[खबार]: मुंबयांत कथापाठ आनि कोंकणी कविसम्मॆळ
(मुंबय, १४ फेब्रेर): प्रगतिशील कोंकणी बरय्णारांच्या एक्ताराच्या मुखॆल्पणाखाल कोंकणी मट्व्या काण्यांचेर अदॆसाचें अध्ययन कामासाळ, हेच्च फेब्रेराच्या १४ तारिकेर, मिरा रॊड फिर्गजेच्या सभासालांत मांडुन हाडलें.
कामासाळाचें उग्तावण करुन मा।जॊकिम रोड्रिगस म्हणालो; "म्हज्या मिसांवाक लागोन हांव संसाराच्या वेवेग्ळ्या दॆशांनि भंव्लां, वेवेग्ळ्यो भासो उलय्लां तर्यी, म्हज्या काळ्जांत्लि भास अजून कोंकणि जाव्नासा, आनि ति मोरापासोन म्हजि आवय्भास जाव्न उर्तलि"
स्वागत उत्रांनि, प्रगतिशील कोंकणी एक्ताराच्या मुंबय पंग्डाचो मुखेल संयॊजक जॊय पालड्का म्हणालो "बद्लोन येंव्च्या परिगतेंत आनि फकत त्या बद्लावणेक देखोन बोस्चेप्रास, एक्वटित जाव्न कोंकणी कामाचो इरादो तशेंच मिसांव हातिं घेत्लें तर, तसलो वाव्र कोंकणी साहित्याक उप्कार्तलो" म्हणालो.
प्रमुख उलव्पि जाव्न आयिल्ल्या डा।एड्वर्ड नज्रेताचि व्हळोक वल्लि क्वाड्रसान करुन दितच्च, डा।नज्रेतान ’हांव मट्व्यो कथा कश्यो बरय्तां’ म्हळ्ळ्या विश्याचेर सविस्तार रितिन आप्लि जाण्वाय आनि माहेत वांटुन घेत्लि.
उप्रांत नेरि नज्रेतान वल्लि क्वाड्रसाच्या काण्यांच्या वाव्राचि व्हळोक कर्न दिलि, आनि ’साहित्य म्हळ्यार कितें, मट्व्यो काण्यो तांत्रिक रितिन कश्यो आसुंक जाय, मट्व्या काण्यांचे वर्ग, प्रकार विश्यांत सविस्तार जाण्वाय आटाप्चें अध्ययन वल्लि क्वाड्रसान चलव्न वेलें. ह्या अध्ययना खातिर हिंदिंत्लि ’नमक क दरोगा (मुन्शि प्रॆम्चंदाचि मट्वि कथा)’, इंग्लिशांत्लि ’द बेट (~आंटोनि चेकॊफाचि मट्वि कथा)’ तशेंच कानडिचि ’कोनेय गिराकि (निरंजनाचि मट्वि कथा)’ विंच्ल्यो तशेंच ह्या काण्यांनि साहितिक तशेंच सामाजिक शेतांत उटयिल्ल्या चिंत्पाचेर आर्सो धर्लो.
त्यॆ उप्रांत्ल्या संवादांत अनंत अमेंबळ, जॊय पालड्का, ग्रेगोरि निड्डॊडि आनि हिलरि डि’सिल्वा हाणिं भाग घेत्लो. दिवो पत्राचो संपादक मानेस्त लारेन्स कुवेल्हो, आनि मानेस्तिण सुजाना कुवेल्हो, ह्यारिबॊय, ~आन्सि पालड्का, लारेन्स डि’सॊज कमानि, जॊन क्रास्तासवें लग्बग चाळीस जणांनि वांटो घेत्लो.
हिलरि डि’सिल्वान उप्कार बावुड्लो.
कविसम्मॆळ (कविसंवाद आनि जे.बि.सिक्वॆरा स्मारक कवितास्पर्धो)
कोंकणि भाशा मंडळ आनि प्रगतिशील कोंकणी बरय्णारांच्या एक्ताराच्या जॊड आयॊगांत दन्पारां उप्रांत्ल्या कार्यांत, डेलिशा डि’सॊजाच्या संगीतांत ’कोंकणी आम्चि मांय, कोंकणी आम्कां जाय’ म्हळ्ळें अपुर्भायेच्या पदान लेविन फेर्नांडिस आनि लिरॊन फेर्नांडिस हाणिं सुर्वात केलि.
कविसम्मॆळाचें उग्तावण करुन मा।मेल्विन डि’कुन्हान जशें रिले खेळांत सर्व सांद्यांनि त्या बॆटन एक्ल्या थाव्न दुस्र्याक पाशार करुंक आस्चेपरिंच आमि सय्त आम्च्या मुख्ल्या पिळ्गेक हि कोंकणी भास, जि आम्चि माय्भास पावंव्चि व्हड जवाभ्दारि आम्चि जाव्नासा, देकुन खंय्चर कोंकणी चटुवटिको जातात, ताका पुर्तो पाटिंबो दींव्क लोकांक उलो दिलो.
डेस्मंड सल्डान्हा आनि डेलिशा डि’सॊजा हाणिं अपुर्भायेचिं कोंकणी पदां गाय्लिं.
कों.भा.मं. अध्यक्ष मानेस्त जॊन डि’सिल्वान स्वागत मागोन जे.बि.सिक्वॆराचि सविस्तार वळोक कर्न दितेच्च, हिलरि डि’सिल्वान कविताशेतांत वल्लि क्वाड्रसान केल्ल्या वाव्राचि सविस्तार व्हळोक करुन दितेच्च, वल्लि क्वाड्रसान संवादित जांव्क आस्च्या कवि ~आन्सि पालड्काचि व्हळोक कर्न दिलि तशेंच ताचेलागिं सविस्तार रितिन संवाद चलव्न वेलो.
संवाद चलोन आस्चेपरिंच जे.बि.सिक्वॆरा स्मारक कवितास्पर्ध्यांत भाग घेत्ल्ल्या कविंनि आपाप्लिं कविता वाच्लिं. आनि ह्या स्पर्ध्यांत जिक्लेल्यांक इमामां वांट्लिं:
पय्लें इनाम (३००० नगद आनि बूक): नेरि नज्रेत ताकोडे
दुस्रें इनाम (२००० नगद आनि बूक): अशॊक डायस बैंदूर
तिस्रें इनाम (१००० नगद आनि बूक): प्रसन्न निड्डॊडि
भुज्वणेचें इनाम (बूक): लेविन फेर्नांडिस
’काव्य’, ’भास’, ’प्रस्तुति’ आनि ’सृजनशीलता’ म्हळ्ळ्या च्यार प्रकारांनि ह्या कवितास्पर्ध्याचि वोराव्णि केल्ल्या ~आन्सि पालड्का, वल्लि क्वाड्रस्सवें तिस्रो वोरय्णार जाव्नास्ल्ल्या अनंत अमेंबळान स्पर्ध्यांत आयिल्ल्या कवितेंचि वाखण्णि केलि.
मुखेल सय्रो जाव्न मंग्ळुर थाव्न आयिल्लो डा।एड्वर्ड नज्रेतान आप्ल्या उलव्पांत कोंकणी साहित्याचो वाव्र करुंक सूक्त संधर्भ आस्चे भॊव उणें जाल्ल्या ह्या काळार सय्त कोंकणी मॊगिंनि कोंकणी उर्भा केदिंच निंवानाये पळेंव्चि जवाभ्दारि घेंव्क जाय, आनि तो वाव्र कर्तेल्यांक जोक्तो पाटिंबो मेळाना, पुण खोडि चड मेळ्तात म्हणुन काळिज ल्हान कर्न बोस्च्याकी, चडित प्रॆरित जांव्च्यो वाटो सोधुंक जाय आनि हें काम तित्लें सलीस न्हय. जशें मंग्ळुरांत जाता तशेंच मुंबयांत सय्त कोंकणी वाव्र कर्तेल्यांनि एकामेका स्पंदन कर्न, एकामेका आधार दीव्न कोंक्णेच्या बरेपणाचो शेवोट दवर्न वाव्र केलो तर तसलो वाव्र कोंक्णेच्या उदर्गतेक उप्कार्ता म्हणालो.
जॊय पालड्कान हिं दोनीं कार्यिं चलव्न वेलिं.
