[ಮಟ್ವಿ ಕಾಣಿ] ಬೊಂಗುಬಾಯ್ ಆನಿ ತಿಚೊ ಫಟ್ಕಿರೊ ಪೂತ್ [ ವಲ್ಲಿ ಕ್ವಾಡ್ರಸ್]
ಹಿ ಕಾಣಿ ಸೊಂಪಿ, ಇತ್ಲಿ ಸೊಂಪಿ ಮ್ಹಳ್ಯಾರ್ ಚಡ್ತಾವಾಂಕ್ ಸಮ್ಜುಂಕ್ ಜಾಯ್ನಾಸ್ಚಿ. ಸಂಸಾರಾಂತ್ ಫಕತ್ ದುಡು ಕಮಾಂವ್ಚ್ಯಾ/ಜಮಂವ್ಚ್ಯಾ ಧಾಂವ್ಣೆಂತ್, ಆಸ್ತೆಲ್ಯಾಂಕ್, ಹುದ್ದೊ/ಪ್ರತಿಶ್ಟಾ/ನಾಂವ್ ಅನಿ ಮಾನಾ ಪಾಟ್ಲ್ಯಾನ್ ಲೆಂಬೆತೆಲ್ಯಾಂಕ್ ಹಿ ಕಥಾ ಭಿಲ್ಕುಲ್ ಸಮ್ಜುಂಚಿಚ್ ನಾ. ಹಾಂತುಂ ವೆಗ್ಳೆಂಚ್ ಚಿಂತಪ್ ಆಸಾ. ತೆಂ ಜಾಯ್ತ್ಯಾಂಕ್ ಅಥ್ವೆಂಚ್ ಮ್ಹಳ್ಳೆಪರಿಂ ಭಗುಂಕ್ ಪುರೊ ಪುಣ್ ಆಜ್ಕಾಲ್ ದಿಸಾನ್ದೀಸ್ ಬದಲ್ಚ್ಯಾ ಸಂಸಾರಾಂತ್ ಬದಲ್ಚ್ಯಾ ಮೊನ್ಶಾಂಮೊಲಾಂಚಿ ಪಯ್ಲಿ ಶಿಕಾರಿಚ್ ಮನ್ಶಾಪಣ್. ಆನಿ ಹಾಚಿ ಗವಾಯ್ ಆಮ್ಚ್ಯಾ ಗಾಂವಾಂನಿ ಚಡುನ್ ಯೆಂವ್ಚಿಂ ಪ್ರಾಯೆಸ್ತಾಂಚಿಂ ಆಶ್ರಮಾಂ.
ಮೊಂತಿಫೆಸ್ತ್ ಏಕ್ ಕುಟ್ಮಾಚೆಂ ಫೆಸ್ತ್. ಕುಟಮ್ ಮ್ಹಳ್ಯಾರ್ ತೆಂಪಾದಿಂ ಆಸ್ಲೆಂ ಚಿಂತಪ್ ಕೆದ್ನಾಂಗಿ ಬದಲ್ಲಾಂ, ಆತಾಂ ಕುಟಮ್ ಮ್ಹಳ್ಯಾರ್ ಹಾಂವ್, ಮ್ಹಜಿ ಬಾಯ್ಲ್ ಆನಿ ಮ್ಹಜಿಂ ಭುರ್ಗಿಂ - ಇತ್ಲೆಂಚ್. ಬಾಕಿಚೆಂ ಕೊಣಾಕ್ ಕೊಣ್ ನಾ, ಜಶೆಂ ಆಳ್ವಾಕ್ ದೇಂಟ್ ನಾ, ಶಿಂಬ್ರ್ಯಾಕ್ ವೋಂಟ್ ನಾ.
ಹಾಂಗಾಸರ್ ಏಕ್ ಬೊಂಗುಬಾಯ್ ಆಸಾ (ಬೊಂಗುಬಾಯ್ ಮ್ಹಳ್ಯಾರ್ ದಾಂತ್ ನಾತ್ಲ್ಲಿ ಬಾಯ್ಲ್) ಆನಿ ತಿಚೊ ಫಟ್ಕಿರೊ ಪೂತ್ ಆಸಾ. ಹ್ಯಾ ಫಟ್ಕಿರ್ಯಾ ಪುತಾಸವೆಂ ಕಸಲಿ ಕಾಣಿ ಉಭಿ ಜಾಂವ್ಕ್ ಸಕ್ತಾ? ಕಸಲೆಂ ಚಿಂತಪ್ ಉದೆಂವ್ಕ್ ಸಕ್ತಾ ಮ್ಹಳ್ಳೆಂ ಪಾರ್ಕುಂಕ್ ವಾ ಸಮ್ಜುಂಕ್ ತುಕಾಚ್ ಸೊಡ್ತಾಂ.
[ಮಟ್ವಿ ಕಾಣಿ] ಬೊಂಗುಬಾಯ್ ಆನಿ ತಿಚೊ ಫಟ್ಕಿರೊ ಪೂತ್ [ ವಲ್ಲಿ ಕ್ವಾಡ್ರಸ್]
"ತುಂ ಕೊಣಾಕ್ ಮೆಳುಂಕ್ ಆಯ್ಲಾಯ್ ಪುತಾ...?"
