"ಸರ್ಗಾಚಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಸರ್ಗಾಚಿ ವಾಟ್ ಹೆರಾಂಕ್ ಕುಮೊಕ್ ಕರ್ಚಿ ಶಿವಾಯ್ ಹೆರಾಂಕ್ ಅಡ್ಕಳ್ ಹಾಡ್ಚಿ ನ್ಹಯ್"

ನವ್ಯಾ ವರ್ಸಾಚೆಂ ನವೆಂ ಚಿಂತಾಪ್

ವರಸ್ : 2006

ಅಂಕೊ : 19

ಮಯ್ನೊ : ಜನೆರ್

ಸಂಪಾದಕೀಯ್ - 19.

ವಲ್ಲಿ ಕ್ವಾಡ್ರಸ್

ಚಿಂತಾಪ್ ಮನ್ಶಾಕ್ ನವಿಂ ಸತಾಂ ಧಾಖವ್ನ್ ದಿತಾ, ಚಿಂತಾಪ್ ಮನ್ಶಾಕ್ ನವ್ಯೊ ವಾಟೊ ಸೊಧುನ್ ದಿತಾ, ಪುಣ್ ಚಿಂತ್ಚಾಂತ್ ಆಮಿಂ ಕಿತ್ಲಿಂ ಹುಶಾರ್? ಭೋವ್ಶಾ ಏಕ್ ಸಮೀಕ್ಶಾ ಕೆಲಿ ತರ್ ಶೆಂಭೊರಾಂತ್ ನೊವೊದ್ ಠಕ್ಕೆ ಲೊಕ್ ಫಕತ್ ’ಅಪುಣ್, ಆಪ್ಲಿಂ ಬಾಯ್ಲ್ ಭುರ್ಗಿಂ, ಆಪ್ಲಿ ಆಸ್ತ್-ಬದಿಕ್, ಅಪ್ಲೆ ಈಶ್ಟ್ ಮಂತ್ರ್’ ಹ್ಯಾವಿಶಿಂ ಮಾತ್ರ್ ಚಿಂತುಂಕ್ ಸಕ್ತಾ ಶಿವಾಯ್ ಚಡ್ತಿಕ್ ಕಿತೆಂಚ್ ನ್ಹಯ್.

ಬಾಕಿ ಉರ್‌ಲ್ಲ್ಯಾ ಥೊಡ್ಯಾಂನಿ ಚಿಂತುಂಕ್ ಪ್ರೇತನ್ ಕೆಲೆಂ ತರ್‌ಯ್ ತಾಂಚಾನ್ ಹೆರಾಂಚಿಂ ಕರ್ತುವಾಂ ವ ಹೆರಾಂಚೆ ಗುನ್ಯಾಂವ್ ಮಾತ್ರ್ ಚಿಂತುಂಕ್ ಸಾಧ್ಯ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಕಿತ್ಯಾಕ್ ಮ್ಹಳ್ಯಾರ್ ಜಾಯ್ತ್ಯಾಂಕ್ ಚಿಂತಾಪ್ ಏಕ್ ಪಿಡಾ ಮ್ಹಳ್ಳೆಂ ಮತಿಂತ್ ಆಸಾ. ಚಿಂತಾಪ್ ಏಕ್ ಪಿಡಾ ಮ್ಹಣ್ ಚಿಂತ್ಚೀಂಯ್ ಧಾರಾಳ್ ಮಾಪಾನ್ ಆಸಾತ್.

ಆಮ್ಚೆಂ ಚಿಂತಾಪ್‌ಯ್ ಕಿತ್ಲೆಂ ಅಪುರ್ಭಾಯೆಚೆಂ? ಆಮ್ಕಾಂ ದೇವ್, ಧರ್ಮ್, ಮೀಸ್, ತೇರ್ಸ್, ಪಾತ್ಕಾಂ, ಕುಮ್ಸಾರ್, ಫೆಸ್ತಾಂ ಶಿವಾಯ್ ಹೆರ್ ಚಿಂತಾಪ್ ಯೆಂವ್ಚೆಂಚ್ ಭೋವ್ ಉಣೆಂ. ದೆಕುನ್ ಆಮ್ಚಾ ಮತಿನ್ ಜೆದ್ನಾಂ ಚಿಂತುಂಕ್ ಮನ್ ಕೆಲೆಂ ತೆದ್ನಾಂ ಯೆಂವ್ಚೆಂ ಚಿಂತಾಪ್‌ಯ್ ಆಮ್ಚಾ ತಳಾತಾತಿತ್ಲೆಂಚ್ ಗೂಂಡ್. ದೆಕುನ್ಂಚ್ ಆಮ್ಚಿ ಮತ್ ಜೆಜುಚೆ ಭಾರಾ ಆಪೊಸ್ತೊಲ್ ಆಸ್‌ಲ್ಲೆ, ತಾಂತುಂ ಪೆದ್ರು ವರ್ತೊ, ಆನಿ ಜುದಾಸ್ ಘಾತ್ಕಿ ಮ್ಹಣ್ ಆಮ್ಚೆಂ ಚಿಂತಾಪ್. ಚೂಕ್ ದೊಗಾಂಯ್ನೀ ಕೆಲ್ಲಿ, ಪೆದ್ರುಕ್ ಜೆಜುನ್ ಪಯ್ಲೆಂಚ್ ಶೀದಾ ಸಾಂಗ್‌ಲ್ಲೆಂ "ಅಳೆ ಪೆದ್ರು, ತುಂ ಮ್ಹಾಕಾ ಫಾಂತ್ಯಾಚೊ ಕೊಂಬೊ ಸಾದ್ ಘಾಲ್ಚಾಪಯ್ಲೆಂ ತೀನ್ ಪಾವ್ಟಿಂ ನೆಗಾರ್ ಕರ್ತಲೊಯ್", ತರ್‌ಯ್ ಪೆದ್ರುನ್ ತಶೆಂಚ್ ಕೆಲೆಂ. ಉಪ್ರಾಂತ್ ಪೆದ್ರು ಗಳ್ಗಳ್ಯಾನ್ ರಡ್ಲೊ... ಉಪ್ರಾಂತ್ಲಿ ಸಭಾರ್ ರಿತಿಚಿ ಕಾಣಿ ಸಭಾರ್ ಜಣಾಂಥಾವ್ನ್ ಆಮಿಂ ಆಯ್ಕಾಲ್ಯಾ, ಆನಿ ಪೆದ್ರು ಇಗರ್ಜ್ ಮಾತೆಚೊ ವ್ಹಡಿಲ್ ಜಾಲೊಚ್.

ಪುಣ್ ಗುನ್ಯಾಂವ್ ಕರುಂಕ್ ಭಾಯ್ರ್ ಸರ್‌ಲ್ಲ್ಯಾ ಜುದಾಸಾಕ್ ಜೆಜುನ್ ಕೆದಿಂಕ್‌ಚ್ ಶೀದಾ ಸಾಂಗ್ಲೆನಾಂಕೀ "ತುಂ ಮ್ಹಾಕಾ ವಿಖ್ರಿತ್ ಕರ್ತಾಯ್" ಮ್ಹಣ್. ಸಾಂಗ್‌ಲ್ಲೆಂ ತರ್ ಕೊಣ್ ಜಾಣಾಂ ತೊ ಕಿತೆಂ ಕರ್ತೊ ಮ್ಹಳ್ಳೆಂ? ಆಸೊಂ! ಜುದಾಸಾನ್ ತೀಸ್ ನಾಣ್ಯಾಂಕ್ ಜೆಜುಕ್ ವಿಖ್ರಿತ್ ಕೆಲೊಚ್. ಉಪ್ರಾಂತ್ ಅಪ್ಲಿ ಚೂಕ್ ವಳ್ಕೊನ್ ತೊ ಗಳ್ಪಾಸ್ ಘೆವ್ನ್ ಮೆಲೊ...

ದೋನ್ ಚುಕಿ, ದೋನ್ ಗುನ್ಯಾಂವ್, ದೋನ್ ಥರಾಂಚೆ, ಜೆಜುಕ್ ವಿಖ್ರಿತ್ ಕರ್ಚೆ.. ಪುಣ್ ದೊಗಾಂಕ್ ತಾಣಿಂ ಕೆಲ್ಲ್ಯಾ ಗುನ್ಯಾಂವಾಂಕ್ ಭೊಗುಂಕ್ ಮೆಳ್‌ಲ್ಲೆಂ ವೆವೆಗ್ಳೆಂಚ್ - ಕಿತ್ಯಾಕ್? ಆಸೊಂ! ಚಡ್ತಿಕ್ ಸವಾಲಾಂ ಕೆಲ್ಯಾರ್ ನವಿಚ್ ಹೆರೆಜಿ ಜಾಯ್ತ್!.

ಥೊಡ್ಯಾಚ್ ವರ್ಸಾಧಿಂ ಕ್ರಿಕೆಟಾಂತ್ ಮ್ಯಾಚ್ ಫಿಕ್ಸಿಂಗ್ ಅಪ್ರಾದಾಂತ್ ಶಿರ್ಕೊನ್ ಪಡ್‌ಲ್ಲ್ಯಾಂಚೊ ಧಾಖ್ಲೊ ಘೆವ್ಯಾಂ, ಆಸ್ಟ್ರೇಲಿಯಾಚೊ ಮಾರ್ಕ್ ವಾ ಆನಿ ಶೇನ್ ವಾರ್ನ್, ದಕ್ಶಿಣ್ ಆಫ್ರಿಕಾಚೊ ಹ್ಯಾನ್ಸಿ ಕ್ರೋನಿಯೆ ಆನಿ ಹೆರ್ ಥೊಡೆ. ಹಾಂತುಂ ಪಯ್ಲೊ ಕೊಣೆಂಚ್ ಅಪ್ಲೊ ಗುನ್ಯಾಂವ್ ವಳ್ಕೊನ್ ಘೆತ್ಲೊನಾ, ಪಯ್ಲೆಂ ಕಿತ್ಯಾಕ್ ಅಜೂನ್ ಸಯ್ತ್ ಹ್ಯಾನ್ಸಿ ಕ್ರೋನಿಯೆಶಿವಾಯ್ ಹೆರ್ ಕೊಣೆಂಚ್ ಹೊ ಗುನ್ಯಾಂವ್ ಕಬೂಲ್ ಕೆಲೊನಾ. ಕಿತೆಂ ಜಾಲೆಂ? ಹ್ಯಾನ್ಸಿ ಕ್ರೋನಿಯೆಕ್ ಕ್ರಿಕೆಟ್ ಸಂಸಾರಾಂತ್ಲೊ ಮೆಕ್ಳೊ ಕೆಲೊ, ಥೊಡ್ಯಾಚ್ ವರ್ಸಾಂನಿ ತೊ ಹ್ಯಾ ಸಂಸಾರಾಂತ್ಲೊಚ್ ಮೆಕ್ಳೊ ಜಾಲೊ. ಪುಣ್ ಹೆರ್ ಅಜೂನ್ ಆಸಾತ್.

ಆಯ್ಲೆವಾರ್ ಎಕಾ ಸಂವಾದಾಂತ್ ’ಚೊರಿ ಅನಿ ಚೋರ್’ ಮ್ಹಳ್ಳೆವಿಶಿಂ ತರ್ಕ್ ಚಲೊನ್ ಆಸ್ತಾನಾ, ಚೊರಾಕ್ ಕಸಲಿ ಶಿಕ್ಶಾ ದೀಜಾಯ್ ಮ್ಹಣೊನ್ ಉಲವ್ನ್ ಆಸ್ತಾನಾ ಎಕ್ಲೊ ಮ್ಹಣಾಲೊ, ’ಚೊರಾಕ್ ಫಾಶೆಚಿ ಶಿಕ್ಶಾ ದೀಜಾಯ್, ಪುಣ್ ತಾಣೆಂ ಚೊರಿ ಕರ್ತಾನಾಂಚ್ ಶಿರ್ಕೊನ್ ಪಡ್ಲೊ ತರ್ ಮಾತ್ರ್’. ಅನ್ಯೆಕ್ಲ್ಯಾನ್ ತವಳ್ ಸವಾಲ್ ಕೆಲೆಂ ’ಕಿತ್ಯಾಕ್ ಚೊರಿ ಕರ್ತಾನಾಂಚ್ ಶಿರ್ಕೊನ್ ಪಡ್‌ಲ್ಲ್ಯಾಕ್?’ ಪಯ್ಲೊ ಜಾಪ್ ದೀವ್ನ್ ಮ್ಹಣಾಲೊ, ಹಾಂಗಾ ಶಿಕ್ಶಾ ಫಕತ್ತ್ ’ಚೊರಿ ಕೆಲ್ಲ್ಯಾಕ್ ನ್ಹಯ್, ಬಗಾರ್ ಶಿರ್ಕೊನ್ ಪಡ್‌ಲ್ಲ್ಯಾಕ್’

ನವ್ಯಾ ವರ್ಸಾರ್ ನವೆಂ ಚಿಂತಾಪ್ ಚಿಂತುಂಕ್ ಆಮ್ಕಾಂ ಸಾಧ್ಯ್? ವಾ ತೆಂಚ್ ಪರ್ನೆಂ ಚಿಂತಾಪ್? ತೆಂಚ್ ಗುಮಾಟ್? ತಿಚ್ಚ್ ಮಾಂಡ್ ಕುರ್ಪೊಣ್ ಆನಿ ತಿಚ್ಚ್ ಧೊಲ್?
- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್