ಕವಿತಾकविताPoem

ಸಾಳಕ್ (- ಆನ್ನಿ ದೆ ಕೊಲ್ವಾಲೆ)

[ಕವಿತಾ] ಸಾಳಕ್ (- ಆನ್ನಿ ದೆ ಕೊಲ್ವಾಲೆ)

ಹ್ಯಾ ಸಂಸಾರಾಂತ್ ಎಕಾ ಝಡಾಚಿ ವಳೊಕ್ ಜಾಂವ್ಚಿ ತ್ಯಾ ಝಡಾಂತಲ್ಯಾ ಫುಲಾಥಾವ್ನ್ ವಾ ಫಳಾಥಾವ್ನ್ ಶಿವಾಯ್ ಪಾಳಾಥಾವ್ನ್ ನ್ಹಯ್. ಹಾಂಗಾಸರ್ ಫುಲ್-ಫಳ್ ಮ್ಹಳ್ಯಾರ್ ಕರ್ನಿ. ಕಾಮ್ ಆನಿ ವರ್ತನ್ ವ ಉಲವ್ಪ್. ಪುಣ್ ಪಾಳಾಂ ಮ್ಹಳ್ಯಾರ್ ಶಿಕಪ್, ಸಮ್ಜಣಿ, ಅನ್ಭೋಗ್ ಆನಿ ಸಾರ್‌ಲ್ಲೆ ದೀಸ್. ಜರ್ ಶೆಣಾಂತ್ ಜಲ್ಮಲ್ಲೊ ಕಿಡೊ ಸಯ್ತ್ ತ್ಯಾ ಶೆಣಾಂತ್ ರಾವಾನಾ ಬಗಾರ್ ಭಾಯ್ರ್ ಯೆತಾ, ತ್ಯಾ ಕೆದಾಂತ್ ಉದೆಲ್ಲೆಂ ಫುಲ್ ಸಯ್ತ್ ಉದ್ಕಾಂತ್ ಉಪ್ಯೆತಾ ತರ್ ಮನಿಸ್ ಕಿತ್ಯಾಕ್ ತ್ಯೇಪರಿಂ ಜಿಯೆಂವ್ಕ್ ಸಕಾನಾ ಮ್ಹಳ್ಳೆ ಸಾಂಕೇತಿಕ್ ನಿಯಾಳ್ ದಿಂವ್ಚಿ ಅಪುರ್ಭಾಯೆಚಿ ಕವಿತಾ ಹಿ.

[ಕವಿತಾ] ಸಾಳಕ್ (- ಆನ್ನಿ ದೆ ಕೊಲ್ವಾಲೆ)

ಸಾಳಕ್

ರೆಬ್ಯಾ ಉದ್ಕಾಂತ್

ಫುಲ್ ಫುಲ್ತಾ

ಪಾಳಾಂ ಮುಳಾಂ

ಚಿಕ್ಲಾಂತ್ ರಂಪ್ತಾ

ಚಿಕ್ಲಾ ಉದ್ಕಾಂತ್

ಜಲಂ ಘೆತಾ

ತರಿ ಸದಾಂಚ್

ಉದ್ಕಾ ವಯ್ರ್ ಉಫೆತಾ

ಶೆಣಾಂತ್ಲೊ ಕಿಡೊ

ಶೆಣಾಂತ್ ಉರನಾ

ಚಿಕ್ಲಾಂತ್ ಜಲ್ಮನುಯ್

ತುಕಾ ಕೊಣ್‌ಚ್ ಶಿಣಂ ನಾಂ

ರೊಂಪಿ ಮುಳಾಂ

ಉದ್ಕಾಂತ್ ಆಸನುಯ್

ಕಮಲಾಚೆಂ ಫುಲ್ ತುಂ

ಉದ್ಕಾಂತ್ ಬುಡನಾ

ರೆಬ್ಯಾಂತ್ ರಾವನ್

ರೆಬ್ಯಾಂತ್ ಲೊಳನಾ

ಹೊಚ್ ತುಜೊ ಗುಟ್

ಮ್ಹಾಕಾ ಕಳನಾ

ತುಜೆ ಕಡ್ಲ್ಯಾನ್

ಜಾಯ್ತೆಂ ಶಿಕ್ಚೆಂ

ಕಶ್ಟಾ ಮಯ್ದಾನಾರ್

ಜಯ್ತ್ ಜಿಕ್ಚೆಂ.

- ಆನ್ನಿ ದೆ ಕೊಲ್ವಾಲೆ. [ಎಪ್ರಿಲ್, 2020]
ಆನ್ನಿ ದೆ ಕೊಲ್ವಾಲೆ: ಕವಿ, ಲೇಖಕ್ ತಶೆಂಚ್ ತಿಯಾತ್ರಿಸ್ಟ್ ನಾಮ್ಣೆಚಿ ಗೊಂಯ್ಚಿ ಕವಿ. ಆಮ್ಚೊ ಆವಾಜ್, ಫುಡಾರಿ, ಉಜ್ವಾಡ್, ಗುಲಾಬ್, ದೊರ್ ಮಯ್ನ್ಯಾಚಿ ರೊಟಿ ಪತ್ರಾಂನಿ ಹಿಚಿಂ ಬರ್ಪಾಂ ಪರ್ಗಟ್ಲ್ಯಾಂತ್. 'ಉಮಾಳೆ' (2017) ಹಿಚೊ ಪಯ್ಲೊ ಕವಿತಾಜಮೊ, 'ಶಿಕಾರ್' (2019) ಆಯ್ಲೆವಾರ್ ಪರ್ಗಟ್‌ಲ್ಲೊ ಕವಿತಾಜಮೊ. ವಾಲೆರಿಯೋ ಕಾರ್ವಾಲ್ಹೊ ಕೊಂಕಣಿ ಪುರಸ್ಕಾರ್,