[मोटवी कथा]: विचित्र एकवट
कंत्राटदार सोजामाचो प्रसताव बाप कुलासान तिरसकार केल्लो. पडोंक तयार जाल्ली आपली इगर्ज दुरुसत कर्ची आशा ताका आसल्ली. इगर्जे भंवतणेचो जागो नितळ कर्न इसकोलाचें मयदान विसतारांवची गर्ज आसा म्हळ्ळें तो जाणा आसल्लो. हेर इगर्जें बरीच आपली इगर्ज नांवाडदीक जावन फिर्गज फेसताक हजारांनी लोक जमो जायजे म्हळ्ळें स्वपाण ताणेंय पळेल्लें. पूण ह्या कामा खातीर फिर्गजेंतल्या दुबळ्या लोकाक बली चडंवचें ताका नाकासलें. फिर्गजेंतल्या हऱ्येक कुटमान म्हयन्याक एक हजार रुपय लेकान दोन वर्सांच्या आवदेंत २४ हजार रुपय इगर्जेक दीवंक जाय म्हळ्ळो सोजामाचो प्रसताव फिर्गज मंडळीन मंजूर केल्लो तरी बाप कुलासान ताचो विरोध केल्लो. फिर्गज मंडळिच्या हेर सांद्यांकी हो प्रसताव मंजूर नातल्लोळ तरी ते असहायक जावन आसल्लीव संगत बाप कुलास जाणा जाल्लो.
"कंत्राटदार सोजाक दुबळ्या लोकाची बिर्मत दिसाना. ताका फकत आपल्या उद्योगाचें पडोन गेलां. सांत आंतोनी बापा, तुंच एक आचऱ्यें कर आनी हांगाच्या दुबळ्या लोकाक बचाव कर," बाप कुलासान आपल्या कुडांत उमकाळायिल्ल्या सांताच्या व्हड पायणेलाचेर दीषट लावन म्हळें.
इगर्जेची अचानक लांबायेक घांट व्हाजची आयकोन बाप कुलास चकीत जालो. आपल्या कुडांतलो आम्सरान भायर सरोन दर्वडी मेटां काडन घांटिच्या तोरिल्हागीं पावलो. मुकल्या गेटिंतल्यान लागसिले थोडे तर्नाटे धांवोन येंवचे पाद्रीन पळेलें. मिरोण जेर्मी खर्शेवन आपल्या आंगार मेल्लें आयिल्लेबरी घांटिची दोरी वोडतालो. ताका पाद्रीन जोरान कुशीन लोटलो.
"हें कितें कर्तायरे? तुका कोणे सांगलें घांट मारुंक?" बाप कुलासान सवाल केलें.
मिरोण आनिकी खर्शेतालो. ताणे आपलो कांपेरो हात उकलन बोट जोकून म्हळें, "पळेया फादर! त्या मापळ्यान सांत आंतोनिची इमाज वोडन सकयल घाल्या!"
पाद्रीन पळेलें. गेटिंतल्यान भितर आयिल्ले तर्नाटे त्या मनशाक मार्ताले. पाद्री आपल्या म्हाताऱ्या प्रायेक मिकवल्ल्या सुडसुडायेन त्ये कुशीन आम्सरी मेटां काडन गेलो. इमाजिच्या स्टेंडालागीं पावताना नायत्याचें तोंड फुटोन रगात देंवतालें. ताची दवी तोपी पयस उसळोन पडल्ली.
बाप कुलासान तर्नाट्यांक ताच्ये थावन विंगड केलें. नायतो भिंयान कांप्तालो. ताणे हात जोडून उलंवचें प्रेतन केलें. पूण उत्रां सुटलीं नांत. पाद्रीन ताच्या बावळ्याक धर्न आपल्या कुडा तेवशीन आपवन वेलो आनी भायर बांकार बसोंक सांगलें. तांच्या पाटल्यान्ंच आयिल्ल्या मिर्णीक सांगोन एक ग्लास उदाक हाडन ताका पियेवंक दिलें. पाद्रीन ताच्ये कुशीन बसोन आपली दयाळ दीषट ताचेर घाली.
"सांग कितें जालें?" पाद्रीन मोवाळायेन विचारलें.
"फादर, धा वर्सांचो म्हजो एकलोच पूत आस्पत्रेंत सीरियस आसा. काळजाची पिडा. ताका पयशिल्या व्हडल्या आस्पत्रेक वेल्यार मात्र ताचो जीव उरोंक साध आसा म्हळां. हांव दुबळो. देवालागीं ताच्या जिवाची भीक मागोंक हावें मसीदी आनी दिवळाक भेट दीवन जाली. उपरांत हांगा आयलों. इमाजिच्या लागीं रावोन हांव मागोन आसल्लों. तेदाळा हांव तकली गुंवोन पडलों. पडताना म्हाका कळीत नासताना हावें इमाजीक वेंग मारली. म्हजे सांगाता इमाजयी सकयल पडली. फादर, म्हजी चूक जाली."
पाद्रीन ताच्या बुजाक थापुडन धयर दिलें.
