ಆಪಾಯಾಚ್ಯೊ ಘಾಂಟಿ (- ಫೆಲ್ಸಿ ಲೋಬೊ, ದೆರೆಬಯ್ಲ್)

ಉಗ್ತ್ಯಾ ಗಾದ್ಯಾಂತ್ ಯ್

ಮೊಡಿಂ ಪಡ್ಲ್ಯಾಂತ್

ಜುಲುಮೆಚೆಂ ಖಾಣ್ ಜಾವ್ನ್

ಕಿಸ್ಪರ್ಲೆಲೆಂ ಫುಲ್ ಜಾವ್ನ್

ಪಿಡೆಸ್ತಾಂಚ್ಯಾ ವಾವ್ರಾ ಥಳಾರ್ ಯ್

ಉಸ್ವಾಸ್ ಭಾಂದ್ಲಾ

ಗಳೊ ಚಿರ್ಡುನ್

ಕಾಳ್ಕೆ ರಾತಿ ಕುಡಿ ಶಿಂಧುನ್

ಮನ್ಶ್ಯಾಪಣಾಕ್ ಸಾಂಡುನ್

ಪಯ್ಣಾ ವಾಟೆ ರಸ್ತ್ಯಾನಿಂಯ್

ಮಾಸೂಮ್ ಜಿವಾಂಕ್ ತಾಸಾಯ್ಲಾಂ

ಲೊಂಕ್ಡಾ ಆಯ್ದಾಂ ವಿಂಚುನ್

ರಾನ್ವಟಿ ಮನ್ಶ್ಯಾ ರುಪಾಂ ಆರಾವ್ನ್

ಸ್ವತಾಕ್ ವಿಸ್ರೊನ್

ದೆವಾಳ್ ಮಂದಿರಾಂ ಭಿತರ್ ಯ್

ಪಿಂಪ್ರ್ಯಾಂಕ್ ಗ್ರಾಸಿಲಾಂ

ಚರ್ಬೆಲ್ಲ್ಯಾ ಕುಡಿಂಚಿ ತೃಷಾ ಥಾಂಭಂವ್ಕ್

ಕ್ರೂರ್ ಮನ್ಜಾತ್ ಜಾವುನ್

ದೆವಾಕ್ ಚ್ ವಿಸ್ರೊನ್

ವಾಟ್ಸುರ್ಯಾಂಕ್ ಯ್ ತಾಂಡುನ್ ವೆಲಾಂ

ಗುಡ್ಯಾ ಮೊಲ್ಯಾಂನಿ

ಮೊಡಿಂ ಲಿಪ್ಲ್ಯಾಂತ್

ಪ್ರಭಾವ್, ಅಧಿಕಾರಾಚ್ಯಾ ಧಯ್ರಾನ್

ನೀತ್, ಶಿಕ್ಷೆಚೆಂ ಮೋಲ್ ವಿಸ್ರೊನ್

ಕುಟ್ಮಾಂತ್ ಧೊತಿ ನಿಬಾನ್ ಯ್

ಆಂಗಾರ್ ದಾಗ್ ಝಳ್ಕಾಲ್ಯಾತ್

ಕುಡಿರ್ ಮತಿನಿಂ ಮಾವ್ ಉರ್ಲ್ಯಾ

ಜುಲುಮೆಕ್ ಹೆಡಾವ್ನ್

ರಾಕ್ಸಾ ಪ್ರವೃತ್ತೆಕ್ ಸಾಕ್ಸ್ ಜಾವ್ನ್

ಘರಾಂನಿ ಘುಸ್ಚೆ ವಾವ್ರಾಡಿಯ್

ಎಕ್ಸುರೆಕ್ ದಾವ್ಲಿ ಮಾರ್ತಾತ್

ಫ್ರಿಜ್ ಟಿವಿ ಸಾರ್ಕೆಂ ಕರ್ಚ್ಯಾ ನಿಬಾಕ್

ಆಪಾಯಾಚ್ಯೊ ಘಾಂಟಿ ವಾಜ್ತಾತ್

ಪಾಚಾರ್ನ್ ತಿ ಅಜುನ್ ಅಸುರಕ್ಷಿತ್ ಮ್ಹಣ್.

- ಫೆಲ್ಸಿ ಲೋಬೊ, ದೆರೆಬಯ್ಲ್   [ಫೆಬ್ರೆರ್, 2025]

ಫೆಲ್ಸಿ ಲೋಬೊ, ದೆರೆಬಯ್ಲ್: ಏಕ್ ಶಿಕ್ಷಕಿ ಜಾವ್ನ್ ವಾವ್ರ್ ಕರ್ಚಿ ಹಿ ಕವಿತಾ, ಲೇಕನಾಂ, ಸಮೀಕ್ಶಾ ಬರಯ್ತಾ. ಕವಿಸಮ್ಮೇಳನಾಂನಿ ಕವಿತಾ ಸಾದರ್ ಕೆಲ್ಯಾತ್. ಸಮಾಜಿಕ್ ಜಾಗರಣ್ ದಿಂವ್ಚಿ ಶ್ಯಾಥಿ ಆಸ್ಚಿ ಬಾಯ್ ಫೆಲ್ಸಿ ಲೋಬೊ ದೆರೆಬಯ್ಲ್ ಅಸ್ತುರಿ ಸಂವೇದನಾಂಕ್ ಲಾಗುನ್ ವ್ಹಳ್ಕಿಚಿ ಜಾಲ್ಯಾ. ’ಪಾಲ್ವಾ ಪೊಂತ್’ ಹಿಚ್ಯಾ ಕವಿತೆಂಚೊ ಜಮೊ ಪರ್ಗಟ್ಲಾ.