ಪರತ್ ಉಗ್ಡಟಲಿಂ (- ರುಪಾಲಿ ಮಾವ್ಜೊ ಕೀರ್ತನಿ)

[ಕವಿತಾ] ಪರತ್ ಉಗ್ಡಟಲಿಂ (- ರುಪಾಲಿ ಮಾವ್ಜೊ ಕೀರ್ತನಿ)

ದೆವಾಚೆರ್ ಪಾತ್ಯೆಣಿ ಆಸ್ಚಿಂ ’ದೇವ್ ಸಗಳ್ಯಾನ್ ಆಸ್ತಾ’ ಮ್ಹಣುನ್ ಪಾತ್ಯೆತಾತ್ ತರ್‌ಯೀ, ಜೆದ್ನಾಂ ಮನಶಾಚ್ಯಾ ಭಕ್ತೆಚೆಂ ಸವಾಲ್ ಯೆತಾ, ತೊ ತಿ ಭಕ್ತ್ ಫಕತ್ ಮಂದಿರ್, ಇಗರ್ಜ್, ಮಸ್ಜಿದೆಂತ್ ಮಾತ್ರ್ ದಾಕಯ್ತಾ ಆನಿ ದೆವಾನ್ ಆಸ್ಚೊ ಜಾಗೊ ಫಕತ್ ತ್ಯಾ ಜಾಗ್ಯಾಂನಿ ಮ್ಹಣುನ್ ಲೆಕ್ತಾ. ಹೆಚ್ ಚಿಂತ್ಪಾಚೆರ್ ಮಾತ್ಶೆ ಗುಂಡಾಯೆನ್ ಕೆಲ್ಲೆಂ ಚಿಂತಪ್ ಹ್ಯಾ ಕವಿತೆಂತ್ ದಿಸುನ್ ಯೆತಾ.

[ಕವಿತಾ] ಪರತ್ ಉಗ್ಡಟಲಿಂ (- ರುಪಾಲಿ ಮಾವ್ಜೊ ಕೀರ್ತನಿ)

ಪರತ್ ಉಗ್ಡಟಲಿಂ

ಬಂದ್ ಜೆನ್ನಾಸಾವನ್ ದೇವ್‌ಸ್ಥಾನಾಂ

ತುಂ ಸಗ್ಲ್ಯಾಂಚ್ಯಾ ಜಿಬೆರ್ ಬಸ್ಲಾ

ವೆಗ್ವೆಗ್ಳ್ಯಾ ರೂಪಾಂತ್ ತುಂ

ಘರಾ ಘರಾಂತ್ ವಸ್ಲಾ

ದೆವ್ಳಾಂತ್ ಜರಿ ಯೆವಂಕ್ ಮೆಳ್ನಾ

ನಾಂವ್ ಘೆವ್ಚೆಂ ಕೊಣ್ ಸೊಡ್ನಾ

ತೂಂಚ್ ಭಾಯ್ರ್ ಸರ್ಲಾ ಜಾಲ್ಲ್ಯಾನ್

ಪಾವ್ಲಾ ಕಣ್ಕಣಿಂ ದೇವ್‌ಸ್ಥಾನಾಂ

ಇಗ್ರ್ಜಿ ಬಂದ್ ಮಸ್ಜಿದಿ ಬಂದ್

ದೆವ್ಳಾಂಚೀಯ್ ದಾರಾ ಬಂದ್

ಕೊಣ್ ಕೆನ್ನಾ ಪಾವ್ತ್ ಕಳ್ನಾ

ಮದತ್ ಕರ್ಚಿ ಸೊಡ್ನಾತ್ ಸಂದ್

ದೇವ್‌ಸ್ಥಾನಾಂನಿ ಸೊದ್ತಾತ್ ತುಕಾ

ಭಾಯ್ರ್ ಕೊಣಾಕ್ ದಿಸ್ನಾ ಕಿತ್ಯಾಕ್?

ಕಿತ್ಯಾಕ್ ತು ದಾಖಯ್ನಾ ವಳಖ್

ವಳ್ಖನಾತ್ ತುಕಾ ಕೊಣ್ ಕಿತ್ಯಾಕ್?

ಕೊಣ್ ನಾ ಕೊಣ್ ಕಸೊ ನಾ ಕಸೊ

ಕೊಣಾಕ್ ನಾ ಕೊಣಾಕ್ ಪಾವ್ತಾ

ಅಶ್ಯಾ ವೆಳಾರ್ ರೂಪ್ ತುಜೆಂ

ತ್ಯಾಂಚ್ಯಾತ್ ದಿಸೂಂಕ್ ಲಾಗ್ತಾ

ಪಾರ್ಖಿ ನದರ್ ಆಸ್ಲಿ ತರ್

ತರೆಕವಾರ್ ತುಜಿಂ ದಿಸ್ತಾತ್ ರೂಪಾಂ

ವಿಸ್ವಾಸ್ ತೆನ್ನಾ ಘಟ್ಟ್ ಜಾತಾ

ಪಯ್ಸ್ ಜಾತ್ಲಿ ಕಾಳಿ ಕುಪಾಂ

ಪರತ್ ಜಾತ್ಲಿಂ ಎಕ್ ಸಗ್ಲಿಂ

ಪರತ್ ಪಡ್ಟಲೊ ಪಾವ್ಸ್ ಖೊಶ್ಯೆಚೊ

ಪರತ್ ಉಗ್ಡಟಲಿಂ ದೇವ್‌ಸ್ಥಾನಾಂ

ಪರತ್ ಹಾಂಸ್ತಲೊ ವಾಠಾರ್ ಭೊಂವಂತಣಚೊ

- ರುಪಾಲಿ ಮಾವ್ಜೊ ಕೀರ್ತನಿ. [ಜ್ಯೂನ್, 2020]