ವೊವ್ಳಿಗ್ (- ಆನ್ಸಿಟಾ ಒಶಿನ್ ಡಿಸೋಜ್)

[ಕವಿತಾ] ವೊವ್ಳಿಗ್ (- ಆನ್ಸಿಟಾ ಒಶಿನ್ ಡಿಸೋಜ್)

ತುಂ ಬರೆಂ ನ್ಹೆಸ್ತಾಯ್ ತರ್ ತುಕಾ ಲೋಕ್ ’ದಾಕವ್ಣಿ ಕರ್ತಾ’ ಮ್ಹಣೊನ್ ಖೊಡಿ ಕಾಡ್ತಲೊ. ತುಂ ಸಾದೆಂ ನ್ಹೆಸ್ತಾಯ್ ತರ್ ತುಕಾ ’ಗರೀಬ್ ವ ಕಂಜೂಸ್’ ಮ್ಹಣೊನ್ ಖೊಡಿ ಕಾಡ್ತಲೊ. ತುಂ ಕುಡಿಂತ್ ಮೊಟೊ ದಿಸ್ತಾಯ್ ತರ್ ತುಕಾ ’ಆಳ್ಶಿ’ ಮ್ಹಣೊನ್ ಖೊಡಿ ಕಾಡ್ತಲೊ. ಆನಿ ತುಂ ಕುಡಿಂತ್ ಬಾರಿಕ್ ಆಸ್ಚಿ ತರ್ ತುಕಾ ’ಪಿಡೆಸ್ತ್’ ಮ್ಹಣೊನ್ ಖೊಡಿ ಕಾಡ್ತಲೊ. ವಾರ್‍ಯಾರ್ ಉಭ್ಚ್ಯಾ ಪಿಶ್ಯಾ ಖೊಲಿಯಾಂಪರಿಂ.. ಸಮಾಜೆಚ್ಯೊ ಜಿಬೊ ಅಶ್ಯೊಚ್. ಹ್ಯಾ ಕವಿತೆಂತ್ ಅಸಲ್ಯಾಚ್ ಜಿಬೆಂಚಿ ಅಪುರ್ಭಾಯೆನ್ ಒಳೊಕ್ ಕೆಲ್ಲಿ ದಿಸೊನ್ ಯೆತಾ.

[ಕವಿತಾ] ವೊವ್ಳಿಗ್ (- ಆನ್ಸಿಟಾ ಒಶಿನ್ ಡಿಸೋಜ್)

ವೊವ್ಳಿಗ್

ತಾರಿಕ್ ವಿಂಚ್ಲಿ, ಕಾಗ್ದಾಂ ಛಾಪ್ಲಿಂ,

ವೊವ್ಳ್ಯಾಂಚಿ ಲಾಂಬ್ ಪಟ್ಟಿ ಬರಯ್ಲಿ;

ಥೊಡ್ಯಾಂಕ್, ಘರಾ ಬಗ್ಲಾಕ್ ವಚೊನ್ ವೊವ್ಳಿಗ್ ಸಾಂಗ್ಲಿ,

ಪಯ್ಶಿಲ್ಯಾಂಕ್ ಫೊನಾರ್, ವಾಟ್ಸಪಾರ್ ಖಬರ್ ದಿಲಿ.

ಹಜಾರ್ ರಾಟಾವಳಿಂ ಮಧೆಂ ಥೊಡಿಂ ನಾಂವಾಂ ಚುಕೊನ್ ಗೆಲಿಂ,

’ತಾಂಕಾಂ ಸಾಂಗ್ಲಾಂ, ಆಮ್ಕಾಂ ಸಾಂಗೊಂಕ್ನಾ’, ಲೊಕಾಂನಿ ಶಿಣ್ ಉಚಾರ್ಲಿ;

’ಆಮ್ಚೆಂ ಎಕ್ ಘರ್ ಚಡ್ ಜಾಲೆಂಗಾಯ್?’ ಎಕ್ಲಿ ದುರಾಂ ಸಾಂಗಾಲಾಗ್ಲಿ,

’ಪಯ್ಸ್ ವೆಚೆಂ ಕೊಣೆಂ? ಸಾಂಗಾನಾತ್‌ಲ್ಲೆಂ ಬರೆಂಚ್ ಜಾಲೆಂ’, ಆನ್ಯೆಕ್ಲಿ ಸೊಂಡಿ ಪಿಂಟಾಯ್ಲಾಗ್ಲಿ.

’ಇತ್ಲ್ಯಾ ಭೊಂಗಾಕ್ ಸಾಂಗ್ಚೆಂ ಕಿತ್ಯಾಕ್?’ ವಾಟ್ಸಪಾರ್ ಆಮಂತ್ರಣ್ ಪಳೆವ್ನ್ ಉಚಾರ್ಲಾಗ್ಲೊ,

’ತೊಂಡಾ ಉತ್ರಾಕ್ ಸಾಂಗೊನ್ ಗೆಲಾ’, ಖಬ್ರೆವಿಣೆಂ ತೆಗಾಂಚೆಂ ಕಾಜಾರ್ ಕೆಲ್ಲೊ ದುರ್ಸಾಲಾಗ್ಲೊ;

’ಮ್ಹಾಕಾ ಪ್ರತ್ಯೇಕ್ ಸಾಂಗೊಂಕ್ ನಾ’, ಬಾಪ್ಲ್ಯಾಚಿ ಬಾಯ್ಲ್ ಪುರ್ಪುರ್ಲಾಗ್ಲಿ,

’ಆಪಯ್ಲ್ಯಾರೀ ಹಾಂವ್ ವಚಾನಾ’, ಪೊರುಂ ಝಗಡ್ಲೆಲಿ ಭಾವೊಜ್ ಮ್ಹಣಾಲಿ.

ಕಾಜಾರ್ ಸಂಪ್ಲೆಂ ವ್ಹಡಾ ಗದ್ದಾಳಾಯೆನ್,

ಲೋಕ್ ಆಯಿಲ್ಲೊ ಮಾಟೊವ್ ಭರ್ನ್;

ಶಾಭಾಸ್ಕಿ ಉಚಾರ್ಲಿ ಥೊಡ್ಯಾಚ್ ಜಣಾನ್,

’ಬೆಷ್ಟೆಂ ಪಯ್ಸೊ ವಿಭಾಡ್’, ಹೆರಾಂ ಪೊಟ್ ಭರ್ನ್ ಗೆಲಿಂ ಠಿಕಾ ಕರುನ್.

- ಆನ್ಸಿಟಾ ಒಶಿನ್ ಡಿಸೋಜ್ [ಎಪ್ರಿಲ್, 2026]

ಆನ್ಸಿಟಾ ಒಶಿನ್ ಡಿಸೋಜ್: ಮೂಡ್‌ಬೆಳ್ಳೆಚೆಂ ತಾಲೆಂತ್, ಬಿಕೊಮಾಂತ್ ರೇಂಕ್ ಆಪ್ಣಾಯ್ಲಾಂ, ಸಾಂ.ಲುವಿಸ್ ಕೊಲೆಜಿಚ್ಯಾ ಕೊಂಕಣಿ ಸಂಸ್ಥ್ಯಾಥಾವ್ನ್ ಪಿಜಿ ಡಿಪ್ಲೋಮಾ ಕರುನ್ ಚಾರ್ಟಎರ್ಡ್ ಎಕೌಂಟೆಂಟ್ ಜಾವ್ನ್ ’ExxonMobil’ ಕಂಪ್ಣೆಂತ್ ಕಾಮ್ ಕರ್ನ್ ಆಸಾ. ಫಿರ್ಗಜ್ ಪತ್ರಾಂನಿ ಸುರ್ವಾತ್ ಕರುನ್ ಕೊಂಕಣಿ ನೆಮಾಳ್ಯಾಂನಿ ಸಯ್ತ್ ಲೇಖನಾಂ, ಕವಿತಾ ಬರಂವ್ಚಾ ಹಿಚೆಂ ಪಯ್ಲೆಂ ಕವಿತೆಚೆಂ ಪುಸ್ತಕ್ ’ತಾಳೊ’ ಪರ್ಗಟ್ಲಾಂ.