काजू बी [वेंकटेश नायक]

व्हाव! कितें ह्या कवितेची सकत पळेया, वयलेभार पळेलें तर एक काजू आनी काजुची भी, जी आमी चडतावां ल्हान‌पणार कितलेश्यो काजू खावन, भियो घेवन आयिल्ल्यांव, आनी काजू तशेंच काजुच्या भियेचे कितलेशे खेळ खेळून आयिल्ल्यांव, हांगासर कवितेंत तें भुर्ग्यापणालें स्वपण जिवाळ कर्ताशें भग्ता. पूण तितलेंच न्हय, ही कविता जायतें सांगून वेता, तिच्च एका कवितेची सकत म्हणच्याक गोवाय दिता.

काजू म्हळ्यार फाल्यां कुसोन वेची वसत, पूण भी म्हळ्यार फालें, आमचो फुडार, आमचें मुखलें जनांग. मनजात आनी मनीस ह्या दोगां मधें आसचो प्रमूक तफावत‌च जावनासा, मनीस वैचारीक चिंत्पाक नियाळुंक सकचो देकून आमची कूड फाल्यां मातियेंत कुसोन वेची तर‌यी, ती कुसोन वेच्याधीं, अपलें बरें मात्र, मुखल्या दिसांनी, मुखल्या पिळगेक सोडून वेता. काजुची भी एक सांकेतीक रूप दीवन कवीन अपुर्भायेचें चिंताप हांगासर व्हाळमवचें दिसून येता देकून ही कविता परत वाचुंक कर्ता. अखेरिच्या वळिंनी कांय वेवेगळ्यो काणियोंच सांगच्या ह्या कवितेचेर अपुर्भायेचें विशलेषण बरव्येता

वृत्तेन प्राध्यापक जावनासचो वेंकटेश नायक म्हाका हेच्च चिंत्पाक लागून भोव खायस, बर्पान कितलो गुंडायेचोकी, संयबान सयत तितलोच खाल्तो आनी समजणेचो म्हण हांवें पार्किल्लो कवी. कोंकणी फुडारांत असल्या कविंचो संखो चडून येंवचो पळेताना खरेंच म्हज्या काळजांत हजार मोरांनी संतोसान नाच‌ल्लेपरीं जाता.

[कविता] काजू बी [वेंकटेश नायक]

काजू बी

शाळेक मेळचे रजा

गांवाक गेल्यारीय आशिले

प्रश्ने प्रतिकेक उत्तर बरोवचे सजा

हाजे मधेंत हितलांत भोंवचाक मजा

खावचाक शोधून वचे रूक ते काजा

हळदूवो आनी तांबडो काजू

भी कशी म्हळ्यारी

श्रीलंका आसा भारताचे बाजू

खावनू वेंचून हाडचे काजूभी

मोलाधीक हे मारग भी

गर्व पावले ते रूकार पिकतना

आनी लोकान भी वेंचून वरतना

थोडे म्हांतारे जावनू जडले

मोलनाशी मातींत पडले

वेंचून वेले, सोल्लावनू काडले

मोल्लाक विकले, खांवनू ते सरले

शाळ सुरवातेक पावस ते आयले

मातींत मेळेलेंक आंक्री ते पुटले

कालचक्रांत सक्कडांक मोल येता

मोलाक विकीलोय सरचे आसा

नेलार पडलेलोय उटावचे आसा

फकत एक पावस जावका जाता

- वेंकटेश नायक [अगोसत २०१८]

वेंकटेश नायक, मडंत्यार: वृत्तेन प्राध्यपक जावन वावर कर्चो वेंकटेश नायक, कोंकणी साहित्यांत काण्येगार/कवी जावन व्हळकेचो तर‌यी, एक संवेदन‌शील चिंत्पाचो कवी, कविता ताची पयली आसक्त. कोंकणेच्या फुडारांत एक भर्वश्याचो कवी जावन उदेतलो म्हळ्ळो म्हजो आशावाद. हाची एक कविता ’सुक्ती भर्ती’ विशलेषणांच्या बुकांत पर्गटल्या