ಭವ್ತಾರಣಿ [ಬಾಲಕೃಷ್ಣ ಮಲ್ಯ, ಕೊಚ್ಚಿ]

ಮನ್ಶ್ಯಾಚ್ಯಾ ಜಿಣಯೆಂತ್ ಕಿತಲೆ ಸಂಬಂಧ್ ಆಸ್ತಿತ್ ತರ್‌ಯೀ, ಆವಯ್ ಏಕ್ ಅಸಲೊ ಸಂಬಂಧ್, ಜೊ ಫಕತ್ ಏಕ್ ಸಂಬಂಧ್ ಮಾತ್ರ್ ನ್ಹಯ್. ಬಗಾರ್ ಏಕ್ ಸಕತ್ ಜಾವ್ನಾಸಾ ಆನಿ ತಿ ಸಕತ್ ಥೊಡ್ಯಾಂಕ್ ತರ್‌ಯೀ ದಿಸಚೆತಸಲಿ ಸಕತ್ ಜಾವನಾಸಾ. ಹ್ಯಾ ಕವಿತೆಂತ್ ಸಯ್ತ್ ಅಸಲಿಚ್ಚ್ ಏಕ್ ಕಾಣಿ ಅಪುರ್ಭಾಯೆನ್ ಉತರಾಂವ್ಚಿ ದಿಸತಾ. ಮೊಳ್ಬಾಕ್ ನಿಸಣ್ ಲ್ಹಾಂವ್ಚಿ ಸಕತ್ ಎಕಾ ಆವಯ್ಕ್ ನಾಸ್ತಾನಾ ಆನಿ ಕೊಣಾಕ್ ಆಸುಯೆತಾ, ಯೆಂವೀ ಅಪಲ್ಯಾ ಬಾಳಾಕ್ ಲಾಗುನ್.

ಭವ್ತಾರಣಿ ಮ್ಹಳ್ಯಾರ್ ಮನಶ್ಯಾಚ್ಯಾ ಅತಮ್ಯಾಕ್ ಜಿವಿತ್ ಆನಿ ಮರಣ್ ಮ್ಹಳ್ಳ್ಯಾ ನ್ಹಂಯ್‌ಚ್ಯಾ ಎಕಾ ತಡಿರ್ ಥಾವನ್ ಅನಯೇಕಾ ತಡಿಕ್ ಪಾವಂವಚಿ ದೇವಿಚೆಂ ನಾಂವ್. ಕೇರಳಾಚೊ ಉರ್ಭೆವಂತ್ ಕವಿ ಬಾಬ್ ಬಾಲಕೃಷ್ಣ ಮಲ್ಯ ವೆಗಳ್ಯಾ ಚಿಂತಪಾಚೊ ಕವಿ. ಮಲಯಾಳಮ್, ತಮಿಳ್ ಭಾಸಾಂನಿ ಸಯ್ತ್ ತೊ ಬರಯ್ತಾ. ಹಾಂಗಾಸರ್ ಏಕ್ ಅಪ್ರೂಪ್ ಚಿಂತಪಾಚಿ ಪುಣ್ ಅಪುರ್ಭಾಯೆಚಿ ಕವಿತಾ ಘೆವ್ನ್ ತೊ ಆಯ್ಲಾ, ಆನಿ ಹ್ಯಾ ಕವಿತೆಚೊ ಸ್ವಾದ್ ಪಾರ್ಕುಂಕ್ ತುಮ್ಕಾಂಚ್ ಸೊಡತಾಂ.

[ಕವಿತಾ] ಭವ್ತಾರಣಿ [ಬಾಲಕೃಷ್ಣ ಮಲ್ಯ, ಕೊಚ್ಚಿ]

ಭವ್ತಾರಣಿ

ತಿ ಮ್ಹಾಕಾ ಚೊಯ್ಲಿ ಹಾಂವೆಂ ದೃಷ್ಟಿ ಪಳೆಯ್ಲಿ

ಶುರು ಜಾಲಿ ಆಮಂಚಿ ಕಳ್ತಾ ತುಮ್ಕಾಂ ಕಾಣಿ

ಜೀವಿತಾಚೆ ಪಯ್ಲಿಂ ಆಗ್ರಹಾಂ ತಿಂ ಆಯ್ಲಿಂ

ಮನಾಕ್ ಚಿತಾರಿಲಿ ಮೌನಾಚೆ ಭೊವ್ರಂಗಾನಿ

ಅಕ್ಷರಾಂ ಕೊರಾಂತಿಲಿಂ ಉತ್ತರಾಂಕ್ ಜೀಣ್ ದಿಲಿಂ

ಪ್ರೆಮಾಚೆ ಸಾಯೀನ್ ಸುಶೊಭಿತ್ ಬರ್ಪಾನಿ

ಗರ್ಭಾಚೆ ಕುಡೀಂತು ಎಕ್ಠಾಂಯ್ ಆಮಿಂ ನಿದೆಲಿಂ

ತಿಜೆ ದೊಳ್ಯಾಂತಾಸಲಿ ಮೊಗಾಚಿ ಗೊಡ್ಸಾಣಿ

ಹಾಸ್ತಾಚಾಸಲಿ ನೆಣ್ ಕಿತ್ಯಾ ತಿ ಹಾಸ್ತಾಲಿ

ಹೃದಯ್ ಫುಲ್ಲೆಲೆಂ ಮ್ಹಜೆ ವಿಶ್ವಾಚಿ ತಿ ರಾಣಿ

ಆತ್ಮಾಚಿ ಹುನ್ಸಾಣಿ ಮೊಗಾಚಿ ಮಾಯೆಲಿ

ಮನ್ ವಶ್ ಧರ್ಲಿ ಮಮ್ತೆಚೆ ಪೊರ್ಮ್ಬೊಳಾನಿ

ತೀಕಾ ಕಳ್ತಾಸಲಿ ಮ್ಹಜಿ ಜನ್ಮಾಕುಂಡಲಿ

ತಿ ವಳ್ಖತಾಸಲಿ ಮ್ಹಜಿ ಪೂರಾಯ್ ಕಾಣಿ

ಮ್ಹಜೆ ಸುಖ್ದುಖಾಂ ತಿ ನ್ಹಯ್ವೆ ವ್ಹಾವಂತಾಲಿ ?

ಕಷ್ಟಾಂತೂಯ್ ಝುಝ್ಲಿ ರಿತ್ತೆ ತೆ ಹಾತಾಂನಿ

ಭೂಂಯೆರ್ ಪಾಯ್ ಲಾಗತ್ ಆಶಾ ಮ್ಹಸ್ತಾಸಲಿ

ತೀಣೆ ನ್ಹಯ್ವೆ ಧರ್ಲೀಲಿ ಮೊಹಾಚೆ ವ್ಹಂಟೀನಿ ?

ಕಳ್ ನಾತ್ತಿಲ್ಲೆ ಭಾಸೆನಿ ಕಿತಿ ಕಿ ಉಲೆಯ್ಲಿಂ

ಕಿತಿ ಆಮಿಂ ಜಾಣ್ಲಿಂ ತೆಂಚ್ ಆಮಿಂ ನೆಣಿ

ಉಬುಚೆ ಪರ್ವ್ಯಾಂಕ್ ಧರೂಂಕ್ ಉಡ್ಕಿ ಹಾಂವೆಂ ಮಾರ್ಲಿ

ಮಾಳ್ಬಾಕ್ ಧರೊ ಮ್ಹಣ್ ತೀಣೆ ದವ್ರ್ಲಿ ನಿಸ್ಣಿ

ಜಾಣಾ ಮ್ಹಜೆ ಹೃದಯಾಂತ್ ತಿ ಎಕ್ಲೀಚ್ ಆಸೀಲ್ಲಿ

ಮ್ಹಜೆ ಎಕೆಕ್ ಶ್ವಾಸಾಕಾಸಾ ಹಾಂವ್ ತೀಜೊ ಋಣಿ

ಜೀವಿತಾಚಿ ಪರೀಕ್ಷಾ ಮ್ಹಜಿ ತಿಣೆ ಮು ಬರೆಯ್ಲಿ

ಆನಿ ತೆ ಬರ್ಪಾಂ ಖಾಲ್ ಮ್ಹಜಿ ಘಾಲೆಯ್ಲಿ ನಿಶಾನಿ

ಭಿಣ್ಣ್ ಮಾತ್ಥ್ಯಾಂತು ಭಿತ್ತರ್ ದಿವ್ಲಿ ಮು ಜಳೆಯ್ಲಿ

ಭಿಜುಡ್ ಪಿಸಾಂಟ್ ಮ್ಹಾಕಾ ಕೆಲ್ಲೊ ತಿಣೆ ಗುಣಿ

ಜನ್ಮಾಂಚೆ ಪುಣ್ಯಾನ್ ಕಿ ತೀಕಾ ದೆವಾನ್ ಬಳೆಯ್ಲಲಿ

ಅನಿಯೆಕ್ ನಿಬ್ಬಾನಿ ಜಾವೂನ್ ಭವಾಚಿ ತಾರ್ಣಿ ?

ತಿ ಮ್ಹಾಕಾ ಚೊಯ್ಲಿ ಹಾಂವೆಂ ದೃಷ್ಟಿ ಪಳೆಯ್ಲಿ

ಶುರು ಜಾಲಿ ಆಮಂಚಿ ಕಳ್ತಾ ತುಮ್ಕಾಂ ಕಾಣಿ

- ಬಾಲಕೃಷ್ಣ ಮಲ್ಯ, ಕೊಚ್ಚಿ [ಎಪ್ರಿಲ್ 2018]

ಬಾಲಕೃಷ್ಣ ಮಲ್ಯ: ಕೇರಳಾಂತ್‌ಲ್ಯಾ ಕೊಚ್ಚಿಚೊ ನಾಮ್ಣೆಚೊ ಕೊಂಕಣಿ ಯುವ ಕವಿ, ತರ್ಜಣ್‌ಕಾರ್ ಆನಿ ಬರವ್ಪಿ. ಮಲಯಾಳಮ್, ತಮಿಳ್ ಭಾಸಾಂನಿ ಸಯ್ತ್ ಹಾಣೆಂ ಕಾಂಯ್ ಹಜಾರಾಂಚ್ಯಾಂಕೀ ಚಡಿತ್ ಕವಿತಾ ಬರಯ್ಲ್ಯಾತ್. ’ಜೀವ ಸಂಕಲ್ಪ (2013)’ ಹಾಚೊ ಎದೊಳ್ ಪರ್ಗಟ್‌ಲ್ಲೊ ಕವಿತಾಜಮೊ. ’ಸ್ವತಂತ್ರ ವಿಚಾರ್’ ಬೂಕ್ ವೆಗಿಂಚ್ ಪರ್ಗಟುನ್ ಯೆಂವ್ಚಾರ್ ಆಸಾ. ಸಭಾರ್ ಕವಿಗೋಶ್ಟಿಂನಿ ತಶೆಂಚ್ ಸಾಹಿತಿಕ್ ಶಿಭಿರಾಂನಿ ಹಾಣೆಂ ವಾಂಟೊ ಘೆತ್ಲಾ. ಮಲಯಾಳಮ್ ಭಾಸೆಚೊ ಬೂಕ್ ಸಯ್ತ್ ಹಾಣೆಂ ಪರ್ಗಟ್ಲಾ.