[ಚ್ಯಾರ್ ರಾಜ್ಯಾಂನಿ]

ಚ್ಯಾರ್ ರಾಜ್ಯಾಂನಿ ಪಾಂಚ್ ಲಿಪಿಯಾಂನಿ ವಾಪಾರ್ ಜಾಂವ್ಚಿ ಆಮ್ಚಿ ಮಾಯ್‌ಭಾಸ್ ಕೊಂಕ್ಣೆಚಿ ಸೊಭಾಯ್ ಅನಿ ಗ್ರೇಸ್ತ್‌ಕಾಯ್ ಸಮ್ಜಲ್ಲೆ ಕೆದಿಂಚ್ ಕೊಂಕ್ಣಿ ಮಾಯ್‌ಭಾಸೆಕ್ ಸಾಂಡುನ್ ಗೆಲ್ಲೆನಾಂತ್ ವಾ ವೆಚೆಯ್ ನಾಂತ್. ಹ್ಯಾ ಕೊಂಕ್ಣಿ ಭಾಸೆಚಿ ಗ್ರೇಸ್ತ್‌ಕಾಯ್ ಸಮ್ಜುಂಕ್‌ಜಾಯ್ ತರ್, ಆಮಿ ಆಮ್ಚ್ಯೊ ಮೆರೊ ಉತ್ರೊನ್ ಹೆರ್ ಪ್ರಾಂತ್ಯಾಂನಿ, ಹೆರ್ ಬೊಲಿಯಾಂನಿ ವಾಪಾರ್ ಜಾಂವ್ಚ್ಯಾ ಕೊಂಕ್ಣಿ ಭಾಸೆಚಿ ಗ್ರೇಸ್ತ್‌ಕಾಯ್ ವಳ್ಕುಂಕ್ ಜಾಯ್.

ಮಾಲ್ವಾಣಿ ಪ್ರಾಂತ್ಯಾಂತ್ ಜಾಯ್ತೆ ಕೊಂಕ್ಣಿ ಲೋಕ್ ತಶೆಂಚ್ ಕೊಂಕ್ಣಿ ಸಾಹಿತ್ ರಚ್ಪಿ ಆಸಾತ್, ಬಾಬ್ ರುಜಾರಿಯೊ ಪಿಂಟೊ ಏಕ್ ನಾಮ್ಣೆಚೊ ಕವಿ, ’ದರ್‍ಯಾದೆಗೆರ್’, ’ಮಾವುಲೀ’, ’ಆಮೀ ಮಾಲ್ವಾಣೀ’ , ಮ್ಹಾಜಾ ಕೊಕಣಾ (ಮಾಲ್ವಾಣಿ ಗಾಣಾ), ’ಆಮೀ ಮಾಲ್ವಾಣೀ’ ಹಾಚಿಂ ಪರ್ಗಟ್ ಜಾಲ್ಲಿಂ ಪ್ರಮುಕ್ ಪುಸ್ತಕಾಂ. ಜಾಯ್ತ್ಯಾ ಕವಿಗೋಶ್ಟಿಂನಿ ಹಾಣೆಂ ವಾಂಟೊ ಘೆತ್ಲಾ.

ಹಿ ಕವಿತಾ ಸಯ್ತ್ ಕೊಂಕ್ಣಿ ಭಾಸೆಚಿ ವ್ಹಡ್ವಿಕ್ ಉಚಾರ್ತಾ, ಆನಿ ಕೊಂಕ್ಣಿ ಭಾಸೆಚ್ಯಾ ಮೊಗಾರ್ ಪಡ್ಲೆಲ್ಯಾಂಕ್ ಖರೆಂಚ್ ಜಾವ್ನ್ ಅಭಿಮಾನ್ ಭಗಾಶೆಂ ಕರ್ತಾ.

ಕೊಂಕಣಾಂತ್ ಮ್ಹಜೊ ಗಾಂವ್

ಕೊಂಕಣಿ ಮ್ಹಜಿ ಭಾಸ್

ಖಾರಿ ಧವಿ ಮಾತಿ

ವಾರ್‍ಯಾಕ್‌ಯೀ ನುಸ್ತ್ಯಾಚೊ ವಾಸ್

ಮಾತ್ಯಾರ್ ಲಾಲ್ ಆಬೊಲಿ

ಸೊಭೀತ್ ಶೆವತ್ಯಾಚಿ ಪಾತಿ

ಕೆನ್ನಾಯ್ ಸುರಂಗಾಚೆ ವಳೆಸಾರ್

ದಿಸತಾತ್ ಬಾಯ್ಲಾಂಚ್ಯಾ ಹಾತಿಂ

ದರ್ಯಾಂಚೊ ಖಾರೊ ವಾರೊ

ಶೀಣ ಸಗಳೆಂ ವೋತ್

ಶೀತಳ್ ಗಾರಪಾಚಿ ಸಾವಳಿ

ಆವಯಚೊ ಮೋಗ್ ದಿತಾ

ಉಂಚ್ ನಾರಳ್ ಪೊಕಳೀಂ

ವಾರೊ ಮೊಗಾನ್ ಘೆಲ್ಯಾತ್

ಕೆಳೀ, ಕಾಜೂವ್ಯೊ ಬಾಗೊ

ಘನಯಾ ಬರೀ ಉಲಯತಾ

ನುಸ್ತೆಂ ಮಾರೂನ್ ರಾಂಪಣಕಾರ್

ಘರ್ ಆಪಲೆಂ ಚಲಯತಾ

ಸಗಳೊ ಲೋಕ್ ಕೊಂಕಣಿ

ಮಾಯೆ ಮೊಗಾನ್ ಉಲಯ್ತಾ

-  ರುಜಾರಿಯೊ ಪಿಂಟೊ, ಮಾಲ್ವಾಣ್ [ಅಗೋಸ್ತ್, 2017]

ರೊಜಾರಿಯೊ ಪಿಂಟೊ: ಮಾಲ್ವಾಣಿ ಪ್ರಾಂತ್ಯಾಂತ್ ಜಾಯ್ತೆ ಕೊಂಕ್ಣಿ ಲೋಕ್ ತಶೆಂಚ್ ಕೊಂಕ್ಣಿ ಸಾಹಿತ್ ರಚ್ಪಿ ಆಸಾತ್, ಬಾಬ್ ರುಜಾರಿಯೊ ಪಿಂಟೊ ಏಕ್ ನಾಮ್ಣೆಚೊ ಕವಿ, ’ದರ್‍ಯಾದೆಗೆರ್’, ’ಮಾವುಲೀ’, ’ಆಮೀ ಮಾಲ್ವಾಣೀ’ , ಮ್ಹಾಜಾ ಕೊಕಣಾ (ಮಾಲ್ವಾಣಿ ಗಾಣಾ), ’ಆಮೀ ಮಾಲ್ವಾಣೀ’ ಹಾಚಿಂ ಪರ್ಗಟ್ ಜಾಲ್ಲಿಂ ಪ್ರಮುಕ್ ಪುಸ್ತಕಾಂ. ಜಾಯ್ತ್ಯಾ ಕವಿಗೋಶ್ಟಿಂನಿ ಹಾಣೆಂ ವಾಂಟೊ ಘೆತ್ಲಾ.