ಸರ್ಕಸಾಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸವಾಲಾಂಕ್ ಜಾಪಿ

ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ

Placeholder: the original page gave this picture no description, and none has been written yet. It came from daaiz\daaiz\column\sz\sz14.asp.

ದಿವೊ ಹಾಫ್ತ್ಯಾಳೆಂ

ಮಿತ್ರ್ ಹಾಫ್ತಾಳೆಂ

ಸೆವಕ್ ಮಯ್ನ್ಯಾಳೆಂ

ಯಾತ್ರಿ ವಿಶ್ಯಾಂತ್

ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಯಾತ್ರಿ’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್‌ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.

[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]

ಜಾಪಿ ದಿತಾ: ಯಾತ್ರಿ

1. ಆಜ್‌ಕಾಲ್ ಸರ್ಕಸಾಂ ಉಣಿಂ ಜಾಲ್ಯಾಂತ್ ಕಿತ್ಯಾಕ್ ಜಾವ್ಯೆತ್ ಯಾತ್ರಿ ಮಾಮಾ? [ಬಾಲ್ಚಾಟ್ ಬಾತ್ತು, ಬಾರ್ಕುರ್]

ಜಾ: ಆಜ್ ಕಾಲ್ಚ್ಯಾ ಯಾಂತ್ರಿಕ್ ಸಂಸಾರಾಂತ್ ಮನ್ಶಾಚಿ ಜಿಣಿಂಚ್ ಸರ್ಕಸ್ ಜಾಲ್ಯಾ ಆಸ್ತಾಂ, ಹೆರ್ ಸರ್ಕಸಾಂಚಿ ಗರ್ಜ್ ಆಸಾಗೀ ಬಾತ್ತೋ.. ಪುಣ್ ಆಮ್ಚಾ ರಾಜಕಾರಿಣಿಂಕ್ ಪಳೆಶಿ ತರ್ ತುಜ್ಯಾ ಸವಾಲಾಕ್ ಜಾಪಿ ಮೆಳ್ತಿತ್ ಕೊಣ್ಣಾ?

2. ಕೊಂಕ್ಣಿ ಜಾಣಾಸೊನ್‌ಯೀ ’ಆಮಿ ಬೋಂಬೆ ಸೆಟಲ್’ ಮ್ಹಣ್ ಇಂಗ್ಲಿಶಾಂತ್ ಲೊಟ್ಟೆ ಸೊಡ್ಚ್ಯಾ ಥೊಡ್ಯಾ ಕೊಂಕ್ಣಿ ಲೊಕಾಂವಿಶಿಂ ಕಿತೆಂ ಮ್ಹಣ್ತಾಯ್ ಯಾತ್ರಿ? [ರೊಜಿಟಾ ನಜ್ರೆತ್, ಮಿರಾ ರೋಡ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಜಾ: ಇಂಗ್ಲೀಶಾಂತ್ ಉಲಯ್ಲ್ಯಾರ್ ವ್ಹಡ್ಪಣ್ ವಾಡ್ತಾ ಮ್ಹಳ್ಳಿ ಚೂಕ್ ಸಮ್ಜಣಿ ತಾಂಚೆ ಥಂಯ್ ಆಸ್‌ಲ್ಲ್ಯಾನಿಮ್ತಿಂ ಆಶೆಂ ಘಡ್ತಾ. ತಶೆಂ ಮ್ಹಣೊನ್ ತಾಂಣಿ ಅಪ್ಲ್ಯಾ ಮಾಂಯ್ ಭಾಶೆಕ್ ಸಾಂಡ್ಲಾಂ ಮ್ಹಣ್ ಸಾಂಗೊಂಕ್ ಜಾಯ್ನಾಂ, ಕಷ್ಟಾಂತ್ ಪಡ್‌ಲ್ಲ್ಯಾ ವೆಳಾ, "ಮ್ಹಾಂಯ್‌ಗೇ..!" ಮ್ಹಣೊಂಕ್ ತಿಂ ವಿಸ್ರಾನಾಂತ್.

3. ಹಾಂಗಾ ಥೊಡೆ ಮೊಗೆಂ ಆನಿ ಚಿಪುಟ್ ಎಕ್‌ಚ್ ಮ್ಹಳ್ಳೊ ವಾದ್ ಮಾಂಡ್ತಾತ್‌ಗಾ - ಕಹಲೆಂ ಮುಣ್ತಾಯ್ ತುಂ? [ವಿನ್ಸಿ, ಬೆಂಗ್ಳುರ್]

ಜಾ: ಮೊಗ್ಯಾಕ್ ಚಿಪುಟ್ ಮ್ಹಣ್ತೆಲ್ಯಾಕ್ ಮೊಗ್ಯಾಚೊ ಬೊಂಡು ಖಾಂವ್ಕ್ ದೀ ಆನಿ ಚಿಪುಟಾಕ್ ಮೊಗೆಂ ಮ್ಹಣ್ತಾಲ್ಯಾಕ್ ಚಿಪುಟ್ ಕಡಿ ಕರ್‍ನ್ ದೀ..!

4. ಎಪ್ರಿಲ್ ಫೂಲ್ ಫಕತ್ತ್ ಎಪ್ರಿಲಾಂತ್ ಮಾತ್ರ್ ಕಿತ್ಯಾಕ್ ಕರ್ಚೆಂ? ಮಾರ್ಚ್ ಫೂಲ್ ಯಾ ಮಾಯ್ ಫೂಲ್ ಜಾಯ್ನಾಂಗೀ? [ಲಾಟ್‌ಫೊಟ್ ಲಾದ್ರು] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಜಾ: ಫೂಲ್ ಜಾಂವ್ಚೆ ಆಸ್ಲ್ಯಾರ್ ಖೈಂಚಾ ಮಹಿನ್ಯಾಂತೀ ಕರುಯೆತಾ. ತ್ಯಾ ಏಕ್ ದೀಸ್ ಕೊಣೀ ತುಕಾ ಮಾಫ್ ಕರ್ತಿತ್. ಪುಣ್ ಸದಾಂಯ್ ಕೊಣಾಕ್‌ಯೀ ’ಫೂಲ್’ ಕರುಂಕ್ ವೆಶಿ ತರ್ ಖೊಟ್ ಮಾರ್‍ನ್ ಧಾಂವ್ಡಾಯ್ತಿತ್ ಜಾಗ್ರುತ್ ಕರ್..!

5. ಸಂಸಾರಾಂತ್ ಆವಯಾಂಚೊ ದೀಸ್, ಬಾಪಾಯಾಂಚೊ ದೀಸ್, ಭಯ್ಣ್ಯಾಂಚೊ ದೀಸ್, ಭಾವಾಂಚೊ ದೀಸ್ ಆಚರಣ್ ಕರ್ತಾತ್, ಪುಣ್ ಕುಮಾದ್ರಿಂಚೊ ದೀಸ್ ಕಿತ್ಯಾಕ್ ಕರಿನಾಂತ್ ಕುಂಪಾರೆ? [ಕುಮಾದ್ರ್, ಕುಂದಾಪುರ್]

ಜಾ: ತುವೆಂ ವಯ್ರ್ ಸಾಂಗ್‌ಲ್ಲ್ಯಾ ದಿಸಾಂನಿ ಭೊವ್‌ಶಾ ಕುಮಾದ್ರಿ ಸಾಂಗಾತಾ ಬಸೊನ್, ಪಿರಿ ಸುಕಯ್ತಾತ್ ದಿಸ್ತಾ.. ತಶೆಂ ತಾಂಕಾಂ ವೆಗ್ಳೊ ದೀಸ್ ನಮಿಯಾರ್ಚಿ ಗರ್ಜ್ ದಿಸೊಂಕ್ ನಾಂ.

6. ಗಾಂವಾಂತ್ ಆಜ್‌ಕಾಲ್ ಜಳಾರಿ ಚಡೊಂಕ್ ಕಾರಣ್ ಕಸ್ಲೆಂಗಾ? [ಅಸ್ಕತ್ ಪಿಲೊ, ಮಸ್ಕತ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಜಾ: ಕೊಂಕ್ಣಿ ಪತ್ರಾಂ ಚಡ್‌ಲ್ಲೆಂ ಕಾರಾಣ್ ಆಸೊಂಕ್ ಪುರೊ. ಕಾರಾಣಾಂ ಸೊಧುಂಕ್ ಕೊಣಾಲಾಗ್ಗಿಂ ಪುರ್ಸತ್ ಆಸಾ, ಸಾಂಗಾನಾಂಯ್..? ಚೆಡೊ ಜಳಾರಿಕ್ ’ಕೋಂಡೊಮ್’ ಆನಿ ಚೆಡುಂ ಜಳಾರಿಂಚೆ ’ಗರ್‍ಭಾಪಾತ್’ ಕರುಂಕ್ ಭಾಯ್ರ್ ಸರ್‍ಲ್ಯಾತ್ ಆಮ್ಚೆ ಮುನ್ಸಿಪಾಲಿಟಿಗಾರ್..!

7. ಆದಿಂ ಪೆಟ್ರೊಲಾಂತ್ ಮಾತ್ ಚಲ್ಚಿಂ ಕಾರಾಂ ಆತಾಂ ಡಿಜಿಲಾಂತ್ ಆನಿ ಗ್ಯಾಸಾಂತ್ ಚಲೊಂಕ್ ಲಾಗ್ಲ್ಯಾಂತ್ - ಫುಡೆಂ ಉದ್ಕಾಂತ್ ಚಲ್ಚೆ ದೀಸ್ ಯೆತಿತ್‌ಗಿ ಯಾತ್ರಿ? [ಸೆವ್ರಿನ್, ಶಿರ್ವಾಂ]

ಜಾ: ಉದ್ಕಾಂತ್ ಚಲೊಂಕ್ ದೋಣ್ ಆನಿ ತಾರ್‍ವಾಂ ಆಸಾತ್‌ನೇ ಸೆವ್ರಿನ್ ಮಾಮಿಯೆ..?

8. ಮಾಗ್ಣಿಂ ಕೆಲ್ಯಾರೀ ಪತ್ರಾಂನಿ ವರ್ದಿ ಧಾಡ್ತಾತ್ ಕಿತ್ಯಾಕ್‌ಗಾ? [ಬೋರಿ ಬಸವ, ಅಬ್ಬಾಸಿಯಾ]

ಜಾ: ತಶೆಂ ತರೀ ದೆವಾಕ್ ಮಾಗ್ಣೆಂ ಕೆಲ್ಲಿ ’ಖಬಾರ್’ ಪಾವೊಂದಿ ಮ್ಹಣ್..!

9. ಯಾತ್ರಿ - ತುಕಾ ಸತ್ರಿ ಧರುಂಕ್ ಯೇಂವ್ಕ್‌ಗಿ? ಪಯ್ಲಿ ತುಜಿ ಖರಿ ವಳೊಕ್ ಸಾಂಗ್ ಮಾತ್ರ್ ಮ್ಹಾಕಾ. [ವಿಮ್ಲಾ ಸೊಜ್, ದುಭಾಯ್]

ಜಾ: ಸತ್ರಿ ಧರ್ಚೆ ದೀಸ್ ಯೆತಾನಾಂ ಹಾಂವ್ ತುಕಾಚ್ ಆಪಯ್ತಾಂ, ಹಾಂವ್ ಆಜೂನ್ ’ಅಪುಟ್’ ಅಂಕ್ವಾರ್.

10. ಕಾರ್ಕಳ್ಚೊ ಗುಮ್ಟೊ ಕೊಂಕ್ಣಿ ಉಲಯ್ತಾ ಕಂಯ್ - ವಯ್ಗೀ ಯಾತ್ರಿ? [ವಿ.ಡಿ. ಕಾರ್ಕೊಳ್]

ಜಾ: ಮ್ಹಾಕಾಯ್ ತಶಿಚ್ ಖಬಾರ್. ತುಂವೆಂಯ್ ವಸ್ತುರ್ ಕಾಡ್ನ್ ತಾಚೆ ಬಗ್ಲೆಕ್ ಉಭೆ ರಾವ್ಲ್ಯಾರ್ ತಾಕಾ ಇಲ್ಲೊ ಸಾಂಗಾತ್ ತರೀ ಜಾಯ್ತ್ ಕೊಣ್ಣಾ..! ಕಿತೆಂ ಮ್ಹಣ್ತಾಯ್..?

11. ಸುನಾಮಿ ಕೊಣಾಚಿ ಮಾಮಿ ಯಾತ್ರಿ? [ಸಹನಾ, ಕುವೇಯ್ಟ್]

ಜಾ: ಮಾಮಾಕ್ ಯೆದೊಳ್‌ಚ್ ಗಿಳ್‌ಲ್ಲ್ಯಾ ’ಸುನಾಮಿ’-ಚಿ ಖಬಾರ್ ಆಮ್ಕಾಂ ನಾಕಾ ಬಾಯೆ ಸಹನಾ, ಪಯ್ಲೆಂಚ್ ತುಂ ಕುವೈಟಾಂತ್ಲ್ಯಾ ರೆಂವೆರ್ ಆಸಾಯ್..! ತುಕಾ ’ಮಾಂವ್’ ಜಾಯ್ ತರ್ ಏಕ್ ಸೊಧ್ತಾಂ..

12. ಸಾಂತ್ ಆಂತೊನಿಚೆಂ ಭಾರಾವೆಂ ಅಜ್ಯಾಪ್ ’ಇಂಡಿಯ್ ವರ್ಲ್ಡ್ ಕಪ್ ಜಿಕ್ಚೆಂ’ ಮ್ಹಣ್ತಾತ್ - ತುಂ ಕಿತೆಂ ಮ್ಹಣ್ತಾಯ್ ಇರ್ಮಾಂವ್? [ಬೊಸ್ತ್ಯಾಂವ್, ಸಾಲ್ಸೆಟ್]

ಜಾ: ಆಜಾಪಾಂನಿಂಯ್ ಥೊಡೆಂ ಪಾವ್ಟಿಂ ಸತ್ ಲಿಪೊನ್ ಆಸ್ತಾನೇ, ಬೊಸ್ತ್ಯಾಂವ್..? ಇಂಡಿಯಾಗಾರಾಂನಿ ವೆಸ್ಟ್ ಇಂಡೀಸಾ ಥಾವ್ನ್ ಪಾಟಿಂ ಯೆತಾನಾಂ ಚಾಯೆಚೆಂ ’ಕಪ್’ ಹಾಡ್ಲ್ಯಾರೀ ಹಾಡ್ಲೆಂ..!

ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ

’ಮಿತ್ರ್ ಹಾಪ್ತ್ಯಾಳೆಂ’

ರೊಜಿಟಾ ನಜ್ರೆತ್, ಮಿರಾ ರೋಡ್

’ದಿವೊ ಹಾಪ್ತ್ಯಾಳೆಂ’

ಅಸ್ಕತ್ ಪಿಲೊ, ಮಸ್ಕತ್

’ಸೆವಕ್ ಮಯ್ನ್ಯಾಳೆಂ’

ಲಾಟ್‌ಫೊಟ್ ಲಾದ್ರು

(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.

ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info @daaiz.com

ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1 , 2, 3 , 4 , 5, 6, 7, 8, 9, 10, 11, 12, 13