अस्तुरी (- अनघा वि. कामत)

[कविता] अस्तुरी (-  अनघा वि. कामत)

एका असतुरेविशीं सभार कविंनी बरयलां आनी काळाथावन काळा पऱ्यांत असतुरेचेर बरयतेले आसतेलेच. कित्याक म्हळ्यार एका असतुरेच्या मिनतेक केदिंच मजूरी ना, तिच्या मोगाक केदिंच मोल ना पूण एक असतुरी कितेंच अपेक्षा करिनासताना अपलो वावर करून वेता.

बाय अनघा वी. कामत कोंकणिंत एक सक्रीय बरवपीण तशेंच वावराडी. हिच्या कवितेंतलीं भावनां आनी विचारांक समजुंक आतां तुकाच सोडतां.

[कविता] अस्तुरी (-  अनघा वि. कामत)

मेटां 

सकाळीं सगळ्यांत पयलीं उठणारी

सगळ्यांत निमणें हांतरुणार पडणारी

येता तशा वाऱ्याक सूप देणारी

आसता ती एक महान अस्तुरी.

कामकश्टान आपलें घर सजयणारी

मायेमोगान घरच्यांकडेन वागणारी

येतल्यावेतल्याक लागीं करणारी

त्यागाची म्हुर्त ती, एक मोगाळ अस्तुरी.

मांयक मांवाक ,देर-जाव घोवाक जपणारी

बापायक, भावभयणांक मानान वागयणारी

घरा-कुळारा ,दोनय घरांनी झिजणारी

नमळायेचें प्रतीक आसा म्होंवाळ अस्तुरी.

भुरग्याबाळांक अपुरबायेन सांबाळणारी

ल्हानपणांत हांसतेमुखान शी,सू काडणारी

मोन्यांनी सगलें मायेन काम हाताळणारी

ममतेने भरिल्ली एक गरीब,शुद्र अस्तुरी.

भुरग्यांनी शूरवीर जावचें अशें म्हणणारी

संवसारांतले उजू मार्ग दाखयणारी

भंय भिरांत मनांतल्यान काडून उडयणारी

क्षत्रीय मनाची ती खंबीर अस्तुरी.

भुरग्याचेर बरे संस्कार घडयणारी

श्रीगणेशा, परवड नित्यनेमान शिकयणारी

भक्तीभावान देखदिण्यो कथाकाणयो सांगणारी

ब्राह्मणाचे गूण आसणारी सद्गुणी अस्तुरी.

भुरग्यांच्या शिक्षणाखातीर धडपडणारी

पयशा-अडक्याचो अर्थ हिशेब जाणणारी

व्यवहार-गिन्यान अचूक तकलेंत घालणारी

वैश्य जात आपणायणारी व्यवहारी अस्तुरी.

सगले धर्म आंगांत कौशल्यान बाणयणारी

घराक आपल्या इंद्रधनूभशेन रंगयणारी

आपलो संवसार सर्गाभशेन मानणारी

सोंशीक,नमळायेची, कुशल,चतूर अस्तुरी.

-  अनघा वि. कामत. [एपरील, २०२३]

अनघा वि. कामत: वृत्तेन शिक्षकी जावनासची बाय अनघा वी. कामत कोंकणी, मराठी, हिंदी, इंगलीश भासेंनी बरयता. कोंकणिच्या वेग-वेगळ्या संस्थ्यांनी खूप वावर करून आसची ही कोंकणी लेखक संघाची सचीव जावनासा