[खबर] कोंकणी कादंबरिंचेर सुकण्यानदर - वेबिनार
११ एप्रिल २०२६: रोमी, कन्नड, नागरी आनी मलयाळं लिपिच्या ’कोंकणी कादंबरिंचेर एक सुकण्यानदर’ अंतरराषट्रीय वेबिनार ११ एपरील २०२६ वेर आशावादी प्रकाशनान मांडून हाडलें. मोनिका डेसा मथायस (डबलीन, अयरलेंड) हिची तीन लिपिंत पुसतकारुपार पर्गट जाल्ली नवालिका ’जिण्ये काणीक’ ह्याच संधर्भार ह्या वेबिनाराचें उग्तावपी मा.बा.चेतन लोबोन लोकार्पण केलें.
सांजेर ४ वोरांक सुरू जाल्ल्या ह्या वेबिनाराचें उग्तावण करून मा.बा.चेतनान "अपणान बरयिल्ली कादंबरी फकत एक, पूण कादंबरी बरवंक करुंक आसची तयाराय तशेंच मिनतेविशीं अपणाक कळीत आसा. आज समाजीक माध्यमाच्या काळांत लांब वाचपां वाचुंक लोकांक वेळ ना देकून कोंकणी कादंबरिंचो फुडार कसो आसत म्हळ्ळें कोणायचान नख्खें सांगोंक जायनां. पूण अध्ययनाच्या नद्रेन समग्र कोंकणी कादंबरिंचेर चडीत समजोणी घेंवच्या दिशेन हें वेबिनार एक महत्वाची सुर्वात करून दिता" म्हणालो.
मुखेल सयरो दो.पूर्णानंद चारी (अध्यक्ष - कोंकणी अकाडेमी गोंय) अपल्या उलवपांत "कोंकणी साहित्य सभार लिपिंनी आसा, आनी हें डिजिटल माध्यमांत एका समग्र वावरामुखांत्र संग्रह (Archieve) केलें तर, शैक्षणीक नद्रेन हें भोव महत्वाचें जावंक पावतेलें. ह्या दिशेन आशावादी प्रकाशन कांय वर्सां थावन वावर करून आसा, आनी त्या वावराक आमी हात मेळयलो तर ताचो फायदो कोंकणीक जातलो" म्हणालो.
उपरांत लारेन्स विनोद बारबोजान मोनिका डेसा मथायसाची तशेंच ’तिची काणीक’ पुसतकाची ओळोक करून दितच, मा.बा.चेतन लोबोन पुसतकाचें लोकार्पण कर्तच उलयिल्ल्या बाय मोनिकान "जिण्ये काणीक" अपल्या वावरांत दोळ्यां समोर जाल्ल्या घडितांक संएदनात्मक चिंतांक स्पंदन दिंवच्या इराद्यान बरयिल्ली. कन्नड लिपिंत बरयिल्ल्या ह्या नवालिकाक नागरी आनी रोमी लिपिंनी लिप्यंतरण केल्ल्या वल्ली क्वाड्रसाक तशेंच जोक्तीं प्रसतावनां बरयिल्ल्या शैलेंद्र मेहता (नागरी), विन्सी क्वाड्रस (रोमी) धिन्वासलें.
कन्नड लिपिंतले कादंबरिकार विश्याचेर नाम्नेचो कादंबरी सुनंद (मानेसत ज्यो डिमेल्लो, आसट्रेलिया) उलवन, अपणाक एक कादंबरी जांवचाक कोंकणी कादंबरिंनी कशें प्रेरीत केलें म्हणालो. कादंबरी आनी नवालिका मधें आसलो तफावताविश्याचेर उलवन वल्ली क्वाड्रसान मलयाळम लिपिच्या कोंकणिंत आयिल्ली कादंबरी फकत एक: आनंदीन २००८ इस्वेची मुंअय थावन हाडल्ली ’अयोध्य’ कादंबरी कोंकणी अकाडेमी गोंय हाणीं नागरी लिपिंत प्रकाशीत केल्ली माहेत दिली. शैलेंद्र मेहतान नागरी लिपिच्या कोंकणी कादंबरेंचेर उलवन "जागतीक वा समकाळीन हेर भासेंनी पर्गट जांवच्या कादंबरिंक वाचताना, कोंकणी कादंबरी खूब पाटीं आसात अशें भग्ता" म्हणालो. विन्सी क्वाड्रस आनी विल्ली गोयेस हाणीं रोमी लिपिंतल्यो कादंबरिंचेर उलवप करून म्हणाले "पुसतकारुपाचेर आज आमकां १९११ इस्वेंत पयली कादंबरी वाचुंक मेळता पूण रोमी लिपिंत कादंबरी हाच्याकी पयलेंच बरयल्यात पूण जोक्ते दाकले नासताना तो इतिहास फकत इतिहास जावन उरला".
डो.चंद्रलेख डिसोजान अपल्या उलवपांत "आमी समग्र कोंकणी साहित्याची जाण्वाय जोडची तर आमी लिपिचे दोरे उत्रोंक जाय, आमचे भंवारीं कितें जाता, हेर लिपिंनी, हेर भासेंनी कसलें साहित्य पर्गटोन येता म्हळ्ळें जाणां जावंक जाय" म्हणाली.
डो.एडवर्ड एल. नज्रेत अपल्या उलवपांत म्हणालो "समग्र कोंकणी कादंबरी वा साहित्याचें अध्ययन कर्ताना आमी फकत लिपी मात्र न्हय, बोलिंक सयत समजोंक एक वाट करून दिता. समग्र कोंकणी कादंबरिंचेर एकामेका समजोंक आशावादी प्रकाशनान आमकां एकामेका ओळोक करून दिंवचें काम केलां. हें वेबिनार एक सुर्वात मात्र, फुडें असलिंच वेबिनारां जांवची गर्ज आसा".
काणीक नेमाळ्याचो आधलो संपादक आवील रसकीन्हान "कन्नड लिपिच्या कोंकणी कादंबरी शेतांत वावर केल्ल्यांचो उल्लेक करून, कोंकणिंत सयत उत्तीम कादंबरी आसात आनी ह्या कादंबरिंचेर अध्ययन जालें तर कळता" म्हणालो.
डो.चारल्स लोबो अपल्या उलवपांत "कोंकणी कादंबरिंक, हेर समकाळीन कादंबरिंसवें तुलनात्मक केलें तर कोंकणी कादंबरी हेर भासेंतल्या कादंबरें समोर खंच्या पांवडार आसात म्हळ्ळें गमता" म्हणालो.
वल्ली क्वाड्रसान धिन्वास उलवपांत "नेमाळ्यांचे संपादक कादंबरी बरवपी आसचो काळ चडुणें संपला. कोंकणी कादंबरिची गर्ज आनी महत्व समजोंच्या नद्रेन हें महत्वाचें. अशें आसतां कोंकणी कादंबरिंचो फुडार एक सवाल जावन मात्र उभें जाता" म्हणालो.
लारेन्स वी. बरबोजान ह्या वेबिनाराचें सूत्र संचालन केलें.