ಆಪ್ಲಿ ಖಾಡ್ಕಿ ಹಾಲವ್ನ್ ಎಕ್ಯೀ ದಾಂತ್ ನಾತ್ಲ್ಲೆಂ ಅಪ್ಲೆಂ ತೋಂಡ್ ಉಘಡ್ನ್ ಹಾಸುನ್ ತಿಣೆಂ ವಿಚಾರ್ಚೆಂ ಮ್ಹಾಕಾ ಆಯ್ಕುಂಕ್ಚ್ ನಾಕಾಸ್ಲೆಂ ಜಾಲ್ಲ್ಯಾನ್ ತಿಕಾ ಜಾಪ್ ಸಯ್ತ್ ದೀನಾಸ್ತಾನಾ ಹಾಂವ್ ರೋಸಿಬಾಯೆಚ್ಯಾ ಕುಡಾಕ್ ರಿಗ್ಲ್ಲೊಂ.
ಹ್ಯಾ ಆಧಿಂ ಥೊಡೆಪಾವ್ಟಿಂ ತ್ಯಾ ಪ್ರಾಯೆಸ್ತಾಂಚ್ಯಾ ಆಶ್ರಮಾಕ್ ಹಾಂವ್ ಪಾವ್ಲಾಂ ತರ್ಯೀ ಹಿಕಾ ಪಳೆಂವ್ಚೆಂ ಪಯ್ಲೆಪಾವ್ಟಿಂ.
"ಕೊಣ್? ಬೊಂಗುಬಾಯ್? ತಿ ತಶಿಚ್, ಆಯಿಲ್ಲ್ಯಾ ಗೆಲ್ಯಾ ಸಗ್ಳ್ಯಾಂಕ್ ತಿ ಎಕಾ ನ್ಹಯ್ ಎಕಾ ನಿಬಾನ್ ಉಲಯ್ತಾ" ರೊಜಿಬಾಯೆನ್ ದಿಲ್ಲ್ಯಾ ಜವಾಬೆಂತ್ ಮಾತ್ಸೊ ರಾಗ್ ಆಸ್ಲೊ ಪುಣ್ ’ಬೊಂಗುಬಾಯ್’ ಅಯ್ಕುನ್ ಮ್ಹಜ್ಯಾ ತೊಂಡಾರ್ ಹಾಸೊ ಉದೆಲ್ಯೊ.
ಪುಣ್ ಅನ್ಯೇಕ್ ಪಾವ್ಟಿಂ ಹಾಂವ್ ಹ್ಯಾ ಆಶ್ರಮಾಕ್ ಭೆಟ್ ದಿತಾನಾ ತಿಚೆಂ ಸವಾಲ್ ಬೊಲ್ತೆಂಚ್;
"ತುಂ ಹಾಂಗಾ ಕಿತ್ಯಾಕ್ ಯೆತಾಯ್ ಪುತಾ?"
ಆಯ್ಕುನ್ ಹಾಂವ್ ಮಾತ್ಸೊ ರಾಗಾರ್ ಜಾವ್ನ್ ತಿಕಾಯ್ ಉಲ್ಟೆಂ ಸವಾಲ್ ಕೆಲ್ಲೆಂ;
"ತುಂ ಹಾಂಗಾ ಕಿತ್ಯಾಕ್ ಆಸಾಯ್?"
ತಿಣೆಂ ವ್ಹಳು ಜವಾಬ್ ದಿಲ್ಲಿ; "ಮ್ಹಾಕಾ ಪೂತ್ ನಾ ಪುತಾ"
ಹಾಂವೆಂಯ್ ತಿಚಿ ಜವಾಬ್ ಆಯ್ಕುನ್ ಚಿಂತಿನಾಸ್ತಾನಾಂಚ್ ಜವಾಬ್ ದಿಲ್ಲಿ; "ಮ್ಹಾಕಾಯ್ ಆವಯ್ ನಾ"
ಪುಣ್ ಹಾಂವೆಂ ತಿಚೆವಿಶಿಂ ಕಿತೆಂಚ್ ಚಡ್ತಿಕ್ ಚಿಂತ್ಲ್ಲೆಂಚ್ ನಾ, ಚಿಂತುಂಕ್ಯೀ ನಾಕಾಸ್ಲೆಂ.
"ಬೊಂಗುಬಾಯ್ ಫಟ್ಕಿರಿ, ತಿಕಾ ತೇಗ್ ಪೂತ್ ಆಸಾತ್, ಅಪ್ಲ್ಯಾ ಪುತಾಂಚಿ ಮರ್ಯಾದ್ ವೆತಾ ಕೊಣ್ಣಾ ಮ್ಹಳ್ಳೆ ಭಿರಾಂತೆನ್ ಅಪ್ಣಾಕ್ ಪೂತ್ ನಾ ಮ್ಹಣ್ ತಿ ಫಟ್ ಮಾರ್ತಾ. ಹರ್ಯೆಕಾ ವರ್ಸಾಚ್ಯಾ ಮೊಂತಿಫೆಸ್ತಾಚ್ ಜಾಲ್ಲ್ಯಾ ಆಪ್ಲ್ಯಾ ಬಡ್ಡೆಕ್ ಅಪ್ಣಾಚೊ ಏಕ್ ಪೂತ್ ತರೆಯೀ ಯೆತಲೊ ಮ್ಹಣ್ ಬಡಾಯ್ ಉಲಯ್ತಾ" ರೊಜಿಬಾಯೆನ್ ತಿಚೆವಿಶಿಂ ಉಲಯಿಲ್ಲಿಂ ನಿಮಾಣಿಂ ಉತ್ರಾಂ.
***
’ಕುಟಮ್, ಅಪ್ಲೊ ಪೆಲೊ, ದುಡು, ಆಸ್ತ್, ಭಾಂಗಾರ್ ಸಗ್ಳೆಂ ಕುಡಿಂತ್ ತ್ರಾಣ್ ಆಸ್ತಾ ಮ್ಹಣಾಸರ್ ಮಾತ್ರ್, ನಿತ್ರಾಣಿ ಜಾತಾನಾ ಪರಿಗತ್ಚ್ ಕಂಗಾಲ್ ಕರ್ತಾ’ಆಯ್ಶಿಂ ವರ್ಸಾಚೆಂ ಆವ್ಕ್ ಸಂಪಯಿಲ್ಲಿ ರೊಜಿಬಾಯ್ ಸರೊನ್ ಮಯ್ನೆ ಸಂಪ್ಲ್ಯಾತ್ ತರ್ಯೀ ತಿಚಿಂ ಉತ್ರಾಂ ಯಾದಿಂತ್ ಆಸ್ಲಿಂ ತಶೆಂಚ್ ತಿಚಿ ಯಾದ್ ಮತಿಂತ್ ಜಿವಾಳ್ ಆಸ್ಲಿ.
ಹಾಂವ್ಯೀ ಲೆಕಾಚೆಂ ಜಿವಿತ್ ಜಿಯೆತಾಂಗಾಯ್ ಮ್ಹಳ್ಳೊ ದುಭಾವ್ ಮ್ಹಜ್ಯಾಯ್ ಮತಿಕ್ ಪಾಟ್ಲ್ಯಾ ಥೊಡ್ಯಾ ತೆಂಪಾಂತ್ ಧೊಸ್ಲ್ಲೊ ಆಸಾ. ಲೆಕಾಚೆ ಇಶ್ಟ್, ಲೆಕಾಚೆಂ ಖಾಣ್, ಲೆಕಾಚೆಂ ಉಲವ್ಣೆಂ, ಲೆಕಾಚಿಂ ಫೆಸ್ತಾಂ. ತವಳ್ ತವಳ್ ಹ್ಯಾ ಪ್ರಾಯೆಸ್ತಾಂಚ್ಯಾ ಆಶ್ರಮಾಕ್ ಭೆಟ್ ದಿತಾಲೊಂ ಫಕತ್ ಅಪ್ಲ್ಯಾ ಕುಟ್ಮಾನ್ ಸಾಂಡ್ಲ್ಲ್ಯಾ ರೊಜಿಬಾಯೆಕ್ ಮೆಳುಂಕ್. ರೊಜಿಬಾಯೆಪರಿಂ ಸಭಾರ್ ಹೆರಾಂ ಥಂಯ್ಚರ್ ಆಸ್ಚಿಂ ಮ್ಹಜ್ಯಾ ಗುಮಾನಾಕ್ ಗೆಲ್ಲೆಂಚ್ ನಾ? ಸಗಳ್ಯಾಂಕ್ ಎಕೇಕ್ ಕಾಣಿ ಆಸಾ, ಸಗ್ಳ್ಯಾಂಚಿ ಜಿಣಿ ವೆಗ್ಳಿ.ರೊಜಿಬಾಯ್ ಸರ್ಲ್ಲೆ ಉಪ್ರಾಂತ್ ಮ್ಹಾಕಾ ಆಶ್ರಮಾಕ್ ವೆಚೆಂ ನೀಬ್ ನಾತ್ಲೆಂ, ಮನ್ ಯೆತಾಲೆಂ ಪುಣ್ ’ಕೊಣ್ ಆಸಾ ಅಪ್ಲಿಂ’ ಮ್ಹಳ್ಳ್ಯಾ ಚಿಂತ್ಪಾನ್ ಅಪ್ಣಾಕ್ ಭುಜವ್ನ್ ಆಸ್ತಾನಾಂಚ್ ’ಅಪುಣ್ ಕಿತ್ಲೊ ಸ್ವಾರ್ಥಿ ಮನಿಸ್, ಫಕತ್ ಅಪ್ಣಾಕ್ ಎಕಾ ತೆಂಪಾರ್ ಜೆವಣ್ ದೀವ್ನ್ ಆಸ್ಲ್ಲ್ಯಾ ರೊಜಿಬಾಯೆಕ್ ಮೆಳುಂಕ್ ಯೆತಾಲೊಂ, ಪುಣ್ ಮ್ಹಜೆಪರಿಂಚ್ ರೊಜಿಬಾಯೆನ್ ಕಿತ್ಲೆಶ್ಯಾಂಕ್ ಜೆವಣ್ ದಿಲ್ಲೆಂ ನಾ, ಮನ್ಶಾಪಣ್ ಜಿಯೆನಾತ್ಲ್ಯಾ ಶೆರಾಂನಿ ಮ್ಹಜೆತಸಲೆ ಕಿತ್ಲೆ ತರ್ನಾಟೆ ಯೇವ್ನ್ ಅಪ್ಲೊ ಫುಡಾರ್ ರುತಾಂ ಕರ್ನ್ ಗೆಲ್ಲೆ, ಪುಣ್ ರೊಜಿಬಾಯೆತಸಲಿಂ ಮೆಳ್ಚಿಂ ಅಪ್ರೂಪ್’.
