ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸಂಗೀತ್ ಸಾಮ್ರಾಟ್ ಹೆನ್ರಿ ಡಿ’ಸೊಜಾ ಕೆನಡಾಂತ್ ಧಾಕ್ಲೊ ರಚ್ತಾ
ಕೊಂಕ್ಣಿ ಸಂಗೀತ್ಶೆತಾಂತ್ ಫಾಮಾದ್ ಕೊಂಕ್ಣಿ ಪದಾಂ ರಚ್ಪಿ/ಗಾವ್ಪಿ ’ಯೆ ಯೆ ಕಾತ್ರಿನಾ....’ ಸಾಂಗಾತಾಚ್ಚ್ ’ಆಮಿಂ ದೊಗಿ ಸೆಜಾರಾ...’ ಪದಾಂಧ್ವಾರಿಂ ಸಂಗೀತ್ ದರ್ಯಾಂತ್ಲಿಂ ಉಂಚ್ಲಿಂ ಲ್ಹಾರಾಂ ಸಂಗೀತ್ ಪ್ರೇಮಿಂಚ್ಯಾ ಕಾಳ್ಜಾಂಚ್ಯಾ ತಡಿಕ್ ಆಪ್ಟಾವ್ನ್ ಅಖ್ಖ್ಯಾ ಸಂಸಾರಾಂತ್ ಫಾಮಾದ್ ಜಾಲ್ಲೊ, ಕೊಂಕ್ಣಿ ಸಂಗೀತಾಚೆಂ ಪರ್ಜಳಿಕ್ ನಕ್ತಿರ್, ’ಸಂಗೀತ್ ಸಾಮ್ರಾಟ್’ ತಶೆಂ ’ಕಲಾರತ್ನ’ ನಾಮಾಂಕಿತ್ ಹೆನ್ರಿ ಡಿ’ಸೊಜಾ ಚರಿತ್ರೆಂತ್ ಪಯಿಲ್ಲೆ ಪಾವ್ಟಿಂ ಮಾಯ್ಗಾಂವಾಂ ಥಾವ್ನ್ 7,500 ಮೈಲಾಂ ಪಯ್ಸಿಲ್ಯಾ ತೆನ್ಕಾ ಅಮೇರಿಕಾಂತ್ಲ್ಯಾ ಕೆನಡಾಕ್ ಪಾವೊನ್ ಥೈಂಚಾ ಕೊಂಕ್ಣಿ ಕಲಾ-ರಸಿಕಾಂಕ್ ಆಪ್ಲ್ಯಾ ಹಾಸ್ತ್ಯಾ-ಉಡ್ತ್ಯಾ ಪದಾನಿಂ ಪೋಟ್-ಭರ್ ಮಜೆದಾರ್ ಪಕ್ವಾನ್ ವಾಂಟುಂಕ್ ಸಕ್ಲೊ.
’ಕೆನರಾ ವರ್ಲ್ಡ್ ಫೌಂಡೇಶನ್’ ಸಂಸ್ಥ್ಯಾನ್ ಕೆನಡಾಂತ್ಲ್ಯಾ ಮಿಸ್ಸಿಸ್ಸಾಗಾ ಶ್ಹೆರಾಂತ್ ವರ್ಸಾವಾರ್ ಸಾದರ್ ಕರ್ಚ್ಯಾ ’ಕೆನರಾ ಕಲಾ ಸಾಂಜ್’ ಕಾರ್ಯವಳಿಂತ್ ಆಪ್ಲಿ ’ಹೆನ್ರಿ ನಾಯ್ಟ್’ ಸಂಗೀತ್ ಸಾಂಜ್ ಸಾದರ್ ಕರುಂಕ್ ಮಾಯ್ಗಾಂವಾ ಥಾವ್ನ್ ಆಯಿಲ್ಲೊ ಹೆನ್ರಿ ಡಿಸೊಜಾ ಕೆನಡಾಂತ್ ಪ್ರಪ್ರಥಮ್ ಜಾವ್ನ್ ’ವಿಲ್ಫಿ ನಾಯ್ಟ್’ ಸಾದರ್ ಕೆಲ್ಲೊ ಕೊಂಕ್ಣಿ ಸಂಗೀತ್ ರಾಯ್ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್, ದುಸ್ರ್ಯಾನ್ ಕೊಂಕಣ್ ಕಲಾಶ್ರೀ ಕ್ಲೋಡ್ ಡಿಸೊಜಾ ಉಪ್ರಾಂತ್ಲೊ ಕೊಂಕ್ಣಿ ಸಂಗೀತ್ ಕಲಾಕಾರ್ ಜಾವುನ್ ಧಾಕ್ಲೊ ರಚುಂಕ್ ಪಾವ್ಲೊ.
ಹೆಂ ಚಾರಿತ್ರಿಕ್ ಕಾರ್ಯೆಂ ಕೆನಡಾಂತ್ಲ್ಯಾ ಮಿಸ್ಸಿಸ್ಸಾಗಾ ಶ್ಹೆರಾಂತ್ ನಾಮ್ಣೆಚೆಂ ಸಾಲ್ ’ಲಿವಿಂಗ್ ಆರ್ಟ್ ಸೆಂಟರ್’ ಹಾಂತು ಸಾದರ್ ಜಾಲೆಂ. ಕೆನಡಾಂತ್ಲೊ ಫಾಮಾದ್ ವ್ಹೆಪಾರಿ ಸಂಸ್ಥೊ ’ಮ್ಯಾಕ್ಸ್ ಮೆಂಡಿಸ್ ಗ್ರೂಪ್’ ಹ್ಯಾ ಕಾರ್ಯಾಚೊ ಪ್ರಮುಖ್ ಪೋಶಕ್. ಹ್ಯಾಚ್ ಸಂಸ್ಥ್ಯಾಚ್ಯಾ ಗುರ್ಕಾರ್ಪಣಾಖಾಲ್ 2005 ಇಸ್ವೆಂತ್ ಸಾದರ್ ಜಾಲ್ಲಿ ’ವಿಲ್ಫಿ ನಾಯ್ಟ್’ ಆನಿ 2008 ವರ್ಸಾಂತ್ ಫಾಮಾದ್ ಕೊಂಕ್ಣಿ ಕಲಾಕಾರ್ ’ಕ್ಲೋಡ್ ಡಿ’ಸೊಜಾ’ ಹಾಣೆಂ ಸಾದರ್ ಕೆಲ್ಲಿ ಕೊಂಕ್ಣಿ ಪದಾಂ ಸಾಂಜ್ ತೆನ್ಕಾ ಅಮೇರಿಕಾಚ್ಯಾ ಚರಿತ್ರೆಂತ್ ಅಮರ್ ಉರ್ಚ್ಯಾ ತಸಲಿಂ ಕೊಂಕ್ಣಿ ಕಾರ್ಯಿಂ. ಸಂಗೀತ್ ಪ್ರೇಮಿನಿಂ ಸಬಾರ್ ತೇಂಪ್ ಥಾವ್ನ್ ಆತುರಾಯೆನ್ ರಾಕೊನ್ ಆಸ್ಲೆಲಿ ಹಿ ಸಂಗೀತ್ ಕಾರ್ಯವಳ್ ಎಪ್ರಿಲ್ 19 ವೆರ್ ದನ್ಪರಾಂ 2.00 ವರಾರ್ ಭಾರತಾಚ್ಯಾ ತಸೆಂಚ್ ಕೆನಡಾಚ್ಯಾ ರಾಷ್ಟ್ರ್ ಗಿತಾಂ ಸವೆಂ ಸುರ್ವಾತ್ಲಿ. ಕೆನಡಾಂತ್ಲೊ ಫಾಮಾದ್ ಕೊಂಕ್ಣಿ ಕಾರ್ಬಾರಿ, ಕಲಾಸಾಂಜ್ ಸಮಿತಿಚೊ ಕಾರ್ಯಾಳ್ ಸಾಂದೊ ತಸೆಂಚ್ ಪೋಶಕ್ ಮಾನೇಸ್ತ್ ಫ್ಲೇವಿಯನ್ ಪಿಂಟೊ ಹಾಣೆಂ ಸಭಿಕಾಂಕ್ ಮಾನಾಚೊ ಯೆವ್ಕಾರ್ ಮಾಗೊನ್ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿ’ಸೊಜಾಚಿ ವಳ್ಕೆಚಿ ಝಳಕ್ ಕರುನ್ ದಿಲಿ.
ಆಪ್ಲ್ಯಾ ಕೆನಡಾಂತ್ಲ್ಯಾ ಪ್ರಪ್ರಥಮ್ ಭೆಟೆಕ್ ಅರ್ಪುನ್ ನವ್ಯಾನ್ ಘಡ್ಲ್ಲೆಂ "ಜೈ ಕೆನಡಾ" ಪದಾ ಸವೆಂ ಹೆನ್ರಿ ಡಿಸೊಜಾನ್ ಆಪ್ಲಿ ಪದಾಂ ಸಾಂಜ್ ಸುರ್ವಾತ್ಲಿ. ತಾಣೆಂ ಗಾಯ್ಲೆಲಿಂ ’ಯೆ ಯೆ ಕಾತ್ರಿನಾ’, ’ಆಮಿ ದೊಗಿ ಸೆಜಾರಾ’, ’ಕಾಳ್ಜಾಚೊ ಗೊಂಡೊ’, ’ಸಿಲ್ವಿಯಾ’ ತಸಲ್ಯಾ ಹಾಸ್ತ್ಯಾ ಉಡ್ತ್ಯಾ ಪದಾನಿಂ ಸಾಲ್ಭರ್ ಹಾಜರ್ ಆಸ್ಲ್ಲ್ಯಾ ಲೊಕಾಕ್ ಸಂಗೀತ್ ಆಕಾಸಾರ್ ಧಲಯ್ಲೆಂ. ಹೆನ್ರಿ ಡಿಸೊಜಾ ಸವೆಂ ಕೆನಡಾಂತ್ಲೆ ಫಾಮಾದ್ ಗಾವ್ಪಿ-ಗಾವ್ಪಿಣ್ಯೊ ವಿಲ್ಸನ್ ಡಿಸೊಜಾ, ಒಸ್ಕರ್ ನಜ್ರೆತ್, ಅನಿಟಾ ಪ್ರಭು, ಶಿಲಾ ಕ್ಯಾಸ್ತೆಲಿನೊ, ಲಾರಾ ರೆಬೆಲ್ಲೊ, ಲುವಿಜಾ ಪಾಯ್ಸ್ ಆನಿ ಜೆರಿ ಡಿ’ಮೆಲ್ಲೊ ಹಾಣಿಂ ಸಾಂಗಾತ್ ದಿಲೊ. ಕೆನಡಾಂತ್ಲೊ ಎ.ಆರ್.ರೆಹಮಾನ್ ಮ್ಹಣೊನ್ ನಾಂವಾಡ್ಲಲೊ ತಾಲೆಂತ್ವಂತ್ ಸಂಗೀತ್ಗಾರ್ ಜೊಯ್ಸನ್ ಡಿಸೊಜಾ ಹಾಚ್ಯಾ ಅದ್ಬುತ್ ಸಂಗೀತ್ ದಿಗ್ದರ್ಶನಾನ್ ತಸೆಂಚ್ ಕೆನಾಡಾಂತ್ಲೆ ಫಾಮಾದ್ ಕ್ಯಾಶುವಲ್ ಎನ್ಕೌಂಟರ್ಸ್ ಹಾಂಚ್ಯಾ ಮಧುರ್ ಸಂಗೀತಾನ್ ಕಾರ್ಯಾಚಿ ಸೊಭಾಯ್ ದೊಡ್ತಿ ಜಾಲಿ.
ಸಾಲ್ಭರ್ ಆಸ್ಲ್ಲ್ಯಾ ಕೆನಡಾಂತ್ಲ್ಯಾ ಕಲಾರಸಿಕಾನಿಂ ಹೆನ್ರಿಚ್ಯಾ ಊಂಚ್ಲ್ಯಾ ಪದಾಂ ಮದ್ಗಾತ್ ಕೆನಡಾಂತ್ಲ್ಯಾ ಲ್ಹಾನ್-ವ್ಹಡ್, ಉದೆತ್ಯಾ ತಸೆಂಚ್ ಫಾಮಾದ್ ಕಲಾಕಾರಾನಿಂ ಸಾದರ್ ಕೆಲ್ಲ್ಯಾ ಸಂಗೀತ್ ನಾಚ್ ಆನಿಂ ಫೊಕಣಾಂಚಿ ರೂಚ್ ಚಾಕ್ಲಿ. ’ಕೆನಡಾಂತ್ಲೊ ಡೊಲ್ಲಾ’ ಖ್ಯಾತೆಚ್ಯಾ ಫ್ಲೇವಿಯನ್ ಪಿಂಟೊಚ್ಯಾ ಮುಕೇಲ್ಪಣಾಖಾಲ್ ಸಾದರ್ ಜಾಲ್ಲ್ಯಾ ಫೊಕಾಣಾನಿಂ ಸಭಿಕಾಂಕ್ ಪೋಟ್ಭರ್ ಹಾಸಯ್ಲೆಂ. ಹ್ಯಾ ಫೊಕಾಣಾನಿಂ ಬಾಪ್ ಹೆನ್ರಿ ಆಳ್ವಾ, ಆಸ್ಟಿನ್ ಪ್ರಭು, ಮ್ಯಾಕ್ಸ್ ಮೆಂಡಿಸ್, ವಿಜಯ್ ದಾಂತಿ, ವಿಲ್ಸನ್ ಡಿಸೊಜಾ, ಪೀಟರ್ ಡಿಸೊಜಾ ಆನಿಂ ಪ್ರೆಸಿಲ್ಲಾ ಡಿಕುನ್ಹಾ ಹಾಣಿಂ ಪಾತ್ರ್ ಘೆತ್ಲ್ಲೊ. ಕಲಾಸಾಂಜ್ ಕಾರ್ಯವಳಿಂತ್ ಪಯ್ಲ್ಯಾ ಪಾವ್ಟಿಂ ವಾಂಟೊ ಘೆತ್ಲ್ಲ್ಯಾ ಫಾಮಾದ್ ಗೊಂಯ್ಕಾರ್ ಕಲಾಕಾರ್ ಜೂನಿಯರ್ ಮಿನೇಜಸ್ ಆನಿ ಸಾಂಗಾತ್ಯಾನಿ ಸಾದರ್ ಕೆಲ್ಲ್ಯಾ ನಾಟ್ಕುಳ್ಯಾನ್ ಹಾಸ್ಯಾಂಚೊ ಬೊಂಬ್ ವೆದಿರ್ ಫುಟಯ್ಲೊ. ಸಂಗೀತ್ ನಾಚಾನಿಂ ವಾಂಟೊ ಘೆತ್ಲ್ಲ್ಯಾ ವಿನಿಶಾ - ಕ್ಲೆರಿಸ್ಸಾ ಡಿಸೊಜಾ, ಶೈನಾ ಮೆಂಡಿಸ್, ಸಮಾಂತಾ - ಸವಾನ್ನಾ ಗೋವಿಯಸ್, ಒಲಿವರ್ ಮತಾಯಸ್, ಸಿಡ್ - ಮೆಳ್ಡನ್ ಪಿರೇರಾ, ಕ್ರಿಸ್ಟಲ್ ಲೊಬೊ ಆನಿ ಝಿನಿಯಾ ಮತಾಯಸ್ ಹಾಣಿಂ ಆಪ್ಲ್ಯಾ ಉಂಚ್ಲ್ಯಾ ನಾಚಾನಿಂ ಲೊಕಾಕ್ ಉತ್ತೀಮ್ ಮನೋರಂಜನ್ ದಿಲೆಂ. ಹ್ಯಾಚ್ ಭಾಗಿ ಸಂದರ್ಬಾರ್ ಆಪ್ಲ್ಯಾ ಕಾಜಾರಿ ಜಿವಿತಾಚೊ ಭಾಂಗ್ರಾಳೊ ಉತ್ಸವ್ ಆಚರುಂಚಾ ಲಿಗೊರಿ ಆನಿ ಎಲಿಜಾ ಡಿಸೊಜಾ ಹಾಂಕಾ ಉಲ್ಲಾಸಿಲೆಂ. ಬಾಪ್ ಹೆನ್ರಿ ಆಳ್ವಾಚ್ಯಾ ಆಶೀರ್ವಾದಾಂ ಸವೆಂ ಕಾರ್ಭಾರ್ಯಾನಿಂ ಭಾಂಗ್ರಾಳ್ಯಾ ಜೊಡ್ಯಾಕ್ ಯದಿಸ್ಥಿಕಾ ಅರ್ಪಿಲಿ.
ಮಾಂಯ್ಗಾಂವಾ ಥಾವ್ನ್ ಕೆನಾಡಾ ಪಾವೊನ್ ಉತ್ತೀಮ್ ಸೆವಾ ಅರ್ಪುನ್ ಅಮರ್ ಜಾಲ್ಲ್ಯಾ ಹೆನ್ರಿ - ರೋಜ್ ಕಾಸ್ತೆಲಿನ್, ಹರ್ಬರ್ಟ್ ಲೊಬೊ ಆನಿ ದೊತೊರ್ ಶೀಲಾ ಬಸ್ರುರ್ ಹಾಂಚೊ ಉಡಾಸ್ ಕಾಡುನ್ ತಾಂಚ್ಯಾ ಕುಟ್ಮಾಂಕ್ ಮರಣೋತ್ತರ್ ಕಾಣಿಕ್ ಕಾರ್ಯಕಾರಿ ಸಮಿತಿಚೆ ಸಾಂದೆ ಜಾವ್ನಾಸ್ಚ್ಯಾ ಐರಿನ್ ಮತಾಯಸ್, ನ್ಯಾನ್ಸಿ ಮೆಂಡಿಸ್ ಆನಿ ವಿಜಯ್ ದಾಂತಿ ಹಾಣಿಂ ಅರ್ಪಿಲಿ. ಹೆಂ ವೆದಿ ಕಾರ್ಯೆಂ ಮಿರಿಯಮ್ ಪಿಂಟೊ ಹಿಣೆಂ ಚಲಯ್ಲೆಂ.
ಕಾರ್ಯಾಕ್ ಹಾಜರ್ ಜಾಲ್ಲ್ಯಾ ಮುಕೇಲ್ ಸಯ್ರ್ಯಾಂಕ್ ಸನ್ಮಾನ್ ಕರ್ಚೆಂ ವೆದಿ ಕಾರ್ಯೆಂ ಮಾನೆಸ್ತಿಣ್ ನ್ಯಾನ್ಸಿ ಮೆಂಡಿಸಾನ್ ಚಲವ್ನ್ ವ್ಹೆಲೆಂ. ಕಾರ್ಯಾಕ್ ’ಮಿನಿಸ್ಟರ್ ಆಫ್ ಸಿಟಿಜನ್ಶಿಪ್, ಇಮಿಗ್ರೇಶನ್ ಎಂಡ್ ಮಲ್ಟಿಕಲ್ಚರಿಸಮ್’ ಹಾಚೊ ಪ್ರತಿನಿಧಿ ಜಾವ್ನ್ ಆಯ್ಲೆಲ್ಯಾ ಟೆಡ್ ಒಪಿಟ್ಸ್ ಆನಿ ಮೆಲಿಸ್ಸಾ ಭಗತ್ ಹಾಂಕಾ ಫುಲಾಂಚೊ ತುರೊ ಆರ್ಪುನ್ ಮಾನ್ ದಿಲೊ. ಟೆಡ್ ಒಪಿಟ್ಸ್ ಹಾಣೆಂ ಆಪ್ಲ್ಯಾ ಉಲವ್ಪಾಂತ್ ಮಂತ್ರಿಚೊ ಸಂದೇಶ್ ವಾಚುನ್ ಕೆನರಾ ವರ್ದ್ ಫೌಂಡೇಶನ್ ಹಾಚೊ ಅಧ್ಯಕ್ಷ್ ಮ್ಯಾಕ್ಸ್ ಮೆಂಡಿಸಾಕ್ ಉಲ್ಲಾಸಿಲೆಂ.
ಕೆನರಾ ವರ್ಲ್ಡ್ ಫೌಂಡೇಶನ್ ತರ್ಫೆನ್ ಅದ್ಯಕ್ಶ್ ಮ್ಯಾಕ್ಸ್ ಮೆಂಡಿಸ್ ಹಾಣೆಂ ಊಂಚ್ಲೊ ಕೊಂಕ್ಣಿ ಸಂಗೀತ್ ಕಲಾಕಾರ್ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿಸೊಜಾ ಹಾಕಾ ಯದಿಸ್ಥಿಕಾ ಅರ್ಪುನ್ "ಕೊಂಕ್ಣಿ ಕಲಾ ಸಂಕೇತ್" ಮ್ಹಳ್ಳೆಂ ಬಿರುದ್ ದೀವ್ನ್ ಮಾನ್ ಕೆಲೊ. ಹೆನ್ರಿ ಡಿಸೊಜಾನ್ ಆಪ್ಲ್ಯಾ ಉಲವ್ಪಾಂತ್ ಹೆಂ ಆಪ್ಲ್ಯಾ ಸಂಗೀತ್ ಜಿವಿತಾಂತ್ಲೆ ಏಕ್ ಮಹತ್ತರ್ ಘಡಿತ್ ಮ್ಹಣೊನ್ ಆಪ್ಲೊ ಸಂತೊಸ್ ವೆಕ್ತ್ ಕೆಲೊ. ಕೆನಡಾಂತ್ ಆಪ್ಲಿ ಸಂಗೀತ್ ಸಾಂಜ್ ಸಾದರ್ ಕರುಂಕ್ ಆವ್ಕಾಸ್ ಲಾಬಯಿಲ್ಲ್ಯಾ ಕೆನರಾ ವರ್ಲ್ದ್ ಫೌಂಡೇಶನ್ ಅಧ್ಯಕ್ಸ್ ಮ್ಯಾಕ್ಸ್ ಮೆಂಡಿಸ್ ಆನಿ ತಾಚ್ಯಾ ಸಾಂಗಾಂಚ್ಯಾಂಚೊ ತಸೆಂಚ್ ಆಪ್ಣಾ ಸವೆಂ ತಾಳೊ-ಸಂಗೀತ್ ದಿಲ್ಲ್ಯಾ ಕಲಾಕರಾಂಚೊ ತಾಣಿಂ ಉಪ್ಕಾರ್ ಆಟಯ್ಲೊ.
ಕೆನರಾ ವರ್ಲ್ದ್ ಫೌಂಡೇಶನ್ ಹಾಣಿಂ ನವ್ಯಾ ಸುರ್ವಾತಿಲ್ಲ್ಯಾ ’ಎಕ್ಸಲ್ಲೆನ್ಸ್ ಇನ್ ಎಜುಕೇಶನ್ ಎವಾರ್ಡ್’ ಪ್ರಶಸ್ತಿ ಆಪ್ಣಾಯ್ಲೆಲ್ಯಾ ಮರ್ವಿನ್ ರೊಸಾರಿಯೊ ಆನಿ ವಿನಿಶಾ ಡಿಸೊಜಾ ಹಾಂಕಾ ಸನ್ಮಾನ್ ಕೆಲೊ. ಹೆಂ ವೆದಿ ಕಾರ್ಯೆಂ ಪೌಲ್ ಮತಾಯಸ್ ಹಾಣೆಂ ಚಲವ್ನ್ ವ್ಹೆಲೆಂ.
ಕಾರ್ಯಾಚ್ಯಾ ಅಕ್ರೇಕ್ ಕೆನರಾ ವರ್ಲ್ದ್ ಫೌಂಡೇಶನ್ ಅಧ್ಯಕ್ಶ್ ಮಾನೇಸ್ತ್ ಮ್ಯಾಕ್ಸ್ ಮೆಂಡಿಸಾನ್ ಕಾರ್ಯೆಂ ಯಶ್ ಕರುಂಕ್ ವಾವುರ್ಲೆಲ್ಯಾ ಸರ್ವಾಂಚೊ ಅಭಾರ್ ಮಾಂದ್ಲೊ. ಅಖ್ಖೆಂ ಸಂಗೀತ್ ಕಾರ್ಯೆಂ ಮಾನೇಸ್ತ್ ಡೊನಾಲ್ದ್ ಆಳ್ವಾ ಹಾಣೆಂ ಆಪ್ಲ್ಯಾ ಕುರ್ಕುರಿತ್ ಉತ್ರಾನಿಂ ಚಲವ್ನ್ ವ್ಹೆಲೆಂ. ನಿಮಾಣೆಂ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿಸೊಜಾನ್ ಜೆರಿ ಡಿಮೆಲ್ಲೊ ಸವೆಂ ಗಾಯ್ಲೆಲೆಂ ’ಆಮಿ ದೊಗಿ ಸೆಜಾರಾ’ ಪದ್ ಸರ್ವಾಂಚಿ ಮನಾಂ ಸಂತೊಸಾಂವ್ಕ್ ಪಾವ್ಲೆಂ.
ಖರೆಂಚ್ ಕೆನರಾ ವರ್ಲ್ದ್ ಫೌಂಡೇಶನ್ ಹಾಣಿಂ ಕೆನಡಾಂತ್ ಮಾಂಡುನ್ ಹಾಡ್ಲೆಲೆಂ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿಸೊಜಾಚೆಂ ಸಂಗೀತ್ ಕಾರ್ಯೆಂ ಚರಿತ್ರೆಂತ್ ಯಾದ್ಗಾರ್ ಜಾವ್ನ್ ಉರ್ತೆಲೆಂ ತೆಂ ಖಂಡಿತ್.
- ಭಾತ್ಮಿ: ಕೊಂಕ್ಣಿ ಸಾಂಗಾತಿ, ಕೆನಡಾ
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
