[खबर]: जेरिमेरिंत कोंकणी कवितासादर सर्त

मेलवीन रोड्रिगसाच्या मुखेल‌पणाखाल कविता ट्रसटान चलंवच्या कोंकणी कवितासादर सर्तेची मुंबयची तिस्री सर्त आशावादी प्रकाशनाच्या मुखेल‌पणाखाल, कोंकण तारां जेरिमेरी हांच्या सहयोगाखाल जेरिमेरिच्या इगर्जेच्या सभासालांत अक्तोबर ६ तारिकेच्या आयतारा दनपारां ३ थावन ५ पर‍यांत चल्ली.

कोंकण तारांचो मुखेली लियो फेर्नांडिसान कवितासादर सर्तेच्या वोरयणरांक तशेंच नविमुंबय थावन स्पर्धिकांक घेवन आयिल्ल्या कोंकाण संघटनाच्या मुखेलीक रिचार्ड डी’सोजाक स्वागत कर्तच बाय फ्ळोरा डी’सोजा कल्माडिच्या मुखेल‌पणाखाल भुर्गीं (१५ वर्सां सकयलीं) तशेंच युवजणां (१५ थावन ३० पऱ्यांतली) अशें दोन विभागांनी कवितासादर सर्त चलवन व्हेली.

भुर्ग्यांच्या वर्गांत पयलें तीन स्थान आपणायिल्लीं;

पयलें इनाम: स्वीडल रोड्रिगस (कविता: एका भात्या तुपें, कवी: बाब चा.फ्रा.दे’कोसता)

दुस्रें इनाम: अलिटा पिरेरा (कविता: अबोल्या तुजो रंग उजोगो, कवी: बाब चा.फ्रा.दे’कोसता)

तिस्रें इनाम: मेलिशा डी’सोजा (कविता: देव कसो दिसता, कवी: बाब प्रसन्न निड्डोडी)

व्हडांच्या विभागांत

पयलें इनाम: प्रिन्सिया फेर्नांडीस (कविता: मनशाचें मटन, कवी: बाब दीप‌राज गोंये)

दुस्रें इनाम: लेवीन फेर्नांदीस (कविता: न्हेस चेडवा आंग‌भर, कवी: बाब लियो फेर्नांडीस)

तिस्रें इनाम: रोयडन मिनेजस (कविता: म्हजी कोंकणी, कवी: उर्जिता भोबे गोंये)

वोरयणार बाय फिलोमेना सांफ्रान्सिसकोन आपले विचार पर्गटून भुर्ग्यांक उल्लास पाटवन, कोंकणी भासेथंय भुर्ग्यांची वोड अशीच मुकारून व्हरुंक व्हडिलांक उलो दिलो. दुस्रो वोरयणार वल्ली क्वाड्रसान इनामां जोडलेल्यांचीं नांवां वाचून सांगलीं.

[पयलें तशेंच दुस्रें इनाम जोडलेलीं, २०२० इस्वेच्या जनेरांत गोयांत चलुंक आसच्या अखील भारतीय हंताच्या स्पर्ध्यांत वांटो घेतलीं]

काऱ्यें निर्वाहण केल्ल्या लीयो फेर्नांडिसान धिन्वास पाटयले.

- भात्मी: