ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಸತ್ರಾ: ಮಿಶೇಲ್ ರಾಯನ್ ಆಲಿಯಾ
"ಏವಿಯೇಶನ್ ಟ್ರೇಯ್ನಿಂಗ್ ಏರ್ ಬೇಸ್!"
ಲಾಂಭ್ ಭಾರೀಕ್ ಎಲ್ ಶೇಪಿಚೆರ್ ಆಸ್ಲ್ಲ್ಯಾ ಏವಿಯೇಶನ್ ಕ್ಯಾಂಪಸಾಚ್ಯಾ ಮೇಯ್ನ್ ಎಂಟ್ರೆನ್ಸಾಚೆರ್ ಆಲಿಯಾಕ್ ಆಪ್ಲ್ಯಾ ಉಸ್ಕ್ಯಾರ್ ಘೆವ್ನ್ ಆಯಿಲ್ಲೆಂ ಕಾರ್, ತ್ಯಾ ಏರ್ಬೇಸಾಚಾ ವ್ಹಡ್ಲ್ಯಾ ಗೇಟಿ ಮುಕಾರ್ ಥಾಂಬ್ಲೆಂ. ಏರ್ಬೇಸಾಚಾ ಮೇಯ್ನ್ ಎಂಟ್ರೆನ್ಸಾ ಮುಕಾರ್ ಯೇವ್ನ್ ಥಾಂಬ್ಲೆಲ್ಯಾ ಕಾರಾ ಭಿತರ್ ಬಸ್ಲೆಲ್ಯಾ ಆಲಿಯಾನ್ ತಶೆಂಚ್ ಕಾರಾ ಭಿತರ್ ಬಸ್ಲ್ಲ್ಯಾ ಕಡೆನ್ ಥಾವ್ನ್ಚ್ ಕಾರಾಚಾ ಆರ್ಶ್ಯಾ ಮುಕಾಂತ್ರ್ ಆಪ್ಲಿ ನದರ್ ಭಾಯ್ರ್ ತ್ಯಾ ಏರ್ಬೇಸಾ ವಯ್ರ್ ಭೊಂವ್ಡಾಯ್ಲಿ.
"ತೆಂಚ್ ವ್ಹಡ್ಲೆಂ ವಿಶಾಲ್ ಕಂಪೌಂಡ್! ತಿಚ್ಚ್ ವ್ಹಡ್ಲಿ ಗೇಟ್! ತೆಂಚ್ ದ್ರಶ್ಯ್!
ಕಾಂಯ್ಚ್ ಬದ್ಲಾವಣ್ ಜಾಂವ್ಕ್ ನಾತ್ಲ್ಲಿ!
ತೆದ್ನಾಂಯ್ ಆಶೆಂಚ್ ಆಸ್ಲ್ಲೆಂ! ಆತಾಂಯ್ ತಶೆಂಚ್ ಆಸಾ!
ಪುಣ್.......!
ಆಲಿಯಾಚಾ ಜಿವಿತಾಂತ್ ಮಸ್ತ್ ಬದ್ಲಾವಣ್ ಜಾಲ್ಲಿ.
ಕಾರಾ ಭಿತರ್ ಥಾವ್ನ್ಚ್ ಏರ್ಬೇಸ್ ಕ್ಯಾಂಪಸಾಕ್ ಪಳವ್ನ್ ರಾವ್ಲೆಲ್ಯಾ ಆಲಿಯಾಕ್ ಆಪ್ಣಾಚೆಂಚ್ ರೂಪ್ ತ್ಯಾ ಗೇಟಿಂತ್ಲ್ಯಾನ್ ಭಿತರ್ ಸರೊನ್ ತ್ಯಾ ಆಫೀಸಾಂಚಾ ಮೇಯ್ನ್ ಎಂಟ್ರೆನ್ಸಾಂತ್ಲ್ಯಾನ್ ಚಲೊನ್ ಭಿತರ್ ಗೆಲ್ಲ್ಯಾ ಪರಿಂ ಜಾಲೆಂ.
ಆಪ್ಣಾಚೆಂಚ್ ರೂಪ್!
ಆಲಿಯಾಚಾ ಭಿತರ್ಲೆಂ ಆಲಿಯಾ!
ತ್ಯಾ ಆದ್ಲ್ಯಾ ದಿಸಾಂನಿ ಆಲಿಯಾ ಹ್ಯಾ ಕಂಪೌಂಡಾಚಿಂ ಮೆಟಾಂ ಚಡ್ಲ್ಲೆಂ. ಕಿತ್ಯಾಕ್, ತಾಕಾ ತ್ಯಾ ಮೊಳಾಬಾರ್ ಸುಕ್ಣ್ಯಾಪರಿಂ ಉಭೊಂಕ್ ಜಾಯ್ ಆಸ್ಲ್ಲೆಂ.
ಎಕಾ ಸುಕ್ಣ್ಯಾಪರಿಂ!
ಸ್ವತಂತ್ರ್ ಸುಕ್ಣ್ಯಾಪರಿಂ!
ಆಲಿಯಾಚೆಂ ಸಪಾಣ್ ತೆಂ!
ದಾಕ್ತೆರ್ ಕರಂವ್ಚ್ಯಾ ಬಾಪಾಯ್ಚ್ಯಾ ಆಶೆಕ್ ಖೊಟಾವ್ನ್ ಆಲಿಯಾ ಹ್ಯಾ ಏರ್ಬೇಸಾಕ್ ಪಾವ್ಲ್ಲೆಂ. ತಾಕಾ ಬಾಪಾಯ್ಚಿ ಆಶಾ ಜ್ಯಾರಿ ಕರ್ಚ್ಯಾ ಪ್ರಾಸ್ ಆಪ್ಲ್ಯಾ ಆಶೆಕ್ ಜ್ಯಾರಿ ಕರ್ಚಿ ಉರ್ಭಾ ಆಸ್ಲ್ಲಿ. ಹ್ಯಾ ಆಪ್ಲ್ಯಾ ಆಶೆಕ್ ಜ್ಯಾರಿ ಕರ್ಚ್ಯಾ ಇರಾದ್ಯಾಂತ್ ಹ್ಯಾ ಏರ್ಬೇಸಾಕ್ ಪಾವ್ಲೆಲ್ಯಾ ಆಲಿಯಾಚಾ ಮತಿಂತ್ ಕಿತ್ಲಿ ಖುಶಿ ಆಸ್ಲ್ಲಿ! ತ್ಯಾ ದೀಸ್ ಆಲಿಯಾನ್ ಹ್ಯಾಚ್ ಗೇಟಿಚೆರ್ ರಾವೊನ್ ಆಪ್ಲ್ಯಾ ನದ್ರೆಕ್ ತ್ಯಾ ನಿಳ್ಶ್ಯಾ ಮೊಳಾಬಾರ್ ಧಾಂವ್ಡಾಯಿಲ್ಲಿ ಆನಿ ತಾಕಾ ತ್ಯಾಚ್ ಘಡಿಯೆ ತ್ಯಾ ಮೊಳಾಬಾರ್ ಆಪುಣ್ ಸ್ವತಂತ್ರ್ ಜಾವ್ನ್ ಉಭ್ತಾಂ ಮ್ಹಳ್ಳ್ಯೊ ಆನ್ಭೋಗ್ ಜಾಲ್ಲೊ.
ಆಪ್ಣಾಚಿ ಧುವ್ ಆಪ್ಲ್ಯಾ ಆಶೆ ತೆಕಿದ್ ದಾಕ್ತೆರ್ನ್ ಜಾಯ್ನಾಂ ಜಾಲ್ಯಾರ್ಯ್ ತಾಚ್ಯಾಚ್ ಖುಶೆನ್ ತೆಂ ಪೈಲೆಟ್ ಜಾತಾ ಮ್ಹಳ್ಳ್ಯಾ ವರ್ವಿಂ ಮಾತ್ರ್ ಶಬೀರಾಕ್ ಸಂತೊಸ್ ಜಾಲ್ಲೊ.
ಶಬೀರಾನ್ ಆಪ್ಲ್ಯಾ ಧುವೆಚ್ಯಾ ಸಂತೊಸಾಂತ್ ಆಪ್ಲೊ ಸಂತೊಸ್ ಪಳೆಲ್ಲೊ.
ಹ್ಯಾ ಸಂತೊಸಾಕ್ ಖುದ್ಧ್ ಆಲಿಯಾನ್ಚ್ ಮಾಂದುನ್ ಘೆತ್ಲೆಲ್ಯಾ ವಿಚಾರಾಂನಿ ಕುರಾಡ್ ಮಾರ್ತಾನಾ ಮಾತ್ರ್ ತೊ ಕೊಸಾಳ್ಲ್ಲೊ.
ವ್ಹಯ್!
ಹ್ಯಾ ಆಲಿಯಾಚಾ ಪಯ್ಲ್ಯಾ ಸಪ್ಣಾಕ್ ಧರ್ಣಿಕ್ ಶೆವ್ಟಾಯಿಲ್ಲೆಂ ಥಳ್ ಹೆಂಚ್!
ಹ್ಯಾಚ್ ಥಳಾರ್ ಆಲಿಯಾಚಾ ಜಿವಿತಾಚಿ ಬದ್ಲಾವಣ್ ಜಾಲ್ಲಿ!
ಹ್ಯಾ ಬದ್ಲಾವಣೆಕ್ ಮುಖ್ಯ್ ಕಾರಾಣ್ ಜಾಲ್ಲೊಚ್ ಕ್ಯಾಪ್ಟನ್ ರಾಣಾ!
ಕಿತ್ಲೊ ಘಮಂಡ್ ತಾಕಾ ಆಪ್ಲ್ಯಾ ದಾದ್ಲ್ಯಾಪಣಾ ವಯ್ರ್!
ಹ್ಯಾಚ್ ಖಾತಿರ್ ಆಲಿಯಾ ಆಜ್ ಪರ್ತ್ಯಾಕ್ ಹ್ಯಾ ಏರ್ಬೇಸಾ ಮುಕಾರ್ ಹಾಜರ್ ಜಾಲ್ಲೆಂ. ಕ್ಯಾಪ್ಟನ್ ರಾಣಾಕ್ ತೆಂ ಪರ್ತ್ಯಾಕ್ ಪಳಂವ್ಕ್ ಆಶೆಲ್ಲೆಂ.
"ಆಜ್ ಆಲಿಯಾ ಹ್ಯಾ ದಾದ್ಲ್ಯಾ ಜಾತಿಕ್ ಚಲಿಯೆ ಜಾತಿಚಿ ಸಾಮರ್ಥಿ ಕಿತೆಂ ಮ್ಹಳ್ಳಿ ತೆಂ ದಾಖಯ್ತೆಲೆಂ!" ಕಾರಾ ಭಿತರ್ ಬಸ್ಲೆಲೆಂ ಆಲಿಯಾ ಆಪ್ಲ್ಯಾ ಮತಿಂತ್ಚ್ ಉಲಯ್ಲೆಂ.
ತಿತ್ಲ್ಯಾರ್ ಆಲಿಯಾಚಾ ಕಾರಾ ಮುಖ್ಲ್ಯಾ ಮಿನಿ ಬಸ್ಸಾರ್ ಥಾವ್ನ್ ದೆಂವ್ಲ್ಲೊ ಸಾವಂತಾಚೊ ಜ್ಯೂನಿಯರ್ ಸೆಕ್ರೆಟರಿ ಆಪ್ಲ್ಯಾ ಹಾತಾಂತ್ ಆಸ್ಲ್ಲ್ಯಾ ಪೇಪರಾಂಕ್ ಘೆವ್ನ್ ತ್ಯಾ ಗೆಟಿಚ್ಯಾ ಭಿತರ್ ಆಸ್ಲ್ಲ್ಯಾ ವಾಚ್ಮ್ಯಾನಾಕ್ ದಾಖವ್ನ್ ತ್ಯಾ ಪೇಪರಾಚೆರ್ ಪರ್ವಣ್ಗೆಚಿ ಸೀಲ್ ಮಾರುನ್ ತೆಂ ಪೇಪರ್ ಘೆವ್ನ್ ಪಾಟಿಂ ಆಯ್ಲೊ. ಏರ್ಬೇಸಾಕ್ ಭಿತರ್ ವೆಚೆಂ ಪರ್ವಣ್ಗೆ ಪತ್ರ್ ತೆಂ!
ತಾಚ್ಯೆ ಪಾಟ್ಲ್ಯಾನ್ ಆಪ್ಲ್ಯಾ ಕುಡಿರ್ ನಿಳ್ಶೆಂ ಯೂನಿಫಾರ್ಮ್ ನ್ಹೆಸ್ಲೆಲೆ ದೋಗ್ ಸೆಕ್ಯೂರಿಟಿ ಗಾರ್ಡ್ ಹೆವ್ಶಿಂ ಆಯಿಲ್ಲೆ, ತಾಂಚ್ಯಾ ಮುಕಾರ್ ರಾವ್ಲೆಲ್ಯಾ ಹ್ಯಾ ಫಿಲ್ಮ್ ಡಿವಿಜನಾಚಾ ವಾಹನಾಂಕ್ ತಪಾಸಣ್ ಕರುಂಕ್ ಲಾಗ್ಲೆ. ತಾಂಚಿ ತಪಾಸಣ್ ಜಾವ್ನ್ ತೆ ಖುಶ್ ಜಾತಾನಾ ಹ್ಯಾ ವಾಹನಾಂಕ್ ಭಿತರ್ ವಚೊಂಕ್ ತಾಣಿಂ ಪರ್ವಣ್ಗಿ ದಿಲಿ.
ಆಲಿಯಾಚಾ ಕಾರಾ ಮುಖ್ಲೆಂ ಮಿನಿಬಸ್ಸ್ ಆತಾಂ ಮುಕಾರ್ ಚಮ್ಕಾಲೆಂ. ತಾಚ್ಯಾ ಪಾಟ್ಲ್ಯಾನ್ ಆಲಿಯಾ ಬಸೊನ್ ಆಸ್ಲ್ಲೆಂ ಕಾರ್ ಆನಿ ತಾಚ್ಯಾ ಪಾಟ್ಲ್ಯಾನ್ ಏಕ್ ಮಿನಿ ಮಿಟ್ಸುಬಿಶಿ ಟ್ರಕ್!
ಎದೊಳ್ಚ್ ಚಿತ್ರೀಕರಣಾಚಿ ಅರ್ಧಿ ತಯಾರಾಯ್ ಜಾಲ್ಲಿ. ಸಾವಂತ್ ತಾಚ್ಯಾ ಮನ್ಶ್ಯಾಂ ಸವೆಂ ಗುರ್ಕಾರ್ಪಣ್ ಚಲಯ್ತಾಲೊ.
ಆತ್ತಾಂ ಆಯಿಲ್ಲ್ಯಾ ಮಿನಿ ಟ್ರಕ್ಕಾ ಥಾವ್ನ್ ಸಕಯ್ಲ್ ದೆಂವಯಿಲ್ಲ್ಲ್ಯಾ ಟೆಂಟಾಚೊ ಸಾಮಾನ್ ಸಗ್ಳೊ ಮೆಕ್ಳೊ ಕರುನ್ ವೆವೆಗ್ಗಿಂ ಥೊಡ್ಯಾಂನಿ ಟೆಂಟ್ ಮಾರ್ಲೆಂ.
ಆಲಿಯಾ ಭಾಯ್ರ್ಚ್ ಎಕಾ ಫೋಲ್ಡಿಂಗ್ ಚೇರಾಚೆರ್ ಬಸ್ಲೆಂ.
ಲೈಟ್ಮ್ಯಾನ್ ಲೈಟಾಂಕ್ ಉಭೆಂ ಕರುನ್ ತಾಂಕಾ ವಯರಾಂ ವೊಡ್ತಾಲೆ. ತ್ಯಾ ಕುಶಿನ್ ರಿಫ್ಲೆಕ್ಟರ್ ಉಭೆ ಜಾತಾಲೆ.
ಕ್ಯಾಮರಾ ಧಾಂವ್ಡಾಂವ್ಕ್ ರೇಯ್ಲಿಂಗ್ ಎದೊಳ್ಚ್ ನಿದಾಯಿಲ್ಲೆಂ. ತಾಚ್ಯಾ ಸ್ಟ್ಯಾಂಡಾರ್ ಕ್ಯಾಮರಾಮ್ಯಾನ್ ಕ್ಯಾಮರಾಕ್ ಮೂವ್ ಕರುನ್ ಆಪ್ಣಾಚಿ ದಿಶಾ ಸೊಧ್ತಾಲೊ.
ಮೇಕಪ್ ಬಾಯ್ ಆಪ್ಲೆಂ ಮೇಕಪ್ ಕಿಟ್ ತಯಾರ್ ಕರ್ಚ್ಯಾರ್ ಪಡ್ಲ್ಲೊ.
ಖಂಯ್ ತೆಂ ಪೈಲೆಟಾಚೆಂ ನಾಂವ್ ಆನಿ ಖಂಯ್ ಹೆಂ ಚಿತ್ರೀಕರಣ್?
ತಿತ್ಲ್ಯಾರ್!
ಸಾವಂತಾನ್ ಆಪ್ಲ್ಯಾ ಅಸಿಸ್ಟಂಟ್ ಡೈರೆಕ್ಟರಾಕ್ ಸ್ಕ್ರಿಪ್ಟ್ ದೀವ್ನ್ ಆಲಿಯಾ ತೆವ್ಶಿಂ ದಾಡ್ಲೆಂ. ಹೀರೋ ಅಜೂನ್ ಯೇಂವ್ಕ್ ನಾತ್ಲ್ಲೊ. ತಾಚ್ಯಾ ಶಾಟ್ಸಾಂಕ್ ವೇಳ್ ಆಸ್ಲ್ಲೊ.
ಆಲಿಯಾಕ್ ಸ್ಕ್ರಿಪ್ಟ್ ದಿಲ್ಲೊ ಸಾವಂತಾಚೊ ಅಸಿಸ್ಟಂಟ್ ಚತುರ್ವೇದಿ ಆಲಿಯಾ ಥಾವ್ನ್ ಆತಾಂ ಘೆಂವ್ಕ್ ಆಸ್ಚ್ಯಾ ಚಿತ್ರೀಕರಣಾಚಾ ದ್ರಶ್ಯಾಂ ವಿಶಿಂ ಸಮ್ಜಾಂವ್ಕ್ ಲಾಗ್ಲೊ.
ಆಲಿಯಾ ಕಿತ್ಲೆಂ ಆಯ್ಕಾತಾಲೆಂ ಆನಿ ಕಿತ್ಲೆಂ ಆಯ್ಕಾನಾತ್ಲ್ಲೆಂ ತೆಂ ತೆಂಚ್ ನೆಣಾಂ ಆಸ್ಲ್ಲೆಂ! ಕಾರಾಣ್.....?
ಆಲಿಯಾಕ್ ಆನಿ ತಾಚ್ಯಾ ದೊಳ್ಯಾಂಕ್ ಹ್ಯಾ ವಗ್ತಾರ್ ಎಕಾ ವ್ಯಕ್ತಿಚಿ ರಾಕೊಣ್ ಆಸ್ಲ್ಲಿ!
ತೊ ವ್ಯಕ್ತಿ ಮಾತ್ರ್ ಅಜ಼ೂನ್ ಆಲಿಯಾಚಾ ದೊಳ್ಯಾಂಕ್ ದಿಸೊಂಕ್ ನಾತ್ಲ್ಲೊ. ತಾಚ್ಯೆ ಥಾವ್ನ್ ಕಾಂಯ್ ಖಬಾರ್ ಪಾಸೊನ್ ಎದೊಳ್ ತಾಕಾ ಯೇಂವ್ಕ್ ನಾತ್ಲ್ಲಿ.
ಆಪ್ಣಾಚೆಂ ಸೆಲ್ಪೋನ್ ಜೀವ್ ಆಸಾ? ಆಲಿಯಾಕ್ ಆಪ್ಲ್ಯಾ ಸೆಲ್ಪೋನಾಚೆರ್ ದುಬಾವ್ ಜಾಲೊ. ಎದೊಳ್ಚ್ ಸಭಾರ್ ಪಾವ್ಟಿಂ ತಾಣೆಂ ಆಪ್ಲ್ಯಾ ಸೆಲ್ಪೋನಾಕ್ ಹ್ಯಾಚ್ ದುಬಾವಾನ್ ಪಳವ್ನ್ ತೆಂ ಆನ್ ಆಸಾ ವಾ ನಾ ಮ್ಹಳ್ಳ್ಯಾಚಿ ಖಾತ್ರಿ ಕೆಲ್ಲಿ. ಸೆಲ್ಪೋನ್ ಆನ್ಚ್ ಆಸ್ಲ್ಲೆಂ. ಪುಣ್ ಆಪ್ಣಾಕ್ ಜಾಯ್ ಜಾಲ್ಲೊ ವ್ಯಕ್ತಿ ಮಾತ್ರ್ ಆಲಿಯಾಚಾ ದೊಳ್ಯಾಂಕ್ ದಿಸೊನ್ ಯೇಂವ್ಕ್ ನಾತ್ಲ್ಲ್ಯಾನ್ ತೆಂ ಪರ್ತ್ಯಾಕ್ ಪರ್ತ್ಯಾಕ್ ಆಪ್ಲ್ಯಾ ಸೆಲ್ಪೊನಾಚೆರ್ ದುಬಾವಾಚಿ ನದರ್ ಮಾರ್ತಾಲೆಂ.
ತಿತ್ಲ್ಯಾರ್!
"ಹಾಯ್!"
ಆಪ್ಣಾಚಾ ಪಾಟ್ಲ್ಯಾನ್ ಥಾವ್ನ್ ಆಲಿಯಾಕ್ ಪರಿಚಿತ್ ತಾಳೊ ಆಯ್ಕೊನ್ ಯೆತಾನಾ ತೆಂ ತಾಕಾ ಕಳಿತ್ ನಾತ್ಲೆಲ್ಯಾ ಪರಿಂಚ್ ಪಾಟಿಂ ಘುಂವ್ಲೆಂ.
ತಿತ್ಲೆಂಚ್!
ಆಲಿಯಾಚಿ ಮತ್ ಸಂತೊಸಾನ್ ಭರ್ಲಿ. ತಾಚ್ಯಾ ದಿಶ್ಟೆಂತ್ ಪ್ರಕಾಸ್ ಫಾಂಕ್ಲೊ.
ತೆಂ ರಾಕೊಣ್ ಆಸ್ಲ್ಲಿ ವ್ಯಕ್ತಿ ಹ್ಯಾ ವೆಳಾರ್ ತಾಚ್ಯಾ ಪಾಟ್ಲ್ಯಾನ್ ಹಾಜರ್ ಜಾಲ್ಲಿ! ತ್ಯಾಚ್ ದಾಟ್ ಕಾಳ್ಯಾ ಸುಟಾರ್!
"ವಿಶು ಕುಮಾರ್!" ಮತಿಂತ್ಚ್ ಉದ್ಗಾರ್ಲ್ಲೆಂ ಆಲಿಯಾ ಖುಶಿಯೆನ್ ಭರ್ಲೆಂ. ತಾಚ್ಯಾ ಕಾಳ್ಜಾಕ್ ಸಮಾಧಾನ್ ಭೊಗ್ಲೆಂ.
ಆಲಿಯಾನ್ ಆಪ್ಲ್ಯಾ ಜಿವಿತಾಂತ್ ಕೆದ್ನಾಂಚ್ ಕೊಣಾಚ್ಯಾಚ್ ಮಜತೆಕ್ ಹಾತ್ ವೊಡ್ಡಾಯಿಲ್ಲೊ ನಾ. ತೆಂ ಆಪ್ಲ್ಯಾ ಸ್ವ-ಭಳಾನ್ ಆಪ್ಲೆಂ ಜಿವಿತ್ ಕಾಡುನ್ ಆಯಿಲ್ಲೆಂ. ಆಸಲೆಂ ಆಲಿಯಾ ಆಜ್......?
ವ್ಹಯ್!
ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಆಲಿಯಾನ್ ಮಜತ್ ಮಾಗ್ಲೆಲಿ ಚಲ್ಯಾ ಜಾತ್ ಮ್ಹಳ್ಯಾರ್ ರಾಯನ್! ತ್ಯಾ ಉಪ್ರಾಂತ್ ಆತಾಂ ಹೊ ವಿಶು ಕುಮಾರ್!
ಖಂಯ್ಚಾ ಜಾತಿನ್ ಆಪ್ಣಾಕ್, ಆಪ್ಣೆಂ ಆಶೆಂವ್ಕ್ ನಾತ್ಲೆಲ್ಯಾ ಹ್ಯಾ ಪಾಂವ್ಡ್ಯಾ ಪಾಸೊನ್ ಪಾವಯ್ಲಾಂ ತ್ಯಾಚ್ ಜಾತಿಕ್ ಆಪ್ಣಾಚೆಂ ಭಳಾಧೀಕ್ ಹಾತೆರ್ ಕರುನ್ ಘೆವ್ನ್ ತ್ಯಾಚ್ ಜಾತಿಚ್ಯಾ ವಯ್ರ್ ಝುಜ್ ಮಾಂಡುಂಕ್ ಆಲಿಯಾನ್ ಯೆವ್ಜಿಲ್ಲೆಂ! ಚಲ್ಯಾ ಜಾತಿ ಮುಕಾರ್ ಹಿ ತಾಚಿ ಸಲ್ವಣ್ ನ್ಹಯ್ ಆಸ್ಲ್ಲಿ. ಚಲ್ಯಾ ಜಾತಿಕ್ ತಾಣೆಂ ಸಲ್ವಂವ್ಚಿ ಹಿ ತಾಚಿ ಚಾಲ್!
ಜಶೆಂ ಝುಜ್ ಜಿಕ್ಚ್ಯಾ ಖಾತಿರ್ ಏಕ್ ಝುಜಾರಿ ಆಪ್ಲ್ಯಾ ಜಯ್ತಾ ತೆವ್ಶಿಂ ಮಾತ್ರ್ ಪಳವ್ನ್ ತ್ಯಾ ಜಯ್ತಾಕ್ ಆಪ್ಣಾಂವ್ಕ್ ತ್ಯಾ ಝುಜಾಚಾ ಮಯ್ದಾನಾರ್ ಕಸಲಿಯ್ ಚಾಲ್ ಖೆಳೊಂಕ್ ಪಾಟಿಂ ಸರಾನಾ ತಶೆಂ!
ಆಲಿಯಾನ್ ತಾಚ್ಯಾ ಝುಜಾಚಿ ಪಯ್ಲಿ ಚಾಲ್, ಆಜ್ ಚಲೊಂಕ್ ತಯಾರಾಯ್ ಕೆಲ್ಲಿ!
ವಿಶು ಕುಮಾರಾ ತೆವ್ಶಿಂ ಪಾಟಿಂ ಘುಂವೊನ್ ಪಳೆಲ್ಲ್ಯಾ ಆಲಿಯಾನ್ ಅಚಾನಕ್ ಉದೆಲ್ಲ್ಯಾ ಅಪ್ಲ್ಯಾ ತೊಂಡಾ ವಯ್ಲ್ಯಾ ಬದ್ಲಾವಣೆಕ್ ಥಂಯ್ಚ್ ದಾಂಪುನ್ ವರುನ್ ಕಾಂಯ್ಚ್ ಜಾಯ್ನಾತ್ಲ್ಲ್ಯಾ ಪರಿಂ ವರ್ತನ್ ಕರುನ್ ಫಕತ್ತ್ ಆಪ್ಲ್ಯಾ ತೊಂಡಾರ್ ತಾಣೆಂ ಹಾಸೊ ಮಾತ್ರ್ ಹಾಡ್ಲ್ಯೊ.
ತಿತ್ಲ್ಯಾರ್!
ವಿಶು ಕುಮಾರ್ ಸಾವಂತಾ ತೆವ್ಶಿಂ ಚಮ್ಕಾತಾಲೊ. ತಾಣೆಂ ಆಲಿಯಾ ತೆವ್ಶಿಂ ಧ್ಯಾನ್ ದಿಲೆಂ ನಾ. ಹಾಚೆಂ ಕಾರಾಣ್ ಆಲಿಯಾ ಜಾಣಾಂ!
ಜರ್ ತರ್ ಸಾವಂತಾಕ್ ಆಪ್ಲ್ಯಾ ಆನಿ ವಿಶು ಕುಮಾರಾಚಾ ಮಧ್ಲ್ಯಾ ಸಂಭಂಧಾ ವಿಶಿಂ ಕಾಂಯ್ ದುಬಾವ್ ಉದೆಲ್ಯಾರ್......? ಆಶೆಂ ಜಾಂವ್ಕ್ ನಜೊ! ಆಲಿಯಾನ್ ವಿಶುಕ್ ಪಯ್ಲೆಂಚ್ ಜಾಗ್ರುತ್ಕಾಯ್ ದಿಲ್ಲಿ. ಖಂಯ್ ಪುಣಿಂ ಚುಕೊನ್ ಜಾಲ್ಯಾರ್ಯ್ ಹಿ ಖಬಾರ್ ರಾಯನಾಚಾ ಕಾನಾಂಕ್ ಪಡಾತ್ ಜಾಲ್ಯಾರ್ ಆಪ್ಣಾಚೆಂ ಝುಜ್ ಆರಂಭ್ ಜಾಂವ್ಚ್ಯಾ ಪಯ್ಲೆಂಚ್ ತ್ಯಾ ಝುಜಾಚ್ಯಾ ಮಯ್ದಾನಾಚಿ ಬುನ್ಯಾದ್ ಹಾಲೊಂಕ್ ಪಾವ್ತೆಲಿ. ತ್ಯಾ ಉಪ್ರಾಂತ್ ಆಪ್ಣಾಕ್ ಆಸಲೊ ದುಸ್ರೊ ಆವ್ಕಾಸ್ ಮೆಳ್ತಲೊ ಮ್ಹಳ್ಳೆಂ ಧಯ್ರ್ ಆಲಿಯಾಕ್ ನಾತ್ಲ್ಲೆಂ. ಕಿತ್ಯಾಕ್, ಆಲಿಯಾ ರಾಯನಾ ವಿಶಿಂ ಬರ್ಯಾನ್ ಜಾಣಾಂ! ಆಪ್ಣಾಚಾ ಫಾಯ್ದ್ಯಾ ಖಾತಿರ್ ಹೊ ರಾಯನ್ ಕಿತೆಂಯ್ ಕರುಂಕ್ ಸಕ್ತಾ!
ಆಲಿಯಾ ದೊನ್ಯ್ ಕುಶಿಂನಿ ಆಪ್ಲೊ ಖೆಳ್ ಖೆಳ್ತಾಲೆಂ!
ಎಕಾ ಕುಶಿಂನ್ ತೆಂ ರಾಯನಾಕ್ ಆಪ್ಣಾಚೆಂ ಭಳಾಧೀಕ್ ಹಾತ್ ಜಾವ್ನ್ ಆಪ್ಣಾಂವ್ಕ್ ಆಶೆತಾಲೆಂ ಜಾಲ್ಯಾರ್ ದುಸ್ರ್ಯಾ ಕುಶಿಕ್ ತ್ಯಾಚ್ ಹಾತಾಂತ್ ಹ್ಯಾ ವಿಶು ಕುಮಾರಾಕ್ ಆಪ್ಣಾಚೆಂ ಭಳಾಧೀಕ್ ಹಾತೆರ್ ಜಾವ್ನ್ ಆಪ್ಣಾಂವ್ಕ್ ಚಿಂತಾಲೆಂ. ಹ್ಯಾಚ್ ಖಾತಿರ್ ತೆಂ ಹಾಂಗಾ ಹ್ಯಾ ಆಪ್ಲ್ಯಾ ಹಾತಾ ಆನಿ ಹಾತೆರಾ ಮಧೆಂ ಆಪ್ಣಾಕ್ಚ್ ಶಾಭೀತ್ ದವರುಂಕ್ ಪ್ರಯತ್ನ್ ಕರ್ತಾಲೆಂ!
ಎಕಾಚ್ಚ್ ಕಾಮಾಂತ್ ತೀನ್ ವ್ಯಕ್ತಿ ಎಕಾಚ್ಚ್ ಉದ್ದೇಶಾಕ್ ಲಾಗೊನ್ ವಾವುರ್ತಾಲ್ಯೊ ಜಾಲ್ಯಾರ್ಯ್ ಭಿತರ್ಲ್ಯಾನ್ ಆಲಿಯಾ ಹ್ಯಾಚ್ ತೆಗಾಂ ಥಾವ್ನ್ ತೀನ್ ಉದ್ದೇಶ್ ಸಫಲ್ ಕರ್ಚ್ಯಾ ಎಕಾ ಕಾಮಾಂತ್ ಮೆತೆರ್ ಜಾಲ್ಲೆಂ!
ವಿಶು ಕುಮಾರ್ ಜಾಲ್ಯಾರ್ಯ್ ರಾಯನಾಕ್ ಬರ್ಯಾನ್ ಜಾಣಾಂ. ರಾಯನಾಕ್ ಹ್ಯಾ ಸಂಸಾರಾಚಾ ಸುಖಾಚಿ ಪರ್ವಾ ನಾತ್ಲ್ಲಿ. ತಾಕಾ ಫಕತ್ತ್ ಆಪ್ಲ್ಯಾ ಜಯ್ತಾಚಿ ಮಾತ್ರ್ ಪರ್ವಾ! ಆಶೆಂ ಆಸ್ತಾನಾ ರಾಯನಾಕ್ ಜಾಂವ್ ಸಾವಂತಾಕ್ ಜಾಂವ್ ಕಾಂಯ್ಚ್ ದುಬಾವ್ ಜಾಯ್ನಾತ್ಲ್ಲ್ಯಾ ಪರಿಂ ವಿಶು ಆಲಿಯಾಕ್ ಜಿಕ್ಚ್ಯಾ ಆಪ್ಲ್ಯಾ ಕಾಮಾಕ್ ಪೋಂತ್ ಪಾವಂವ್ಕ್ ಚಿಂತಾಲೊ. ತ್ಯಾ ಭಾಯ್ರ್ ಖಂಯ್ ತರ್ಯ್ ಆಪ್ಣಾಕ್ ಆನಿ ಆಲಿಯಾಕ್ ಹ್ಯಾ ಮೀಡಿಯಾನ್ ಸಾಂಗಾತಾ ಪಳೆಲೆಂ ಜಾಲ್ಯಾರ್ ಉಪ್ರಾಂತ್ ಮೀಡಿಯಾಚೆಂ ತೋಂಡ್ ದಾಂಪಂವ್ಕ್ ಕೊಣಾಯ್ಕ್ಯ್ ಸಾದ್ಯ್ ನಾತ್ಲ್ಲೆಂ. ಆಪುಣ್ ನವೊ ನವೊ ಕಾಜಾರಿ ಮ್ಹಣ್ತಾನಾ ಆಪ್ಲ್ಯಾ ಕಾಜಾರಿ ಜೀವನಾಕ್ ಹೆಂ ಆಲಿಯಾ ಕಾಂಯ್ಚ್ ಮಾರೆಕಾರ್ ಜಾಯ್ನಾತ್ಲ್ಲ್ಯಾ ಪರಿಂ ತಾಣೆಂ ಹ್ಯಾ ಮೀಡಿಯಾಕ್ ಸಾಂಬಾಳುಂಕ್ ಆಸ್ಲ್ಲೆಂ. ಹ್ಯಾಚ್ ಕಾರಾಣಾಕ್ ಲಾಗೊನ್ ವಿಶು ಕುಮಾರಾನ್ ಆಲಿಯಾ ತೆವ್ಶಿಂ ಧ್ಯಾನ್ ದೀನಾಸ್ತಾನಾ ನಿಟ್ಟ್ ಸಾವಂತಾ ತೆವ್ಶಿಂ ಆಪ್ಲಿಂ ಮೆಟಾಂ ಕಾಡ್ಲೆಲಿಂ.
"ಸಾವಂತ್......?" ಆಪ್ಲ್ಯಾ ಬೊಲ್ಸಾಂಕ್ ಹಾತ್ ಚೆಪ್ಲ್ಲೊ ವಿಶು, "ಅಜೂನ್ಯ್ ಸೆಟ್ ತಯಾರ್ ಜಾಂವ್ಕ್ ನಾ.....? ಟೂ ಸಿಟ್ಟರಾಕ್ ಹಾವೆಂ ತಯಾರ್ ಕೆಲಾಂ. ಪೈಲೆಟ್ ಮಾತ್ರ್ ಇಕ್ರಾ ವೊರಾಂಕ್ ಯೆತಲೊ!" ವಿಶು ಸಾವಂತಾಲಾಗಿಂ ಉಲವ್ನ್ ಆಸ್ಲ್ಲ್ಯಾಪರಿಂಚ್ ಸಾವಂತಾಚಾ ಕಾಮಾರ್ ಆಪ್ಲಿ ನದರ್ ಮಾರ್ತಾಲೊ.
"ಇಕ್ರಾ ವೊರಾಂಕ್.....?" ಸಾವಂತ್ ಹಾಂಕ್ರೆಲೊ. "ಇಕ್ರಾ ವೊರಾಂಕ್ ಹಾಂಗಾ ಖಂಡಾಪಟ್ಟೆ ವೋತ್. ಹ್ಯಾ ವೊತಾಕ್ ತ್ಯಾ ದೊಂಗ್ರಾ ತೆವ್ಶಿಂ ಕ್ಯಾಮರಾ ಘುಂವ್ಡಾಂವ್ಕ್ ಕಶ್ಟ್ ಮಾರ್ತೆಲೆ!" ಉಲಂವ್ಚೊ ಸಾವಂತ್ ತ್ಯಾ ಮುಡ್ಲಾ ಕುಶಿನ್ ದಿಸ್ಚ್ಯಾ ಪಾಚ್ವ್ಯಾ ಪಾಚ್ವ್ಯಾ ದೊಂಗ್ರಾಂ ತೆವ್ಶಿಂ ಘುಂವ್ಲೊ. ತಾಣೆಂ ಪಳೆಲ್ಲ್ಯಾ ದಿಶೆನ್ಚ್ ಪಯ್ಶಿಲಿ ಪೃಕೃತಿ ಸೊಭಿತ್ ದಿಸ್ತಾಲಿ. ತ್ಯಾಚ್ ಪೃಕೃತೆಕ್ ಆಪ್ಲ್ಯಾ ಹ್ಯಾ ದ್ರಶ್ಯಾಂತ್ ಕಯ್ದ್ ಕರುಂಕ್ ತಾಣೆಂ ಕ್ಯಾಮರಾಮ್ಯಾನಾಕ್ ಉಲೊ ದಿಲ್ಲೊ.
"ತುಂ ಪಯ್ಲೆಂಚ್ ಸಾರ್ಕೆಂ ಪ್ಲ್ಯಾನ್ ಕರ್ ಸಾವಂತ್! ಹಾಂಗಾ ಹಾಂಚೆಂ ಬಾಡೆಂ ಕಿತ್ಲೆಂ ಜಾತಾ ತೆಂ ತುಂ ಜಾಣಾಂಯ್? ಸಾಂಗ್ಲ್ಲ್ಯಾಪರಿಂ ಆನಿಕ್ಯ್ ಕಿತ್ಲೊ ವೇಳ್ ಲಾಗ್ತಲೊ?"
"ಸಗ್ಳೆಂ ರೆಡಿ ಆಸಾ ಫಕತ್ತ್ ಅರ್ಧೆಂ ವೋರ್!" ಸಾವಂತ್ ಆಪ್ಲ್ಯಾ ಮಾತ್ಯಾ ವಯ್ಲ್ಯಾ ಫೆಲ್ಟ್ ಹ್ಯಾಟಾಕ್ ಘುಂವ್ಡಾಯಿತ್ತ್ ಉಲಯ್ಲೊ.
"ಬರೆಂ ತರ್! ಹಾಂವ್ ಭಿತರ್ ಆಸಾಂ!" ವಿಶು ಕುಮಾರ್ ಆತಾಂ ಪಾಟಿಂ ಚಲ್ಲೊ.
ತಿತ್ಲ್ಯಾರ್, ಆಪ್ಣಾಕ್ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್, ತೊ ಪರ್ತ್ಯಾಕ್ ಸಾವಂತಾ ತೆವ್ಶಿಂ ಘುಂವ್ಲೊ.
"ತುವೆಂ ಉಸ್ಮಾನಾಕ್ ಪೋನ್ ಕೆಲ್ಲೆಂಯ್? ಸೆಟ್ಟಾಚೆಂ ಕಿತೆಂ ಜಾಲಾಂ.....? ಮುಂಬಯಿ ಪಾವ್ತಾನಾ ತೆಂ ರೆಡಿ ಆಸೊಂಕ್ ಜಾಯ್! ರಾಯನಾಕ್ ಹೊ ಪ್ರಾಜೆಕ್ಟ್ ವೆಗಿಂಚ್ ಕಾಬಾರ್ ಕರಂವ್ಕ್ ಜಾಯ್ ಖಂಯ್. ತಾಣೆಂ ಮ್ಹಾಕಾ ಪೋನ್ ಕೆಲ್ಲೆಂ!"
"ಹಾಂವ್ ಚತುರ್ವೇದಿಕ್ ಹ್ಯಾ ಹಪ್ತ್ಯಾಕ್ ಮುಂಬಯಿ ದಾಡ್ತಾಂ! ಮ್ಹಾಕಾ ದಿಸ್ತಾ ತೊ ಸ್ಟೂಡಿಯೊಂತ್ ಹಾಜರ್ ಆಸ್ಲ್ಯಾರ್ ಬರೆಂ. ತಾಚಿ ಆರ್ಟಿಸ್ಟಿಕ್ ಕ್ವಾಲಿಟಿ ಬರಿ ಆಸಾ!" ಸಾವಂತಾನ್ ಆಪ್ಲ್ಯಾ ಮಾತ್ಯಾ ವಯ್ಲ್ಯಾ ಹ್ಯಾಟಾಕ್ ದಾವ್ಯಾ ಹಾತಿಂ ಕಾಡುನ್ ಉಜ್ವ್ಯಾ ಹಾತಾನ್ ತ್ಯಾ ತಾಚ್ಯಾ ಮಾತ್ಯಾ ವಯ್ಲ್ಯಾ ಪಾತಳ್ ಕೆಸಾಂ ಮಧೆಂ ಬೊಟಾಂ ಚರಯ್ಲಿಂ.
"ಆನಿ ತೊ ಅನುರಾಗ್.....?" ವಿಶು ಕುಮಾರಾಕ್ ಸಾವಂತಾಚ್ಯಾ ಜವಾಬೆ ಥಾವ್ನ್ ತೃಪ್ತಿ ಲಾಭ್ಲ್ಲಿ.
"ಅನುರಾಗನ್ ಮ್ಹಾಕಾ ಕಾಲ್ಚ್ ಪೋನ್ ಕೆಲ್ಲೆಂ! ತೊ ಮ್ಹಣ್ತಾ ಗೊವಾ ನಾಕಾ ಖಂಯ್! ಆಮ್ಚ್ಯಾ ಸ್ಕ್ರಿಪ್ಟಾಕ್ ಅಮಿಂ ಪ್ರೆಸೆಂಟ್ ಕರ್ಚ್ಯಾ ತಸಲೆ ಸ್ಪಾಟ್ ತಾಕಾ ದಿಯು ಆನಿ ದಾಮನಾಂತ್ ಲಾಭ್ಲ್ಯಾತ್ ಮ್ಹಣ್ತಾಲೊ. ಫಾಲ್ಯಾಂ ಪೊರ್ವಾಂ ತಿತ್ಲ್ಯಾಕ್ ತೊ ಪಂಜಾಬಾಕ್ ವಚೊಂಕ್ ಪುರೊ. ಪಂಜಾಬಾಚೆ ಥೊಡೆ ರಿಮೋಟ್ ಸ್ಪಾಟ್ ಆಮ್ಕಾಂ ಜಾಯ್. ಜಶೆಂ ಪಯ್ಶಿಲ್ಯಾ ಪಾಚ್ವ್ಯಾ ಗುಡ್ಯಾರ್ ನಿರ್ಗತಿಕ್ ಜಾವ್ನ್ ಉಭೊ ಆಸ್ಲ್ಲೊ ಮೊರೊನ್ ಗೆಲ್ಲೊ ರೂಕ್! ಭಂವ್ತಣಿಚ್ಯಾ ಪಾಚ್ವ್ಯಾಪಣಾಂತ್ ಹ್ಯಾ ಮೊರೊನ್ ಗೆಲ್ಲ್ಯಾ ರುಕಾ ಥಾವ್ನ್ ಹಾಂವ್ ಸ್ಟ್ರಾಂಗ್ ಮೆಸೇಜ್ ದಾಕಂವ್ಕ್ ಸೊಧ್ತಾಂ!" ಸಾವಂತ್ ಆಪ್ಣಾ ಮುಕ್ಲ್ಯಾ ತ್ಯಾ ಪಯ್ಶಿಲ್ಯಾ ದೊಂಗ್ರಾಕ್ಚ್ ಪಳೆತಾಲೊ.
"ಅನುರಾಗ್ ಇಸ್ ದಿ ಬೆಸ್ಟ್ ಚಾಯ್ಸ್!" ವಿಶು ಕುಮಾರ್ ಅನುರಾಗಾನ್ ಸೆಲೆಕ್ಟ್ ಕರ್ಚ್ಯಾ ಚಿತ್ರೀಕರಣಾಚಾ ಸ್ಪಾಟಾಂ ವಿಶಿಂ ಹ್ಯಾ ಆದಿಂ ಜಾಣಾಂ.
ಆಪ್ಲ್ಯಾ ಬಸ್ಕೆರ್ ಬಸ್ಲೆಲೆಂ ಆಲಿಯಾ ವಿಶು ಕುಮಾರಾಚೆಂ ಆನಿ ಸಾವಂತಾಚೆಂ ಉಲೊಣೆಂ ಆಯ್ಕಾತಾಲೆಂ. ಎಕಾ ಫಿಲ್ಮಾ ಖಾತಿರ್ ಕಿತ್ಲೆ ತ್ರಾಸ್ ಕಾಡುಂಕ್ ಆಸಾತ್ ಮ್ಹಳ್ಳೆಂ ತೆಂ ಆಲಿಯಾಕ್ ತೆಂ ಹ್ಯಾ ಬಾಲಿವುಡಾಕ್ ಆಯ್ಲ್ಯಾ ಉಪ್ರಾಂತ್ಚ್ ಸಮ್ಜಾಲ್ಲೆಂ.
"ಬರೆಂ.....! ಸಗ್ಳೆಂ ರೆಡಿ ಕರುನ್ ದವರ್! ಪೈಲೆಟ್ ಆಯಿಲ್ಲೊಚ್ ಹಾಂವ್ ತುಕಾ ಆಪಯ್ತಾ!" ವಿಶು ಕುಮಾರ್ ಪಾಟಿಂ ಪರ್ತಾಲೊ.
ತಿತ್ಲೆಂಚ್!
"ಎಕ್ಸ್ಕ್ಯೂಜ್ ಮಿ!" ಆಲಿಯಾ ವಿಶು ಕುಮಾರಾ ತೆವ್ಶಿಂ ಘುಂವ್ಲೆಂ. ವಿಶು ಕುಮಾರ್ ಹಾಂಗಾ ಥಾವ್ನ್ ಭಿತರ್ ಗೆಲೊ ಜಾಲ್ಯಾರ್ ಪರ್ತ್ಯಾಕ್ ತೊ ಆಪ್ಣಾಕ್ ಮೆಳ್ಚೊ ನಾ ತೆಂ ತಾಕಾ ಕಳಿತ್ ಆಸ್ಲ್ಲೆಂ. ಆಶೆಂ ಜಾಂವ್ಚ್ಯಾ ಪಯ್ಲೆಂ ತಾಣೆಂ ಆಪ್ಲಿ ಚಾಲ್ ಚಲೊಂಕ್ ಆಸ್ಲ್ಲಿ.
"ಎಸ್!"
"ಇಫ್ ಯು ಡೋಂಟ್ ಮೈಂಡ್ ಹಾಂವ್ಯ್ ಭಿತರ್ ಯೇಂವ್ಕ್ ಸಕ್ತಾಂ?" ಆಲಿಯಾಚೆ ದೊಳೆ ಆಪ್ಲ್ಯಾ ಮಾದಕ್ ದೃಶ್ಟೆಂತ್ ವಿಶು ಕುಮಾರಾಚಾ ದೊಳ್ಯಾಂ ನದ್ರೆಕ್ ದುಸ್ರ್ಯಾಚ್ ಎಕಾ ಸಂಸಾರಾಕ್ ವೊಡುನ್ ವೊರ್ತಾಲೆ.
"ಕಿತ್ಯಾಕ್?" ವಿಶುಚ್ಯಾ ತೊಂಡಾರ್ ಆಶ್ಚರ್ಯಾಚಿಂ ಭಾವನಾಂ ಉದೆಲಿಂ.
"ಆಶೆಂಚ್..... ಪಳಂವ್ಕ್!"
"ಪರ್ಮಿಶನ್ ಆಸಾ....?"
"ತುಂ ದಿವಯ್ತಾಯ್ ಜಾಲ್ಯಾರ್.....!" ಆಲಿಯಾ ಹಾಸ್ಲೆಂ.
"ಊಂ..... ಓ.ಕೆ.!"
ಆಲಿಯಾ ಆತಾಂ ವಿಶು ಕುಮಾರಾ ತೆವ್ಶಿಂ ಚಮ್ಕಾಲೆಂ.
ಸಾವಂತಾಚಾ ಮುಕಾರ್ ಆಲಿಯಾನ್ ಹೆಂ ಫಕತ್ತ್ ನಟನ್ ಕೆಲ್ಲೆಂ ಮಾತ್ರ್. ಕಾಲ್ಚ್ಯಾ ರಾತಿಕ್ ವಿಶು ಕುಮಾರ್ ಆಲಿಯಾಕ್ ಮೆಳೊಂಕ್ ತಾಚ್ಯಾ ಹೊಟೆಲಾಕ್ ಆಯಿಲ್ಲ್ಯಾ ವೆಳಾರ್ ಹ್ಯಾ ವಿಶಿ ತೆಂ ವಿಶು ಲಾಗಿಂ ಉಲಯಿಲ್ಲೆಂ.
"ತುಂ ಆಪ್ಣಾಚೆಂ ಕಾಮ್ ಕರ್! ಹಾಂವ್ ತುಜೆಂ ಕಾಮ್ ಕರ್ತಾಂ!" ಆಲಿಯನ್ ಸಾಂಗ್ತಾನಾ ವಿಶು ಕುಮಾರ್ ಒಪ್ವಾಲ್ಲೊ. ವಿಶು ಕುಮಾರಾಕ್ ಜಾಯ್ ಜಾಲ್ಲೆಂ ಆಲಿಯಾಲಾಗಿಂ ಆಸ್ಲ್ಲೆಂ. ಆಲಿಯಾಕ್ ಜಾಯ್ ಆಸ್ಲ್ಲೆಂ ವಿಶು ಕುಮಾರ್ ಕರುಂಕ್ ಸಕ್ತಾ ಮ್ಹಳ್ಳೊ ಭರ್ವಸೊ ಆಲಿಯಾಕ್ ಆಸ್ಲ್ಲೊ.
"ಕೋಆಪರೇಟ್!" ವಿಶುಕುಮಾರಾನ್ ಹಾಸೊನ್ ಸಾಂಗ್ತಾನಾ ಆಲಿಯಾಯ್ ಹಾಸ್ಲ್ಲೆಂ.
ಫಿಲ್ಮಾಚಾ ನಿಬಾನ್ ಆಲಿಯಾ ಆಪ್ಣಾ ಸವೆಂ ಕೋ ಆಪರೇಟ್ ಕರ್ತೆಲೆಂ ಮ್ಹಳ್ಳೊ ವಿಶ್ವಾಸ್ ವಿಶು ಕುಮಾರಾಕ್ ನಾತ್ಲ್ಲೊ. ಕಾರಾಣ್, ಫಿಲ್ಮಾಂತ್ ಸಾಟ್ ಪರ್ಸಂಟ್ ಇನ್ವೆಸ್ಟ್ಮೆಂಟ್ ರಾಯನಾಚೆಂ. ತ್ಯಾ ಶಿವಾಯ್ ಆಲಿಯಾಕ್ ರಾಯನಾನ್ಚ್ ಫಿಲ್ಮಾಕ್ ದೆಂವಯಿಲ್ಲೆಂ.
"ಆಪ್ಣಾಕ್ ಫಕತ್ತ್ ಏಕ್ ಪಾವ್ಟಿಂ ಜನರಲಾಚಾ ಮುಕಾರ್ ಉಭೆಂ ಕರಯ್!" ಆಲಿಯಾನ್ ವಿಶು ಕುಮಾರಾ ಲಾಗಿಂ ಇತ್ಲೆಂಚ್ ಮಾಗ್ಲ್ಲೆಂ. ಆಪ್ಣಾಚೆಂ ಹೆಂ ಮಾಗ್ಣೆಂ ಕಿತ್ಯಾಕ್ ಆನಿ ಕಶೆಂ ಮ್ಹಳ್ಳ್ಯಾ ವಿಶಯಾಕ್ ಆಲಿಯಾನ್ ಗುಪ್ತ್ ದವರ್ಲ್ಲೊ. ವಿಶು ಕುಮಾರಾಕ್ ಜಾಲ್ಯಾರ್ಯ್ ಹೊ ವಿಶಯ್ ಜಾಣಾಂ ಜಾವ್ನ್ ಕಾಂಯ್ ಜಾಂವ್ಚೆಂ ನಾತ್ಲ್ಲೆಂ. ತಾಕಾ ಫಕತ್ತ್ ತಾಣೆಂ ಆಶೆಂವ್ಚೆಂ ಕೋ ಆಪರೇಶನ್ ಆಲಿಯಾ ಥಾವ್ನ್ ಮೆಳ್ಳ್ಯಾರ್ ಪುರೊ ಆಸ್ಲ್ಲೆಂ.
ಆಲಿಯಾಕ್ ಏರ್ಬೇಸ್ ದಾಖಂವ್ಚ್ಯಾ ನಿಬಾನ್ ವಿಶುಕುಮಾರ್ ಡೈರೆಕ್ಟರ್ ಜನರಲ್ ಜಗ್ಜೀತ್ ಸಿಂಗಾಚಾ ಆಫೀಸಾಕ್ ಆಪವ್ನ್ ವರುನ್ ಗೆಲೊ.
"ಡೈರೆಕ್ಟರ್ ಜನರಲ್ ಜಗ್ಜೀತ್ ಸಿಂಗ್!"
ಏರ್ಬೇಸಾಚಾ ಡೈರೆಕ್ಟರಾಚಾ ಆಫೀಸಾ ತೆವ್ಶಿಂ ವಿಶು ಕುಮಾರಾ ಸವೆಂ ಮೆಟಾಂ ಕಾಡ್ಲ್ಲ್ಯಾ ಆಲಿಯಾನ್ ಡೈರೆಕ್ಟರಾಚಾ ಆಫೀಸಾಚಾ ಭಾಯ್ರ್ ತ್ಯಾ ಆಫೀಸಾಚಾ ದಾರಾರ್ ಡೈರೆಕ್ಟರಾಚೆಂ ನಾಂವ್ ಬರಯಿಲ್ಲೊ ಬೋರ್ಡ್ ವಾಚ್ಲೊ.
ತಿತ್ಲೆಂಚ್!
ಎಕಾಚ್ಚ್ ಫರಾ ಆಲಿಯಾಚಾ ದೊಳ್ಯಾಂ ಮುಕಾರ್ ಜಗ್ಲಾಣೆಂ ಧಾಂವ್ಲ್ಲ್ಯಾ ಪರಿಂ ತಾಕಾ ಜಾಲೆಂ. ಕಾಲ್ಚ್ಯಾ ರಾತಿಕ್ ಆಪ್ಲಿ ನೀದ್ ಖಳೊನ್ ತಾಣೆಂ ಕೆಲ್ಲೆಂ ಸಗ್ಳೆಂ ಪ್ಲ್ಯಾನ್ ಉದ್ಕಾಂತ್ ವ್ಹಾಳೊನ್ ಗೆಲ್ಲ್ಯಾ ಪರಿಂ ಜಾಲೆಂ. ಕಾಲ್ಚ್ಯಾ ರಾತಿಕ್ ಆಯ್ಚ್ಯಾ ತಾಚ್ಯಾ ತಾಣೆಂ ದೀಂವ್ಕ್ ಆಸ್ಚ್ಯಾ ಫಾರಿಕ್ಪಣಾಕ್ ಚಿಂತುನ್ ತಾಣೆಂ ಕಿತ್ಲೊ ವೇಳ್ ಆಪ್ಲ್ಯಾ ದೊಳ್ಯಾಂಚಿ ನೀದ್ ಫಾರ್ಲ್ಲಿ ನಾ? ಚಿಂತ್ನಾಂನಿ ತಾಕಾ ಥಕಯ್ತಾನಾ ಮಾತ್ರ್ ಆಲಿಯಾಚಾ ದೊಳ್ಯಾಂಕ್ ನೀದ್ ಆಯಿಲ್ಲಿ. ಪುಣ್ ಆತಾಂ?
ಸಗ್ಳೆಂಚ್ ಉದ್ಕಾಂತ್! ಎಕಾಚ್ಚ್ ಖಿಣಾ ಭಿತರ್ ಸಗ್ಳೆಂ ಉದ್ಕಾಂತ್!
ಹಾಂಗಾಸರ್ ಡೈರೆಕ್ಟರ್ ಜನರಲ್ಚ್ ಬದ್ಲಾಲ್ಲೊ!
ಹೊ ಆತಾಂಚೊ ಡೈರೆಕ್ಟರ್ ತೊ ಆದ್ಲೊ ಡೈರೆಕ್ಟರ್ ಜನರಲ್ ನ್ಹಯ್! ತಾಚೆಂ ಟ್ರಾನ್ಸ್ಫರ್ ಜಾಲ್ಲೆಂ. ಆನಿ ಆಲಿಯಾ ಆಪ್ಲ್ಯಾ ಫಾರಿಕ್ಪಣಾಚಾ ವಾಟೆರ್ ಫಸ್ಲ್ಲೆಂ!
ತರ್ ಕ್ಯಾಪ್ಟನ್ ರಾಣಾ.....? ಆಲಿಯಾಚಿಂ ಚಿಂತ್ನಾಂ ಕ್ಯಾಪ್ಟನಾಕ್ ಚಿಂತುಂಕ್ ಲಾಗ್ಲಿಂ.
ತೊ ತರ್ಯ್ ಆಸ್ಲ್ಯಾರ್ ಪುರೊ! ಆಲಿಯಾ ಆಶೆಲೆಂ.
ಕ್ಯಾಪ್ಟನ್ ಖಂಯ್ ವೆತಲೊ? ತೊ ಹಾಂಗಾಚ್ ಆಸ್ತಲೊ. ತಾಚ್ಯಾ ಮತಿಕ್ ತಾಣೆಂಚ್ ಭರ್ವಸೊ ಹಾಡಯ್ಲೊ. ಹ್ಯಾ ಭರ್ವಸ್ಯಾ ಸವೆಂ ತೆಂ ವಿಶು ಕುಮಾರಾ ಸವೆಂ ಡೈರೆಕ್ಟರಾಚಾ ಅಫೀಸಾ ಭಿತರ್ ರಿಗ್ಲೆಂ.
ಆಲಿಯಾಚಿ ಮತ್ ವಾರ್ಯಾ ವೇಗಾನ್ ಚಿಂತಾಲಿ. ಆಪುಣ್ ಆತಾಂ ಕಿತೆಂ ಕರುಂ? ಕಿತೆಂ ಕರುಂ?
ತಿತ್ಲ್ಯಾರ್!
’ಸಟ್ಟ್’ ಕರುನ್ ಆಲಿಯಾಚಾ ಮತಿಂತ್ ಏಕ್ ಉಪಾಯ್ ಝಳ್ಕಾಲೊ.
ತಿತ್ಲೆಂಚ್!
ಆಪ್ಲ್ಯಾ ಮತಿಂತ್ ಝಳ್ಕಾಲ್ಲ್ಯಾ ಉಪಾಯಾಕ್ ತಾಣೆಂ ಕಾರ್ಯಾರುಪಾಕ್ ದೆಂವೊಂಕ್ ಚಿಂತ್ಲೆಂ. ಹ್ಯಾ ವಗ್ತಾರ್ ಆಲಿಯಾಚಾ ಮುಕಾರ್ ದುಸ್ರಿ ವಾಟ್ ನಾತ್ಲ್ಲಿ. ಆಪ್ಣಾಕ್ ಲಾಭ್ಲ್ಲ್ಯಾ ಹ್ಯಾ ಆವ್ಕಾಸಾಕ್ ತಾಣೆಂ ಕಶೆಂ ತರ್ಯ್ ಆಪ್ಣಾಕ್ ಫಾಯ್ದೊ ಜಾಂವ್ಚ್ಯಾ ಪರಿಂ ಆಪ್ಣಾಚೊ ಕರುನ್ ಘೆಮ್ವ್ಕ್ ಜಾಯ್ ಆಸ್ಲ್ಲೊ. ತಾಣೆಂ ಆಪ್ಲ್ಯಾ ಮುಖಮಳಾರ್ ಹಾಸೊ ಹಾಡ್ಲ್ಯೊ ಆನಿ ತೆಂ ಡೈರೆಕ್ಟರಾಚಾ ಮುಕಾರ್ ಆಪ್ಣಾಕ್ಚ್ ಪ್ರಸ್ತುತ್ ಕರುಂಕ್ ತಯಾರ್ ಜಾಲೆಂ.
ಬಾಲಿವುಡಾಚಾ ಹೀರೋಯಿನಾಕ್ ಆಪ್ಲ್ಯಾ ಆಫೀಸಾಂತ್ ಪಳೆಲ್ಲೊ ಜಗ್ಜೀತ್ ಸಗ್ಳೊಚ್ ಸಂತೊಸಾನ್ ಭರ್ಲೊ. ಡೈರೆಕ್ಟರಾಚಾ ಹ್ಯಾ ಸಂತೊಸಾಕ್ಚ್ ಆಪ್ಣಾಚೆ ಆಯುಧ್ ಜಾವ್ನ್ ಹಾತಿಂ ಘೆಂವ್ಕ್ ಆಲಿಯಾನ್ ಚಿಂತ್ಲೆಂ. ತೆಂ ಆತಾಂ ಜಗ್ಜೀತಾಚಾ ಮುಕಾರ್ ಜಗ್ಜೀತಾಕ್ಚ್ ಜಾಯ್ ಆಸ್ಲ್ಲ್ಯಾಪರಿಂ ಉಭೆಂ ಜಾವ್ನ್ ಡೈರೆಕ್ಟರಾಚೆಂ ಮನ್ ಭುಲಂವ್ಕ್ ತಯಾರ್ ಜಾಲೆಂ.
ಆಲಿಯಾಚಾ ಮಾದಕ್ ಹಾಸ್ಯಾಂ ಮುಕಾರ್ ಆನಿ ಎದೊಳ್ಚ್ ತಾಚ್ಯಾ ಮಾತ್ಯಾರ್ ಛಾಪ್ಲ್ಲ್ಯಾ ಬಾಲಿವುಡಾಚೆಂ ಹೀರೋಯಿನ್ ಮ್ಹಳ್ಳ್ಯಾ ಬಿಲ್ಲ್ಯಾ ಥಾವ್ನ್ ಡೈರೆಕ್ಟರ್ ಖುಶಿಯೆನ್ ಫುಲ್ಲೊ! ಬಾಲಿವುಡಾಚೆಂ ಹೀರೋಯಿನ್ ಆಪ್ಣಾಚಾ ಆಫೀಸಾಂತ್ ಆಪ್ಣಾ ಮುಕಾರ್....? ಡೈರೆಕ್ಟರಾಕ್ ಪಾತ್ಯೆಂವ್ಕ್ಚ್ ಜಾಲೆಂ ನಾ.
ಜಗ್ಜೀತಾನ್ ಕಾಫಿಕ್ ಆರ್ಡರ್ ಕೆಲೆಂ!
ಕಾಫಿ ಪಿಯೆತಾನಾ ತೆಗಾಂಯ್ ಮಧೆಂ ಬೆಶ್ಟ್ಯೊ ಖಬ್ರೊ ಚಲ್ಲ್ಯೊ.
ಆಲಿಯಾನ್ ಪಂಜಾಬಾಕ್ ಪುಗಾರ್ಲೆಂ. ತಾಕಾ ಜಗ್ಜೀತಾಕ್ ಭಾರಿಚ್ಚ್ ಖುಶ್ ಕರುಂಕ್ ಜಾಯ್ ಆಸ್ಲ್ಲೆಂ. ಜಿತ್ಲೆಂ ಡೈರೆಕ್ಟರ್ ಆಪ್ಣಾ ಥಾವ್ನ್ ಖುಶ್ ಜಾತಾ ತಿತ್ಲೆಂ ಆಪ್ಣಾಚ್ಯಾ ಫಾರಿಕ್ಪಣಾಚೆಂ ಹೆಂ ನವೆಂ ಪ್ಲ್ಯಾನ್ ಜಯ್ತಾ ತೆವ್ಶಿಂ ಪಾವ್ತೆಲೆಂ. ನಾ ಜಾಲ್ಯಾರ್.....?
ಆಪ್ಣಾಕ್ ಪಂಜಾಬ್ ಪಳಂವ್ಕ್ ಜಾಯ್ ಆಸ್ಚಿ ಆಶಾ ಡೈರೆಕ್ಟರಾ ಮುಕಾರ್ ಆಲಿಯಾನ್ ಪರ್ಗಟ್ ಕೆಲಿ. ಪಂಜಾಬಾಚಾ ಗೊಂವಾಕ್ ಆನಿ ಸಾಕ್ರಿಕ್ ಆಲಿಯಾನ್ ಪುಗಾರ್ಲೆಂ.
ಆಲಿಯಾಚೊ ಮತ್ಲಾಬ್ ಫಕತ್ತ್ ಡೈರೆಕ್ಟರಾಚಾ ವಳ್ಕೆಚೊ ಮಾತ್ರ್! ಕಶೆಂಯ್ ಕರುನ್ ಹ್ಯಾ ಡೈರೆಕ್ಟರಾಕ್ ಆಪ್ಲ್ಯಾ ಹಾತಿಂತ್ ಧರ್ಲ್ಯಾರ್ ಉಪ್ರಾಂತ್ ಕ್ಯಾಪ್ಟನಾಕ್.... ಆಲಿಯಾ ಫುಡಾರಾಚೆಂ ಆಪ್ಲೆಂ ಜಯ್ತ್ ಚಿಂತುನ್ ಹಾಸ್ಲೆಂ.
ಆಲಿಯಾನ್ ತಾಕಾ ಆನಿ ಹ್ಯಾ ಏರ್ಬೇಸಾಕ್ ಸಂಭಂಧ್ ಆಸ್ಲ್ಲ್ಯಾ ವಿಶಿಂ ಕಾಂಯ್ ಪ್ರಸ್ತಾಪ್ ಕಾಡ್ಲೊ ನಾ. ತಶೆಂ ಆಲಿಯಾಕ್ ವಳಕ್ ಧರುನ್ ಉಲಂವ್ಚಿಂಯ್ ಹಾಂಗಾ ಕೊಣ್ಯ್ ಝಳ್ಕಾಲಿಂ ನಾಂತ್.
ಆಲಿಯಾ ಆತಾಂ ಜನರಲಾಕ್ ಆಪ್ಣಾಚ್ಯಾ ಲಾಗಿಂ ಕರುಂಕ್ ಆಶೆಲೆಂ. ತಾಚ್ಯಾ ಮುಕಾರ್ ಆಜ್ ಹ್ಯಾ ಘಡಿಯೆರ್ ಉದೆವ್ನ್ ಆಯಿಲ್ಲ್ಯಾ ಹ್ಯಾ ಎಕಾಚ್ ಎಕಾ ಆವ್ಕಾಸಾಕ್ ಬರ್ಪೂರ್ ಉಪ್ಯೋಗ್ ಕರುಂಕ್ ತಾಣೆಂ ಚಿಂತ್ಲೆಂ.
ತಿತ್ಲೆಂಚ್!
ಆಲಿಯಾ ನವ್ಯಾನ್ ಕಾರ್ಯಾಕ್ ದೆಂವ್ಲೆಂ!
"ತುಮ್ಕಾಂ ಪಳೆಲ್ಲೊ ಮ್ಹಾಕಾ ಉಡಾಸ್ ನಾ. ಪುಣ್ ತುಮ್ಚೆಂ ನಾಂವ್ ಆಯ್ಕಾಲಾಂ ಹಾವೆಂ. ಪುಣ್ ಖಂಯ್ಚರ್ ಮ್ಹಳ್ಳೆಂ ತೆಂ ಕಳಾನಾ!" ಆಲಿಯಾನ್ ಆಶಿಂಚ್ ಉತ್ರಾಂ ವಿಂಚ್ಲಿಂ. ತೆಂ ಜಾಣಾಂ ಹ್ಯಾ ಡೈರೆಕ್ಟರಾಕ್ ಹ್ಯಾ ಆದಿಂ ತಾಣೆಂ ಖಂಯ್ಚರ್ಯ್ ಪಳೆಲ್ಲೆಂ ನಾ.
"ಪಾಟ್ಲ್ಯಾ ದೋನ್ ವರ್ಸಾಂ ಪಯ್ಲೆಂ ಆಸ್ತೆಲೆಂ!" ಖುಶಿ ಜಾಲ್ಲ್ಯಾ ಪರಿಂ ವರ್ತನ್ ಕೆಲ್ಲೊ ಡೈರೆಕ್ಟರ್ ’ಸಟ್ಟ್’ ಕರುನ್ ಉಲಯ್ಲೊ.
"ಆಂ......!" ಆಲಿಯಾ ಆತಾಂ ಚಿಂತುಂಕ್ ಪಡ್ಲೆಂ. ತಾಣೆಂ ಉಡಯಿಲ್ಲೊ ಫಾತರ್ ಸಾರ್ಕ್ಯಾ ಜಾಗ್ಯಾರ್ಚ್ ಲಾಗ್ಲ್ಲೊ. ಪುಣ್ ಹ್ಯಾ ಮುಕಾರ್...? ಆತಾಂ ಹ್ಯಾ ಡೈರೆಕ್ಟರಾಕ್ ಕಿತೆಂ ಜವಾಬ್ ದೀಂವ್?
"ಇಂಡಿಯನ್ ಎಕ್ಸ್ಪ್ರೆಸ್ ನಿವ್ಸ್ ಪೇಪರಾರ್ ಆಸ್ತೆಲೆಂ!" ಆಲಿಯಾ ಚಿಂತುಂಕ್ ಪಡ್ಲ್ಲೆಂ ಪಳವ್ನ್ ಡೈರೆಕ್ಟರಾನ್ಚ್ ಹಾಸೊನ್ ಸಾಂಗ್ಲೆಂ. ತೊ ಆತಾಂ ಖುಶ್ ಜಾಲ್ಲ್ಯಾ ಪರಿಂ ದಿಸ್ಲೊ." ಮ್ಹಾಕಾ ಆವಾರ್ಡ್ ಮ್ಹೆಳ್ಲ್ಲೊ! ಏರ್ ಇಂಡಿಯಾ ಥಾವ್ನ್ ಮ್ಹಾಕಾ ಹಾನರ್ ಕೆಲ್ಲೊ! ತಾಚಿ ಫೋಟೊ ನಿವ್ಸ್ ಪೇಪರಾರ್ ಆಯಿಲ್ಲಿ!"
ಉಲಂವ್ಚೊ ಡೈರೆಕ್ಟರ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ. ತಾಚ್ಯಾ ಪಾಟ್ಲ್ಯಾ ವೊಣೊದಿಕ್ ತೆಂಕೊನ್ ಆಸ್ಲ್ಲ್ಯಾ ಎಕಾ ಲಾಕರಾಕ್ ಉಗ್ತೆಂ ಕರುನ್ ತ್ಯಾ ಲಾಕರಾ ಭಿತರ್ ಆಸ್ಲ್ಲೆಂ ಏಕ್ ಪರ್ನೆಂ ನಿವ್ಸ್ ಪೇಪರ್ ಕಾಡುನ್ ತಾಣೆಂ ತೆಂ ಆಲಿಯಾಚಾ ಮುಕಾರ್ ದವರ್ಲೆಂ.
"ಹೆಂ ಪಳೆಯಾ!"
ಆಲಿಯಾನ್ ತೆಂ ನಿವ್ಸ್ ಪೇಪರ್ ಆಪ್ಲ್ಯಾ ಹಾತಿಂ ಘೆತ್ಲೆಂ. ಆಲಿಯಾಚಾ ಬಗ್ಲೆಕ್ ಬಸೊನ್ ಆಸ್ಲ್ಲೊ ವಿಶು ಕುಮಾರ್ ತಶೆಂಚ್ ಬಾಗೊನ್ ತ್ಯಾ ಪೇಪರಾಕ್ ಪಳಂವ್ಕ್ ಲಾಗ್ಲೊ. ತಾಣೆಂ ಆಲಿಯಾಕ್ ತಾಚ್ಯಾ ಆಶೆ ಪರ್ಮಾಣೆ ಡೈರೆಕ್ಟರಾಕ್ ಮೆಳಯಿಲ್ಲೆಂ. ಪುಣ್ ಹ್ಯಾ ಆಲಿಯಾಚಾ ಆಶೆ ಪಾಟ್ಲ್ಯಾನ್ ಆಲಿಯಾಚೊ ಮತ್ಲಾಬ್ ಕಿತೆಂ ಮ್ಹಳ್ಳೆಂ ತೆಂ ಅಜೂನ್ ವಿಶು ಕುಮಾರಾಕ್ ಸಮ್ಜೊಂಕ್ ನಾ.
"ತುಂ ಏರಿಂಡಿಯಾಂತ್ ಆಸ್ಲ್ಲೊಯ್?"
"ಅಟ್ರಾ ವರ್ಸಾಂ!"
ಆಪ್ಲ್ಯಾ ದಾಟ್ ವೊಂಟಾನಿ ಡೈರೆಕ್ಟರಾನ್ ಮಂದ್ ಹಾಸೊ ಹಾಡ್ಲ್ಯೊ. ತಾಕಾ ಆಪ್ಣಾಚಾ ವಯ್ರ್ ಘಮಂಡ್ ಆಸ್ಲ್ಲೊ. ಜಶೆಂ ಕ್ಯಾಪ್ಟನ್ ರಾಣಾಕ್ ಆಪ್ಲ್ಯಾ ಮಿಲಿಟರಿ ಮೆಡಲಾ ವಯ್ರ್ ಘಮಂಡ್ ಆಸ್ಲ್ಲ್ಯಾಪರಿಂ! ಡೈರೆಕ್ಟರಾಚಾ ದೊಳ್ಯಾಂನಿ ಉಪ್ಯೆಂವ್ಚ್ಯಾ ದಿಶ್ಟಿಂತ್ಚ್, ತಾಕಾ ತಾಚ್ಯಾ ನಾಂವಾಚಾ ಪಬ್ಲಿಸಿಟಿಚಿ ಕಿತ್ಲಿ ಭುಕ್ ಆಸಾ ಮ್ಹಳ್ಳೆಂ ತೆಂ ಆಲಿಯಾ ಜಾಣಾಂ ಜಾಲೆಂ.
"ಹಾಂ...! ಆತಾಂ ಉಡಾಸ್ ಆಯ್ಲೊ!" ಕಿತೆಂಗೀ ಆಪ್ಣಾಕ್ ಉಡಾಸ್ ಆಯಿಲ್ಲ್ಯಾ ಪರಿಂ ಆಲಿಯಾನ್ ನಟನ್ ಕೆಲೆಂ. "ಮ್ಹಜೊ ಅಂಕಲ್ ತುಮ್ಚ್ಯಾ ವಿಶಿ ಉಲಯ್ತಾಲೊ!" ಆಪ್ಲ್ಯಾ ಫಾರಿಕ್ಪಣಾಚ್ಯಾ ವಾಟೆರ್ ಆಲಿಯಾನ್ ಆಪ್ಣಾ ಖಾತಿರ್ ಏಕ್ ಅಂಕಲ್ ರಚ್ಲೊ.
"ತುಜೊ ಅಂಕಲ್....?" ಡೈರೆಕ್ಟರಾಚೊ ಆಸ್ಡ್ಯೊ ವಯ್ರ್ ಗೆಲ್ಯೊ.
"ತೊ ಏರ್ ಇಂಡಿಯಾಚಾ ಟೆಕ್ನಿಕಲ್ ಡಿಪಾರ್ಟ್ಮೆಂಟಾಂತ್ ಇಂಜಿನೀಯರ್ ಜಾವ್ನ್ ಆಸ್ಲ್ಲೊ!" ಆಲಿಯಾನ್ ಡೈರೆಕ್ಟರಾಚಾ ಮುಕಾರ್ ಏಕ್ ಕಾಣಿ ಘುಂತ್ಲಿ.
"ಐ ಸೀ!" ಜನರಲಾನ್ ತಕ್ಲಿ ಹಾಲಯ್ಲಿ.
"ತುಮಿ ಮಸ್ತ್ ಸ್ಟ್ರಿಕ್ಟ್ ಆಫೀಸರ್ ಮ್ಹಣೊನ್ ದಿಸ್ತಾ!"
"ತುಜೊ ಅಂಕಲ್ ಸಾಂಗ್ತಾಲೊ?"
"ವ್ಹಯ್!" ಆಪ್ಣೆಂಚ್ ರಚ್ಲೆಲ್ಯಾ ಕಾಣಿಯೆಕ್ ಆಲಿಯಾನ್ ದುಬಾವಾ ವಿಣೆ ಮುಂದರಿಲೆಂ.
"ಐ ಟೋಟಲ್ಲಿ ಬೌಂಡ್ ವಿದ್ ಮೈ ಡ್ಯೂಟಿ!" ಜನರಲಾಕ್ ಆಲಿಯಾಕ್ಚ್ ಆಪ್ಲಿ ದೀಶ್ಟ್ ಜೊಕ್ಲಿ. "ಸೋ ಐ ಮಸ್ಟ್ ಬೀ!" ತೊಚ್ ಉದ್ಗಾರ್ಲೊ.
"ತುಂ ಸರದಾರಾಚೊ ಪಾಟ್ಲಾವ್ದಾರಿ ಮ್ಹಳ್ಳ್ಯಾ ಪರಿಂ ದಿಸ್ತಾ!" ಆಲಿಯಾನ್ ವೊಂಟಾರ್ ಹಾಸೊ ಹಾಡ್ಲ್ಯೊ.
"ಸರದಾರ್....? ಕೋಣ್ ಸರದಾರ್?" ಜನರಲಾಚೊ ಆಸ್ಡ್ಯೊ ರುಂದಾಲ್ಯೊ. ತೊ ಆಪ್ಲ್ಯಾ ಬಸ್ಕೆರ್ ಮುಕಾರ್ ಬಾಗ್ವಾಲೊ.
"ಸರದಾರ್ ವಲ್ಲಭಾ ಭಾಯಿ ಪಟೇಲ್! ದಿ ಐರನ್ಮ್ಯಾನ್!" ಆಲಿಯಾಚಾ ತಾಳ್ಯಾಂತ್ ಶಾಂತ್ಪಣ್ ಆಸ್ಲ್ಲೆಂ.
"ಓಹ್!" ಜನರಲ್ ಆಪ್ಳ್ಯಾ ಬಸ್ಕೆಕ್ ವೊಣ್ಕಾಲೊ. ಆಪ್ಣಾಕ್ ಸರದಾರ್ ವಲ್ಲಭಾ ಭಾಯಿ ಪಟೇಲಾಚೊ ಪಾಟ್ಲಾವ್ದಾರ್ ಮ್ಹಣೊನ್ ವೊಲಾಯಿಲ್ಲೆಂ ಆಯ್ಕೊನ್ ತಾಚೊ ಭರ್ಮ್ ಆನಿಕ್ಯ್ ವಾಡ್ಲೊ. ಭಿತರ್ಲ್ಯಾ ಭಿತರ್ಚ್ ತೊ ಸಂತೊಸಾನ್ ಫುಲ್ಲೊ. ಆಲಿಯಾ ಹೆಂಚ್ ಆಶೆತಾಲೆಂ. ಹ್ಯಾ ವರ್ವಿಂ ತಾಚ್ಯಾ ಆನಿ ಜನರಲಾಚ್ಯಾ ಮಧೆಂ ಸಂಭಂಧ್ ಕಿತ್ಲೊ ವಾಡ್ತಾ ತಿತ್ಲೊ ಆಲಿಯಾಕ್ ಫಾಯ್ದೊ ಆಸ್ಲ್ಲೊ.
ಜನರಲ್ ಆತಾಂ ಖುಶಿಯೆನ್ ಭರ್ಲಾ ತೆಂ ಕಳೊನ್,
"ಸಾಂಜೆರ್ ಕಿತೆಂ ಕರ್ತೆಲ್ಯಾತ್? ತುಮಿ ಪ್ರೀ ಆಸಾತ್ ಜಾಲ್ಯಾರ್ ರಾತಿಚೆಂ ಜೆವಾಣ್ ಹೊಟೆಲಾಂತ್ ಕರ್ಯಾಂ? ಅಟ್ಲೀಸ್ಟ್ ಹ್ಯಾ ನಿಬಾನ್ ತರ್ಯ್ ತುಮ್ಚ್ಯಾ ವಿಶಿಂ ಚಡಿತ್ ಜಾಣಾಂ ಜಾಂವ್ಕ್ ಸಾದ್ಯ್ ಜಾತೆಲೆಂ!"
ಆಲಿಯಾಚಾ ಹ್ಯಾ ಆಯ್ಚ್ಯಾ ಸಾಂಜೆಚ್ಯಾ ಜೆವ್ಣಾಚಾ ಆಪವ್ಣ್ಯಾ ಥಾವ್ನ್ ಡೈರೆಕ್ಟರ್ ಸಂತೊಸಾನ್ ಭರ್ಲೊ. ತೊ ಕಿತ್ಲೊ ಸಂತೊಸಾನ್ ಭರ್ತಾ ತಿತ್ಲೊ ತೊ ಆಪ್ಣಾಕ್ ಲಾಗಿಂ ಜಾತಲೊ ಮ್ಹಳ್ಳೆಂ ಆಲಿಯಾ ಜಾಣಾಂ.
"ಮ್ಹಾಕಾ ಮ್ಹಜಿ ಪ್ಯಾಮಿಲಿ ಆಸಾ! ಐ ಯಾಮ್ ಸಾರ್ರಿ! ಪುಣ್ ತುಂ ಫ್ರೀ ಆಸಾಯ್ ಜಾಲ್ಯಾರ್ ಸಾಂಜೆರ್ ತುಮಿಂ ದೊಗಾಂಯ್ ಆಮ್ಚಾ ಘರಾಚ್ ಕಿತ್ಯಾಕ್ ಜೆವ್ಣಾಕ್ ಯೇಂವ್ಕ್ ನಜೊ?" ಡೈರೆಕ್ಟರ್ ಅಪ್ಲೆಸ್ತಕಿಂ ಆಲಿಯಾನ್ ಚಿಂತ್ಲ್ಲ್ಯಾ ವಾಟೆರ್ಚ್ ಆಯಿಲ್ಲೊ.
"ಬರೊ ಉಪಾಯ್! ಪುಣ್ ಆಮ್ಚೆಂ ಶೆಡ್ಯೂಲ್ ಕಿತೆಂ ತೆಂ ಸಾಂಗೊಂಕ್ ಜಾಯ್ನಾಂ. ತರೀ ಹಾಂವ್ ಟ್ರೈ ಕರ್ತಾಂ....! ಮ್ಹಾಕಾ ತುಮ್ಚೆಂ ಪೋನ್ ನಂಬರ್ ದಿಯಾತ್!" ಆಲಿಯಕ್ ಹ್ಯಾ ಪೋನ್ ನಂಬರಾಚಿ ಮಸ್ತ್ ಗರ್ಜ್ ಆಸ್ಲ್ಲಿ. ಹ್ಯಾ ಪೋನ್ ನಂಬರಾ ಥಾವ್ನ್ ತೆಂ ಮಸ್ತ್ ಕಾಮಾಂ ಕರುಂಕ್ ಸಕ್ತಾಲೆಂ. ಹೆಂ ವಿಶು ಕುಮಾರಾಚಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ.
"ಶೂವರ್ ವೈ ನಾಟ್?"
ಆಲಿಯಾನ್ ಜನರಲಾಚೆಂ ನಂಬರ್ ಘೆತ್ಲೆಂ.
"ಸಾಂಜೆರ್ ಹಾಂವ್ ತುಮ್ಕಾಂ ಪೋನ್ ಕರ್ತಾಂ!"
"ಸಾಂಜೆರ್ ಪಾಂಚ್ ವೊರಾಂ ಉಪ್ರಾಂತ್ ಹಾಂವ್ ಘರಾಚ್ ಆಸ್ತಾಂ!" ಜನರಲ್ ಖುಶಿಯೆನ್ ಭರ್ಲೊ.
"ಬರೆಂ ತರ್....! ಚಿತ್ರೀಕರಣಾಕ್ ಡೈರೆಕ್ಟರ್ ರಾಕ್ತಾ ಆಸ್ತಲೊ!" ಆಲಿಯಾ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ.
"ತುಂ ಬರೆಂ ಉಲಯ್ತಾಯ್ ಮಾತ್ರ್....!" ಭಾಯ್ರ್ ವಚೊಂಕ್ ಆಯ್ತೆಂ ಜಾಲ್ಲ್ಯಾ ಆಲಿಯಾಕ್ ಪಳವ್ನ್ ಹಾಸ್ಲ್ಲ್ಯಾ ಜನರಲಾನ್ ಆಲಿಯಾಕ್ ಆಪ್ಲೊ ಹಾತ್ ಮೆಳಯ್ಲೊ.
"ಮ್ಹಾಕಾ ಉಲಂವ್ಚೆಂ ಮ್ಹಳ್ಯಾರ್ ಮಸ್ತ್ ಪಸಂದ್!" ಹಾಸೊನ್ ಸಾಂಗ್ಲ್ಲ್ಯಾ ಆಲಿಯಾನ್ ವಿಶು ಕುಮಾರಾ ತೆವ್ಶಿಂ ಪಲೆಲೆಂ.
"ತುಂ ವಚ್ ಆಲಿಯಾ! ಹಾಂವ್ ಪೈಲೆಟ್ ಆಯ್ಲ್ಯಾ ಉಪ್ರಾಂತ್ ಯೆತಾಂ!" ವಿಶುಕುಮಾರಾನ್ ಸಾಂಗ್ಲೆಂ.
"ಬರೆಂ ತರ್...! ಆಮಿಂ ಉಪ್ರಾಂತ್ ಮೆಳ್ಯಾಂ!"
ಆಲಿಯಾ ಆತಾಂ ಜನರಲಾಚಾ ಆಫೀಸಾ ಥಾವ್ನ್ ಭಾಯ್ರ್ ಆಯ್ಲೆಂ.
ಸಾವಂತಾನ್ ಎದೊಳ್ಚ್ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಪರಿಂ ಚಿತ್ರೀಕರಣಾಚೆಂ ಟೆಕ್ನಿಕಲ್ ಸೆಟ್ ತಯಾರ್ ಕೆಲ್ಲೆಂ.
"ಗೆಟ್ ರೆಡಿ ಆಲಿಯಾ!" ಸಾವಂತ್ ಸ್ಕ್ರಿಫ್ಟ್ ಘೆವ್ನ್ ಮುಕಾರ್ ಆಯ್ಲೊ.
"ಸಾರ್ರಿ...!" ಆಲಿಯಾನ್ ಆಪ್ಣಾ ಥಾವ್ನ್ ಜಾಲ್ಲ್ಯಾ ಅಡ್ಚಣೆಕ್ ವಳ್ಕೊನ್ ಘೆತ್ಲೆಂ.
"ರಾಜೂ....! ಮ್ಯಾಡಮಾಕ್ ಮೇಕಪ್ ರೆಡಿ ಕರ್. ಕ್ವಿಕ್!" ತೊ ಬೊಬಾಟ್ಲೊ.
ತಿತ್ಲ್ಯಾರ್ ರಾಜು ಆನಿ ತಾಚೊ ಹೆಲ್ಪರ್ ಮೇಕಪಾಚೊ ಬಾಕ್ಸ್ ಘೆವ್ನ್ ಆಲಿಯಾಚಾ ಲಾಗಿಂ ಆಯ್ಲೆ.
"ತೆಂ ಶಾರ್ಟ್ ವಿಗ್ ಖಂಯ್ ಆಸಾ? ತುಕಾ ಹಾವೆಂ ಸಾಂಗ್ಲ್ಲೆಂ ಸಗ್ಳೆಂ ರೆಡಿ ಕರುನ್ ದವರ್ ಮ್ಹಣೊನ್!" ದುಸ್ರ್ಯಾ ವಯ್ರ್ ಸಾವಂತ್ ರಾಗಾರ್ ಜಾಲೊ.
ತಿತ್ಲೆಂಚ್!
ಸಗ್ಳೆ ಹೆವ್ಶಿಂ ತೆವ್ಶಿಂ ಆಪ್ಲ್ಯಾ ಕಾಮಾಂತ್ ಧಾಂವೊಕ್ ಲಾಗ್ಲೆ.
"ಮೂರ್ತಿ...?" ಬೊಬಾಟ್ಲೊ ಸಾವಂತ್! ಕ್ಯಾಮರಾಮ್ಯಾನಾ ಸಾಂಗಾತಾ ರಾವೊನ್ ದ್ರಶ್ಯಾಂಚಾ ವಿಶಿಂ ಆಲೋಚನ್ ಕರ್ಚೊ ಮೂರ್ತಿ ಸಾವಂತಾಚೊ ತಾಳೊ ಆಯ್ಕೊನ್ ಹೆವ್ಶಿಂ ಧಾಂವೊನ್ ಆಯ್ಲೊ.
"ಮೂರ್ತಿ....! ಮ್ಯಾಡಮಾಕ್ ಡೈಲಾಗ್ ಟೋನ್ ವೇರಿಯೇಶನ್ ಸಾರ್ಕೆಂ ಸಮ್ಜಯ್!"
ಸಾವಂತ್ ಆತಾಂ ಆಪ್ಲ್ಯಾ ದುಸ್ರ್ಯಾ ಅಸಿಸ್ಟಂಟಾ ತೆವ್ಶಿಂ ಚಮ್ಕಾಲೊ.
************
ಮಿಶೇಲ್!
ರಾಯನಾನ್ ಮಿಶೇಲಾಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ. ಹ್ಯಾ ತಾಚ್ಯಾ ಪ್ರಯತ್ನಾಂತ್ ಆಪುಣ್ ಕಿತ್ಲೊ ಜಿಕ್ಲಾಂ ಮ್ಹಳ್ಳ್ಯಾಚಿ ರುಜ್ವಾತ್ ಮಿಶೇಲಾ ಥಾವ್ನ್ ರಾಯನಾಕ್ ಮೆಳ್ಳಿ ನಾ ಜಾಲ್ಯಾರ್ಯ್ ಹ್ಯಾ ದಿಸಾಂನಿ ಮಿಶೇಲ್ ಥೊಡೆಂ ಆಪ್ಲ್ಯಾ ಮತಿಚಾ ಸಂತುಲನಾಂತ್ ಆಸಾ ಮ್ಹಳ್ಳೆಂ ತೆಂ ರಾಯನಾಕ್ ಸುಸ್ತಾಲ್ಲೆಂ. ಹ್ಯಾ ಖಾತಿರ್ ತಾಣೆಂ ಆಪ್ಲ್ಯಾ ಬಿಜ್ನೆಸಾ ತೆವ್ಶಿಂ ಗುಮಾನ್ ದೀನಾಸ್ತಾನಾ ಚಡ್ತಾವ್ ಜಾವ್ನ್ ಆಪ್ಲ್ಯಾ ಮಿಶೇಲಾ ತೆವ್ಶಿಂ ತೊ ಗುಮಾನ್ ದೀಂವ್ಕ್ ಲಾಗ್ಲ್ಲೊ. ತಾಕಾ ಆತಾಂ ಆಪ್ಲ್ಯಾ ಬಿಜ್ನೆಸಾಚ್ಯಾಕ್ಯ್ ಚಡ್ ಜಾವ್ನ್ ತಾಚ್ಯಾ ಮಿಶೇಲಾಚಿ ಖಂತ್ ಜಾಲ್ಲಿ. ಬಿಜ್ನೆಸಾಂತ್ ಕಾಂಯ್ ಚಡ್ ಉಣೆಂ ಜಾಲ್ಯಾರ್ಯ್ ಆಪುಣ್ ಫಾಲ್ಯಾಂ ಭೊರುನ್ ಘೆಂವ್ಕ್ ಸಕ್ತಾಂ ಮ್ಹಳ್ಳೊ ತಾಕಾ ಭರ್ವಸೊ ಆಸ್ಲ್ಲೊ. ಪುಣ್ ಮಿಶೇಲ್....? ಮಿಶೇಲಾಕ್ ಕಾಂಯ್ ಜಾಲ್ಯಾರ್......? ಮುಕ್ಲೆಂ ತಾಚ್ಯಾನ್ ಚಿಂತುಂಕ್ ಆಸಾದ್ಯ್ ಜಾಲ್ಲೆಂ.
ಮಿಶೇಲಾಚಿ ಮತ್ ಭುರ್ಗ್ಯಾಪರಿಂ ನಾಜ಼ೂಕ್! ಜೆದ್ನಾಂ ಪಾಸೊನ್ ತಿ ಮತ್ ಹಾಲಾನಾತ್ಲ್ಲ್ಯಾ ಉದ್ಕಾ ಪರಿಂ ಪ್ರಶಾಂತ್ ಜಾವ್ನ್ ಉರ್ತಾ ತೆದ್ನಾಂ ಪಾಸೊನ್ ತೆಂ ಆರ್ಶ್ಯಾ ಪರಿಂ. ಜೆದ್ನಾಂ ಮಿಶೇಲಾಚಿ ಮತ್ ಹಾಲ್ಚ್ಯಾ ಉದ್ಕಾಪರಿಂ ಹಾಲೊಂಕ್ ಲಾಗ್ಲಿ, ತೆದ್ನಾಂ ತ್ಯಾ ತಾಚ್ಯಾ ಮತಿಂತ್ ಎಕಾಚ್ಚ್ ಪಿಂತುರಾಚಿಂ ಹಜಾರ್ ರುಪಾಂ, ಎಕಾಚ್ ರುಪಾಚಿಂ ಹಜಾರ್ ತರಂಗಾಂ ಉಟೊನ್ ತಾಚಿ ಮತ್ ಉಪ್ರಾಂತ್ ತಾಚ್ಯಾ ಹಾತಿಂ ಆಸಾನಾ. ಹೆಂ ರಾಯನ್ ಬರ್ಯಾ ಭಾಶೆನ್ ಜಾಣಾಂ.
ಕಾಜಾರ್ ಜಾವ್ನ್ ಇತ್ಲೆ ದೀಸ್ ಆಪ್ಲ್ಯಾ ಬಾಯ್ಲೆ ಸಾಂಗಾತಾ ಆಪ್ಲೆಂ ಜಿವಿತ್ ಕಾಡ್ಲೆಲ್ಯಾ ತಾಕಾ ಮಿಶೇಲಾ ಸಾಂಗಾತಾ ತಾಚೆಂ ಜಿವಿತ್ ಮಸ್ತ್ ಸೊಭಿತ್ ದಿಸ್ಲ್ಲೆಂ. ತೆಂ ಜಿವಿತ್ ಸದಾಂಚ್ ಮತಿಚ್ಯಾ ಉಡಾಸಾಂತ್ ಉರ್ಚ್ಯಾ ತಸಲೆಂ. ರಾಯನಾನ್ ಮಿಶೇಲಾ ಸಾಂಗಾತಾ ಜಿಯೆಲ್ಲೆಂ ಅಸಲೆಂ ಸೊಭಿತ್ ಜಿವಿತ್ ಆಜ್ ತಾಚಾ ಜಿವಿತಾ ಥಾವ್ನ್ ಪಯ್ಸ್ ಗೆಲ್ಲೆಂ.
ಹ್ಯಾ ದಿಸಾಂನಿ ಮಿಶೇಲ್ ಆಪ್ಲ್ಯಾಚ್ ಸಂಸಾರಾಂತ್ ಆಸ್ತಾಲೆಂ. ಎಕೇಕ್ ಪಾವ್ಟಿಂ ಮಿಶೇಲಾಕ್ ಸಮ್ಜೊಂಕ್ಯ್ ರಾಯನಾಕ್ ಕಶ್ಟ್ ಜಾತಾಲೆ.
ಮಿಶೇಲಾಚಾ ಹ್ಯಾ ಪರಿಸ್ಥಿತೆಕ್ ಹೆಂ ಶೀತಲ್ಚ್ ಕಾರಾಣ್ ಮ್ಹಳ್ಳೆಂ ರಾಯನ್ ಸಾರ್ಕೊ ಜಾಣಾಂ. ಪುಣ್ ತೊ ಕರ್ತಲೊ ಕಿತೆಂ? ಹ್ಯಾ ದಿಸಾಂನಿ ವಿಶು ಕುಮಾರ್ ಮುಂಬಯಿ ನಾತ್ಲ್ಲೊ. ತೊ ಮುಂಬಯಿ ಆಸ್ಲ್ಲೊ ಜಾಲ್ಯಾರ್ ರಾಯನ್ ತಾಕಾ ಕಾಂಯ್ ಥೊಡೆಂ ಸಮ್ಜಾಯ್ತೊ. ಹ್ಯಾ ವರ್ವಿಂ ಮಿಶೇಲಾಚಾ ಮತಿಕ್ ಸಮಾಧಾನ್ ಮೆಳ್ತೆಂ.
ಕಾಂಯ್ ಥೊಡೆ ದೀಸ್ ಆಪ್ಣೆ ಮಿಶೇಲಾ ಸವೆಂ ಹ್ಯಾ ಮುಂಬಯಿ ಥಾವ್ನ್ ಪಯ್ಸ್ ರಾವ್ಲ್ಯಾರ್? ರಾಯನಾಚಾ ಮತಿಂತ್ ಚಿಂತ್ನಾ ಉದೆಲಿಂ.
ಪುಣ್ ಹೆಂ ಕಿತ್ಲ್ಯಾ ದಿಸಾಂಕ್?
ಮಿಶೇಲಾಕ್ ಘೆವ್ನ್ ಹಾಂವ್ ಕಿತ್ಲೆ ದೀಸ್ ಧಾಂವೊಂ? ಫಾಲ್ಯಾಂ ಪಾಟಿಂ ಯೆತಾನಾ ಪರ್ತ್ಯಾಕ್ ಹಾಂಗಾ ಶೀತಲ್ ಆಸ್ತೆಲೆಂ ಆನಿ ಸಗ್ಳೆಂ ಪರ್ತ್ಯಾಕ್ ತಶೆಂಚ್ ಜಾತೆಲೆಂ.
ತರ್, ಮಿಶೇಲ್ ಆಪ್ಲೆಂ ಜಿವಿತ್ ಕೆದ್ನಾಂ ಜಿಯೆಂವ್ಕ್ ಸಕ್ತೆಲೆಂ?
ಜಿವಿತಾಂತ್ಲ್ಯಾ ದಿಸಾಂಕ್ ತಾಂಡುನ್ ರಾಂವ್ಚಿ ಸಕತ್ ತಾಕಾ ಕೆದಾಳಾ ಯೆತೆಲಿ?
ರಾಯನಾನ್ ಮತಿಂತ್ಲ್ಯಾ ಚಿಂತ್ನಾಂನಿ ದಾಖಯಿಲ್ಲ್ಯಾ, ತಾಚ್ಯಾ ಮಿಶೇಲಾಕ್ ಘೆವ್ನ್ ಮುಂಬಯಿ ಥಾವ್ನ್ ಥೊಡೆ ದೀಸ್ ಪಯ್ಸ್ ರಾಂವ್ಚ್ಯಾ ಉಪಾಯಾಕ್ ತಾಣೆಂ ಬಗ್ಲೆಕ್ ದವರ್ಲೆಂ.
ಆಯ್ಚೊ ದೀಸ್ ಶನ್ವಾರ್!
ಸಾಕಾಳಿಂ ಆಫೀಸಾಕ್ ಭಾಯ್ರ್ ಸರ್ತಾನಾಂಚ್ ರಾಯನಾನ್ ಏಕ್ ನಿರ್ಧಾರ್ ಕೆಲ್ಲೊ.
"ಮಿಶೇಲ್!" ಡ್ರೆಸ್ಸಿಂಗ್ ಟೆಬಲಾಚಾ ಮುಕಾರ್ ರಾಯನ್ ಆಪ್ಲ್ಯಾ ಗಳ್ಯಾಚಿ ಟೈ ಬಾಂದ್ತಾಲೊ.
"ಆಜ್ ಸಾಂಜೆರ್ ಆಮಿಂ ಫಾರ್ಮ್ ಹೌಸಾಕ್ ಯಾ! ಫಾಲ್ಯಾಂಚೊ ದೀಸ್ ಆಮಿಂ ಫಾರ್ಮ್ ಹೌಸಾಂತ್ಚ್ ರಾವ್ಯಾಂ! ಫಾಲ್ಯಾಂ ಸಾಂಜೆರ್ ಆಮ್ಕಾಂ ಪಾಟಿಂ ಯೆವ್ಯೆತ್! ತುಂ ಕಿತೆಂ ಮ್ಹಣ್ತಾಯ್?" ರಾಯನಾಚಾ ಮತಿಕ್ ಮಿಶೇಲಾಕ್ ಖುಶ್ ದವರ್ಚೊ ಭೋವ್ ಸುಲಭ್ ಉಪಾಯ್ ಝಳ್ಕಾಲ್ಲೊ.
"ತುವೆಂ ವಿಶುಕ್ ಪೋನ್ ಕೆಲ್ಲೆಂಯ್.....?" ಮಿಶೇಲಾಚಿ ಮತ್ ಅಜೂನ್ ಶೀತಲಾಕ್ಚ್ ಚಿಂತಾಲಿ. ತಾಕಾ ರಾಯನಾನ್ ಸಾಂಗ್ಲ್ಲೆಂ ಆಯ್ಕಾಲ್ಲೆಂ ಜಾಲ್ಯಾರ್ಯ್ ತಾಚಿ ತಾಕಾ ಕಾಂಯ್ ಪರ್ವಾ ನಾತ್ಲ್ಲಿ.
"ವಿಶು ಮುಂಬಯಿಂತ್ ನಾ ಮಿಶೇಲ್! ತೊ ಡೆಲ್ಲಿ ಗೆಲಾ! ಆನಿ ಹೊ ಶೀತಲಾಚೊ ವಿಶಯ್ ಪೊನಾರ್ ಉಲಂವ್ಚ್ಯಾ ತಸಲೊ ನ್ಹಯ್! ತೊ ಮುಂಬಯಿ ಯೇಂವ್ದಿ. ಆಮಿಂ ಸಾಂಗಾತಾ ಬಸೊನ್ ಹ್ಯಾ ವಿಶಯಾಂತ್ ಬಸೊನ್ ಉಲವ್ಯಾಂ. ಹಾವೆಂ ತುಕಾ ಸಾಂಗ್ಲಾಂ....! ವಿಶುಲಾಗಿಂ ಹಾಂವ್ ಉಲಯ್ತಾಂ. ಡೋಂಟ್ ವರ್ರಿ...! ತುವೆಂ ಘರಾ ಆಬಾಕ್ ಪೋನ್ ಕೆಲ್ಲೆಂಯ್.....?" ರಾಯನಾನ್ ಥಂಯ್ಚ್ ವಿಶಯ್ ಬದ್ಲಿಲೊ.
"ವ್ಹಯ್!"
"ಕಶಿಂ ಆಸಾತ್ ಘರಾ?"
"ಘರಾಲಾಗಿಂ ಕೋಣ್? ಮಾಂಯ್ ಬರಿ ಆಸಾ!" ಮೆಜಾ ವಯ್ಲ್ಯಾ ಫರ್ಫ್ಯೂಮಾಕ್ ಹಾತಿಂ ಕಾಡ್ಲ್ಲ್ಯಾ ಮಿಶೇಲಾನ್ ತ್ಯಾ ಫರ್ಫ್ಯೂಮಾಕ್ ರಾಯನಾಚಾ ವಸ್ತುರಾ ವಯ್ರ್ ಶಿಂವ್ರಾಯ್ಲೆಂ.
"ತಿಂ ಹಾಸ್ಪಿಟಲಾಕ್ ಗೆಲ್ಲಿಂ ಖಂಯ್.....?" ರಾಯನ್ ಬಾಯ್ಲೆಕ್ಚ್ ಪಳೆತಾಲೊ.
