ಕವಿತಾकविताPoem
ದುಕೊಳ್ ಪಡ್ಲ್ಲೊ ಗಾಂವ್ (- ಫೆಲ್ಸಿ ಲೋಬೊ, ದೆರೆಬಯ್ಲ್)
[ಕವಿತಾ] ದುಕೊಳ್ ಪಡ್ಲ್ಲೊ ಗಾಂವ್ (- ಫೆಲ್ಸಿ ಲೋಬೊ, ದೆರೆಬಯ್ಲ್)
ಎಕಾ ಸಮಾಜೆಂತ್ ಬರೆಂ ಆನಿ ವಾಯ್ಟ್ ಘಡಾನಾಸ್ತಾಂ ರಾವಾನಾ ಜಾಂವ್ ತಿ ಸಮಾಜ್ ಕಿತ್ಲಿಯ್ ಬರಿ ಆಸುಂ. ಪುಣ್ ಸಮಾಜೆಂತ್ ಘಡ್ಚೆಂ ಸರ್ವ್ ವಾಯ್ಟ್ ವಾ ಖೊಟೆಂ ಫಕತ್ ವಾಯ್ಟ್/ಖೊಟ್ಯಾಂಚಿ ಕರ್ನಿ ನ್ಹಯ್. ಬಗಾರ್ ತಾಂಚೊ ವಿರೋದ್ ಕರಿನಾಸ್ತಾಂ ವ ಆವಾಜ್ ಉಟಯ್ನಾಸ್ತಾಂ ರಾವ್ತೆಲ್ಯಾ ಬರ್ಯಾಂಚಿ ಸಯ್ತ್. ದೆಕುನ್ ಆಜ್ ಸಂಸಾರ್ ಚಡಿತ್ ಮಾಪಾನ್ ಖೊಟೆಂಪಣಾನ್ ಭರ್ಲಾ. ಮನ್ಶಾಪಣಾಚೆರ್ ಪಡ್ಲಲೊ ದುಕೊಳ್ ಹ್ಯಾ ಕವಿತೆಂತ್ ಭೋವ್ ನಾಜೂಕ್ ರಿತಿನ್ ಪಿಂತ್ರಾವ್ಣಿ ಕೆಲ್ಲೆಂ ದಿಸುನ್ ಯೆತಾ.
ಹಿ ಕವಿತಾ ಪಯ್ಲ್ಯಾ ಪಂಗ್ತೆಥಾವ್ನ್ ಅಖೇರಿಚ್ಯಾ ಪಂಘ್ತೆಪರ್ಯಾಂತ್ ತಿಣೆಂ ಸಮಾಜಿಕ್, ಆರ್ಥಿಕ್, ರಾಜಕೀಯ್ ವೆವಸ್ತೆಚೆರ್ ಉಜ್ವಾಡ್ ಫಾಂಕಂವ್ಕ್ ಗೆಲ್ಲೆಪರಿಂಚ್ ಮನ್ಶಾಭಿತರ್ ಆಸ್ಚೊ ಕುಡ್ಡೊ ಭಾವಾರ್ಥ್, ಚಿಂತಪ್ ನಾಸ್ಚಿ ಮತ್, ಮಾಯಾಮೊಗ್ ನಾಸ್ಚೆಂ ಕಾಳಿಜ್ ತಶೆಂಚ್ ವಯ್ಚಾರಿಕತಾ ನಾತ್ಲ್ಲಿ ಜಿಣಿ ಪಿಂತ್ರಾಯ್ತಾ ತಿ ಕವಿತೆಚೆಂ ಸಂವೇದನ್ ಆಸ್ಚ್ಯಾಂಕ್ ಗಮ್ತಾ.
ಬಾಯ್ ಫೆಲ್ಸಿ ಲೋಬೊ ದೆರೆಬಯ್ಲ್ ಹಿಚ್ಯಾ ’ಪಾಲ್ವಾ ಪೋಂತ್’ ಕವಿತಾಜಮ್ಯಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಲಾಭ್ಲಾ. ವೃತ್ತೆನ್ ಶಿಕ್ಷಕಿ ಜಾವ್ನಾಸ್ಚಿ ಬಾಯ್ ಫೆಲ್ಸಿ ಲೋಬೊ, ಕೊಂಕಣಿ ಸಾಹಿತಿಕ್ ವರ್ತುಲಾಂತ್ ಸಕ್ರಿಯ್ ಜಾವ್ನಾಸುನ್ ಅಪ್ಲಿವ್ ಮ್ಹಳ್ಳಿ ಶಯ್ಲೆರ್ ಕವಿತಾ ಬರಯ್ತಾ. ಹಿ ಕವಿತಾ ಸಯ್ತ್ ತಿಚ್ಯಾ ಖಾಶೆಲ್ಯಾ ಶಯ್ಲಿಚಿ ಜಾವ್ನಾಸುನ್ ಸಮಾಜೆಚ್ಯಾ ಧಾರ್ ನಾತ್ಲೆಲ್ಯಾ ವಯ್ಚಾರಿಕ್ ಚಿಂತ್ಪಾಕ್ ಚಿಮ್ಟೊ ಕಾಡ್ತಾ.
[ಕವಿತಾ] ದುಕೊಳ್ ಪಡ್ಲ್ಲೊ ಗಾಂವ್ (- ಫೆಲ್ಸಿ ಲೋಬೊ, ದೆರೆಬಯ್ಲ್)
ದುಕೊಳ್
ಪಡ್ಲ್ಲೊ ಗಾಂವ್
ಥಂಯ್ ದುಕೊಳ್ ಪಡ್ಲ್ಲೊ ತಾಂಚೆ ಘಾಮಾ ಥೆಂಬೆ ಖಿರ್ಲ್ಲ್ಯಾ ಧರಣೆರ್ ಕಿರ್ಲಾಲ್ಲ್ಯಾ ಭಾತಾ ಪೊಟ್ರೆಕ್ಚ್ ಮುಸಾಂನಿ ಘಾಲೊ
ರೆಂವೊಡ್ ಕೊಡೊ ಭರೊಂಕ್ ಆಯ್ಕಾಲೊನಾ ಕುಮೆರಿಚ್ಯಾ ಲಾಂಬ್ ವೊಳಿಂನಿ ಕೊಸಾಯಿಲ್ಲ್ಯಾ
ಮಾತ್ಯೆಂತ್ ಮೆಲ್ಲ್ಯಾ ಕಣಾನಿಂ ಸುಕ್ಲ್ಲ್ಯಾ
ಆಡಾರಾಂಚೆರ್ ಜೀವ್ ಚರಯ್ಲೊ ಮುಯಾಂನಿ ಕಾಡ್ಲೊ
ಪುರ್ಶಾಂವ್ ಬೆಲಾರ್ ಫುಲ್ಚ್ ಫುಲ್ಲೆಂನಾ ಡಾಮಾರ್ ರಸ್ತೆ ಫೊಡ್ನ್ ಖರ್ಕಟ್ಯಾ ವೊತಾಂತ್
ಕಾಲಯಿಲ್ಲೆ ಸಿಮೆಟಿಂತ್ ತಾಂಚ್ಯಾ ಘಾಮಾಚೆ ಪಾವ್ಳೆ
ಭರ್ಸಾಲೆ ಘೆಟೆಲಿ ಧರ್ಣ್ ಸಾಂಜೆರ್ ಝರಿಂಚೊ ಸ್ವಾಸ್
ಲಾಂಬ್ಲೊನಾ.. ಪಾಚ್ವೆಂ ಪಾಂಗರ್ಲೆಲ್ಯಾ ರಾನಾ ವ್ಹಾಳ್ಳೆಂ ವಾರೆಂ ಧಲ್ಲಿಂ ಪಾನಾಂ ಕೊರ್ವೊಂತ್
