’ಸರ್ಗ್ ಭಗುಂಕ್ ಸರ್ವಾಂಕ್ ಜಾಯ್,

ಕಾನಡಿಂತ್ ಏಕ್ ಸೊಭಿತ್ ಸಾಂಗ್ಣಿ ಆಸಾ ’ದೂರದ ಬೆಟ್ಟ ನುಣ್ಣಗೆ’ ಮ್ಹಳ್ಯಾರ್ ಪಯ್ಸಿಲೊ ಗುಡೊ ಸಪಾಟ್/ಸೊಭೀತ್ ಮ್ಹಣುನ್. ಹಿ ಅಸ್ಕತ್ ಮನ್ಶ್ಯಾಚ್ಯಾ ಅಸ್ಕತ್ ಚಿಂತ್ಪಾಚೊ ಫಳ್. ಆಮ್ಚ್ಯಾ ದೀಸ್ಪಡ್ತ್ಯಾ ಜಿಣ್ಯೆಂತ್ ಸಯ್ತ್ ಆಮಿ ಕಿತ್ಲೆಶೆ ಪಾವ್ಟಿಂ ಚಿಂತ್ಚೆಂ ಆಸಾ ಕೀ; ಅಪುಣ್ ಮಾತ್ರ್ ಜಿಣ್ಯೆಂತ್ ಸಂಘರ್ಶ್ ಕರುನ್ ಆಸಾ, ಹೆರ್ ಸರ್ವ್ ಭೋವ್ ಸಂತೊಸಾನ್/ಮಜೇನ್ ಜಿಯೆವ್ನ್ ಆಸಾತ್ ಮ್ಹಣುನ್. ಚಲುನ್ ವೆಚೆ ಗಾಡಿಯಾಂನಿ ವೆತೆಲ್ಯಾಂಚೆರ್, ಗಾಡಿಯಾಂನಿ ವೆತೆಲೆ ವಿಮಾನಾಂನಿ ವೆತೆಲ್ಯಾಂಚೆರ್, ಗಾಂವ್ಚೆ ಪರ್ಗಾಂವಾಂಚೆರ್, ಜೊಪ್ಡ್ಯಾಂನಿ ಜಿಯೆತೆಲೆ ಗುಡುಲಾಂನಿ ಜಿಯೆತೆಲ್ಯಾಂಚೆರ್, ಗುಡ್ಸುಲಾಂನಿ ಜಿಯೆತೆಲೆ ಚಾಲಿಂನಿ ಜಿಯೆತೆಲ್ಯಾಂಚೆರ್, ಚಾಲಿಂನಿ ಜಿಯೆತೆಲಿಂ ಕಾಲೊನಿಂನಿ ಜಿಯೆತೆಲ್ಯಾಂಚೆರ್, ಕಾಲೊನಿಂನಿ ಜಿಯೆತೆಲಿಂ ಫ್ಲೇಟಾಂನಿ ಜಿಯೆತೆಲ್ಯಾಂಚೆರ್, ಫ್ಲೇಟಾಂನಿ ಜಿಯೆತೆಲಿಂ ಬಂಗ್ಲ್ಯಾಂತ್ ಜಿಯೆತೆಲ್ಯಾಂಚೆರ್, ಬಂಗ್ಲ್ಯಾಂನಿ ಜಿಯೆತೆಲಿಂ ರಾವ್ಳೆರಾಂನಿ ಜಿಯೆತೆಲ್ಯಾಂಚೆರ್ ಅಶೆಂಚ್ ಚಿಂತಾತ್....

ಪಯ್ಸಿಲೊ ಗುಡೊ ಸೊಭಿತ್...

