ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಹಾಂವ್ ಸರ್ವ್ ಜಾಣಾರಿ ಮ್ಹಳ್ಳೆಂ ಚಿಂತಾಪ್ ಆಸ್ಚೆ ಅರ್ಧೆಂಕುರೆ ಜಾಣಾರಿ’ - ಆಸ್ಟಿನ್ ಡಿ’ಸೊಜ್ ಪ್ರಭು (ಅಮೆರಿಕಾ)

ಕೊಂಕ್ಣಿ ಕಾರ್ಭಾರಿ - 4

Placeholder: the original page gave this picture no description, and none has been written yet. It came from daaiz\daaiz\column\kk\kk4.asp.

ಸಂದರ್ಶಕ್: ಜೊಮೆಲ್ ಬೊಂದೆಲ್ (ಕುವೇಯ್ಟ್)

ಆಸ್ಟಿನ್ ಡಿ’ಸೊಜ್ ಪ್ರಭು

ಜನನ್ : 1950 ಇಸ್ವೆಚಾ ಅಗೋಸ್ತಾಚಾ 8 ತಾರಿಕೆರ್ ಕೊಡ್ಯಾಳ್ಚಾ ನಂತೂರ್ ಫಿರ್ಗಜೆಂತ್ ಜಲ್ಮಾಲೊ.

ವಿಳಾಸ್ : 906, Danlop Avenue, Forest park, illinois 60130-2059, USA.

ಕುಟ್ಮಾಚೊ ವಿವರ್ : ತೆರೆಸ್ ಲಿಲ್ಲಿ ಡಿಸೊಜ್, (ಪತಿಣ್), ಆನಿತಾ, ಆನಿಲ್, ಆಟಿನಾ, ಆನಿಂ ಆಗ್ನೆಲ್ (ಭುರ್ಗಿಂ).

ಇಮೇಯ್ಲ್ : ADsouza963@aol.com

ಶರೊ: ಕೊಂಕ್ಣಿ ಸಮಾಜೆಂತ್ ಉದೆವ್ನ್ ಆಯಿಲ್ಲ್ಯಾ ಭೋವ್ ಥೊಡ್ಯಾ ಉಂಚ್ಲ್ಯಾ ಮುಖೆಲಿಂ ಪಯ್ಕಿ ಹೊ ಎಕ್ಲೊ. ಕಥೊಲಿಕ್ ಯುವಸಂಚಾಲನಾಚಾ ಕೇಂದ್ರಿಯ್ ಸಮಿತಿಚೊ ಅಧ್ಯಕ್ಡ್ ಜಾವ್ನ್ ಸೆವಾ ದಿಲ್ಲೊ ಹೊ ಏಕ್ ಸಮಾಜ್ ಸೆವಕ್, ಸಾಹಿತಿ, ಪತ್ರಿಕೋಧ್ಯಮಿ, ಕವಿ, ನಾಟಕಿಸ್ತ್, ನಟ್, ಚಿಂತ್ಪಿ ಆನಿಂ ಕೊಂಕ್ಣೆಚೊ ಖರೊ ಮೋಗ್ ಆನಿ ಹುಸ್ಕೊ ಆಸ್ಚೊ ಏಕ್ ಮಾನ್ ವೆಕ್ತಿ. ಆಜ್‌ಕಾಲ್ ಕುವೆಯ್ಟಾಂತ್ ತಶೆಂಚ್ ಹೆರ್‌ಜಾಗ್ಯಾಂನಿ ಜಾಯ್ತಿಂ ಹಾಚಿ ದೇಕ್ ಘೆತಾತ್ ಆನಿಂ ಹಾಣೆಂ ದಾಕ್ಡ್ಯಾಧಿಂ ಕೆಲ್ಲಿಂ ಸಾಧನಾಂ ಆತಾಂ ತೆಚ್ಚ್ ಪರಿಂ ನಕ್ಕಲ್ ಕರ್ತಾತ್.

"THE GREATEST TRUTH IS ALWAYS SIMPLE

THE GREATEST PERSON IS ALWAS HUMBLE"

ಹಿಂ ವಯ್ಲಿಂ ಉತ್ರಾಂ ಖಂಡಿತ್ ಜಾವ್ನ್ ಮಾನೆಸ್ತ್ ಆಸ್ಟಿನ್ ಡಿಸೊಜಾಕ್ ವಳ್ಕಲ್ಲ್ಯಾಂನಿ ಕಾಳ್ಜಾ-ಮನಾಂನಿ ಒಪುನ್ ಘೆಂವ್ಚಿಂ ಜಾವ್ನಾಸಾತ್. ಅಪ್ಲ್ಯಾ ಜಿಣ್ಯೆಕ್ ಹೆರಾಂಚಾ ಬರೆಪಣಾಖಾತಿರ್ ಗಳ್ಸಿತೆಲೆ ಖರೆ ಮುಖೆಲಿ ಆಯ್ಚಾ ಕಾಳಾರ್ ಆಮ್ಕಾಂ ಸೊಧುನ್ ಗೆಲ್ಯಾರ್‌ಯ್ ಮೆಳ್ಚೆ ಭೋವ್ ಉಣೆಂ, ತ್ಯಾ ಭೋವ್ ಉಣ್ಯಾಂತ್ಲೊ ಎಕ್ಲೊ ಜಾವ್ನ್ ಆಸ್ಚೊ ಮಾನೆಸ್ತ್ ಆಸ್ಟಿನ್, ಕೆದಿಂಕ್‌ಚ್ ಅಪ್ಲ್ಯಾ ನಾಂವಾಖಾತಿರ್ ಝುಜ್‌ಲ್ಲೊ ವಾ ಝುಜ್ಚೊ ಮನಿಸ್ ನ್ಹಯ್. ಮ್ಹಜಾ ಚಿಂತ್ಪಾಪ್ರಕಾರ್ ತಾಣೆಂ ಗಳ್ಸಿಲ್ಲ್ಯಾಚಾಕೀ ಚಡಿತ್ ಹೊಗ್ಡಾಯ್ಲಾಂ.

ಕೊಂಕ್ಣಿ ಮಾತ್ಯೆಂತ್ ಜಲ್ಮಾಲ್ಲೊ ಮಾನೆಸ್ತ್ ಆಸ್ಟಿನ್, ಫಾಮದ್ ನಾಟಕಿಸ್ತ್, ಬರಯ್ಣಾರ್, ಏಕ್ ಖರೊ ಮುಖೆಲಿ, ಸಮಾಜ್ ಸೆವಕ್ ಆನಿಂ ವಿವಿಧ್ ಶೆತಾಂನಿ ಹೆಳ್‌ಲ್ಲೊ ಖಾಲ್ತೊ ಮ್ಹನಿಸ್ ಜಾವ್ನಾಸಾ. ಇತ್ಲ್ಯಾ ತಾಲೆಂತಾನಿ ಭರ್ಲ್ಯಾರೀ, ತಿತ್ಲೆಂಚ್ ಸಾದೆಂ ತಶೆಂ ಮೊವಾಳ್ ಕಾಳ್ಜಾಚೊ ಜಾವ್ನಾಸಾ ಮ್ಹಣ್ ಸಾಂಗೊಂಕ್ ಮ್ಹಾಕಾ ವರ್ತೊ ಸಂತೊಸ್ ಆನಿಂ ಅಭಿಮಾನ್ ಭಗ್ತಾ. ತಾಕಾ ಆಮಿ "ಕೊಂಕಣ್ ಕಾರ್ಭಾರಿ" ಮ್ಹಣ್ ವಿಂಚುಂಕ್ ಆಮ್ಕಾಂ ಭೋವ್ ಸಂತೊಸ್ ಭೊಗ್ತಾ.

ಕಶಿ ಏಕ್ ಹಸ್ತ್ ರಸ್ತ್ಯಾ ವಯ್ಲ್ಯಾನ್ ಚಲ್ತಾನಾ ಘಾಂಟ್ ಮಾರುನ್ ಕಳೊಂವ್ಚಿ ಗರ್ಜ್ ಆಸಾನಾಂಗಿ ತಶೆಂಚ್ ಮಾನೆಸ್ತ್ ಆಸ್ಟಿನಾ ವಿಶ್ಯಾಂತ್ ವ್ಹಳೊಕ್ ಕರುನ್ ದಿಂವ್ಚಿಯ್ ಗರ್ಜ್ ಮ್ಹಣ್ ದಿಸಾನಾ. ಬರ್‍ಯಾ ಕಾಮಾಕ್, ಬರ್‍ಯಾ ಉದ್ದೆಶಾಂಕ್ ಅನಿಂ ಬರ್‍ಯಾ ಮ್ಹನ್ಶ್ಯಾಂಕ್ ಸದಾಂ ಪಾಟಿಂಬೊ ದಿಂವ್ಚಾಂತ್ ಯಾ ಉಲ್ಲಾಸ್ ಪಾಟಂವ್ಚ್ಯಾಂತ್ ಮಾನೆಸ್ತ್ ಆಸ್ಟಿನ್ ಕೆದಿಂಚ್ ಘಳಾಯ್ ಕರಿನಾ. ಹೊ ತಾಚೊ ಉಂಚ್ಲೊ ಗೂಣ್ ಜಾವ್ನಾಸಾ. ತಾಣೆಂ ಕೊಂಕ್ಣಿ ಸಮಾಜೆಕ್ ಆನಿ ಹೆರ್ ಸಂಘ್ ಸಂಸ್ತ್ಯಾಂಕ್ ಕೆಲ್ಲೊ ವಾವ್ರ್ ಆಮಿ ಲಿಖುಂಕ್ ಬಸ್ಲೊಂ ತರ್ ಏಕ್ ಕಾದಂಬರಿಚ್ ಬರವ್ಯೆತಾ. ಪುಣ್ ಮಟ್ವ್ಯಾನ್ ತಾಚೊ ಥೊಡೊ ವಾವ್ರ್ ಹಾಂಗಾಸರ್ ಪಿಂತ್ರಾಂವ್ಕ್ ಆಮಿ ಪ್ರಯತ್ನ್ ಕೆಲಾ.

ಕೊಂಕ್ಣಿ ಪತ್ರಿಕೊದ್ಯಮಾಂತ್ಲೊ ವಾವ್ರ್: 

* ಸಂಪಾದಕ್ ಆನಿಂ ಸಂಚಾಲಾಕ್ - ’ಮಿತ್ರ್’ ಹಾಫ್ತ್ಯಾಳೆಂ.

* ಸಂಪಾದಕ್ ಆನಿಂ ಸಂಚಾಲಾಕ್ - ’ಝೆಲೊ’ ಪಂದ್ರಾಳೆಂ

* ಸಂಪಾದಕ್ ಆನಿಂ ಸಂಚಾಲಾಕ್ - ’ಕಾಣಿಕ್’ ಮಹಿನ್ಯಾಳೆಂ

* ಸಂಪಾದಕ್ ಆನಿಂ ಸಂಚಾಲಾಕ್ - ’ಯುವಕ್’ ಸಿವೈಎಮ್ ಕೌನ್ಸಿಲಾಚೆಂ ಪತ್ರ್

* ಸಂಪಾದಕ್ ಆನಿಂ ಸಂಚಾಲಾಕ್ - ’ಉದೆವ್’ ಹಾಪ್ತ್ಯಾಳೆಂ

* ಸಹ-ಸಂಪಾದಕ್ - ’ಆಮ್ಚಿ ಸಮಜ್’ ಮಹಿನ್ಯಾಳೆಂ

* ಸಹ-ಸಂಪಾದಕ್ - ’ರಾಕ್ಣೊ’ ಹಾಪ್ತ್ಯಾಳೆಂ

ಕೊಂಕ್ಣಿ ನಾಟಕ್, ಕಲಾ, ಆನಿಂ ಸಾಮಾಜಿಕ್ ವಾವ್ರ್: 

* ಸ್ಥಾಪಕ್ ಕಾರ್‍ಯದರ್‍ಶಿ : ಕೊಂಕಣ್ ಭಾಷಾ ಮಂಡಳ್(ನೊ), ಕರ್‍ನಾಟಕ್, ಮಂಗ್ಳೂರ್ - ಸ ವರ್‍ಸಾಂ ಪರ್‍ಯಾಂತ್.

* ಕಾರ್‍ಯದರ್ಶಿ : ಕೊಂಕ್ಣಿ ನಾಟಕ್ ಸಭಾ(ನೊ), ಮಂಗ್ಳೂರ್ - ಸ ವರ್‍ಸಾಂ ಪರ್‍ಯಾಂತ್

* ಸ್ಥಾಪಕ್ : ಕಲಾ ಸಂಪತ್, ಮಂಗ್ಳೂರ್ - 1972

* ಸ್ಥಾಪಕ್ : ಕಲಾ ಸಂಪತ್ ಕಲ್ಚರಲ್ ಅಸೊಶಿಯೆಶನ್, ಚಿಕಾಗೊ

* ಸ್ಥಾಪಕ್ : ಮೆಂಗ್ಲೋರಿಯನ್ ಕೊಂಕಣ್ ಕ್ರಿಸ್ಚಿಯನ್ ಅಸೊಶಿಯೆಶನ್, ಅಮೆರಿಕಾ

ಹಾಕಾ ಮುಖಾಮುಖಿಂ ಭೆಟ್ಚೆಂ ಭಾಗ್ ಆಮ್ಕಾಂ ಎದೊಳ್ ಲಾಭೊಂಕ್ ನಾ ತರ್‌ಯ್ ಓನ್‌ಲಾಯ್ನ್ ಘೆತ್‌ಲ್ಲ್ಯಾ ಸಂದರ್ಶನಾಚಿಂ ಥೊಡಿಂ ಸವಾಲಾಂ ಆನಿಂ ತಾಚೊ ಜಾಪಿ ಅಶ್ಯೊ ಆಸಾತ್;

ಸ: ಕೊಂಕ್ಣಿ ಸಾಹಿತ್ಯ್ ಆನಿಂ ಪತ್ರಿಕೊಧ್ಯಮಾಚಿ ಪಿಸಾಯ್ ತುಮ್ಕಾಂ ಕಶಿ ಲಾಗ್ಲಿ? 

