ಕಾಳ್ಖಾತಲೆಂ ಉಲೆ (- ಮಹೇಶ್ ಗಾಂವ್ಕಾರ್)

ಸಾದಯ್ತಾಲೆ ಕಾಳ್ಖಿ ಉಲೆ

ಜಾಗಯ್ತಾಲೆ ಗಾಂವಾ ಶಿಮೆರ್

ಮಸ್ತ್ ಭೊವ್ಪಿ ಶಿಬ್ರೆ ಕೊಲೆ

ಶಿಯಾಂ ದಿಸಾನಿ ಕಾನಾಕ್ ತೊಂಪ್ರೆಂ

ಕುಡೀಕ್ ಆವ್ಳ್ಳಿಲಿ ಗೊಜ್ಡಿ ಜಡ್

ವಾಡ್ಟೆ ರಾತೀಕ್ ಕುಲ್ಕೂಲೊ ಚಡ್

ಜಾತಾಲೆ ನ್ಹಿದೆ ಭಾರಾಂನ್ ದೊಳೆ ಜಡ್

ಆಮುಲ್ಲೆಂ ಮುಳಾಂತ್ ಪೆಟ್ಟಾಲೊ ಪರ್ಸೊ

ಆಂಗ್ ಶೆಕೊವ್ಪಾಕ್ ಗರ್ದಿ ವ್ಹಡ್

ಬಿನ್ ಅರ್ಥಾಚ್ಯಾ ಫುಟ್ಕ್ಯಾ ತೊಂಡಾತ್ಲ್ಯಾನ್

ಗಾಂವಾವ್ಯ್ಲ್ಯೊಚ್ ಗಜಾಲಿ ಚಡ್

ಕಾನಾಂಕ್ ಖೊಯ್ಲ್ಲಿ ಶೆನ್ವಾತಾಂ ವಿಡಿ

ಫುಲ್ಲಿಲ್ಯಾ ಇಂಗಳ್ಯಾರ್ ಪೆಟ್ಟಾಲಿ

ಝುರ್ಕ್ಯಾರ್ ಝುರ್ಕೆ ಮಾರ್ ಮಾರೂಂನ್

ಕೂಡ್ ಧುಂವ್ರಾನ್ ಸೊಶೆಂತಾಲಿ

ಧುಂವ್ರಿಲ್ಲ್ಯಾ ವಾತಾವ್ರಣಾಂತ್

ಮನ್ ಮನಾಕ್ ಮೆಳ್ಟಾಲೆಂ

ಸುಖ್ದುಖ್ಖಾ ಕುಶೀಕ್ ದವ್ರೂಂನ್

ಭೊಂವ್ತಣಿ ಲ್ಹಾರ್ ಖೊಸ್ಯೆಚೆ ಖೆಳ್ಟಾಲೆಂ

ಸೈಮ್ಪೂತ್ ಸೈಮ್ ಉಲೆ

ಕಾಳ್ಜಾ ಮದಿ ಜಿರಯ್ತಾಲೆ

ಕಾಳ್ಖಾತ್ಲ್ಯಾಂ ಗಾಂವಾಂತ್ ಕಾಳ್ಖಾತಲೆ ಉಲೆ

ಘರಾಂನ್ ಘರ್ ಜಾಗಯ್ತಾಲೆ

ದೀಸ್ ಫುಟ್ಟಾಚ್ ಕಾಳ್ಖಿ ಉಲೆ

ಮನ್ಶಾಂ ಕುಡೀಂತ್ ರಿಗ್ತಾಲೆ

ಉಜ್ವಾಂಡಾನ್ ಭರೊಂನ್ ಕಶ್ಟಿ ಮನೀಸ್

ರಾನಾಂವ್ನಾಂತ್ ಧಾವ್ತಾಲೆ

ಸೈಮ್ ಭಾರೀತ್ ಜಾಂವ್ನ್ ಖಿಣಾಂತ್

ಸೈಮೀಕ್ ಜೀಣ್ ಜಗ್ತಾಲೆ

ರಾಬ್ ರಾಬೂನ್ ಶೆತಾ ಕುಮೆರೀನಿ

ಘಾಮ್ ಮಾತ್ಯೆಂತ್ ವಾರಯ್ತಾಲೆ

ಉಜ್ವಾಡಾನ್ ಭರಿಲ್ಲೆ ಆಖ್ಖೆ ಮಳಬ್

ತಾಂಚೆರ್ ಸೈಮ್ಸಾಸಾಯ್ ಶಿಂವ್ರಾಯತಾಲೆ

ತಾಂಚೆರ್ ಸೈಮ್ಸಾಸಾಯ್ ಶಿಂವ್ರಾಯತಾಲೆ.

- ಮಹೇಶ್ ಗಾಂವ್ಕಾರ್. [ಜನೆರ್, 2020]

ಮಹೇಶ್ ಗಾಂವ್ಕಾರ್: ನಾಟಕಾಂ, ಕವಿತಾ ಬರಂವ್ಚೊ ಹೊ ನಟನ್, ನಿರ್ದೇಶನ್ ಕರ್ತಾ ತಶೆಂಚ್ ವಾಜಂತ್ರಾಂ ಸಯ್ತ್ ಖೆಳತಾ. ಹಾಚ್ಯೊ ಮರಾಠಿ ಕವಿತಾ ಸಾಹಿತ್ಯ್ ಯಾತ್ರಿ ಕಲಾ ಪ್ರಕಾಶನ್ ಪುಣೆ ಹಾಂಚ್ಯಾ ಪ್ರೇಮ್ ಸಾಗರ್, ಪ್ರೇಮ್ ಗೃಂಥ್, ಆನಿ ಪೊಯೆಟ್ರಿ, ದ ಮಾಯ್ಲ್ ಸ್ಟೋನ್ ಹ್ಯಾ ಜಮ್ಯಾಂನಿ ಕವಿತಾ ಪರ್ಗಟ್ಲ್ಯಾತ್. 2015 ಇಸ್ವೆಚೊ ಕೊಂಕಣಿ ಭಾಶಾ ಮಂಡಳ್ (ಗೊಂಯ್) ಸಾಹಿತ್ ಪುರಸ್ಕಾರ್ ಜೊಡ್‌ಲ್ಲ್ಯಾ ಹಾಚೆ ’ಫುಲಾ ಪಾಕ್ಳ್ಯೊ’, ’ಯಾದೀಂಚೆ ಉಮಾಳೆ’, ’ಅವ್ಯಕ್ತ್ ಭಾಸ್’ ಯೆದೊಳ್ ಪರ್ಗಟ್‌ಲ್ಲೆ ಬೂಕ್. ’ಕಾಳ್ಖಾತಲೆಂ ಉಲೊ’ ಸದ್ದ್ಯಾಕ್ ಪರ್ಗಟ್ಣೆರ್ ಆಸಾ. ಆಕಾಶ್‌ವಾಣಿ ಪಣ್ಜಿ ಕೇಮ್ದ್ರಾರ್ ತಶೆಂಚ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಶದೆಂತ್ ಕವಿತಾ ಸಾದರ್ ಕೆಲ್ಯಾತ್.