ಪುಣ್ ಜಶೆಂಚ್ ಕೊಂಕ್ಣೆಂತ್ ಸಾಂಗಾಪ್ ಆಸಾ ’ಮನ್ಶಾಸವೆಂ ಜಿಯೆವ್ನ್ ಪಳೆ.. ಉದ್ಕಾಂತ್ ದೆಂವೊನ್ ಪಳೆ...’. ಅಸೆಂ ಮ್ಹಣ್ತಾಸ್ತಾಂ ಮ್ಹಜಿಂಚ್ ಥೊಡಿಂ ಉತ್ರಾಂ ಯಾದಿಕ್ ಯೆತಾತ್;

’ಸರ್ಗ್ ಭಗುಂಕ್ ಸರ್ವಾಂಕ್ ಜಾಯ್,

ಪುಣ್ ಮೊರೊಂಕ್ ಮಾತ್ ಕೊಣಾಕ್‌ಚ್ಚ್ ನಾಕಾ’

ತಾಕೊಡೆಚೊ ನೆರಿ ನಜ್ರೆತ್ ಮುಂಬಯಾಂತ್ಲ್ಯಾ ಜಿಣ್ಯೆ ಸಂಘರ್ಶಾಂತ್ ಕಾಂಯ್ ಥೊಡೊ ವೇಳ್ ಅಪ್ಲ್ಯಾ ಕವಿತೆಚ್ಯಾ ಅಭಿವ್ಯಕ್ತೆಕ್ ಧಾಂಬುನ್ ಧರ್ನ್ ಜಿಯೆಲ್ಲೊ ಆಸ್ಯೆತಾ, ಪುಣ್ ತಾಚೆಥಂಯ್ ಆಸ್ಚಿ ನದರ್ ತಿಚ್ಚ್ ಕವಿಚಿ, ಆನಿ ಹಾಚಿ ಗೊವಾಯ್ ದಿಂವ್ಚಾಕ್ ಹಿ ಕವಿತಾ ವಾಚುಂಕ್ ಆನಿ ಪಾರ್ಕುಂಕ್ ತುಕಾಚ್ಚ್ ಸೊಡ್ತಾಂ.

ಭಗ್ಚೆಂ ಆಸಾ....

ದೊಂಗೊರ್ ಯೆಕ್

ವೋಲ್ ಕಶಿ

ಪಾಚ್ವ್ಯಾ ತಣಾಚಿ....

ಮುಳಾಕ್ ಪಾವ್ಲ್ಯಾರ್ ಕಳ್ತಾ

ವಾಟ್ ಮ್ಹಣೊನ್....

ಕಿತ್ಲ್ಯಾ ಕಾಂಟ್ಯಾ ಫಾತ್ರಾಂಚಿ ?

ಭಗ್ಚೆಂ ಆಸಾ....

ಕಾಂಯ್ ಚಂದ್ರೆಮಾಚೆರ್ ಚಡ್ಯಾಂ

ಆನಿ ಥಂಯ್ಸರ್ ಬಸೊನ್

ಮಜ಼ೇನ್ ಇಲ್ಲೆಂ ಆಮಾಲ್ ಸೆವ್ಯಾಂ....

ಅಂತ್ರಾಳಾರ್ ಉಭ್ಲ್ಯಾರ್ ಮಾತ್ರ್

ಕಳಾತ್ ಥಂಯ್ಚಿ ಉಂಚಾಯ್

ಶಿವಾಯ್... ಆನಿ ಭಿರಾಂತ್ ಸಕ್ಲಾ ಪಾವ್ತಾಸರ್

ಭಗ್ಚೆಂ ಆಸಾ....

ಸೆಜಾರಿ ಬರೊ ತಾಂಕಿವಂತ್

ದವರ್‌ಲ್ಲೆಂ ಆಸಾ ತಾಣೆಂ

ಜಾಯಿತ್ತೆಂ ಪುಂಜಾವುನ್....

ತಾಕಾ ಭೆಟ್ಲ್ಯಾರ್ ಕಳಾತ್

ತಾಚೆ ಭಿತರ್ಲೆಂ ತೆಂ ಝುಜ್ ?

ವಾಂಚವ್ಕ್ ರಿಣಾಂತ್ ಬುಡ್ಲೆಲೆಂ

ತಾಚೆಂ ಘರ್‌ದಾರ್

ಭಗ್ಚೆಂ ಆಸಾ....

.......?

- ನಜ್ರೆತ್ ನೆರಿ ತಾಕೊಡೆ [ಮಾರ್ಚ್, 2016]