11 ಮಾರ್ಚ್ (ಗೊಂಯ್): ಆಶಾವಾದಿ ಪ್ರಕಾಶನಾನ್, ದಲ್ಗಾದೊ ಕೊಂಕಣಿ ಅಕಾಡೆಮಿ ಆನಿ ಕೊಂಕಣಿ ಅಕಾಡೆಮಿ ಗೊಂಯ್ ಹಾಣಿಂ ಮಂಗ್ಳರಾ (11 ಮಾರ್ಚ್) ರೆಜಿನಾಲ್ಡ್ ಫೆರ್ನಾಂಡಿಸ್ ಸಭಾಸಾಲಾಂತ್, ಸಕಾಳಿಂ 10:30 ಥಾವ್ನ್ 12:00 ಪರ್ಯಾಂತ್ ಚಲ್ಲೆಲ್ಯಾ ಪುಸ್ತಕ್ ಲೊಕಾರ್ಪಣ್ ದಬಾಜೊ ಕಾರ್ಯಾಂತ್ ಕೊಂಕಣಿಚ್ಯಾ ತೀನ್ ಲಿಪಿಚಿಂ ಪಾಂಚ್ ಪುಸ್ತಕಾಂ ಲೊಕಾರ್ಪಣ್ ಜಾಲಿಂ.
ಬಾಬ್ ತೊಮಾಜಿನ್ ಕಾರ್ಡೋಜ್ (ಆಧ್ಲೊ ಅಧ್ಯಕ್ಷ್ - ದಲ್ಗಾದೊ ಕೊಂಕಣಿ ಅಕಾಡೆಮಿ) ಹಾಂಚ್ಯಾ ಅಧ್ಯಕ್ಷ್ಪಣಾಖಾಲ್, ಮುಖೆಲ್ ಸಯ್ರಿ ಜಾವ್ನಾ ಡೊ.ಬೀನಾ ಮಾರ್ಟಿನ್ಸ್, ಬಾಬ್ ವಸಂತ್ ಸಾವಂತ್ (ಅಧ್ಯಕ್ಷ್, ಕೊಂಕಣಿ ಅಕಾಡೆಮಿ ಗೊಂಯ್), ಬಾಬ್ ಸೆಲ್ಸೊ ಫೆರ್ನಾಂಡಿಸ್ (ಅಧ್ಯಕ್ಷ್, ದಲ್ಗಾದೊ ಕೊಂಕಣಿ ಅಕಾಡೆಮಿ), ಬಾಬ್ ವಿನ್ಸಿ ಕ್ವಾಡ್ರಸ್ (ಆಧ್ಲೊ ಅಧ್ಯಕ್ಷ್, ದಲ್ಗಾದೊ ಕೊಂಕಣಿ ಅಕಾಡೆಮಿ), ಬಾಬ್ ಫಾವುಸ್ತೊ ಡಿಕೊಸ್ತಾ (ಸಂಪಾದಕ್, ಗುಲಾಬ್), ಡೊ. ಪ್ರಕಾಶ್ ಪೆರ್ಯಂಕರ್ (ಗೊಂಯ್ ಮಹಾವಿಧ್ಯಾಪೀಠ್), ಬಾಬ್ ಉದಯ್ ಮ್ಹಾಂಬ್ರೊ (ನಾಮ್ನೆಚೊ ಕವಿ), ಬಾಬ್ ವಿಲ್ಲಿ ಗೋಯೆಸ್ (ನಾಮ್ನೆಚೊ ಕಾದಂಬರಿಕಾರ್), ಬಾಯ್ ಉರ್ಜಿತಾ ಭೊಬೆ (ನಾಮ್ನೆಚಿ ಕವಿ) ಅಶೆಂ ಕನ್ನಡ, ನಾಗರಿ ಆನಿ ರೋಮಿ ಲಿಪಿಂತ್ ಬರಂವ್ಚೆ ಸಾಹಿತಿ, ಕವಿ ಹ್ಯಾ ಕಾರ್ಯಾಂತ್ ಹಾಜರ್ ಆಸ್ಲೆ.
