[खबर]: मुंबय थावन स भुर्गीं फैनलाक

(मुंबय, नवेंबर २५): कविता ट्रसटान वर्सान वरस चलंवच्या कोंकणी कवितासादर स्पर्ध्याक मुंबयांत आशावादी प्रकाशनासवें मुंबयच्या हेर फिर्गजेच्या संघटनांच्या मजतेन ओकटोबर ११ थावन नवेंबर १८ पऱ्यांत प्राथमीक सर्ती चलवन, तांतूं जिकोन आयिल्ल्यांनी नवेंबर २५ तारिकेर अंधेरिच्या ’आत्म दर्शनांत’ मुंबय हंताचें फैनल स्पर्धो आसलो, तांतूं वेवेगळ्या फिर्गजेचीं स भुर्गीं, जनेर १३ तारिकेर मंगळुरांत चलुंक आसच्या ’अखील भारतीय हंतार’ चल्च्या फैनलाक विंचून आयलीं;

भुर्गीं (१५ वर्सां प्राये सकयलीं)

सियोना सारंग‌पाणी (थाणे)

नियोमी मार्टीस (ओरलेम, मलाड)

रियोना ओलिवेरा (ओरलेम, मलाड)

लीनल सेरावो

युवजण (प्राय १५ थावन ३० पऱ्यांतलीं)

सोनल डी’सोज (कांदिवली)

रोयडन मिनेजस (जेरिमेरी)

रेचल डी’सोज (वसय)

सकाळीं धा वोरांचेर सुरू जाल्ल्या ह्या स्पर्ध्याचें उग्तावण करून मुखेल सयरो जावन आयिल्लो मंगळूर विश्व‌विध्यानिलयाच्या कोंकणी अध्ययन पीठचो संयोजक डा|जयवंत नायक अपल्या उलवपांत आमी कोंकणी भाशेक आमच्या जिवितांत चडीत प्रामुख्यता दिली तर कोंकणी भाद केदिंच आळवोन वेचिना’ म्हणून ताणें स्पर्धिकांक उल्लास पाठयले.

तशेंच गोयां थावन आयिल्ली कोंकणी कवयत्री बाय उर्जिता भोबेन अपल्या दोन उत्रांनी कोंकणी कवितेंक इतल्या मोगान आरायिल्ल्या समेसत कोंकणी भुर्ग्यांक उल्लास पाठयतच कोच्ची थावन आयिल्लो नामणेचो कवी बाब आर. एस. भासकर हाणें कविता जर संसाराच्या वेवेगळ्या प्रांत्याच्या लोकाक लागीं हाडुंक सक्ता तर कवितेची तांक म्हळ्यार कितें म्हणून समजुयेता म्हणालो. मानेसत हेनरी पांगळा हाणें कोंकणी पदां गायलीं.

कविता ट्रसटाचो स्थापक बाब मेलवीन रोड्रिगसान कवितासादर स्पर्ध्याच्यो जेराल रेग्रो आनी नेमांविशीं विवर दितच सोळा भुर्गीं तशेंच इक्रा युवजणांनी ह्या कवितासादर सर्तेंत वांटो घेतलो. वांटो घेतलेल्या समेसत स्पर्धिकांक तशेंच इनामां जोडलेल्यांक कोंकणी भाशा मंडळ महाराषट्रचो अध्यक्ष बाब जोन डी’सिलव आनी काऱ्यदर्शी बाब लारेन्स डी’सोज कमानी हाणीं इनामां आनी सर्टिफिकेट्यो वांटल्यो.

वेदिचेर आशावादी प्रकाशन तर्फेन बाब हिलरी डी’सिलवा उपसतीत आसलो. शारल डी’सोज कांदिवली हिणें हें काऱ्यें चलवन व्हेलें.