दो|तानाजी हळर्णेकराची एक याद

[खबर] दो|तानाजी हळर्णेकराची एक याद

नवेंबर (२१): अक्तोबर २० तारिकेर संसाराक सासणीक अधेवस मागून गेल्ल्या, वरिश्ट कोंकणी शिक्षक, वावराडी, मार्गदर्शी; केंद्र साहित्य अकाडेमिचो आधलो संचालक दो|तानाजी हळर्णेकर हांची याद काडून हांणीं कोंकणी भास, साहित्य, शिक्षण, संघटन अशें वेग-वेगळ्या शेतांनी दिल्ल्या अमोलीक देणगेची याद कर्चें काऱ्यें डिजिटल माध्यमाचेर २१ नवेंबर २०२० सन्वारा सांजेर ४:३० थावन ५:३० पऱ्यांत आशावादी प्रकाशनान मांडून हाडलें.

बाब शैलेंद्र मेहतान काऱ्याची सुर्वात करून समेसतांक येवकार मागून दो|तानाजी बाब कसो एक व्यक्ती मात्र न्हय, बगर एक संस्थो कसो आसलो म्हळ्ळेविशीं विवरून सांग्तच, दो|तानाजी हळर्णेकराक लागशिल्यान व्हळकल्ले तशेंच तांचेसवें सभार रितीन वावर करून आयिल्ल्यांनी तांचो अणभव विवरून सांगलो; बाब मुकेश थळी (गोंय), बाब बसती वामन शेणय (मंगळूर), बाब संजय हर्मळकर (गोंय), बाय उशा राणे (कारवार), बाब तुकाराम शेट (गोंय), बाब गोकुळदास प्रभू (केरळ), बाब प्रेमानंद फडते (गोंय) तशेंच बाब दामोदर मावजो (गोंय) हाणीं दो|तानाजिविशीं सविसतार रितीन अपलो अनभोव वांटलो. बाब प्रेमानंद फडतेन दो|तानाजी हांचो रेकोर्ड केल्लो आवाज सर्वांक आयकाशें कर्तच, भायी मावजो हाणीं दो|तानाजिचेर एक डोक्युमेंटरी कर्पाक जाय आनी तांच्या सविसतार वावराचो विवर कोंकणी समाजेन याद दवर्पाक जाय म्हणालो.

दो|आसटीन प्रभू (अमेरिका), दो|जयवंत नायक (मंगळूर), दो|तानाजिचो सुपुत्र बाब तुशार हळर्णेकर (गोंय), बाय अन्वेशा सिंगबल (गोंय), दो|पूर्णानंद च्यारी (गोंय), बाब ग्यानेश्वरी तरी (गोंय), बाय योगिता आनी गौरीश वेर्णेकर (गोंय), बाय अंजू साखर‌दांडे (गोंय), बाब गोपिनात कामत (मुंबय), बाय फिलोमेना सांफ्रान्सिसको (मुंबय), वल्ली क्वाड्रस (मुंबय), बाब हिलरी डी’सिलवा (मुंबय), बाब आर.एस.भासकर (कोचीन) तशेंच सभार कोंकणी बरवपी, वावराडी ह्या काऱ्यांत उपसतीत आसलीं.