ಜ: ವರ್ಗಣ್ದಾರ್ ದೆಕುನ್ ಆಮ್ಚ್ಯಾ ಘರಾಂತ್ ರಾಕ್ಣೊ ಹಾಫ್ತ್ಯಾಳೆಂ ಯೆತಾಲೆಂ ಆನಿಂ ಮ್ಹಜೊ ಬಾಬ್ ತೆಂ ವಾಚ್ತಾಲೊ, ತರ್‌ಯಿ ಹಾಂವ್ ಚಡಿತ್ ಗುಮಾನ್ ದಿನಾಸ್ತಾಂ ತವಳ್ ತವಳ್ ತೆಂ ಪತ್ರ್ ವಾಚ್ತಾಲೊ. ಮಾನೆಸ್ತ್ ಲಿಯಾಬಾಚಿ "ಸಾವಿಯೊ ಮಂಡಲಿ" ಅಂಕಣ್ ಮ್ಹಕಾ ಚಡ್ ಪಸಂದ್ ಜಾತಾನಾ, ಹಾಂವೆಂಯ್ ಏಕ್ ಮಟ್ವಿ ಕಾಣಿ ಬರವ್ನ್ ಹ್ಯಾ ಪತ್ರಾಕ್ ದಾಡ್ಲಿ. ತಿ ಕಾಣಿ ಪತ್ರಾರ್ ಫಾಯ್ಸ್ ಜಾತಾನಾ ಮ್ಹಕಾ ವರ್ತೊ ಸಂತೊಸ್ ಜಾಲ್ಲೊ. ಮ್ಹಜೊ ಬಾಪ್ಲೊ ಬೊಂಬೊಯ್ ಥಾವ್ನ್ ಭಲಾಯ್ಕೆ ಬಾಬ್ತಿನ್ ಗಾವಾಂಕ್ ಪಾವ್‌ಲ್ಲ್ಯಾ ವೆಳಾರ್ ತಾಣೆ ’ಮಿತ್ರ್’, ’ಝೆಲೊ’ ಆನಿಂ ಹೆರ್ ಪತ್ರಾಂ ಹಾಡ್ಲೊ. ಹಿಂ ಪತ್ರಾಂ ಮ್ಹಕಾ ಚಡ್ ರುಚ್ಲಿಂ ಆನಿಂ ಹಾಂವೆ ಮ್ಹಜ್ಯೊ ಥೊಡಿಂ ಲೆಖನಾಂ, ಕಾಣಿಯೊ ಆನಿಂ ಕವನಾಂ ಜೊ. ಸಾ. ಅಲ್ವಾರಿಸಾಕ್ ತಪ್ಪಲಾಚೆರ್ ಧಾಡ್ಲಿಂ. ಆನಿಂ ತಿಂ ತ್ಯಾ ಪತ್ರಾಂಚೆರ್ ಫಾಯ್ಸ್ ಜಾತಾನಾ ಮ್ಹಜೆಂ ನಾಂವ್ ಪತ್ರಾಚೆರ್ ಯೆಂವ್ಚೆಂ ಪಳೆವ್ನ್ ಸಂತೊಸಾನ್ ಉಡಿ ಮಾರ್‍ತಾಲೊಂ. ’ಮಿತ್ರ್’ ಪತ್ರಾಚೆರ್ ಫಾಯ್ಸ್ ಜಾಲ್ಲೆಂ ಮ್ಹಜೆಂ "ಇಗರ್‍ಜೆ ಭಿತರ್‍ಲಿ ಕುಸಾಡಾಯ್" ಲೇಖನ್ ಕಠೀಣ್ ತರ್ಕಾಕ್ ಆನಿಂ ಗುಸ್ಪೊಡಾಕ್ ಕಾರಣ್ ಜಾಲೆಂ.

ಇಗರ್‍ಜೆ ಭಿತರ್ ಮೊಡಿಂ ಪುರ್‍ಚಿಂ ಆನಿಂ ಹೆರ್ ವಿಶಯಂತ್ ಹಾಂವೆ ಮ್ಹಜೆ ಅಭಿಪ್ರಾಯ್ ವ್ಯಕ್ತ್ ಕರ್‍ತಾನಾ, ಹೊ ಗುಸ್ಪೊಡ್ ವಾದ್-ವಿವಾದ್ ಧಾ ಮಹಿನೆ ಮ್ಹಣಾಸರ್ ಲಾಂಬ್ತಾನಾ, ಲೊಕಾನಿಂ ಮ್ಹಕಾ ಏಕ್ ಬರಯ್ಣಾರ್ ತಶೆಂ ಸ್ವಿಕಾರ್ ಕೆಲ್ಲೊ. (ಕ್ರಮೇಣ್ ಇಗರ್‍ಜೆ ಭಿತರ್ ಮೊಡಿಂ ಪುರ್‍ಚೆಂ ರಾವ್ಲೆಂ). ಮ್ಹಜಾ ITI ಶಿಕ್ಪಾ ಉಪ್ರಾಂತ್, ಕಾಮಾ ಖಾತಿರ್ ಬೊಂಬೊಯ್ ಪಾವ್ತಾನಾ, ಮ್ಹಕಾ ಬರೊಂವ್ಕ್ ಚಡಿತ್ ವೇಳ್ ಮೆಳ್ತಾಲೊ ಆನಿಂ ತೊ ವೇಳ್ ಹಾಂವೆ ಬರೊ ಕರುನ್ ಗಳ್ಸುನ್ ’ಆಂಜ್’, ’ಮಿತ್ರ್’, ’ಝೆಲೊ’ ಪತ್ರಾಂಕ್ ಸರಾಗ್ ಬರಯ್ತಾಲೊಂ. "ಹಾಪ್ತ್ಯಾಚೆಂ ಭವಿಷ್ಯ್" ಮ್ಹಳ್ಳೆಂ ಅಂಕಣ್ (ಜಾತಕ್ ಪಟ್ಟಿ) ಸಯ್ತ್ ಹಾಂವ್ ಬೊಂಬೊಯ್ ಥಾವ್ನ್ ಲಿಖ್ತಾಲೊಂ. ಬೊಂಬಂಯ್ತ್ ಕೈಸಿ ಕಂಪೆನಿಂತ್ ತೀನ್ ವರ್‍ಸಾಂ ಆನಿಂ ’ಪಯ್ಣಾರಿ’ ಹಾಫ್ತ್ಯಾಳ್ಯಾಂತ್ ದೊನ್ ಮಹಿನೆ ಕಾಮ್ ಕೆಲ್ಲ್ಯಾ ನಂತರ್ ಹಾಂವ್ ಪರತ್ ಗಾವಾಕ್ ಪಾಟಿಂ ಯೆತಾನಾ, ಬಾಪಾಯ್ನ್ ಮ್ಹಜ್ಯಾ ತಾಚ್ಯಾ ಟೈಲರ್ ದುಕಾನಾಂತ್ ಕಾಮ್ ಕರುಂಕ್ ಆವ್ಕಾಸ್ ಕರುನ್ ದಿಲೊ. ಹಾಂವ್ ಬಾಪಯ್‌ಬರಿಂ ಬರೊ ಧರ್ಜಿ ಜಾಯ್ಜೆ ಮ್ಹಣ್ ಚಿಂತ್ಲ್ಯಾರ್‌ಯೀ, ಹಿ ವೃತ್ತಿ ಮ್ಹಾಕಾ ಚಡ್ ಪಸಂದ್ ಜಾಲಿನಾ.

ಹ್ಯಾ ವೆಳಾರ್, "ವೀಕ್‌ನೆಸ್ ನಂತೂರ್" ಮ್ಹಳ್ಳ್ಯಾ ಲೆಖ್ಣೆ ನಾಂವಾರ್ ಹಾಂವ್ ಹಾಸ್ಯ್, ವಿಡಂಬನ್, ಆನಿಂ ಹೆರ್ ಲೆಖನಾಂ ’ಮಿತ್ರ್’, ’ಝೆಲೊ’, ’ರಾಕ್ಣೊ’, ’ಆಮ್ಚಿಂ ಸಮಾಜ್’ ಆನಿಂ ’ಮಾಂಯ್‌ಗಾಂವ್’ ಪತ್ರಾಂಕ್ ಲಿಖ್ತಾಲೊಂ. ಭಲಾಯ್ಕಿ ಆನಿಂ ಉತರ್‌ಪ್ರಾಯೆ ನಿಮ್ತಿಂ ಜೊ. ಸಾ. ಆಲ್ವಾರಿಸ್ ’ಝೆಲೊ’ ಪತ್ರ್ ಬಂಧ್ ಕರ್‍ಚಿ ಖಭಾರ್ ಮ್ಹಾಕಾ ಕಳ್ತಾನಾ, ಮ್ಹಾಕಾ ಬೋವ್ ಬೆಜಾರ್ ಆನಿಂ ದೂಖ್ ಬೊಗ್ಲೆಂ. ಹಾಂವ್ ಖುದ್ದ್ ತಾಕಾ ಮೆಳೊಂಕ್ (ಪಯ್ಲೆಂ ಪಾವ್ಟಿಂ) ಗೆಲೊಂ. ಹಾಂವೆ ತಾಕಾ ಪಾಂಯ್ಶಿ ರುಪಯ್ (Royalty) ದೀವ್ನ್ ’ಝೆಲೊ’ ಪತ್ರ್ ಮೊಲಾಕ್ ಘೆತ್ಲೆಂ, ಆನಿಂ ಸುಧಾ ಆರ್ಟ್ಸ್ ವಚೊನ್ ’ಝೆಲೊ’ ಪತ್ರಾಚೆಂ ಮುಖ್ಲೆಂ ಪಾನ್ ರಂಗಾಳ್ ಕರುನ್ ಪತ್ರ್ ಚಾಲು ದವರ್‍ಲೆಂ. ತೆದ್ನಾಂ ಮ್ಹಕಾ ಜಾಲ್ಲಿ ದಾಧೊಸ್ಕಾಯ್ ವರ್‍ಣುಂಕ್ ಮ್ಹಾಕಾ ಉತ್ರಾಂ ಪಾವಾನಾಂತ್.

ಪರತ್ ’ಝೆಲೊ’ ಪತ್ರ್ ಫಾಮಾದ್ ಜಾಲೆಂ. ಸ ಮಹಿನ್ಯಾ ಉಪ್ರಾಂತ್ ’ಮಿತ್ರ್’ ಪತ್ರ್ ಹಾಂವ್ ಜೊ. ಸಾ. ಅಲ್ವಾರಿಸಾಬಾ ಥಾವ್ನ್ ಘೆವ್ನ್, ಹಿಂ ದೋನೀಂ ಪತ್ರಾಂ ಚಲವ್ನ್ ವರುಂಕ್ ಲಾಗ್ಲೊಂ. ಹ್ಯಾ ವೆಳಾರ್ ಮ್ಹಾಕಾ ಜಾಯ್ತ್ಯಾ ಲೇಖಕ್ ಇಷ್ಟಾಂಚಿ ವಳೊಕ್ ಜಾಲಿ. ತಾಂಚೆ ಪಯ್ಕಿ ಸಿಜ್ಯೆಸ್ ಎಕ್ಲೊ, ಆನಿಂ ತಾಣೆಂ ಮ್ಹಾಕಾ ಹಿಂ ಪತ್ರಾಂ ಜಿವಾಳ್ ಉರಂವ್ಕ್ ಬರೊ ಪಾಟಿಂಬೊ ದಿಲ್ಲೊ ಹಾಂವ್ ವಿಸ್ರೊಂಚೊ ನಾಂ. ತ್ಯಾ ವೆಳಾರ್ ’ಸಿರಿವಂತಾನ್’ ಚಲೊಂವ್ಚೊ ’ಕಾಣಿಕ್’ ಪತ್ರ್ ಬಂಧ್ ಜಾತಾ ಮ್ಹಣ್ ಸಿಜ್ಯೆಸಾನ್ ಖಭಾರ್ ಹಾಡ್ತಾನಾ, ಆಮಿ ದೊಗೀ ಸಿರಿವಂತಾಕ್ ಮೆಳೊನ್, ಕಾಣಿಕ್ ಪತ್ರ್ ಆಮಿ ಚಲುನ್ ವರ್‍ಚಿ ಆಶಾ ಉಚಾರ್ಲಿ. ಅಶೆಂ ಹಾಂವ್ ’ಝೆಲೊ’, ’ಮಿತ್ರ್’ ಅನಿಂ ’ಕಾಣಿಕ್’ ಪತ್ರಾಂಚೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲೊ.

ಸ: ತುಮ್ಚಾ ಸಾಹಿತ್ಯಾಚೊ ಇಲ್ಲೊ ವಿವರ್ ದಿಶಾತ್‌ಗೀ?

ಜ: ಸುಮಾರ್ 1972 ಥಾವ್ನ್ ಹಾಂವೆ 1980 ಮ್ಹಣಾಸರ್ ಹಾಂವೆ 12 ಮಟ್ವ್ಯೊ ಕಾಣಿಯೊ, 8 ನಾಟಕ್, 10 ರೆಡಿಯೊ ನಾಟಕ್ (ಕೊಂಕ್ಣಿ), 3 ಲಾಂಬ್ ನಾಟಕ್ ಬರಯ್ಲ್ಯಾತ್. ಏಕ್ ನಾಟಕ್ - ’ಆಂಕ್ವಾರ್ ಸೆಲ್ಲಿ’ ಬುಕಾ ರುಪಾರ್ ತಶೆಂಚ್ ಆಯ್ಲೆವಾರ್ ಮಾಂಯ್‌ಭಾಸ್ ಸಾಯ್ಟಿಚೆರ್ ಫಾಯ್ಸ್ ಜಾಲಾ. ಹ್ಯಾ ನಾಟ್ಕುಳ್ಯಾಕ್, ಕೊಂಕಣಿ ಭಾಷಾ ಮಂಡಳ್, ಗೊಂಯಾಚಿ 1976 ಂತ್ ಪ್ರಶಸ್ಥಿ.

"ಯುನೈಟೆಡ್ ಯಂಗ್ ಸ್ಟರ್‍ಸ್, ಜೆಪ್ಪು" ಪಂಗ್ಡಾಚೆ ಮಜತೆನ್ "ಸೊಮಿಯಾ ಕಾಕುತ್ ಕರ್" ಮ್ಹಳ್ಳೊ ನಾಟಕ್ ಕೊವ್ಳೆರುಪಾರ್ ಫಾಯ್ಸ್ ಜಾಲಾ. ಹೊ ನಾಟ್ಕುಳೊ ಹಾಂವೆ 1984 ಂತ್ ಖಳಾನಾಸ್ತಾಂ ಪಾಂಚ್ ವೊರಾಂಭಿತರ್ ಲಿಖುನ್, ಏಕಾ ಹಪ್ತ್ಯಾಚ್ಯಾ ತಯಾರಾಯೆನ್ ಬೆಂದುರ್ ಉಗ್ತ್ಯಾ ರಂಗಮಂಚಾರ್ ಖೆಳವ್ನ್ ದಾಕಯ್ಲಾ. ಹಾಂವೆ ಶೆಂಭೊರಾಂ ವಯ್ರ್ ನಾಟಕಾಂತ್ ಯಾ ರೆಡಿಯೊ ನಾಟಕಾಂತ್ ಅಭಿನಯ್ ಕೆಲಾಂ.

1981 ಂತ್ "ಸೊಮಿಯಾಚೊ ಪಾಶಾಂವ್" ನಾಟಾಕಾಂತ್ ಬೊಟ್ಲೆರಾಚೊ ಪಾತ್ರ್ ಘೆತ್ಲಾ. ಹಾಸ್ಯ್ ನಟನ್ ಮ್ಹಕಾ ಚಡಿತ್ ಪಸಂದೆಚೆಂ ಅನಿ ಲೋಕ್ ಮ್ಹಜೆಂ ಅಭಿನಯ್ ಪಳೆಂವ್ಚ್ಯಾ ಫುಡೆಂಚ್ ಮ್ಹಕಾ ಪಳೆವ್ನ್ ಹಾಸ್ತಾಲೊ. ಏಕ್ ಪಾವ್ಟಿಂ ಡೋನ್ ಬೊಸ್ಕೊ ಹೊಲಾಂತ್ ದೆವಾದಿನ್ ಏಡ್ವರ್ಡ್ ಕ್ವಾಡ್ರಸ್ ಆನಿಂ ದೆವಾದಿನ್ ವಿನ್ಸೆಂಟ್ ಕಾಮತ್ ಹಾಂಕಾ ರಂಗಮಂಚೆರ್‌ಚ್ ಜ್ಯೊರಾನ್ ಹಾಸಯಿಲ್ಲೆಂ ಮ್ಹಾಕಾ ಅಜೂನ್ ಉಡಾಸಾಕ್ ಯೆತಾ. ಹಾಂವ್ ಮ್ಹಜಿಂಚ್ ಥೊಡಿಂ ಸಂಭಾಷಣಾಂ ಘಾಲುನ್ ಲೊಕಾಂಕ್ ಹಾಸಂವ್ಚಿ ಮ್ಹಜಿ ಏಕ್ ವಿಶಿಶ್ಟಿತಾ ಜಾವ್ನಾಸಾ. ತಶೆಂ ಹಾಂವೆ ಲಗ್ಬಗ್ ದೊನ್ಶ್ಯಾಂ ವಯ್ರ್ ಕವಿತಾ ಬರೈಲ್ಯಾಂತ್.

"ಆದರ್‍ಶ್ ಯುವಜಣ್" ಮ್ಹಳ್ಳೊ ಏಕ್ ಲಿಸಾಂವಬರಿತ್ ಬೂಕ್ ಬರೈಲಾ. ಹ್ಯಾ ಬುಕಾಕ್ ’ಕೊಂಕಣ್ ಭಾಷಾ ಮಂಡಳ್’, ಗೊಂಯಾ ಥಾವ್ನ್ 1978 ಂತ್ ಪ್ರಶಸ್ತಿ ಲಾಭ್ಲ್ಯಾ. ’ರಾಕ್ಣೊ’, ’ಮಿತ್ರ್’, ’ಝೆಲೊ’, ’ಕಾಣಿಕ್’, ’ಆಮ್ಚಿ ಸಮಾಜ್’, ’ಮಾಂಯ್‌ಗಾಂವ್’, ’ಆಮ್ಚೊ ಯುವಕ್’, ’ವಿಶನ್’, ’ಗವರ್‍ನರ್‍ಸ್ ನ್ಯೂಸ್ ಲೆಟರ್’ ಇತ್ಯಾದಿಂತ್ ಹಾಂವೆ ಜಾಯ್ತಿಂ ಲೆಖನಾಂ ಲಿಖ್ಲ್ಯಾಂತ್.

ಸ: "ಕಲಾಸಂಪತ್" ಹಾಚೊ ಧ್ಯೇಯ್ ಕಸಲೊ?

ಜ: ಕೊಂಕ್ಣಿ ಯುವಕಾಂಕ್ ಗಾಯಾನ್, ನಾಚ್, ಸಾರ್‍ವಜನಿಕ್ ಉಲವ್ಣೆಂ (Public Speaking), ಅಭಿನಯ್, ಸಂಘ್ ಸಂಸ್ತ್ಯಾಂನಿ ಭರ್‍ಸೊನ್ ಮೆಳೊನ್ ರಾಂವ್ಚೆಂ, ಹ್ಯಾ ವಿಶ್ಯಾಂತ್ ಆಮಿ ಜಾಯ್ ಪುರ್‍ತಿ ಮಾಹೆತ್ ಆನಿಂ ಆಮ್ಚೊ ಆನ್ಭೊಗ್ ವಾಂಟ್ತಾಂವ್.

ಹಾಂವ್ ಮಂಗ್ಳುರ್ ಆಸ್ತಾನಾ, ಬೆಂದುರ್ ಪಿರ್ಗಜೆಂತ್ ಆಮಿ ಅಸಲಿಂ ಜಾಯ್ತಿ ಕಾರ್‍ಯಕ್ರಮಾಂ ಮಾಂಡುನ್ ಹಾಡ್ಲ್ಯಾಂತ್. ಮಾನೆಸ್ತ್ ಆರ್ಥರ್ ಡಿ’ಸೊಜಾಚಾ ಮಿನೆತೆನ್, ಆಮಿ ಡೊನ್ ಬೊಸ್ಕೊ ಹೊಲಾಂತ್ ಕೊಂಕ್ಣಿ ನಾಟಕ್ ಸ್ಪರ್ದೆ ಆಸಾ ಕೆಲ್ಯಾತ್.

ಸ: ಕೊಂಕ್ಣಿ ಭಾಸ್ ಆಯ್ಲೆವಾರ್ ’ಇ-ಮಾಧ್ಯಾಮ್’ ಮುಖಾಂತ್ರ್ ಫುಲೊನ್ ಯೆಂವ್ಚಿ ಆನಿಂ ಕೊಂಕ್ಣಿ ಪರ್‍ಜೆಕ್ ಹ್ಯಾ ಸಂಗ್ತೆಂತ್ ಆಸ್ಚ್ಯಾ ಅಭಿರುಚಿ ವಿಶ್ಯೆಂತ್ ತುಮ್ಚಿ ಅಭಿಪ್ರಾಯ್ ಕಸಲಿ?

ಜ: ನಿಜಾಯ್ಕ್‌ಯಿ ವರ್ತಿ ದಾಧೊಸ್ಕಾಯೆಚಿ ಸಂಗತ್ ಹಿ. ಹ್ಯಾ ಆಧುನಿಕ್/ಪ್ರಗತೆಚಾ ಕಂಪ್ಯೂಟರ್ ಕಾಳಾರ್ ಕೊಂಕ್ಣಿ ಭಾಶೆನ್ ಸಯ್ತ್ ಹ್ಯಾ ಸಂಗ್ತೆಚೊ ಭರ್‍ಪೂರ್ ಫಾಯ್ದೊ ಜೊಡ್ಲಾ ಆನಿಂ ಲೊಕಾಂಚಾ ವಾಡಾವಾಳೆಂತ್ ಪ್ರಯೋಜನ್ ಜಾತಾ ಮ್ಹಣ್ ಮ್ಹಕಾ ಭೊವ್ ಖುಶಿ ಭೊಗ್ತಾ. ಖಂಡಿತ್ ಜಾವ್ನ್ ಅಂತರ್‌ಜಾಳಾಂ (ವೆಬ್‌ಸಾಯ್ಟ್) ಧ್ವಾರಿಂ ಕೊಂಕ್ಣಿ ಭಾಸ್ ಉಂಚ್ಲ್ಯಾ ಶಿಕಾರಾಕ್ ಪಾವ್ತೆಲಿ ಮಾತ್ರ್ ನ್ಹಯ್ ಸಂಸಾರಾಂತ್ ಶಿಂಪಡ್ಲೆಲ್ಯಾ ಕೊಂಕ್ಣಿ ಪರ್‍ಜೆಕ್ ಏಕ್ ಆಸ್ರೊ ಜಾತೆಲಿ. ಆನಿಂ ಹೆಂ ಮಾಧ್ಯಮ್ ಚಡ್ ಆನಿಂ ಚಡ್ ಕೊಂಕ್ಣಿ ಬಾಸೆಕ್ ಲಾಗು ಕರಿಜಯ್.

ಪುಣ್, ಕೊಂಕ್ಣಿ ಬಾಸೆಂತ್ ಜಾಯಿ ಲಿಪಿ ಆಸ್‌ಲ್ಲೆ ವರ್ವಿಂ ಹೆಂ ಕಿತ್ತುನ್ ಸಾಧ್ಯ್ ಜಾಯ್ತ್ ಮ್ಹಳ್ಳೆಂ ಆಮಿಂ ಚಿಂತಿಜಯ್ ಪಡ್ತಾ. ಭಾರತ್ ದೇಸ್ ಸೊಡ್ನ್, ಉರ್‌ಲ್ಲ್ಯಾ ದೆಸಾಂತ್ ಕಾನಾಡಿ ಆನಿಂ ದೇವ್‌ನಾಗಾರಿ ಲಿಪಿ ಶಿಕ್ಚೆಂ ಸಾಧ್ಯ್ ದಿಸಾನಾ. ತಸಲ್ಯಾ ಸಂದರ್ಭಾರ್, ರೊಮಿ ಲಿಪಿ ವಾಪಾರ್‍ಚಿಚ್ ಸಂಪೆಂ ಜಾವ್ನಾಸಾ.

ಸ: ಕೊಂಕ್ಣಿ ಸಂಸಾರಾಂತ್ ಪತ್ರಿಕೊಧ್ಯಮಾಚೊ ಪಾತ್ರ್ ಕಸಲೊ?

ಜ: ಪತ್ರಿಕೊಧ್ಯಮ್ ಕೊಂಕ್ಣಿ ಭಾಶೆಚಾ ವಾಡಾವಾಳೆಕ್ ಆನಿಕಿ ವದ್ದಾಡುನ್ ಆಸಾ ಮ್ಹಣ್ ಸಾಂಗೊಂಕ್ ಬೆಜಾರ್ ಜಾತಾ. ಕೊಂಕ್ಣಿ ಲೊಕಾಂಚೊ ಖರೊ ಪಾಟಿಂಬೊ ನಾಸ್ತಾನಾ, ಆಜ್ ಪತ್ರಿಕೋಧ್ಯಮ್ ಕೊಂಕ್ಣಿ ಭಾಶೆಂ ಥಂಯ್ ಪಾಟಿಂ ಉರ್‍ಲಾಂ. ಗೊಯಾಂತ್ ಕೊಂಕ್ಣಿ ಭಾಶೆಧ್ವಾರಿಂ ಧರ್ಮಾ ಬಿತರ್ ವಾಂಟೆ ಫಾಂಟೆ ಜಾಲ್ಯಾರ್, ಮಂಗ್ಳುರಾಂತ್ ಗ್ರೆಸ್ತ್ ಆನಿಂ ದುಬ್ಳ್ಯಾಂ ಮಧೆಂ ಫರಕ್ ಸ್ಪಷ್ಟ್ ದಿಸ್ತಾ. ಉಂಚ್ಲ್ಯಾ ವರ್ಗಾಚಾ ಲೊಕಾಂಕ್ ಕೊಂಕ್ಣಿ ಬಾಶೆ ಥಂಯ್ ಕಸಲಿಗಿ ಏಕ್ ಅಲರ್ಜಿ ಯಾ ಉಣೆಪಣ್ ದಿಸೊನ್ ಯೆತಾ. ನಿಜಾಯ್ಕಿ ಹಿ ಏಕ್ ನಾಲಿಸಾಯೆಚಿ ಗಜಾಲ್ ಜಾವಾಸಾ.

ಸ: ಕೊಣಾಯ್ಚಾಯ್ ಬರ್‍ಯಾ ಕಾಮಾಂಕ್ ಉತ್ತೇಜನ್ ದಿಂವ್ಚೆಂ ಜಾಂವ್, ಕೊಣಾಯ್ಚಾಯ್ ಸಂತೊಸ್ ದುಖಾಂತ್ ವಾಂಟೆಲಿ ಜಾಂವ್ಚೆಂ ಜಾಂವ್, ತುಮಿ ಪಯ್ಲೆ ಜಾವ್ನಾಸ್ತಾತ್. ಕಸೊ ವೆಳ್ ಮೆಳ್ತಾ?

ಜ: ಆಳ್ಸ್ಯಾಂಕ್ ಮಾತ್ರ್ ವೇಳ್ ಮೆಳಾನಾ. ಮ್ಹಕಾ ಧಾರಾಳ್ ವೇಳ್ ಮೆಳ್ತಾ. ಜರ್ ತುಕಾ ಖಂಯ್ಚಾಯ್ ಸಂಗ್ತೆಂತ್ ಮ್ಹನ್ ಆಸಾ ತರ್ ತುಕಾ ವೇಳ್ ಅಪಾಪಿಂಚ್ ಮೆಳ್ತಾ. ಮ್ಹಜ್ಯಾ ತರ್ನಾಟ್‌ಪಣಾರ್ ಥಾವ್ನ್ ಹಾಂವ್ ಹೆಂ ಕರ್‍ತೆಚ್ ಆಸಾಂ. ಆಮಿ ಏಕ್ ಹಾಸ್ಕುರೆಂ ಮುಕಾಮಳ್ ದಾಕಯಿಲ್ಲ್ಯಾಂತ್ ಆಮ್ಚೆಂ ಕಿತೆಂಯ್ ಝರೊನ್ ವಚಾನಾ ಯಾ ಅಮ್ಕಾ ಖಂಚ್ಯಾಂತ್‌ಯಿ ಬಾಧಕ್ ನಾ. ತಶೆಂ ಆಸ್ತಾಂ, ಬರೆಂ ಕಾಮ್ ಕರ್‍ತೆಲ್ಯಾಂಕ್, ಜಯ್ತ್ ಜೊಡ್‌ಲ್ಲ್ಯಾಂಕ್ ಶಾಭಾಸ್ಕಿ ಯಾ ಉಲ್ಲಾಸ್ ಪಾಟಯಿಲ್ಲ್ಯಾಂತ್ ತಾಂಚೊ ಆತ್ಮ್ ವಿಶ್ವಾಸ್ ದೊಡ್ತೊ ಜಾತಾ ಆಶೆಂ ಸಮಜೆಂತ್ ಬರೆಂಪಣ್ಂಚ್ ಪ್ರಸಾರ್ ಜಾತಾ. ಹಾಂವ್ ಕೆದ್ನಾಂಯ್ ಗರ್ಜ್ ನಾತ್‌ಲ್ಲ್ಯಾ ಸಂಗ್ತೆಂಕ್ ವೇಳ್ ಪಾಡ್ ಕರಿನಾ. ಮ್ಹಕಾ ಟಿವಿ ಥಂಯ್ ಚಡ್ ವೋಡ್ ನಾ. ಹಾಂವ್ ಬೆಸ್ಟೊಂಚ್ ಬೊಸಾನಾ. ಇಂಗ್ಲಿಶಾಂತ್ಲ್ಯಾ ಸಾಂಗ್ಣೆ ಪ್ರಕಾರ್ "If you want to get things done, give such assignments to the busiest person arround you.".

ಸ: ಪಾಟ್ಲ್ಯಾ ಥೊಡ್ಯಾ ತೆಂಪಾ ಥಾವ್ನ್, ತುಮಿ ಜಾಯ್ತಿಂ ಕವಿತಾ ಲಿಖ್ಲ್ಯಾತ್. ಕಶೆಂ ತುಮ್ಕಾ ಪ್ರೆರಣ್ ಮೆಳ್ತಾ?

ಜ: ಮ್ಹಕಾ ಕವಿತಾ ಲಿಕ್ಚ್ಯಾಂತ್ ಧಾದೊಸ್ಕಾಯ್ ಮೆಳ್ತಾ. ಹಾಂವ್ ತಿಂ ಜಾಯ್ತ್ಯಾ ವೆಬ್‌ಸಾಯ್ಟಾಂಕ್ ಧಾಡ್ತಾಂ. ಭೋವ್ಶಾ ಮ್ಹಜೆಂಚ್ ಏಕ್ ವೆಬ್‌ಸಾಯ್ಟ್ ಆಸ್‌ಲ್ಲೆಂ ತರ್ ಹಾಂವ್ ದಿಸಾಕ್ ಕವಿತಾ ಲಿಕುನ್ ಫಾಯ್ಸ್ ಕರ್‍ತೊಂ ಕೊಣ್ಣಾಂ.

ಸ: ತುಮಿ ಏಕ್ ಧಯ್ರಾಧಿಕ್ ಮುಖೆಲಿ, ಮೊವಾಳ್ ಕಾಳ್ಜಾಚೆ, ಸಮಾಜ್ ಸೇವಕ್, ಉದಾರ್ ಮನಾಚೆ (ಧಾನಿ) ತಶೆಂ ಉತ್ತಮ್ ಲೆಖಕ್/ಬರೈಣಾರ್ ಜಾವ್ನಾಸಾತ್. ಹ್ಯಾ ಸರ್‍ವ್ ದೆಣ್ಯಾಂಪಯ್ಕಿ ತುಮ್ಕಾ ಖಂಯ್ಚೆಂ ಚಡ್ ಮೊಗಾಚೆಂ? ಆನಿಂ ಕಿತ್ಯಾಕ್?

ಜ: ತುಮಿ ಉಚಾರ್‌ಲ್ಲಿಂ ಉತ್ರಾಂ ಮ್ಹಜ್ಯಾ ತಸಲ್ಯಾ ವ್ಯಕ್ತಿಕ್ ಚಡ್ ಮ್ಹಣ್ ಮ್ಹಾಕಾ ಭೊಗ್ತಾ. ಹಾಂವ್ ತುಮಿ ಚಿಂತ್‌ಲ್ಲೆತೆದೊ ವ್ಹಡ್ಲೊ ಮ್ಹನಿಸ್ ನಂಯ್. ಜಾಲ್ಯಾರಿ, ಮ್ಹಕಾ ಮ್ಹಜ್ಯಾ ಲ್ಹಾನಾಂ ಭಾವ್ ಭಯ್ಣಿಂಚ್ಯಾ ಗರ್ಜಾಂತ್ ಪಾಂವ್ಚೆ, ತಾಂಕಾ ಕುಮೊಕ್ ಕರ್‍ಚೆಂ ಚಡ್ ಪಸಂದ್. ಅನಿಂ ಹೆಂ ಹಾಂವ್ ಮ್ಹಜ್ಯಾ ತಾಂಕಿಭಿತರ್ ಸದಾಂಕಾಲ್ ಕರ್‍ತೊಲೊಂಚ್ಚ್.

ಥೊಡ್ಯಾ ತೆಂಪಾ ಆದಿಂ ಆಮಿ ಸಾತ್ ಹಜಾರ್ ಭುರ್‍ಗ್ಯಾಂಕ್ ದೊಳ್ಯಾಂಚಿ ತಪಾಸ್ಣಿ ಕರುನ್ ವಕ್ತಾಂಚಿ ವಿಲೇವಾರಿ ಕೆಲ್ಲಿ. ತವಳ್ ಹ್ಯಾ ಭುರ್ಗ್ಯಾ ಥಂಯ್ ಜಾಲ್ಲೊ ಸಂತೊಸ್ ತೊ ಆಮಿ ವರ್‍ಣುಂಕ್‌ಚ್ ಸಕಾನಾಂವ್. ಆಯ್ಚಿ ಭುರ್ಗಿಂ ಫಾಲ್ಯಾಚಿಂ ಮುಖೆಲಿ ಜಾವ್ನಾಸಾತ್. ಜರ್‌ತರ್ ಹಿಂ ಭುರ್ಗಿಂ ಬರಂವ್ಕ್/ ಶಿಕೊಂಕ್ ಆತಾಂಚ್ ಆಡ್ಚಾಲಿಂ ತರ್, ತಿಂ ಫಾಲ್ಯಾಂಚಿ ಮುಖೆಲಿಂ ಕಶಿಂ ಜಾತೆಲಿಂ? ತಾಂಕಾ ಜಾಯ್ ಪುರ್‍ತೊ ಸಾಂಗಾತ್, ಬರೆಂ ಆದರ್‍ಶ್ ಜೀವನ್, ದೆಕಿಭರಿತ್ ಲಿಸಾವಾಂಧ್ವಾರಿಂ ತಿಂ ಆಮ್ಚ್ಯಾ ಸಮಾಜೆಚಿ ಧಯ್ರಾಧಿಕ್ ಘಟ್‌ಮುಟ್ ಖಾಂಬೆ ಜಾಂವ್ಕ್ ಪಾವ್ತೆಲಿಂ.

ಸ: ಹ್ಯಾ ತುಮ್ಚ್ಯಾ ಜಿವಿತಾಂತ್ ತುಮಿ ಜಾಯ್ತೆಂ ಸಾಧನ್ ಕೆಲಾಂ ತಶೆಂ ಬರೆಂ ನಾಂವ್ ಜೊಡ್ಲಾಂ. ತಶೆಂ ಆಸ್ತಾ, ತುಮ್ಚ್ಯಾ ಜಿವಿತಾಚೊ ಪ್ರಮುಕ್ ಉದ್ದೇಶ್ ಕಿತೆಂ ಅನಿಂ ಮುಕಾರಿಂ ತುಮ್ಚಿ ಯೊಜಾನಾ ಕಸಲಿಂ?

ಜ: ಮ್ಹಜ್ಯಾ ಲ್ಹಾನಾ ಭಾವಾಂ ಭಯ್ಣಿಂಕ್ ಪಾಂವ್ಚೆಂಚ್ ಮ್ಹಜ್ಯಾ ಜಿವಿತಾಚೆಂ ಮಿಸಾಂವ್ ಜಾವ್ನಾಸಾ. ಸಂಸಾರಾಂತ್ ಲೊಕಾಂನಿ ಧರ್ಮ್, ಕುಳಿ, ಜಾತ್, ಕಾತ್, ದುಡು ಬಾಂಗಾರಾಚಿ ಪರ್ವಾ ಕರಿನಾಸ್ತಾಂ ಮ್ಹನ್ಶಾಪಣಾಚೆಂ ಏಕ್ ವಿಸ್ತಾರ್ ಕುಟಾಮ್ ಬಾಂಧುನ್ ಹಾಡ್ಚೆಂಚ್ ಮ್ಹಜೊ ಧ್ಯೇಯ್. ಆಮಿ ಆತಾಂ ಸರ್ವಾಂಚಾ ಗರ್ಜಾಂಕ್ ಪಾವ್ಲ್ಯಾರ್, ಫಾಲ್ಯಾಂ ಏಕ್ ಬರಿ ಸಮಾಜ್ ಬಾಂಧುನ್ ಯೆತೆಲಿ ಆನಿಂ ಥಂಯ್ಸರ್ ಶಾಂತ್ ಸಮಧಾನ್ ರಾಜ್ ಜಾತೆಲೆಂ. ಹಾಂಗಾಸರ್ ಹಾಂವ್ ಏಕ್ ಉತಾರ್ ಸಾಂಗೊಂಕ್ ಆಶೆತಾಂಕೀ, ಸರ್ವಾನಿಂ ನೆಕೆತ್ರಾಂಕ್ ಪಾಂವ್ಚೊ ಉದ್ದೆಶ್ ದವರ್‍ಲ್ಯಾರ್, ಖಂಡಿತ್ ಜಾವ್ನ್ ಆಮಿ ತಾರಾಂ/ನೆಕೆತ್ರಾಂ ತಿತ್ತುನ್ ಪಾವಾನಾಂವ್ ತರಿ, ಧೊಣು (Rainbow) ತಿತ್ತುನ್ ತರ್‌ಯೀ ಪಾವ್ತೆಲ್ಯಾಂವ್ ಆನಿಂ ತಾಂತ್ಲೊ ಸೊಭಿತ್ತ್ ಸುಂದರ್ ವರ್‍ಣುಂಕ್ ಫಾವೊ ಜಾಯ್ನಾಸ್ಚೊ ರಂಗಾಳ್ ಸಂಸಾರ್ ದಿಸ್ತಾಲೊ. ಹಿ ಮ್ಹಜಿ ಆಖಂಡ್ ಪಾತ್ಯೆಣಿ.

ಸ: ಆಜ್ ತುಮ್ಚ್ಯಾ ಜಿವಿತಾಚಾ ಹ್ಯಾ ಪಾಂವ್ಡ್ಯಾಕ್ ಪಾವಾಜಯ್ ತರ್ ತುಮಿ ಜಾಯ್ತಿ ಮಿನತ್ ಕೆಲ್ಯಾ. ತಶೆಂ ಆಸ್ತಾಂ ಯುವಜಣಾಂಕ್ ತುಮ್ಚೊ ಸಂದೇಶ್ ಕಸಲೊ?

ಜ: ಕೆದ್ನಾಂಚ್ ಖಂಚಿಯ್ ಸಂಗತ್ ಸುಲಾಭಾಯೆನ್ ಸೊಡ್ನ್ ದೀನಾಕಾತ್. ತುಮ್ಚಿ ಜಾಣ್ವಾಯ್ ಹರ್‍ಯೆಕಾ ರಿತಿನ್ ವೃದ್ದಿ ಕರುಂಕ್ ಪ್ರಯತ್ನ್ ಕರಾ. ಖಂಚಿಯ್ ಜಾಣ್ವಾಯ್ ಜೊಡುಂಕ್ ಯಾ ಶಿಕೊಂಕ್ ಅಂತ್ ಮಳ್ಳೆಂ ನಾ. ’ಹಾಂವ್ ಸರ್‍ವ್ ಜಾಣಾ’ ಮ್ಹಳ್ಳೆಂ ಚಿತಾಪ್ ತುಮ್ಚ್ಯಾ ಮತಿಕ್ ಕೆದ್ನಾಂಯ್ ಯೆನಾ ಜಾಂವ್. ತಸಲಿ ವಿಶಯ್ ಹ್ಯಾ ಸಂಸರಾಂತ್‌ಚ್ ನಾ. ಜಾಯ್ತಿ ಜಾಣ್ವಾಯ್ ಜೊಡ್ಲ್ಯಾರೀ ಪರತ್ ಪರತ್ ಜಾಣಾಂ ಜಾಂವ್ಕ್, ಶಿಕೊಂಕ್ ತುಮಿ ತುಮ್ಕಾಂಚ್ ಅಸ್ಪದ್ ಕರ್‍ನ್ ದಿಯಾ. ಸ್ವಾರ್‍ತ್ ಸಾಂಡುನ್, ಹೆರಾಂಚಾ ಗರ್‍ಜಾಂತ್ ಪಾವಾ ಆನಿಂ ಹೆಂ ಆಮ್ಚೆಂ ಕರ್ತವ್ಯ್ ಜಾವ್ನಾಸಾ.

ಏಕಾಮೆಕಾ ವಾಂಟುನ್ ಘೆತ್‌ಲ್ಲ್ಯಾಂತ್ ದೇವ್ ಆಮ್ಕಾಂ ಧಾ ವಾಂಟ್ಯಾನ್ ಪಾಟಿಂ ದಿತಾಂ ಮ್ಹಳ್ಳೆಂ ಉಡಾಸ್ ದವರಾ. ಕಸಲಿಯ್ ವಾಯ್ಟ್ ಸವಯೆ/ಸಂಗ್ತೆ ಥಾವ್ನ್ ಪಯ್ಸ್ ರಾವೊಂಕ್ ಸದಾಂಚ್ ಪ್ರಯತ್ನ್ ಕರಾ. ಪಿಯೊವ್ಣೆಂ, ಧುಮ್ರ್‌ಪಾನಾಂತ್ ಕಸಲೊಚ್ ಸಂತೊಸ್ ಮೆಳಾನಾ. ಹಾಂವ್ ಮ್ಹಜ್ಯಾ ಜಿವಿತಾಂತ್ ವಾಯ್ನ್ ಆನಿ ಬಿಯರ್ ಸೊಡ್ನ್ ಕಿತೆಂಚ್ ಅಮಾಲ್ ಹಾಂವ್ ಸೆವಿನಾ. ಬಿಡಿ ಸಿಗ್ರೆಟ್ ಹಾಂವ್ ವೊಡಿನಾ. ಲೆಕಾವರ್‍ತಿಂ ಪಿಂತುರಾ (ಫಿಲ್ಮಾಂ) ಪಳೆಂವ್ಕ್ ನಾಂತ್. ಹಾಂತುಂ ಕಸಲೊಚ್ ಫಾಯ್ದೊ ಮೆಳಾನಾ. ಜಾಯ್ತೊ ವೇಳ್ ಆಸೊಚ್ ಪಾಡ್ ಜಾತಾ. (ಹಾಂವೆ ಪಾಟ್ಲ್ಯಾ ಪನ್ನಾಸ್ ಆನಿಂ ಪಾಂಚ್ ವರ್‍ಸಾಂತ್ ಚಾರ್ ಯಾ ಪಾಂಚ್ ಫಿಲ್ಮಾಚ್ಯಾಕಿ ಚಡ್ ಪಳೆಂವ್ಕ್ ನಾಂತ್) ಹೆಂ ಸಗ್ಳೆಂ ಕರುಂಕ್ ತುಮ್ಕಾಂಯ್ ಸಾಧ್ಯ್ ಆಸಾ. ಫಕತ್ತ್ ತುಮಿ ತುಮ್ಚ್ಯಾ ಜಾಣ್ವಾಯೆಚೊ ರಿಮೋಟ್ ಕಂಟ್ರೊಲ್ ಸಾರ್‍ಕ್ಯಾ ರಿತಿನ್ ಗಳ್ಸಿಲ್ಯಾರ್ ಜಾಲೆಂ. ಬರಿ ಜಿಣಿ ಜಿಯೆಯಾ ಅಶೆಂ ಸದಾಂಚ್ ಸಂತೊಸಾನ್ ರಾವಾ.

ಸ: ಕೊಂಕ್ಣಿ ಸಮುಧಾಯೆಚಿ ಅಂತರ್‌ಜಾಳಾಂ (ವೆಬ್‌ಸಾಯ್ಟ್) ಲೊಕಾಂಚಾ ಬರ್‍ಯಾಪಣಾ ಥಂಯ್ ಕಾಮ್ ಕರುಂಕ್ ತುಮ್ಚಿ ಕಸಲಿಯ್ ಸುಚನಾ ಯಾ ಅಭಿಪ್ರಾಯ್?

ಜ: ಪಯ್ಲ್ಯಾ ಸುವಾತೆರ್ ಹ್ಯಾ ಸರ್‍ವ್ ಕೊಂಕ್ಣಿ ವೆಬ್‌ಸಾಯ್ಟಾಂಕ್ ಶಾಭಾಸ್ಕಿ ಆನಿ ಜಯ್ತ್ ಮಾಗ್ತಾಂ. ತುಮಿ ಕಾಡ್ಚಿ ತಿಂ ಮೆಟಾಂ ನಿಜಾಯ್ಕ್‌ಯಿ ಕೊಂಕ್ಣೆಕ್ ಗ್ರೇಸ್ತ್ ಕರ್ತಾ. ಪುಣ್ ತುಮ್ಚೆಮಧೆಂ ಬರ್‍ಯಾ ಮತ್ಲಾಬಾಚೊ ಸ್ಪರ್ಧೊ ಆಸೊಂದಿ. ಏಕಾಮೆಕಾಕ್ ಆಡ್‌ಪಾಂಯ್ ಯಾ ಪಾಂಯ್ ವೊಡ್ಚಿಂ ತಸಲೆಂ ಪಂತಾಟ್ ಆಸ್ಚೆಂ ನಾಕಾ. ಆಮಿ ಏಕಾಮೆಕಾ ಥಂಯ್ ಸಾಂಗಾತ್ ದಿವ್ಯಾಂ. ಏಕ್ ವೆಬ್‌ಸಾಯ್ಟ್ ಊಂಚ್ ಪಾವಾತ್ ತರ್ ಉರ್‌ಲ್ಲ್ಯಾನಿಂ ಭಿಯೆಂವ್ಚಿ ಗರ್ಜ್ ನಾ.

ಆಮ್ಚಿ ಕೊಂಕ್ಣಿ ಸಮಾಜ್ ಏಕ್ ವಿಸ್ತಾರ್ ಕುಟಾಮ್ ಜಾಂವ್ದಿ. ಆಮ್ಚಿ ಮ್ಹನಾಂ ವಿಸ್ತಾರ್ ಚಿಂತ್ಪಾಚಿಂ ಜಾಂವ್ದಿ. ಏಕಾಮೆಕಾ ಕುಮ್ಕೆಚೊ ಹಾತ್ ಸದಾಂಚ್ ದಿವ್ಯಾಂ. ಅಮಿ ಮಾಟ್ಯಾಂತ್ ಆಸ್‌ಲ್ಲ್ಯಾ ಕುರ್‍ಲ್ಯಾಂಚೊ ಸಂಸಾರ್ ಸೊಡುನ್ ಕೊಂಕ್ಣೆಚ್ಯಾ ಅಭಿವೃದ್ದೆಕ್ ವ್ಹಡ್ ಮೇಟ್ ಕಾಡ್ಯಾಂ. ಸಮೇಸ್ತಾಂಕ್ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ದೆಂವೊಂದಿ ಮ್ಹಣ್ ಮ್ಹಜೆಂ ಖಾಲ್ತೆಂ ಮಾಗ್ಣೆಂ ಜಾವ್ನಾಸಾ.

ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications