ಆಂಗಣ್ ಹೆಂ ಜಿವಿತ್ (-ಕ್ಲೈವ್ ಸೋಜ್, ಬೊಳಿಯೆ)

[ಕವಿತಾ] ಆಂಗಣ್ ಹೆಂ ಜಿವಿತ್ (-ಕ್ಲೈವ್ ಸೋಜ್, ಬೊಳಿಯೆ)

ಎಕಾ ಹಿಂದಿ ಕವಿತೆಚಿ ವೋಳ್ ಯಾದಿಕ್ ಯೆತಾ;

ಹಾಂಗಾಸರ್ ಜಿವಿತ್, ನಾಚ್ ಆನಿ ಆಂಗಣ್ ಕವಿತಾ ಮನಶಾಕ್ ಸಂತೊಸ್, ಸಮಧಾನ್ ಕಶೆಂ ಸೊಧ್ಚೆಂ ಮ್ಹಳ್ಳೆವಿಶಿಂ ಸಾಂಗತಾ. ಮನೀಸ್ ಭವ್ತಿಕ್ ಸಂಸಾರಾಂತ್ ಸರ್ವ್ ಸಂಗ್ತೆಂಕ್ ಪಳೆಂವ್ಕ್, ಆಪ್ಡುಂಕ್ ಆಶೆತಾ; ಮ್ಹಳ್ಯಾರ್ ಜ್ಯೆ ಕಿತೆಂ ದಿಸ್ತಾ ತೆಂಚ್ ತೊ ಮಾಂದ್ತಾ ಪುಣ್ ಸಂತೊಸ್, ಸಮಧಾನ್ ಕೊಣೆಂಚ್ ಆಪಡುಂಕ್ ವಾ ಪಳೆಂವ್ಕ್ ಸಕಾನಾತ್ಲೆಂ. ಅಪುರ್ಭಾಯೆಚೆಂ ಚಿಂತಪ್ ಹ್ಯ ಕವಿತೆಂತ್ ವ್ಹಾಳಂವ್ಚೆಂ ದಿಸುನ್ ಯೆತ.

ಬಾಬ್ ಕ್ಲೈವ್ ಸೋಜ್ ಬೊಳಿಯೆ, ಏಕ್ ಯುವಕವಿ. ಆಯ್ಲೆವಾರ್ ಕಾಚ್ಯಾ ಕವಿತೆಂನಿ ಪಳೆಂವ್ಕ್ ಮೆಳ್ಚಿ ಗುಂಡಾಯ್ ದಾಧೊಸ್ಕಾಯೆಚಿ. ’ಮಯ್ನ್ಯಾಚಿಂ ಕವಿತಾ’ ಖರಿಂಚ್ ಜಾವ್ನ್ ಹೆರಾಂಕ್ ಪ್ರೇರಿತ್ ಕರುಂಕ್ ಸಕತಾತ್ ಮ್ಹಣಚ್ಯಾಕ್ ಹಿ ಕವಿತಾ ಗವಾಯ್ ದೀತ್. ಬಾಕಿಚೆಂ ತುಜೆರ್ ಸೊಡತಾಂ.

[ಕವಿತಾ] ಆಂಗಣ್ ಹೆಂ ಜಿವಿತ್ (-ಕ್ಲೈವ್ ಸೋಜ್, ಬೊಳಿಯೆ)

ಆಂಗಣ್ ಹೆಂ ಜಿವಿತ್

ಆಂಗಣ್ ತುಜೆಂ ಮಾತ್ರ್ ನ್ಹಯ್

ಸಗ್ಳಿಂ ವಾಂಕ್ಡಿಂಚ್ ರೆ ಪಾಪಿಯಾ..!!

ಲೋಕ್ ತುಜೆರ್ ಮಾತ್ರ್ ಹಾಸ್ತಾ,

ತುಂವೆಂ ಸತ್ ಸಾಂಗ್ಲೆಂಯ್..!!

ಸಗ್ಳಿಂ ಶಿಕೊನ್ ಆಸಾತ್,

ನಾಚೊಂಕ್ ಕೊಣಾಯ್ಕಿ ಕಳನಾ..!!

ರಡ್ಚಿಂ ಪಾಂಯ್ಜಾಣಾಂ ಕಾಡ್ನ್ ದವರ್,

ಆಂಗಣ್ ಮಾತ್ರ್ ಸೊಡಿನಾಕಾ..!!

ವಾಳ್ಚಾ ವಾರ್ಯಚಿ ಪರ್ವ ನಾಸ್ತಾಂ,

ಉಡ್ಕಾಣಾಂ ಮಾರ್ತಾತ್

ಪಿಸಂತುರ್ ಲ್ಹಾರಾಂ;

ನಾ ಸುಶೆಗ್ ದರ್ಯಾಕ್,

ನಾ ತಡಿಕ್‌ರೆ ಮನ್ಶ್ಯಾ...!!

ಲೋಕ್ ಚಾಕ್ತಾ ಸೊಭಯ್,

ದಿವುನ್ ನೀಬ್ ಬುಡ್ಚಾ ಸುರ್ಯಾಚೆಂ..!!

ತುಂಯ್ ನಾಚಾತ್ ರಾವ್ ,

ಶಹಬಾಸ್ಕಿ ನಾಕಾ ಕೊಣಾಯ್ಚಿ

ಆಂಗಣ್ ನೈಂ ತರ್, ನಾಚ್ ತರಿ ಸಾರ್ಕೊ ಜಾಯ್ತ್..!!

ಫಾತರ್, ಖಿಳೆ ಆಸ್ಚಿಂ

ಆಂಗ್ಣಾಂಚ್ ಚಡ್‌ರೆ ಭಾವಾ ..!!

'ಸಗ್ಳೆಂ ಬರೆಂ ಆಸಾ'

ಹೆಂಚ್ಚ್ ಘಾಜ್ತಾತ್ ತಾಂಚಿಂ ಪಾಂಯ್ಜಾಣಾಂ..

ಹುಲೊಪಾಂತ್ ನಾಚ್ತೆಲ್ಯಾಂಚಿ,

ದೂಖ್ ನಿಯಾಳ್ನ್..!

ತಾಳಿಯಾಂಚಾ ಆವಾಜಾಕ್ ಭುಲ್ಲೊಯ್ ತರ್,

ಥುತ್ಕಾರ್ಚಿಂ ಉತ್ರಾಂ ಆಯ್ಕೊಂವ್ಚಿಂ ನಾಂತ್..!!

ಮಧೆಂಚ್ಚ್ ಆಂಗಣ್ ಸೊಡುನ್ ವೆಶಿ

'ಓಹ್, ಛೆ' ಮ್ಹಣಾತ್

ವಿಸ್ರೊನ್ ಸೊಡಿತ್ ರೆ ಸಾಯ್ಬಾ...!!

ತುಜಾ ಲಾಗ್ಶಿಲ್ಯಾಂಚೆಂ ದೂಖ್ ಚಡಾತ್,

ನಾಚೊಂಕ್ ಕಷ್ಟ್ ಜಾಯ್ತ್..!!

ತುಜಾ, ಆಪ್ಲ್ಯಾ ಖಾತಿರ್ ತರಿ ನಾಚ್

ತಾಣೆಂ; ಪುರೊ ಮ್ಹಣ್ತಾ ಪರ್ಯಂತ್..!!

- ಕ್ಲೈವ್ ಸೋಜ್, ಬೊಳಿಯೆ. [ಫೆಬ್ರೆರ್, 2020]