ಸವಾಲ್!?

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾಝರ್ - 32. ಸವಾಲಾಂಕ್ ಏಕ್ ಸವಾಲ್!?

ಜೇಮ್ಸ್ ಲುವಿಸ್, ಒಮ್ಜೂರ್: ಜೇಮ್ಸ್ ಲುವಿಸ್ ಒಮ್ಜೂರ್, ಪ್ರಸ್ತುತ್ ಕಾಳಾರ್ ಸಮಾಜೆಂತ್ ಆಸ್ಚಾ ಸಮಸ್ಯಾಂಚೆರ್ ಅಪ್ಲ್ಯಾ ಕಾಣ್ಯೆಧ್ವಾರಿಂ ಆರ್ಸೊ ಧರ್ಚೆಂ ಪ್ರೇತನ್ ಕರ್ಚಾಂತ್ಲೊ ಎಕ್ಲೊ. ಅಪ್ರೂಪಾಯೆನ್ ಕಾಣ್ಯೊ ಬರಯ್ತಾ ತರ್‌ಯ್ ತಾಚಿ ಕಾಣಿ ಫಕತ್ತ್ ಏಕ್ ಮನರಂಜನಾಚಿ ಕಾಣಿ ಮಾತ್ರ್ ಜಾವ್ನ್ ಆಸಾನಾಸ್ತಾಂ, ಸಮಾಜಿಕ್ ನೀತ್, ಸಮಾಜಿಕ್ ಲಿಸಾಂವ್ ಆಟಾಪ್ತಾ ದೆಖುನ್ ಹಿ ಕಾಣಿ ಕೊಣೆಂಯ್ ಪರತ್ ಪರತ್ ವಾಚ್ಯೆತಾ ತಸಲಿ ಜಾವ್ನಾಸಾ.

ಜೇಮ್ಸ್ ಲುವಿಸ್

ಮ್ಹಜೊ ಪೂತ್ "?" ಮ್ಹಣ್ ವ್ಹಡ್ಲ್ಯಾನ್ ಉಲೊ ಕರ್‍ತಾಲೊ. ’ಹೊ ಕೊಣಾಕ್ ತಶೆಂ ಮ್ಹಣ್ತಾ’ ಮ್ಹಣ್ ಮೆಂದ್ವಾಂತ್ ಸವಾಲ್ ಭರೊನ್ ಭಾಯ್ರ್ ಆಂಗ್ಣಾಕ್ ಆಯಿಲ್ಲ್ಯಾ ವೆಳಾರ್ ಪುತಾನ್ "?" ಮ್ಹಣ್ ಉಲೊ ಕೆಲ್ಲೆಂ ದುಸ್ರ್ಯಾ ಕೊಣಾಯ್ಕೀ ನ್ಹಂಯ್. ಬಗಾರ್ ಮಾರ್ಗಾನ್ ಬಾಗ್ವೊನ್ ವೆಚ್ಯಾ ನತಾಲ್ ಬಾಯೆಕ್ ಮ್ಹಣ್ ಸಮ್ಜಾಲ್ಲೆಂಚ್ ರಾಗಾನ್ ಹಾಂವ್ ಕಡ್ಕಡೊಂಕ್ ಲಾಗ್ಲೊಂ. ಛೆ| ಮ್ಹಾತಾರಿ ಬಾಯ್ಲ್ ತಿ. ಪೆಂಕ್ಡಾಕ್ ಬಳ್ ನಾಸ್ತಾನಾ ಪೆಂಕಾಡ್ ಧರ್ಣಿಕ್ ಬಾಗ್ವಲಾಂ. ತಿಚಿ ಬಿರ್ಮತ್‌ಯಿ ದಿಸ್ಲಿ. ಪೂಣ್ ಕಿತೆಂ ಕರ್‍ಯೆತಾ? ಪಳೆತೆಲ್ಯಾಂಕ್ ತಿಕಾ ಕಿತೆಂ ಘರಾಚ್ ರಾವೊಂಕ್ ನಜೊಗಿ ಮ್ಹಳ್ಳೆಂ ಸವಾಲ್ ಉದೆಲ್ಲ್ಯಾನ್ ನವಾಲ್ ನಾ. ನಾ, ತಿ ಘರಾ ರಾಂವ್ಚಿ ಬಾಯ್ಲ್ ನ್ಹಂಯ್. ರಾಂವ್ಚೆಂ ಮ್ಹಲ್ಯಾರ್ ತಿಚೆಂ ಮ್ಹಳ್ಳೆಂ ಬಿಡಾರ್ ಜಾಂವ್, ತಿಚಿಂ ಮ್ಹಳ್ಳಿಂ ಮನ್ಶಾಂಯಿ ಹ್ಯಾ ಗಾಂವಾಂತ್ ನಾ ಮ್ಹಳ್ಳೆಂ ಸತ್ ಥೊಡ್ಯಾಂಕ್ ಮಾತ್ ಕಳಿತ್ ಆಸಾ.

’ನತಾಲ್ ಬಾಯೆಕ್ ಕಶೆಂ ಪುಣಿ ಆಸ್ರ್ಯಾಕ್ ವ್ಹರಿಜೆ’ ಎಕಾ ಫಲಾಣ್ಯಾ ದಿಸಾ ವಾಡ್ಯಾಚೊ ಗುರ್ಕಾರ್ ಮ್ಹಜಿ ಸಸಾಯ್ ವಿಚಾರ್ಚ್ಯಾಕ್ ಆಮ್ಗೆರ್ ಆಯ್‌ಲ್ಲೊ.

"ನತಾಲ್ ಬಾಯೆಚೊ ವಿಷಯ್ ತುಕಾ ಕಳಿತ್ ಆಸಾಗಿ? ತಿಕಾ ಪುತಾನ್ ಆನಿ ಸುನೆನ್ ಧಾಂವ್ಡಾಯ್ಲಾಂ ಖಂಯ್. ಪಾಪ್ ಬಾವ್ಡಿ ಏಕ್ ದೀಸ್ ಎಕ್ಲ್ಯಾಚ್ಯಾ ಘರಾ, ಅನ್ಯೇಕ್ ದೀಸ್ ಅನ್ಯೇಕ್ಲ್ಯಾಚ್ಯಾ ಘರಾ ರಾವ್ತಾ ಖಂಯ್. ಕಾಲ್ ಆಮ್ಗೆರ್ ಆಯ್ಲ್ಯಾ. ಹಾವೆಂ ವಚ್ ಮ್ಹಳ್ಯಾರ್ ದುಸ್ರ್ಯಾಂಚ್ಯಾ ಘರಾ ವೆತಾ. ಕ್ರಿಸ್ತಾಂವ್ ಜಾವ್ನ್ ತಿಕಾ ಏಕ್ ಥಾರೊ ಕರ್ನ್ ದಿನಾ ಜಾಲ್ಯಾರ್ ಆಮಿ ಜಲ್ಮೊನ್ ಕಿತೆಂ ಫಾಯ್ದೊ".

ತೊ ಉಲವ್ನ್ಂಚ್ ವೆತಾಲೊ. ತಿಚೆವಿಶ್ಯಾಂತ್ ಹಾಂವ್ ಥೊಡೆಂ ಜಾಣಾಂ, ತಿಕಾ ತೇಗ್ ಪೂತ್ ಆಸಾತ್. ತೆಗಾಂಯ್ಕಿ ಕಾಜಾರ್ ಜಾಲಾಂ. ತಿಚೊ ಘರ್ಕಾರ್ ತರ್ನ್ಯಾ ಪ್ರಾಯೆರ್‌ಚ್ ಅಂತರ್ಲೊ. ತಾಚೆ ಉಪ್ರಾಂತ್ ದೋನ್ ತೀನ್ ಘರಾಂನಿ ವಸ್ತುರ್ ಧುವ್ನ್ ಮೆಳ್‌ಲ್ಲ್ಯಾ ಚಾರ್ ಕಾಸಾಂನಿ ತಿಚ್ಯಾ ಭುರ್ಗ್ಯಾಂಕ್ ಪೊಸ್‌ಲ್ಲೆಂ. ಭುರ್ಗೆ ಜಾಲ್ಯಾರ್‌ಯಿ ಬರ್‍ಯಾ ಗುಣಾಂನಿ ವಾಡೊಂಕ್ ನಾಂತ್. ವಾಯ್ಟ್ ಚಾಲಿಂಚ್ಯಾ ಇಷ್ಟಾಂ ಸಂಗಿಂ ಭರ್‍ಸುನ್ ತಾಣಿಂಯಿ ವಾಯ್ಟ್ ಸವಯೊ ಆಪ್ಣಾಚ್ಯೊ ಕರ್ನ್ ಘೆತ್ಲ್ಯೊ.

ಭುರ್ಗೆ ತರ್ನಾಟೆ ಜಾಲೆ ಮ್ಹಣ್ತಾನಾ ಆವಯ್ ಬಾಪಾಯ್ಚೆಂ ಕೊಣ್ ಆಯ್ಕತಾ? ತಿಚೆ ಭುರ್ಗೆ ನಾಕಾ ನಾಕಾ ಮ್ಹಳ್ಯಾರ್‌ಯಿ ಮ್ಹವಾಲಿ ಜಾಂವ್ಕ್ ಪಾವ್‌ಲ್ಲೆ. ತಿಣೆಂ ಕೆಲ್ಲ್ಯಾ ಪಾತ್ಕಾಂಚೆಂ ಫಳ್ ಮ್ಹಣ್ ಗಾಂವ್ಚೊ ಲೋಕ್ ಉಲಂವ್ಚೆಂ ಹಾವೆಂ ಆಯ್ಕಾಲಾಂ.

ತಿಚೆಂ ಪಾತಾಕ್? ಹ್ಯಾ ಸವಾಲಾಕ್ಜಾಪ್ ಕೊಣಾಯ್ ಕಡೆನ್ ನಾತ್‌ಲ್ಲಿ. ತಿಚೊ ಘೊವ್ ಅಂತರ್ಲ್ಯಾ ಉಪ್ರಾಂತ್ ಎಕಾ ಬೊಣ್ಕ್ಯಾಚ್ಯಾ ಘರಾ ತಿ ಕಾಮಾಕ್ ವೆತಾಲಿ. ತವಳ್ ಥಾವ್ನ್ ತಿಕಾ ಬೊಣ್ಕ್ಯಾಕ್ ಬಾಂಧುನ್ ದಿಂವ್ಚೆಂ ಕಾಮ್ ಗಾಂವ್ಚ್ಯಾ ಲೊಕಾಂನಿ ಕೆಲ್ಲೆಂ. ನೀಜ್ ಜಾವ್ನ್ ಹೆಂ ಸಾರ್ಕೆಂಗಿ ಮ್ಹಳ್ಳೆಂ ಅನ್ಯೇಕ್ ಸವಾಲ್ "?" ಸವಾಲ್ ಜಾವ್ನ್ಂಚ್ ಉರ್‌ಲ್ಲೆಂ.

’ತಿಚ್ಯಾ ಭುರ್ಗ್ಯಾಂಕ್ ಕಳಯ್ಲ್ಯಾರ್ ಬರೆಂ ನ್ಹಂಯ್‌ಗಿ’

ಹಾಂವ್ ರಾಜಾಂವ್ ಉಲಯ್ಲೊಂ.

’ಬುರ್ಗೆಚ್ ತಿಕಾ ಬರೆಂ ಕರ್ನ್ ಪಳೆನಾಂತ್ ನ್ಹಂಯ್‌ಗಿ?’

ತಾಣೆಂ ಸಾಂಗ್ಚ್ಯಾಂತ್ ಸತ್ ಅಸ್‌ಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಭುರ್ಗಿಂ ಲ್ಹಾನ್ ಆಸ್ತಾನಾ, ತಾಂಚೆ ಥಂಯ್ ಗುಮಾನ್ ದವರುಂಕ್ ಸಯ್ತ್ ವೇಳ್ ಮೆಳಾನಾತ್‌ಲ್ಲ್ಯಾ ತಿಕಾ ತಿಚ್ಯಾ ಭುರ್ಗ್ಯಾಂ ಥಾವ್ನ್ ಪಾಲನ್ ಪೋಶಣ್ ಕರ್ಚೆಂ ಹಕ್ಕ್‌ಯಿ ಖಂಯ್ ಥಾವ್ನ್ ಯೇತ್?

’ಭುರ್ಗ್ಯಾಂಕ್ ತಿಣೆಂ ಕಶೆಂ ಪಳಯಿಲ್ಲೆಂ ಖಂಯ್?’

ಮ್ಹಜ್ಯಾ ಸವಲಾಕ್ ಗುರ್ಕಾರಾನ್ ತಕ್ಲಿ ಹಾಲಯ್ಲಿ.

’ಪುತಾ ಕಡೆನ್ಂಚ್ ಸಮಾ ಪಡಾನಾತ್‌ಲ್ಲ್ಯಾ ತಿಕಾ ಆಸ್ರ್ಯಾಂತ್ ಸಮಾ ಜಾಯ್ತ್‌ಗಿ? ಪರತ್ ’?’ ಸವಾಲ್. ಪುಣ್ ಹ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ತಿಕ್ಕೆ ಕಷ್ಟ್ ತರೀ ತಿಚ್ಯಾ ಜಿಣ್ಯೆ ವಯ್ರ್ನದರ್ ಘಾಲಿ ತರ್ ಥೊಡಿ ತರಿ ಜಾಪ್ ಮೆಳಾತ್.

ತಿಚ್ಯಾ ತೇಗ್ ಜಣ್ ಭುರ್ಗ್ಯಾಂ ಪಯ್ಕಿ ದೋಗ್ ಜಣ್ ಖಂಯ್ ಆಸಾತ್ ಮ್ಹಳ್ಳೆಂಚ್ ಕಳಿತ್ ನಾ. ನಿಮಾಣೊ ಎಕ್ಲೊ ಕೊಡ್ಯಾಳಾಂತ್ ವಸ್ತಿ ಕರ್ತಾ ಮ್ಹಣ್ ಖಬರ್ ಆಸಾ. ತೊಯಿ ಕೊಣ್‌ಗಿ ಅಕ್ರಿಸ್ತಾಂವ್ ಚಲಿಯೆಲಾಗಿಂ ಕಾಜಾರ್ ಜಾಲಾ ಖಂಯ್. ಗೆಲೆತ್ಯಾ ಪಾವ್ಸಳ್ಯಾಕ್ ತೊ ಯೆವ್ನ್ ತಿಕಾ ತಾಚ್ಯಾ ಘರಾ ಆಪವ್ನ್ ವ್ಹೆಲ್ಲೆಂ ಸಕ್ಡಾಂಕ್ ಕಳಿತ್ ಆಸ್‌ಲ್ಲೆಂ.

ಸ ಮಯ್ನ್ಯಾನಿಂಚ್ ತಿ ಪಾಟಿಂ ಯೇಜೆ ತರ್ ಕಾರಾಣ್ ಕಿತೆಂ? ತಿಕಾ ಆಮ್ಚ್ಯಾ ಗಾಂವಾಂತ್ ತಿಚೆಂ ಮ್ಹಳ್ಳೆಂ ಘರ್ ನಾ. ಪೂಣ್ ತಿಚಿಂ ಒಳ್ಕಿಂಚಿ ಆಸಾತ್ ಮ್ಹಣ್ ಪುತಾಕ್ ಸೊಡ್ನ್ ಯೆಂವ್ಚೆಂ ಮ್ಹಳ್ಯಾರ್?

ಸವಾಲಾಂಚಿ ಪೊಟ್ಲಿ ಸೊಡಂವ್ಚೆಂ ಪ್ರೇತನ್ ಕರ್ನ್ ಸಲ್ವತಾನಾ, ತಾಚ್ಯಾ ಪುತಾಕ್ ಆನಿ ಸುನೆಕ್ ಮೆಳೊನ್ ಕಿತೆಂ ಗಜಾಲ್ ಮ್ಹಣ್ ಪಳೆಂವ್ಕ್ ಗುರ್ಕಾರಾನ್ ಆನಿ ಹಾಂವೆಂ ಚಿಂತ್ಲೆಂ.

ಘರ್ ಸೊಧುನ್ ಕಾಡುಂಕ್ ತಿತ್ಲೆ ವಾಂದೆ ಜಾವ್ನಾಂತ್. ಘರ್ ಮ್ಹಣ್ಚ್ಯಾಕೀ ಏಕ್ ಕೊಡ್ಕೆಂ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಮಾರ್ಗಾರ್ ವೆಚೆಂ ಸುಣೆಂ ಆಮ್ಕಾಂ ಪಳೆವ್ನ್ ಬೊಬಾಟ್ ಘಾಲ್ನ್ ಧಾಂವೊನ್ ಆಯ್ಲೆಂ. ತಿತ್ಲ್ಯರ್ ಮೆಳ್ಕುಟಿ ನಾಯ್ಟಿ ನ್ಹೆಸೊನ್ ಏಕ್ ಬಾಯ್ಲ್ ಮನಿಸ್ ರಸ್ತ್ಯಾಕ್ ಧಾಂವೊನ್ ಆಯ್ಲಿ.

’ಕೊಣ್ ಜಾಯ್ ತುಮ್ಕಾಂ’ ಕಾನಡಿಂತ್ ತಿ ಉಲಯ್ಲಿ.

’ರೊಬಿನ್ ಹಾಚೆಂ ಘರ್ ಖಂಯ್ ಮ್ಹಣ್ ಕಳಿತ್ ಆಸಾಗಿ?’ ಹಾವೆಂ ವಿಚಾರ್ಲೆಂ.

’ಹಾಂವ್ ತಾಚಿ ಬಾಲ್. ಯೆಯಾ ಭಿತರ್ ಯೆಯಾ’ ತಿ ಸರಾಂ ಸರಾಂ ಭಿತರ್ ಧಾಂವ್ಲಿ ಆಣಿ ದೋನ್ ಪ್ಲಾಸ್ಟಿಕಾಚಿಂ ಕದೆಲಾಂ ಹಾಡ್ನ್ ಆಯ್ಲಿ.

’ರೊಬಿನ್ ನಾಂಗಿ?’ ಗುರ್ಕಾರಾನ್ ಸವಾಲ್ ಕೆಲೆಂ.

’ಆಸಾ ಅಳೆ ಹೊ ಥಂಯ್ ಆಸಾ’ ತಿಣೆಂ ಬೊಟ್ ದಾಕಯ್ಲ್ಯಾ ಕುಶಿನ್ ಪಳೆಲೆಂ. ತೊ ನಿದೆರ್ ಆಸಾ.

’ನಿದ್‌ಲ್ಲ್ಯಾಕ್ ಉಟಯ್ನಾಕಾ’ ಹಾವೆಂ ತಿಚೆಕಡೆನ್ ವಿನತಿ ಕೆಲಿ.

’ತಾಕಾ ನಿದ್ಚ್ಯಾಕ್ ರಾತ್ ಮ್ಹಳ್ಳಿ ನಾ. ದೀಸ್ ಮ್ಹಳ್ಳೊ ನಾ. ದಿಸಾಚೆಂ ಚವೀಸ್ ವೊರಾಂಯಿ ನಿದೊಂಕ್ ಪಾವಾನಾಂತ್.’

’ಹೊ’ ಗುರ್ಕಾರಾನ್ ಉದ್ಗಾರ್ ಸೊಡ್ಲೊ.

’ರಾವಾ ಪಿಯೆಂವ್ಕ್ ಕರ್ತಾಂ.’

ತಿಣೆಂ ಸಾಂಗ್ತಾನಾ ಹ್ಯಾ ಕುಟ್ಮಾಂತ್ ಕಿತೆಂ ಶಿಜ್ತಾ ಮ್ಹಳ್ಳೆಂ ಇಲ್ಲೆಂ ಇಲ್ಲೆಂ ಕಳೊಂಕ್ ಸುರು ಜಾಲೆಂ. ಆಮಿ ಪಿಯೆಂವ್ಕ್ ನಾಕಾ ಮ್ಹಣ್ ತಿಕಾ ಆಡಾಯ್ಲೆಂ.

’ಆಮಿ ಆಯಿಲ್ಲೊ ವಿಷಯ್, ತುಜ್ಯಾ ಸಾಸು ಮಾಂಯ್ ವಿಶಿಂ ಉಲಯಾಂ ಮ್ಹಣ್’ ಹಾವೆಂ ಉಲವ್ಣ್ಯಾಕ್ ಸುರ್ವಾತ್ ಕೆಲಿ.

’ತುಮ್ಕಾಂ ತಿ ಮೆಳ್ಳಿಗಿ?’ ತಿಣೆಂ ಆಕಾಂತುನ್ ವಿಚಾರ್ಲೆಂ.

’ಹಾಂವ್, ವ್ಹಯ್, ತಿ ಆತಾಂ ಗಾಂವಾಂತ್ ಆಯ್ಲ್ಯಾ. ಸುನ್ ಬರೆಂ ಕರ್ನ್ ಪಳೆನಾ ದೆಖುನ್ ಹಾಂಗೆರ್ ತಾಂಗೆರ್ ಮ್ಹಣ್ ದೀಸ್ ಕಾದ್ತಾ. ಮ್ಹಾತಾರ್‍ಯಾ ಆವಯ್ಕ್ ಅಶೆಂ ಘರಾ ಥಾವ್ನ್ ಧಾಂವ್ಡಾಂವ್ಚೆಂ ಮ್ಹಳ್ಯಾರ್ ಆಮ್ಕಾಂ ಕ್ರಿಸ್ತಾಂವಾಂಕ್ ನಾಲಿಸಾಯ್ ನ್ಹಂಯ್‌ಗಿ ಬಾಯೆ’ ಗುರ್ಕಾರಾನ್ ಹಾತ್ ಉದಾರೆ ಕೆಲೆ.

’ತಿ ಖಂಯ್ ಆಮ್ಗೆರ್ ರಾವ್ತಾ. ಹಾಂಗಾಸರ್ ಆಸ್ಲ್ಯಾರ್ ಪುತಾಕ್ ಆನಿ ಮಾಂಯ್ಕ್ ಕೆದಾಳಾ ಪಳೆಲ್ಯಾರ್‌ಯಿ ಲಡಾಯ್‌ಚ್. ತಾಂಚ್ಯಾ ಮದೆಂ ಹಾಂವ್ ಚಪಾತಿಂ ಜಾಲ್ಯಾಂ. ತೊ ನಾಕ್‌ಭರ್ ಪಿಯೆತಾ. ತಿಕಾ ಏಕ್ ಥೆಂಬೊ ಸಯ್ತ್ ದೀನಾ. ತ್ಯಾ ಸೊರ್‍ಯಾ ಖಾತಿರ್ ದೀಸ್ ಮ್ಹಣೊನ್ ನಾ ರಾತ್ ಮ್ಹಣ್ ನಾ ಲಡಾಯ್‌ಚ್ ಲಡಾಯ್. ಘರ್ಚ್ಯಾ ರಾಂದ್ಣಿರ್ ಕಾಂಯ್ ಮೊಡ್ಕಿ ಚಡಾಜೆ ತರ್ ಹಾವೆಂ ಚಾರ್ ಪಾಂಚ್ ಘರ್ಚಿಂ ಆಯ್ದನಾಂ ಧುಯ್ಜೆ. ನಾ ತರ್ ಉಪಾಶಿಂಚ್. ಎಕಾಧಾವೆಳಾರ್ ಮ್ಹಾತಾರೆಕ್ ಏಕ್ ಜೆವಣ್‌ಚ್ ಚುಕ್ಲೆಂ, ಸರ್ಗ್‌ಚ್ ವೊಮ್ತೊ ಪಡ್‌ಲ್ಲೆ ಭಾಶೆನ್ ಆರಾಬಾಯೊ ದಿತಾ. ತಿತ್ಲೆಂಚ್ ಜಾಲ್ಲೆಂ ಜಾಲ್ಯಾರ್ ವ್ಹಡ್ ನ್ಹಂಯ್ ಆಸ್‌ಲ್ಲೆಂ. ಪುಣ್ ಮ್ಹಾತಾರೆಕ್ ವಾಡಿನಾತ್‌ಲ್ಲ್ಯಾಕ್ ಮ್ಹಜ್ಯಾ ಘೊವಾನ್ ಮ್ಹಾಕಾ ಮಾರ್ಚೆಂ ಒಟ್ರಾಶಿ ಮ್ಹಜೆಂ ನಶಿಬ್ ಖೊಟೆಂ. ಬರೊ ಭುರ್ಗೊ ಮ್ಹಣ್ ತಾಚಿ ಜಾತ್‌ಯಿ ಪಳೆನಾಸ್ತಾನಾ ತಾಚ್ಯಾ ಪಾಟ್ಲ್ಯಾನ್ ಧಾಂವೊನ್ ಆಯಿಲ್ಲಿಂ ಪಳೆ. ತಿಮ್ಹಜಿ ಪಯ್ಲಿ ಚೂಕ್. ಪುಣ್ ಹ್ಯಾ ಕಷ್ಟಾಂಕ್ ಕೆದಾಳಾ ಪರಿಹಾರ್ ಮೆಳಾತ್?’

ಸವಾಲ್ (?) ವಿಚಾರ್‍ಲೆಲ್ಯಾ ಆಮ್ಕಾಂಚ್ ಜಾಪಿ ಬದ್ಲಾಕ್ ಸವಾಲ್‌ಚ್ ಪಾಟಿಂ ಮೆಳ್‌ಲ್ಲೆಂ. 

’ತಿಕಾ ಆಸ್ರ್ಯಾಕ್ ಘಾಲ್ಯಾರ್ ಕಶೆಂ’ ಹಾಂವೆಂ ಪರತ್ ಸವಾಲ್ಕೆಲೆಂ. ತಿ ಉಲಯ್ಲಿ ನಾ.

’ಭುರ್ಗ್ಯಾಂನಿ ಆವಯ್ ಬಾಪಾಯ್ಚಿ ತಾಂಚ್ಯಾ ಪ್ರಾಯ್ವಂತ್‌ಪಣಾರ್ ಚಾಕ್ರಿ ಕರಿಜೆ. ತಶೆಂ ಕರಿನಾ ತರ್ ತುಮ್ಚಿಂ ಭುರ್ಗಿಂ’ ಮ್ಹಜೆಂ ಉತರ್ ತಿಕಾ ಅಡೂಕ್ ಜಾಲೆಂ ಜಾಯ್ಜೆ.

’ಸಗ್ಳಿ ಜಿಣಿ ಸವಾಲಾಂಕ್ ಜಾಪಿ ದೀವ್ನ್ಂಚ್ ಪುರೊ ಜಾಲಾಂ. ಆತಾಂ ಮ್ಹಾಕಾಯ್ ಏಕ್ ಸವಾಳ್ ಉದೆತಾ. ಕಿತ್ಯಾಕ್ ಹಾಂವೆಂಯಿ ಆಸ್ರ್ಯಾಕ್ ವಚೊಂಕ್ ನಜೊ?’

ಅರೆ ಮಲಾಮತ್ತಿ! ಸವಾಲಾಂ ವಯ್ರ್ ಸವಾಲಾಂ. ತಕ್ಲಿ ಪಿರ್ಕಿ ಜಾಲಿ.

ಗುರ್ಕಾರಾನ್ "?+?" ಸಾಂಗಾತಾ ಘಾಲ್ಯಾರ್ ಥೊಡೊ ಉಪಾವ್ ಮೆಳಾತ್ ಮ್ಹಣ್ ಚಿಂತುನ್ ಆಯಿಲ್ಲೊ. ಪುಣ್ ಮೆಳ್‌ಲ್ಲಿ ಜಾಪ್ ಮಾತ್ ಪರತ್ ಸವಾಲ್ "?".

"ಕೊಣಾಕ್ ಆಸ್ರ್ಯಾಕ್ ವ್ಹರ್ತಾತ್? ಮ್ಹಾಕಾ?" ರೊಬಿಚಿ ಜೀಬ್ ಸವಾಲ್ ವೊಂಕ್ಚ್ಯಾಕ್ ತ್ರಾಸ್ ಘೆತಾಲಿ.

ಕಥಾ ಪಾನಾಕ್

ಕಥಾಂಕರ್ ಪಾನಾಕ್

ಕಥಾದಾಯ್ಜ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications