ಕವಿತಾकविताPoem
यादींचे सुवाळे
हऱ्येक मनीस जिवितापयणांत मुकार गेल्लेपरिंच आपल्या यादिंची शिंकळ सयत अपणासवें व्हरून वेता. तांतूं थोडे बरे, थोडे कोडू आनी थोडे मधूर यादी आसतात. आनी हांगासरयी असल्याच यादिंची शिंकळ कवयत्री नियाळता पूण ह्या यादिंक नियाळचेमुखांत्र नवी काणिंच उभी कर्ता.
ग्वादलूप डायस गोंयची नामणेची कवयत्री. नागरी तशेंच रोमी लिपिंत तिणें जायतो साहितीक वावर केला, लेखनां, काणयो, कविता, बाळ साहीत अशें वेवेगळ्या प्रकारांत तिणें अपली लिखणी झरयल्या. तिच्या वावराक सभार पुरसकार तिका लाभल्यात आनी मान तिका लाभला. ही कविता सयत कवितारसिकाच्या मनाक दाधोस करुंक सकची तांक आसची. बाकिचें तुजेर सोडतां.
यादींचे सुवाळे
गांवांतल्यो यादी
यादींतलो गांव
केन्नाय बसून
नियाळटां हांव
नेयदादीचीं शेतां
ईनासाची जोतां
मिरांदाच्या भाटांत
माडाचे चुडटेर
पाडेल्यांचीं कोंतां
काळजाच्या करंडांत
उस्तितां हांव
गांवांतल्यो यादी...
खोंपीतली जीण
कोंयसांवांचो शीण
आयमोरेच्या पारार
वोल्ता वयले गादयेर
पेद्रूचें रीण
जूर वाडचे पयलीं
फारीक करतां हांव
गांवांतल्यो यादी...
मातयेचीं कुळणीं
अळम्यांच्यो रोयणी
मोदीनीच्या गार्फाक
पयल्या चंवराचें तोर
काडपाची ताळणी
कुमसारा पयलीं
तुमकां सांगतां हांव
गांवांतल्यो यादी...
रेंदेराचो साद
घुमटाचो नाद
राजू-गाडयेक धरून
जाव-जावं मदीं
बांयचेर जाल्लो वाद
वाडचे पयलींच
थांबयतां हांव
गांवांतल्यो यादी...
दत्तूच्यो म्हशी
आंबे-पणसांच्यो राशी
घराची पारेत
दुरगांत बदलपी
देमांदाच्यो केशी
निकाला पयलींच
पालयतां हांव
गांवांतल्यो यादी...
मानशेचीं दारां
कुर्ल्ल्यांचीं पोरां
पोंवशेल्लीं सुंगटां
गोरयेक लावन
सारील्लीं वरां
घडयाळा विणेंच
मेजतां हांव
गांवांतल्यो यादी...
श्रुंगारीत पावसाळे
मोगाचे दुवाळे
जिणेच्या नगरांत
अजूनय बाकी
यादींचे सुवाळे
तुमचे बरीबर
मनयतां हांव
गांवांतल्यो यादी...
- ग्वादलुप डायस, गोयां [जनेर २०१८]
More in Poinnari
ಕವಿತಾकविताPoem Feb 2025
धाळ्यो [डो. झीटा लॊबो]
ಕವಿತಾकविताPoem Oct 2020
केन्नां पुणी उटतेल्यात... (- विल्मा बंटवाळ)
ಕವಿತಾकविताPoem Nov 2016
येका फो०डाचि कता
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.