"ತುಕಾ ಪೋನ್ ಕರುನ್ ವಿಚಾರುಂಕ್ ಜಾಯ್ನಾಂ ದಿಸ್ತಾ...!" ಮಿಶೇಲಾನ್ ಆಪ್ಲ್ಯಾ ತೊಂಡಾರ್ ಮೊಗಾಭರಿತ್ ಕ್ರತಕ್ ರಾಗ್ ದಾಖಯ್ಲೊ.
ತಿತ್ಲೆಂಚ್!
ಎದೊಳ್ ಪಾಸೊನ್ ವಿಶೆವ್ ಘೆವ್ನ್ ಆಸ್ಲ್ಲ್ಯಾ ಮೆಜಾ ವಯ್ಲ್ಯಾ ಟೆಲಿಪೋನಾಕ್ ಕಾಡ್ಲ್ಲ್ಯಾ ರಾಯನಾನ್ ಮಂಗ್ಳುರಾಕ್ ಡಯಲ್ ಕೆಲೆಂ.
ಪೊನಾರ್ ಜೆರೊಮ್ ಆನಿ ಎಸ್ತೆಲ್ ದೊಗಾಂಯ್ ಉಲಂವ್ಕ್ ಮೆಳ್ಳಿಂ.
ರಾಯನ್ ತಾಂಚೆ ಲಾಗಿಂ ಸುಖ್ ದೂಖ್ ಉಲವ್ನ್ ತಾಂಚಾ ಭಲಯ್ಕೆ ವಿಶಿ ಜಾಗ್ರುತ್ಕಾಯ್ ಸಾಂಗೊನ್ ಜೆರೊಮಾಕ್ ಹಾಸ್ಪಿಟಲಾಕ್ ವೊಚೊನ್ ಚೆಕ್ ಅಪ್ ಕರುನ್ ಯೆಂವ್ಚ್ಯಾ ವಿಶಯಾಂತ್ ಜಾಗವ್ನ್ ದೀವ್ನ್ ತಾಣೆಂ ಪೋನ್ ಭಂಧ್ ಕೆಲೆಂ.
"ಹಾಂ ಮಿಶೇಲ್!" ತೊ ಆತಾಂ ಮಿಶೇಲಾ ತೆವ್ಶಿಂ ಘುಂವ್ಲೊ.
"ಸಾಂಜೆರ್ ಫಾರ್ಮ್ಹೌಸಾಕ್ ಚಲ್ಯಾಂ....?" ರಾಯನಾನ್ ಮಿಶೇಲಾಚಾ ಬಾವ್ಳ್ಯಾಕ್ ಧರ್ಲೆಂ.
"ತುಕಾ ಆತಾಂ ಆಫೀಸಾಕ್ ವಚೊಂಕ್ ಜಾಯ್?" ರಾಯನಾಚಾ ದೊಳ್ಯಾಂಕ್ ದೊಳೆ ಜೊಕುನ್ ಪಳಂವ್ಚ್ಯಾ ಮಿಶೇಲಾಚಾ ದೊಳ್ಯಾಂ ದಿಶ್ಟೆಂತ್ ಕಸಲಿಗೀ ಸ್ತುಪ್ತ್ ಆಶಾ ಉಟೊನ್ ಉಭಿ ಜಾಲ್ಯಾ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ.
"ಕಿತ್ಯಾಕ್.....?"
"ಶೀತಲಾನ್ ಹಾಂಗಾ ಯೆತಾಂ ಮ್ಹಣೊನ್ ಸಾಂಗ್ಲಾಂ!"
"ಶೀತಲಾನ್ ಯೆತಾಂ ಮ್ಹಣೊನ್ ಸಾಂಗ್ಲಾಂ.....?" ಮಿಶೇಲಾಚಾ ದೊಳ್ಯಾಂನಿ ಉದೆಲ್ಲ್ಯಾ ಸ್ತುಪ್ತ್ ಆಶೆಚೊ ಮತ್ಲಾಬ್ ರಾಯನಾಕ್ ಸಮ್ಜಾಲೊ. ತಾಣೆಂ ಆತಾಂ ಆಪ್ಲ್ಯಾ ಆಂಗಾರ್ ಕೋಟ್ ವೊಡ್ಲೊ. "......ಯೇಂವ್ದಿ!" ಕೊಟಾಚೆ ಬುತಾಂವ್ ಶಿರ್ಕಾಂವ್ಚ್ಯಾ ಮಿಶೇಲಾಕ್ ಆಪ್ಲ್ಯಾ ಘೊವಾಚ್ಯಾ ತಾಳ್ಯಾಂತ್ ಉತ್ಸಾಹ್ ನಾತ್ಲ್ಲೊ ತೊ ಸ್ಪಶ್ಟ್ ಝಳ್ಕಾಲೊ.
"ನ್ಹಯ್! ತುಂ ಆಸ್ಲ್ಲೊಯ್ ಜಾಲ್ಯಾರ್ ತಾಕಾ ಥೊಡೆಂ......!"
"ಮ್ಹಾಕಾ ದಿಸ್ತಾ ಮಿಶೇಲ್ ತುಂ ಗರ್ಜೆಚ್ಯಾಕ್ಯ್ ಚಡ್ ಚಿಂತಾಯ್! ತುವೆಂ ಚಿಂತ್ಚ್ಯಾ ತಿತ್ಲೆಂ ವ್ಹಡ್ಲೆಂ ಕಾಂಯ್ ಜಾಂವ್ಕ್ ನಾ! ಎಕ್ಟುವಲ್ಲೀ ತುಮಿಂ ಹ್ಯಾ ಬಿಜ್ನೆಸಾಚಾ ಸಂಸಾರಾಂತ್ ನವಿಂ ಪಳೆ ತಶೆಂ ತುಮ್ಕಾಂ ಆಶೆಂ ಭೊಗ್ತಾ!" ರಾಯನಾನ್ ಆಪ್ಲ್ಯಾ ಆಂಗಾರ್ ಚಡಯಿಲ್ಲ್ಯಾ ಕೋಟಾಕ್ ತ್ಯಾ ಡ್ರೆಸ್ಸಿಂಗ್ ಟೆಬಲಾ ವಯ್ಲ್ಯಾ ಆರ್ಶ್ಯಾಂತ್ ಪಳವ್ನ್ ತಾಕಾ ದಾವ್ಯಾ ಭುಜಾಚೆರ್ ಥೊಡೊ ಸಕಯ್ಲ್ ವೊಡುನ್ ಸಾರ್ಕೊ ಕೆಲೊ.
"ಹಾಂವ್ ಹ್ಯಾ ಬಿಜ್ನೆಸಾಚಾ ಸಂಸಾರಾಂತ್ ನವಿಂ ರಾಯನ್. ಪುಣ್ ಶೀತಲ್ ನವೆಂ ನ್ಹಯ್! ತೆಂ ಮುಂಬಯಿ ಯೆತಾನಾ ತಾಚ್ಯಾ ಕಾಳ್ಜಾಂತ್ ಏಕ್ ದುಸ್ರೆಂಚ್ ಸಪಾಣ್ ಆಸ್ಲ್ಲೆಂ. ಜ್ಯಾ ಸಪ್ಣಾಕ್ ಜಿಮ್ಮಿನ್ ಕಿರ್ಲಾತ್ ಘಾಲ್ಲೆಂ!" ಮಿಶೇಲ್ ರಾಯನಾಚಾ ಪಾಟ್ಲ್ಯಾನ್ ಉಲಯಿತ್ತ್ ವೆತಾಲೆಂ.
"ಜಿಮ್ಮಿನ್....?" ರಾಯನಾಚೆ ದೊಳೆ ರುಂದಾಲೆ. ತಾಣೆಂ ಆಪ್ಲಿ ಬ್ರೀಪ್ ಕೇಸ್ ಆಪ್ಲ್ಯಾ ಹಾತಾಂತ್ ಘೆತ್ಲಿ.
"ಪಳೆ ಮಿಶೇಲ್.....! ತುಂ ಹ್ಯಾ ಶೀತಲಾಚಾ ವಿಶಯಾಂತ್ ಕಾಂಯ್ ಚಡ್ ಚಿಂತುಂಕ್ ವಚಾನಾಕಾ. ಹಾವೆಂ ತುಕಾ ಸಾಂಗ್ಲೆಂ ನೆ ಹಾಂವ್ ವಿಶು ಲಾಗಿಂ ಉಲಯ್ತಾಂ. ತೊ ಖಂಯ್ಚಾಯ್ಕ್ಯ್ ಡೆಲ್ಲಿ ಥಾವ್ನ್ ಮುಂಬಯಿ ಯೇಂವ್ದಿ. ಓ.ಕೆ.......?" ರಾಯನ್ ಆತಾಂ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಚಲ್ಲೊ.
ರಾಯನಾ ಪಾಟ್ಲ್ಯಾನ್ಚ್ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಮಿಶೇಲ್ ತಾಚೆ ಸಾಂಗಾತಾ ಸಾಲಾಕ್ ದೆಂವ್ಚಿಂ ಮೆಟಾಂ ದೆಂವೊಂಕ್ ಲಾಗ್ಲೆಂ.
"ತುಕಾ ಹಾವೆಂ ಸಾಂಗ್ಲ್ಲೊ ಉಡಾಸ್ ಆಸಾ....? ಸಾಂಜೆರ್...!" ಆಪ್ಣೆಂ ಸಾಂಜೆರ್ ಫಾರ್ಮ್ಹೌಸಾಕ್ ವೆಚ್ಯಾ ವಿಶಿಂ ಮಿಶೇಲಾಕ್ ಸಾಂಗ್ಲ್ಲ್ಯಾಚೊ ತಾಣೆಂ ಪರ್ತ್ಯಾಕ್ ಆಪ್ಲ್ಯಾ ಬಾಯ್ಲೆಕ್ ಉಡಾಸ್ ಕರ್ಚೆಂ ಪ್ರಯತ್ನ್ ಕೆಲೆಂ.
"ತುಂ ಧನ್ಫಾರಾಂ ಜೆವ್ಣಾಕ್ ಯೆತಲೊಯ್ ನೆ.....!? ಆತಾಂ ವಚ್!" ಮಿಶೇಲ್ ಹಾಸ್ಲೆಂ.
ಥೊಡೊ ವೇಳ್ ರಾಯನ್ ಆಪ್ಲ್ಯಾ ಬಾಯ್ಲೆಚ್ಯಾ ತೊಂಡಾ ವಯ್ರ್ ಉದೆಲ್ಲ್ಯಾ ಹ್ಯಾ ಹಾಸ್ಯಾಂಕ್ಚ್ ಪಳವ್ನ್ ರಾವ್ಲೊ. ತೊ ಹರ್ಯೆಕಾ ಘಡಿಯೆ ಮಿಶೇಲಾಚಾ ತೊಂಡಾರ್ ಆಸಲ್ಯೊಚ್ ಹಾಸೊ ಪಳಂವ್ಕ್ ಆಶೆತಾಲೊ.
"ಕಿತೆಂ ಜಾಲೆಂ.....?" ಆಪ್ಲೊ ಘೊವ್ ಆಪ್ಣಾಕ್ಚ್ ದೀಶ್ಟ್ ಜೊಕುನ್ ಪಳೆತಾ ತೆಂ ಕಳೊನ್ ಮಿಶೇಲಾನ್ ವಿಚಾರ್ಲೆಂ.
"ತುಂ ಮ್ಹಜ್ಯಾ ಭೊಂವಾರಿ ಆಶೆಂಚ್ ಹಾಸೊನ್ ಆಸ್ಲ್ಯಾರ್ ಕಿತ್ಲೆಂ ಬರೆಂ ದಿಸ್ತಾಯ್!" ರಾಯನ್ ತಸೊಚ್ಚ್ ಉದ್ಗಾರ್ಲೊ.
"ಎಕ್ಲಾನ್ ಹಾಸ್ಚ್ಯಾ ಖಾತಿರ್ ಎಕ್ಲ್ಯಾನ್ ಖಂಯ್ ನಾ ತರ್ ಖಂಯ್ ರಡೊಂಕ್ ಪಡ್ತಾ ರಾಯನ್!" ರೆವೆಂತ್ ಉದಾಕ್ ವೊತ್ಲ್ಲೆಂ ತೆಂ ಜಿರೊನ್ ಗೆಲ್ಲ್ಯಾ ಪರಿಂ ಮಿಶೇಲಾಚಾ ತೊಂಡಾ ವಯ್ಲ್ಯೊ ಹಾಸೊ ಜಿರೊನ್ ಗೆಲ್ಯೊ. ತಾಚ್ಯಾ ಜಿವಾಚ್ಯಾ ವರ್ತನಾಂತ್ ಅಚಾನಕ್ ಬದ್ಲಾವಣ್ ಜಾಲ್ಲಿ. ಥೊಡ್ಯಾಚ್ ಖಿಣಾಂನಿ!
"ಬರೆಂ ತರ್ ಹಾಂವ್ ರಾವ್ತಾಂ!" ರಾಯನ್ ಥಂಯ್ಚ್ ಮೆಟಾಂ ದೆಂವ್ಚ್ಯಾ ಕಡೆನ್ ತ್ಯಾ ರುಕಾಟಾಚಾ ಕಡ್ಚಿಲಾಂಕ್ ವೊಣ್ಕಾಲೊ.
"ತುಕಾ ರಾಗ್ ಆಯ್ಲೊ?" ಮಿಶೇಲಾಚಾ ಮುಖಮಳಾರ್ ಪರ್ತ್ಯಾಕ್ ಬದ್ಲಾವಣ್!
ಪರ್ತ್ಯಾಕ್ ಮಿಶೇಲಾಚಾ ಮುಖಮಳಾರ್ ತೆಂಚ್ ನೆಣ್ತೆಂಪಣ್!
ಥೊಡ್ಯಾಚ್ ಘಡಿಯಾಂ ಭಿತರ್ ಮಿಶೇಲ್ ಆಶೆಂ ಕಶೆಂ? ರಾಯನಾಕ್ ಸಮ್ಜಾಲೆಂ ನಾ.
ತಿತ್ಲೆಂಚ್!
ರಾಯನಾಚಾ ದೊಳ್ಯಾಂ ಮುಕಾರ್ ಆಪ್ಲ್ಯಾ ಬಾಪಾಯ್ಚೆಂ ರೂಪ್ ಉದೆವ್ನ್ ಆಯ್ಲೆಂ.
ವ್ಹಯ್!
ಆಜ್ ಆಪ್ಣಾಚೊ ಬಾಪಯ್ ಜಿವಂತ್ ಆಸ್ಲ್ಲೊ ಜಾಲ್ಯಾರ್ ಹ್ಯಾ ಮಿಶೇಲಾಕ್ ಪಳವ್ನ್ ತೊ ಕಿತ್ಲೊ ಖುಶ್ ಪಾವ್ತೊ! ದೋನ್ ವರ್ಸಾಂ.....! ಫಕತ್ತ್ ದೋನ್ ವರ್ಸಾಂ! ದೋನ್ ವರ್ಸಾಂ ಖಾತಿರ್ ತಾಚೆಂ ಆವ್ಕ್ ಲಾಂಭ್ ಜಾಲ್ಲೆಂ ಜಾಲ್ಯಾರ್.....? ಆಜ್ ಆಪ್ಲೊ ಬಾಪಯ್ ಸಮಾಧಾನೆನ್ ಆಸ್ತೊ. ತಾಚ್ಯಾ ಆತ್ಮ್ಯಾಕ್ ಶಾಂತಿ ಲಾಭ್ತಿ!
"ಕಿತೆಂ ಚಿಂತಾಯ್......?" ಮಿಶೇಲಾನ್ ರಾಯನಾಕ್ಚ್ಚ್ ಪಳವ್ನ್ ತಾಚ್ಯಾ ಕೊಟಾರ್ ಆಪ್ಲೊ ಹಾತ್ ಚರಯ್ಲೊ.
"ಚಲ್ ಶಮ್ಮಿಕ್ ಥೊಡಿ ಕಾಫಿ ಕರುಂಕ್ ಸಾಂಗ್!" ರಾಯನಾನ್ ಮಿಶೇಲಾಚಾ ಖಾಂದಾರ್ ಆಪ್ಲೊ ಹಾತ್ ಘಾಲೊ.
"ತುಂ ಆಫೀಸಾಕ್ ವಚಾನಾಂಯ್......?" ಮಿಶೇಲ್ ರಾವ್ಲೆಲ್ಯಾ ಕಡೆನ್ ಥಾವ್ನ್ ಹಾಲ್ಲೆಂ ನಾ.
"ನಾ!"
"ಕಿತ್ಯಾಕ್......?"
"ಶೀತಲ್ ಹಾಂಗಾ ಯೆತಾ ಮ್ಹಣೊನ್ ತುವೆಂಚ್ ಆತ್ತಾಂ ಸಾಂಗ್ಲೆಂಯ್!"
"ವ್ಹಡ್ ನಾ ಸೊಡ್! ತುಂ ಆಫೀಸಾಕ್ ವಚ್! ಫಾಲ್ಯಾಂ ಸುಟಿ. ತ್ಯಾ ಭಾಯ್ರ್ ಆಜ್ ಶನ್ವಾರ್! ತುಂ ವಚ್!" ಮಿಶೇಲಾನ್ ರಾಯನಾಕ್ಚ್ ಪಳೆಲೆಂ.
"ಶೂವರ್......?" ರಾಯನಾಕ್ ಮಿಶೇಲಾ ವಯ್ರ್ ಅಜೂನ್ ದುಬಾವ್ ಆಸ್ಲ್ಲೊ.
"ಶೂವರ್!" ಮಿಶೇಲಾಚಾ ತೊಂಡಾರ್ ಆತಾಂ ಪರ್ತ್ಯಾಕ್ ತ್ಯೊ ಪಯ್ಲೆಂಚೊಚ್ ಹಾಸೊ ಪರ್ತ್ಯಾಕ್ ಪರ್ಜಳ್ಳ್ಯೊ.
"ಬಾಯ್ ಡಾರ್ಲಿಂಗ್!" ರಾಯನಾಚಾ ಮತಿಕ್ ತೃಪ್ತಿ ಜಾಲಿ.
ತೊ ಆತಾಂ ಘರಾ ಥಾವ್ನ್ ಭಾಯ್ರ್ ಪಡ್ಲೊ.
ರಾಯನ್ ಆಫೀಸಾಕ್ ವಚೊನ್ ಅರ್ಧ್ಯಾ ವೊರಾನ್ ಶೀತಲ್ ಮಿಶೇಲಾಚಾ ಘರಾ ಆಯಿಲ್ಲೆಂ.
ಶೀತಲಾಚಾ ಜಿವಿತಾಂತ್ ಉದೆಲ್ಲೊ ಕಾಳೊಕ್ ತಾಚ್ಯಾ ದೊಳ್ಯಾಂ ಮುಕ್ಲೊ ಧಾಂವೊಕ್ ನಾತ್ಲ್ಲೊ ಜಾಲ್ಯಾರ್ಯ್ ಮಿಶೇಲಾಚಾ ಮತಿಕ್ ಸಮಾಧಾನ್ ದಿಂವ್ಚ್ಯಾ ಉತ್ರಾಂ ಥಾವ್ನ್ ಶೀತಲಾನ್ ಆಪ್ಲ್ಯಾಚ್ ಮತಿಕ್ ಸಮ್ಜಾಯಿಲ್ಲೆಂ. ಪುಣ್ ಹಿ ಸಮ್ಜಣಿ ತಾಕಾ ಕಿತ್ಯಾ ದಿಸಾಂ ಪಾಸೊನ್ ಸಮಧಾನೆಂತ್ ದವರುಂಕ್ ಪಾವ್ತಾ ಮ್ಹಳ್ಳೆಂ ತೆಂ ಖುದ್ದ್ ಶೀತಲ್ ನೆಣಾಂ ಆಸ್ಲ್ಲೆಂ.
ಮಿಶೇಲಾಚಾ ಘರಾ ಆಯಿಲ್ಲ್ಯಾ ಶೀತಲಾಕ್ ಮಿಶೇಲಾನ್ ಧವ್ಫಾರಾಂಚಾ ಜೆವ್ಣಾಕ್ ವತ್ತಾಯ್ ಕರ್ತಾನಾ ತೆಂ ರಾಂವ್ಲೆಂ. ತಶೆಂಯ್ ತಾಂಕಾ ಎಕಾಮೆಕಾ ಲಾಗಿಂ ಉಲಯ್ತಾನಾ ವೇಳ್ ಪಾಶಾರ್ ಜಾಲ್ಲೊ ಕಳೊಂಕ್ಚ್ ನಾ.
ಶೀತಲಾಚ್ಯಾ ಆಯ್ಚ್ಯಾ ಯೆಣ್ಯಾ ಥಾವ್ನ್ ಮಿಶೇಲ್ ಏಕ್ ವಿಶಯ್ ಮಾತ್ರ್ ಖಂಡಿತ್ ಜಾಣಾಂ ಜಾಲ್ಲೆಂ ಕೀ ಹ್ಯಾ ದಿಸಾಂನಿ ಶೀತಲ್ ಜಿಮ್ಮಿಕ್ ಆನಿ ತಾಚ್ಯಾ ಉತ್ರಾಂಕ್ ಹರ್ಯೆಕಾ ವಗ್ತಾರ್ ನಿಯಾಳ್ತಾಲೆಂ. ಶೀತಲಾಚಾ ವರ್ತನೆಕ್ ಜಿಮ್ಮಿಚ್ ಕಾರಾಣ್ ಮ್ಹಳ್ಳೆಂ ತೆಂ ಮಿಶೇಲಾಕ್ ಕಳಿತ್ ಜಾಲೆಂ. ಆಜ್ ಜರ್ ತರ್ ಶೀತಲ್ ಆಪ್ಲ್ಯಾ ಜಿವಿತಾ ವಿಶ್ಯಾಂತ್ ಇತ್ಲೆಂ ಚಿಂತಾ ಜಾಲ್ಯಾರ್ ತಾಕಾ ತೊ ಜಿಮ್ಮಿಚ್ ಕಾರಾಣ್! ಮಿಶೆಲಾನ್ ಜಿಮ್ಮಿ ವಯ್ರ್ ಆಫ್ರಾಧ್ ಮಾಂಡ್ಲ್ಲೊ. ಜಿಮ್ಮಿನ್ ಜರ್ ಶೀತಲಾಚಾ ಮತಿಂತ್ ಅಸಲೆ ವಿಚಾರ್ ವೊಂಪುಂಕ್ ನಾತ್ಲ್ಲೆ ಜಾಲ್ಯಾರ್ ಶೀತಲ್ ಆಜ್ ಆಶೆಂ ಆಸ್ತೆಂ ನಾ. ಮಿಶೇಲ್ ಆಪ್ಣಾ ತಿತ್ಲ್ಯಾಕ್ ಚಿಂತಾಲೆಂ.
ಧನ್ಪರಾಂ ಜೆವ್ಣಾಕ್ ಆಯಿಲ್ಲೊ ರಾಯನ್ ಧನ್ಫರಾಂ ಉಪ್ರಾಂತ್ ಅಫೀಸಾಕ್ ಗೆಲೊ ನಾ. ತೊ ಘರಾಚ್ಚ್ ರಾವ್ಲೊ. ಮಿಶೇಲಾಚಿ ಖುಶಿ ಹಾಂತುಂಚ್ ಆಸಾ ಮ್ಹಣೊನ್ ತಾಕಾ ಕಳ್ತಾನಾ ತೊ ಆಪ್ಲ್ಯಾ ಬಾಯ್ಲೆಚ್ಯಾ ಖುಶಿಯೆಕ್ ಆಶೆಲೊ.
ಸಾಂಜೆರ್ ಶೀತಲಾಕ್ ತಾಚ್ಯಾ ಘರಾ ಪಾವವ್ನ್ ತೊ ಮಿಶೇಲಾ ಸವೆಂ ಫಾರ್ಮ್ ಹೌಸಾಕ್ ಭಾಯ್ರ್ ಸರ್ಲೊ.
ಲಾಂಗ್ ಡ್ರೈವಾಕ್ ಆಜ್ ತಾಣೆಂ ಆಪ್ಲೆಂ ಟೊಯೊಟಾ ಲ್ಯಾಂಡ್ಕ್ರೂಸರ್ ಜೀಪ್ ಭಾಯ್ರ್ ಕಾಡ್ಲೆಂ.
"ತುಂ ಖುಶ್ ಆಸಾಯ್ ನೆ ಮಿಶೇಲ್.....?" ಜಿಪಾಚಿ ವೇಗ್ ಉಣೊ ಕರುನ್ ರಾಯನ್ ಮಿಶೆಲಾಚಾ ತೆವ್ಶಿಂ ಘುಂವ್ಲೊ.
ರಾಯನಾಚಾ ಸವಾಲಾಕ್ ಆಯ್ಕೊನ್ ಜಿಪಾ ವಯ್ಲ್ಯಾ ಡೆಕಾಚ್ಯಾ ಆವಾಜಾಕ್ ಮಿಶೇಲಾನ್ ಥೊಡೊ ಉಣೊ ಕೆಲೊ. ತೆಂ ತಶೆಂಚ್ ಏಕ್ ಶ್ವಾಸ್ ಸೊಡುನ್ ಜಿಪಾಚಾ ಬಸ್ಕೆಕ್ ಪುರ್ತೆಂ ವೊಣ್ಕಾಲೆಂ.
"ಹಾಂವ್ ಖುಶಿಯೆರ್.....?" ಮಿಶೇಲಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ. "ರಾಯನ್ ಹೆಂ ಸಗ್ಳೆಂ ಆಪ್ಲ್ಯಾ ಸುಖಾ ಖಾತಿರ್ ಕರ್ತಾ.....? ಮ್ಹಳ್ಯಾರ್ ಮ್ಹಜ್ಯಾ ಸುಖಾ ಖಾತಿರ್? ತರ್ ಶೀತಲಾಕ್ ಕಿತ್ಯಾಕ್ ಹೆಂ ಸುಖ್ ನಾ? ತಾಚೊ ಘೊವ್ ಆಪ್ಲ್ಯಾ ಘೊವಾಚ್ಯಾ ಬಿಜ್ನೆಸಾಚೊ ಏಕ್ ವಾಮ್ಟೊ ಜಾವ್ನ್ ಆಸ್ತಾಂ ಕಾಂಯ್ ಶೀತಲಾಚಾ ವಾಂಟ್ಯಾಚೆಂ ಸುಖ್..... ಹಾಂವ್....?" ಮಿಶೇಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಾಚಿ ಮತ್ ತಾಕಾ ಸೊಡುನ್ ತಾಚ್ಯಾ ಮಂಗ್ಳುರಾಕ್ ಧಾಂವ್ಲಿ. ತಾಚ್ಯಾ ದೊಳ್ಯಾಂ ಮುಕಾರ್ ತಾಚ್ಯಾ ಆಜ್ಯಾ ಆಜಿಯೆಚೆಂ ರೂಪ್ ಉದೆವ್ನ್ ರಾವ್ಲೆಂ. ತೆಂ ಮ್ಯಾಂಚೆಸ್ಟರಾ ಥಾವ್ನ್ ಮಂಗ್ಳುರಾಕ್ ಯೆತಾನಾ ಜಿವಿತಾಚೊ ಭರ್ವಸೊ ನಾತ್ಲೆಲ್ಯಾ ಆಪ್ಲ್ಯಾ ಆಜ್ಯಾ ಆಜಿಯೆಚಾ ಸಂತೊಸಾಚೆಂ ಕಾರಾಣ್ ಜಾವ್ನ್ ತೆಂ ಆಯಿಲ್ಲೆಂ. ತಸಲೆಂ ಮಿಶೇಲ್ ಆಪ್ಲ್ಯಾ ಆವಯ್ ಬಾಪಾಯ್ ಸಾಂಗಾತಾ ತ್ಯಾ ಮ್ಯಾಂಚೆಸ್ಟರಾಂತ್ ಆಸ್ತಾನಾ ತೆಂ ತ್ಯಾಚ್ ತಾಚ್ಯಾ ಆಜ್ಯಾ ಆಜಿಯೆಚಾ ದುಖಾಕ್, ತಾಂಚಾ ಖಂತಿಕ್, ತಾಂಚಾ ಬೆಜಾರಾಯೆಕ್ ತೆಂ ಕಾರಾಣ್ ಜಾಲ್ಲೆಂ. ತರ್...?
ಆಜ್ ಹ್ಯಾ ಶೀತಲಾಚಾ ಖಂತಿ ಬೆಜಾರಾಯೆಕ್......?
ತಿತ್ಲೆಂಚ್!
ಮಿಶೇಲಾಚಾ ದೊಳ್ಯಾಂ ಮುಕಾರ್ ಗಯ್ರಿಂ ಗಯ್ರಿಂ ರುಪಾಂ ಉದೆವ್ನ್ ಆಯ್ಲಿಂ.
ಒಮ್ಜುರ್ಚ್ಯಾ ತೊಟಾಂತ್ ಖೆಳ್ಚಿಂ ಲಾಯ್ಡ್ ಆನಿ ಲವೀನಾ!
ಆಪ್ಲ್ಯಾಚ್ ಶೆತಾಕ್ ಚರ್ಚಿ ಗಾಯ್!
ನೆಣ್ತ್ಯಾ ಬಾಳಾಕ್ ಆಪ್ಲ್ಯಾ ಹಾಂಡಿಯೆರ್ ಘೆವ್ನ್ ಆಪ್ಣಾಕ್ಚ್ ಪಳಂವ್ಚೆಂ ತೆಂ ರಸ್ತ್ಯಾ ವಯ್ಲೆಂ ಚೆಡುಂ!
ಎಕಾ ರುಪಾ ಥಾವ್ನ್ ಎಕಾ ರುಪಾಕ್ ಖಂಯ್ ನಾ ಜಾಲ್ಯಾರ್ ಖಂಯ್ ಎಕಾಮೆಕಾ ಥಂಯ್ ಸಂಭಂಧ್ ಆಸಾ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ. ಆನಿ ನಿಮಾಣೆಂ......!
ವ್ಹಯ್!
ನಿಮಾಣೆಂ ತಾಚ್ಯಾ ದೊಳ್ಯಾಂ ಮುಕಾರ್ ಉಭೊ ಜಾಲೊ ತೊ ಪ್ರಾಯ್ವಂತಾಂಚೊ ಆಸ್ರೊ!
ಸಗ್ಳೆ ಸಂಭಂಧ್ ಎಕಾಮೆಕಾ ಘಾಂಟೊನ್ ಪಡೊನ್ ನಿಮಾಣೆಂ ತ್ಯಾ ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಪಾವ್ಲೆಲ್ಯಾ ಪರಿಂ ತಾಕಾ ದಿಸ್ಲೆಂ.
ಎಕಾ ಕುಶಿನ್ ತೊ ಪ್ರಾಯ್ವಂತಾಂಚೊ ಆಸ್ರೊ! ದುಸ್ರ್ಯಾ ಕುಶಿನ್ ಹೊ ರಸ್ತೊ!
ತ್ಯಾ ಆಸ್ರ್ಯಾಂತ್ ತೊ ಆಸ್ರೊ ಭರೊನ್ ಆಸ್ಲ್ಯಾರ್ಯ್ ಥಂಯ್ಚೊ ಹರ್ಯೆಕ್ ಜೀವ್ ಎಕ್ಸುರೊ! ಜಶೆಂ ಹ್ಯಾ ರಸ್ತ್ಯಾರ್ ಆಪ್ಲಿ ವಾಟ್ ಸೊಧುನ್ ಹ್ಯಾ ರಸ್ತ್ಯಾಕ್ ವೆಂಗುನ್ ವೆಚಿಂ ಸಭಾರ್ ಆಸಾತ್ ಜಾಲ್ಯಾರ್ಯ್ ಹೊ ರಸ್ತೊ ಎಕ್ಸುರೊ! ಏಕ್ ದುಸ್ರ್ಯಾಕ್ ಹಾಂಗಾ ಕಾಂಯ್ಚ್ ವ್ಯತ್ಯಾಸ್ ನಾ! ತ್ಯಾ ಆಸ್ರ್ಯಾಂತ್ ಜೀವ್ ಜಿವಂತ್ ಆಸೊನ್ಯ್ ಮೆಲ್ಲೊ! ಹಾಂಗಾ ಹ್ಯಾ ರಸ್ತ್ಯಾಚೊ ಜೀವ್ ಮೊರೊನ್ಯ್ ಮಾತ್ಯೆಕ್ ಸಾರೆಂ ಜಾಂವ್ಕ್ ನಾತ್ಲ್ಲೊ! ಹ್ಯಾ ಮಧೆಂ ಹಾಂವ್ ಖುಶಿ ಆಸೊಂಕ್ ಸಕ್ತಾಂ....?
"ಕಿತೆಂ ಜಾಲೆಂ?" ಮಿಶೇಲಾನ್ ಆಪ್ಲ್ಯಾ ಸವಾಲಾಕ್ ಜವಾಬ್ ದೀನಾಸ್ತಾನಾ ತೆಂ ಚಿಂತುಂಕ್ ಪಡ್ಲೆಲೆಂ ಪಳವ್ನ್ ರಾಯನಾನ್ ಮಿಶೇಲಾ ವಯ್ರ್ ಆಪ್ಲಿ ದೀಶ್ಟ್ ಖಂಚಯ್ಲಿ.
"ಮುಂಬಯಿಂತ್ ಪ್ರಾಯ್ವಂತಾಚೊ ಆಸ್ರೊ ನಾ......?" ಬಸ್ಕೆರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಹಾಲಾನಾಸ್ತಾನಾ ಮಿಶೇಲಾನ್ ಫಕತ್ತ್ ಆಪ್ಲಿ ತಕ್ಲಿ ಮಾತ್ರ್ ರಾಯನಾ ತೆವ್ಶಿಂ ಘುಂವ್ಡಾಯ್ಲಿ.
"ಆಸಾ! ಕಿತ್ಯಾಕ್......?"
"ಆಮ್ಕಾಂ ಥಂಯ್ ವಚೊಂಕ್ ಯೆತಾ.....?"
"ಆಸ್ರ್ಯಾಕ್? ಕಿತ್ಯಾಕ್.....?" ರಾಯನಾಕ್ ಸಮ್ಜಾಲೆಂ ನಾ. ಅಚಾನಕ್ ಮಿಶೇಲ್ ಆಸ್ರ್ಯಾಕ್ ಕಿತ್ಯಾಕ್ ವಚೊಂಕ್ ಸೊಧ್ತಾ?
"ತುಂ ಕೆದ್ನಾಂಯ್ ಆಸ್ರ್ಯಾಕ್ ಗೆಲಾಯ್ ರಾಯನ್....?"
"ಹಾಂವ್.....? ನಾಂ!"
"ಕೆದ್ನಾಂಯ್ ಏಕ್ ಪಾವ್ಟಿಂ ವಚೊನ್ ಯೇ!"
"ಹಾಂವ್.....? ಆಸ್ರ್ಯಾಕ್.....?" ರಾಯನ್ ಹಾಸ್ಲೊ.
"ಹಾಸ್ತಾಯ್ ಕಿತ್ಯಾಕ್.....?" ತಿಕ್ಕೆ ರಾಗಾನ್ ಮ್ಹಳ್ಳ್ಯಾ ಪರಿಂ ಮಿಶೇಲಾನ್ ರಾಯನಾಕ್ ಪಳೆಲೆಂ.
"ಅಶೆಂಚ್ ಕೆದ್ನಾಂ ಕೆದ್ನಾಂ ತುವೆಂ ರಾಗ್ ಕರುಂಕ್ ಜಾಯ್ ಮಿಶೇಲ್! ಯು ಲುಕ್ಸ್ ವೆರ್ರಿ ಪ್ರಿಟಿ!" ರಾಯನಾಚಾ ತೊಂಡಾ ವಯ್ಲ್ಯೊ ಹಾಸೊ ತಾಕಾ ಸೊಡುನ್ ಧಾಂವ್ಲ್ಯೊ ನಾಂತ್.
ಮಿಶೇಲಾನ್ ಆತಾಂ ಆಪ್ಲಿ ತಕ್ಲಿ ನೀಟ್ ಕರುನ್ ಆಪ್ಲಿ ದೀಶ್ಟ್ ರಸ್ತ್ಯಾರ್ ವೆಲಿ.
ಜಿವಿತ್ಯ್ ತ್ಯಾ ರಸ್ತ್ಯಾ ಪರಿಂ ಕಿತ್ಲೆಂ ಎಕ್ಸುರೆಂ. ಆಪ್ಣೆಂ ಸಾರುಂಕ್ ಆಸ್ಚಿ ವಾಟ್ ಜಾಣಾಂ ಆಸೊನ್ಯ್ ಹೆಂ ಜಿವಿತ್ ಆಪ್ಲ್ಯಾ ವಾಟೆರ್ ಚಲೊಂಕ್ ತಯಾರ್ ನಾ! ಜಶೆಂ ತ್ಯಾ ಆಸ್ರ್ಯಾಂತ್! ಮಿಶೇಲಾಚ್ಯಾ ಮತಿಂತ್ ಚಿಂತ್ನಾಂ ಧಾಂವ್ಲಿಂ.
"ತುಕಾ ಕಸಲೊ ಉಡಾಸ್ ಆಯ್ಲೊ ಮಿಶೇಲ್?" ಆಪ್ಲೆಂ ಬಾಯ್ಲ್ ಮೌನ್ ಜಾಲ್ಲೆಂ ಪಳವ್ನ್ ಮಿಶೇಲಾನ್ ಕಾಂಯ್ ತರ್ಯ್ ಚಿಂತ್ಲಾಂ ಮ್ಹಳ್ಳೆಂ ರಾಯನಾಕ್ ಕಚಿತ್ ಜಾಲೆಂ. ತೊ ತಾಚ್ಯಾ ಮಿಶೇಲಾಕ್ ಜಾಣಾಂ ಆಸ್ಲ್ಲೊ. ಆಪ್ಣೆಂ ವಿಚಾರ್ಲ್ಯಾ ಬಗಾರ್ ಮಿಶೇಲ್ ತೋಂಡ್ ಸೊಡುನ್ ವಿಚಾರ್ಚೆಂ ನಾ ಮ್ಹಳ್ಳೆಂ ತೆಂ ರಾಯನ್ ಜಾಣಾಂ.
ರಾಯನಾಚಾ ಸವಾಲಾಕ್ ಮಿಶೇಲಾನ್ ಕಾಂಯ್ ಜವಾಬ್ ದಿಲಿ ನಾ. ತೆಂ ತಶೆಂಚ್ ತಾಚ್ಯಾ ನದ್ರೆಕ್ ರಸ್ತ್ಯಾರ್ ಕೇಂದ್ರೀಕ್ರತ್ ಕರುನ್ ಬಸ್ಲ್ಲೆಂ.
"ಉಲಯ್ನಾಂಯ್.....?" ರಾಯನ್ಚ್ ಪರ್ತ್ಯಾಕ್ ಉಲಯ್ಲೊ.
"ಪಳಂವ್ಕ್ ಗೆಲ್ಯಾರ್ ಹ್ಯಾ ಸಂಸಾರಾಂತ್ ಕಾಂಯ್ ನಾ ರಾಯನ್! ಜಶೆಂ ತೊ ಆಸ್ರೊ!" ಥೊಡ್ಯಾ ವೆಳಾಚಾ ಮೌನಾ ಉಪ್ರಾಂತ್ ಮಿಶೇಲ್ ಸವ್ಕಾಸ್ ಉಲಯ್ಲೆಂ. "ತ್ಯಾ ಆಸ್ರ್ಯಾಂತ್ ಆಮ್ಚೆಂ ಕಾಂಯ್ ನಾ ಮ್ಹಳ್ಳ್ಯಾಪರಿಂ ದಿಸ್ತಾ ಜಾಲ್ಯಾರ್ಯ್ ಥಂಯ್ಚರ್ ಆಮ್ಚೆಂ ಮಸ್ತ್ ಆಸಾ! ಹಾವೆಂ ಥಂಯ್ಚರ್ ವಚೊನ್ ಪಳೆಲಾಂ. ಮನ್ಶ್ಯಾ ಜಿವಿತಾಚಿಂ ಸತಾಂ ಜಾಣಾಂ ಜಾಂವ್ಕ್ ತುಕಾ ದೆವಾಳಾಕ್ ವಚೊಂಕ್ ಜಾಯ್ ಮ್ಹಣೊನ್ ನಾ. ಯಾ ವೊರೆ ವಿಂಗಡ್ ರಾನಾಂತ್ ಎಕ್ಸುರ್ಪಣಾಕ್ ವೆಂಗುಂಕ್ ಜಾಯ್ ಮ್ಹಣೊನ್ ನಾ. ಏಕ್ ಪಾವ್ಟಿಂ ಜರ್ ತುಂ ಆಸ್ರ್ಯಾಕ್ ವಚೊನ್ ಪಳೆಶಿ ಜಾಲ್ಯಾರ್ ಜಿವಿತಾಚಿಂ ಸಗ್ಳಿಂ ಸತಾಂ ತುಕಾ ಉಗ್ಡಾಪಿಂ ಜಾತೆಲಿಂ!" ಮಿಶೇಲ್ ಆತಾಂ ಮೌನ್ ಜಾಲೆಂ. ತೆಂ ತಶೆಂಚ್ ಮುಕ್ಲ್ಯಾ ರಸ್ತ್ಯಾಕ್ ಪಳೆತಾಲೆಂ.
"ತುಜೆಂ ಕೊಣ್ಯ್ ತ್ಯಾ ಆಸ್ರ್ಯಾಂತ್ ಆಸಾ?" ರಾಯನಾನ್ ಮಿಶೇಲಾ ವಯ್ರ್ ದುಬಾವ್ ಮಾರ್ಲೊ.
"ನಾ!"
"ತರ್....?"
"ಆಸ್ರ್ಯಾಂತ್ ಆಮ್ಚೆಂ ಕೊಣ್ಯ್ ಆಸೊಂಕ್ಚ್ ಜಾಯ್ ಮ್ಹಣೊನ್ ನಾ ರಾಯನ್! ಜಿವಿತ್ ಮ್ಹಣ್ತಾನಾ ಸಗ್ಳೆಂ ಎಕಾಮೆಕಾ ಸಂಭಂಧ್ ಆಸ್ತಾ. ಫಕತ್ತ್ ಮನ್ಶ್ಯಾಕ್ ಮಾತ್ರ್ ಹೆಂ ಜಿವಿತಾಚೆಂ ಸತ್ ಅಜೂನ್ ಉಗ್ಡಾಪೆಂ ಜಾಂವ್ಕ್ ನಾ! ಕಿತ್ಯಾಕ್ ಜಾಣಾಂಯ್...?" ಮಿಶೇಲಾನ್ ರಾಯನಾಚಾ ಕುಶಿನ್ ಘುಂವ್ಲೆಂ.
"ಕಿತ್ಯಾಕ್.....?" ರಾಯನಾನ್ ಆತಾಂ ಮಿಶೇಲಾ ತೆವ್ಶಿಂ ಆಪ್ಲಿ ತಕ್ಲಿ ಘುಂವ್ಡಾಯ್ಲಿ.
"ಹೆಂ ಸತ್ ಜಾಣಾಂ ಜಾಂವ್ಕ್ ಮನ್ಶ್ಯಾಕ್ ಆಪ್ಲೆಂ ಜಿವಿತ್ ಜಿಯೆಂವ್ಕ್ ಪಡ್ತಾ. ಪುಣ್ ಮನಿಸ್ ಆಪ್ಲೆಂ ಜಿವಿತ್ ಖಂಯ್ ಜಿಯೆತಾ? ತೊ ಜಿಯೆಂವ್ಕ್ಚ್ ನೆಣಾಂ. ದೆಕುನ್ ಮೊರೊನ್ ಮೊರೊನ್ ದೀಸ್ ಸಾರ್ತಾ! ಮೆಲ್ಲೊ ಮನಿಸ್ ಹ್ಯಾ ಸತಾಕ್ ಕಶೆಂ ಜಾಣಾಂ ಜಾತಲೊ? ಜಶೆಂ ಹೊ ರಸ್ತೊ!"
ಮಿಶೇಲಾಕ್ಚ್ ಪಳೆಲ್ಲ್ಯಾ ರಾಯನಾಕ್ ತೆಂ ಹ್ಯಾ ವಗ್ತಾರ್ ದುಸ್ರ್ಯಾಚ್ ಸಂಸಾರಾಂತ್ ಆಸಾ ಮ್ಹಳ್ಳ್ಯಾ ಪರಿಂ ಜಾಲೆಂ. ತೆಂ ಫಕತ್ತ್ ಕುಡಿನ್ ಮಾತ್ರ್ ಆಪ್ಣಾ ಮುಕಾರ್ ಹಾಜರ್ ಆಸಾ ಶಿವಾಯ್ ತಾಚೊ ಆತ್ಮೊ.....?
"ಮಿಶೇಲ್.....?" ರಾಯನಾನ್ ಮಿಶೇಲಾಕ್ ಜಾಗಂವ್ಚೆಂ ಪ್ರಯತ್ನ್ ಕೆಲೆಂ.
"ಹ್ಯಾ ರಸ್ತ್ಯಾಕ್ ಪಳೆ ರಾಯನ್! ಪಳಂವ್ಕ್ ಹೊ ರಸ್ತೊ ವೀರಾನ್! ಬಂಜರ್! ಹಾಚ್ಯೆರ್ ಕಾಂಯ್ಚ್ ಕಿರ್ಲಾನಾ! ತರ್ಯ್ ಹ್ಯಾ ರಸ್ತ್ಯಾರ್ ಮಸ್ತ್ ಆಸಾ. ಹ್ಯಾ ರಸ್ತ್ಯಾರ್ ಶಿಂಪಡ್ಲೆಲಿಂ ನೆಣ್ತಿಂ ಸಪ್ಣಾಂ ದಿಸ್ತಾತ್ ಮ್ಹಾಕಾ. ಹ್ಯಾ ರಸ್ತ್ಯಾರ್ ಗಳೊನ್ ಗೆಲ್ಲೊ ಘಾಮ್ ದಿಸ್ತಾ. ಹ್ಯಾ ರಸ್ತ್ಯಾರ್ ಅಜೂನ್ ಜಿವ್ಸಾಣೆನ್ ದಡ್ಬಡ್ಚೆ ರಗ್ತಾ ಥೆಂಬೆ ದಿಸ್ತಾತ್ ಮ್ಹಾಕಾ!"
ತಿತ್ಲೆಂಚ್!
’ಗಕ್ಕ್’ ಕರುನ್ ರಾಯನಾನ್ ಜಿಪಾಚಿ ಬ್ರೇಕ್ ದಾಂಬ್ಲಿ. ತಾಚ್ಯಾ ಸವೆಂ ತಾಣೆಂ ಆಪ್ಲ್ಯಾ ಜಿಪಾಕ್ ರಸ್ತ್ಯಾ ಥಾವ್ನ್ ಸಕಯ್ಲ್ ದೆಂವಯ್ಲೆಂ.
ಮಿಶೇಲಾಚಿಂ ಉತ್ರಾಂ ಆಯ್ಕೊನ್ ರಾಯನ್ ಆತಾಂ ಸಂಪೂರ್ಣ್ ಭಿಯೆಲೊ. ಮಿಶೇಲ್ ಕಿತೆಂ ಉಲಯ್ತಾ ತೆಂ ತಾಕಾ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಹಾಚ್ಯಾ ಆದಿಂ ಮಿಶೇಲಾನ್ ತಾಚ್ಯೆ ಸಂಗಿಂ ಆಸೊ ಭರ್ತಾವ್ ಕೆಲ್ಲೊ ನಾ. ತರ್ ಆತಾಂ....?
"ತುಂ ಹುಶಾರ್ ಆಸಾಯ್ ಮಿಶೇಲ್...?" ರಾಯನಾನ್ ಮಿಶೇಲಾಚಾ ಖಾಂದಾರ್ ಹಾತ್ ಘಾಲೊ.
"ತುಕಾ ತೆಂ ಸಮ್ಜೊಂಚೆಂ ನಾ ರಾಯನ್!" ಮಿಶೇಲಾನ್ ರಾಯನಾಕ್ಚ್ ಪಳೆಲೆಂ.
"ಮ್ಹಾಕಾ ಸಮ್ಜಾಲೆಂ ಮಿಶೇಲ್! ಹಾಂವ್ ಜರ್ ಆಜ್ ತುಕಾ ಸಮ್ಜೊಂಕ್ ಸಕ್ಲೊಂ ನಾ ಜಾಲ್ಯಾರ್ ತುಕಾ ಕೆದಿಂಚ್ ಸಮ್ಜೊಂಕ್ ಸಕ್ಚೊಂ ನಾ!" ರಾಯನಾನ್ ಆಪ್ಲ್ಯಾ ಹಾತಾಕ್ ಮಿಶೇಲಾಚಾ ಖಾಂದಾರ್ ಥಾವ್ನ್ ದೆಂವಯ್ಲೊ ಆನಿ ತಾಣೆಂ ಜಿಪಾಚೆಂ ಸ್ಟೇರಿಂಗ್ ಹಾತಿಂ ಧರ್ಲೆಂ.
"ತುಜ್ಯಾ ಮತಿಕ್ ಖಂಯ್ ಶಾಂತಿ ಮೆಳ್ತಾ ಥಂಯ್ಚರ್ ಹಾಂವ್ ತುಜ್ಯಾ ಬರಾಬರ್ ಆಸಾಂ ಡಾರ್ಲಿಂಗ್! ತುಕಾ ಆತಾಂ ಹಾಂವ್ ಖಂಯ್ ಆಪವ್ನ್ ವರ್ತಾಂ ಪಳೆ......!"
ರಾಯನಾನ್ ಆಪ್ಲ್ಯಾ ಜಿಪಾಕ್ ರಸ್ತ್ಯಾರ್ ಹಾಡ್ಲೆಂ.
"ಖಂಯ್ ಆಪವ್ನ್ ವರ್ತಾಯ್...?" ಮಿಶೇಲಾಕ್ ರಾಯನ್ ಕಿತೆಂ ಸಾಂಗ್ತಾ ತೆಂ ಕಳ್ಳೆಂ ನಾ.
"ಯು ಜಸ್ಟ್ ವಾಚ್ ಎಂಡ್ ಸೀ ಡಾರ್ಲಿಂಗ್!" ರಾಯನ್ ಹಾಸ್ಲೊ.
*************
ವೊರಾಂ ಸಾಂಜೆಚಿಂ ಚಾರ್ ವ್ಹಾಜ್ತಾನಾ ಜನರಲ್ ಜಗ್ಜೀತ್ ಸಿಂಗ್ ಆಪ್ಲ್ಯಾ ಘರಾಚ್ಯಾ ವಾಟೆರ್ ಆಸ್ಲ್ಲೊ. ಸಾಕಾಳಿಂ ಆಲಿಯಾ ತಾಕಾ ಮೆಳೊನ್ ಗೆಲ್ಯಾ ಉಪ್ರಾಂತ್ ತೆಂ ತಾಕಾ ಮೆಳೊಂಕ್ ನಾತ್ಲ್ಲೆಂ. ಪುಣ್ ಸಾಂಜೆಚಾ ಜೆವ್ಣಾ ವಿಶ್ಯಾಂತ್ ಆಲಿಯಾನ್ ಉಲ್ಲೇಖ್ ಕೆಲ್ಲೊ ತೊ ತಾಕಾ ಉಡಾಸ್ ಆಸ್ಲ್ಲೊ.
ಆಲಿಯಾ ಆನಿ ಬಾಲಿವುಡ್!
ಖಂಯ್ಚಾಯ್ ಎಕಾ ಸಾಂಗಾತಾ ಸಂಭಂಧ್ ಜೊಡ್ಲ್ಯಾರ್ಯ್ ತಾಚ್ಯೆ ಥಾವ್ನ್ ಆಪ್ಣಾಚಿ ಪಬ್ಲಿಸಿಟಿ ಖಂಡಿತ್ ಸಾದ್ಯ್ ಆಸಾ! ಜಗ್ಜೀತ್ ಸಿಂಗ್ ಚಿಂತಾಲೊ.
ಆಲಿಯಾಚಾ ತೊಂಡಾ ಥಾವ್ನ್ ಭಾಯ್ರ್ ಯೆಂವ್ಚೆಂ ಆಪ್ಣಾಚೆಂ ನಾಂವ್ ಫುಡಾರಾಕ್ ಆಪ್ಣಾಕ್ ಸಾಂಗಾತ್ ದೀಂವ್ಕ್ ಸಕ್ತಾ! ಪುಣ್ ಆಪ್ಲೆಂ ಸೆಲ್ಪೋನ್ ವ್ಹಾಜ್ಲ್ಯಾರ್ ಮಾತ್ರ್ ಹೆಂ ಮ್ಹಜೆಂ ಸಪಾಣ್ ಖರೆಂ ಜಾಂವ್ಕ್ ಸಾದ್ಯ್ ಆಸಾ. ನಾ ಜಾಲ್ಯಾರ್.....?
ಜನರಲ್ ಸಿಂಗಾನ್ ಆಪ್ಲ್ಯಾ ಸೆಲ್ಪೋನಾಕ್ ಪಳೆಲೆಂ. ತೆಂ ಮೌನ್ ಆಸ್ಲ್ಲೆಂ ಜಶೆಂ ತೆಂ ಲಾಂಭ್ ವಿಶೆವಾಂತ್ ಆಸಾ ತಶೆಂ!
ಹೆಂ ಸೆಲ್ಪೋನ್ ಆಜ್ ಆಪ್ಣಾಚೆಂ ಜಾವ್ನ್ಯ್ ತೆಂ ಆಪ್ಣಾಚ್ಯಾ ತಾಬೆಂತ್ ನಾ ಮ್ಹಳ್ಳ್ಯಾ ಪರಿಂ ಜನರಲಾಕ್ ದಿಸ್ಲೆಂ.
ಜಿವಿತ್ಯ್ ಕೆದ್ನಾಂ ಕೆದ್ನಾಂ ಹ್ಯಾ ಸೆಲ್ಪೋನಾ ಪರಿಂ! ಹರ್ಯೆಕ್ ವಗ್ತಾರ್ ಆಪ್ಲ್ಯಾ ಸಾಂಗಾತಾ ಆಸ್ತಾ ಜಾಲ್ಯಾರ್ಯ್ ಕೆದ್ನಾಂ ಕೆದ್ನಾಂ ಆಪ್ಣೆಂ ಚಿಂತ್ಲ್ಲ್ಯಾಪರಿಂ ಚಲಾನಾ. ತಾಕಾ ವೇಳ್ ಚಲಯ್ತಾ! ಆನಿ ಹೊ ವೇಳ್.....?
ಹೊ ವೇಳ್ ಹ್ಯಾ ವಗ್ತಾರ್ ಜನರಲಾಕ್ ಸಾಂಗಾತ್ ದೀಂವ್ಕ್ ಸಲ್ವಾಲ್ಲೊ!
ವೊರಾಂ ಭರ್ತಿ ಸಾತ್ ವ್ಹಾಜ್ತಾನಾ ಜನರಲ್ ಜಗಜೀತ್ ಸಿಂಗಾಚೆಂ ಸೆಲ್ಪೋನ್ ವ್ಹಾಜ್ಲೆಂ.
"ಹಲೋ.....!?" ಜನರಲಾಚಾ ತಾಳ್ಯಾಂತ್ ಎದೊಳ್ ಜಿರೊನ್ ಗೆಲ್ಲೊ ಹುರುಪ್ ಉಮಾಳುನ್ ಆಯ್ಲೊ.
"ಆಲಿಯಾ ಉಲಯ್ತಾಂ!"
ತ್ಯಾ ಕುಶಿನ್ ಆಲಿಯಾಚೊ ತಾಳೊ ಆಯ್ಕೊನ್ ಜನರಲಾಚಾ ಜಿವಾಂತ್ ಜೀವ್ ಆಯಿಲ್ಲ್ಯಾ ಪರಿಂ ತಾಕಾ ಜಾಲೆಂ. ಪುಣ್ ತ್ಯಾ ಆಯಿಲ್ಲ್ಯಾ ಜಿವಾ ಸವೆಂ ಆಲಿಯಾಚಾ ತಾಳ್ಯಾಂತ್ ಆಸ್ಲ್ಲೆಂ ಉದಾಸ್ಪಣ್ ಪಳವ್ನ್ ತಾಕಾ ದುಬಾವ್ ಜಾಲೊ.
"ಕಿತೆಂ ಜಾಲೆಂ ಆಲಿಯಾ.....?" ಜನರಲಾನ್ ವಿಚಾರ್ಲೆಂ.
".........!" ಆಲಿಯಾ ತ್ಯಾ ಕುಶಿನ್ ಥಾವ್ನ್ ಉಲಯ್ಲೆಂ.
ತಿತ್ಲೆಮ್ಚ್!
ಜನರಲ್ ’ಸಟ್ಟ್’ ಕರುನ್ ಆಪ್ಣೆ ಬಸ್ಲೆಲ್ಯಾ ಸೊಫಾರ್ ಥಾವ್ನ್ ಉಟ್ಲೊ.
ತ್ಯಾ ಕುಶಿನ್ ಆಲಿಯಾನ್ ಉಲಯಿಲ್ಲೆಂ ಆಯ್ಕೊನ್ ಜನರಾಲಾಚೆಂ ರಗಾತ್ ಸಳ್ಸಳೊಂಕ್ ಲಾಗ್ಲೆಂ. ತಾಚೊ ರಾಗ್ ತಳ್ಮಟ್ಯಾಕ್ ಚಡ್ಲೊ. ತಾಕಾ ಕಾಂಯ್ಚ್ ಉಲಂವ್ಕ್ ಜಾಲೆಂ ನಾ. ತೊ ಆಪ್ಲ್ಯಾ ಜಿಬೆಕ್ ಆರ್ ಮಾರ್ಲ್ಲ್ಯಾ ಪರಿಂ ಮೌನ್ ಜಾಲೊ. ತ್ಯಾ ಕುಶಿನ್ ಆಲಿಯಾನ್ ಕೆದ್ನಾಂ ಟೆಲಿಪೋನ್ ಭಂಧ್ ಕೆಲ್ಲೆಂ ತೆಂ ತಾಕಾಚ್ ಕಳ್ಳೆಂ ನಾ. ತೊ ತಸೊಚ್ಚ್ ಪೊನ್ ಕಾನಾಕ್ ಲಾವ್ನ್ ಉಭೊಚ್ ಉರ್ಲೊ.
"ಕೆದಾಳಾ ಯೆತಾ ಖಂಯ್?"
ಪೊನಾಚೆರ್ ಉಲಯಿಲ್ಲ್ಯಾ ಆಪ್ಲ್ಯಾ ಘೊವಾಕ್ ತಾಚ್ಯಾ ಲಾಗಿಂ ಥಾವ್ನ್ಚ್ ಪಳವ್ನ್ ರಾವ್ಲೆಲ್ಯಾ ಜಗ್ಜೀತಾಚ್ಯಾ ಬಾಯ್ಲೆನ್ ಸವಾಲ್ ಕರ್ತಾನಾಚ್ ಜನರಲ್ ಜಾಗೊ ಜಾಲ್ಲೊ.
ಆಪ್ಣಾಕ್ ಸವಾಲ್ ಕೆಲ್ಲ್ಯಾ ಆಪ್ಲ್ಯಾ ಬಾಯ್ಲೆಕ್ ತೊ ಕಿತೆಂ ಸಾಂಗ್ತಲೊ?
"ಆಂ.....?" ಜನರಲಾನ್ ಆಪ್ಲ್ಯಾ ಪೊನಾಕ್ ಕಾಡುನ್ ಆಪ್ಣೆಂ ಪಯ್ಲೆಂ ಬಸ್ಲೆಲ್ಯಾ ಸೊಫಾಚೆರ್ ಉಡಯ್ಲೆಂ. ತೊ ಆಪ್ಲ್ಯಾ ಮುಕಾರ್ ಆಪ್ಣಾಚ್ಯಾ ಜವಾಬೆಕ್ ರಾಕ್ಚ್ಯಾ ಆಪ್ಲ್ಯಾ ಬಾಯ್ಲೆಕ್ಚ್ ಥೊಡೊ ವೇಳ್ ಪಳವ್ನ್ ರಾವ್ಲೊ. ಬಾಯ್ಲೆಕ್ ತೊ ಕಿತೆಂ ಜವಾಬ್ ದಿತಲೊ?
ಘೊವಾಚೆಂ ವರ್ತನ್ ಪಳವ್ನ್ ಜಗ್ಜೀತಾಚಾ ಬಾಯ್ಲೆಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಿ ಆಪ್ಲ್ಯಾ ಘರಾ ಬಾಲಿವುಡಾಚೆಂ ಹೀರೋಯಿನ್ ಜೆವ್ಣಾಕ್ ಯೆತಾ ಮ್ಹಣೊನ್ ಖುಶ್ ಜಾಲ್ಲಿ. ಏಕ್ ಬಾಲಿವುಡಾಚೆಂ ಹೀರೋಯಿನ್ ಆಪ್ಣಾಚಾ ಘರಾ....? ಜಗ್ಜೀತಾಚಾ ಬಾಯ್ಲೆಸೊ ಸಂತೊಸ್ ವರ್ಣುನ್ ಸಾಂಗೊಂಕ್ ನಜೊ ತಸಲೊ! ಆಪ್ಣಾಚಾ ಸಮಾಜೆಂತ್ ಆಪುಣ್ ಸಗ್ಳ್ಯಾಂ ಪ್ರಾಸ್ ವಯ್ರ್ ಪಾವ್ಲಲೊ ಆನ್ಭೋಗ್ ತಿಕಾ ಜಾಲ್ಲೊ. ಆಲಿಯಾನ್ ಆಪ್ಣಾಚಾ ಘರಾ ಜೆವ್ಣಾಕ್ ಯೆಮ್ವ್ಚೊ ವಿಶಯ್ ತಿಣೆಂ ಆಪ್ಲ್ಯಾ ಸೆಜಾರ್ಚ್ಯಾಂ ಲಾಗಿಂ ವಾಂಟುನ್ ಘೆತಾನ ಸೆಜಾರ್ಚ್ಯಾ ಬಾಯ್ಲಾಂಚಾ ತೊಂಡಾರ್ ಜಾಲ್ಲಿ ಬದ್ಲಾವಣ್ ಪಳವ್ನ್ ತಿಕಾ ಹ್ಯಾ ತಿಚ್ಯಾ ವ್ಹಡ್ಪಣಾಚೊ ಆನ್ಭೋಗ್ ಖರೊಚ್ಚ್ ಕಾಳ್ಜಾಕ್ ಲಾಗ್ಲ್ಲೊ. ಪುಣ್ ಆತಾಂ.....?
"ಕಿತೆಂ ಜಾಲೆಂ?" ಆತಾಂ ತಿಕಾಯ್ ಘೊವಾಚ್ಯಾ ವರ್ತನಾಚೆರ್ ದುಬಾವ್ ಜಾಲೊ.
ಆಪ್ಣಾಚೊ ಘೊವ್ ತೀನ್ ವೊರಾಂ ಥಾವ್ನ್ ರಾಕೊನ್ ಆಸ್ಲ್ಲೆಂ ಪೋನ್ ಆಯಿಲ್ಲೆಂಚ್ ತ್ಯಾ ಪೊನಾ ವಯ್ಲ್ಯಾ ಉತ್ರಾಂಕ್ ಆಯ್ಕೊನ್ ಎಕಾಚ್ಚ್ ಫರಾ ತಾಚೊ ಜಿನೊಸ್ ಬದ್ಲಾಲ್ಲೊ ಪಳೆಲ್ಲ್ಯಾ ತಿಚ್ಯಾ ಮತಿಂತ್ ದುಬಾವಾಚೊ ಕಿಡೊ ಕಾಂತಂವ್ಕ್ ಲಾಗ್ಲೊ.
"ಇತ್ಲೆಂ ವ್ಹಡ್ಲೆಂ ಇನ್ಸಲ್ಟ್!" ಜನರಲಾನ್ ಆಪ್ಲಿ ಮೂಟ್ ಆಂರ್ದಿಲಿ. ದಾವ್ಯಾ ಹಾತಾನ್ ಆಪ್ಲ್ಯಾ ಉಜ್ವ್ಯಾ ಹಾತಾರ್ ಆಸ್ಲ್ಲ್ಯಾ ಆಪ್ಣಾಚ್ಯಾ ಸ್ಟೀಲಾಚಾ ಬೊಳ್ಯಾಕ್ ತೊ ರಾಗಾನ್ ಮ್ಹಳ್ಳ್ಯಾಪರಿಂ ಘುಂವ್ಡಾಂವ್ಕ್ ಲಾಗ್ಲೊ.
ತಾಣೆಂ ಚಿಂತ್ಲ್ಲೆಂ ಸಗ್ಳೆಂ ಉಳ್ಟೆಂಚ್ ಜಾಲ್ಲೆಂ. ಆಜ್ ತಾಚ್ಯಾಚ್ ಘರಾಂತ್ ತಾಚಿ ಮರ್ಯಾದ್ ತೀನ್ ತಿರ್ಕುಟ್ ಜಾಲ್ಲಿ. ತೊ ಆತಾಂ ಆಪ್ಲ್ಯಾ ಬಾಯ್ಲೆಕ್ ಕಿತೆಂ ಸಾಂಗ್ತಲೊ?
ಹೆಂಚ್ ಕೀ ಆಲಿಯಾ ಆಜ್ ಆಪ್ಲ್ಯಾ ಘರಾ ಜೆವ್ಣಾಕ್ ಯೇನಾ!
ಹೆಂ ತೊ ಕಶೆಂ ಸಾಂಗ್ತಲೊ? ಆಲಿಯಾ ಬಾಲಿವುಡಾಚೆಂ ಹೀರೋಯಿನ್ ಆಪ್ಲ್ಯಾ ಘರಾ ಆಜ್ ರಾತಿಚಾ ಜೆವ್ಣಾಕ್ ಯೆತಾ ಮ್ಹಣೊನ್ ವರ್ತ್ಯಾ ಖುಶೆನ್ ಮ್ಹಳ್ಳ್ಯಾಪರಿಂ ಸಾಂಗ್ಲೆಲ್ಯಾ ಆಪ್ಲ್ಯಾಚ್ ಜಿಬೆನ್ ತೊ ಅತಾಂ ಆಲಿಯಾ ಆಜ್ ಆಪ್ಣಾಚಾ ಘರಾ ಜೆವ್ಣಾಕ್ ಯೇನಾ ಮ್ಹಣೊನ್ ಕಶೆಂ ಉಚಾರ್ತಲೊ?
ಜನರಲಾಚಾ ಬಾಯ್ಲೆನ್ ಜೆವ್ಣಾಚಿ ತಯಾರಾಯ್ ಕೆಲ್ಲಿ. ಸೆಜಾರ್ಚಿಂ ಜನೆಂಲಾಂತ್ಲ್ಯಾನ್ ಘಡ್ಯೆ ಘಡ್ಯೆ ತಿಳುನ್ ಪಳೆತಾಲಿಂ. ಕಾಲೇಜಿಕ್ ವೆಚಿಂ ತಾಚಿಂ ದೊಗಾಂ ಚೆಡ್ವಾಂ ಸಂತೊಸಾನ್ ಭರ್ಲ್ಲಿಂ. ಮಾಲ್ಗಡ್ಯಾ ಪುತಾನ್ ಕ್ಯಾಮರಾಕ್ ನವೊ ಫಿಲ್ಮ್ ರೋಲ್ ಘಾಲುನ್ ಕ್ಯಾಮರಾ ತಯಾರ್ ದವರ್ಲ್ಲೊ. ಚೆಡ್ವಾಂನಿ ತಾಚ್ಯಾ ಘರಾಕ್ ಕಿತ್ಲೆಂ ನಿತಳ್ ಆನಿ ನಿರ್ಮಳ್ ಕೆಲ್ಲೆಂ! ತಾಚ್ಯಾ ಘರಾಚಿ ಕಿತ್ಲಿ ಸುಂರ್ಗಾರಾಯ್ ಕೆಲ್ಲಿ!
ಕಾಂಯ್ಚ್ ಫಾಯ್ದೊ ನಾ. ಸಗ್ಳೆಂ ವ್ಯರ್ಥ್!
"ಕ್ಯಾಪ್ಟನ್ ರಾಣಾ!" ಜನರಲಾನ್ ಆಪ್ಲೆ ದಾಂತ್ ಚಾಬ್ಲೆ. ತ್ಯಾ ಆಪ್ಣೆ ಚಾಬ್ಲೆಲ್ಯಾ ದಾಂತಾಂ ಮಧೆಂ ಕ್ಯಾಪ್ಟನಾಚಾ ನಾಂವಾಕ್ಯ್ ತಾಣೆಂ ತಿತ್ಲ್ಯಾಚ್ ನಿಶ್ಟುರಾಯೆನ್ ಚಾಬ್ಲೆಂ.
"ತುಂ ಸರದಾರ್ ವಲ್ಲಭಾ ಭಾಯಿ ಪಟೇಲಾ ಪರಿಂ! ದಿ ಐರನ್ಮ್ಯಾನ್ ಆಫ್ ಇಂಡಿಯಾ!" ಆಲಿಯಾನ್ ಸಾಕಾಳಿಂ ಆಪ್ಣಾಚಾ ಕ್ಯಾಬೀನಾಂತ್ ಉಚಾರ್ಲ್ಲಿಂ ಉತ್ರಾಂ, ಹ್ಯಾ ವಗ್ತಾರ್, ಜನರಲಾಕ್ ಕಸಲ್ಯಾಗೀ ಭಳಿಶ್ಟ್ ಲೊಂಕ್ಡಾನ್ ಆಪ್ಲ್ಯಾ ತಳ್ಮಟ್ಯಾಕ್ ಮಾರ್ತಾತ್ ಮ್ಹಳ್ಳ್ಯಾಪರಿಂ ಜಾಲಿಂ.
ಆಲಿಯಾನ್ ಸಾಕಾಳಿಂ ಆಪ್ಣಾಚಾ ಆಫೀಸಾಂತ್ ಸಾಂಗ್ಲೆಲ್ಯಾ ಪರಿಂ, ಎದೊಳ್ ಆಪುಣ್ ಏಕ್ ಐರನ್ಮ್ಯಾನಾ ಪರಿಂ ಆಸ್ಲ್ಲೊಂ. ಪುಣ್ ಆತಾಂ...?
ಎಕಾಚ್ಚ್ ಘಡಿಯೆಂತ್ ಆಪುಣ್ ಲೊಂಕ್ಡಾ ಥಾವ್ನ್ ಮೇಣ್ ಜಾಂವ್ಕ್ ಪಾವ್ಲೊಂ ತೆಂ ಕಳ್ತಾನಾ ಜನರಲಾಕ್ ಕಿತೆಂ ಕರ್ಚೆಂ ತೆಂ ಕಳ್ಳೆಂ ನಾ.
ಜನರಲಾಚಾ ಘರಾಂತ್ ಹ್ಯಾ ಘಡ್ಯೆ ತಾಚ್ಯಾ ಭುರ್ಗ್ಯಾಂಕ್ ತಾಂಚಾ ಬಾಪಾಯ್ಚೆಂ ಹೆಂ ಮೌನ್ ಆನಿ ತಾಚೊ ಹೊ ರಾಗ್ ತಾಂಕಾ ಏಕ್ ಸಮ್ಜೊಂಕ್ ಜಾಯ್ನತ್ಲೆಲ್ಯಾ ತಸಲೊ ಮಿಸ್ತೆರ್ ಜಾಲ್ಲೊ ಜಾಲ್ಯಾರ್, ತಾಚ್ಯಾ ಬಾಯ್ಲೆಕ್ ಆಪ್ಲ್ಯಾ ಘೊವಾಚೆಂ ಹೆಂ ವರ್ತನ್ ತಿಚ್ಯಾ ದೊಳ್ಯಾಂ ಮುಕಾರ್ ದುಬಾವಾಕ್ ಫುಂಕ್ತಾಲೆಂ.
ಭಾಯ್ಲಿ ಮರ್ಯಾದ್ ಕಶಿಯ್ ಕಾಡ್ಲಿ. ಘರಾ ಭಿತರ್ಲಿ ಮರ್ಯಾದ್ಯ್ ಗೆಲಿ....?" ಜನರಲಾನ್ ಆಪ್ಲ್ಯಾ ಮತಿಂತ್ಚ್ ಆಪ್ಣಾಕ್ ಸವಾಲ್ ಕೆಲೆಂ.
ಆಪುಣ್ ಆತಾಂ ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂಕ್ ಕಶೆಂ ಸಮ್ಜಾಂವ್ ಕೀ ಆಲಿಯಾ ಆಜ್ ಆಮ್ಚ್ಯಾ ಘರಾ ಜೆವ್ಣಾಕ್ ಯೇನಾ! ಜನರಲ್ ಅಸಹಾಯಕ್ ಜಾಲ್ಲೊ.
ತಿತ್ಲೆಂಚ್!
ಆಪ್ಲ್ಯಾ ಮತಿಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ವೆತಾನಾ ಹೆವ್ಶಿಂ ತೆವ್ಶಿಂ ಪಳೆಲ್ಲೊ ತೊ ಮುಕ್ಲ್ಯಾ ಸೋಫಾಚೆರ್ ಗಳ್ಳೊ. ಲಾಗಿಂಚ್ ತಾಣೆಂ ಪಯ್ಲೆಂ ಉಡಯಿಲ್ಲೆಂ ಸೆಲ್ಪೋನ್ ವಿಶೆವ್ ಘೆವ್ನ್ ಆಸ್ಲ್ಲೆಂ. ಎಕಾ ಖಿಣಾಕ್ ತೆಂ ಪೋನ್ ಕಾಡುನ್ ಧರ್ಣಿಕ್ ಮಾರ್ಯಾಂ ತಶೆಂ ತಾಕಾ ಜಾಲೆಂ. ಪುಣ್ ತೊ ತ್ಯಾ ಕ್ಯಾಪ್ಟನಾಚಾ ರಾಗಾಕ್ ಹ್ಯಾ ನಿರ್ದೊಶಿ ಪೊನಾ ವಯ್ರ್ ಕಸೊ ಕಾಡ್ತಲೊ?
ಹ್ಯಾ ವಗ್ತಾರ್ ಸುರ್ಯೊ ಬುಡ್ಚ್ಯಾಕ್ಯ್ ಸುರ್ಯೊ ಉದೆವ್ನ್ ಆಯಿಲ್ಲೊ ಜಾಲ್ಯಾರ್....? ಆಪುಣ್ ಕೋಣ್ ತೆಂ ತ್ಯಾ ಕ್ಯಾಪ್ಟನಾಕ್ ದಾಖಯ್ತೊಂ! ಜನರಲಾಚಿ ಮತ್ ಆಪ್ಲ್ಯಾ ಭಿತರ್ಚ್ ನಿರ್ಧಾರ್ ಕರ್ತಾಲಿ. ಹ್ಯಾ ನಿರ್ಧಾರಾಕ್ ಸಾಂಗಾತ್ ದೀವ್ನ್ ಮ್ಹಳ್ಳ್ಯಾ ಪರಿಂ ತಾಚೊ ದಾವೊ ಹಾತ್ ತಾಚ್ಯಾ ಉಜ್ವ್ಯಾ ಹಾತಾರ್ ಆಸ್ಲೆಲ್ಯಾ ದಾಟ್ ಸ್ಟೀಲಾಚಾ ಬೊಳ್ಯಾಕ್ ಘುಂವ್ಡಾಯ್ತಾಲೊ.
"ಕೆದಾಳಾ ಯೆತಾ ಖಂಯ್ ಆಲಿಯಾ?" ಮತಿಂತ್ಲೊ ಉದ್ವೇಗ್ ಸಾಂಬಾಳುಂಕ್ ಜಾಯ್ನಾಸ್ತಾನಾ ಜನರಲಾಚಾ ಬಾಯ್ಲೆನ್ ಘೊವಾಕ್ ಪಳೆಲೆಂ.
ತಿತ್ಲೆಂಚ್!
ಏಕ್ ಪಾವ್ಟಿಂ ರಾಗಾನ್ ಮ್ಹಳ್ಳ್ಯಾಪರಿಂ ಜನರಲಾನ್ ಆಪ್ಲ್ಯಾ ಬಾಯ್ಲೆಕ್ ಪಳಯ್ಲೆಂ. ದುಸ್ರ್ಯಾ ಕ್ಷಣಾರ್ ತಾಚೊ ರಾಗ್ ಪೊಳುನ್ ಧಾಂವ್ಲೊ.
ಆಪ್ಣಾ ಮುಕಾರ್ ಕ್ಯಾಪ್ಟನ್ ರಾಣಾ ನ್ಹಯ್ ಆಪ್ಲಿ ಬಾಯ್ಲ್ ಉಭಿ ಆಸಾ ಮ್ಹಳ್ಳೆಂ ತೊ ವಿಸ್ರಾಲ್ಲೊ!
ಜನರಲ್ ಆಪ್ಲ್ಯಾ ಬಾಯ್ಲೆ ಮುಕಾರ್ ಶಾಂತ್ ಜಾಲೊ. ತಾಣೆಂ ಬಾಯ್ಲೆ ತೆವ್ಶಿಂ ಉಭಾರ್ಲ್ಲಿ ರಾಗಾಚಿ ನದರ್ ಆತಾಂ ತಗ್ಸಾಲಿ.
ಜನರಲಾ ಮುಕಾರ್ ಹ್ಯಾ ವಗ್ತಾರ್ ದುಸ್ರಿ ವಾಟ್ ನಾತ್ಲ್ಲಿ! ಹ್ಯಾ ವಗ್ತಾರ್ ಆಪ್ಣಾ ಮುಕಾರ್ ಆಪ್ಲಿ ಬಾಯ್ರ್ ಉಭಿ ಜಾಂವ್ಚ್ಯಾಕ್ಯ್ ತೊ ಕ್ಯಾಪ್ಟನ್ ರಾಣಾ ಉಭೊ ಜಾಲ್ಲೊ ಜಾಲ್ಯಾರ್ ತಾಕಾ ಆಪುಣ್ ಕೋಣ್ ಮ್ಹಳ್ಳೆಂ ತೆಂ ರಾಣಾಕ್ ದಾಖಂಯ್ತೊ. ಪುಣ್ ಆಪ್ಲ್ಯಾ ಬಾಯ್ಲೆ ಮುಕಾರ್.....? ಜನರಲಾಕ್ ಹೆಂ ಧಯ್ರ್ ನಾತ್ಲ್ಲೆಂ. ಎಕಾ ವಾಟೆನ್ ಮತಿಂತ್ಲೊ ರಾಗ್ ಆನಿ ದುಸ್ರ್ಯಾ ವಾಟೆನ್ ಆಪ್ಲ್ಯಾ ಬಾಯ್ಲೆ ಮುಕಾರ್ ಆಪ್ಣಾಚಿ ಸದಾಂಚಿ ಸಲ್ವಣಿ! ತಾಣೆಂ ಆತಾಂ ಸತಾಕ್ ಉಗ್ಡಾಪೆಂ ಕರುಂಕ್ಚ್ ಆಸ್ಲ್ಲೆಂ. ಆನಿ ಆತಾಂ, ತಾಣೆಂ ತ್ಯಾ ಸತಾಕ್ ಉಗ್ಡಾಪೆಂ ಕರುಂಕ್ ತೋಂಡ್ ಉಗಡ್ಲಾಂ ಮಾತ್ರ್!
ತಿತ್ಲ್ಯಾರ್!
ಜನರಲಾಚೆಂ ಪೋನ್ ಪರ್ತ್ಯಾಕ್ ವ್ಹಾಜೊಂಕ್ ಲಾಗ್ಲೆಂ.
"ಆಲಿಯಾ....?" ಪೊನಾಕ್ ಪಳೆಲ್ಲೊ ಜನರಲ್ ಮತಿಂತ್ಚ್ ಉದ್ಗಾರ್ಲೊ.
"ಹಲೋ......?" ಜನರಲಾನ್ ಪೋನ್ ಹಾತಿಂ ಘೆತ್ಲೆಂ.
"ಸಾರ್ ಹಾಂವ್ ಅರ್ಧ್ಯಾ ವೊರಾನ್ ಪಾವ್ತಾಂ! ಮ್ಹಾಕಾ ತುಮ್ಚೊ ಎಡ್ರೆಸ್ ಸಾಂಗ್ಶ್ಯಾತ್....?" ತ್ಯಾ ಕುಶಿನ್ ಥಾವ್ನ್ ಆಲಿಯಾ ಉಲಯ್ಲೆಂ.
ತಿತ್ಲೆಂಚ್!
ಆಜ್ ಜನರಲಾಚೊ ದುಸ್ರೊ ಜಲ್ಮ್ ಜಾಲ್ಲೊ!
************
"ಕ್ಯಾಪ್ಟನ್ ರಾಣಾ!" ಜನರಲ್ ಘರ್ಜಾಲೊ. ತಾಚೊ ತಾಳೊ ತ್ಯಾ ತಾಚ್ಯಾ ಆಫೀಸಾಚಾ ಚ್ಯಾರ್ಯ್ ವೊಣೊದಿಂಕ್ ಆಪ್ಟೊನ್ ಪ್ರತಿಧ್ವನಿತ್ ಜಾವ್ನ್ ಪಾಟಿಂ ಆಯ್ಲೊ.
"ಎಸ್ ಸಾರ್!"
ಜನರಲಾಚಾ ಆಫೀಸಾಂತ್ ತಾಚ್ಯಾ ಟೇಬಲಾ ಮುಕಾರ್ ನಮ್ರತಾಯೆನ್ ರಾಣಾ ಉಭೊ ಜಾಲ್ಲೊ. ಸಾಕಾಳಿಂ ಏರ್ಬೇಸಾಕ್ ಆಯಿಲ್ಲ್ಯಾ ತಾಕಾ ತಾಚ್ಯಾ ಟೇಬಲಾಕ್ ನೋಟಿಸ್ ತಯಾರ್ ಆಸ್ಲ್ಲೆಂ. ಕ್ಯಾಪ್ಟನಾಕ್ ಹೆಂ ಕಶೆಂ ಆನಿ ಕಿತ್ಯಾಕ್ ಮ್ಹಣೊನ್ ಸಮ್ಜಾಲೆಂ ನಾ ತರ್ಯ್ ತಾಣೆಂ ಜನರಲಾಚಿ ಹುಕುಮ್ ಪಾಳುಂಕ್ ಆಸ್ಲ್ಲಿ.
"ತುಂ ತುಕಾಚ್ಚ್ ಕಿತೆಂ ಚಿಂತಾಯ್? ಇಂಡಿಯನ್ ಏರ್ಪೋರ್ಸಾಚೊ ಚೀಫ್?" ಜನರಲ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
ಕ್ಯಾಪ್ಟನ್ ಮೌನ್ ರಾವ್ಲ್ಲೊ. ಜನರಲಾಚಾ ಪಯ್ಲ್ಯಾ ಸವಾಲಾನ್ಚ್ ತಾಚ್ಯಾ ಜಿಬೆಕ್ ಖಾಡುಂ ಮಾರ್ಲೆಂ. ತಾಕಾ ಧಖೊ ಬಸ್ಲೊ. ಜನರಲಾಚ್ಯಾ ಅಸಲ್ಯಾ ಸವಾಲಾಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ತಾಕಾ ಸಮ್ಜಾಲೆಂ ನಾ. ಜನರಾಲಾಕ್ಚ್ ಪಳೆಂವ್ಚೊ ರಾಣಾ ಮೌನ್ ಆಸ್ಲ್ಲೊ.
"ಮ್ಹಜ್ಯಾ ಸವಾಲಾಕ್ ತುವೆಂ ಜವಾಬ್ ದೀಂವ್ಕ್ ನಾಂಯ್.... ಕ್ಯಾಪ್ಟನ್!" ಜನರಲ್ಚ್ ಪರ್ತ್ಯಾಕ್ ಉಲಯ್ಲೊ.
"ನ್ಹಯ್ ಸರ್!" ರಾಣಾಕ್ ಆತಾಂ ಜವಾಬ್ ದಿಂವ್ಚಿಚ್ ಪಡ್ಲಿ.
"ಮಾಗಿರ್.....?"
ಜನರಲಾಚ್ಯಾ ತೊಂಡಾರ್ ವ್ಹಳೂ ಹಾಸೊ ಉದೆಲ್ಯೊ. ವಿಲಕ್ಷಣ್ ಹಾಸೊ!
"ಮ್ಹಾಕಾ ತುಜಿ ಜವಾಬ್ ಜಾಯ್ ಕ್ಯಾಪ್ಟನ್!" ಜನರಲಾಚೊ ತಾಳೊ ಮತ್ಸೊ ಸಾದ್ಲೊ.
"ಪ್ಲೈಂಯಿಂಗ್ ಕಮಾಂಡರ್!"
"ಮ್ಹಳ್ಯಾರ್... ಏಕ್ ಪೈಲೆಟ್! ಯಾಮ್ ಐ ರೈಟ್?"
"ಯು ಆರ್ ರೈಟ್ ಸರ್!"
"ತರ್ ತುವೆಂ ಮ್ಹಜೆಂ ಆರ್ಡರ್ ಕಶೆಂ ಮಾಂದುಂಕ್ ನಾಂಯ್....?"
"ಖಂಯ್ಚೆಂ ಆರ್ಡರ್ ಸರ್.....?"
"ಖಂಯ್ಚೆಂ ಆರ್ಡರ್.....? ಸೀ ದಿಸ್!" ಆಪ್ಲ್ಯಾ ಬಸ್ಕೆರ್ ಮುಕಾರ್ ಬಾಗ್ವಾಲ್ಲ್ಯಾ ಜನರಲಾನ್ ಥಂಯ್ಚ್ ತಾಚ್ಯಾ ಮೆಜಾರ್ ಪಡೊನ್ ಆಸ್ಲ್ಲೆಂ ಏಕ್ ಅಸೈನ್ಮೆಂಟ್ ಪೇಪರ್ ಕಾಡುನ್ ಕ್ಯಾಪ್ಟನಾಚಾ ಮುಕಾರ್ ಉಡಯ್ಲೆಂ.
ಕ್ಯಾಪ್ಟನಾನ್ ತಸೊಚ್ ಉಭೊ ಆಸ್ಲೆಲ್ಯಾ ಕಡೆನ್ ಥಾವ್ನ್ ತ್ಯಾ ಅಸೈನ್ಮೆಂಟ್ ಪೇಪರಾರ್ ಆಪ್ಲಿ ನದರ್ ಖಂಚಯ್ಲಿ. ಎಕ್ಚ್ಚ್ ಕ್ಶಣ್! ದುಸ್ರ್ಯಾ ಖಿಣಾರ್ ತಾಕಾ ಜನರಲಾಚಾ ಆಯ್ಚ್ಯಾ ಹ್ಯಾ ವರ್ತನಾಚೆಂ ಕಾರಾಣ್ ಸಮ್ಜಾಲ್ಲೆಂ. ತಾಣೆಂ ಆಪ್ಲಿ ತಕ್ಲಿ ಜನರಲಾ ತೆವ್ಶಿಂ ಉಕೊಲ್ಲಿ.
ತಿತ್ಲೆಂಚ್!
"ರೀಡ್ ಇಟ್ ಕ್ಯಾಪ್ಟನ್!" ಜನರಲಾಚೊ ತಾಳೊ ಪರ್ತ್ಯಾಕ್ ಸಾದ್ಲೊ.
"ಕ್ಯಾಪ್ಟನ್ ರಾಮ್ಪಾಲಾಕ್ ಪಯ್ಲೆಂ ಹಿ ಡ್ಯೂಟಿ ದಿಲ್ಲಿ. ಆನಿ ತೊ ಕಾಲ್ಚ್ಯಾ ದಿಸಾ ಫ್ರೀ ಆಸ್ಲ್ಲೊ!" ಕ್ಯಾಪ್ಟನಾನ್ ಧಯ್ರ್ ಆರಾಯ್ಲೆಂ
"ತೆಂ ತುಜೆಂ ಬಿಜ್ನೆಸ್ ನ್ಹಯ್! ತುವೆಂ ಮ್ಹಜ್ಯಾ ಆರ್ಡರಾಕ್ ಕಶೆಂ ಮಾಂದುಂಕ್ ನಾಂಯ್?"
"ಹಾಂವ್ ಹಾಂಗಾ ಏಕ್ ಕಮಾಂಡಿಂಗ್ ಟೀಚರ್! ಆನಿ ಎಕಾ ಕಮಾಂಡರಾಕ್ ಏಕ್ ಸ್ಟೂಡೆಂಟ್ ಆರ್ಡರ್ ದಿತಾ ತೆಂ ಮ್ಹಾಕಾ ಪಸಂದ್ ನಾ!" ಕ್ಯಾಪ್ಟನಾಚಾ ತಾಳ್ಯಾಂತ್ ಥೊಡೆಂ ಧಯ್ರ್ ಆಸ್ಲ್ಲೆಂ.
"ವಾಟ್ ಡು ಯು ಮೀನ್......?!" ಜನರಲ್ ಘರ್ಜಾಲೊ.
"ತುಂ ಮ್ಹಣ್ತಾಯ್ ಹಾಂವ್ ತುಜೊ ಸ್ಟೂಡೆಂಟ್.....?" ಜನರಲ್ ಆಪ್ಲ್ಯಾ ಬಸ್ಕೆರ್ ಮುಕಾರ್ ಆಯ್ಲೊ.
"ತುಂ ನ್ಹಯ್ ಸರ್!"
"ಆನಿ......?"
"ಆಲಿಯಾ! ಆಲಿಯಾ ಖಾನ್!"
"ಶಟಪ್ ಯು ಕ್ಯಾಪ್ಟನ್!" ಜನರಲ್ ಉಟೊನ್ ಉಭೊ ಜಾಲೊ. "ತುಂ ಆತಾಂ ಆಲಿಯಾಕ್ ಗುನ್ಯಾಂವ್ಕಾರ್ ಕರ್ತಾಯ್? ತುವೆಂ ಮ್ಹಜೆಂ ಆರ್ಡರ್ ಮಾಂದಿನಾಸ್ತಾನಾ ಸಗ್ಳ್ಯಾ ಏರ್ಬೆಸಾಂತ್ ಮ್ಹಾಕಾ ತುವೆಂ ಇನ್ಸಲ್ಟ್ ಕೆಲಾಂಯ್! ಆಲಿಯಾ ಥಾವ್ನ್ ಮಾತ್ರ್ ಕಾಲ್ ಮ್ಹಜಿ ಮರ್ಯಾದ್ ಉರೊಂಕ್ ಸಾದ್ಯ್ ಜಾಲಿ. ನಾ ಜಾಲ್ಯಾರ್ ಹಾವೆಂ......!" ಜನರಲ್ ರಾಗಾನ್ ಖರ್ಶೆಲ್ಲ್ಯಾಪರಿಂ ದಿಸ್ತಾಲೊ. ಕಾಲ್ಚ್ಯಾ ಸಾಂಜೆರ್ ತೊ ಆಪ್ಲ್ಯಾ ಬಾಯ್ಲೆ ಮುಕಾರ್ ಕಿತ್ಲೊ ಅಸಹಾಯಕ್ ಜಾಲ್ಲೊ ತಿತ್ಲೊಚ್ ತೊ ಆತಾಂ ಕ್ಯಾಪ್ಟನಾಚಾ ಮುಕಾರ್ ಆಪ್ಣಾಚೆಂ ಭಳ್ ದಾಖಯ್ತಾಲೊ. ಥೊಡೊ ವೇಳ್ ತೊ ತಸೊಚ್ ಕ್ಯಾಪ್ತನಾಕ್ ಪಳವ್ನ್ ರಾವ್ಲೊ.
ಕ್ಯಾಪ್ಟನಾ ರಾಣಾ ಆತಾಂ ಮೌನ್ ಆಸ್ಲ್ಲೊ. ಕಾಲ್ಚ್ಯಾ ದಿಸಾ ತಾಣೆ ಕೆಲ್ಲಿ ತಿ ಚೂಕ್ ಮ್ಹಣೊನ್ ತಾಕಾ ಸಮ್ಜಾಲ್ಲೆಂ. ಪುಣ್ ಹೆಂ ತಾಚ್ಯಾ ಆನಿ ರಾಮ್ಪಾಲಾ ಮಧ್ಲೆಂ! ತಾಣಿಂ ಆಪ್ಣಾ ಮಧೆಂ ತಾಂಚಾ ಆರ್ಡರಾಕ್ ಹೆವ್ಶಿಂ ತೆವ್ಶಿಂ ಬದ್ಲಿ ಕರುನ್ ಘೆತ್ಲ್ಲೆಂ. ಹ್ಯಾ ಕಾರಾಣಾ ಖಾತಿರ್ ಜನರಲ್ ಕಿತ್ಯಾಕ್ ಆಜ್ ಇತ್ಲೊಯ್ ರಾಗಾರ್ ಜಾಲಾ ತೆಂಚ್ ಕ್ಯಾಪ್ಟನಾಕ್ ಕಳ್ಳೆಂ ನಾ. ಕಾಲ್ ತಾಕಾ ಪರ್ತ್ಯಾ ದುಸ್ರ್ಯಾ ಪಾವ್ಟಿಂ ಆಲಿಯಾಚಾ ಮುಕಾರ್ ಜಿಕ್ಲ್ಲೊ ಆನ್ಭೋಗ್ ಜಾಲ್ಲೊ. ಎಕಾ ಬಾಲಿವುಡಾಚಾ ಹೀರೋಯಿನಾಕ್ ಆಪ್ಣೆಂ ಸಲ್ವಯಿಲ್ಲೊ ಆನ್ಭೋಗ್ ಜಾಲ್ಲೊ! ಪುಣ್ ಆತಾಂ......?
"ತುಂ ಕಾಲ್ ಕಸೊ ಮ್ಹಜ್ಯಾ ಆರ್ಡರಾಕ್ ಮಾಂದಿನಾಸ್ತಾನಾ ಗೆಲೊಯ್? ಕಸೊ...?" ಆಪ್ಣಾ ಮುಕ್ಲ್ಯಾ ಕ್ಯಾಪ್ಟನಾಚೆಂ ಮೌನ್ ಪಳೆಲ್ಲ್ಯಾ ಜನರಲಾಕ್ ತಾಚ್ಯಾ ಆಂಗಾರ್ ತಾಕಾ ಮುಯೊ ಚರ್ಲ್ಲೊ ಆನ್ಭೋಗ್ ಜಾಲೊ. "ಸಗ್ಳ್ಯಾ ಏರ್ಬೇಸಾಕ್ ಹಿ ಖಬಾರ್ ಆಸಾ. ಪುಣ್ ಆಲಿಯಾನ್ ತಾಚ್ಯಾ ಹೆಲ್ತಾಚೆಂ ನೀಬ್ ದಿಲ್ಲ್ಯಾನ್ ಹಾಂವ್ ಆನಿ ಮ್ಹಜಿ ಮರ್ಯಾದ್....." ಜನರಲ್ ರಾಗಾನ್ ಕಾಂಪ್ತಾಲೊ. ಕಾಲ್ಚ್ಯಾ ಉಡಾಸಾನ್ ತೊ ಆವೇಶಾಂತ್ ಆಯಿಲ್ಲೊ.
"ತಾಚ್ಯಾ ಹೆಲ್ತಾಕ್ ಕಾಂಯ್ ಜಾಂವ್ಕ್ ನಾತ್ಲ್ಲೆಂ ಸರ್! ತಾಣೆಂ ಚಿಂತ್ಲ್ಲ್ಯಾ ಪರಿಂ ಜಾಂವ್ಕ್ ನಾತ್ಲ್ಲೆಂ ಪಳವ್ನ್ ತಾಣೆಂ ಆಪ್ಲೆಂ ಶೂಟಿಂಗ್ ಕ್ಯಾನ್ಸಲ್ ಕೆಲ್ಲೆಂ!"
ತಿತ್ಲೆಂಚ್!
ಕ್ಯಾಪ್ಟನಾಚಿಂ ಉತ್ರಾಂ ಆಯ್ಕಾಲ್ಲ್ಯಾ ಜನರಲಾನ್ ಕ್ಯಾಪ್ಟನಾಕ್ಚ್ ಆಪ್ಲಿ ದೀಶ್ಟ್ ಜೊಕ್ಲಿ.
"ತುವೆಂ ಹಾಂಗಾ ಆಸ್ಚೆಂ ಫಕತ್ತ್ ತುಕಾ ದಿಲ್ಲಿ ತುಜಿ ಡ್ಯೂಟಿ ಕರುಂಕ್ ಮಾತ್ರ್. ಅಂಡರ್ಸ್ಟ್ಯಾಂಡ್....?" ಜನರಲ್ ಆಪ್ಲ್ಯಾ ಬಸ್ಕೆರ್ ಬಸ್ಲೊ.
ಆಪ್ಲ್ಯಾ ಮೆಜಾರ್ ಆಪ್ಣಾ ಮುಕಾರ್ ಪಡೊನ್ ಆಸ್ಲ್ಲೆಂ ಫೈಲ್ ಉಗ್ತೆಂ ಕೆಲ್ಲ್ಯಾ ತಾಣೆಂ ಆಪ್ಲಿ ದೀಶ್ಟ್ ಕ್ಯಾಪ್ಟನಾ ವಯ್ರ್ ಉಭಾರ್ಲಿ.
"ಯು ಆರ್ ಸಸ್ಪೆಂಡಡ್ ಕ್ಯಾಪ್ಟನ್ ರಾಣಾ!"
ಜನರಲಾನ್ ಆಪ್ಣೆ ಉಗ್ತೆಂ ಕೆಲ್ಲ್ಯಾ ಫೈಲಾಂತ್ಲಿಂ ದೋನ್ ಪೇಪರಾಂ ಕಾಡುನ್ ಕ್ಯಾಪ್ಟನಾಚಾ ಮುಕಾರ್ ಉಡಯ್ಲಿಂ.
"ಹಾಚೆಂ ಇನ್ವೆಸ್ಟಿಗೇಶನ್ ಜಾಂವ್ಕ್ ಜಾಯ್ ಸಾರ್! ಹಾಂವ್ ನಿರಾಫ್ರಾಧಿ! ಹೆಂ ಆಲಿಯಾನ್ ಮ್ಹಜ್ಯಾ ವಯ್ಲ್ಯಾ ಹಗ್ಯಾನ್ ಕೆಲಾಂ. ಹಾಂವ್ ತಾಕಾ ಬರ್ಯಾನ್ ವಳ್ಕಾತಾಂ. ಶಿ ಇಸ್ ಎ ಮ್ಯಾಡ್ ಗರ್ಲ್! ತಾಣೆಂ ಕಾಲ್ ಮ್ಹಜ್ಯಾ ಸವೆಂ ಕಸೊ ಭರ್ತಾವ್ ಕೆಲಾ ತೆಂ ತುಂ ನೆಣಾಂಯ್! ಆನಿ ತುಂ ತಾಕಾಚ್ಚ್ ಸಪೋರ್ಟ್ ಕರ್ತಾಯ್? ಹ್ಯಾ ವಿಶಿಂ ಇನ್ವೆಸ್ಟಿಗೇಶನ್ ಚಲಂವ್ಕ್ ಜಾಯ್ ಸಾರ್!" ರಾಣಾನ್ ವಾದ್ ಮಾಂಡ್ಲೊ.
"ಓ.....ಯ್ಯಾ....?" ಜನರಲ್ ಆತಾಂ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
ಥೊಡೊ ವೇಳ್ ಕಿತೆಂಗೀ ಚಿಂತ್ಲ್ಲ್ಯಾ ತಾಣೆ ಉಪ್ರಾಂತ್ ಮುಕಾರ್ ಬಾಗೊನ್ ಆಪ್ಲ್ಯಾ ಮೆಜಾ ವಯ್ಲ್ಯಾ ಟೆಲಿಪೋನಾಕ್ ಹೆವ್ಶಿಂ ವೊಡ್ಲೆಂ. ಟೆಲಿಪೊನಾ ವಯ್ರ್ ಇಂಟರ್ಕೋಮಾಚ್ಯಾ ಏಕ್ ನಂಬರಾಕ್ ತಾಣೆಂ ಡಯಲ್ ಕೆಲೆಂ.
"ಕ್ಯಾಪ್ಟನ್ ರಾಮ್ಪಾಲ್?"
"ಎಸ್ ಸಾರ್!" ತ್ಯಾ ಕುಶಿಸೊ ತಾಳೊ.
"ಟೇಕ್ ಚಾರ್ಜ್ ಆಫ್ ಕ್ಯಾಪ್ಟನ್ ರಾಣಾ!"
ಜನರಲಾನ್ ’ಟಕ್ಕ್’ ಕರುನ್ ಪೋನ್ ರಿಸೀವರಾಕ್ ತಾಚ್ಯಾ ಕ್ರೇಡಲಾ ವಯ್ರ್ ದಾಡಾಯ್ಲೆಂ.
"ತುಕಾ ಮ್ಹಜ್ಯಾ ಆರ್ಡರಾ ವಯ್ರ್ ಇನ್ವೆಸ್ಟಿಗೇಶನ್ ಚಲಂವ್ಕ್ ಜಾಯ್......?" ಜನರಲಾನ್ ಆಪ್ಲಿ ತಕ್ಲಿ ವಯ್ರ್ ಸಕಯ್ಲ್ ಹಾಲಯ್ಲಿ. "ಗೋ ಎಂಡ್ ಡೂ ಇಟ್. ಯು ಆರ್ ಡಿಸ್ಮಿಸ್ಡ್!"
ಜನರಲಾಚಿಂ ಉತ್ರಾಂ ಘಡ್ಗಡ್ಯಾ ಪರಿಂ ಕ್ಯಾಪ್ಟನ್ ರಾಣಾಚಾ ಕಾನಾಂತ್ ಸಾದ್ಲಿಂ. ತೊ ರಾವ್ಲ್ಲ್ಯಾ ಕಡೆಚ್ ಮಿಟಾಚೊ ಖಾಂಬೊ ಜಾಲೊ. ತಾಣೆಂ ಚಿಂತ್ಲ್ಲೆಂ ಜನರಲ್ ಆಪ್ಣಾಕ್ ಸಮ್ಜಾತಲೊ. ಹ್ಯಾಚ್ ಖಾತಿರ್ ತಾಣೆಂ ಜನರಲಾಕ್ ಇನ್ವೆಸ್ಟಿಗೇಶನಾಚೊ ಉಲೊ ದಿಲ್ಲೊ. ಪುಣ್ ಹೆಂ ತಾಕಾಚ್ ಮಾರಗ್ ಪಡ್ಲೆಂ.
"ತುಂ ತುಜ್ಯಾ ಕ್ಯಾಬಿನಾಕ್ ವಚ್ ಕ್ಯಾಪ್ಟನ್......! ತುಕಾ ಆರ್ಡರ್ ಥಂಯ್ ತುಜ್ಯಾ ಟೇಬಲಾರ್ ಪಾವ್ತೆಲೆಂ!"
ತಿತ್ಲ್ಯಾರ್!
"ಮೇ ಐ ಕಮಿನ್ ಸಾರ್!" ಮುಕ್ಲ್ಯಾ ದಾರಾರ್ ಎಕಾ ಚಲಿಯೆಚೊ ತಾಳೊ.
"ಆಲಿಯಾ.....! ಕಮ್ ಇನ್. ಕಮ್ ಇನ್!" ಜನರಲಾಚಾ ತೊಂಡಾರ್ ಹಾಸೊ ಉದೆಲ್ಯೊ.
"ತುವೆಂ ಆತಾಂ ವಚ್ಯೆತ್ ಕ್ಯಾಪ್ಟನ್!"
ಕ್ಯಾಪ್ಟನ್ ರಾಣಾಕ್ ಜನರಲಾಚಾ ಆದೇಶಾಕ್ ಪಾಳಿನಾಸ್ತಾನಾ ದುಸ್ರಿ ವಾಟ್ ನಾತ್ಲ್ಲಿ. ತೊ ಸವ್ಕಾಸ್ ಜನರಲಾಚಾ ಆಫೀಸಾ ಥಾವ್ನ್ ಭಾಯ್ರ್ ಚಮ್ಕಾಲೊ.
"ಹಲೋ.....? ಗುಡ್ ಮಾರ್ನಿಂಗ್!"
ಮುಕಾರ್ ಭೆಟ್ಲ್ಲ್ಯಾ ಆಲಿಯಾಚಾ ವಂದನಾಕ್ ಕ್ಯಾಪ್ಟನ್ ರಾಣಾನ್ ಫಕತ್ತ್ ಆಯ್ಕಾಲೆಂ ಮಾತ್ರ್ ಶಿವಾಯ್ ತಾಣೆಂ ಆಲಿಯಾಕ್ ಪಾಟಿಂ ವಂದನ್ ಕೆಲೆಂ ನಾ. ಕಿತ್ಯಾಕ್...., ಆಜ್ ತೊ ಆಲಿಯಾಚಾ ಮುಕಾರ್ ಸಲ್ವಾಲ್ಲೊ!
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
