उदका थेंबो

सांकेतीक इमाजी व्हापारून आध्यात्मीक विचार कवितेंनी आयल्यार ताचो गुंडायेचो अर्थ करुयेता. जेदनां एक काण्येगार, पदां-घडपी असली कविता घेवन येता तर ती कविता फकत एक पावटीं मात न्हय, बगार परत परत वाचुंक मन येता.

अपरूप कवी, पदां-घडपी जोन आर. मसकरेन्हस असलिच्च एक कविता हांगासर घेवन आयला, करेज्म, आनी ह्या काळाक कारण जाल्ल्या जेजुच्या मूळ तत्वांचेर एकोडो आर्सो धर्चें प्रेतन हांगासर केल्लें दिसून येताना, हाचो स्वाद चाकुंक तुमकांच सोडतां.

उदका थेंबो

आळवा पानार उदका थेंबो

कालवा रुकार जेजू उबो

थोड्योच घडी थेंब्याक पानार

निमाण्यो वोडी जेजूक खुर्सार.

आळवा पानार धर्णी थावन उभार

मेजता अवक थेंबो वार‍यार

रुका खुर्सार, देव पूत्र दोंग्रार

सोडवण दीवंक मनशा रुपार

पान हाल्ता, थेंबो गळता

धर्णीर मात्येंत विलीन जाता

पृथवी कांप्ता, जीव उभता

क्रीसत मनशाक सडवण दिता.!!

- जोन आर. मसकरेन्हस, जेरिमेरी [एपरील, २०१७]

जोन आर. मसकरेन्हस: मुंबयांतल्या जेरिमेरी फिर्गजेंत सर्वांक वळकिचें नांव, वेवेगळ्या तालेंतांनी नांव वेल्लो, काण्येगार, नाटकिसत, निर्देशक, नट, पदां-घडपी, गावपी, संगीत निर्देशक, अपरूप कवी, विचार‌वंत चिंत्पी तशेंच समाजेची काळजी आसचो शिकपी प्रतिभावंत. अपरूपायेन तर‌यी थोडीं अपुर्भायेचीं कविता बरवंक सक्ता.