ದುಭಾಯ್, ದಸೆಂಬರ್ 21: ಫಾಮಾದ್ ಕೊಂಕಣಿ ಸಾಹಿತಿ, ವಾವ್ರಾಡಿ, ಕಾದಂಬರಿಕಾರ್, ಕಥಾಕಾರ್, ಕವಿ ವಲ್ಲಿ ಕ್ವಾಡ್ರಸಾಕ್ 2023 ಇಸ್ವೆಚೊ ಪ್ರತಿಶ್ಟಿತ್ ದಾಯ್ಜಿ ದುಭಾಯ್ ಸಾಹಿತಿಕ್ ಪುರಸ್ಕಾರಾಕ್ ವಿಂಚ್ಲಾ. ದಸೆಂಬರ್ 18 ತಾರಿಕೆರ್ ದುಭಯಾಂತ್ ಚಲ್ಲ್ಲ್ಯಾ ದಾಯ್ಜಿ ದುಭಾಯ್ ಜೆರಾಲ್ ಜಮಾತೆಚೆರ್ ವಿಂಚವ್ಣ್ ಜಾಲಿ.
ವಲ್ಲಿ ಕ್ವಾಡ್ರಸ್ (23 ಜುಲಾಯ್ 1967, ಅಜೆಕಾರ್) ಹಾಣೆಂ 1984 ಇಸ್ವೆಂತ್ ಅಪ್ಲಿ ಸಾಹಿತಿಕ್ ಸುರ್ವಾತ್ ಕೆಲ್ಲೊ ಏಕ್ ಬರವ್ಪಿ, ಸಂಪಾದಕ್, ಅಂಕಣ್ಕಾರ್, ವಿಮರ್ಶಕ್, ಭಾಶಾಂತರ್/ಲಿಪಿಯಂತರ್ಕಾರ್ ತಶೆಂಚ್ ಪ್ರಾಧ್ಯಾಪಕ್. 250 ವಯ್ರ್ ಮೊಟ್ವ್ಯೊ ಕಥಾ, 350 ವಯ್ರ್ ಕವಿತಾ, 6 ಕಾದಂಬರಿ, 250 ವಯ್ರ್ ಲೇಖನಾಂ, 8 ನಾಟ್ಕುಳೆ ಬರಯಿಲ್ಲ್ಯಾ ಹಾಚಿಂ ಬರ್ಪಾಂ ಇಂಗ್ಲಿಶ್, ಕನ್ನಡ, ಹಿಂದಿ, ಮರಾಠಿ ಆನಿ ತುಳು ಭಾಶೆಂನಿ ತರ್ಜಣ್ ಜಾವ್ನ್ ವೆವೆಗ್ಳ್ಯಾ ನೇಮಾಳ್ಯಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಪರ್ಗಟ್ಲ್ಯಾಂತ್. ಅಪ್ಲ್ಯಾ ಆಶಾವಾದಿ ಪ್ರಕಾಶನ್ ಥಾವ್ನ್ ಪನ್ನಾಸ್ ಪುಸ್ತಕಾಂ (ಪ್ರಿಂಟ್), 40 ಡಿಜಿಟಲ್ ಇ-ಪುಸ್ತಕಾಂ, ಆನಿ 130 ಮೊಟ್ವ್ಯೊ ಕಥಾ ಆಟಾಪ್ಚಿಂ ಪಾಂಚ್ ಆಡಿಯೊ ಪುಸ್ತಕಾಂ ಯೂ-ಟ್ಯೂಬ್ ಚ್ಯನಲಾಚೆರ್ ಪ್ರಸಾರ್ ಕೆಲ್ಯಾಂತ್. ಗೊಂಯ್ಚ್ಯಾ ಕೊಂಕಣ್ಗಾರ್ ಪ್ರಕಾಶನ್ ಥಾವ್ನ್ ಲಿಪಿಯಂತರ್, ಸಂಪಾದನ್ ಕೆಲ್ಲಿಂ ಪಾಂಚ್ ಪುಸ್ತಕಾಂ ಪರ್ಗಟ್ಲ್ಯಾಂತ್. ರಾಶ್ಟ್ರೀಯ್ ಮಟ್ಟಾಚ್ಯಾ ಕೊಂಕಣಿ ಮೊಟ್ವ್ಯಾ ಕಥೆಂಚಿಂ ತೀನ್ ಸಂಕಲನಾಂ ಸಂಪಾದನ್ ಕರುನ್ ಪರ್ಗಟ್ಲ್ಯಾಂತ್; 20ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕಥಾ (2006), ಸುರ್ಯೊ ಉದೆತಾ (2019), ಸುರ್ಯೊ ಉದೆಲಾ (2022).
ದಾಯ್ಜ್.ಕೊಮ್ (2003-2011), ಪಯ್ಣಾರಿ.ಕೊಮ್ (2015 ಥಾವ್ನ್) ಸಾಹಿತಿಕ್ ಜಾಳಿಜಾಗ್ಯಾಚೊ ತಶೆಂಚ್ ಪಯ್ಣಾರಿ ಸಾಹಿತಿಕ್ ಡಿಜಿಟಲ್ ಜರ್ನಲಾಚೊ, ಕೊಂಕಣ್ಗಾರ್ ಪ್ರಕಾಶನ್ ಗೊಂಯ್ಚೊ ಸಂಪಾದಕ್ ಜಾವ್ನ್ ವಾವ್ರ್ ಕರುನ್ ಆಸ್ಚ್ಯಾ ವಲ್ಲಿ ಕ್ವಾಡ್ರಸಾಕ್ ದಿವೊ ಸಾಹಿತಿಕ್ ಪುರಸ್ಕಾರ್ (2003), ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆ ಪುರಸ್ಕಾರ್ ತೀನ್ ಪಾವ್ಟಿಂ ಮೆಳ್ಳ್ಯಾತ್; ಕವಿತಾಪಾಠ್ (2005), ದರ್ಭಾರಾಂತ್ಲಿ ಪಿಂರ್ಗೊಣ್ (2006), ಬಂದ್ (2018). ತಶೆಂಚ್ ಮಥಾಯಸ್ ಕುಟ್ಮಾಚೊ ಕವಿತಾ ಟ್ರಸ್ಟಾಚೊ ಪುರಸ್ಕಾರ್ (2019) ಲಾಭ್ಲಾ. ಮಿನಿಸ್ಟ್ರಿ ಆಫ್ ಕಲ್ಚರ್ ಥಾವ್ನ್ 2021-23 ಚೊ ಸೀನಿಯರ್ ಫೆಲೋಶಿಪ್ (ಸಾಹಿತ್ಯ್) ಲಾಭ್ಲಾ.
ಸಾಹಿತಿಕ್ ವಾವ್ರಾಶಿವಾಯ್ 50 ವಯ್ರ್ ರಾಶ್ಟ್ರೀಯ್/ಅಂತರ್ರಾಶ್ಟ್ರೀಯ್ ಕಾಮಾಸಾಳಾಂ, ವೆಬಿನಾರಾಂ ಗೊಂಯ್ ವಿಶ್ವ್ವಿಧ್ಯಾಲಯ್ ಆನಿ ಮಂಗ್ಳುರ್ ವಿಶ್ವ್ವಿಧ್ಯಾಲಯಾಂನಿ ತಶೆಂಚ್ ಗೊಂಯ್, ಮಂಗ್ಳುರ್ಚ್ಯಾ ಸಭಾರ್ ಕೊಲೆಜಿಂನಿ ಚಲಯ್ಲ್ಯಾಂತ್. ಮ್ಯಾನೇಜ್ಮೆಂಟಾಂತ್ ಪದ್ಯುತ್ತರ್ (MBA) ಶಿಕುನ್ ಪ್ರಸ್ತುತ್ ಶ್ರೀನಿವಾಸ್ ಯುನಿವರ್ಸಿಟಿ ಕೋಲೆಜ್ ಆಫ್ ಇಂಜಿನಿಯರಿಂಗ್ ಎಂಡ್ ಟೆಕ್ನೋಲೊಜೀಸ್ ಹಾಂಗಾಸರ್ ಪ್ರಾಧ್ಯಾಪಕ್ ಜಾವ್ನಾಸಾ ತಶೆಂಚ್ ಪಿ.ಎಚ್.ಡಿ.ಚಿ ತಯಾರಾಯ್ ಕರುನ್ ಆಸಾ. ಓವೇಶನ್ ವರ್ಕ್ಪ್ಲೇಸ್ ಸರ್ವಿಸಸ್ ಮ್ಹಳ್ಳ್ಯಾ ಎಕಾ ಅಮೆರಿಕಾಚ್ಯಾ ಬಹು-ರಾಶ್ಟ್ರೀಯ್ ಕಂಪ್ಣೆಚೊ ಗ್ಲೋಬಲ್ ಡೆಲಿವರಿ ಆನಿ ಕಂಪ್ಲಾಯನ್ಸ್ ಹೆಡ್ ಜಾವ್ನ್ ವಾವ್ರ್ ಕರುನ್ ಆಸಾ.
ಕೊಂಕ್ಣೆಂತ್ಲೊ ಭೋವ್ ಪ್ರತಿಶ್ಟಿತ್ ’ದಾಯ್ಜಿ ದುಭಾಯ್ ಸಾಹಿತಿಕ್ ಪುರಸ್ಕಾರ್’ 2023 ಇಸ್ವೆಚ್ಯಾ ಎಪ್ರಿಲಾಚ್ಯಾ 30 ತಾರಿಕೆರ್ ದುಭಾಯಾಂತ್ಲ್ಯಾ ’ಎಮಿರೇಟ್ಸ್ ಆಡಿಟೋರಿಯಮ್’ ಹಾಂಗಾಸರ್ ಚಲುಂಕ್ ಆಸ್ಚ್ಯಾ ದಾಯ್ಜಿ ದುಭಾಯ್ ವರ್ಸುಗೆಚ್ಯಾ ಕಾರ್ಯಾವೆಳಾರ್ ಲಾಭ್ತಲೊ. ಪುರಸ್ಕಾರ್ ರು.75000, ಯಾದಿಸ್ತಿಕಾ ತಶೆಂಚ್ ಮಾನ್ಪತ್ರ್ ಆಟಾಪ್ತಾ. ಪಾಟ್ಲ್ಯಾ ದೋನ್ ದಾಕಡ್ಯಾಂ ಥಾವ್ನ್ ದಾಯ್ಜಿ ದುಭಾಯ್ ಸಂಘಟನ್ ಕೊಂಕಣಿ ಸಾಹಿತಿಂಕ್ ಪಾಟಿಂಬೊ/ಪ್ರೋತ್ಸಾಹ್ ದಿಂವ್ಚೆಂ ಮಿಸಾಂವ್ ಚಲವ್ನ್ ಆಯ್ಲಾಂ.
