[खबार]: मैसूरांत अखिल भारतीय कोंकणि साहितिक उत्सव
मैसूर (फेब्रेर २८): कोंकणि क्रिश्चियन असॊसियॆशन (रि) मैसूर आनि अखिल भारतीय कोंकणि लॆखक संघटन (रि) मंग्ळुर सांगात्पणाखाल एका दिसाचें कोंक्णि साहितिक उत्सव कार्यें, हेच्च फेब्रेराच्या २८ तारिकेर (आय्तारा) विजयनगरांत्ल्या ’कोंकण भवन’ चेर चल्लें.
फामाद कोंक्णि बरव्पि, प्रसंग्कार मा।वि.जे.मिनॆज (मेल्कि होस्पॆट) हांचेथाव्न मिसाच्या बलिदानांत सुर्वात जाल्ल्या ह्या कार्याचें अध्यक्ष्पण विन्सेंट क्रास्तान चलव्न व्हेलें. उग्तावण कार्याचो अध्यक्ष जाव्न हाजर आस्ल्लो कोंक्णि क्रिश्चियन फेडेरॆशनाचो अध्यक्ष मानेस्त एड्विन डि’सॊजान, कार्याचें उग्तवण चलव्न, आज कोंक्णि भासेचि अस्मिताय उरंव्चि हर्येका कुट्माचि जवाभ्दारि आनि काय्दो जाव्नासा म्हणालो. अखिल भारतीय कोंक्णि लॆखकांच्या एक्ताराचो जेराल कार्यदर्शि डा।एड्वर्ड नज्रेतान स्वागत माग्लो. साहितिक उत्सवाचो अध्यक्ष मानेस्त विन्सेंट क्रास्तान आप्ल्या उत्रांनि ४१ वेवेग्ळ्या बोलिंनि सोभोन आस्च्या कोंक्णेच्या ग्रॆस्त्कायेक आमि सम्जुंक जाय, तशेंच कोंक्णि भासेच्या उदर्गतेखातिर सर्वांनि आमि मेळुन एक्वटिक रितिन वाव्र करुंक जाय म्हणुन उलो दिलो. कोंक्णि उत्सवाचो संचालक मानेस्त वल्लि वग्गन उप्कार आटय्लो.
कार्याच्या मुख्ल्या वांट्यांत ’साहितिलागिं संवाद’ कार्यें चल्लें, मा।वि.जे.मिनॆजसाचि सविस्तार वळोक, तशेंच ताच्या भुर्ग्यापणाले, युवपणाले याद करुन, ऎक समाजिक सुधारक जाव्न मा।वि.जे.मिनॆजसान केल्या वाव्राचि वळोक कर्न दीव्न मानेस्त वल्लि वग्गन तांचेसवें संवाद चलव्न वेलो. मा।वि.जे.मिनॆजसान आप्ल्या जिण्येच्या सुर्वातेर साहित्यान कसो ताच्या चिंत्पाचेर, बरि वाट धर्चेदिशेन कसलो प्रभाव घालो म्हणुन, वेवेग्ळ्या घडितांचो उडास काडुन विवर दिलो.
कार्याच्या मुख्ल्या वांट्यांत मुंबय, मैसूर, सुंटिकोप्प, मंग्ळुर अशें वेवेग्ळ्या प्रांत्याथाव्न आयिल्ल्या आट कविंसवें, कवि वल्लि क्वाड्रसाच्या अध्यक्ष्पणाखाल ’अखिल भारतीय कोंक्णि कविगॊश्टि’ चलव्न वेलि. उत्सवाच्या संचालकान; वल्लि वग्गन सर्वांचि व्हळोक करुन दितच्च, लीना ~आग्नेस डि’सॊज मैसूर, दैवसमाज कोंक्णेचि कवयत्रि निकिता शॆट, जियॊ आग्रार, जॊन सुंटिकोप्प, जि.एस.बि कोंकणि कवयत्रियां; शीला भंडार्कर, जैश्री गणपति श्यान्भाग, रिच्चि पिरॆर, नवीन पिरॆर आनि वल्लि क्वाड्रस हाणिं आपाप्लिं कविता वाच्लिं. कवि जेद्नां समाजिक स्पंदन कर्ता, आनि समाजेचें संवॆदन सम्जुन ति संवेदन आप्ल्या कवितेंनि व्हाळय्ता, तेद्नां मात्र तो समाजिक कवि जाता म्हणालो.
दोन्पारांच्या जेव्णाच्या कार्या उप्रांत चल्ल्ल्या सांस्कृतिक कार्यांत, सहकार्यदर्शि मानेस्तिण अपॊलिनाच्या मुखॆल्पणार भुर्ग्यांनि कोंक्णि मांडो आनि जानपद तशें हेर अपुर्भायेचिं पदां गाव्न, तशेंच नटन/नाचासवें पदां गाव्न लोकाक मनरंजन दिलें.
उप्रांत्ल्या कार्यांत ’प्राचीन कोंक्णि भारत’ विश्याचेर ऎक विचार्सातें डा।एड्वर्ड नज्रेत आनि डा।रॊकि वि. मिरांदा हाणिं चलव्न वेलें.
उप्रांत रिच्चि पाय्सान बरयिल्लो, जॊर्ज विलियं डि’सॊज मैसूर हाच्या निर्दॆशनाखाल ’गुळियो’ म्हळ्ळो नाटक सांद्यानि खेळव्न धाखय्लो.
सकाळिं थाव्न सांजेपर्यांत लग्बग साडे तिन्शिं कोंक्णि लोकांनि ह्या कार्यांत वांटो घेत्लो.
जॊन लियॊ रेबेल्लोन उप्कार आटय्लो.
