ಶೈಲೇಂದ್ರ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾದಾಯ್ಜ್ - 7

ಶೈಲೇಂದ್ರ

ನೀಜ್ ನಾಂವ್ : ಶಂಕರ್‌ದಾಸ್ ಕೇಸ್ರಿಲಾಲ್ ಶೈಲೇಂದ್ರ.

ಆವಯ್-ಬಾಪಾಯ್ಚೆಂ ನಾಂವ್ : ಪಾರ್ವತಿ ದೇವಿ ಆನಿ ಕೇಸ್ರಿಲಾಲ್.

ಜನನ್ : 30 ಅಗೋಸ್ತ್ 1923.

ಮರಣ್ : 14 ದಸೆಂಬರ್ 1966.

ಜಲ್ಮಾಲ್ಲೊ ಗಾಂವ್ : ರಾವಲ್ಪಿಂಡಿ (ಪಾಕಿಸ್ತಾನ್).

ವಳೊಕ್:

ಅಪ್ಣಾಯಿಲ್ಲ್ಯೊ ಪ್ರಶಸ್ತ್ಯೊ :

1958 ಇಸ್ವೆಂತ್ ’ಯಹೂದಿ’ ಫಿಲ್ಮಾಕ್ ತಾಣೆ ಲಿಖ್‌ಲ್ಲ್ಯಾ ’ಯೆ ಮೆರಾ ದೀವಾನಾಪನ್ ಹೆ’ ಪದಾಕ್ ಫಿಲ್ಮ್‌ಫೇರ್ ಪ್ರಶಸ್ತಿ.

1959 ಇಸ್ವೆಂತ್ ’ಅನಾರಿ’ ಫಿಲ್ಮಾಕ್ ತಾಣೆ ಲಿಖ್‌ಲ್ಲ್ಯಾ ’ಸಬ್‌ಕುಚ್ ಸೀಕಾ ಹಮ್‌ನೇ’ ಪದಾಕ್ ಫಿಲ್ಮ್‌ಫೇರ್ ಪ್ರಶಸ್ತಿ.

1968 ಇಸ್ವೆಂತ್ ’ಬ್ರಹ್ಮಾಚಾರಿ’ ಫಿಲ್ಮಾಕ್ ತಾಣೆ ಲಿಖ್‌ಲ್ಲ್ಯಾ ’ಮೇಂ ಗಾವುಂ ತೂ ಸೋಜಾವೊ’ ಪದಾಕ್ ಫಿಲ್ಮ್‌ಫೇರ್ ಪ್ರಶಸ್ತಿ.

ಹಾಣೆಂ ಪದಾಂ ಬರಯಿಲ್ಲಿಂ ಫಿಲ್ಮಾಂ: 50 ವಯ್ರ್.

ಪದಾಂ/ಕವಿತಾ/ಗಝಲಾಂ : 1000 ವಯ್ರ್.

ಸಾಹಿತಿಕ್ ಸುರ್‍ವಾತ್ :

ಶೈಲೇಂದ್ರ ಜಾಲ್ಮಾಲ್ಲೊ ಪಾಕಿಸ್ತಾನಾಂತ್ ತರ್‌ಯೀ ಬುರ್ಗ್ಯಾಪಣಾಚಾ ದಿಸಾಂನಿ ತಾಚೆಂ ಕುಟಾಮ್ ಮಥುರಾಕ್ ಪಾವ್ಲೆಂ. ಪುಣ್ ಆವ್ಘಡಾಂತ್ ಅಪ್ಲ್ಯಾ ಆವಯ್ಚಾ ಜಾಲ್ಲ್ಯಾ ಮರ್ಣಾ ಉಪ್ರಾಂತ್ ತಾಕಾ ದೆವಾಚೆರ್ ಆಸ್ಚಿ ಪಾತ್ಯೆಣಿ ಚಡುಣೆಂ ಮಾಯಾಗ್ ಜಾಲಿ ಮಾತ್ರ್ ನ್ಹಯ್ ತಾಕಾ ’ನಾಸ್ತಿಕ್’ ಕರಿಲಾಗ್ಲಿ. ತಾಚಾ ಜಿವಿತಾಚಿ ಸುರ್‍ವಾತ್ ಅಸಾಮಾನ್ಯ್ ರಿತಿರ್ ಜಾಲಿ ಮ್ಹಣ್ಯೆತಾ. ತೊ ’ಭಾರತೀಯ್ ರೈಲ್‌ವೇಂತ್’ ಕಾಮಾಕ್ ಲಾಗ್ಲೊ ಆನಿಂ

