ದಾರಾಂ ಜಾಲ್ಯಾತ್ ವಣ್ಟಿ (- ರುಪಾಲಿ ಮಾವ್ಜೊ ಕೀರ್ತನಿ)

[ಕವಿತಾ] ದಾರಾಂ ಜಾಲ್ಯಾತ್ ವಣ್ಟಿ (- ರುಪಾಲಿ ಮಾವ್ಜೊ ಕೀರ್ತನಿ)

ಜೆದನಾಂ ಜಿಣ್ಯೆಂತಲೆ ಅನ್ಭೋಗ್, ಕಾಳ್ಜಾಚಿಂ ಭಾವನಾಂಕ್ ದಾಂಬುನ್ ಧರುನ್, ದೊಳ್ಯಾಂತಲ್ಯಾ ದುಕಾಂಚೊ ಕಾಟ್ ಭಾಂದುನ್ ಸೊಡ್ತಾ ತೆದನಾಂ ಉಮಾಳೆ ಜರ್ ಉತ್ರಾಂನಿ ವ್ಹಾಳುಂಕ್ ಲಾಗ್ತಿತ್ ತರ್ ಅಸಲಿಚ್ ಕವಿತಾ ಉದೆವ್ನ್ ಯೆತಾ. ಹ್ಯಾ ಕವಿತೆಚಿ ಎಕೇಕ್ ವಳ್ ಎಕೇಕ್ ಕಾಣಿ ಸಾಂಗತಾ. ಪರ್ಗಾಂವಾಂತ್ ಆಸ್ಚಿ ಆವಯ್, ಅಪಲ್ಯಾ ಭುರಗ್ಯಾಂಕ್ ಮೆಳುಂಕ್ ಆಶೆತಾ ಪುಣ್ ಹಾಲಾತ್ ತಿಕಾ ಬಂಧಿ ಕರತಾ ಅನಿ ಅಪಲ್ಯಾಚ್ ಘರಾಚ್ಯಾ ಚ್ಯಾರ್ ವಣತಿಮಧೆಂ ಫಿಛಾರ್ ಕರತಾನಾ ಭಗುಂಕ್ ಜಾಯ್ ಜಾಲ್ಲೆ ಆಟೆವಿಟೆ ಕಸಲೆ ತೆ ತುಮಿಂಚ್ ಸಮ್ಜುನ್ ಘೆಯಾತ್.

[ಕವಿತಾ] ದಾರಾಂ ಜಾಲ್ಯಾತ್ ವಣ್ಟಿ (- ರುಪಾಲಿ ಮಾವ್ಜೊ ಕೀರ್ತನಿ)

ದಾರಾಂ ಜಾಲ್ಯಾತ್ ವಣ್ಟಿ

ಸಕಾಳಿ ಉಠ್ಚೆ ಉಠೂನ್

ತುಮ್ಚಿ ಕೂಡ್ ನೀವ್ಳ್ ಕರ್ತಾಲೆಂ

ಯೆವಂಕ್ ಪಾಂಚೂಚ್ ಮ್ಹಯ್ನೆ ಉರ್ಲ್ಯಾತ್

ಸದಾಂಚ್ ಸ್ವತಃಕ್ ಸಾಂಗ್ತಾಲೆಂ

ಎಕ್ ಎಕ್ ಮ್ಹಯ್ನೊ ಸರ್ತಾಲೊ

ದೀಸ್ ಲಾಗಿಂ ಪಾವಿಲ್ಲೆ

ಸೂಟ್ಯೆತ್ ಯೆತ್ಲಿ ತುಮಿ ಮ್ಹೂಣ್

ತಯಾರೆಕ್ ಹಾಂವ್ ಲಾಗಿಲ್ಲೆಂ

ಅಚ್ಕೀತ್ ಎಕೆ ಸಕಾಳಿ

ವಾಟೊಚ್ ಸಗ್ಳ್ಯೊ ಜಾಲ್ಯೊ ಬಂದ್

ಜಗ್ ಜಾಲೆಂ ಆರ್ತೆಂ ಪರ್ತೆಂ

ಗತಿ ಜಾಲಿ ಮಂದ್ ಮಂದ್

ತೆ ರಾತಿ ಆಕಾಂತಾಚೊ

ಹುಂವಾರ್ ಘರಾ ಘರಾಂನಿ

ವಣ್ಟಿ ಬಾಂದ್ ಬಾಂದ್ಚೆ ಪಡ್ಲೆ

ರೊಕ್ಡೆಚ್ ಕಾಂಯ್ ವರಾಂನಿ

ಭುರ್ಗಿಂ ಉರ್ಲಿಂ ಎಕೆ ಕಡೆನ್

ಆವ್ಯ್ ಬಾಪೂಯ್ ದುಸ್ರೆ ಕಡೆನ್

ಮಹಾಮಾರೀಚೊ ಹುಂವಾರ್ ಹೊ

ಪಾತ್ಳತ್ ರಾವ್ಲೊ ಸಗ್ಲೆ ಕಡೆನ್

ಶೆತಾಂ-ಭಾಟಾಂ ಕಾಮ್ ಧಂದೊ

ಸಗ್ಳೆಂಚ್ ಲಾಗ್ಲಾಂ ಪಣಾಕ್

ದೆವ್ಸ್ಥಾನಾಯ್ ಜಾಲ್ಯಾತ್ ಬಂದ್

ಸಾಂಗ್ಚೆಂ ಕಿತೆಂ ಕೊಣಾಕ್

ಭಾಯ್ರ್ ಸರ್ಚೆಂ ನ್ಹಯ್ ಮ್ಹೂಣ್

ದಾರಾಂ ಜಾಲ್ಯಾತ್ ವಣ್ಟಿ

ಪರಿಸ್ತಿಥೀಚೆರ್ ಮಾತ್ ಕರೂಂಕ್

ವಿಸ್ವಾಸಾಚಿ ಲಾಯ್ತಾಂ ಪಣ್ಟಿ

ಸಕಾಳ್ ಫುಡೆಂ ನಿಟ್ಟ್ ಹಾಲಿಂ

ದೆವಾ ಕುಡೀಂತ್ ವತಾಂ

ದೊಳೆ ಬಂದ್ ಹಾತ್ ಜೊಡೂನ್

ಎಕಚ್ ಹಾಂವ್ ಮಾಗ್ತಾಂ

ಆಸಾತ್ ಥಂಯ್ ಆಸುಂ ತುಮಿ

ಸುಖ್ರೂಪ್ ತುಮ್ಕಾಂ ದವ್ರ್

ಕವ್ಚ್ ರುಪಿ ಘುವುಂ ಭಂವ್ತಿಂ

ಮ್ಹಜ್ಯಾ ಮೊಗಾಚೊ ಭಂವ್ರ್

- ರುಪಾಲಿ ಮಾವ್ಜೊ ಕೀರ್ತನಿ. [ಎಪ್ರಿಲ್, 2020]