ವಾವುರ್ಲೆ ರಾತ್ಚ್ಯಾ ಫರಾ ನಿದ್ಲೆ ರೂಕ್ ಜಾಗ್ಲೆ ಚೋರ್ ಕೊಗ್ಳೆ ಕಂತಾರ್ ಸಾದ್ಲೆಂನಾ.. ಗಾಂವಾರ್ ಘಡ್ಲೆಂ
ಎಲಿಸಾಂವ್ ಮಾಗೊಂಕ್ ಆಯ್ಲೆ ಬೆಸಾಂವ್ ಧನ್
ದಿರ್ವ್ಯಾ ನಂಯ್ ವ್ಹಾಳ್ಳಿ ಖರಿ ಸುಟ್ಕಾ ಲುಟುನ್
ವ್ಹೆಲಿ ಧರ್ಮಾಂಚಿ ಬುನ್ಯಾದ್ ಉರ್ಲಿನಾ ಸತ್
ಹಾರ್ಲೆಂ ನೀತ್ ಲಿಪ್ಲಿ ಮಾಸೂಮಾಂಚಿ ವೀದ್ ವಾವ್ಳಿ ಶಿಂದ್ಲಿಂ ಮನಾಂ ಫಾರ್ಲೊ ಮಾನ್ ಮನ್ಶ್ಯಾಮೊಲಾಂ
ಜಿಕ್ಲಿಂನಾಂತ್ ಥಂಯ್ ದುಕೊಳ್ ಪಡ್ಲ್ಲೊ...
-
ಫೆಲ್ಸಿ ಲೋಬೊ, ದೆರೆಬಯ್ಲ್ [ಎಪ್ರಿಲ್, 2025]
ಫೆಲ್ಸಿ ಲೋಬೊ,
ದೆರೆಬಯ್ಲ್: ಏಕ್ ಶಿಕ್ಷಕಿ ಜಾವ್ನ್ ವಾವ್ರ್
ಕರ್ಚಿ ಹಿ ಕವಿತಾ, ಲೇಕನಾಂ, ಸಮೀಕ್ಶಾ ಬರಯ್ತಾ.
ಕವಿಸಮ್ಮೇಳನಾಂನಿ ಕವಿತಾ ಸಾದರ್ ಕೆಲ್ಯಾತ್. ಸಮಾಜಿಕ್
ಜಾಗರಣ್ ದಿಂವ್ಚಿ ಶ್ಯಾಥಿ ಆಸ್ಚಿ ಬಾಯ್ ಫೆಲ್ಸಿ ಲೋಬೊ
ದೆರೆಬಯ್ಲ್ ಅಸ್ತುರಿ ಸಂವೇದನಾಂಕ್ ಲಾಗುನ್ ವ್ಹಳ್ಕಿಚಿ
ಜಾಲ್ಯಾ.
’ಪಾಲ್ವಾ ಪೊಂತ್’ ಹಿಚ್ಯಾ ಕವಿತೆಂಚೊ ಜಮೊ ಪರ್ಗಟ್ಲಾ.
ಕವಿತಾकविताPoem Feb 2025
ಆಪಾಯಾಚ್ಯೊ ಘಾಂಟಿ (- ಫೆಲ್ಸಿ ಲೋಬೊ, ದೆರೆಬಯ್ಲ್)
ಕವಿತಾकविताPoem May 2023
ಹಿಶಾರೆ (- ಫೆಲ್ಸಿ ಲೋಬೊ, ದೆರೆಬಯ್ಲ್)
More in Poinnari
ಕವಿತಾकविताPoem Feb 2025
ಧಾಳ್ಯೊ [ಡೊ. ಝೀಟಾ ಲೋಬೊ]
ಕವಿತಾकविताPoem Oct 2020
ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಕವಿತಾकविताPoem Nov 2016
ಎಕಾ ಫೊಂಡಾಚಿ ಕಥಾ
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.