दान पेट (- ग्ल्यानीश मार्टीस अलंगार)

[कविता] दान पेट (- ग्ल्यानीश मार्टीस अलंगार)

भक्त, फितिस्पण, हकीगत ह्या तिनामधें जियेंवच्या मनशाचीं रुपणीं ह्या कवितेंत सोभीत रितीन पिंत्रायिल्लीं दिसतात. लोकाच्या भक्तेचो, फितिस्पणाची भिरांत दाकवन, पून-बेसांवाचो अबलेस दाकवन कर्चो धर्मीक दंदो, आनी ह्या दंद्यांत लाचार, कंगाल जांवचो गरीब मनीस जितलो गरीब जाता तितलोच गिरेसत जाता वेवेगळ्या इमाजिंक दवर्न दंदो कर्चो. भक्तेचो डोंग, फितिस्पणाचें दाकवप अपलो नंगानाच कर्ताना हकीगत मात कोनशार रावोन दुकाचें थेंबे गळंवचें मार्मीक चिंतप, ह्या कवितेची एकेक वळ वाचून गेल्लेपरीं मनांत उदेवन येता.

ग्लानीश मार्टीस युवकवी, हाच्या कवितेंनी; जांव भांदावळेंत, अमूर्त इमाजेंच्या पिंत्रांवणेंत व कविता थेंब्यांत खरेंच विज्मीत पांवचें चिंतप आसा, कोंकणिचो फुडार मतिंत धरलो तर खंडीत तोंडार संतोसाच्यो हासो उदेतात. ह्या कवितेची तांक मापुंक तुकाच सोडतां.

[कविता] दान पेट (- ग्ल्यानीश मार्टीस अलंगार)

दान पेट

इमाजेक उमो दिवन

कितें‌ पुणी

पेट्येंत घाल्यार

मेळत 'पून' म्हळ्ळ्या भर्वश्यान

घाल्लो नोट -

'आमी चेप‌ल्लो कित्याक?' म्हण

उचार्ची शीण -

इमाजेक धोसता कोण्णा.

पेट्येची अशीर वाट

चमकल्यार खजानो

बीग व्हड तरी

भंडारा वाट बिगात

डब्बो ग्रेसत पूण

घाल्लो‌च निर्गतीक जालासतां

ताणेंच तांतले मातशे काडल्यार -

समाजेचो व्हडलो चोर कोण्णा.

पोटाची दंडोवण

पेट्येक‌च वचाजे तर

उपासाक वळग जाल्ल्या

जठराची‌ दूक

आपल्ये भुकेक मार‌ल्ली

खोट जावन बदलाताना

पाज्राल्लीं दुकां -

पेट्येक रडयता कोण्णा.

लोक‌डावना वेळार

उग्तायलेल्या एका पेटेंत

पयशांरहीत फुलाक पळेवन

'भोवशा पेट्येक पडचे

दुबळ्यांच्या पोटाक पावल्यात' म्हण

इमाजेच्या मुखमळाक पळेताना

भूक थांबलेल्यांच्यो‌ हासो

इमाजेर पर्जळ्ळ्यो.

- ग्ल्यानीश मार्टीस अलंगार. [ज्यून, २०२०]