताPoem 21 Nov 2026

Devak Ulo

By Vincy Quadros

ಕವಿತಾकविताPoem Nov 2020

Sangat

By Vincy Quadros

ಕವಿತಾकविताPoem Oct 2020

Sasnnachem Ghor

By Vincy Quadros

More in Poinnari

Everything in Poinnari