ಮಾನಸ್ ಕನ್ಯಾ ...! [- ಡೊ|ಹನುಮಂತ್ ಚೋಪಡೇಕರ್]

[ಕವಿತಾ] ಮಾನಸ್ ಕನ್ಯಾ...! [- ಡೊ|ಹನುಮಂತ್ ಚೋಪಡೇಕರ್]

ಆಮಿ ಜಾಯ್ತೆಪಾವ್ಟಿಂ ಕವಿತಾ ವಾಚ್ತಾಂವ್ ಆನಿ ಭೋವ್ ಥೊಡಿಂ ಕವಿತಾ ಆಮ್ಕಾಂ ಆಮಿ ಚಿಂತ್ಚಿ ಮತ್ ಥೊಡಿಂ ಖಿಣಾಂ ಬಂಧ್ ಕರುಂಕ್ ಲಾಯ್ತಾ. ತೊಂಡಾಂತ್ಲಿ ಜೀಬ್ ಸುಟಾನಾ, ಗಳ್ಯಾರ್ ತಾಳೊ ಸುಟಾನಾ ಅನಿ ಅಶೆಂ ಭಗ್ತಾ ಕಾಳ್ಜಾಂತ್ ಧಾಡ್ಧಡೆ ಸಯ್ತ್ ರಾವ್ಲ್ಯಾತ್. ಹಿ ಕಾಂಯ್ ತೆಚ್ ಪ್ರಕಾರಾಚಿ ಕವಿತಾ ಮ್ಹಣ್ಯೆತ್. ಮನೀಸ್ ಜಾವ್ನ್ ಜಲ್ಮಲ್ಲೊ, ಮನೀಸ್ ಜಾವ್ನ್ ಜಿಯೆತಲೊ ಹರ್ಯೆಕ್ಲೊ ಮನ್ಶಾಪಣ್ ಆಸ್ಚೊ ಏಕ್ ಪಾವ್ಟಿಂ ನ್ಹಯ್, ಪರತ್ ಪರತ್ ಅಪ್ಣಾಕ್ ವಿಚಾರ್ ಕರುಂಕ್ ಫಾವೊ, ಹೆಂ ಸರ್ವ್ ಕಿತ್ಯಾಕ್ ಘಡ್ತಾ? ಆನಿ ಘಡುನ್‌ಚ್ ಆಸಾ?

ನಿರ್ಭಯಾ ಆಜ್ ಆಮ್ಚೆಮಧೆಂ ನಾ ತರ್‌ಯೀ ತಿಚ್ಯಾ ಯಾದಿನ್ ಆಮ್ಕಾಂ ಚುಕಿದಾರ್ ಕರುನ್ ಧೊಸ್ಚೆಂ ಅಜೂನ್ ರಾವಂವ್ಕ್ ನಾ. ಹ್ಯಾ ಕವಿತೆಂತ್ ಸಯ್ತ್ ಕವಿ ಬಾಬ್ ದೊ|ಹನುಮಂತ್ ಚೋಪ್ಡೇಕರ್ ಹೆಂಚ್ ಚಿಂತಪ್ ಘೆವ್ನ್ ಆಯ್ಲಾ. ಹ್ಯಾ ಕವಿತೆಚೊ ಅವಾದ್ ಕರುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಮಾನಸ್ ಕನ್ಯಾ...! [- ಡೊ|ಹನುಮಂತ್ ಚೋಪಡೇಕರ್]

ಮಾನಸ್ ಕನ್ಯಾ

ಧುವೆ,

ತುಜೆರ್ ಆಗ್ಳೀಕ್ ಜಾಲ್ಲ್ಯಾ

ತ್ಯಾ ಕಾಳ್ಯಾ ದಿಸಾಂಚ್ಯಾ

ಆಕಾಂತಾಚಿ ಯಾದ್ ಯೆತಾಚ್

ಆತ್ಮ್ಯಾಕ್ ಫುಟ್ಟಾ ಮ್ಹಜ್ಯಾ

ಕುಲ್ಕುಲ್ಯಾಚೊ ಜೊರ್

ಆನಿ

ಬೆಳ್ಶೆಲ್ಲೊ ಶೆಳೊ ಘಾಮ್

ಫುಟ್ಟಾ ಮ್ಹಜ್ಯಾ

ಭಗ್ಭಗ್ ಪಡಿಲ್ಲ್ಯಾ

ಫಡ್ಫಡಪಿ ಪ್ರಾಣಾಕ್

ಕಶೆಂ........