ಬಾಬ್ ಸೆಲ್ಸೊ ಫೆರ್ನಾಂಡಿಸಾನ್ ಯೆವ್ಕಾರ್ ಉಲವ್ಪ್ ಕರ್ತಚ್, ಸೂತ್ರ್ ಸಂಚಾಲನ್ ಕೆಲ್ಲ್ಯಾ ಬಾಬ್ ಶೈಲೇಂದ್ರ ಮೆಹ್ತಾನ್ ಸಯ್ರ್ಯಾಂಚಿ ಮೊಟ್ವಿ ಒಳೊಕ್ ಕರ್ತಚ್, ಬಾಯ್ ಉರ್ಜಿತಾ ಭೊಬೆನ್ ಉಡಾಸಾಚಿ ಕಾಣಿಕ್ ದೀವ್ನ್ ಯೆವ್ಕಾರ್ ದಿವುನ್ ’ಫುಲಾಂ ತುರೊ’ ಪುಸ್ತಕಾಚಿ ಒಳೊಕ್ ಕರುನ್ ದಿಲಿ. ಬಾಬ್ ಉದಯ್ ಮ್ಹಾಂಬ್ರೊನ್ ’ಮೊಳ್ಸುದ್’ ಪುಸ್ತಕಾಚಿ ಒಳೊಕ್ ಕರುನ್ ದಿಲಿ. ಬಾಬ್ ವಸಂತ್ ಸಾವಂತಾನ್ ’ಸುರ್ಯಾ ಉದೆಲಾ’ ಪುಸ್ತಕಾಚಿ ಒಳೊಕ್ ಕರುನ್ ದಿಲಿ, ಬಾಬ್ ವಿಲ್ಲಿ ಗೋಯೆಸಾನ್ (ಗ್ವಾದಲೂಪ್ ಡಾಯಸಾ ತರ್ಫೆನ್) ’ಭಿತರ್ಲೊ ಕವಿ’ ಪುಸ್ತಕಾಚೊ ಒಳೊಕ್ ಕರುನ್ ದಿತಚ್, ಬಾಬ್ ಸೆಲ್ಸೊ ಫೆರ್ನಾಂಡಿಸಾಚ್ಯಾ ಹಾತಿಂ ಪುಸ್ತಕಾಂ ಲೊಕಾರ್ಪಣ್ ಜಾಂವ್ಚ್ಯಾ ಹಾತಿಂ ಹತಾಂತರ್ ಕೆಲಿಂ; ಡೊ.ಬೀನಾ ಮಾರ್ಟಿನ್ಸಾನ್ ’ಫುಲಾಂ ತುರೊ’, ಬಾಬ್ ವಿನ್ಸಿ ಕ್ವಾಡ್ರೊಸಾನ್ ’ಮೊಳ್ಸುದ್’, ಬಾಬ್ ತೊಮಾಜಿನ್ ಕಾರ್ಡೊನಾನ್ ’ಸುರ್ಯಾ ಉದೆಲಾ’ (ರೋಮಿ ಲಿಪಿ), ಡೊ.ಪ್ರಕಾಶ್ ಪೆರ್ಯಂಕರಾನ್ ’ಸುರ್ಯಾ ಉದೆಲಾ’ (ನಾಗರಿ ಲಿಪಿ), ಬಾಬ್ ಫಾವುಸ್ತೊ ವಿ ಡಿಕೋಸ್ತಾನ್ ’ಭಿತರ್ಲೊ ಕವಿ’ ಪುಸ್ತಕಾಚೆಂ ಲೊಕಾರ್ಪಣ್ ಕೆಲೆಂ. (ಹಿಂ ಪುಸ್ತಕಾಂ ಆಶಾವಾದಿ ಪ್ರಕಾಶನಾಚ್ಯಾ ೨೫ವ್ಯಾ ವರ್ಸಾ ಕೊಂಕಣಿ ಸರ್ದಾರ್ ಬಸ್ತಿ ವಾಮನ್ ಶೆಣಯ್ ಪುಸ್ತಕ್ ಪ್ರಕಾಶನ್ ಯೆವ್ಜಣೆಖಾಲ್ ಪ್ರಕಾಶಿತ್ ಜಾಲ್ಲಿಂ ಜಾವ್ನಾಸಾತ್)
ಸಯ್ರ್ಯಾಂನಿ; ಡೊ.ಬೀನಾ ಮಾರ್ಟಿನ್ಸ್, ಡೊ.ಪ್ರಕಾಶ್ ಪೆರ್ಯಂಕರ್, ಬಾಬ್ ಫಾವುಸ್ತೊ ಡಿಕೊಸ್ತಾ ಹಾಣಿಂ ಅಪ್ಲೆ ಸಂದೇಶ್ ದಿತಚ್ ಅಧ್ಕಕ್ಷ್ ಉಲವ್ಪಾಂತ್ ಬಾಬ್ ತೊಮಾಜಿನ್ ಕಾರ್ಡೊಜಾನ್ ’ಕೊಂಕಣಿ ಭಾಸೆಚ್ಯಾ ಫುಡಾರಾಕ್ ಲಾಗುನ್ ಆಮಿ ಸರ್ವಾಂನಿ ಲಾಗಿಂ ಯೇವ್ನ್ ಎಕಾ ಮನಾನ್ ಕೊಂಕಣಿ ವಾವ್ರ್ ಕರ್ಚಿ ಗರ್ಜ್ ಆಸಾ ಆನಿ ಹೊ ವಾವ್ರ್ ಅಸೊಚ್ ಫುಡೆಂ ವೆಚಿ ಗರ್ಜ್ ಆಸಾ’ ಮ್ಹಳೆಂ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಉಲವ್ಪಾಂತ್ ’ಸುರ್ಯೊ ಉದೆಲಾ’ ಮ್ಹಜೆಂ ತಿಸ್ರೆಂ ರಾಷ್ಟ್ರ್ ಮಟ್ಟಾಚೆಂ ಕಥಾಸಂಕಲನ್, ಪುಣ್ ಹ್ಯಾ ಪುಸ್ತಕಾಂತ್ ಆಸ್ಚೊ ಏಕ್ ಊಣ್ ಮ್ಹಳ್ಯಾರ್, ಹಾಂತುಂ ರೋಮಿ ಲಿಪಿಂತ್ ಬರಯಿಲ್ಲಿ ಕಥಾ ನಾ. ತ್ಯೇ ಪಾಸತ್ ಪಾಟ್ಲ್ಯಾ ಕಾಂಯ್ ವರ್ಸಾಂ ಥಾವ್ನ್ ಅಪ್ಣಾನ್ ಜಾಯ್ತಿ ಮಿನತ್ ಕೆಲಿ ಪುಣ್ ಅಜೂನ್ ರಾಷ್ಟ್ರ್ ಮಟ್ಟಾಚಿ ಕಥಾ ಅಪ್ಣಾಕ್ ಲಾಭ್ಲಿನಾ. ಮ್ಹಣಾಲೊ.
