ಕವಿತಾकविताPoem

काथोलीक पंचांग! [आंड्रू एल. डी’कुन्हा]

[कविता] काथोलीक पंचांग! [आंड्रू एल. डी’कुन्हा]

एका तेंपादीं एक घर, एक घराणें, एक कुटम म्हळ्यार दरबसत भांद आनी मयपास थंयसर राज कर्न आसतालो. तांतूं जीव-निर्जीव वसतुंक सयत जोक्तो मान आसतालो जशें एक क्यालेंडर. काथोलीक पंचांग म्हळ्यार एका क्रिसती कुटमाक वेग-वेगळ्या मयन्याच्या एकेका दिसाच्या महत्वाविशीं कळयतालें आनी त्या पंचांगाचो पाटलाव करून कुटमीक काऱ्यीं मांडून हाडची रिवाज आसली.

पूण वेळाकाळाक सरी जावन ह्या भांदाच्यो सरियो असकत जावन तुटून पडुंक लागल्यात आनी स्व-चिंत्पान मनीस दिसान दीस चडीत आनी चडीत स्वार्थी/आबलेशी/मतलभी जावन ह्या मनशा मोलांक होगडावन आयला तें स्वता मनशाक‍च कळीत ना जालां. पूण ह्या परिगतेंत खिळ्यासमेत धर्णीक शेवटोन अपलें सर्व प्रेतन कर्चें काथोलीक पंचांग खूब बरे विचार उत्रांविणेंच सांग्ता आनी ती बोब अंग्तर‌मनांत कान आसच्यांक मात्र आयकता. पूण कवितेची उंचाय अखेरिच्या दोन वळिंनी दिसून येता; झरल्ल्या हुंबरावयल्या गिटांनी एकेक भांद आयिल्लो-गेल्लो फकत एका आवयक मात्र दिसता आनी ती मोनी जावन बोसचें पळेताना कवितारसिकाच्या काळजांतलीं भगणां सयत एक घडी मोनीं जांवच्यांत दुभाव ना. ह्या कवितेक वाचून ह्या कवितेच्या सक्तेचो भर्पूर संतोस जोडुंक तुकाच उलो दितां.

[कविता] काथोलीक पंचांग! [आंड्रू एल. डी’कुन्हा]

काथोलीक पंचांग!

वेळाकाळाच्या पोकोळायेचेर

मार‌ल्ल्या खिळ्याचेर

उमकाळता काथोलीक पंचांग

आज कुटाम सांगाता मेळ्ळां!

जमीनिचेर वोडल्ल्या नव्या गिटांचेर

नवे दोरे बांधुंक तयाराय

मालघड्याक हेणें निमाण्याक तेणें…

सांगाता मेळल्लीं घड्येन पासाळ्ळीं

हातीं घेवन वांट्यांची दसतावेजां

धर्णीक शेवटालां काथोलीक पंचांग

खिळ्या समेत! वोणोदिंचें रडणें!

झरल्ल्या हुंबरावयल्या गिटांक पळेवन

मोनी जावन बसल्या अवय!

- आंड्रू एल. डी’कुन्हा [फेब्रेर, २०२३]

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

आंड्रयू एल. डिकुन्हा

१९८४ (पाटल्या ४२ वर्सां) थावन कोंकणेंत साहित्य रचून आसचो आंडऱ्यू एल. डिकुन्हा एक लोकामोगाळ कवी. गांवान गुर्पूर किन्निकंबळाचो तो अतां इजय वसती कर्न आसा. देवाधीन डेनीस आनी मेरी डिकुन्हा हांच्या सात भुर्ग्यां पयकी तो निमाणो. ताणें १००० वयर कवितां, १५० क मिकवोन लेखनां आनी ३० मटव्यो काणियो बरयल्यात. ’व्हळू व्हळू व्हाळ व्हाळ्या’ (२००४ - आशावादी प्रकाशन), ’अंजुराचें पान’ (२०१३ - कविता ट्रसट) आनी ’आयेराचो बूक’ (२०१४ - कर्नाटक कोंकणी साहित्य अकाडेमी) ताचे प्रकटीत कविता पुंजे. ताच्या "अंजुराचें पान" पुसतकाक कर्नाटक कोंकणी साहित्य अकाडेमी प्रशसती, AIKWO (अखील भारत कोंकणी बरोवप्यांचो एक्तार पुरसकार), विमला वी. पै विश्व कोंकणी कविता पुरसकार आनी डा. टी. एम. ए. पै पुसतक पुरसकार ताका लाबल्यात. आयलेवार ताच्या "उज्वाडाच्ये वेंगेंत" कविता पुसतकाक कर्नाटक कोंकणी साहीत प्रशसती लाबल्या. २०२३ वर्साची राज्य मट्टाची “संदेश कोंकणी साहित्य प्रशसती” ताका लाबल्या.

मंगळूर आकाश‍वाणी थावन सुमार ४० कोंकणी कार‍यक्रमां ताणें सादर केल्यांत. सुमार ३८ वर्सां आदीं राकणो पत्रार ‘आंद्रू माम’ लिखणे नांवान भुर्ग्यांचो संसार विभाग ताणें चलवन व्हेला. आमचो युवक पत्रार निर्वाहक संपादक जावन वावर दिला. "इजयचो कळो" पत्राचो संपादक जावन वावूर‍ला. दायजी दुबाय बरवप्यांच्या एक्ताराचो संपादक जावन वावर दिला. माय‍भास.कोम जाळी जाग्यार , राकणो, दिर्वें, उज्वाड पत्रांनी कविता अंकण ताणें चलयलां. राकण्यार ताचो "कास संसार" अंकण, नमान जेजू बाळोक पत्रार "खास संसार" अंकण अनी आमचो संदेश पत्रार सकाळीक लेखनां सराग प्रकट जावन आसात. ताणें आट पुसतकांक प्रसतावन बरयलां. वेवेगळ्या कोंकणी कविता स्पर्द्यांचो, कोंकणी कविता सादर सर्तेंचो तशेंच कर्नाटक कोंकणी साहित्य अकाडेमिच्या पुसतक प्रशसतेचो वरयणार जावन वावर दिला. गांवांत आनी पर्गांवांत सबार कवितागोश्टी ताणें चलवन वेल्यात. कवितां विशीं सबार प्रबंध मंडन केल्यात आनी उपन्यास दिल्यात. “कविता ट्रसट” चो तो ट्रसटी जावन आसा. कविता.कोम जाळी जाग्यार संपादकीयां तो बरयता.

All 14 pages by this writer