ಕವಿತಾकविताPoem

ಬಂಡ್ [-ಸಂಗೀತಾ ನಾಯ್ಕ್]

[ಕವಿತಾ] ಬಂಡ್ [-ಸಂಗೀತಾ ನಾಯ್ಕ್]

ಎಕಾ ತೆಂಪಾದಿಂ ಮಾಂಕೊಡ್ ಜಾವ್ನ್ ಜಿಯೆಂವ್ಚೊ ಮನಿಸ್ ಅಪ್ಣಾನ್ ವಸ್ತಿ ಕರುನ್ ಆಸ್ಲೆಂ ರಾನ್ ಸೊಡುನ್ ಆಯ್ಲೊ ಆನಿ ಶಿಕಪ್ ಜೊಡುನ್ ಪ್ರಗತೆಚ್ಯಾ ಪಾವ್ಲಾಂನಿ ಮುಕಾರ್ ಪಾವ್ಲೊ ಆನಿ ವಿಕಾಸಾಚ್ಯಾ ಪಾವ್ಲಾಂನಿ ಧಾಂವುನ್ ಲಾಗ್ಲೊ. ಆಜ್ ತೊಚ್ ಮನಿಸ್ ಖಿಣಾನ್ ದರ್ಯಾಚ್ಯಾ ಗರ್ಭಾಕ್ ರಿಗುಂಕ್ ಸಕ್ಲಾ, ಚಂದ್ರಾಚೆರ್ ಉಡ್ಕಿ ಮಾರುಂಕ್ ಸಕ್ಲಾ ಪುಣ್ ಹಕೀಗತೆಂತ್ ಸಮಾಜೆಂತ್ ಕಿತೆಂ ಘಡುನ್ ಆಸಾ? ಹ್ಯಾ ವಿಕಾಚೆಂ ಕಾರಣ್ ಕೊಣ್ ಅನಿ ಕಿತೆಂ ಮ್ಹಳ್ಳೆಂ ಆಮಿ ಚಿಂತ್ಚಿ ಭೋವ್ ಗರ್ಜ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಮನಿಸ್ ಅಪ್ಲ್ಯಾ ಸ್ವಾರ್ಥಿ ಚಿಂತ್ಪಾನ್, ಧರ್ಮ್, ಜಾತ್, ಆನಿ ವೆವೆಗ್ಳೆ ದೊರೆ ಉಭಾರಿತ್ ಗೆಲ್ಲೆಪರಿಂಚ್ ಭಿತರ್ಲೆ ಭಿತರ್ ಪೊಕೊಳ್ ಜಾವ್ನ್ ಯೆತೆಚ್ ಆಸಾ ಆನಿ ಆಜ್ ಸಮಾಜೆಂತ್ ಆಮ್ಚೆಸಮೊರ್ ಘಡ್ಚಿಂ ಭಿರಾಂಕುಳ್ ಘಡಿತಾಂ ಹಾಚಿ ಗವಾಯ್.

’ಮಯ್ನ್ಯಾಚೊ ಕವಿ’ ಸ್ಪರ್ಧ್ಯಾಕ್ ಆಯಿಲ್ಲಿ ಹಿ ಪಯ್ಲಿ ಕವಿತಾ. ಬಾಯ್ ಸಂಗೀತಾ ನಾಯ್ಕ್ ಗೊಂಯ್ಚಿ ಏಕ್ ನಾಮ್ಣೆಚಿ ಬರವ್ಪಿಣ್. ತಿಚ್ಯಾ ಕವಿತೆಂತ್ ಸಯ್ತ್ ತೆಂಚ್ ರಗತ್ ವ್ಹಾಳ್ತಾ ಜ್ಯೆಂ ಥೊಡೆಚ್ ದಿಸಾಧಿಂ ಹಯ್ದರಾಬಾದಾಂತ್ ಘೆಟೆಲ್ಲೆಂ, ತೊಚ್ ತಾಳೊ ಆಯ್ಕತಾ ತೊ ಆಧ್ಲ್ಯಾ ಹಫ್ತ್ಯಾಂತ್ ಅನಿಶ್ಟ್ ಮನ್ಶಾಂನಿ ಅಪ್ಲ್ಯಾ ಕಿರ್ಕೊಳ್ ಕರ್ನೆಕ್ ಲಿಪಂವ್ಚ್ಯಾಕ್ ಬಂಧ್ ಕೆಲ್ಲೊ. ಆನಿ ಎಕೇಕ್ ಉತ್ರಾಂನಿ ಲಿಪುನ್ ಆಸ್ಚ್ಯೊ ಸರ್ವ್ ಇಮಾಜೊ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಬಂಡ್ [-ಸಂಗೀತಾ ನಾಯ್ಕ್]

ಬಂಡ್

ಚೆಡುಂ ತುಂ ....

ಹೆಂಚ್ ಕರು ನಾಕಾ,

ತೆಂಚ್ ಕರು ನಾಕಾ

ಅಶೆಂ ಫಾಟಿಂ ವಡೂನ್

ತು ಕರ್ತಲಿ ಮ್ಹಾಕಾ

ತುಜೆಚ್‌ಭಾಶೆನ್..

ಚೆಪ್ಣಾಕ್ ಘಾಲ್ಲಿ ಅಬ್ಲಾ.

'ಬಾಯ್ ಸರ್ ತು ಫುಡೆಂ' ಮ್ಹಣ್,

ಧಾರಿಷ್ಟಯಾಚೆಂ ಬಳ್ಗೆಂ ದಿ

ಕರ್ಗೆ ಮ್ಹಾಕಾ ಸಬ್ಲಾ

ನಾಜೂಕ್ ಕಳಿ,

ಫುಲಾಚಿ ಪಾಕ್ಳಿ,

ಸೊಶೀಕ್ ಪಾಯಾತಲೆಂ ಜೊತೆಂ,

ಅಶೆಂ ಮ್ಹಾಕಾ ವಾಢಯ್ಶೀತ್ ಜಾಲ್ಯಾರ್,

ಉರ್ಚೆಂನಾ ಹಾಂವ್ ಜೀತೆಂ.

ಪಾಟ್ಲಿ , ಕಾಂಕ್ಣಾಂ ,ಬಾಜೂಬಂದ್

ಪೆಟು ನಾಕಾ ಭಾಂಗಾಂರ್.

ತ್ಯಾಬ್ದಲಾ ಶಿಕಯ್ ಗೆ ಮ್ಹಾಕಾ

ಜಗಾಕ್ ಘೆವಂಕ್ ಶಿಂಗಾರ್.

ಮೊಟಾರ್ ಚಲೊವಂಕ್ ಶಿಕಯ್ತಾನಾ

ಶಿಕಯ್ ಪಂಕ್ಚರುಯ್ ಕಾಡೂಂಕ್.

ಆನೀಕ್ ಶಿಕಯ್

ವಾಟೆಕ್ ಯೆತ್ಲ್ಯಾಂಚೆ

ಹಾತ್ ದೊಕೆಯ್ ಮೊಡುಂಕ್.

ಲಜ್ -ಭೀಡ್, ಕವ್ಚೆಂಶೀಲ್,

ಕುಟುಂಬಾಚಿ ಶಾನ್.

ಥೊತಾಂಡಾ ಸಗ್ಲಿಂ

ಸಾಂಗ್ಚೆ ಆದಿಂ

ಶಿಕಯ್ ಆತ್ಮಸ್ನ್ಮಾನ್.

ಬುದ್ದ್ ಗಂಜೊವ್ಪಿ ರೀತಿ ಭಾತಿ

ಮಾತುಯ್ ಶಿಕೊವ್ ನಾಕಾ.

ಜಮ್ತಾ ತಶಿ ದಿಗೆ ಮ್ಹಾಕಾ

ಶಿಕ್ಷಣಾಚಿಂ ಪಾಖಾಂ.

ತನಾ -ಮನಾಚೆರ್ ಮ್ಹಜ್ಯಾ

ಪಳೊವ್ಪಾಚೆಂ ನಾಸತ್ ಹಜಾರಾಂನಿ ವಳ್,

ಜಾಲ್ಯಾರ್ ಘಟ್ಮೂಟ್ ಘಡಯ್ ಮ್ಹಾಕಾ

ಮನ್ಗಟಾಂಕ್ ದಿವ್ನ್ ಬಳ್.

ಸರ್ಭವತಣಿ ಜಳಿಂ ಮಳಿಂ

ಮಾತ್ಲ್ಯಾ ಗುಂಡಾಂಚೆ ಝುಂಡ್

ಆಇ ಮ್ಹಾಕಾ ಹೆರ್ ಕಾಂಯ್

ಶಿಕಯ್ ವಾ ಶಿಕಯ್ ನಾಕಾ

ಕರೂಂಕ್ ಶಿಕಯ್ ಬಂಡ್

ಕರೂಂಕ್ ಶಿಕಯ್ ಬಂಡ್ !

- ಸಂಗೀತಾ ನಾಯ್ಕ್. [ದಸೆಂಬ್ರ್, 2019]