[khobor] Konknni bhaxa monddoll, Gõyan monoilo 58vo vordhapon dis
Konknni bhaxa monddoll, gõyan monoilo 58vo vordhapon dis
ozunuy sahityokar aplea lekhnant bailechi chukichi ani apleak zai toxi protima dakhoitat. Hem jen'na na zatlem ten'nach bail ani dadlo forok na zatlo oxem jextth sahityik ani lokved sonxodhok zointi naik hamnni sanglem. Konknni bhaxa monddoll, gõyachea 58vea vordhapon dis suvallea vellar teo uloitaleo.
Aplo fuddar ghoddoupachea kallant konknni bhas ani somaza khatir tornnatte konknni bhaxa monddlla vorvim vaur kortat hi khoxyechi gozal oxem mot jextth sahityik ani lokved sonxodhok zointi naik hamnni sanglem.
Bhaxechi xokt tachi boli va xoili. Konknnichi girest oxi utraull asa. Ti xennpak laglea. Aple boli vixim nyungondd somaza bhitor nirmann zalea. Haka lagun kitleoxeoch boleo xennpak lagleat. Heo boleo rakhun douropa khatir ekttham-i yeun vichar korpak zai ani teo samballun douropak zai oxem tamnni sanglem.
Monddllan aplo 58vo vordhapon dis 30 sopttembor 2020 disa enolain madhyomantlean monoilo. Hea vellar mukhel soiri zointi naik hamnni vordhapon dis vixex smornnikechem lokarponn kelem. Hi smornnika monddllachea www.konkanibhashamandal.com sonketothollacher upolbdh asa. He kareavollichem monddllachea fesbuk panacher toxench yuttyub chenlacher thett prosaronn zalem.
Ximo-mero lagtat teo suvarthak. Nisuvarthiponnan kam' korpeank lagta ti fokot ekoch zat, ekoch dhorm' ani ekoch bhas ti mhonnlear konknni bhas oxem konknni bhaxa monddllachi odhyokx onvexa singball hamnni aplea yeukarachea uloupant mhonnlem. Kovidd kallant tornnatte ani jextthacho adar gheun monddllan xikxonnik toxench sahityik mollar aplo vaur chaluch dourola. Monddllan xikxonnik enolain sahity toyar kelem, enolain xobdokox kelo, pustokam omezhonar ghalim toxench onnkar, avazachem xastr, sonxodhon, potrokarita hea vixeant vebinar ghoddoun haddle oxi mahiti onvexa singball hamnni dili.
Konknni bhaxa monddoll purskrit seva purskar horixchondr nagvenkar, serafin kota purskrit felisyu kardoz yadstik xikxok purskar ddo. Prokax vojrikar, zuje piedad kvadrus yadstik karyokrto purskar sorgest niteanond naik, ligorio furtad ttrostt potrokarita purskar zuje salvador fernanddis, dinex monnerokar purskrit chondrokant kenni yadstik stombhlekhon purskar ulhas naik, dinex monnerokar priroskrit ramnath monnerokar yadstik onnkar purskar mannikoravo ram' probhu gaunnekar, so. Norsimh damodor naik yadstik sahity purskar enttni barkur, so. Rok barretto yadstik sahity purskar xoilendr mehta, konknni bhaxa monddoll sahity purskar mario minejhis, monohororai sordesai yadstik bal sahity purskar noina addarokar ani so. Podmoza mannikoravo gaunnekar yadstik proptr lekhon sortichem inam' dipraz satorddekar hamnni aplem monogot vyokt kelem. Kovidd-19 mohamarichi poristhiti sudarlea uprant manestank purskar bhettoupacho suvallo monddoll ghoddoun haddttole.
Rovindr kellekar goneanmondir, moddgamvchea videartheancho soim' pixim ami gitacher nach, fonddenchea xri. Kottmogall dada pongddacho ttrio, sauyverencho sokheahoricho koirasur gitacher nach, sorkari mohavidealoi, khanddollechea videartheamni sador kel'li vadeanchi zuglobondi, sorkari mohavidealoi, kepenchea videartheancho bhum' bhum' gitacher nach, moddgamvchea kola ekstomacho podor gitacher nach, yuva kannkonnokaracho ttrio ani videa bhuvn konknni xalla, moddgamvchea kuddiche ovyv gitacher nach he kareavollicho bhag axil'le.
Kareavollichem sutrosonchalon gopinath gamvs hamnni aplea sot'torintlea khaxele xoilin kelem. Monddllache sochivo ulhas gamvkar hamnni upkarachem uloup kelem.
