[खबर] जोन क्रास्ता; कोंकणेचो बळवंत फुडारी - एक शृद्दांजली.
जोन क्रास्ता - कोंकणेचो बळवंत फुडारी - एक शृद्दांजली.
"दोळे ते बिजतात दुकांनी
पूण पोल्यार हासो हाडतीत
तुज्या कर्तुवांचो उगडास येताना
मिरारोडांतलो कोंकणेचो भंवर तूं
कोंकणी काळजांचो कुंवर तूं"
देवाधीन जोन क्रास्ताक सहजल्लीं उत्रां हीं. जिण्ये तारूं, जीवन म्हळ्ळ्या दर्यांत आपलें पयण संपवन गडीक पाटीं पर्तनासतां दूसऱ्याच अगणीत देशांत प्रवेश जालें. ह्या दुखाळ घड्ये मरण पावल्ल्या आमचा भावा जोन क्रास्ताक सैंट जॊसेफ्स कोंकणी वेलफेर असोशियेशन मिरारोड तर्फेन शृद्दांजली भेटवंक तसेंंच ताच्या कुटमाक भुजावण पाटवंक हें म्हजें ल्हानशें प्रयतन.
मिरारोडांतलो एक बळवंत कोंकणी फुडारी आज आमचा मधें ना म्हण चिंतुंक कषट मार्तात. मानेसत जोन क्रास्ता - मिरारोडांतलो एक बळिषट आनी तांकिवंत कोंकणी संघटक. चोवदा वर्सां सां. जुजे कोंकणी वेलफेर एसोसियेशनाचो मुखेली जावन वावर दिला आनी लोकामोगाळ जाला. कोंकणी भासेच्या आनी कोंकणी संसक्रतिच्या उदर्गते खातीर विवीध कार्यीं ताणे मांडून हाडल्यांत. कोंकणे खातीर तो सदां तयार आनी जायना म्हण पाटीं सर्चो मानाय केदिंकच न्हय. सां. जुजे कोंकणी वेलफेर संघ मिरारोड हाचो प्रसतूत अध्यक्ष जावनासल्लो.
अग्रार फिर्गजेंत(पुनेकोल) ताचो जल्म १५ May १९६२- ंत जालो. लागसार्च्या ओमजूर फीर्गजेंत मूळ शिकप करून बर्या फुडारा खातीर मुंबय पावलो. सूर्वेर थावनंच स्व-उध्यमांत आसक्त आसल्ल्यान मुंबय येवन थोड्याच वर्सानीं आपलें स्वउध्यम स्थापीत करून यशस्वी जोडुंक पावलो. तितलेंच न्हय समाज सेवा कर्च्यांत , गर्जेवंताक पांवच्यांत ताचो उकल्लोलो हात.
कन्नडाचो माल्गडो कवी जी यस शिवरुद्रप्प आपले एका कवितेंत आशें म्हणता- "एक दीस आमचो जल्म तर, मरण आन्येक दीस, हाचे मधले ते दीस हजार, हेंच तें जीवन". व्हय तुज्या त्या ५९ वर्सांचा फळादीक संसारी पयणांत जीवनाचे विवीध हंत जावंक पुरो पूत, भाव, पती, बापूय आनी एक आप्त मित्र आमां सर्वांक, तुवें यशस्वी थरान सांबाळ्याय.
उदेल्लो सूर्यो तो बुडता, फूलल्लें फूल तें बावता, ऊबल्लें सुकणें तें देंवता, आनी जल्माल्लें संसारी जीवीत मर्णांत संप्ता. एपरिलाच्या १९ तारिकेर सांजेर सूर्यो आसतमचा वेळा सगळ्या मिरारोडांत आकलासाचो आकांत हाडून आयलो. चिंतुंक नातल्लें तें घडलें. तुज्या आल्पकालाच्या आस्वस्थे थावन उबजल्लें तें जीवन-मर्णा मधलें झूज संपले. देवाचा आपवण्याक तुंवे सय घालीय, आमचे थावन सासणाक भवतीक स्थितेन पयस गेलोय.
पाटल्या ब्रेसतारा सांजेच्या वेळा तुज्या भलायके विशीं खबर काडुंक dial केल्लें तें फोन मोव ताळ्यान .."हांव हुशार आसां, आतां दाक्तेर आसात फाल्यां उलव्यां" म्हळ्ळ्या जवाबेसवें स्तब्द जालें. तुका रूप रूप पळेवन तुज्या सहवासांत मेतेर जांवचें फालें आयलेंना...!
आशें कित्याक जालें? इतले वेग्गीं कसें घडलें? म्हळ्ळीं सवलां मतिंत उदेतात, पूण देवाच्या मांडावळेक सवाल कर्येत? मनशा जीवीत जल्म अनी मर्णा मधें भांदल्लो सांकव. जनन केदळा येत म्हण थोड्या दिसां आदीं तरी कळीत जाता, पूण मरण - आवचीत येता. आशेंच घडलें जोन क्रास्ता थंय, आनी ताचें कुटम दुकांत बुडलें. दुखेसत जाल्ल्या ताचा पतिणेक हेलेन बायेक, पुता डेल्हानाक आनी धूव जेनाक आमीं सर्व भुजावण पाटयतांव, आमच्या मागण्याचो आधार भासायतांव. भवतीक थरान जोन तुमच्ये थावन वेगळो जाला तरी स्पिरितान तुमचे संगी तो सदां आसतलो. सर्गार थावन तो देवाचीं विशेस बेसांवा मागोन धाडतलो म्हण आमीं पात्येतांव. ताणे सोडून गेल्लो जागो भर्ती करुंक कूर्पा आनी ससाय तोच रचणार फावो करूं म्हळ्ळें आमचें खाल्तें मागणें.
जीवितांत बरें कर्ता तो मेल्या उपरांतय आपलें नांव शास्वत दवर्ता. मिरारोडांतलो कोंकणी संस्थो आनी घडोन हाडल्लीं विवीध कोंकणी कार्यीं प्रत्येक जावन मोंती फेसताचो संभ्रम सदां आमच्ये थंय उगडासाचो घूर्त जातलो. तुज्या साद्या व्यक्तित्वान, सेवा मनोभावन, उपकारी मनान, आनी सर्वांक आदार्सुंचा उदारपणान तुजे आभिमानी संसार भर आसात तें, तुज्या मर्णाची खबर वाचून पत्रानीं, अंतर्जाळिंनी ताणी दिल्ली ती प्रतिक्रियाच हाका साक्स. एक उज्वाडाचो दिवो आज पालवला तरी तुज्ये संगी खर्चिल्ल्यो त्यो घड्यो आमच्या काळजांनी माज्वनातल्लीं पावलां जावंक पावल्यांत. तुज्यो यादी वोडारुकाच्या पाळांबरी आमच्ये मतिंत खंचल्यात.
जोन क्रास्ता एक विभिन्न कालेतिचो व्यक्ती, संपरदायाचो मोगी, वेळा काळाच्या रोदांक होंद्वून, मिरारोडांत कोंकणी संसक्रती आळवोंक आयती जाताना ती उरंवचें झूज मांडल्लो कोंकणेचो एक सुपुत्र. ताचीं जायतीं सपणां आधुरीं ऊर्ल्यांत तरी, ताच्या कोंकणेच्या सेवेंत आमचा काळजांनी अमर जाल्यांत. तुवें तुज्या फुडारपणार केल्लीं कोंकणेचीं नानातीं कामां कोंकणी लोका मधें सदां जिवीं ऊर्तलीं. जोन क्रास्ता अमर तूं ... आमच्या काळजांत, मनांत, संस्थ्यांत, फीर्गजेंत आनी समाजेंत सदां जिवो तूं आसतोलोय.
आदेवस तुका जोन क्रास्ता..!
सां. जुजे कोंकणी संघटनाच्या समेसत सांद्यां तर्फेन
- जेराल्ड डी’सोजा (कार्यदर्शी- सें. जॊसेफ्स कोंकणी वेलफेर असोशियेशन मिरारोड)
