ಯುವತಾರಾಂ

[ಕವಿತಾ] ಯುವತಾರಾಂ

ಕೊಂಕ್ಣಿ ಭಾಸೆಂತ್ ಬರಯ್ತೆಲೆ ಚಡ್ತಾವ್ ಜಾವ್ನ್ ವಾಚುನ್ ’ಕೊಂಕ್ಣಿ’ ಶಿಕ್‌ಲ್ಲೆ ಶಿವಾಯ್ ಇಸ್ಕೊಲಾಂನಿ ನ್ಹಯ್. ಆಯ್ಚಿ ಪರಿಗತ್ ಬದಲ್ಲ್ಯಾ, ಇಸ್ಕೊಲಾಂನಿ ಕೊಂಕ್ಣಿ ಶಿಕ್ಚೊ ಆವ್ಕಾಸ್ ಭುರ್ಗ್ಯಾಂಕ್ ಫಾವೊ ಜಾಲಾ ಪುಣ್ ಅಪ್ಲೇಸ್ತಕಿಂ ಕೊಂಕ್ಣಿ ಬರಂವ್ಕ್ ಶಿಕುನ್, ಸಾಹಿತ್ಯಾಚಿ ವೋಡ್ ಅನಿ ಅಭಿರುಚ್ ಆಸುನ್, ಅಪ್ಲೊ ಮಾಂಯ್‌ಗಾಂವ್ ಸೊಡ್ನ್ ಪರ್‍ಗಾಂವಾಕ್ ಪಾವ್ಲ್ಯಾರ್‌ಯೀ ಅಪ್ಲ್ಯಾ ಕಾಳ್ಜಾಂತ್ ಪೆಟ್ಚೊ ಕೊಂಕ್ಣಿ ಮೋಗ್ ಜಿವಾಳ್ ದವ್ರುಂಕ್ ಜಾಯ್ತೆ ಆಜ್‌ಕಾಲ್ ಸಮಾಜಿಕ್ ಜಾಳಿಜಾಗ್ಯಾಂನಿ ಅಪ್ಲಿಂ ಬರ್ಪಾಂ ವಾಂಟ್ತಾತ್, ಹಿಂ ಸರ್ವ್ ಬರ್‍ಪಾಂ ಅಪುರ್ಭಾಯೆಚಿಂ ಮ್ಹಣುಂಕ್ ಜಾಯ್ನಾ ತರ್‌ಯೀ, ಹೆಂ ಏಕ್ ಪಯ್ಲೆಂ ಮೇಟ್ ಮ್ಹಣ್ ಲೆಕುನ್, ಅಪ್ಲೆಂ ವಾಚಾಪ್ ವಿಸ್ತಾರಾಯ್ಲೆಂ ತರ್, ಅಸಲ್ಯಾಂಕ್ ಅಪ್ಲ್ಯಾ ಬರ್‍ಪಾಂಚೆರ್ ಸುಧ್ರಾಪ್ ಹಾಡಂವ್ಕ್ ಸಾಧ್ಯ್ ಆಸಾ, ಪುಣ್ ಮಿನತ್ ಕರ್ಚಿ ಭೋವ್ ಗರ್‍ಜೆಚಿ.

ಏಕ್ ಬರಪ್ ಧಾಡುನ್ ತೆಂ ಪರ್‍ಗಟ್ ಜಾತಚ್ಚ್ ’ಸಮಾಜಿಕ್ ಜಾಳಿಜಾಗ್ಯಾಂನಿ ’ಜಿಗ್ಗ್’ ಕರ್‍ನ್ ಪರ್ಜಳುನ್, ಉಪ್ರಾಂತ್ ಕೊನ್ಶಾಕ್ ಪಡ್ತೆಲ್ಯಾಂಚೆರ್ ಹಿ ಕವಿತಾ ವಿಣ್ಲ್ಯಾ. ಮಾನೆಸ್ತ್ ಎಲಿಯಾಸ್ ಜಿಣ್ಯೆ ಅನ್ಭೋಗ್ ಜೊಡ್‌ಲ್ಲೊ ಕೊಂಕ್ಣಿ ವಾಚ್ಪಿ, ಫುಡೆಂಯ್ ಹಾಚ್ಯಾ ಲಿಖ್ಣೆಥಾವ್ನ್ ಹಾಚ್ಯಾಕೀ ಅಪುರ್ಭಾಯೆಚಿಂ ಬರ್‍ಪಾಂ ಯೇಂವ್ದಿತ್ ಶಿವಾಯ್ ಕಾಜುಲ್ಯಾಪರಿಂ ಹೊಯ್ ಮಾಜ್ವೊನ್ ವಚಾನಾ ಜಾಂವ್ ಮ್ಹಳ್ಳೊಚ್ ಮ್ಹಜೊ ಭರ್‍ವಸೊ.

