ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
8. ಕೊಂಕ್ಣಿ ಸಾಹಿತ್ಯಾಚೆರ್ ಏಕ್ ಮುಕ್ತ್ - ಉಲವ್ಪ್[ಆಗೋಸ್ತ್
ಧಾ ತಾರಿಕೆರ್ ಬಿಸ್ಪಾಚ್ಯಾ ಘರಾ ಚಲ್ಲ್ಲ್ಯಾ, ಕೊಂಕ್ಣಿ ಲೇಖಕಾಂಚೊ ಎಕ್ವಟಾನ್ ರಾಕ್ಣೊ ಹಫ್ತ್ಯಾಳೆಂ ಆನಿ ಸಾಂ. ಲುವಿಸ್ ಕಾಲೆಜಿಚ್ಯಾ ಸಹಯೋಗಾನ್ ಮಾಂಡುನ್ ಹಾಡ್ಲ್ಲ್ಯಾ ’ಕೊಂಕ್ಣಿ ಲೇಖಕಾಂಚೆಂ ಮುಕ್ತ್ ಉಲೊವ್ಪ್" ಕಾರ್ಯಾಂತ್ ಎಚ್ಚೆಮ್ಮಾನ್ ಸಾದರ್ ಕೆಲ್ಲೊ ಪ್ರಬಂಧ್ ಹೊ. ಪ್ರಸ್ತುತ್ ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ಘಡ್ಚ್ಯೊ ವೀದ್ವಾವ್ಳಿ ಪೂರಾ ಹಾಂತು ಸ್ಪಶ್ಟ್ ತರಾನ್ ಸಾಂಗ್ಲ್ಯಾತ್.]
ಸಾಹಿತಾಂತ್ ಮಟ್ಟ್ ಜಾಇಜೆ ಮ್ಹಳ್ಳ್ಯಾ ಚಿಂತ್ಪಾನ್ ಮ್ಹಾಕಾ ಆಜ್ ಹಾಂಗಾ ಹಾಡ್ನ್ ರಾವಯ್ಲಾಂ. ದೆಕುನ್ ಹಾಂವೆಂ ಸಾಹಿತಾಂತ್ ಮಟ್ಟ್ ಕಿತ್ಯಾಕ್ ಜಾಇಜೆ ಮ್ಹಳ್ಳೆಂ ಪಯ್ಲ್ಯಾನ್ ಪಯ್ಲೆಂ ಸ್ಪಶ್ಟ್ ಕರಿಜೆ. ಕೊಂಕ್ಣೆಚ್ಯಾ ಸಂದರ್ಬಾರ್ ಸಾಂಗ್ಚೆಂ ತರ್ ಕಸಲೆಂಇ ಶಾಸ್ತ್ರೀಯ್ ಶಿಕಪ್ ನಾಸ್ತಾನಾ ಬೋವ್ಶಾ ಹಾಂಗಾ ಕೊಣೆಂಇ ಸುಲಭಾಯೆನ್ ಸಾಹಿತಿ ಜಾವ್ಯೆತ್. ಬರಂವ್ಕ್ ಕಾಗತ್ ಆನಿ ಪೆನ್ನ್, ಆನಿ ಪೆನ್ನಾಂತ್ ಇಂಕ್ ಆಸ್ಲ್ಯಾರ್ ಪುರೊ. ದಾಕ್ತೆರ್ ಜಾಇಜೆ ತರ್ ದಾಕ್ತೆರ್ಗಿ ಶಿಕಜೆ ಪಡ್ಟಾ, ಇಜ್ನೆರ್ ಜಾಇಜೆ ತರ್ ಇಜ್ನೆರ್ಗಿ ಶಿಕಜೆ ಪಡ್ಟಾ. ಪುಣ್ ಬರವ್ಪಿ ಜಾಂವ್ಕ್ ಕಸಲ್ಯಾ ಮುಳಾವ್ಯಾ ಶಿಕ್ಪಾಚಿಇ ಗರ್ಜ್ ನಾ- ಅಶಿ ರಾವ್ಲ್ಯಾ ಆಯ್ಚಿ ಗತ್. ದೆಕುನ್ ಆಮ್ಕಾ ಕೊಂಕ್ಣೆಂತ್ ಆಸ್ಚ್ಯಾ ತಿತ್ಲೆಂ ಬೇಜವಾಬ್ದಾರೆಚೆಂ ಬರಪ್ ಖಂಯ್ಚ್ಯಾಇ ಹೆರ್ ಭಾಶೆಂತ್ ಪಳೆಂವ್ಕ್ ಮೆಳನಾ.
ಆಮ್ಚೊ ಕೊಂಕ್ಣಿ ಸಂವ್ಸಾರ್ ಬೋವ್ ಲ್ಹಾನ್. ಹಾಂಗಾ ಬರಯ್ತಲೆಚ್ ವಾಚ್ಪಿ ಆನಿ ವಾಚ್ಪಿಚ್ ಬರಯ್ತೆಲೆ. ಖಂಯ್ಚ್ಯಾ ಕೊಂಕ್ಣಿ ಕಾರ್ಯಕ್ರಮಾಕ್ ಗೆಲ್ಯಾರ್ಇ ತೀಂಚ್ ಸದಾಂಚಿಂ ಪಂಚೀಸ್ ತೊಂಡಾಂ. ತಾಂತ್ಲೆಚ್ ಉಲಯ್ತಲೆ, ತಾಂತ್ಲೆಚ್ ಆಯ್ಕಾತಲೆ ಅನಿ ತಾಂತ್ಲೆಚ್ ಸಂವಾದ್ ಕರ್ತೆಲೆ. ದೊ. ವಿಲ್ಲಿಯಂ ದ ಸಿಲ್ವಾಚ್ಯಾ ಭಾಶೆಂತ್ ಸಾಂಗ್ಚೆಂ ತರ್ ’ಎಕಾಂತ್ಚ್ ಮುತ್ತಾಲೆ’. ಅಸಲ್ಯಾ ಸಂದಿಗ್ಧ್ ಪರಿಗತೆಂತ್ ದಾಕ್ಶೆಣ್ ಮಾತ್ ಕಾಮ್ ಕರ್ತಾ. ಸೊಡ್ಲ್ಯಾರ್ ಕನ್ನಡಾಂತ್ ಸಾಂಗ್ತಾತ್ ತಿ ’ಮುಖಸ್ತುತಿ’. ನಿಶ್ಟುರಾಯೆನ್ ಕಿತೇಂಇ ಹಾಂಗಾ ಸಾಂಗ್ಚೆ ಬರಿ ನಾ. ಸಾಂಗ್ಲ್ಯಾರ್ ಕೊಣಾಕ್ ಬೆಜಾರ್ ಜಾತಾ ಮ್ಹಳ್ಳಿ ದಾಕ್ಶೆಣ್. ಕೆನ್ನಾ ಪರ್ಯಾಂತ್ ಕೊಂಕ್ಣೆಚೊ ಸಂವ್ಸಾರ್ ಹ್ಯಾ ದಾಕ್ಶೆಣೆಂತ್ಲೊ ಭಾಇರ್ ಯೇನಾ, ತೆದೊಳ್ ಪರ್ಯಾಂತ್ ಕೊಂಕ್ಣಿ ಸಾಹಿತಾಂತ್ ಎಕಾ ಮಟ್ಟಾಕ್ ಪಾವೊಂಕ್ ಸಾದ್ ನಾ. ಮಟ್ಟ್ ಕಿತೆಂ ಮ್ಹಣ್ ಸಮ್ಜಜೆ ತರ್ ಪಯ್ಲ್ಯಾನ್ ಪಯ್ಲೆಂ ಆಮಿ ದಾಕ್ಶೆಣ್ ಸೊಡಿಜೆ.
ತರ್ ಮಟ್ಟ್ ಮ್ಹಳ್ಯಾರ್ ಕಿತೆಂ? ಸಾಹಿತಾಕ್ ಸಾಹಿತಾಚಿ ಒಳೊಕ್ ದಿಂವ್ಚೆಂಚ್ ಸಾಹಿತಾಚೆಂ ಮಟ್ಟ್. ಬರಇಲ್ಲೆಂ ಸಗ್ಳೆಂ ಸಾಹಿತ್ ಮ್ಹಣೊಂಕ್ ಜಾಇನಾ. ಜಶೆಂ ಶಿಕ್ಪಾಚ್ಯಾ ಹರ್ ಶಾಖ್ಯಾಂನಿ, ಜಶೆಂ ಸಮಾಜ್ಶಾಸ್ತಿರ್, ಅರ್ಥ್ಶಾಸ್ತಿರ್, ಚರಿತ್ರಾ ಹಾಂತು ಅಮ್ಕಿಂಚ್ ಮ್ಹಳ್ಳಿಂ ನೆಮಾಂ ಆಸಾತ್ ತಸಲಿಂ ನೆಮಾಂ ಸಾಹಿತಾಂತ್ ನಾಂತ್ ಜಾಂವ್ಕ್ ಪುರೊ. ಪುಣ್ ಕಸಲೆಂಇ ಬರಪ್ ಸಾಹಿತ್ ಮ್ಹಣೊಂಕ್ ಜಾಇನಾ. ಕೊಂಕ್ಣಿ ಸೊಡ್ನ್ ಹೆರ್ ಭಾಸಾಂನಿ ಜ್ಯೊ ಭಾಸೊ ಅಕಾಡೆಮಿಕ್ ಜಾಲ್ಯಾತ್ ಮ್ಹಣ್ಜೆ ಇಸ್ಕೊಲಾಂನಿ, ಕೊಲೆಜಿಂನಿ, ಯುನಿವರ್ಸಿಟಿಂನಿ ಶಿಕಯ್ತಾತ್ ತಾಂಕಾ ಆಮ್ಕೆಂಚ್ ಮ್ಹಳ್ಳೆಂ ಮಟ್ಟ್ ಆಸಾ. ಆನಿ ತ್ಯಾ ಮಟ್ಟಾಪರ್ಮಾಣೆ ಸಾಹಿತಾಚೆಂ ಶಿಕಪ್ ಶಿಸ್ತೆನ್ ಚಲ್ತಾ. ಕೊಂಕ್ಣೆಂತ್ಇ ಅಸಲೆಂ ’ಮಟ್ಟ್’ ಆಮ್ಚಿ ಭಾಸ್ ಯುನಿವರ್ಸಿಟಿಕ್ ಪಾವೊನ್ ಸಾಹಿತಾಚೆಂ ಶಿಕಪ್ ಸುರು ಜಾತಾನಾ ಯೇತ್ ಆನಿ ಚಡ್ ಆನಿ ಚಡ್ ಸ್ಪಶ್ಟ್ ಜಾಯ್ತ್. ಹೆಂ ಹಾಂವ್ ಮಂಗ್ಳುರಿ ಸಂದರ್ಬಾರ್ ಸಾಂಗ್ತಾಂ. ಗೊಯಾಂತ್ ತೆಂ ಎದೊಳ್ಚ್ ಚಾಲ್ತೆರ್ ಆಇಲಾಂ. ಆತಾಂ ಸವಾಲ್, ಆಜ್ ಕಿತ್ಯಾಕ್ ಆಮ್ಸೊರ್ ಆನಿ ದರ್ವೊಡ್? ಕಾರಣ್ ಸ್ಪಶ್ಟ್ ಆಸಾ- ಆಮ್ಚೆ ಶಿಕ್ಪಿ ವಾಚ್ಪಿ. ಆಯ್ಚೊ ಕೊಂಕ್ಣಿ ವಾಚ್ಪಿ ಕಿತ್ಲ್ಯಾಗೀ ಮುಕಾರ್ ಪಾವ್ಲಾ. ಹಾಂಗಾ ಹಾಂವ್ ಮ್ಹಾಕಾಚ್ ಏಕ್ ವಾಚ್ಪಿ ಮ್ಹಣೊನ್ ಲೆಕ್ತಾಂ. ಶಿಕ್ಪಾವರ್ವಿಂ ಆನಿ ಶಿಸ್ತೆಚ್ಯಾ ವಾಚ್ಪಾವರ್ವಿಂ ಆಮ್ಚ್ಯಾ ಬರವ್ಪ್ಯಾಂಥಾವ್ನ್ ತಾಚೆ ಅಪೆಕ್ಶ್ಯಾ ಚಡ್ಲ್ಯಾತ್. ಪುಣ್ ಆಮ್ಚೆ ಬರವ್ಪಿ ಮಾತ್ ಆಪ್ಲ್ಯಾ ಜಾಪ್ದಾರೆಂತ್(ಜವಾಬ್ದಾರಿ) ಸಲ್ವಲ್ಯಾತ್. ತೆ ಅಜೂನ್ಇ ಆದ್ಲ್ಯಾ ಕಾಳಾಚೆಂ ಬರಪ್ ಆನಿ ಚಿಂತ್ನಾಂ ದಿತೆತ್ ಆಸಾತ್. ದಾಕ್ಲ್ಯಾಕ್ ಆಜ್ ಆಮ್ಚ್ಯಾ ಪತ್ರಾಂನಿ ಯೆಂವ್ಚ್ಯೊ ಸಾಂಕಳ್ ಕಾಣಿಯೊ ಪಳಯಾ- ಮಾಟ್ ಆನಿ ದೆಸ್ವಾಟ್, ಸಿಮೆಸ್ತ್ರಿಚ್ಯಾ ವಟಾರಾಂತ್.. ಇತ್ಯಾದಿ ಇತ್ಯಾದಿ. ಬದ್ಲಲ್ಲ್ಯಾ ಕಾಳಾತೆಕಿದ್ ವಾಚ್ಪಿ ವಾಡ್ಲ್ಯಾತ್ ಪುಣ್ ಆಮ್ಚೆ ಬರವ್ಪಿ ಆಜೂನ್ಇ ವಾಡೊಂಕ್ ನಾಂತ್. ಅಸಲ್ಯಾ ತಾಂಚ್ಯಾ ಬೇಜಾವಾಬ್ದೆರೆಚ್ಯಾ ಬರವ್ಪಾಂತ್ ಕಿತ್ಲ್ಯಾ ವಾಚ್ಪ್ಯಾಂಕ್ ಧರುನ್ ದವರ್ಲಾಂ ಮ್ಹಣ್ಚೆಪ್ರಾಸ್ ಕಿತ್ಲ್ಯಾ ವಾಚ್ಪ್ಯಾಂಕ್ ಹೊಗ್ಡಾಯ್ಲಾಂ ಮ್ಹಳ್ಳೆಂ ಚಿಂತುನ್ ಪಳಂವ್ಚಿ ಗರ್ಜ್ ಆಸಾ. ಆಜ್ ಅಸಲ್ಯಾ ಸಂಗ್ತಿಂನಿ ಆಮಿ ಭಾವುಕ್ ಜಾವ್ನ್, ಸಿಂತಿಮೆಂತಾಳ್ ಜಾವ್ನ್ ಫಾಯ್ದೊ ನಾ. ಆಮಿ ಪ್ರಾಯೋಗಿಕ್, ವೈಚಾರಿಕ್ ಜಾಂವ್ಕ್ ಶಿಕಜೆ.
ಕೊಂಕ್ಣೆಂತ್ ಮಾತ್ ನ್ಹಂಯ್ ಖಂಯ್ಚಾಇ ಭಾಶೆಂತ್ ಉತಳ್ ಸಾಹಿತ್ ಆಸ್ತಾಚ್. ಪುಣ್ ತ್ಯಾ ಪುರ್ತೆಂ ಉಂಚ್ಲೆಂ ಸಾಹಿತ್ಇ ಆಸ್ತಾ. ಅಶೆಂ ಬೇಲೆನ್ಸ್ ಜಾತಾ. ಪುಣ್ ಹಾಂಗಾ ಚಡ್ ಆನಿ ಚಡ್ ಉತಳ್ ಸಾಹಿತ್ಚ್ ಭರೊನ್ ಗೆಲಾಂ. ಆನಿ ಹ್ಯಾ ಉತಳ್ ಸಾಹಿತಾ ಮುಕಾರ್ ತೆಣೆಂ ಹೆಣೆಂ ಇಲ್ಲೆಂ ತರ್ಇ ಆಸ್ಚೆಂ ಉಂಚ್ಲೆಂ ಸಾಹಿತ್ ಕೊಂಕ್ಣೆಂತ್ ಲಿಪೊನ್ಚ್ ವೆತಾ. ಹಾಕಾ ಮುಕೆಲ್ ಕಾರಣ್ ಆಮ್ಚ್ಯಾ ಬರವ್ಪ್ಯಾಂಚೆಂ ’ಅಶಿಕ್ಪಿಪಣ್’. ಹಾಂಗಾ ಶಿಕಪ್ ಮ್ಹಳ್ಳೊ ಸಬ್ದ್ ’ಡಿಗ್ರಿ’ ಮ್ಹಳ್ಳ್ಯಾ ಅರ್ತಾನ್ ಹಾಂವ್ ವಾಪಾರಿನಾ. ಶಿಸ್ತೆಚೆಂ ವಾಚಪ್ ಆನಿ ಜಿಣಿಯೆ ಅನ್ಭೊಗ್ ಪಳಂವ್ಚಿ ರೀತ್ಚ್ ಶಿಕಪ್. ಆಜ್ ಕೊಂಕ್ಣೆಂತ್ ಬರಂವ್ಚೆ ಜಾಯ್ತೆ ಸಾಹಿತಿ ಖಬ್ರೆಪತ್ರಾಂ ಸೊಡ್ಲ್ಯಾರ್ ಹೆರ್ ಕಿತೆಂಇ ಸಾಹಿತ್ ವಾಚುಂಕ್ ವಚನಾಂತ್. ಹಾಂವೆಂ ಹಾಚ್ಯಾ ಆದಿಂಇ ಮ್ಹಳಾಂ ಆನಿ ಆತಾಂಇ ಮ್ಹಣ್ಟಾಂ ಏಕ್ ಸೂಕ್ಶಿಮ್ ಮ್ಹನಿಸ್ ಜಾಲ್ಲ್ಯಾ ಖರಿತ್ ಬರೊ ಬರವ್ಪಿ ಜಾಂವ್ಕ್ ಸಾದ್ ನಾ. ಬರ್ಪಾಂತ್ ಸೂಕ್ಶಿಮಾಯ್ ಯೇಜೆ ತರ್ ಪಇಲೆಂ ತಿ ಜಿಣಿಯೆಂತ್ ಯೇಜೆ. ಆಮ್ಚೆ ಜಾಯ್ತೆ ಬರವ್ಪಿ ಕ್ರತಕ್ ಜಿಣಿ ಜಿಯೆತಾತ್ ದೆಕುನ್ ತಾಂಚೆಂ ಬರಪ್ಇ ಕ್ರತಕ್. ಎಕಾ ಪತ್ರಾರ್ ವರ್ಸಾಚ್ಯಾ ಬಾರಾ ಮ್ಹಇನೆಇ ಉತಳ್ ಬರಪ್ಚ್ ಆಯ್ಲೆಂ ತರ್ ಚುಕಾಮುಕಿ ತಾಂತು ಯೆಂವ್ಚಿ ಏಕ್ ಬರಿ ಕವಿತಾ ವಾ ಕಾಣಿ ಕೊಣಾಚ್ಯಾಇ ಗುಮಾನಾಕ್ ಯೇನಾಸ್ತಾನಾಂಚ್ ವೆತಾ. ಹಾಚೆ ವರ್ವಿಂ ಲುಕ್ಸಾಣ್ ಒಟ್ಟಾರೆ ಸಾಹಿತಾಕ್ ಆನಿ ತಾಚ್ಯಾ ವಾಡಾವಳೆಕ್ ಜಾತಾ ತೆಂ ಖರೆಂ. ಆಜ್ ಆಮ್ಕಾ ’ಕ್ವಾಲಿಟಿ’ ಗರ್ಜ್ ಶಿವಾಇ ’ಕ್ವಾಂಟಿಟಿ’ ನ್ಹಂಯ್. ಆಯ್ಚ್ಯಾ ಕೊಂಕ್ಣಿ ಪತ್ರಾರ್ ಯೆಂವ್ಚೆ ತಿತ್ಲೆಂ ’ಜಂಕ್’ ಸಾಹಿತ್ ಹೆರ್ ಭಾಶೆಂಕ್ ತುಲನ್ ಕೆಲ್ಯಾರ್ ಯೇನಾ.