ಸಪ್ತೆಂಬ್ರಾಚೊ ಪಯ್ಲೊ ಹಫ್ತೊ ಜಾಲ್ಲ್ಯಾನ್ ಮರಿಯೆಕ್ ಫುಲಾಂ ಭೆಟಂವ್ಚ್ಯಾ ಭುರ್ಗ್ಯಾಂಕ್ ಬಸವ್ನ್ ಮ್ಹಜ್ಯಾಚ್ ರಿಕ್ಶಾಚೆರ್ ಹಾಂವ್ ವರ್ತಾಲೊಂ. ಹ್ಯಾ ವರ್ಸಾ ಪುಣಿಂ ಮ್ಹಜಿಚ್ ಮ್ಹಳ್ಳಿ ಸ್ವತಾಚಿ ರಿಕ್ಶಾ ಘೆಂವ್ಚಿ ಆಶಾ ಸುಫಳ್ ಕರ್ ಸಾಯ್ಭಿಣಿ ಮ್ಹಣುನ್ ಪಾಟ್ಲ್ಯಾ ತೆರಾ ವರ್ಸಾಂನಿ ಹಾಂವ್ ಮಾಗುನ್ ಆಸ್ಲೊಂ. "ತುಂ ಕಾಜಾರ್ ಜಾ ಪುತಾ, ಘರಾಂತ್ ಏಕ್ ಬಾಯ್ಲ್ ಆಯ್ಲಿ ಮ್ಹಣ್ತಚ್ ದೇವ್ ತಿಚ್ಯಾ ನಶಿಬಾಚೆಂ ದಿತಾಚ್, ಉಪ್ರಾಂತ್ ಭುರ್ಗಿಂ ಜಾಲಿಂ ತರ್, ಹರ್ಯೇಕ್ ಭುರ್ಗೆಂ ಅಪ್ಲೆಂ ಮ್ಹಳ್ಳೆಂ ನಶಿಬ್ ಘೆವ್ನ್ ಯೆತಾ.. ತುಂ ಕೆದಿಂಚ್ ಗರೀಬ್ ಜಾವ್ನ್ ಉರ್ಚೊನಾಂಯ್"
"ಕೊಣ್ ಚೆಡುಂ ರಿಕ್ಶಾವಾಲ್ಯಾ ಚೆಡ್ಯಾಚಿ ಬಾಯ್ಲ್ ಜಾಂವ್ಕ್ ಆಶೆತಾ ಆಯ್ಚ್ಯಾ ಕಾಳಾರ್? ಸಗ್ಳ್ಯಾಂಕ್ ಬಂಗ್ಲೆ/ಫ್ಲೇಟಾಂನಿ ವಸ್ತಿ ಕರುಂಕ್ ಜಾಯ್, ಸಗ್ಳ್ಯಾಂಕ್ ಶೋಪಿಂಗ್ ಮೋಲಾಂಕ್ ವಚುನ್ ಶೊಪಿಂಗಾಚಿ, ಮಲ್ಟಿಪ್ಲೆಕ್ಸಾಂನಿ ಫಿಲ್ಮ್ ಧಾಖಂವ್ಚೆ, ಕಾರಾಂನಿ ಭಂವ್ಡಾಂವ್ಚೆ, ತವಳ್ ತವಳ್ ವಿದೇಶಾಕ್ ಭಂವ್ಡೆಕ್ ವ್ಹರ್ಚೆಚ್ ಜಾಯ್ ಆಸ್ಲೆ ಶಿವಾಯ್, ಹ್ಯಾ ರಿಕ್ಶಾವಾಲ್ಯಾಚ್ಯಾ ಲ್ಹಾನ್ ಕೊಟ್ರೆಚ್ಯಾ ಚ್ಯಾರ್ ವ್ಹಣದೆಭಿತರ್ ಅಪ್ಲಿಂ ಸ್ವಪ್ಣಾಂ ಪಿಡ್ಡ್ಯಾರ್ ಕರುಂಕ್ ಕೊಣಾಕ್ ಜಾಯ್? ಹೆಂಚ್ ಚಿಂತುನ್ ಅಜೂನ್ ಹಾಂವ್ ಅಂಕ್ವಾರ್ ಉರ್ಲಾಂ ರೊಜಿಬಾಯೆ."
ತಿಚ್ಯಾ ಉತ್ರಾಂಕ್ ಹಾಂವೆಂ ಮಾನ್ ದಿಲೊಚ್ ನಾ.ಥೊಡೆ ವರ್ಸಾಂನಿ ತಿಣೆಂ ಪರತ್ ಸಾಂಗ್ಲೆ;
"ಕಾಜಾರ್ ಜಾಯ್ನಾಂಯ್ ತರ್ ಜಾಯ್ನಾಕಾ, ಪುಣ್ ತುಜ್ಯಾ ಉತರ್ ಪ್ರಾಯೆರ್ ತುಜೊ ಆಧಾರ್ ಜಾಂವ್ಕ್, ಎಕಾ ಅನಾಥ್ ಭುರ್ಗ್ಯಾಕ್ ತರ್ಯೀ ಪೊಸ್ಕೊ ಕರ್"
"ತುಕಾ ತುಜಿಂಚ್ ದೊಗಾಂ ಭುರ್ಗಿಂ ನ್ಹಯ್ ರೊಜಿಬಾಯೆ? ಎಕ್ಲೊ ಪೂತ್ ಆನಿ ಧುವ್, ಪುಣ್ ತುಕಾ ಆಜ್ ಕೊಣ್ಚ್ ಆಧಾರ್ ಜಾವ್ನ್ ನಾಂತ್. ತರ್ ಅನಾಥ್ ಭುರ್ಗೊ ಮ್ಹಾಕಾ ಮ್ಹಜ್ಯಾ ಉತರ್ ಪ್ರಾಯೆರ್ ಆಧಾರ್ ಜಾತಲೊ ಮ್ಹಳ್ಳೊ ಭರ್ವಸೊ ಕಸಲೊ? ಹಾಂ ಹಾಂವ್ ಚಿಂತುನ್ ಆಸಾಂ, ತುಕಾಚ್ ಮ್ಹಜಿ ಪೊಸ್ಕಿ ಆವಯ್ ಕರುಂಕ್.."ರೊಜಿಬಾಯ್ ಫಕತ್ ಹಾಸ್ಲಿ ಪುಣ್ ಫುಡೆಂ ಕೆದಿಂಚ್ ಮ್ಹಾಕಾ ಸಮ್ಜಾಂವ್ಚೆಂ ಪ್ರೇತನ್ ತಿಣೆಂ ಸೊಡ್ಲೆಂ.
***
’ಸಕ್ಕಡ್ ಸಾಂಗಾತಾ ಮೆಳ್ಯಾಂ, ಸಕ್ಕಡ್ ಲಾಗಿಂ ಸರ್ಯಾಂ..’ ಕಾಂತಾರ್ ಸುರು ಜಾಲ್ಲೆಥಾವ್ನ್ ಮ್ಹಜ್ಯಾ ಮತಿಂತ್ ಕಿತೆಂಗಿ ಕಾಂತಂವ್ಕ್ ಲಾಗ್ಲೆಂ. ಮೊಂತಿ ಸಾಯ್ಭಿಣಿಚ್ಯಾ ಫೆಸ್ತಾಚೆಂ ಮೀಸ್ ಜಾಲೆಂ, ಕಣ್ಶಿ ಘೆವ್ನ್ ಹಾಂವ್ ಘರಾ ಆಯಿಲ್ಲೊಂಚ್ ತಿ ಆಲ್ತಾರೆರ್ ದವರ್ನ್, ಬೇಕರಿಂತ್ಲಿ ಏಕ್ ಕೇಕ್ ಘೆವ್ನ್ ಪ್ರಾಯೆಸ್ತಾಂಚ್ಯಾ ಆಶ್ರಮಾತೆವ್ಶಿನ್ ಚಮ್ಕಲೊಂ.ಆಶ್ರಮಾಂತ್ ತವಳ್ ತವಳ್ ಬದಲ್ಚಿಂ ತೊಂಡಾಂ ಮ್ಹಾಕಾ ನವಿಂ ನ್ಹಯ್, ನವಿಂ ಯೆತಾಲಿಂ, ಥೊಡಿಂ ಥೊಡೆ ಮಯ್ನೆ, ಥೊಡಿಂ ಥೊಡಿಂ ವರ್ಸಾಂ ಥಂಯ್ ಉರ್ತಾಲಿಂ, ಪಿಡೆಕ್ ವ್ಹಕಾತ್ ಘೆಂವ್ಚಿ ಶ್ಯಾಥಿ ನಾತ್ಲಿಂ ಗುಪ್ತಿಂ ವ್ಹಳ್ವಳುನ್ ಮೊರ್ತಾಲಿಂ. ಗುಪ್ತಿಂ ನಾಸ್ತಾಂ ಪರ್ಗಟ್ ವ್ಹಳ್ವಳ್ಳ್ಯಾರೀ ತಸಲ್ಯಾಂಚೆ ಕಳ್ವಳೆ ರಾನಾಂತ್ಲ್ಯಾ ಬೊಬೆಪರಿಂ, ಆಯ್ಕತಲೊ ನಾ, ಸಮ್ಜತಲೊ ನಾ.
ರಿಕ್ಶಾ ರಾವವ್ನ್ ಹಾಂವ್ ತೆವ್ಶಿನ್ ಹೆವ್ಶಿನ್ ಪಳೆತಾನಾ ಮ್ಹಾಕಾ ಖಂಯ್ಚರ್ಯೀ ತಿ ಬೊಂಗುಬಾಯ್ ದಿಸ್ಲಿನಾ, ಆನಿ ತಿಚೆಂ ಖರೆಂ ನಾಂವ್ಯೀ ನೆಣಾಸ್ತಾಂ, ಕೊಣಾಯ್ಲಾಗಿಂ ವಿಚಾರ್ ಕರ್ಚೊ ತರ್ಯೀ ಕಸೊ ಮ್ಹಣುನ್ ಚಿಂತುನ್ ರೊಜಿಬಾಯೆಚ್ಯಾ ಕುಡಾಚ್ಯಾ ಬಗ್ಲೆಚ್ಯಾ ತಿಚ್ಯಾ ಕುಡಾತೆವ್ಶಿಂ ಗೆಲೊಂ. ಕುಡಾಚ್ಯಾ ಭಾಯ್ಲ್ಯಾ ಪೊರ್ಟಿಕೊಚೆರ್ ಬಾಂಕಾಚೆರ್ ಥೊಡೆ ಪ್ರಾಯೆಸ್ತ್ ಬಸುನ್ ಮ್ಹಾಕಾಚ್ ಚೊಯ್ತಾಲೆ ತರ್ಯೀ ಎಕೆಕ್ಲೆ ಎಕೆಕಾ ಸಂಸಾರಾಂತ್ ಚಿಂತುನ್ ಆಸ್ಲೆ. ಕುಡಾಚೆಂ ಬಾಗಿಲ್ ಉಗ್ತೆಂಚ್ ಆಸ್ಲ್ಲ್ಯಾನ್ ಖಾಟಿಚೆರ್ ನಿದ್ಲ್ಲ್ಯಾ ತಿಕಾ ಪಳೆವ್ನ್ ಹಾಂವೆಂ ತಿಚಿ ವಳೊಕ್ ಧರ್ಲಿ.
ಹರ್ಶೆಂಚ್ಯಾ ಮ್ಹಜ್ಯಾ ಸವಯೆಪರಿಂ ತಾಳ್ಯಾಂತ್ ’ಖೊಂಕ್ಲೆಚೊ ಆವಾಜ್’ ಕೆಲ್ಲೊಚ್, ತಿಣೆಂ ಅಪ್ಲೆಂ ತೋಂಡ್ ದಾರಾತೆವ್ಶಿನ್ ಘುಂವ್ಡಾಯ್ಲೆಂ ಆನಿ ಹಾಸುನ್ ವಿಚಾರಿಲಾಗ್ಲಿ;
"ಕೊಣಾಕ್ ಮೆಳುಂಕ್ ಆಯ್ಲಾಯ್ ಪುತಾ...? ರೊಜು ನಾ ಆತಾಂ"
"ರೊಜಿಬಾಯೆಕ್ ನ್ಹಯ್ ಮಾಂಯ್, ತುಕಾ ಮೆಳುಂಕ್ ಆಯ್ಲಾಂ."ತಶೆಂಚ್ ತ್ಯಾ ಜಾಣ್ತ್ಯಾಂಕ್ ಆಯ್ಕಾಸಾರ್ಕೆಂ ಸಾಂಗ್ಲೆಂ; "ಆವಯ್ಚ್ಯಾ ಜಲ್ಮಾದಿಸಾ ಪೂತ್ ಕೇಕ್ ಘೆವ್ನ್ ಆಯ್ಲಾ"ಬಾಂಕಾಚೆರ್ ಬಸೊನ್ ಆಸ್ಲ್ಲ್ಯಾ ಜಾಣ್ತ್ಯಾಂಚ್ಯಾ ಕುಡಿಕ್ ಕಸ್ಲೆಂಗಿ ತ್ರಾಣ್ ಆಯ್ಲೆಂ ಜಾಯ್ಜಯ್. ಮ್ಹಜಿಂ ಉತ್ರಾಂ ಆಯ್ಕುನ್ ಸಂತೊಸಾನ್ ಮ್ಹಜೆತೆವ್ಶಿನ್ ಆಯ್ಲೆ ಆನಿ ಮ್ಹಜೆಸವೆಂ ತೆಯೀ ಎಕೆಕ್ಲೆಚ್ ತಿಚ್ಯಾ ಕುಡಾಕ್ ರಿಗುನ್ ವಿಚಾರ್ ಕರಿಲಾಗ್ಲೆ;
"ತುಜೆಂ ಮಾಗ್ಣೆಂ ದೆವಾನ್ ಆಯ್ಕಲೆಂ ಬಾಯೆ.." ಎಕ್ಲೊ ಮ್ಹಣಾಲೊ.
"ತುಜ್ಯಾ ಬಡ್ಡೆಕ್ ತುಜೊ ಪೂತ್ ಆಯ್ಲೊಚ್.." ಅನ್ಯೇಕ್ಲೊ ಮ್ಹಣಾಲೊ.