"चिंता करिनाका, सगळें सार्कें जातलें. हें सांग तुजें नांव कितें?" पाद्रीन मोवाळायेन विचारलें.
"म्हजें नांव सलीम. लागशिल्या केरिंत रावतां. शहरांत रुकाच्या मिल्लांत काम कर्तां," तो म्हणालो. ताचो ताळो कांप्तालो.
पाद्री उटोन आपल्या कुडा भितर गेलो. ताणे फोनार उलंवचें सलीमाक आयकतालें. पोलिसांक दूर दिता म्हण चिंतून ताचो जीव कांपोंक लागलो. उटोन धांवचीं चिंत्नां आयलीं. पूण ताच्या पायांक उबे रांवचें बळ नातलें. थोड्या वेळान पाद्री भायर आयलो.
"धर हे थोडे रुपय. गर्जेक उपकार्तीत. तूं पुताची चिंता करिनाका. दयाळ मोगाळ देव ताका बरो कर्तलो. ताच्ये खातीर हांव माग्तां," पाद्रीन म्हळें.
सलीम ताच्ये उपरांत तिस्रे पावटीं पाद्रीक मेळोंक आयलो. सलीमाचो पूत संपूर्ण बरो जाल्लो. नांवाडदीक सर्जनान ताच्या काळजाचें ओपरेशन केल्लें. बाप कुलासान गुटान ती वेवस्था केल्ली.
"फादर," सलीम म्हणालो. "तुमी म्हज्या पुताचो जीव राकलो. त्ये दीस तुमी म्हजो जीव राकलो मात्र न्हय म्हज्या समुदाया वयलें व्हड अन्वार तुमी पयस केलें. तुमची मजत नातली तर भयंकर लडाय जावन रगात व्हाळतें आसल्लेंम. सभार जीव वेते आसले. फादर, हावें तुमच्या समडतिंत भर्ती जावंक चिंतलां. म्हाका बावतिज्म दिया फादर."
बाप कुलास थोडो वेळ चिंतून बसलो. उपरांत तो म्हणालो, "जायत, पूण एक शर्ता खाल. तुज्या समडतिचे तीन अवगूण आनी म्हज्या समडतेचे तीन बरे गूण तुवें सांगोंक जाय."
सलीमाचें तोंड बंध जालें.
"तुवें तुजो धर्म सांडची गर्ज ना. देव सकडांचोय एकच. सालवासांव जोडच्यो वाटो मात्र विंगड. तुवें म्हजो उपकार बावुडचे खातीर आमच्या धर्मांत मेळचें नाका," म्हणालो बाप कुलास.
"म्हजो लोक ह्या इगर्जेची खंच्ये रितीन तरी सेवा करुंक खुशी वर्ता. सांगा फादर, आमी सक्कड सांगाता मेळोन कर्तांव," सलीम म्हणालो.
जायतो वेळ पऱ्यांत तांचे मधें तर्क चल्लें. इगर्जेचें काम सांगल्या शिवाय सलीम वचोंक तयार नातलो. अखरेक बाप कुलासान सलवणी स्वीकारली.
"आमच्या इगर्जेक आनी इसकोलाक हें ल्हान मयदान पावाना. इगर्जे कुशिची गुड्या सुवात समतट्ट करुंक तुमच्यान जायत?" बाप कुलासान सवाल केलें.
"कित्याक जांवचें ना?" सलीम संतोसान उडोन पडलो. "एक बरें गार्डन सयत जातेलें. बांय दुरुसत जातेली. ह्या इगर्जेचें आमी रूप बदलून सोडतेल्यांव. वेळ लाग्तलो, पूण काम जातलें."
बाप कुलासाच्या सांत आंतोनी फिर्गजेंत आचऱ्यांची सुर्वात जाली. सल्मान आनी ताच्या सांगात्यांनी काम कर्चें पळेवन हिंदू भाव सयत मुकार सरले. आळशी क्रीसतावांक लज जाली. सोजामान आडवारलें तरी तांच्यान पाटीं रावोंक जालेंना. एक राज नेतान काम कर्च्या लोका खातीर च्हा फळाराची वेवस्था कर्ताना ताच्या विरोधीन पेज आनी चेटणेची विलेवरी केली.
सक्कड जातिच्या लोकान सांगाता मेळोन इगर्जेचें काम कर्ची खबार मेळतच पत्रकार जागे जाले. स्थानीय टिवी आनी पत्रांनी विवर प्रकट जालो. देश विदेशा थावन दान येवंक शुरू जालें.
बाप कुलास आनी सलीम हाणी केदाळाय सांगाता आसचें पळेवन पर्की लोक विज्मीत जातालो. त्या विचित्र जोड्याच्यो तस्वीऱ्यो पत्रांनी प्रकट जाल्यो.
फिर्गज फेसताक पयले पावटीं बिस्पान येतां म्हळें. कंत्राटदारर सोजामाक चड तेंप पयस रावोंक जालेंना. ताणे हात जोडन बोगसाणे माग्ताना उधार मनाच्या बाप कुलासान ताका पोटलून धरलो. वेचीक पूत पाटीं आपल्या घरा आयिल्लो.
[२०१७]