ಧುವೆ.... ಕಶೆಂ........

ಸೊಂಸ್ಲೆ ತುವೆಂ

ತೆ

ಮಹಾಯಾತನಾಂಚೆ

ನಿರಂತರ್

ಪೊಜ್ಡೆ ಅತ್ಯಾಚಾರ್

ರಾಷ್ಟ್ರಾಚ್ಯಾ

ಭರ್ ಕಾಳ್ಜಾಂತಘಡಿಲ್ಲ್ಯಾ

ತ್ಯಾ

ಕಾಳ್ಖ್ಯಾ ಘಡ್ಣುಕೆ ಸಾವ್ನ್

ಮ್ಹಾಕಾ ದರ್ ಖಿಣಾಕ್

ಎಕ್ ಪ್ರಸ್ನ್ ಸತಯ್ತಾ..

ಪರ್ಸ್ತ್ರೀಕ್ ಆವ್ಯ್ ಮಾನ್ಪಿ

ಮಹಾಪುರೂಶ್ ಹ್ಯಾಚ್ ಸಂಸ್ಕೃತೆಂತ್

ಜಲ್ಮಲ್ಲೆ ಅಶೆಂ ಮ್ಹಟ್ಲ್ಯಾರ್

ಕೊಣ್ ದವ್ರತಲೊ ವಿಶ್ರ್ವಾಸ್...

ತಸೊ ಆತಾಂ

ವಿಶ್ರ್ವಾಸ್

ಹ್ಯಾ ವಿಶ್ರ್ವಾಂತ್ ಉರೂಂಕೂಚ್ ನಾ

ತೊ

ಪಿಸೊ ಜಾಲಾ

ನಪುಂಸಕ್ ಜಾಲಾ

ತಾಚ್ಯಾ ಸಗ್ಳ್ಯಾ

ಸೊಯ್ರ್ಯಾಂ ಧಾಯ್ರ್ಯಾಂ

ಆನಿ

ದಾಯ್ಜ್ಯಾಂ ಸಕಟ್

ಧುವೆ,

ತುಜೆರ್ ಅತ್ಯಾಚಾರ್ ಕರ್ಪಿ

ಹಾತ್

ಮ್ಹಜ್ಯಾ ಸಾರ್ಕ್ಯಾಚ್

ದಾದ್ಲ್ಯಾಂಚೆ ಆಸ್ಲೆಂ....

ಹೆಂ ಸತ್ಯ್ ಹೊಲ್ಮತಾಚ್

ಮ್ಹಜೊ ಹಾಂವೂಚ್

ಮ್ಹಾಕಾಚ್ ಕಾಡೊನ್ ಉಡಯ್ತಾ

ನರ್ಕಾಂಚ್ಯಾ ಗುವಾಂತ್

ಆನಿ

ತ್ಯಾ ಸ ನರ್ಕಾಸುರಾಂಚ್ಯೊ

ಆತ್ಡ್ಯೊ ಭಾಯ್ರ್ ಕಾಡೂನ್

ತ್ಯೊ ವೆಶೀರ್ ಹುಮ್ಕೊಳಪಾಕ್

ಹಾಂವ್ ಭಾಯ್ರ್ ಸರ್ತಾ

ಘರಾಧಾರಾಚೆರ್ ಮ್ಹಜೆಂ

ಪುರೂಷ್ತ್ವ್ ಹುಮ್ಕೊಳೊನ್

ಧುವೆ,

ಮ್ಹಾಕಾ ಖಬರ್ ಆಸಾ

ಹಾಂಗಾಂ

ಮನೀಸ್ ದುಯೆಂಸಾನ್ ಮರ್ತಾತ್

ಮನೀಸ್ ರಸ್ತ್ಯಾರ್ ಸೊಪ್ತಾತ್

ಗಾಡ್ಯೆ ಪೊಂದಾಕ್ ಪಡಿಲ್ಲೆ ಜೀವ್

ಎಕಾ ಧಪ್ಕ್ಯಾಂತ್ ಲಾಟೂನ್ ವತಾ

ಚಪಾತಿ ಸಾರ್ಕೆ...

ಹಯ್ ಧುವೆ,

ಹಾಂವ್ ಜಾಣಾ

ತೊ ಜೀವ್ ಎಕ್ದಾಂಚ್ ಮರ್ತಾತ್

ಎಕಾ ಧಪ್ಕ್ಯಾಂತ್ ಕಾಬಾರ್ ಜಾತಾ

ಪೂಣ್ ತುವೆಂ

ಇಲ್ಲ್ಯಾಶಾ ಸಾನ್ ಪಿರಾಯೆರ್

ಎಕಾಚ್ ವಾಂಗ್ಡಾ

ತಿಂ ಹಜಾರಮರಣಾಂ

ಕಶಿಂ ಗೆ ಸೊಂಸ್ಲಿಂ

ಕಶಿಂ ?????????

ಧುವೆ ಮ್ಹಜೆ,

ನಿರ್ಭಯೆ.............

ತುಂ ಮರ್ಣಾ ಕಡೆನ್ ಝುಜೂನ್ ಗೆಲಿ....

ಸಾಸ್ಣಾಚಿ ನ್ಹಿದ್ ಘೆವ್ನ್ ಗೆಲಿ

ಆಮ್ಕಾಂ ಸಗ್ಳ್ಯಾಂಕ್ ಮಾತ್

ತುಂ ಲಖ್ಖ್ ಜಾಗಿ ಕರೂನ್ ಗೆಲಿ

- ಡೊ|ಹನುಮಂತ್ ಚೋಪಡೇಕರ್. [ದಸೆಂಬ್ರ್, 2019]

ಡೊ|ಹನುಮಂತ್ ಚೋಪಡೇಕರ್: ವೃತ್ತೆನ್ ಪ್ರಾಧ್ಯಾಪಕ್ ಜಾವ್ನಾಸ್ಚೊ ದೊ|ಹನುಮಂತ್ ಚೋಪ್ಡೇಕರ್ ಗೊಂಯ್ಚ್ಯಾ ಚೌಗ್ಲೆ ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚೊ ಮುಖೇಸ್ತ್. ಕಾಣಿಯೆಗಾರ್, ನಾಟಕಿಸ್ತ್, ಬಾಲ್ ಸಾಹಿತ್‌ಕಾರ್, ಸಂಶೋಧಕ್, ತರ್ಜಣ್‌ಕಾರ್ ತಸೊಚ್ ಕವಿ. ’ಆತಾಂ ಕೆನ್ನಾತರೀ ಫಾಂತೊಡ್ ಜಾತಲಿ’, ’ಏಕ್ ಚೀಟ್ ಮೊಗಾಳ್ ಆಯೀಕ್’ ಮ್ಹಳ್ಳೆ ಕವಿತಾಜಮೆ ಪರ್ಗಟ್ಲ್ಯಾತ್. ಕೊಂಕಣಿ ಭಾಶಾ ಮಂಡಳಾಚೊ ಪುರಸ್ಕಾರ್, ಗೋವಾ ಕೊಂಕಣಿ ಅಕಾಡೆಮಿಚೊ ಪುರಸ್ಕಾರ್ ಹಾಕಾ ಲಾಭ್‌ಲ್ಲೆ ಪ್ರಮುಕ್ ಪುರಸ್ಕಾರ್.