"ಆನಿ ತುಕಾ ಹಾಂಗಾಸರ್ ರಾವಾಜಯ್ ಮ್ಹಣ್ ನಾ... ತುಜೊ ಪೂತ್ ತುಕಾ ಆಪವ್ನ್ ವ್ಹರ್ತಲೊ" ತಿಸ್ರ್ಯಾ ಜಾಣ್ತ್ಯಾಚೆಂ ಉತರ್ ಆಯ್ಕುನ್ ಮ್ಹಜ್ಯಾ ಮತಿಂತ್ ಎಕಾಥರಾಚಿ ಕಾವ್ಜೆಣಿ ಉಭ್ಜಾಲಿ ಪುಣ್ ಕೊಣಾಕ್ಚ್ ಕಿತೆಂಚ್ ಸಾಂಗಾನಾಸ್ತಾನಾ ಅಪ್ಣಾನ್ ಹಾಡ್ಲ್ಲಿ ಕೇಕ್ ಸುಟಯ್ಲಿ.
ಬೊಂಗುಬಾಯ್ ಖಾಟಿಯೆರ್ ಆಡ್ ಪಡ್ಲ್ಲಿ ಕಶ್ಟಾನಿ ಉಟೊನ್ ಬಸ್ಲಿ, ತಿಚ್ಯಾನ್ ಚಲೊಂಕ್ ಜಾಯ್ನಾತ್ಲೆಂ ದೆಕುನ್ ಖಾಟಿಯೆರ್ಚ್ ತಿ ಕೇಕ್ ದವರ್ಲಿ ಆನಿ ತಿಕಾ ತಿ ಕಾತ್ರುಂಕ್ ಕೆಲೆಂ. ಉಪ್ರಾಂತ್ ಹೆರಾಂಸವೆಂ ತಿ ವಾಂಟ್ಲಿ.
***
"ಮ್ಹಜೊ ಪೂತ್ ಲ್ಹಾನ್ ಆಸ್ತಾನಾ ವಿಶೇಸ್ ಪೊಕ್ರಿ ಆಸ್ಲೊ, ಬೊಶಿಯೆಂತ್ಲೆಂ ಶಿತ್ ಶಿಂಪಿನಾಕಾ ಮ್ಹಳ್ಯಾರ್ ಜಾಯ್ ಜಾಯ್ ಮ್ಹಣುನ್ ಶಿಂಪ್ತಾಲೊ, ಘರ್ಚ್ಯಾ ವಣದೆಂನಿ ಇಂಗ್ಳೊ ಆನಿ ಚೊಕಾಂನಿ ಗಿಚ್ಚಿತಾಲೊ, ಆನಿ ಆನ್ ಮಾರ್ಚ್ಯಾಧಿಂ ತೆಂ ಪುಸುಂಕ್ ಮ್ಹಜಿಂ ಕಾಪ್ಡಾಂ ವ್ಹಾಪಾರ್ತಾಲೊ, ಪುಣ್ ಮ್ಹಜೊ ಮೊಸ್ತ್ ಜತನ್ ಘೆತಾಲೊ, ಹಾಂವ್ ತಾಪಾಂತ್ ನಿದ್ಲಿಂ ತರ್, ಬಾವ್ಡೊ ಹೊಚ್ ವಚುನ್ ಆಯ್ದಾನಾಂ ಧುತಾಲೊ, ಘರ್ ನಿತಳ್ ಕರ್ತಾಲೊ, ಆನಿ ಪೇಜ್ ಕರ್ತಾಲೊ..."
ಬೊಂಗುಬಾಯ್ ಉಲಯಿಲ್ಲೆಪರಿಂಚ್ ಹೆರ್ ಪ್ರಾಯೆಸ್ತ್ ಮ್ಹಜೆರ್ ಮಯ್ಪಾಸಾನ್ ಪಳೆತಾಲೆ.
"ಮ್ಹಜಿ ಮಾಂಯ್ ಸಯ್ತ್ ಭಾರಿಚ್ ತ್ಯಾಗಿ, ಜೆದ್ನಾಂ ಮೊಡ್ಕೆಂತ್ ಫಕತ್ ನೀಸ್ ಆಸ್ಲೊ ತರ್, ತೊ ಪುರ್ತೊ ಭುರ್ಗ್ಯಾಂಕ್ ವಾಡುನ್, ತಿ ಉದಾಕ್ ಪಿಯೆವ್ನ್ ನಿದ್ತಾಲಿ"
ಹಾಂವೆಂಯ್ ಫಟ್ ಮಾರುಂಕ್ ಧರ್ಲೆಂ.ಕಾಂಯ್ ವೇಳ್ ಮ್ಹಣಾಸರ್ ಬೊಂಗುಬಾಯೆನ್ ಅಪ್ಲ್ಯಾ ಪುತಾಚಿ ವ್ಹಡ್ವಿಕಾಯೆವಿಶಿಂ ಉಲಯಿಲ್ಲೆಪರಿಂಚ್ ಹಾಂವ್ಯೀ ಫಟ್ಕಿರೊ ಕಾಣಿಯೊ ಗುಂತುನ್ ತಾಂಕಾಂ ಸಾಂಗ್ತಾಲೊಂ. ಆಯ್ಕಲ್ಲೆ ಹೆರ್ ಪ್ರಾಯೆಸ್ತ್, ಥೊಡೆ ನವೆಚ್. ಥೊಡ್ಯಾ ಪ್ರಾಯೆಸ್ತಾಂನಿ ಮ್ಹಾಕಾ ವಿಚಾರ್ಲೆಂ;
"ತುಮಿ ಇತ್ಲ್ಯಾ ಮೊಗಾನ್ ಆಸ್ಲಿಂ ತರ್, ತಿಕಾ ಆಶ್ರಮಾಕ್ ಭರ್ತಿ ಕರುಂಕ್ ಕೊಣೆಂ ಮನ್ ಧಾಕಯ್ಲೆಂ?"
ತೆಂ ಎಕ್ಚ್ ಸವಾಲ್ ಮ್ಹಾಕಾ ಉಭೆಂ ಚಿರುಂಕ್ ಸಕ್ಲೆಂ.
ಹಾಂವ್ ಫಟ್ಕಿರೊಚ್ ಸಯ್, ಪುಣ್ ಕಾಂಯ್ ತಿಕಾ ಇಲ್ಲೊ ಸಂತೊಸ್ ಹಾಡ್ಯಾಂ ಮ್ಹಣುನ್ ಆಜ್ ಆಯಿಲ್ಲೊಂ. ಪುಣ್ ಅಶೆಂ ಸಗ್ಳೆಂ ಘಡಾತ್ ಮ್ಹಣುನ್ ಹಾಂವೆಂ ಸ್ವಪ್ಣಾಂತ್ಯೀ ಚಿಂತ್ಲ್ಲೆಂ ನಾ.
"ರೊಜಿಬಾಯೆ ತುಕಾ ಜಾಲ್ಯಾರ್ ಮ್ಹಜಿ ಪೊಸ್ಕಿ ಆವಯ್ ಕರುಂಕ್ ಹಾಂವ್ ತಯಾರ್" ಮ್ಹಣುನ್ ರೊಜಿಬಾಯ್ ಜೀವ್ ಆಸ್ತಾನಾ ಸಾಂಗ್ಲ್ಲಿಂ ಉತ್ರಾಂ ಮ್ಹಜ್ಯಾ ಅಂತಸ್ಕರ್ನಾಚ್ಯಾ ಕಾನಾಂನಿ ಗಾಜ್ಲಿಂ.
"ವ್ಹಯ್, ಮ್ಹಜಿಚ್ ಚೂಕ್ ತಿ, ಮ್ಹಜ್ಯೆ ಆವಯ್ಶಿವಾಯ್ ಮ್ಹಜೆಂ ಜಿವಿತ್ಚ್ ಅಧುರೆಂ ಜಾಲ್ಲ್ಯಾನ್ ಆಜ್ ತಿಚ್ಯಾ ಜಲ್ಮಾದಿಸಾಚ್ ತಿಕಾ ಮ್ಹಜ್ಯಾ ಘರಾ ಆಪವ್ನ್ ವ್ಹರುಂಕ್ ಆಯ್ಲಾಂ" ಜಮೊ ಆಸ್ಚ್ಯಾ ಪ್ರಾಯೆಸ್ತಾಂಚ್ಯಾ ತೊಂಡಾರ್ ಮ್ಹಾಕಾ ಸಮ್ಜುಂಕ್ ಜಾಯ್ನಾತ್ಲಿಂ ಭಗ್ಣಾಂ ಉದೆಲಿಂ.
ಹಾಂವ್ ಆಶ್ರಮಾಚ್ಯಾ ವ್ಹಡಿಲಾಕ್ ಮೆಳುಂಕ್ ವೆಚ್ಯಾರ್ ಆಸ್ಲೊಂ..
ವಲ್ಲಿ ಕ್ವಾಡ್ರಸ್: ಪಾಟ್ಲ್ಯಾ ತೀಸ್ ವರ್ಸಾಂನಿ ಕಾಣ್ಯೆಗಾರ್ ಜಾವ್ನ್ ಲಗ್ಬಗ್ ದೊನ್ಶಿಂ ಮಟ್ವ್ಯೊ ಕಥಾ ಬರಯ್ಲ್ಯಾತ್, ಕಾಂಯ್ ಪಂದ್ರಾ ಕಾಣ್ಯೊ ಕಾನಡಿಕ್ ಅನುವಾದಿತ್ ಜಾವ್ನ್ ಪರ್ಗಟ್ಲ್ಯಾತ್, ಚ್ಯಾರ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಆನಿ ’ಬಂಧ್’ ಮ್ಹಳ್ಳೆ ಚ್ಯಾರ್ ಕಾಣ್ಯಾಜಮೆ ಪರ್ಗಟ್ಲ್ಯಾತ್, ’ಸತಾಂ ಆನಿ ಖತಾಂ’ ಮ್ಹಳ್ಳೊ ನೈತಿಕ್ ಮೌಲ್ಯಾಂಚ್ಯಾ ಕಾಣ್ಯಾಜಮೊ ಪರ್ಗಟ್ಲಾ. ’ಮುಖಾಂ’, ’ಕಥಾಝರ್’, ’ಕಥಾಮೃತ್’, ’ಕಥಾಪಾಠ್’ ಹಾಣೆಂ ಚಲಯಿಲ್ಲಿಂ/ಚಲಂವ್ಚಿಂ ಅಂಕಣಾಂ. ದಾಯ್ಜ್.ಕೊಮ್ (2004-2011) ಅನಿ ಪಯ್ಣಾರಿ.ಕೊಮ್ (2015-)ಚೊ ಸಂಪಾದಕ್.
