ಮ್ಹಾಕಾ ಭುಕ್ ಲಾಗ್ಲ್ಯಾ (- ಆನ್ಸಿಟಾ ಒಶಿನ್ ಡಿಸೋಜ್)

[ಕವಿತಾ] ಮ್ಹಾಕಾ ಭುಕ್ ಲಾಗ್ಲ್ಯಾ (- ಆನ್ಸಿಟಾ ಒಶಿನ್ ಡಿಸೋಜ್)

ಎಕಾ ಕವಿಚಿ ಮುಳಾವಿ ಜವಾಭ್ದಾರಿ ಕಸಲಿ? ಭಾತ್ ಕಾಂಡ್ಲ್ಯಾರ್ ತಾಂದು ಜಾತಾ ಮ್ಹಳ್ಳೆಂ ಸಮಾಜೆಂತ್ ಸಗ್ಳೊ ಜಾಣಾ ದೆಕುನ್ ತಿಂಚ್ ಉತ್ರಾಂ ಬರಂವ್ಚೊ ಕವಿ ಜಾತಾಕಾಯ್? ಎಕಾಮೆಕಾಚೊ ಮೋಗ್ ಕರಾ, ಬರಿ ಜಿಣಿ ಜಿಯೆಯಾ ಮ್ಹಳ್ಳೆ ಉಪಾದೆಸ್ ಹರ್ಯೆಕಾ ಆಯ್ತಾರಾ ಪಾದ್ರಿಚ್ಯಾ ಶೆರ್ಮಾವಾಂನಿ ಆಯ್ಕತಾಂವ್, ಆನಿ ಹಿಂಚ್ ಉತ್ರಾಂ ಬರಂವ್ಚ್ಯಾಕ್ ಕವಿತಾ ಮ್ಹಣ್ತಾತ್? ಕವಿಚಿ ಮುಳಾವಿ ಜವಾಭ್ದಾರಿಚ್ ಸಮಾಜೆನ್ ಚಿಂತುಂಕ್ ಸಕಾನಾಸ್ಚೆಂ ಕವಿನ್ ಸ್ವತಾ ಚಿಂತ್ಚೆಂ ಆನಿ ಸವಾಲ್ ಕರ್ಚೆಂ. ಹ್ಯಾ ಸವಾಲಾಂನಿ ಸಮಾಜೆಚ್ಯಾ ಲೊಕಾಕ್ (ಮತ್ ಆಸ್ಚ್ಯಾ) ಚಿಂತುಂಕ್ ಕರ್ಚೆಂ. ಹಿ ಕವಿತಾ ವಾಚುನ್ ಹಿ ಭುಕ್ ಕಸ್ಲಿಕಾಯ್ ಮ್ಹಣ್ತಾಸ್ತಾಂ ಮತಿಂತ್ ಯಾದ್ ಯೆತಾ ’ಮ್ಹಜ್ಯಾ ಘರಾಂತ್ ಭಾರಾ ಜೊತಾಂ, ಹಾಂವ್ ಮಾತ್ರ್ ಮಾಗೊನ್ ಖಾತಾಂ’. ಸಮಾಜೆಚ್ಯಾ ಅಶೀರ್ ಚಿಂತ್ಪಾಚ್ಯಾ ಪರಿಣಾಮಾನ್ ಕಶೆಂ ಆಮಿಂ ದುರಾಶಾ ಆನಿ ಅಬ್ಲೇಶಾಂತ್ ಆಮ್ಚೆಭಿತರ್ ಆಮಿಂಚ್ ಪೊಕೊಳ್ ಜಾವ್ನ್ ಜಿಯೆವ್ನ್ ಆಸಾಂವ್ ಮ್ಹಳ್ಳ್ಯಾಚೆರ್ ಭೋವ್ ಅಪುರ್ಭಾಯೆನ್ ಆರ್ಸೊ ಧರ್ಚಿ ಕವಿತಾ ಹಿ.

ಬಾಯ್ ಆನ್ಸಿಟಾ ಯೆದೊಳ್‌ಚ್ ಕೊಂಕಣಿ ಕವಿತಾಶೆತಾಂತ್ ಒಳ್ಕಿಚೆಂ ಜಾಲಾಂ. ಅಸಲ್ಯೊ ಕವಿತಾ ಖರೆಂಚ್ ಜಾವ್ನ್ ತಿಚ್ಯಾ ಕವಿತಾಪಯ್ಣಾರ್ ಸಭಾರ್ ಅಭಿಮಾನಿಂಕ್ ಲಾಗಿಂ ಹಾಡುಂಕ್ ಕರ್ಚಾಂತ್ ನವಾಲ್ ನಾ. ಚಡ್ತಿಕ್ ಸಮ್ಜೊಂಕ್ ಹಿ ಕವಿತಾ ವಾಚುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಮ್ಹಾಕಾ ಭುಕ್ ಲಾಗ್ಲ್ಯಾ (- ಆನ್ಸಿಟಾ ಒಶಿನ್ ಡಿಸೋಜ್)

ಮ್ಹಾಕಾ ಭುಕ್ ಲಾಗ್ಲ್ಯಾ

ಮ್ಹಾಕಾ ಭುಕ್ ಲಾಗ್ಲ್ಯಾ,

ಪೊಟ್ ಭರ್ನ್ ಜೆವ್ಲ್ಯಾರೀ ಭುಕ್ ಥಾಂಬ್ಲಿ ನಾ!

ಧಾದೊಶಿ ಜೆವಾಣ್ ರಾಂದ್ಲಾಂ ಪುಣೀ,

ಆನಿಕೀ ರುಚಿಕ್ ಆಸ್ತೆಂ ಮ್ಹಳ್ಳಿ ಭುಕ್!

ನಿದೊಂಕ್ ಜಾಯ್ತಿಂ ಕುಡಾಂ ಆಸಾತ್ ತರೀ,

ವಯ್ರ್ ಆನಿ ದೋನ್ ಆಸಾಜೆ ಮ್ಹಳ್ಳಿ ಭುಕ್!

ಘರ್ಚ್ಯಾ ಆಂಗ್ಣಾಂತ್ ಎಕ್ ಗಾಡಿ ರಾವ್ಲ್ಯಾ ತರೀ,

ಸೆಜಾರ್ಯಾ ಸಾರ್ಕಿ ಆನಿಕೀ ವ್ಹಡ್ ಆಸಾಜೆ ಮ್ಹಳ್ಳಿ ಭುಕ್!

ಭಾಂಗಾರ್ ಘಾಲುಂಕ್ ಮನ್ ಒಪ್ಪಾನಾ ತರೀ,

'ಕರ್ನ್ ದವರ್ಲ್ಯಾರ್ ಗರ್ಜ್ ಪಡತ್' ಮ್ಹಳ್ಳಿ ಭುಕ್!

ಘರ್ ಖರ್ಚಾಕ್ ಹಾತ್ ಭರ್ನ್ ಸಾಂಬಾಳ್ ಆಸ್ಲ್ಯಾರೀ,

ಸೆಜಾರ್ನಿ ಪ್ರಾಸ್ ಚಡ್ ಮ್ಹಾಕಾ ಮೆಳಾಜೆ ಮ್ಹಳ್ಳಿ ಭುಕ್!

ಗಾಂವ್ಚ್ಯಾ ಸಾಲಾಂತ್ ಘರ್ಚೆಂ ಕಾರ್ಯೆಂ ಬರ್ಯಾನ್ ಸಂಪಯ್ಲೆಂ ತರೀ,

ರಾವ್ಳೆರಾಂತ್ ಕೆಲ್ಲೆಂ ತರ್ ಆನಿಕೀ ಸೊಭ್ತೆಂ ಮ್ಹಳ್ಳಿ ಭುಕ್!

ಮ್ಹಾಕಾ ಭುಕ್ ಲಾಗ್ಲ್ಯಾ,

ಪೊಟಾಚಿ ಭುಕ್ ತರ್, ಜೆವ್ ಲ್ಲೆಂಚ್ ಥಾಂಬ್ತಿ;

ಪುಣ್ ಭುಕ್ ಮ್ಹಜಿ ದುಡ್ವಾಚಿ, ಪದ್ವೆಚಿ, ಸಂಪತ್ತೆಚಿ,

ಕೆದಿಂಚ್ ಥಾಂಬಾನಾಸ್ತಾಂ ಚಡ್ ಚ್ ಜಾಂವ್ಚಿ ಭುಕ್ ತಿ...

ಹಾಕಾ ಖಾಣ್ ನಾ, ಜೆವಾಣ್ ನಾ,

ಭಾಂಗ್ರಾ ಫೊಂಡಾಂತ್ ಪುರ್ಲ್ಯಾರೀ, ತಿ ಭುಕ್ ಥಾಂಬ್ಚಿ ನಾ...

- ಆನ್ಸಿಟಾ ಒಶಿನ್ ಡಿಸೋಜ್ [ಒಕ್ಟೋಬರ್, 2025]

ಆನ್ಸಿಟಾ ಒಶಿನ್ ಡಿಸೋಜ್: ಮೂಡ್‌ಬೆಳ್ಳೆಚೆಂ ತಾಲೆಂತ್, ಬಿಕೊಮಾಂತ್ ರೇಂಕ್ ಆಪ್ಣಾಯ್ಲಾಂ, ಸಾಂ.ಲುವಿಸ್ ಕೊಲೆಜಿಚ್ಯಾ ಕೊಂಕಣಿ ಸಂಸ್ಥ್ಯಾಥಾವ್ನ್ ಪಿಜಿ ಡಿಪ್ಲೋಮಾ ಕರುನ್ ಚಾರ್ಟಎರ್ಡ್ ಎಕೌಂಟೆಂಟ್ ಜಾವ್ನ್ ’ಡೆಲೋಯ್ಟ್’ ಕಂಪ್ಣೆಂತ್ ಕಾಮ್ ಕರ್ನ್ ಆಸಾ. ಫಿರ್ಗಜ್ ಪತ್ರಾಂನಿ ಸುರ್ವಾತ್ ಕರುನ್ ಕೊಂಕಣಿ ನೆಮಾಳ್ಯಾಂನಿ ಸಯ್ತ್ ಲೇಖನಾಂ, ಕವಿತಾ ಬರಂವ್ಚಾ ಹಿಚೆಂ ಪಯ್ಲೆಂ ಕವಿತೆಚೆಂ ಪುಸ್ತಕ್ ’ತಾಳೊ’ ಪರ್ಗಟ್ಲಾಂ.