ಆತಾಂ ಹೆಂ ’ಮಟ್ಟ್’ ಮೆಜ್ಚೆಂ ಕಶೆಂ? ಆಮಿ ಆಮ್ಚ್ಯಾಚ್ ಸಾಹಿತಾಕ್ ಪಾಟಿಂ ಘುಂವೊನ್ ಪಳವ್ಯಾಂ. ಹಾಂಗಾ ಹಾಂವೆಂ ಏಕ್ ಗಜಾಲ್ ಸ್ಪಶ್ಟ್ ಕರಿಜೆ ಪಡ್ಟಾ. ಕೊಂಕ್ಣಿ ಸಾಹಿತಾಂತ್ ಮಟ್ಟಾಚಿ ಚರ್ಚಾ ಸುರು ಜಾಲ್ಲೆ ಥಾವ್ನ್ ಆಮಿ ಕೊಂಕ್ಣೆಚ್ಯಾ ಮ್ಹಾನ್ ಲೇಖಕಾಂಕ್ ಮ್ಹಣ್ಜೆ ಚಾಫ್ರಾ, ಎಟ್ಯೆಲ್, ಖಡಾಪ್, ಗಬ್ಬು, ಜೊ.ಸಾ.- ಹಾಂಚ್ಯಾ ಸಾಹಿತಾಕ್ ಮಟ್ಟ್ ನಾ ಮ್ಹಣ್ ಮ್ಹಣ್ಟಾತ್ ಮ್ಹಣ್ ಆಜ್ ಕೀಳ್ ಮಟ್ಟಾಚೆಂ ಸಾಹಿತ್ ಬರಯ್ತೆಲೆ ಮ್ಹಣ್ಟೆ ಆಸಾತ್. ಪುಣ್ ಖರಿ ಗಜಾಲ್ ಮ್ಹಳ್ಯಾರ್ ಆಮಿ ತಶೆಂ ಕೆನ್ನಾಂಇ ಮ್ಹಳ್ಳೆಂ ನಾ. ಹೊ ಆರೋಪ್ ತೆ ಆಪ್ಲಿ ಅಸ್ಕತ್ಕಾಇ ಧಾಂಪುಂಕ್ ಮಾಂಡ್ತೆ ಆಸಾತ್ ಆನಿ ಆಪ್ಲೆಂ ಕೀಳ್ ಸಾಹಿತ್ ತಾಂಚ್ಯಾ ಸಾಹಿತಾ ಪಾಟ್ಲ್ಯಾನ್ ಲಿಪವ್ನ್ ಫುಂಕ್ಯಾಕ್ ಮಾನ್ ಜೊಡ್ಟೇ ಆಸಾತ್. ಸರ್ಲೆಲ್ಯಾಂಚ್ಯಾ ಖಾಂದಾರ್ ಬಂದೂಕ್ ದವರ್ನ್ ಫಾರ್ ಮಾರ್ಚಿ ಬೋವ್ ಶಾಣಿ ಚಾಲ್ ಹಿ. ಕಳ್ಯಾ ಸಾಂಗಾತಾ ಜಶೆಂ ದೋರ್ಇ ಆಲ್ತಾರೆಕ್ ಚಡ್ಲ್ಲ್ಯಾ ಬರಿ. ಆಜ್ ಕೊಂಕ್ಣೆಂತ್ ಬರಯ್ತೆಲ್ಯಾ ’ಸೋ ಕಾಲ್ಡ್’ ಮ್ಹಾನ್ ಬರವ್ಪ್ಯಾಂಚ್ಯಾ ಬರ್ಪಾಕ್ ಚಾಫ್ರಾ, ಎಟ್ಯೆಲ್, ಖಡಾಪ್, ಗಬ್ಬು, ಜೊ.ಸಾ.- ಹಾಂಚ್ಯಾ ಸಾಹಿತಾಚೆಂ ಮಟ್ಟ್ ಆಸಾ? ಲೆಕಾಚೆ ಏಕ್ ದೋಗ್ ಸೊಡ್ಲ್ಯಾರ್. ಖರೆಂ ಮ್ಹಳ್ಯಾರ್ ಹೆ ಮ್ಹಾನ್ ಸಾಹಿತಿ ಜಾವ್ನ್ ಗೆಲ್ಯಾ ಉಪ್ರಾಂತ್ ಕೊಂಕ್ಣಿ ಸಾಹಿತಾಂತ್ ಏಕ್ ಖಾಲಿ ಜಾಗೊ(ವ್ಯಾಕ್ಕುಮ್) ರುತಾ ಜಾಲಾ. ಆನಿ ಹಿ ಖಾಲಿ ಜಾಗೊ ಬರ್ಚಿ ತಾಂಕ್ ಆಜ್ ಬರಂವ್ಚ್ಯಾ ಕೋಣ್ ಸಾಹಿತಿಕ್ ನಾ. ಹೆಂ ಹಾಂವ್ ದಾಕ್ಶೆಣೆವಿಣೆಂ ಸಾಂಗ್ತಾಂ. ಆಯ್ಚ್ಯಾ ಕಾಳಾಚೆಂ ಸೊಡ್ಯಾಂ ತ್ಯಾ ಕಾಳಾಚೆಂ ಸಾಹಿತ್ ಬರಂವ್ಚಿ ತಾಂಕ್ಇ ಆತಾಂಚ್ಯಾ ಸಾಹಿತಿಂಕ್ ನಾ. ವೇಳ್ಘಡಿ ವಾ ಆಂಜೆಲ್ ತಸಲಿ ಕಾದಂಬರಿ ಆಜ್ಇ ಹ್ಯಾ ಕಾರಣಾಕ್ ಲಾಗೊನ್ ಪ್ರಸ್ತುತ್ ಜಾತಾತ್. ಆಜ್ ಮಾಟ್ ಮಂತ್ರಾಂ, ಸಿಮಿಸ್ತ್ರಿ ವಿಶ್ಯಾಂತ್ ಬರಯ್ತೆಲೆ ಸಾಹಿತಿ ಆಪ್ಲೆಂ ಉಣೆಂಪಣ್ ಧಾಪುಂಕ್ ಚಾಫ್ರಾ, ಎಟ್ಯೆಲ್ ತಸಲ್ಯಾ ಮ್ಹಾನ್ ಸಾಹಿತಿಂಚ್ಯಾ ನಾಂವಾಚೊ ಆಸ್ರೊ ಘೆತಾತ್ ಆನಿ ತಾಂಚ್ಯಾ ಪಾಟ್ಲ್ಯಾನ್ ರಾವ್ತಾತ್. ಆಮಿ ಸ್ಪಶ್ಟ್ ಸಾಂಗ್ತೇ ಆಸಾಂವ್ ಕೀ- ಆಮಿ ಆಜ್ ಬರಯ್ತೆಲ್ಯಾ ಸಾಹಿತಿಂ ವಿಶಿಂ ಉಲಯ್ತಾಂವ್, ಜಾವ್ನ್ ಗೆಲ್ಲ್ಯಾ ಸಾಹಿತಿಂ ವಿಶ್ಯಾಂತ್ ನ್ಹಯ್. ಆನಿ ತಾಂಚ್ಯಾ ಸಾಹಿತಾಚ್ಯಾ ಮಟ್ಟಾಕ್ ಆಜ್ ಬರಯ್ತೆಲ್ಯಾ ಸಾಹಿತಿಂಚೆಂ ಸಾಹಿತ್ ಖಂಡಿತ್ಇ ನಾ. ಸಾಹಿತಾಂತ್ ಮಟ್ಟಾವಿಶಿಂ ಉಲೊವ್ಣೆ ಜಾತಾನಾ ಹರ್ಏಕ್ ಪಾವ್ಟಿಂ ’ಮಟ್ಟಾವಿಶಾಂತ್ ಉಲಯ್ತೆಲೆ ಮಟ್ಟಾಚೆಂ ಸಾಹಿತ್ ರಚುನ್ ದಾಕಂವ್ದಿತ್’ ಮ್ಹಳ್ಳೆಂ ಪರ್ತುನ್ ಪರ್ತುನ್ ಆಯ್ಕೊಂಕ್ ಮೆಳ್ಟಾ. ಆಯ್ಲೆವಾರ್ಚ್ಯಾ ’ದಾಯ್ಜ್’ ಸಂಪಾದಕೀಯಾಂತ್ ವಲ್ಲಿ ಕ್ವಾಡ್ರಸಾನ್ಇ ಹೆಂಚ್ ಬರಯ್ಲಾಂ. ತೊ ಮ್ಹಣ್ಟಾ ’ಲ್ಹಾನ್ ಗೀಟ್ ಲ್ಹಾನ್ ಮ್ಹಣ್ ದಾಕಯ್ಜೆ ತರ್ ಕುಶಿನ್ ವ್ಹಡ್ ಗೀಟ್ ವೊಡಿಜೆ’. ಖರೆಂ. ಪುಣ್ ಹೊ ಗೀಟ್ ಕೊಣೆ ವೊಡಿಜೆ? ಹೊ ಗೀಟ್ ಎದೊಳ್ಚ್ ಚಾಫ್ರಾ, ಎಟ್ಯೆಲ್, ಖಡಾಪ್ ತಸಲ್ಯಾಂನಿ ವೋಡ್ನ್ ಜಾಲಾ. ಆನಿ ಆಮಿ ಕೇವಲ್ ಕೇವಲ್ ಆಯ್ಚೆ ಗೀಟ್ ಲ್ಹಾನ್ ಆಸಾತ್ ಮ್ಹಣ್ ಸಾಂಗ್ಚೆಂ ಕಾಮ್ ಕರ್ತೆ ಆಸಾಂವ್.