1947 ಇಸ್ವೆಂತ್ ಬೊಂಬೊಯ್ ಪಾವ್ಲೊ. ತ್ಯಾ ವೆಳಾರ್ ಅಖ್ಖ್ಯಾ ಭಾರತಾಂತ್ ಸ್ವಾತಂತ್ರಾಚಿ ಚಳ್ವಳ್ ಜ್ಯೊರಾನ್ ಚಲೊನಾಸ್‌ಲ್ಲಿ. ಆನಿಂ ತಾಚೆಂ ಯಾಂತ್ರೀಕೃತ್ ಕಾಮ್ ಅಪ್ಲ್ಯಾ ಕಲಾಕಾರಿ ಚಿಂತ್ಪಾಕ್ ಬಿಲ್ಕುಲ್ ತಾಳ್ ಪಡಾನಾತ್‌ಲ್ಲಿ. ತರ್‌ಯೀ ಅಪ್ಲ್ಯಾ ಕಾಮಾಚಾ ವೆಳಾರ್‌ಚ್ ತಾಣೆಂ ಅಪ್ಲಿಂ ಕವಿತಾ/ಪದಾಂ ಬರಂವ್ಕ್ ಧರ್ಲಿಂ. ಹ್ಯಾ ಖಾತಿರ್ ತಾಕಾ ತಾಚಾ ಮುಖೆಲ್ಯಾಂನಿ ಜಾಯ್ತೆ ಪಾವ್ಟಿಂ ಜಾಗ್ವಣ್ ದಿಲಿ.

ಫಿಲ್ಮಾಂಕ್ ಪದಾಂಚಿ ಸುರ್‍ವಾತ್ :

ಶೈಲೇಂದ್ರನ್ ಕವಿತಾ/ಪದಾಂ ಬರಂವ್ಕ್ ಲಾಗ್ಚಾ ವೆಳಾರ್ ಆಮ್ಚೊ ದೇಸ್ ಬ್ರಿಟಿಶಾಂಚಾ ಗುಲಾಮ್‌ಪಣಾಖಾಲ್ ಆಸ್‌ಲ್ಲೊ ದೆಕುನ್ ಹ್ಯಾ ಸ್ವಾತಂತ್ರ್-ಝುಜಾಚಾ ಸಂದರ್ಭಾರ್ ತಾಣೆಂ ಅಪ್ಲ್ಯಾಚ್ ವಾಟೆರ್ ಝುಜ್ ಮಾಂಡುಂಕ್ ಚಿಂತ್ಲೆಂ. ಕ್ರಾಂತಿಕಾರಿ, ಬಂಡಾಯ್ ಕವಿತಾಂ ಲಿಖುಂಕ್ ಧರ್ಲಿಂ. ಆನಿಂ ಆಸೆಂ ’ಜಲ್ತಾ ಹೆ ಪಂಜಾಬ್ (ಪಂಜಾಬ್ ಝಳೊನಾಸಾ)’ ಮ್ಹಳ್ಳೆಂ ಕವಿತಾ ಲಿಖ್ಲೆಂ ಆನಿಂ ಎಕಾ ಪರ್ಗಟ್ ಕಾರ್‍ಯಾವೆಳಾರ್ ತೆಂ ಕವಿತಾ ವಾಚ್ಲೆಂ. ತ್ಯಾ ಕಾರ್‍ಯಾಕ್ ಹಾಜರ್ ಆಸ್‌ಲ್ಲಾ ರಾಜ್‌ಕಪೂರಾಚಾ ನದ್ರೆಂತ್ ತೊ ಪಡ್ಲೊ ಆನಿಂ ಅಪ್ಲ್ಯಾ ನವ್ಯಾ ಫಿಲ್ಮಾಂಕ್ ಪದಾಂ ಬರಂವ್ಕ್ ತಾಣೆಂ ಶೈಲೇಂದ್ರಾಕ್ ವಿಚಾರ್‍ಲೊ.

ಪುಣ್ ಶೈಲೇಂದ್ರನ್ ತಾಕಾ ನಾಕಾರ್ಲೆಂ. ಪುಣ್ ಘರ್ಚಾ ಥೊಡ್ಯಾ ಸಮಸ್ಯಾಂಕ್ ಆನಿಂ ಅಪ್ಲ್ಯಾ ಜವಾಬ್ಧಾರೆಕ್ ಲಾಗೊನ್ ಶೈಲೇಂದ್ರ ರಾಜ್‌ಕಪೂರಾಕ್ ಮೆಳ್ಳೊ ಆನಿಂ ತಾಚಾ ಫಿಲ್ಮಾಂಕ್ ಪದಾಂ ಬರಂವ್ಕ್ ವೊಪ್ಲೊ. ಅಶೆಂ ’ಬರ್ಸಾತ್’ ಫಿಲ್ಮಾಕ್ ತಾಣೆಂ ಪದಾಂ ಲಿಖ್ಲಿಂ, ತಿಂ ಪದಾಂ ವಿಸಾವ್ಯಾ ಶೆಕ್ಡ್ಯಾಂತ್ಲ್ಯಾ ಬರ್‍ಯಾಂತ್ಲ್ಯಾ ಬರ್‍ಯಾ ಪದಾಂ ಪಯ್ಕಿ ಥೊಡಿಂ ಜಾಲಿಂ. ಅಪ್ಲಿ ಜಿಣಿಂಚ್ ಏಕ್ ಕವಿತಾ ಮ್ಹಳ್ಳೆಂ ಚಿಂತಾಪ್ ಶೈಲೇಂದ್ರಾಚೆಂ ಜಾವ್ನಾಸ್‌ಲ್ಲೆಂ.

ತಾಕಾ ಕವಿತಾ ಬರಂವ್ಕ್ ಪ್ರೇರಣ್ ಲಾಭ್ತಾಲೆಂ ಸದಾಂಯ್ ಸಕಾಳಿಂ ಉಟೊನ್ ಜುಹು ಬೀಚಾಂತ್ ಚಲ್ತಾನಾ. ಜಿಣ್ಯೆಚಾ ಹರ್‍ಯೆಕಾ ಸಂದರ್ಭಾಂಖಾತಿರ್ ತಾಣೆಂ ಪದಾಂ ಲಿಖ್ಲ್ಯಾಂತ್. ಜಾಂವ್ ಜನನ್ ಯಾ ಮರಣ್, ಹಾಸೊ ಯಾ ದೂಕ್, ವಿಳಾಪ್ ಯಾ ರುದಾನ್, ವಿಖ್ರಿತ್‌ಪಣ್ ಯಾ ನಿರಾಸ್. ಹರ್‍ಯೆಕಾ ಸಂದರ್ಭಾಂನಿ ತಾಚಿಂ ಪದಾಂ ತ್ಯಾ ತ್ಯಾ ಸಂದರ್ಭಾಚಾ ಅರ್ಥಾಂಕ್ ಮಿಕ್ವೊನ್ ಗೆಲ್ಯಾಂತ್ ಆನಿಂ ದೆಕುನ್ಂಚ್ ತಿಂ ಅಮರ್ ಜಾಲ್ಯಾಂತ್.

ಕವಿತಾ/ಪದಾಂ: 

ಕೊಣ್‌ಯೀ ಕಶೆಂ ವಿಸರ್ತಿತ್ ಹಿಂ ಉತ್ರಾಂ? ;

"ಮೊರೊನ್‌ಯೀ ಕೊಣಾಚಾ ತರ್‌ಯೀ ಉಡಾಸಾರ್ ಯೆತಲೊಂ ಕೊಣಾಚಾ ತರ್‌ಯೀ ದುಖಾಂನಿ ಹಾಸ್ತಲೊಂ ಫುಲ್ ಸಯ್ತ್, ಝಡಾಂತೂನ್ ಪರತ್ ಪರತ್ ಉಚಾರ್ತೆಲೆಂ ’ಜಿಣಿ’ ಹಾಚೆಂಚ್ ನಾಂವ್ ಜಾವ್ನಾಸಾ"

ಶೈಲೇಂದ್ರಚಿಂ ಪದಾಂ ಭೋವ್ ಸಂಪಿಂ ದೆಕುನ್ ತಿಂ ಆಯ್ಕೊಂವ್ಚೊ ಲೋಕ್ ತಾಂಕಾಂ ಭೋವ್ ಸುಲಭಾಯೆನ್ ಸಮ್ಜೊಂಕ್ ಸಕ್ತಾಲೊ. ಕವಿತಾ ಮ್ಹಳ್ಯಾರ್ ಅಥ್ವೆ ಸಬ್ದ್ ಆಸ್ಚೆ ವಾಕ್ಯ್ ಮ್ಹಳ್ಳೆಂ ಚಿಂತಾಪ್ ಚಡ್ತಾವ್ ಕವಿ/ಪದಾಂ ಲಿಖ್ಪಿಂಚಾ ಮತಿಂತ್ ಆಸ್‌ಲ್ಲೆಂ. ದೆಕುನ್ಂಚ್ ಚಡ್ತಾವ್ ಹಿಂದಿ ಪದಾಂನಿ ಉರ್ದು ಸಬ್ಧ್ ವಾಚುಂಕ್ ಮೆಳ್ತಾತ್.

ಪುಣ್ ಶೈಲೇಂದ್ರಚಾ ಪದಾಂನಿ ಸಾದಿ ಭಾಸ್, ಸಾದಿಂ ಉತ್ರಾಂ ಆಸ್‌ಲ್ಲಿಂ. ತಾಣೆಂ ತಾಚಾ ಕಾಳಾರ್ ಆಸ್‌ಲ್ಲ್ಯಾ ಹೆರ್ ಮಹಾನ್ ಕವಿಂ - ಹಸ್ರತ್ ಜೈಪುರಿ, ಶಕೀಲ್ ಬದಾಯುನಿ ಯಾ ಸಾಹಿರ್ ಲುಧ್ಯಾನ್ವಿ ಹಾಣಿಂ ರಚ್ಲೆಲೆ ತಿತ್ಲಿ ಗೂಂಡ್ ಚಿಂತ್ಪಾಚಿಂ ಪದಾಂ ರಚುಂಕ್‌ನಾಂತ್ ತರ್‌ಯೀ ಶೈಲೇಂದ್ರಾಚಾ ಪದಾಂಕ್ ಏಕ್ ಬರೆಂ ಮಾಧ್ಯಮ್ ಮೆಳ್ಳೆಂ - ತೆಂ ಜಾವ್ನಾಸಾ ರಾಜ್‌ಕಪೂರ್. ಆನಿಂ ಆರ್.ಕೆ.ಫಿಲ್ಮಾಂತ್ಲ್ಯಾ ಚಡ್ತಾವ್ ಫಿಲ್ಮಾಂನಿ ಆಸ್ಚಿಂ ಪದಾಂ ಶೈಲೇಂದ್ರಾಚಿಂಚ್. ಕವಿ/ಗೀತ್‌ಕಾರ್ ಶೈಲೇಂದ್ರಚೆಂ ನಾಂವ್ ಸಾಹಿತ್ಯಾಂತ್ ಸಾಸ್ಣಾಚೆಂ ಕರ್ಚಾಕ್ ಕಾರಾಣ್ ಜಾಲ್ಲೆ ವೆಕ್ತಿ ಪಯ್ಲೆಂ ರಾಜ್ ಕಪೂರಾನ್ ತರ್ ದುಸ್ರೆಂ ಶಂಕರ್ ಜೈಕಿಶನಾನ್. ಆನಿ ಹಾಕಾ ರುಜ್ವಾತ್ ಜಾವ್ನಾಸ್ಚಿಂ ಫಿಲ್ಮಾಂ;

ಶ್ರೀ ೪೨೦, ಬರ್ಸಾತ್, ಸಂಗಮ್, ಬೋಬ್ಬಿ, ಮೇರಾ ನಾಮ್ ಜೋಕರ್, ಪ್ರೇಮ್ ರೋಗ್. ಪುಣ್ ಅಸಲಿಂಚ್ ಥೊಡಿಂ ಹೆರ್ ಫಿಲ್ಮಾಂಕ್ ತಾಣೆಂ ಪದಾಂ ಲಿಖ್‌ಲ್ಲಿಂ ಆನಿಂ ತಿಂ ಆಜ್ ಪರ್‍ಯಾಂತ್ ಲೋಕ್ ವಿಸ್ರೊಂಕ್ ನಾ, ಆನಿಂ ತಿಂ ಜಾವ್ನಾಸಾತ್; ಗೈಡ್, ಅನಾರಿ..

ಅಖ್ರೇಚೆ ದೀಸ್:

ತಾಣೆಂ ಹೆರಾಂಚಾ ಫಿಲ್ಮಾಕ್ ಇತ್ಲಿಂ ಅಪುರ್ಭಾಯೆಚಿಂ ಪದಾಂ ಲಿಖ್‌ಲ್ಲಿಂ ಆನಿಂ ರಾಜ್‌ಕಪೂರಾನ್ ತಿಂ ಸಂಸಾರ್‌ಭರ್ ಪಾಂವ್ಚೆಪರಿಂ ಕೆಲ್ಲಿಂ.

ಶೈಲೇಂದ್ರಾನ್ ನಿರ್ಮಾಣ್ ಕೆಲ್ಲೆಂ ಫಿಲ್ಮ್ ’ತೀಸ್ರಿ ಕಸಮ್’ ಹಾಂತುಂ ರಾಜ್‌ಕಪೂರಾನ್ ನಟನ್ ಕೆಲ್ಲೆಂ ತರ್‌ಯೀ ಹ್ಯಾ ಫಿಲ್ಮಾನ್ ಬಾಕ್ಸ್ ಅಫಿಸಾಂತ್ ಧುಳ್ ಕೆಲ್ಲಿ ಸಂಗತ್ ಶೈಲೇಂದ್ರಾಕ್ ಸೊಸುಂಕ್ ತಾಂಕಾನಾತ್‌ಲ್ಲೊ ದಖೊ ಜಾಲೊ. ಆನಿಂ ತಾಚಾ ಮರ್ಣಾಕ್‌ಯೀ ಕಾರಾಣ್ ಜಾಲೊ. ಪುಣ್ ತಾಚಾ ದುಖಿಕ್ ಕಾರಾಣ್ ತಾಚೆಂ ಫಿಲ್ಮ್ ಬಾಕ್ಸ್ ಅಫಿಸಾಂತ್ ಸಲ್ವಾಲ್ಲೆಂ ಕಾರಾಣ್ ನ್ಹಯ್, ಅಪ್ಲ್ಯಾ ಸಭಾರ್ ಇಸ್ಟಾಂ ಥಾವ್ನ್ ಪೊಯ್ಶೆ ಘೆವ್ನ್ ಹ್ಯಾ ಫಿಲ್ಮಾಕ್ ಘಾಲ್ಲೆ ಆನಿಂ ಅಶೆಂ ಅಪ್ಣಾಚೆರ್ ಆಸ್‌ಲ್ಲೊ ತಾಂಚೊ ಭರ್ವಸೊ ಉಣೊ ಜಾಂವ್ಕ್ ಕಾರಾಣ್ ಜಾಲ್ಲ್ಯಾಚಿ ದೂಕ್.

ದಸೆಂಬ್ರಾಚಾ ತೆರಾ ತಾರಿಕೆರ್ ತಾಕಾ ಆಸ್ಪತ್ರೆಕ್ ಭರ್ತಿ ಕರ್ಚಾ ವೆಳಾರ್, ವಾಟೆರ್‌ಚ್ ತೊ ಆರ್.ಕೆ.ಸ್ಟುಡಿಯೊಲಾಗಿಂ ಗಾಡಿ ರಾವಾವ್ನ್ ರಾಜ್‌ಕಪೂರಾಕ್ ಮೆಳ್ಳೊ ಆನಿಂ ’ಜಿವಿತ್ ಹಾಂಗಾ.. ಮರಣ್ ಹಾಂಗಾ (ಜೀನಾ ಯಹಾಂ ಮರ್ನಾಂ ಯಹಾಂ)’ ಪದ್ ಬರವ್ನ್ ದಿಂವ್ಚಿ ಭಾಸ್ ದಿಲಿ ತರ್‌ಯೀ ತಿ ಅಧುರಿಚ್ ಉರ್ಲಿ, ಕಿತ್ಯಾಕ್ ಮ್ಹಳ್ಯಾರ್ ದುಸ್ರೆಚ್ ದಿಸಾ ತೊ ಅಂತರ್ಲೊ, ತೊ ದೀಸ್ ರಾಜ್‌ಕಪೂರಾನ್ ಜಲ್ಮಾಲ್ಲೊ ದೀಸ್.

ಕವಿತಾದಾಯ್ಜ್ - 7 . ಶೈಲೇಂದ್ರ

1953 ಇಸ್ವೆಂತ್ಲ್ಯಾ ರಾಜ್‌ಕಪೂರಾಚಾ ’ಆಹ್’ ಫಿಲ್ಮಾಕ್ ಹಾಣೆಂ ಬರಯಿಲ್ಲೆಂ ’ಚೋಟಿಸಿ ಯೇ ಜಿಂದಗಾನಿ (ಲ್ಹಾನ್ಶೆಂ ಜಾವ್ನಾಸಾ ಹೆಂ ಜಿವಿತ್)’ ಮ್ಹಳ್ಳೆಂ ಏಕ್ ಅಪುರ್ಭಾಯೆಚೆಂ ಪದ್ ಅಶೆಂ ಆಸಾ;

     "ಮಟ್ವೆಂ ಜಾವ್ನಾಸಾ ಹೆಂ ಜಿವಿತ್‌ರೆ, 

     ಚಾರ್ ದಿಸಾಂಚೆಂ ತರ್ನಾಟ್ಪಣ್ ತುಜೆಂ 

     ಹಾಯ್ ರೆ ಹಾಯ್ ದುಕಾಚಿ ಕಾಣಿ ತುಜಿ ತಿ

     ದುಕಾಚಿ ಕಾಣಿ ತುಜಿ 

ಸಾಂಜ್ ಜಾತೆಚ್ ಹೊ ದೇಸ್ ರಿಕಾಮೊ 

ತುಕಾ ತುಕಾ ಪ್ರೇಮಿಚಾ ಘರಾ ವಚೊಂಕ್ ಆಸಾ, 

ಮೊಗಾಚಾ ಘರಾ ಪಾವೊಂಕ್ ಆಸಾ 

ವಾಟೆರ್ ಪಿಶ್ಯಾ ಲುಟೊನ್ ವಚಾನಾಕಾ, ಲುಟೊನ್ ವಚಾನಾಕಾ 

     ಕುಳಾರ್ಚೆಂ ಘರ್ ಸೊಡುನ್ ಜಾತೆಚ್ 

     ದೊಳ್ಯಾಂನಿ ಕಾಳ್ಭಾಣ್ ಭರೊನ್ ಯೇತ್, 

     ಪಳೆ ಕಾಳಿಜ್‌ಯ್ ಭಿಂಯೆತ್ 

     ದೊಳ್ಯಾಂತೂನ್ ಗಳ್ತೆಲೆಂ 

     ಕಾಳ್ಜಾಚೆಂ ಖಜಾನ್, ಕಾಳ್ಜಾಚೆಂ ಖಜಾನ್".

ಕವಿತಾದಾಯ್ಜ್: 1, 2, 3, 4, 5, 6

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2004 DAAIZ.COM All rights reserved. Page concept, designed and maintained by Ashawadi Publications