[ಬ್ರೊತೊ - 8] ಯುವತಾರಾಂ

ಯುವತಾರಾಂ ಕೊಂಕ್ಣೆಚ್ಯಾ ಕಲಾಂಗ್ಣಾಂತ್ಲಿಂ

ತಾಲೆಂತಾಂ ಸಭಾರ್ ಪರ್ಜಳ್ ಕಿರ್‍ಣಾಂಚೊ

ಫುದೆಂ ಸರುಂಕ್ ನವೆ ದಿಶೆಚೊ

ಉರ್ಜಿತ್ ಕರುಂಕ್ ಸಹಕಾರ್ ತುಮ್ಚೊ

ಆಯ್ಲಿಂ ಥೊಡಿಂ ಘೆವ್ನ್ ತಾಂಚಿ ಕಲಾ

ಏಕ್ ದೋನ್ ಸ್ಪರ್ಧೆ ಜಿಕುನ್

ಫೇಸ್‌ಬುಕ್ ವಾಟ್ಸ್‌ಆಪಾಚೆರ್ ಗಾಜವ್ನ್

ಮಾಯಾಗ್ ಜಾಲಿಂ ತ್ಯಾ ಕಲೆ ಥಾವ್ನ್

ಆನಿ ಥೊಡಿಂ ಆಯ್ಲಿಂ ಕಶ್ಟಾಂನಿ

ಭರುನ್ ವೊಮ್ತೊಂಚ್ಯಾ ವಿವಿಧ್ ತಾಲೆಂತಾಂನಿ

ಚಿರ್‍ಡುನ್ ಉಡಯ್ಲೆಂ ಸಹಕಲಾಕಾರಾಂನಿ

ಕಿತೆಂ ಸಾಂಗುಂ, ಪಡ್ಲಿಂ ಎಕಾ ಕೊನ್ಶಾಂನಿ

ಆಸಾತ್ ಸಭಾರ್ ದೆಣಿಂ, ಥೊಡ್ಯಾಂ ಥಂಯ್

ಸಹಾಯ್ ಕರಿನಾಂತ್ ತಾಂಕಾಂ ಕೊಣೀ

ಎಕ್ಲೊ ಚಡ್ತಾನಾ ವೋಡ್ನ್ ಘಾಲ್ತಾ ಅಪ್ಲೊಚ್ ಪೆಲೊ

ಹಿಚ್ ಆಮ್ಚಿ ಕಲಾಕಾರಾಂಚಿ ಜಿಣಿ

ಸಲ್ಹಾ ಸುಚನಾಂ ಚಡ್ ಗರ್ಜೆಚಿಂ

ನ್ಹಯ್ ತೆಂ ಎಕ್ಲ್ಯಾಕ್ ನಿರಾಶಿ ಕರ್ಚೆಂ

ಖೆಂಡಾಪ್ ಮೊಗಾಚೆಂ ತಿದ್ವುನ್ ಮುಕಾರುನ್ ವರ್ಚೆಂ

ವ್ಹಯ್! ಯುವತಾರಾಂ ಕೊಂಕ್ಣೆಚ್ಯಾ ಭವಿಶ್ಯಾಚಿಂ ಕಿರ್‍ಣಾಂ..

[- ಇಲಾಸ್ ಅಲಂಗಾರ್, (ಸಪ್ತೆಂಬರ್, 2017.]

ಇಲಾಸ್ ಅಲಂಗಾರ್: ಇಲಾಸ್ ಅಲಂಗಾರ್ ನಾಂವಾಖಾಲ್ ಆಯ್ಲೆವಾರ್ ಸಮಾಜಿಕ್ ಜಾಳಿಜಾಗ್ಯಾಂನಿ ಅಪ್ಲಿಂ ಬರ್ಪಾಂ ವಾಂಟ್ಚೊ ಮಾನೆಸ್ತ್ ಎಲಿಯಾಸ್, ಇಸ್ರೇಲಾಂತ್ ಅಪ್ಲೊ ದೀಸ್ಪಡ್ತೊ ಗ್ರಾಸ್ ಜೊಡ್ತಾ ತರ್‌ಯೀ, ಕಾಳ್ಜಾಂತ್ಲೊ ಕೊಂಕ್ಣಿ ಮೋಗ್ ಜಿವೊ ದವರ್ನ್ ಕೊಂಕ್ಣಿ ಸಾಹಿತ್ಯಾಕ್ ವಾಚ್ತಾ ಆನಿ ಕಾರ್ಯಾಳ್ ರಿತಿನ್ ಲಿಖ್ಣಿ ಝರಯ್ತಾ.