ರಾತ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಪೊಲ್ಯಾಂಕ್ ಲಾಲಿ ಆನಿ

ಒಂಠಾಕ್ ಲಿಪ್ಶ್ಟಿಕ್ ಲಾವ್ನ್

ದಾರಾಂತ್ ಉಬಿಂ ರಾವಿಲ್ಯಾ

ತ್ಯಾ ಶಿಂದ್ಳೆ ಭಶೆನ್

ರಾತ್ ಉದೆಲ್ಯಾ!

ಹ್ಯಾ ರಾತೀಂನ್ ಕಿತೆಂ ಪಳೊವಂಕ್ ನಾಂ?

ಸಕಾಳಚೆ ಉಜಳ್ ಮಾಥ್ಯಾನ್ ಭೊಂವ್ಪಿ

ಸಮಾಜ್ ಸುದಾರಣೆಚೆರ್ ಭಾಶ್ಣಾಂ ಠೊಕ್ಪಿ

ಧವೆ ತೊಪ್ಯೆವಾಲ್ಯಾಂಚ್ಯಾ ನಾಗ್ಡೆ ಕುಡೀಪೊಂದಾ

ತರ್ಣ್ಯೊ ಕಳ್ಯೊ ಚಿಡ್ಡತನಾ

ಹ್ಯಾ ರಾತೀನ್ ಪಳಯ್ಲಾಂ.

ದಿಸಾಚೊ ವೆವ್ಹಾರ್ ಮ್ಹಳ್ಯಾರ್

ರಾತ್ಚಿಂ ನಾಡ್ಪೆನ್ನಾ, ಫಿತ್ರೀಸಾಂ ಆನಿ

ದುಸ್ರ್ಯಾಂಚ್ಯಾ ಘರಾರ್ ಸುಣಿಂ ಚಡೊವ್ಪಾಚಿ

ಜಿ ವೃತ್ತಿ ಆಸ್ತಾ

ತೀಚೆಂ ಮುಳ್ ಹ್ಯಾ ರಾತೀಂನ್ ದೆಖ್ಲಾಂ.

ದೀಸಾಚೆ ವಿರೊಧಿ ಪಕ್ಷಾಚೆ ಮ್ಹಣ್ಪಿ

ರಾತ್ಚೆ ಸತ್ತಾಧಾರಿ ಪಕ್ಷಾಚೆ

ಖಾಂದಾರ್ ಹಾತ್ ಘಾಲೂನ್

ಎಕಾಚ್ ಕೊಪಾಂತ್ ಸೊರೊ ಪಿಯೆತನಾ

ಹ್ಯಾ ರಾತೀನ್ ಪಳಯ್ಲಾಂ.

ಗಿರಾಯ್ಕಾಂಚಿ ಆಸ್ತ್ ಭಾಗೊವ್ನ್, ಪುರೊ ಜಾವ್ನ್

ಝಿಳ್ಮೀಳ್ಟ್ಯಾರ್ ನ್ಹಿದೂಂಕ್ ವಚ್ಪಿ

ತ್ಯಾ ಶಿಂದ್ಳೆ ಭಶೆನ್

ರಾತ್ ಆತಾಂ ಅಸ್ತಾಕ್ ಗೆಲ್ಯಾ...

ತುಮ್ಕಾಂ, ಆಮ್ಕಾಂ ಪರ್ಥೂನ್ ಎಕ್ದಾಂ

ದಿಸಾಚೆ ಉಜಳ್ ಮಾಥ್ಯಾನ್

ಭೊಂವ್ಪಾಕ್ ಮೆಳ್ಚೆಂ ಮ್ಹಣ್!

- ಸಖಾರಾಮ್ ಶೆಣ್ವಿ ಬೋರ್ಕರ್. [ಜುಲಾಯ್, 2020]