ಸುಗಮ್ ಸಾಹಿತ್:
ದೇಶಕಾಲ ಕನ್ನಡ ಪತ್ರಾಚೊ ವಿವೇಕ್ ಶಾನ್ಭೊಗ್ ಮ್ಹಣ್ಟಾ- ’ಸಾಹಿತ್ಯದಲ್ಲಿ ಇವತ್ತು ಸುಗಮ ಸಂಗೀತದಂತೆ ಸುಗಮ ಸಾಹಿತ್ಯವೆಂಬ ಪ್ರಕಾರ ಹುಟ್ಟಿಕೊಂಡಿದೆ. ಬಹುತೇಕ ಜನಪ್ರಿಯ ಪತ್ರಿಕೆಗಳಲ್ಲಿ ಬರುವ ಸಾಹಿತ್ಯ, ಅದನ್ನು ಬರೆಯುವ ಮಂದಿ ಇದನ್ನೇ ಶ್ರೇಶ್ಟ ಸಾಹಿತ್ಯವೆಂದು ನಂಬಿಕೊಂಡಿದ್ದಾರೆ. ಮತ್ತು ಸುಗಮ ಸಂಗೀತದವರಿಗೆ ಶಾಸ್ತ್ರೀಯ ಸಂಗೀತದವರ ಮೇಲೆ ಹೇಗೆ ಸಿಟ್ಟು ಇದೆಯೋ ಅದೇ ತರ ಸುಗಮ ಸಾಹಿತ್ಯದವರಿಗೂ ಗಂಭೀರ ಸಾಹಿತ್ಯದವರ ಮೇಲೆ ಇದೆ’. ಚಡ್ಉಣೆಂ ಕೊಂಕ್ಣೆಚಿ ಆಯ್ಚಿ ಗಜಾಲ್ಇ ಹಿಚ್ ಜಾಲ್ಯಾ. ಬಿಲ್ಕುಲ್ ರಿಯಾಲಿಟಿ ಶೊ ಬರಿ; ಸಂಗೀತ್ ಆನಿ ನಾಚ್. ಆನಿ ತೇಂಇ ಫಿಲ್ಮೀ ಮಾತ್ ಖರೆಂ ತಾಲೆಂತ್ ಮ್ಹಣ್ ತೆ ಚಿಂತಾತ್. ತಾಂತುಂಇ ಶಾಸ್ತ್ರೀಯ್ ಸಂಗಿತಾಕ್ ವಾ ಶಾಸ್ತ್ರೀಯ್ ನಾಚಾಕ್ ಆಪ್ಡುಂಕ್ ವಚನಾಂತ್. ಹಿಚ್ ಗತ್ ಆಮ್ಚ್ಯಾ ಕೊಂಕ್ಣಿ ವೆಬ್ಸಾಯ್ಟಿಂಚಿಂ. ವಲ್ಲಿ ಕ್ವಾಡ್ರಸ್ ಕೊಂಕ್ಣಿ ಸಾಹಿತಾಚ್ಯಾ ಮಟ್ಟಾವಿಶಾಂತ್ ಉಲಯ್ತಾನಾ ಕೊಂಕ್ಣಿ ಸಾಹಿತಾಚೆಂ ತುಲನ್ ಲತಾ ಮಂಗೇಶ್ಕರಾ ಸವೆಂ ಕರ್ತಾ. ಆನಿ ಮ್ಹಣ್ಟಾ- ’ಆಜ್ ಕೊಂಕ್ಣೆಂತ್ ಮಟ್ಟಾವಿಶಾಂತ್ ಉಲಯ್ತೆಲೆ ಲತಾ ಮಂಗೇಶ್ಕರಾಕ್ ತುಕಾ ಶಕೀರಾಬರಿ, ರಿಕ್ಕಿ ಮಾರ್ಟಿನಾಬರಿ, ಮಡೋನ್ನಾಬರಿ ಗಾಂವ್ಕ್ ಕಳನಾ ಮ್ಹಣ್ಚೆ ಪಿಶೆ’. ಆಮ್ಚ್ಯಾ ವೆಬ್ಸಾಯ್ಟಿಂಕ್ ಆನಿ ರಿಯಾಲಿಟಿ ಶೋಕ್ ಕಸಲೊ ಫರಕ್ಇ ನಾ; ದೊನ್ಇ ಎಕ್ಚ್. ರಿಯಾಲಿಟಿ ಶೋಕ್ ಫಿಲ್ಮಾಂ ತರ್ ವೆಬ್ಸಾಯ್ಟಿಂಕ್ ’ಜಂಕ್’ ಸಾಹಿತ್. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಸಂಗೀತಾವಿಶಿಂ ಉಲಯ್ತಾನಾ ವಲ್ಲಿ ಕ್ವಾಡ್ರಸಾಕ್ ಲತಾ ಮಂಗೇಶ್ಕರ್ ದಿಸ್ಲೆಂ; ಗಂಗೂಬಾಯ್ ಹಾನಾಗಲ್, ಮಲ್ಲಿಕಾರ್ಜುನ ಮನ್ಸೂರ್, ಪಂಡಿತ್ ಭೀಮ್ಸೇನ್ ಜೋಶಿ, ಡಾ. ಬಾಲಮುರಳೀಕ್ರಿಶ್ಣ, ಕಿಶೋರಿ ಅಮೋನ್ಕರ್, ಎಂ.ಎಸ್. ಸುಬ್ಬುಲಕ್ಶ್ಮಿ ತಸಲಿಂ ದಿಸನಾಂತ್. ಕೊಂಕ್ಣಿ ಸಾಹಿತಾಂತ್ ಮಟ್ಟಾವಿಶಿಂ ಉಲಂವ್ಚೆ ಆಮಿ ಹಾಂಚೆವಿಶ್ಯಾಂತ್ ಚಿಂತಾಂವ್; ಲತಾ ಮಂಗೇಶ್ಕರಾ ವಿಶಿಂ ನ್ಹಂಯ್. ಸಂಗೀತಾಂತ್ ಶಾಸ್ತ್ರೀಯ್ ಸಂಗೀತಾಕ್ ಆಸ್ಚೆಂ ಮಟ್ಟ್ ಕೊಂಕ್ಣಿ ಸಾಹಿತಾಕ್ ಯೇಜೆ ಮ್ಹಣ್ ಆಮ್ಚಿ ಆಶಾ. ಜಶೆಂ ರಿಯಾಲಿಟಿ ಶೋಚೆ ತಾಂಚೆವಿಶಿಂಚ್ ಉಲಯ್ತಾತ್ ತಶೆಂ ಆಮ್ಚ್ಯೊ ವೆಬ್ಸಾಯ್ಟಿ. ತಾಂಚೆಂಚ್ ಸಂಪಾದಕೀಯ್, ತಾಂಚಿಂಚ್ ಸಂಪಾದಕಾಂಕ್ ಪತ್ರಾಂ. ವೆವೆಗ್ಳ್ಯಾ ನಾಂವಾಂನಿ.
ವ್ಯಾಕ್ಕ್ಯುಮ್(ಖಾಲಿ ಜಾಗೊ):
ಆಮಿ ಬರಂವ್ಕ್ ಧರ್ತಾನಾ ರಾಕ್ಣೊ, ಮಿತ್ರ್ ಪತ್ರಾಂ ಕೊಡಿಯಾಳಾಂತ್ ಲೇಖಕ್ ಸಮ್ಮೇಳ್ ಆಸಾ ಕರ್ತಲಿಂ. ಆನಿ ಆಮಿ ಪಯ್ಶಿಲ್ಯಾ ಪಯ್ಶಿಲ್ಯಾ ಫಿರ್ಗಜೆಥಾವ್ನ್ ಚಾಫ್ರಾ, ಸಿರಿವಂತ್, ಎಟ್ಯೆಲ್ ತಸಲ್ಯಾ ಕವಿಂಕ್, ಸಾಹಿತಿಂಕ್ ಆಯ್ಕೊಂಕ್ಚ್ ಮ್ಹಣ್ ಯೆತೆಲ್ಯಾಂವ್. ಆಜ್ ಕೊಂಕ್ಣೆಂತ್ ಹ್ಯಾ ಮಟ್ಟಾಚೆ ಸಾಹಿತಿಇ ನಾಂತ್ ಆನಿ ಸಮ್ಮೆಳನಾಂಇ ನಾಂತ್. ರಾಕ್ಣ್ಯಾನ್ ಏಕ್ ಕೆಲ್ಲೆಂ. ಕನ್ನಡಾಚ್ಯಾ ನರೇಂದ್ರ ರೈ ದೇರ್ಲಾಕ್ ಆಪಇಲ್ಲೆಂ. ಹಾಂವ್ ಹಾಕಾ ವ್ಯಾಕ್ಕ್ಯುಮ್ ಮ್ಹಣ್ಟಾಂ. ಆಜ್ ಕೊಂಕ್ಣೆಂತ್ ಬರಂವ್ಕ್ ಸುರು ಕರ್ತೆಲ್ಯಾನ್ ’ರೋಲ್ ಮೋಡೆಲ್’ ಮ್ಹಣ್ ಘೆವ್ಯೆತ್ ಜಾಲ್ಲೊ ಏಕ್ ಸಾಹಿತಿ ಕೊಂಕ್ಣೆಂತ್ ನಾ. ಹಾಂವೆಂ ಹಾಚೆಬರಿ ಬರವ್ಪಿ ಜಾಯ್ಜೆ ಮ್ಹಣ್ ಕೋಣ್ ನವೊ ಬರವ್ಪಿ ಕೊಂಕ್ಣೆಂತ್ ಸಾಂಗಾನಾ. ತಸಲಿಂ ಪ್ರೇರಣಾಂಚ್ ಕೊಂಕ್ಣೆಂತ್ ನಾಂತ್. ಹೆಂ ಖರೆಂ ನಿರ್ಭಾಗ್ಪಣ್. ಕೊಂಕ್ಣೆಂತ್ ಖಂಯ್ಚ್ಯಾಇ ಬರವ್ಪ್ಯಾಕ್ ತಾಚೆಚ್ ಮ್ಹಳ್ಳೆ ಸ್ಟೂಡೆಂಟ್ ನಾಂತ್. ಏಕ್ ಆಪ್ರಾದ್ ಮ್ಹಳ್ಯಾರ್ ದೊ. ವಿಲಿಯಂ ದ ಸಿಲ್ವ. ತಾಕಾ ಆಮಿ ಥೊಡೆ ಸ್ಟೂಡೆಂಟ್ ಆಸಾಂವ್. ಆನಿ ತಾಕಾ ಆಮಿ ಹರ್ಎಕಾ ಬೊಲ್ಕಾಂವಾಂತ್ ತೀನ್ ವಾ ಚಾರ್ ವೊರಾಂ ಆಯ್ಕತಾಂವ್. ಆಜ್ ಖಂಯ್ಚ್ಯಾ ಕೊಂಕ್ಣಿಂ ಸಾಹಿತಿಕ್ ತೀನ್ ವಾ ಚಾರ್ ವೊರಾಂ ನಿರರ್ಗಳ್ ಉಲಂವ್ಚಿ ತಾಂಕ್ ಆಸಾ? ತಿ ಗಜಾಲ್ ವೆಗ್ಳಿ.
ಸ್ಪೋನ್ಸರ್ಡ್ ಲಿಟರೇಚರ್:
ಎದೊಳ್ಚ್ ಹಾಂವೆ ದಾಕ್ಶೆಣೆವಿಶಿಂ ಸಾಂಗ್ಲೆಂ. ಕೊಂಕ್ಣೆಕ್ ಲಾಗ್ಲ್ಲೆಂ ಆನಿಎಕ್ ಮಾರೆಕಾರ್ ಖರ್ಗ್ ಮ್ಹಳ್ಯಾರ್ ಸ್ಪೊನ್ಸರ್ಡ್ ಲಿಟರೇಚರ್. ಕಿತೆಂ ಹೆಂ ಸ್ಪೊನ್ಸರ್ಡ್ ಲಿಟರೇಚರ್? ತುಮಿ ಪತ್ರಾಂನಿ ’ಸ್ಪೋನ್ಸರ್ಡ್ ಸಪ್ಲಿಮೆಂಟ್’ ಮ್ಹಣ್ಜೆ ಪ್ರಾಯೋಜಿತ್ ಪುರವಣಿ ಕಾಡ್ಚೆವಿಶಿಂ ಆಯ್ಕಲಾಂ. ತಾಂತುಂ ದುಡು ಮುಕಾರ್; ಸಾಹಿತ್ ಪಾಟಿಂ. ಅಶೆಂಚ್ ಕೊಂಕ್ಣೆಂತ್ ಆಜ್ ಘಡ್ಟಾ. ಕೊಣಾಕಡೆ ದುಡು ಆಸಾ ತೊ ಆಪ್ಲೆ ಬೂಕ್ ಖುದ್ ಛಾಪ್ತಾ ಆನಿ ಫುಂಕ್ಯಾಕ್ ವಾಂಟ್ಟಾ. ಸಾಹಿತಾಚ್ಯಾ ಮಟ್ಟಾಕ್ ಕೊಲೊ ವರುಂ ಮ್ಹಣ್ಟಾ. ನ್ಹಂಯ್ ತರ್ ಎಕಾ ಡಮ್ಮಿ ಪರ್ಕಾಶಕಾಕ್ ಧರ್ತಾ ಆನಿ ಪ್ರಿಂಟಿಂಗಾಚೊ ಖರ್ಚ್ ಹಾಂವ್ಚ್ ದಿತಾಂ ಮ್ಹಣ್ಟಾ. ಎಕ್ಲ್ಯಾ ಬೊಕ್ರ್ಯಾಕ್ ಧರ್ನ್ ಮಾಗಿರ್ ಪ್ರಸ್ತಾವನ್ ಬರಂವ್ಕ್ ಲಾಯ್ತಾತ್ ಆನಿ ಬೂಕ್ ಛಾಪುನ್ ಯೆತಾ. ಹಾಂಗಾ ಸಾಹಿತಾಚೆಂ ಮೋಲ್ ಸುಣ್ಯಾಸವಾಇ. ಪಯ್ಲೆಂ ಅಶೆಂ ಘಡನಾತ್ಲೆಂ. ಸಿರಿವಂತ್ ತಸಲೊ ಏಕ್ ಪರ್ಕಾಶಕ್ ವಾಚ್ಪಿ ಆನಿ ಲೇಖಕಾಂಮಧೆಂ ಮೌಲ್ಯ್ ಮಾಪನಾಚೆಂ ಕಾಮ್ ಕರ್ತಲೊ. ಸಾಹಿತ್ ಪರ್ಗಟ್ ಕರ್ಚ್ಯಾ ಮಟ್ಟಾಕ್ ಆಸಾ ವಾ ನಾ ತೆಂ ವರವ್ನ್ ಪಳಂವ್ಚೊ ವಾವ್ರ್ ಚಲ್ತಲೊ ಆನಿ ತೆ ಪರ್ಮಾಣೆ ಪರ್ಕಾಶಕ್ ಸಾಹಿತಾಚೊ ಪಯ್ಲೊ ವಿಮರ್ಶಕ್ ಜಾತಲೊ. ಆಜ್ ಕೊಂಕ್ಣೆಂತ್ಲೊ ಪರ್ಕಾಶಕ್ ಮ್ಹಳ್ಳೊ ಮಾಯಾಗ್ ಜಾಲಾ. ಲೇಖಕ್ಚ್ ಪರ್ಕಾಶಕ್. ದೆಕುನ್ ಸಗ್ಳ್ಯಾನಿತ್ಲ್ಯಾನ್ ಆಪಾಪ್ಲ್ಯಾ ಮರ್ಜೆಚೆಂ ಸಾಹಿತ್. ಸಿರಿವಂತಾ ತಸಲೊ ಪರ್ಕಾಶಕ್ ಸಾಹಿತ್ ಪಳವ್ನ್ ತೆಂ ಪರ್ಗಟ್ತಲೊ. ಆಜ್ ದುಡು ಪಳವ್ನ್ ಸಾಹಿತ್ ಪರ್ಗಟ್ ಜಾತಾ. ಮಾಗಿರ್ ತೆಂ ಫುಂಕ್ಯಾಕ್ ವಾಂಟ್ಟಾತ್. ಹಾಕಾ ಕಿತ್ಲೆಂ ಮಟ್ಟ್ ಆಸತ್? ಕೆನ್ನಾ ಪರ್ಯಾಂತ್ ಹೆಂ ಚಾಲು ಆಸ್ತಲೆಂ ಕೊಂಕ್ಣೆಚೆಂ ಮಟ್ಟ್ ಅನಿಕ್ಇ ಕುಸ್ಕಾತಲೆಂ. ಹಾಕಾ ಆನಿಏಕ್ ದಾಕ್ಲೊ ದಿಂವ್ಚೊ ತರ್ ಪತ್ರಾಂಚೆ ವಿಸೇಸ್ ಅಂಕೆ. ತೇಇ ಪ್ರಾಯೊಜಿತ್ ಪುರವಣಿಚ್. ಥೊಡ್ಯಾ ವರ್ಸಾ ಆದಿಂ ಎಕಾ ಪತ್ರಾಚೆ ವಿಸೇಸ್ ಅಂಕೆ, ಪ್ರೆತ್ಯೇಕ್ ತರಾನ್ ಗಲ್ಫಾಗರಾಂಚೆ ಯೆತಲೆ. ಹಾಂಗಾಇ ದುಡುಚ್ ಮುಕೇಲ್ ಪಾತ್ರ್ ಖೆಳ್ಟಲೊ. ದುಡು ಮೆಳ್ಟಾನಾ ಕೋಣ್ ಸಂಪಾದಕ್ ಸಾಹಿತಾಚೆಂ ಮಟ್ಟ್ ಪಳಯ್ತಾ? ಜಾಯ್ರಾತ್ ದಿಲ್ಯಾರ್ ಪುರೊ ಕಸಲೆಂ ’ಜಂಕ್’ ಸಾಹಿತಿಇ ಪರ್ಗಟುಂಕ್ ತಯಾರ್. ಹಾಂಗಾಇ ದಾಕ್ಶೆಣ್ಚ್ ಕಾಮ್ ಕರ್ತಾ. ವಿಸೇಸ್ ಅಂಕೆ ಕಾಡ್ಟಾಲೆಇ ಪಯ್ಶ್ಯಾವಾಲ್ಯಾಂಚೆಚ್ ಕಾಡ್ಟಾಲೆ- ಹೆಂ ಗುಮಾನಾಂತ್ ದವರ್ಚೆಂ.
ವಿಮರ್ಸೊ:
ಕೊಂಕ್ಣೆಚ್ಯಾ ವರ್ತುಲಾಂತ್ ವಿಮರ್ಸೊ ಮ್ಹಳ್ಳ್ಯಾ ಸಬ್ದಾನ್ಚ್ ಅರ್ತ್ ಹೊಗ್ಡಾವ್ನ್ ಘೆತ್ಲಾ. ಹಾಂಗಾ ವಿಮರ್ಸೆಚಿಂ ಇಸ್ಕೊಲಾಂ ಕಶಿಂಇ ನಾಂತ್ ಏಕ್ ಆಪುರ್ಬಾಯೆಚೊ ವಿಮರ್ಸೊಇ ನಾ. ಆಯ್ಲೆವಾರ್ ಹೆಂಇ ಆಯ್ಕೊಂಕ್ ಮ್ಹೆಳ್ಳೆಂ- ವಿಮರ್ಸೊ ಕರಿಜೆ ತರ್ ಡೊಕ್ಟರೇಟ್ ಜಾಇಜೆ, ಆನಿ ಅಶೆಂ ಮ್ಹಣ್ಟಲೆ ಸಾಹಿತಾಕ್ ಸಂಬಂದ್ಚ್ ನಾತ್ಲೆ ವಿಗ್ಯಾನಾಚೆ ಮೆಸ್ತ್ರಿ. ಜಶೆಂ ಗೊರ್ವಾಂಚ್ಯಾ ದಾಕ್ತೆರಾನ್ ಮ್ಹನ್ಶ್ಯಾಂಕ್ ಒಕೊತ್ ದಿವ್ಯೆತ್ ತಶೆಂ ಹೆ ವಿಗ್ಯಾನಾಚೆ ಮೆಸ್ತ್ರಿ ಖುದ್ದ್ ಸಾಹಿತಾಚೊ ವಿಮರ್ಸೊ ಕರ್ತಾತ್. ಆಮ್ಕಾಂ ಹೆಂ ಚಲ್ತಾ. ಜರ್ ಶಿಕಪ್ ನಾತ್ಲ್ಲ್ಯಾಂನಿ ಮತಿಕ್ ಆಯಿಲ್ಲೆಂ ಬರಪ್ ಬರಯ್ಲೆಂ ಆನಿ ತಾಂಕಾಂ ತುಮಿ ಸಾಹಿತಿ ಮ್ಹಣ್ ಮಾನುನ್ ಘೆತ್ಲೆಂ ತರ್ ಖರ್ಯಾ ವಾಚ್ಪ್ಯಾಕ್ ಆನಿ ತಾಚ್ಯಾ ಅಭಿಪ್ರಾಯೆಕ್ ವಿಮರ್ಸೊ ಮ್ಹಣ್ ಮಾನುನ್ ಘೆಂವ್ಕ್ ಕಿತ್ಯಾಕ್ ತಯಾರ್ ನಾಂತ್? ಆಯ್ಲೆವಾರ್ ದಾಯ್ಜಿ ದಶಮಾನೋತ್ಸವ್ ಕಾರ್ಯಕ್ರಮಾಂತ್ ಹೇಮಾಚಾರ್ಯ ಮ್ಹಣಾಲೊ- ’ಆಮಿ ವಿಮರ್ಸೊ ಕರುಂಕ್ ಯೋಗ್ಯ್ ನ್ಹಂಯ್’. ತರ್ ಕೋಣ್ ಯೋಗ್ಯ್? ತೆ ಮಾತ್? ಕಿತ್ಯಾಕ್ ತಾಣಿಂ ತಾಂಚೆಂ ಸಂಗಟನ್ ಸುರು ಜಾತಾನಾ ಬರ್ಪೂರ್ ಸಾಹಿತಾಚೊ ವಿಮರ್ಸೊ ಕೆಲೊ ಮ್ಹಣ್ ತಾಣಿಂಚ್ ತಾಂಚ್ಯಾ ಕಡ್ತಿಲೆಂತ್ ಬರಯ್ಲಾಂ. ಏಕ್ ಪಾವ್ಟಿಂ ಬರವ್ನ್ ಪತ್ರಾರ್ ಫಾಯ್ಸ್ ಜಾಲೆಂ ವಾ ಬುಕಾರುಪಾರ್ ಪರ್ಗಟ್ಲೆಂ ತೆಂ ಮಾಗಿರ್ ವಾಚ್ಪ್ಯಾಂಚಿ ಆಸ್ತ್. ವಾಚ್ಪ್ಯಾಕ್ ಹ್ಯಾ ಸಾಹಿತಾಚೊ ವಿಮರ್ಸೊ ಕರ್ಚೆಂ ಹರ್ ಹಕ್ಕ್ ಆಸಾ. ವಿಮರ್ಸೊ ನಾಕಾ ಮ್ಹಣ್ಟಾಲೆ ಬರಯ್ತಾತ್ ಕಿತ್ಯಾಕ್? ಬರಯ್ಲ್ಯಾರ್ಇ ಕಿತ್ಯಾಕ್ ಫಾಯ್ಸ್ ಕರ್ತಾತ್? ಹ್ಯಾ ಸವಾಲಾಂಕ್ ಜಾಪ್ ಸೊದ್ಚಿ ಗರ್ಜ್ ಆಸಾ. ಎಕಾದಾವೆಳಾ ತುಮ್ಕಾಂ ವಿಮರ್ಸೊ ನಾಕಾ ತರ್ ತುಮ್ಚೆಂ ಸಾಹಿತ್ ವರ್ನ್ ತೆಂ ರಾಂದ್ಣಿ ಕೊನ್ಶ್ಯಾಕ್ ಘಾಲಾ. ತೆಂ ದಯಾ ಕರುನ್ ಫಾಯ್ಸ್ ಕರಿನಾಕಾತ್. ಹಾಂಗಾ ಅನ್ಎಕ್ ಗಜಾಲ್ ಸಾಂಗೊಂಕ್ ಆಶೆತಾಂ. ಬೋವ್ಶಾ ಸಂವ್ಸಾರಾಂತ್ಲ್ಯಾ ಖಂಯ್ಚ್ಯಾಇ ಭಾಶೆಂತ್ ಚಲನಾತ್ಲೆಂ ತರ್ಕ್ ಕೊಂಕ್ಣೆಂತ್ ಚಲ್ತಾ. ವಿಮರ್ಶ್ಯಾಕಾಂಕ್ ’ತರ್ ತುಮಿ ಬರೆಂ ಸಾಹಿತ್ ರಚುನ್ ದಾಕಯಾ’ ಮ್ಹಣ್ಚೆಂ. ಜರ್ ಕೋಣ್ಇ ಸರ್ಕಸ್ ಪಳಂವ್ಕ್ ಗೆಲೊ ಆನಿ ತೆಂ ಸರ್ಕಸ್ ಬರೆಂ ನಾ ಮ್ಹಣ್ಟಾ ತರ್ ತಾಣೆ ಕಿತೆಂ ತೆಂ ಸರ್ಕಸ್ ಕರ್ನ್ ದಾಕಇಜೆ ಮ್ಹಣ್ ಗಿ? ಸೊಡ್ಯಾಂ, ಕೊರೊಡಾಂನಿ ಬಜೆಟ್ ಖರ್ಚುನ್ ಫಿಲ್ಮಾಂ ಕಾಡ್ಟಾತ್. ಲೋಕ್ ಪನ್ನಾಸ್ ರುಪಯ್ ದೀವ್ನ್ ಫಿಲ್ಮಾಂ ಪಳಯ್ತಾ ಆನಿ ಬರೆಂ ನಾ ತರ್ ’ಎಂಚಿ ಸಾವುದ ಪಿಚ್ಚರ್ಯಾ’ ಮ್ಹಣ್ಟಾ. ತರ್ ತಾಣೆಂ ಕಿತೆಂ ಫಿಲ್ಮ್ ಕಾಡ್ನ್ ದಾಕಇಜೆ ಗಿ? ನಾಕಾ, ಪತ್ರ್ಕಾರ್ ಥೊಡೆ ಫಿಲ್ಮ್ ಪಳಯ್ತಾತ್, ಬರೆಂ ನಾ ತರ್ ಯೆಟುನ್ ಬರಯ್ತಾತ್. ತರ್ ಫಿಲ್ಮ್ ನಿರ್ದೇಶಕ್, ನಿರ್ಮಾಪಕ್ ಕಿತೆಂ ತಾಂಕಾಂ ’ತರ್ ತುಮಿ ಬರೆಂ ಫಿಲ್ಮ್ ಕಾಡ್ನ್ ದಾಕಯಾ’ ಮ್ಹಣ್ಟಾತ್ಗೀ? ಕೊಂಕ್ಣೆಂತ್ಲ್ಯಾ ಹ್ಯಾ ತರ್ಕಾಕ್ ಲಜ್ ನಾ. ಮಟ್ಟಾವಿಶಿಂ ಬರಇತಲೆ ಮಟ್ಟಾಚೆಂ ಸಾಹಿತ್ ರಚುನ್ ದಾಕಂವ್ದಿತ್ ಮ್ಹಣ್ಚೆಂ ಹಾಸ್ಯಾಸ್ಪದ್. ವಿಮರ್ಶ್ಯಾವರ್ವಿಂ ಆಮ್ಚೆ ಸಾಹಿತ್ ಖಂಯ್ ಆಸಾ ತೆಂ ಕಳ್ಟಾ. ಜರ್ ಬರವ್ಪ್ಯಾಂಕ್ ವಿಮರ್ಸೊ ಘೆಂವ್ಚಿ ತಾಂಕ್ ನಾ ತರ್ ತಾಣೆಂ ಬರಯ್ನಾಸ್ತಾಂ ರಾಂವ್ಚೆಂ ಬರೆಂ. ಸಾಹಿತಾಂತ್ ಮಟ್ಟಾವಿಶಿಂ ಉಲಯ್ತಾನಾ ಆಮಿ ಕೆಲ್ಲೊ ವಿಮರ್ಸೊ ವಯಕ್ತಿಕ್ ಜಾಲೊ ಮ್ಹಣ್ಇ ಜಾಯ್ತೆ ಮ್ಹಣ್ಟಾತ್. ಎಕಾ ಸಾಹಿತಿಚೆಂ ನಾಂವ್ ಕಾಡಿನಾಸ್ತಾನಾ ತಾಚ್ಯಾ ಬರ್ಪಾಚೊ ವಿಮರ್ಸೊ ಕಸೊ ಕರ್ಚೊ ತೆಂ ಕಳಾನಾ. ಸಾಹಿತ್ ಏಕ್ ಸೊಡ್ಲ್ಯಾರ್ ಆಮ್ಕಾಂ ನಿಶ್ಟುರ್ ಜಾಂವ್ಕ್ ಹೆರ್ ಕಿತೆಂಇ ಆಸ್ತ್ಬದ್ಕಾಚಿಂ ಕಾರಣಾಂ ನಾಂತ್. ಆಮ್ಚ್ಯಾ ಬರವ್ಪ್ಯಾಂಕ್ ಫಕತ್ ಫುಲಾಂಚೆ ಝೆಲೆ ಜಾಯ್ಜೆ. ಟಿಕಾ, ವಿಮರ್ಸೊ ನಾಕಾ. ಹಾಂಗಾಇ ದಾಕ್ಶೆಣ್ಚ್ ಕಾಮ್ ಕರ್ತಾ.
ಸೂಕ್ಶಿಮಾಯ್ ಹೊಗ್ಡಾಇಲ್ಲೆಂ ಬರಪ್:
ವಿಮರ್ಸೊ ಕೊಣೆಂ ಕರ್ಯೆತ್ ಮ್ಹಣ್ಟಾನಾ ಉಡಾಸ್ ಆಯ್ಲೊ. ಆದ್ಲ್ಯಾ ವರ್ಸಾ ಕರ್ನಾಟಕಾ ಕೊಂಕ್ಣಿ ಸಾಹಿತ್ ಅಕಾಡೆಮಿನ್ ಮೆಲ್ವಿನ್ ಲುದ್ರಿಗಾಚ್ಯಾ ಸಂಪಾದಕ್ಪಣಾಖಾಲ್ ಪರ್ಗಟ್ಲಲೊ ಬೂಕ್ ’ಶೆಕ್ಡ್ಯಾಚೊ ಕೊಂಕ್ಣಿ ಕವಿತಾ’ ಮೊಕ್ಳಿಕ್ ಕರುಂಕ್ ಮ್ಹಣ್ ಜೆ.ಎನ್.ಯು.ಚೊ ಪ್ರೊಫೆಸರ್ ದೊ. ವಲೇರಿಯನ್ ಲುದ್ರಿಗ್ ಆಇಲ್ಲೊ. ತೊ ಮ್ಹಣಾಲೊ- ’ ಹ್ಯಾ ಬುಕಾಂತ್ಲ್ಯೊ ಕವಿತಾ ಬಿಲ್ಕುಕ್ ಪೊಕೊಳ್ ಭುಂಯ್ಗೊಳಾಂತ್ಲ್ಯೊ. ಹಾಂತು ಜಿಣಿಯೆಚಿ ಸುಕ್ಶಿಮಾಯ್ ಕಶಿಇ ನಾ; ಸಾಮಾಜಿಕ್ ಸ್ಪಂದನ್ ತಾಚೆಪಯ್ಲೆಂ ನಾ’. ಹಾಚೆ ವರ್ತೊ ವಿಮರ್ಸೊ ಆಮ್ಕಾಂ ಜಾಯ್? ಆನಿ ಹೆಂ ಕೆಲ್ಲೊ ಡಾಕ್ಟರೇಟ್ ಕೆಲ್ಲೊಚ್ ಗ್ರಾಯ್ಕ್. ಡೆಲ್ಲಿ ಥಾವ್ನ್ ಆಯ್ಲೊ ಆನಿ ಆಮ್ಚಿ ಚಡ್ಡಿ ಕಾಡ್ನ್ ಗೆಲೊ. ಆಮಿ ನಾಗ್ಡೆ ಜಾಲ್ಯಾಂವ್ ಪುಣ್ ಕೊಣಾಇಕ್ಇ ಲಜ್ ಭೊಗುಂಕ್ ನಾ. ಹೊ ವಿಮರ್ಸೊ ಕೊಣಾಚ್ಯಾಇ ಗುಮಾನಾಕ್ ಗೆಲ್ಲೊ ನಾ. ಹಾಚಿ ಖಂಯ್ಇ ಖಬರ್ ಜಾಲಿ ನಾ. ಮುಸ್ಕಾರಾಕ್ ಮಾರ್ಲ್ಲೆಬರಿ ಜಾಲ್ಲೊ ಹೊ ವಿಮರ್ಸೊ ಕೊಣೆಂಇ ಗಂಭೀರಾಯೆನ್ ಘೆತ್ಲ್ಲ್ಯಾಬರಿ ದಿಸನಾ. ಆಮ್ಚ್ಯಾ ಬರ್ಪಾಂತ್ ದೊ. ವಲೇರಿಯನ್ ಲುದ್ರಿಗಾನ್ ಸಾಂಗ್ಲ್ಲೆಬರಿ ಬಿಲ್ಕುಲ್ ಸುಕ್ಶಿಮಾಯ್ ನಾ. ಆಮ್ಚೆ ಇತ್ಲೆ ಬರವ್ಪಿ ಮುಂಬಯ್ ಗೆಲ್ಯಾತ್, ಗಲ್ಫಾಕ್ ಗೆಲ್ಯಾತ್. ತಾಂಚ್ಯಾ ಬರ್ಪಾಂತ್ ಥಂಯ್ಚ್ಯಾ ಜಿಣಿಯೆಚಿ ಸುಕ್ಶಿಮಾಯ್ ಆಯಿಲ್ಲಿ ಖಂಯ್ಇ ದಿಸಾನಾ. ಥಂಯ್ ಹಾಂಗಾ ಅಯ್ಲ್ಯಾ ತರ್ಇ ಬೋವ್ ಪಾತಳ್.
ಖಂಯ್ ಆಸಾತ್ ಯುವ ಬರವ್ಪಿ?
ಆಮ್ಚ್ಯಾ ಖಂಯ್ಚ್ಯಾಇ ಕೊಂಕ್ಣಿ ಕಾರ್ಯಕ್ರಮಾಂನಿ ಜಾಂವ್ದಿ ಯುವ ಬರವ್ಪಿ ಮ್ಹಳ್ಳೆ ದಿಸಾನಾಂತ್. ದಿಸನಾಂತ್ ಮ್ಹಣ್ಚೆ ಪ್ರಾಸ್ ಕೊಂಕ್ಣೆಚೆ ಯುವ ಬರವ್ಪಿ ಮುಕೇಲ್ ವ್ಹಾಳ್ಯಾಂತ್ ನಾಂಚ್ ಮ್ಹಣ್ಯೆತ್. ತಾಂಕಾ ಮುಕೇಲ್ ವ್ಹಾಳ್ಯಾಂತ್ ಹಾಡ್ಚೆಂ ಪ್ರೇತನ್ ಖಂಯ್ಚ್ಯಾ ಸಂಗಟನಾಚೆಇ ಕರಿನಾಂತ್ ಕಿತ್ಯಾಕ್? ಆಮ್ಚೆ ಯುವ ಬರವ್ಪಿ ’ಉಲ್ಕೆ’ ಬರಿ ಎಕಾ ಕೊನ್ಶ್ಯಾಕ್ ಆಸಾತ್. ಬಹುತೇಕ್ ಆಮ್ಚೊಯುವಕ್ ಪತ್ರಾಚ್ಯಾ ಆಸ್ಪಾಸ್. ಕಾರಣ್ ಸ್ಪಶ್ಟ್ ಆಸಾ. ಯುವಬರವ್ಪ್ಯಾಂಕ್ ಮುಕೇಲ್ ವ್ಹಾಳ್ಯಾಂತ್ ಆಕರ್ಶಿತ್ ಕರುಂಕ್ ಜಾಯ್ ಜಾಲ್ಲೆಂ ’ಚಾರ್ಮ್’ ಆಜ್ ನಾ. ಪ್ರೇರಣಾಂಇ ನಾಂತ್. ತರ್ ತೆ ತರ್ಇ ಕಶೆ ಯೆತಲೆ? ಹಾಂವೆಂ ಆದಿಂಚ್ ಸಾಂಗ್ಲ್ಲೆಬರಿ ’ರೋಲ್ ಮೋಡೆಲ್’ ಜಾವ್ನ್ ಘೆವ್ಯೆತ್ ಜಾಲ್ಲೊ ಏಕ್ ಸಾಹಿತಿ ಕೊಂಕ್ಣೆಂತ್ ನಾ.
ಕೋಣ್ ನವೊ ಬರವ್ಪಿ?
ಕಾನಡಿ ಸಾಹಿತಿ ಜಯಂತ್ ಕಾಯ್ಕಿಣಿ ಮ್ಹಣ್ಟಾ- ’ಬರವ್ಪಿ ಮ್ಹಳ್ಯಾರ್ ಜಿವ್ಯಾ ಬಾಂಳ್ಟಿಬರಿ. ಜಶೆಂ ಪರ್ನೊ ರೂಕ್ಇ ಆಯ್ಚೆಂ ವಾರೆಂ, ಆಯ್ಚೆಂ ಉದಕ್ ಪಿಯೆವ್ನ್ ನವೆಂ ಫುಲ್ ಫುಲಯ್ತಾ ತಶೆಂ ಹರ್ ಬರವ್ಪಿ ಸದಾಂ ನವೆಂ ಸಾಹಿತ್ ರಚ್ತಾ’. ಹ್ಯಾ ಅರ್ತಾನ್ ಪಳಯ್ಲ್ಯಾರ್ ನವೊ ಬರವ್ಪಿ ತರ್ನೊ ಬರವ್ಪಿ ಬೇದ್ ನಾ. ಪುಣ್ ಆಮ್ಚೆ ಕಿತ್ಲೆ ಪರ್ನೆ ರೂಕ್ ನವಿಂ ಫುಲಾಂ ಫುಲಯ್ತಾತ್? ಹಿ ಗಜಾಲ್ ಮಹತ್ವಾಚಿ.
ತುಲನ್ ನಜೊ ಕಿತ್ಯಾಕ್?
ಆಮ್ಚೆ ಸಾಹಿತ್ ಹೆರ್ ಭಾಶೆಂಚ್ಯಾ ಸಾಹಿತಾಸವೆಂ ತುಲನ್ ಕಿತ್ಯಾಕ್ ಕರುಂಕ್ ನಜೊ ತೆಂ ಮ್ಹಾಕಾ ಸಮ್ಜನಾ. ಆಮ್ಚೆ ಬರವ್ಪಿ ಆಯ್ಚ್ಯಾ ಸಂವ್ಸಾರಾಂತ್ ಜಿಯೆತೆ ಆಸಾತ್. ತೆ ಕಿತೆಂ ವಿಂಗಡ್ ವಾರೆಂ ಸೆವ್ತಾತ್? ವಿಂಗಡ್ ಉದಕ್ ಪಿಯೆತಾತ್? ಹೆರ್ ಭಾಶೆಚ್ಯಾ ಬರವ್ಪ್ಯಾಂಕ್ ಆಸ್ಚೆ ಸಾಮಾಜಿಕ್ ಸಂದರ್ಬ್ ಆಮ್ಚ್ಯಾ ಬರವ್ಪ್ಯಾಂಕ್ ನಾಂತ್? ಇತ್ಲೆಂ ಸರ್ವ್ ತಾಳ್ ಪಡ್ಟಾ ಮ್ಹಣ್ಟಾನಾ ಸಾಹಿತ್ ಕಿತ್ಯಾಕ್ ತುಲನ್ ಕರುಂಕ್ ನಜೊ? ಎಕಾದವೆಳಾ ತುಲನ್ ಕರಿನಾಂವ್ ಜಾಲ್ಯಾರ್ ಆಮಿಂ ಖಂಯ್ ಆಸಾಂವ್ ಮ್ಹಳ್ಳೆಂ ಆಮ್ಕಾಂ ಕಶೆಂ ಕಳ್ಚೆಂ? ಆಮ್ಚ್ಯಾ ಭಾಶೆಕ್ ಹೆರ್ ಭಾಶೆಂಚ್ಯಾ ತಿತ್ಲಿ ಚರಿತ್ರಾ ನಾ ಮ್ಹಣ್ಟೆಲೆ ಆಯ್ಚ್ಯಾ ಸಮಾಜೆಂ ಜಿಯೆನಾಂತ್ ಗಿ? ಆಜ್ ಸಾಹಿತಾಚೆಂ ಪ್ರತ್ಯೇಕ್ ತರಾನ್ ಕೊಂಕ್ಣಿ ಸಾಹಿತಾಚೆಂ ತುಲನ್ ಹೆರ್ ಭಾಸಾಂಸವೆಂ ಆಪಾಪಿಂ ಜಾತಾ. ಕಾರಣ್ ಆಮ್ಚಿ ಭುರ್ಗಿಂ ಆಜಿ ಶಾಳೆಂನಿ ಕನ್ನಡ. ಇಂಗ್ಲೆಜ್, ಹಿಂದಿ ಭಾಶೆಂಚೆಂ ಸಾಹಿತ್ ಶಿಕ್ತಾತ್ ಆನಿ ತೆಂ ಶಿಕ್ತಾನಾ ತಾಂಕಾಂ ಕೊಂಕ್ಣಿ ಸಾಹಿತಾಚೆಂ ಮಟ್ಟ್ ಆಪಾಪಿಂ ಕಳ್ಟಾ. ಕೊಣೆಂಇ ಸೊಡೊವ್ನ್ ಸಾಂಗಜೆ ಮ್ಹಣ್ ನಾ. ತಾಂಕಾ ಆಡಾಂವ್ಚಿ ತಾಂಕ್ ಕೊಣಾಕ್ ಆಸಾ?
’ಹೈಫೈ’ ಕಾರ್ಯಿಂ:
ಆಮ್ಚೆಂ ಹರ್ ಕೊಂಕ್ಣಿ ಕಾರ್ಯೆಂ ಹೈಫೈ ಜಾಲಾಂ. ಹರ್ಯೇಕ್ ಕಾರ್ಯೆಂ ಜೆವ್ಣಾಸವೆಂ ಸಂಪ್ತಾ. ಪುಣ್ ಏಕ್ ಕಾಳ್ ಆಸ್ಲ್ಲೊ. ಚಾಫ್ರಾ ದಿಯೆಸೆಜಿಚ್ಯಾ ಕೊನ್ಶ್ಯಾಕೊನ್ಶ್ಯಾಕ್ ವಚೊನ್ ಜಾಗೆಕವಿಗೋಶ್ಟಿ ಚಲಯ್ತಾನಾ ಸಿಂಗಲ್ ಚಾಯೆಕ್ ತತ್ವಾರ್ ಆಸ್ಲ್ಲೊ. ಪುಣ್ ಕವಿತಾ ತಾನ್ಭುಕ್ ಮಾರ್ನ್ ಕಾಡ್ಟಾಲಿ. ಆಯ್ಚಿ ಆಮ್ಚಿಂ ಕಾರ್ಯಕ್ರಮಾಂ ಸಗ್ಳಿಂ ಪೊಟಾಚ್ಯಾ ಭುಕೆಭೊಂವ್ತಣಿ ಭೊಂವ್ತಾತ್ ಶಿವಾಯ್ ಸಾಹಿತಾಚ್ಯಾ ಮಟ್ಟಾವಿಶಿಂ ಚಿಂತಿನಾಂತ್. ಕವಿತೆಚೆಂ ಮಟ್ಟ್ಇ ತ್ಯಾ ಪರ್ಮಾಣೆಂಚ್ ದೆಂವ್ಲಾಂ.
’ಸ್ಪೊನ್ಸರ್ಡ್’ ಕಾರ್ಯಕ್ರಮಾಂ:
ಆಯ್ಚಿಂ ಹರ್ಎಕ್ ಕಾರ್ಯಿಂ ಸ್ಪೊನ್ಸರ್ ನಾಸ್ತಾನಾ ಚಲಾನಾಂತ್. ಸ್ಪೊನ್ಸರ್ ನಾತ್ಲ್ಯಾರ್ ಕಾರ್ಯೆಂಚ್ ಜಾಯ್ನಾ. ಕಾರಣ್ ಹಾಂಗಾಇ ಜೆವಣ್ ದೀಜೆ ನ್ಹಂಯ್? ಹಾಂಗಾಇ ದಾಕ್ಶೆಣ್ಚ್ ಕಾಮ್ ಕರ್ತಾ. ಕೊಣೆಂ ಸ್ಪೊನ್ಸರ್ ದಿಲಾಂ ತಾಕಾ ಕಾರ್ಯಕ್ರಮಾಂತ್ ಆಪವ್ನ್ ಮ್ಹಣಯ್ ಘಾಲ್ಚಿ, ತಾಕಾ ಫುಲಾಂ ಘಾಲ್ಚಿಂ ಸದಾಚೆಂ ಜಾಲಾಂ. ಹಾಂಗಾ ಕಾರ್ಯಕ್ರಮ್ ಪಾಟ್ಲಿ ಬಸ್ಕಾ ಘೆತಾ ಆನಿ ಸ್ಪೊನ್ಸರ್ ಮುಕ್ಲಿ ಬಸ್ಕಾ. ದಾಕ್ಲ್ಯಾಕ್ ಸ್ಟೇನ್ ಅಗೇರಾ ಸಂವಾದ್ ಕಾರ್ಯೆಂ ಪಳಯಾ- ದಾಯ್ಜಿನ್ ಸ್ಪೊನ್ಸರ್ ಕೆಲಾಂ ಮ್ಹಣ್ ದಾಯ್ಜಿ ಮ್ಹನ್ಶಾಕಡೆಚ್ ಸಂವಾದ್. ತಾಕಾ ಪಯ್ಲೆಂ ಸನ್ಮಾನ್. ದಾಯ್ಜಿಚೊಚ್ ಮ್ಹನಿಸ್ ಮುಕೇಲ್ ಸಯ್ರೊ. ಆಮ್ಚೆ ಸ್ರಜನಾಇ ಹಾಕಾ ಕಾಂಯ್ ಆಪ್ವಾದ್ ನ್ಹಂಯ್. ಥಂಯ್ ಸಮನ್ವಯ ಆಸ್ಲ್ಲೆಂ. ತಾಣಿಂ ಸ್ಪೊನ್ಸರ್ ಕೆಲಾಂ ಮ್ಹಣ್ ತಾಂಕಾಂ ಮ್ಹಣಂಯ್. ಕೊಂಕ್ಣೆಂತ್ ಹೆಂ ರಾವಜೆ. ಕಾರ್ಯಕ್ರಮ್ ಸ್ಪೊನ್ಸರ್ ಕೆಲ್ಲ್ಯಾನ್ ಕಾರ್ಯಾಂತ್ ಹಾತ್ ಘಾಲುಂಕ್ ನಜೊ.
ಬೇಜಾವಾಬ್ದಾರೆಚೆಂ ಚಿಂತಪ್:
ಆಮ್ಚ್ಯಾ ಬೇಜವಾಬ್ದಾರೆಚ್ಯಾ ಚಿಂತ್ಪಾಕ್ ಆನಿಎಕ್ ದಾಕ್ಲೊ ದಿತಾಂ. ಆಯ್ಲೆವಾರ್ ರೆಗಾಮ್ ತಾಕೊಡೆಚೊ ಕರ್ನಾಟಕಾ ಕೊಂಕ್ಣಿ ಆಕಾಡೆಮಿಚೊ ಕೊಂಕ್ಣಿ ಸಮುದಾಯವಿಶಾಂತ್ಲೊ ಏಕ್ ಬೂಕ್ ಪರ್ಗಟ್ ಜಾಲೊ. ತಾಕಾ ಸಂಸೊದ್ ಕರುಂಕ್ ದಿಲ್ಲ್ಯಾ ಉಣ್ಯಾ ಆವ್ದೆಂತ್ ತಾಕಾ ಬತ್ತೀಸ್ ಸಮುದಾಯಾ ವಿಶಿಂ ಮಾತ್ ಜಾಣಾಂ ಜಾಂವ್ಕ್ ಜಾಲೆಂ. ಪುಣ್ ಕೊಂಕ್ಣಿ ಉಲಂವ್ಚೆ ಬತ್ತೀಸ್ ಸಮುದಾಯ್ ಮಾತ್ ಆಸ್ಚೆ ನ್ಹಂಯ್. ತೆ ಕರ್ನಾಟಕಾಂತ್ಚ್ ಕಾಂಯ್ ಸಾಟಾಲಾಗಿಂ ಆಸಾತ್. ಪುಣ್ ಹಾಂಗಾ ಗಜಾಲ್ ಕಿತೆಂ ಜಾಲಿ? ಸಮುದಾಯ್ ಆಸ್ಚೆ ಬತ್ತೀಸ್ಚ್ ಮ್ಹಣ್ ಜೆರಿ ನಿಡ್ಡೋಡಿನ್, ಎರಿಕ್ ಒಝೆರಾನ್, ರಾಕ್ಣೊ ಸಂಪಾದಕಾನ್ ಸಇತ್ ಥಿರಾಯ್ಲೆಂ ಆನಿ ತಶೆಂ ಬರಯ್ಲೆಂ ವಾ ಸಾಂಗ್ಲೆಂ. ಗೊಂಯಾಂ ಧರ್ಲ್ಯಾರ್ ಕೊಂಕ್ಣಿ ಉಲಂವ್ಚೆ ಶೆಂಭರಾವಯ್ರ್ ಸಮುದಾಯ್ ಆಸಾತ್. ಹಾಚಿ ಖಬರ್ ಆಮ್ಕಾಂ ನಾ. ಕೊಂಕ್ಣಿ ಮ್ಹನ್ಶ್ಯಾಂಚ್ಯಾ ಮೆಂದು ಖಾಕಿಯೆಂತ್ ದವರ್ನ್ ಘೆಂವ್ಚ್ಯಾ ಸವಯೆಕ್ ಹಾಚೆ ಪ್ರಾಸ್ ವ್ಹಡ್ ದಾಕ್ಲೊ ಜಾಯ್?
ಫುಡಾರಾಚಿ ಘುಸ್ಪೊಡ್:
ಆಯ್ಲೆವಾರ್ ಕೊಂಕ್ಣಿ ಕುಟಾಮ್ ಬಾಹ್ರೇಯ್ನ್ ಪ್ರಶಸ್ತಿ ಪ್ರದಾನ್ ಕಾರ್ಯೆಂ ಚಲ್ಲ್ಲೆಂ. ತಾಂತು ಸಯ್ರೊ ಜಾವ್ನ್ ಆಯಿಲ್ಲ್ಯಾ ದಾಯ್ಜಿಚ್ಯಾ ವಾಲ್ಟರ್ ನಂದಳಿಕೆನ್ ಮ್ಹಳೆಂ- ’ಕೊಂಕ್ಣೆಂತ್ ನವೆ ಬರವ್ಪಿ ನಾಂತ್. ದೆಕುನ್ ಕೊಂಕ್ಣೆಚೊ ಫುಡಾರ್ ಅಸ್ಪಶ್ಟ್ ಆನಿ ಅಸ್ಕತ್’. ಹೆಂ ತಾಣೆಂ ಆಪ್ಣೆಂ ಜಾಹೀರ್ ಕರುಂಕ್ ಆಸ್ಚ್ಯಾ ಯುವ ಬರವ್ಪಿ ಪುರಸ್ಕಾರಾಕ್ ಲಗ್ತಿ ಜಾವ್ನ್ ಮ್ಹಳ್ಳೆಂ ಜಾಂವ್ಕ್ ಪುರೊ. ಆಸೊಂ, ಪುಣ್ ಫಾ. ಮಾರ್ಕ್ ವಾಲ್ಡರ್ ಕಿತೆಂ ಮ್ಹಣ್ಟಾ? ಎಕಾ ದಿಸಾ ಕೊ.ಲೆ. ಜಮಾತಿಂತ್ ತೊ ಮ್ಹಣಾಲೊ- ’ಕೊಂಕ್ಣೆಚೊ ಫುಡಾರ್ ಬರೊ ಆಸಾ. ಮ್ಹಾಕಾ ಚಾಳಿಸ್ ಆನಿ ನೋವ್ ಬೂಕ್ ವರವ್ಣೆಕ್ ಆಯ್ಲ್ಯಾತ್. ತಾಂತ್ಲೆ ಕಿತ್ಲೆ ವಾಚ್ಚೆಬರಿ ಆಸಾತ್ ತೆಂ ತಾಣೆಂಇ ಸಾಂಗ್ಲೆಂ ನಾ. ಹೊ ಘುಸ್ಪೊಡ್ ಕಿತ್ಯಾಕ್?
ಆತಾಂ ನಿಮಾಣಿ ಗಜಾಲ್:
ಖಂಯ್ಚ್ಯಾಇ ಸಾಹಿತಾಂತ್ ಏಕ್ ಪ್ರಗತಿಶೀಲ್ ಚಳ್ವಳ್ ಸುರು ಜಾತಾನಾ ತಿ ಚಾಲ್ತೆರ್ ಆಸ್ಚ್ಯಾ ಸಾಹಿತಾಕ್ ಸವಾಲ್ ಘಾಲ್ನ್ಚ್ ಸುರು ಜಾತಾ. ತಶೆಂ ಆಜ್ ಕೊಂಕ್ಣೆಂತ್ ಘಡ್ಟೇ ಆಸಾ. ಸವ್ಕಾಸ್ ಆಮಿ ವಿಮರ್ಶ್ಯಾಕ್ ಉಗ್ತೆ ಜಾತೆ ಆಸಾಂವ್. ಹಾಚೆವರ್ವಿಂ ಕೊಂಕ್ಣಿ ಸಾಹಿತಾಚೆಂ ಖಂಡಿತ್ ಬರೆಂ ಜಾತಲೆಂ.
ಶ್ಹರೊ: ಕೊಂಕ್ಣಿ ಸಾಹಿತಿಕ್ ವಾಡಾವಾಳ್ ಭೋವ್ ಗರ್ಜೆಚಿ ಮ್ಹಳ್ಳ್ಯಾ ಇರಾದ್ಯಾನ್, ಮಿತ್ರ್ ಎಚ್ಚೆಮಾಚೆಂ ಮುಕ್ತ್-ಉಲವ್ಪ್ ಹಾಂಗಾಸರ್ ಆಸಾ ತಶೆಂ ದಿಲಾಂ. ಹೆ ಸರ್ವ್ ವಿಚಾರ್ ತಾಚೆ ಸ್ವತಾಚೆ ಶಿವಾಯ್ ದಾಯ್ಜ್,ಕೊಮಾಚೆ ಜಾಯ್ಜಯ್ ಮ್ಹಣ್ ನಾಂ. ಹಾಣೆಂ ಉಲ್ಲೇಕ್ ಕೆಲ್ಲ್ಯಾ ದೋನ್ ಬರ್ಪಾಂಚೆಂ ಲಿಂಕ್ ಆಮಿ ಹಾಂಗಾಸರ್ ದಿಲಾಂ. ಜ್ಯೆಂ ಕೊಣೆಂ ತೆಂ ಎದೊಳ್ ವಾಚುಂಕ್ ನಾ, ತಾಣಿಂ ಪರತ್ ಏಕ್ ಪಾವ್ಟಿಂ ವಾಚ್ಲೆಂ ತರ್, ದೂದ್ ಆನಿ ಉದಾಕ್ ಖಂಯ್ಚೆಂ ಮ್ಹಳ್ಳೆಂ ಇಥ್ಯರ್ಥ್ ಜಾತೆಲೆಂ. ಶೆಣ್ ಚಳ್ವಳೆಚೆರ್ ಸರ್ವಾಂಕ್ ಆಪಾಪ್ಲಿ ಪ್ರತಿಕ್ರಿಯಾ ದೀಂವ್ಕ್ ಹಕ್ಕ್ ಆಸಾ. ಪುಣ್ ದಯಕರುನ್ ಕೊಣಾಕ್ಚ್ಚ್ ಹಲ್ಕ್ ಕರ್ಚೆಂ ವಾ ಅಪ್ಣಾಚೆಂ ಶೆಂಕಾರೆಂ ಫುಲಂವ್ಚಿಂ ಬರ್ಪಾಂ, ತಶೆಂಚ್ ನಾಂವ್ ಬದ್ಲುನ್ ಆಯಿಲ್ಲಿಂ ಬರ್ಪಾಂ ಪರ್ಗಟ್ಚೆಂ ವಾ ಕರಿನಾಯೆ ರಾಂವ್ಚೆಂ ಹಕ್ಕ್ ಆಮ್ಚೆಂ ಮ್ಹಣ್ ಸಮ್ಜೊಂವ್ಚೆಂ. - ಸಂ.
’ತಿಸ್ರೊ ದೊಳೊ’ಚೆ ಆಧ್ಲೆ ಆಂಕ್ಡೆ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
